Month: December 2018

Raat ke andhere mein tujhe
Subah ka hai intazaar
Zindagi sangeen lagey
Phir bhi hai is se pyaar

Shanti ki talaash mein
Dil hai bekaraar
Guruji ko bula le prem se
Ve sunenge teri pukaar

Teri doobtee naiya ka
Ve lagaayenge beda paar
Guruji ka ashirwaad hai
Teri naiya ki patvaar

Chaahe aayein sainkdon mushkilein
Teri na hogi kabhi haar
Isliye tu ghabrana chod de
Tu aaya hai Guruji ke dwaar

Sunn tu Guruji ki awaaz ko
Ve keh rahein hain baar baar
Guruji ka kehna maan le
Aur apne zameer ko na maar

Zindagi ka kya bharosa
Chhoot jaayein sab rishteydaar
Kisi ka thikaana sthir nahin
Bichad jaatein hain jigri yaar

Tu kaheen bhi hoga
Is baat ke liye rehna taiyaar
Ki jab bhi tu yaad karega
Guruji aayenge har baar

Guruji sabke naath hain
Sabse karein Ve pyaar
Guru bin jeevan adhoora hai
Yahee hai jeevan ka saar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji ke liye jo bhaav hai
Usey dil mein kar le mehsoos
Guruji se sachchaa pyaar karega toh
Tera imaan rahega mehfooz

Logon se tu na darna
Koi galat kaam na karna
Sabne apne karmon ka karzaa
Kabhi toh hai adaa karna

Ghor kalyuga ki bela hai
Laukik aakarshanon ka mela hai
Isliye aur bhi hai zaroori
Ki mitt jaaye atma ki kamzori

Jitni karega tu saadhna
Guruji ke dhyan mein hokar leen
Utna hee shant aur sthir tu hoga
Tu kar le is baat ka yakeen

Guruji tujhe bheetar se saaf karenge
Tujhe galatiyon ke liye maaf karenge
Unkee baaton par tu amal karega
Teri jholi hadd se zyada bharenge

Shikaayat chod kar tu kar Unka shukrana
Unko kabhi kisi bhi haal mein na bisraana
Sotey jaagte tu Guruji ka dhyan lagaana
Tera jeevan bann jaayega sundar ruhaani afsaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sampoornta ki talaash mein
Bhatakte hain hum loag
Jab tak hai jeevan tab tak
Chalta rahega karam bhog

Guruji hamaare chaahein ki
Hum apni ‘mai’ ko tyaag dein
Bahut so liye agyaan ki neend mein
Apne bhaley ke liye ab jaag lein

Shiv Yog mein leen hokar
Advait sthiti ka anubhav kar lein
Apni ‘mai’ ko saadhna dwara chodkar
Apne mein divyata ko bhar lein

Guruji ke dhyan mein apne ko khokar
Unki khushboo se mehkega hamaara har shwaas
Bheetar se shoonya honei se hee
Hamein hoga poorna honei ka ehsaas

Guruji ki dikhaayee raah par chalkar
Atma ko milega sakaaratmak sakaash
Guruji ko sarvsamarpan kar ke
Safal hogi sampoornta ki talaash

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Chhaya hai har taraf
Guruji ka pyaar is kadar
Ki Guruji ke chehre se
Hatt tee nahin nazar

Aankhein khuli hon ya bundd hon
Guruji hee nazar aatey hain
Divya abhamandal se susajjit
Prem se muskuraatey hain

Unkee awaaz sunaayee deti hai
Kaanon mein dheemi dheemi
Mere chehre par aa jaati hai
Ik muskaan bheeni bheeni

Unki bhakti mein ramm kar
Dil gungunaata hai kayee geet
Aksar bayaan karti hoon Unko
Unke liye dil mein basee preet

Kabhi kabhi sapne mein aatey hain
Koi sanket ya hukm lekar
Itna sukh pahunchaatey hain
Apne pyaare darshan dekar

Unka ashirwaad paakar
Mai phooli nahin samaatee
Ab ghabraane ki koi baat nahin
Mai swayam ko yeh samjhaatee

Guruji ko jo ab saump diya hai
Mainey apna jeevan
Pehle se kaheen zyada nishchint
Rehta hai ab yeh mann

Guruji ki sharan mein hoon
Toh jab bhi koi kasht aayega
Apni divya leela se mera Guru
Mujhe sankat se bachaayega

Jin mata pita ne mujhe janam diya
Unhe bhi Guruji ne sambhaala hai
Meri har uljhan ko suljhaakar Guruji ne
Mujhe duvidha se baahar nikaala hai

Guruji hee mere naath hain
Guruji hee mere madadgaar hain
Guruji hee maargdarshak hain mere
Aur Vahee mere parwardigaar hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kitne avgun hain hamaare mein
Guruji ne phir bhi hamein sweekaara hai
Is kalyuga ki bahuroopi bela mein
Guru naam ka hee sachchaa sahaara hai

Ek Guruji hee hain jo
Kar sakte hain udhdhaar hamaara
Tarnaa hamaara sambhav hai
Guruji ki divya shakti ke dwaara

Phir kyun logon ki baaton mein aakar
Hum anuchit raaste par jaayein
Kyun na apne dil ki sunein
Aur Guruji ke kareeb aayein

Sab kuch Guruji ka diya hua hai
Aur kya bhent karein Unhe hum
Apne paap aur apne karam ki poonji
Vahee toh de sakte hain hum

Agar Guruji se karein hum pyaar
Toh apne karmon par dhyan dein
Taaki Guruji hamein moksh ka
Sabse uttam vardaan dein

Aao jaagrit ho jaayein hum sab
Aur neki ka raasta apnaayein
Khud bhi hum khush rehna seekhein
Aur chaaron oar bhi khushi phailaayein

Phir satyuga jald hee aayega
Yeh jeevan sanvar jaayega
Guruji ki kripa se Unka ashirwaad
Ek nayi ruhaani roshni laayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Yeh jeevan hai jeene ke liye
Guru charan ka amrit peene ke liye
Yahaan pal doh pal hee rehna hai
Kuch sunn na hai, kuch kehna hai

Is jeevan mein kabhi aise moad milenge
Jahaan bahut hee sundar phool khilenge
Aur kabhi toh aise pal bhi dikhenge
Jab kashton ke shool milenge

Beintehaa shukrana hai Guruji ka
Ki Unhonei thaama hai haath hamaara
Is chaaon aur dhoop ke chakra mein
Unhonei diya hai Apna sahaara

Jeevan mein kasht toh aate rahenge
Lekin jo insaan dil se Jai Guruji kahenge
Unhe Guruji ke naam se milegi himmat
Aur ve datt kar mushkil ka saamna karenge

Sab kuch jo kar denge Guruji ke havaale
Ve bhakt nishchint ho jaayenge
Kashton ka pahaad lagega tinke jaisa
Aur Guruji ka ashish Ve paayenge

Guru naam ki divya shakti se
Hoga bhakton ka udhdhaar
Trishuldhaari hain Guruji hamaare
Hain Veh hum sabke paalanhaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kalyuga ki daldal mein phansne se
Guruji hee bachaa sakte hain
Lekin apni manmaani karne se
Hum dheeth loag kahaan rukte hain

Guruji ke vachan anmol hain
Guru chetna ka srot hai
Lekin jaagriti kaise ho
Agar neeyat mein hee khot hai ?

Pehle pehle toh furk nahin padega
Kyunki bada yash aur naam ho jaayega
Lekin samay ke saath saath
Apne naam mein hee banda kho jaayega

Phir aayegi gumm ki andheri raat
Aur akelapan chchaa jaayega
Tab Guruji ki aayegi yaad
Apni galati par rona aayega

Achchee neeyat se hee toh
Guruji khush hongei hum se
Phir kyun na hum sudhar jaayein
Aur duur rahein uss gumm se

Isliye niswaarth neeyat se
Karte chalein hum kaam
Sab kuch samarpan karein Guruji ko
Kyunki Vahee toh hain Bhagwaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jitne bhi janam hum le lein Guruji
Aapka shukrana karne ke liye kum hain
Aapko hee buss saump diye hain
Jitne bhi jeevan mein gumm hain

Aap toh hamein janam janmaantar se jaante hain
Hamaari kamiyaan Aap bhali bhanti pehchaante hain
Raaste bhi Aap hee dikhaate hain
Aap hee uss par chalaate hain

Phir bhi agar hum bhatak jaate hain
Toh Aap hamein samjhaate hain
Kabhi pyaar se toh kabhi daant kar
Hamein galati karne se bachaate Hain

Aagey ka nirnaya hamaare haath mein hai
Aapka ashirwaad hamaare saath mein hai
Apne karmon ko kaunsi disha dikhaayein hum
Jeevan ko ujlaa savera ya andheri raat banaayein hum

Jo bhi sanchit karam hain hamaare
Unka poora bhaar bhi hum nahin uthaate hain
Adhiktar karam toh Aap Apne par lekar
Hamaare sab karmon ka bhugtaan karaate hain

Hum itne khushkismat hain ki hamein
Mila Aap jaisa dayaalu bakshanhaar hai
Poore brahmaand mein hoti Aapki Jai jaikaar hai
Guruji, Aapko hamaara vinamr namaskar hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji ke ashirwaad bina
Jeevan bharpuur nahin
Jab hoga chetna ka savera
Veh pal toh duur nahin

Guruji ki sharan mein aane se
Milta hai sudharne ka mauka
Is maukey ko ganvaa kar
Dena nahin khud ko dhokha

Guruji se pavitra rishta jod Kar
Mann mandir ko kar le paawan
Buss dil se yeh vintee kar ki
Guruji ka chhootey na kabhi daaman

Tere kiye huey karmon ko
Guruji kamm kar ke katvaayenge
Jab bhi tu pyaar se bulaayega
Guruji zaroor aayenge

Apni mai ko chod kar
Jab Guruji ke pass tu aayega
Swayam ka astitva khokar
Tu Guruji ko paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 22, 2018

Om Namaha Shivaya
Aaj Ka Suvichaar 🙏🏻🙏🏻 # 307

           Guruji Yaad Dilaate Hain

Chalte chalte zindagi ke safar mein
Kar lein kuch toh achche karam
Paapon ka bojh halkaa kar lein
Nibhaayein insaaniyat ka dharam

Guruji ko maanaa hai naath apna
Toh Unkee baatein maanein
Apni antaratma mein jhaankein
Aur apni kamzoriyaan pehchaanein

Anginat ayb hain hum mein
Kyun na unhein hum sudhaarein
Kyun surf laukik sukh ke liye hee
Hum Guruji ko pukaarein?

Kehte Hain Guruji, “Maango nahin, manno”
Phir bhi hum kahaan suntey hain
Khwaashon kee oon aur laalach kee salayee se
Hum armaanon kee chaadar buntey Hain

Kaam krodh moh lobh ahankar ke
Tamaashe mein ulajh jaate hain
Kalyuga ke gehre daldal mein
Phanste hee chale jaatey hain

Guruji baar baar yaad dilaate Hain
Ki sab kuch karmon ka kissa hai
Jitna Guruji nirdhaarit karein
Utna hee hamaara hissa hai

Guruji kee baat maan lein taaki
Ve hamaari niyati ko likh dein dobara
Udhaar toh pehle hee kar dete Ve
Lekin humne hee na samjhaa ishaara

Pashchyataap mein bhi praayascchit hai
Aao, bhavishya ko sudhaar lein hum
Itna anmol jeevan jo Guruji ne diya hai
Usey achche karmon dwara nikhaar lein hum

🌹🌹🌹🌹🌹🌹🌹

Jai Guruji 🙏🏻🙏🏻
Dhirja