Aaj Ka Suvichaar

December 19, 2025

Om Namaha Shivaya
Aaj Ka Suvichaar 🙏🏻🙏🏻

#2861

                   Apni Marzi Se…

Param poojya Guruvar,

Meri jholi ko bharna Apni marzi se
Na ki meri kee hui arzi se
Mai hoon mandd buddhi, jaanoon na, mera bhala kis mein hai
Kintu Aap toh jaante Hain mera kalyaan jis mein bhi hai.

Aap Hain kalyaankarta, karmon ke phal ke daata
Aap Hain maalik deendayal
Mai jahaan bhi hoti hoon, jis bhi haal mein
Aap sada rakhte Hain mera khayaal
Aur saari kee saari sangat ka hee.

Beshak Aap adrishya hee sahi
Lekin Aap chaahein toh de dete Hain saakshaat darshan
Aap chaahein toh dikh jaate Hain kisee anokhe roop mein kisee bhi kshan
Aapki chhavi, Aapka soumya roop
Aapka noor, Aapka har swaroop
Aapke swapn darshan, Aapki khushboo
In sab se anugrahit hoti rehti hai rooh.

Sunkar satsang mein Aapki mahima ka bakhaan
Jee chaahta hai ki sunti aur karti hee jaaoon Aapki karuna ka gungaan
Meri arzi toh sada hai tuchh
Aapki marzi sada hai sab kuch
Meri mandd buddhi kee shuddhi karte rahiyega, poojya antaryami
Aapse kuch bhi chhipa nahin, mere dayalu swami.

🌹🌹🌹🌹🌹🌹🌹

Jai Guruji 🙏🙏
Dhirja

Apni Marzi Se… (12/19/2025)

December 18, 2025

Om Namaha Shivaya
Aaj Ka Suvichaar 🙏🏻🙏🏻

#2860

                       Divya Pyaar

Param poojya Guruji Maharaj,

Divya pyaar bann kar aaye Aap
Meri zindagi mein
Deedar bann kar chhaaye Aap
Meri bandagi mein
Mujh paapi ko kshama bakshi
Aapki bakhshindagi ne
Jiske kaabil nahin thi vo paaya
Meri sharmindagi ne.

Nimaani mai aur meri har baat
Badi se badi Aapki har daat
Ye khushkismati hai meri
Ki meri oar se beshak hoti hai deri
Phir bhi Aap bin vilamb karte rehte Hain kalyaan
Chaahe mai jaanoon ya na paaoon jaan.

Is samay, is pal mein bhi
Na jaane Aap kis kasht se bachaa rahe Hain
Kyunki Aapko har pal rehti hai meri fikr
Mai beshak karoon ya na karoon apni pareshaaniyon ka zikr.

Pashchaataap aur sharmindagi
Kshama aur shukrana
Aur pyaar pyaar pyaar
Keejiye mera sweekaar
Mujh mein ayb kayi hazaar
Lekin Aap toh Hain kirpadhaar
Kripa karte Hain baar baar
Aapka shukriya karoon baarambaar.

Aapne toh na jaane kab se mujhe hai thaama
Mainey hee is sundar ashirwaad ko nahin thaa pehchaana
Abb soch bhi nahin sakti mai ki kaheen aur hai mujhe jaana
Jaisi bhi hoon, arzi hai ki Apne charnon mein rehne deejiyega mera thikaana.

🌹🌹🌹🌹🌹🌹🌹

Jai Guruji 🙏🙏
Dhirja

Divya Pyaar (12/18/2025)

December 17, 2025

Om Namaha Shivaya
Aaj Ka Suvichaar 🙏🏻🙏🏻

#2859

          Aaj Ya Kal Ye Hoga Zaroor

Apne gireban mein jhaanko
Aur suno bheetar kee awaaz
Vaheen hai Guruji ka vaas
Vaheen hai har vo raaz
Tumhaare jeev se Shiv bann paane ka
Aur safar mein safal ho jaane ka.

Vaheen hai Guruji ke roop mein tumhaari chetna
Vaheen Guruji de rahe Hain tumhe prerna
Har duniyavi farz ko nibhaane kee
Par saath hee bheetar se badhte jaane kee
Guruji ke kareeb
Taaki nikharta jaaye rooh ka naseeb.

Kyunki rooh kee manzil hai Paramatama
Jo Guruji ke roop mein kar rahe Hain tumhaare bheetar vaas
Phir bhi itnee duuri kyun, ye soch karti hogi tumhe udaas
Lekin darasal, tabhi ye bheetar ka safar hai anokha aur khaas.

Keh raha hai tumhaare maathe ka noor
Ki tumhaari rooh mehsoos karegi uss milan ka suroor
Ki ye duuri hogi duur
Aaj ya kal ye hoga zaroor.

🌹🌹🌹🌹🌹🌹🌹

Jai Guruji 🙏🙏
Dhirja

Aaj Ya Kal Ye Hoga Zaroor (12/17/2025)

December 16, 2025

Om Namaha Shivaya
Aaj Ka Suvichaar 🙏🏻🙏🏻

#2858

                Adrishya Nirdeshak

Ye mahapurushon dwaara kaha jaata hai
Aur sunn-ne mein aksar hai aaya
Ki jeevan ke rangg manch kee
Adrishya nirdeshak hai maya.

Sach mein, har insaan ko hee karta hai prabhaavit
Maya ka andekha sa saaya
Atma ko rakhti hai ye Paramatma se duur
Kumm kar deti hai atma ka noor
Unn baadalon kee bhanti
Jo sooraj kee roshni ko chhipa lete hain
Sooraj hai hee nahin
Aisa ehsaas hamein dete hain.

Par viveki purush jaanta hai
Ki baadalon ke peechhe sooraj hai roshan
Buss, yoon hee vivek se dekhna hoga maya ke paar
Tabhi hoga atma ka anukool poshan
Taaki vo Paramatma ke kareeb hoti jaaye
Aur usey apni manzil mil paaye.

Maya hai Maheshwar kee shakti
Aur Guruji swayam Hain SadaShiv
Unkee leela se Shiv se jeev hum baney
Jaise jaise maya ne apne jaal buney.

Maya ke astitva ko lena pehchaan
Jaagriti kee oar hai pehla kadam
Phir Paramatama kee oar chalte rehna hoga
Karte Huey Unka simran, stavan, chintan
Guruji kee hee kripa se tayy hoga ye safar
Jeev se Shiv bann-ne mein hona hoga safal.

Mayapati ka sir par haath rahe
Buddhi vivek ke sangg bahe
Galat aur sahi kee ho pehchaan
Saarthak aur swapn mein fark jaayein jaan
Toh Guruji kee kripa se sampann hogi jeev se Shiv kee dastaan
Aur atma ko Apne mein samaa lenge Param pita mahaan.

🌹🌹🌹🌹🌹🌹🌹

Jai Guruji 🙏🙏
Dhirja

Adrishya Nirdeshak (12/16/2025)

December 15, 2025

Om Namaha Shivaya
Aaj Ka Suvichaar 🙏🏻🙏🏻

#2857

         Guruji Se Pyaar Badhaana

Guruji se pyaar badhaana
Is pyaar ko badhaana rozaana
Bina banaaye koi bahaana
Kyunki ye hai ik aisa khazaana
Jiske sangg jeevan jee paana
Khud mein hai sabse uttam ashirwaad
Jo karega tumhaari rooh ko Guru prasad se aabaad.

Is pyaar mein swaarth na ho
Is pyaar mein tum jaana kho
Is se apne paap lena tum dho
Is se bhakti ka beej lena tum bo.

Isey banaa lo apna swabhaav
Piro do ismein apna bhola bhaav
Jitna hoga tumhe Guruji se pyaar badhaane ka chaav
Uss se kaheen zyada hoga Guruji ka tumhaari oar bahaav.

Kyunki Guruji toh dayanidhaan Hain
Guruji bhakton par meharbaan Hain
Guruji mamta kee khan Hain
Ve toh swayam Bhagwaan Hain.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Se Pyaar Badhaana (12/15/2025)

December 14,2025

Om Namaha Shivaya
Aaj Ka Suvichaar 🙏🏻🙏🏻

#2856

Mera Ateet, Aaj, Aur Aane Wala Kal

Mera ateet, aaj, aur aane wala kal
Mere har janam maran ka har pal
Guruji, Aap sab kuch sakte Hain dekh
Isliye Aapke kamal charnon mein maatha tek
Apni matt ko doon tyaag
Aapki rehmat se bheetar se jaaoon jaag.

Saarthak ko paaoon jaan
Aapke har hukm ko jaan aur maan
Rakhkar usey sir aankhon par
Tayy karoon jeevan kee dagar
Chal kar Aapke nakshe kadam par
Toh hee safal hoga ye safar.

Varna bhatak jaaoongi
Dagmagaa jaaoongi
Aapki kripa bin chal na paaoongi
Raasta dikhaate rahiyega, mere sartaj
Uspar chalaate rahiyega, Maharaj
Hukm dete huey har kadam par…

…Jabb takk paa na loon vo seher
Jo Aap chaahte Hain mujhe dikhaana
Abhi se karoon Aapka shukrana
Aur karti rahoon shukrana har pal
Karte huey Aapke hukm par amal.

Yoon hee safar jaaye beet
Gaate huey shukrana ke geet
Aap baney rahiyega maargdarshak, mere Guru sarkar
Apne saanidhya mein Apni kripa se keejiye mera beda paar
Hai meri vintee bhari pukaar
Kyunki Aapmein hai vo shakti aparampaar
Jo Brahmaand mein kisee aur ke paas na hai, na ho sakti hai kabhi
Isliye toh Aapko Brahmaand ka Shehenshaah kehte hain sabhi.

🌹🌹🌹🌹🌹🌹🌹

Jai Guruji 🙏🙏
Dhirja

Mera Ateet, Aaj, Aur Aane Wala Kal (12/14/2025)

December 13, 2025

Om Namaha Shivaya
Aaj Ka Suvichaar 🙏🏻🙏🏻

#2855

        Shukr Hai, Aapne Pukaara Hai

Guruji paalanhaar
Guruji taaranhaar
Aapse hee ujiyaara hai
Shukr hai, Aapne pukaara hai.

Aapke charnon mein
Mera ye jeevan hai
Guruji, sach kahoon mai.
Jaisa bhi ho jeevan
Chaahe sukh ho ya dukh
Yaheen par jeeyoon maroon mai.
Aapke siwa mera nahin koi kinnaara hai….
Aapse hee ujiyaara hai
Shukr hai, Aapne pukaara hai.

Mai nimaani hoon
Aur mai anjaani hoon
Par Aapki deewaani hoon.
Koi reet na aaye mujhe
Koi geet na aaye mujhe
Aap amrit, mai maylaa paani hoon.
Aapne chhoo kar
Meri is rooh ko nikhaara hai
Aapse hee ujiyaara hai
Shukr hai, Aapne pukaara hai.

Gir rahi thi mai
Mar rahi thi mai
Aur Aapne aa sambhaala.
Khada kiya mujhko
Jeevan diya mujhko
Har kasht mera taalaa.
Aapne hee toh
Mere mann ko bhi sanvaara hai
Aapse hee ujiyaara hai
Shukr hai, Aapne pukaara hai.

🌹🌹🌹🌹🌹🌹🌹

Jai Guruji 🙏🙏
Dhirja

Shukr Hai, Aapne Pukaara Hai (12/13/2025)

December 12, 2025

Om Namaha Shivaya
Aaj Ka Suvichaar 🙏🏻🙏🏻

#2854

   Aapki Duaon Ka Khoobsoorat Asar

Param poojya Guru Sahib,

Jhuka kar apna sir
Aap par apna dhyan dhar
Aapke charnon mein, Aapke dar par
Jaari rahe mera safar
Toh manzil bhi vaheen raasta hoga jahaan
Aapki sharan mein beetegi aagey kee dastaan
Aapke rehem se poora hoga Aapse judey rehne ka armaan
Aapki nadar se chuur chuur hoga mera abhimaan.

Khoobiyan aur vadiyaayiyan Aapki
Gin-na chaahoon toh bhi na gin paaoongi
Itne ehsaan hain Aap meharbaan ke mujhpar
Ki unke karz taley mai dabb kar dhool ho jaaoongi.

Beshak mere kann kann par jamee hai gehri kaalik
Is dhool ko Apne charnon ke taley rehne deejiyega, mere maalik
Zamaane kee aandhi se bachi rahoongi
Jo sehna hoga, vo Aapke kadmon taley hokar sahoongi
Pighal bhi gayi agar kisee tareh, toh vaheen bahoongi
Chuppi mein, ya bol kar, jo kehna hoga, Aapse hee kahoongi.

Iklaute hamdard Hain Aap, mere gareebnawaaz
Aapse chhipa nahin kayenaat ka koi raaz
Toh phir meri toh kya hee hai aukat
Ki Aapse chhup jaaye meri koi baat.

Swayam ko mehsoos karti hoon surakshit
Ki Aap waaqif Hain har baat aur raaz se
Is satya se hai itnee tasalli
Ki Aap sab karte Hain Apni leela aur Apne andaaz se.

Safar mein hoti rahegi jo Aapki nadar
Rakhte chalenge jo Aap mujh nacheez par nazar
Toh jaanti hoon ki jaisa bhi hoga raasta aur har manzar
Mujh par hota rahega Aapki duaon ka khoobsoorat asar.

🌹🌹🌹🌹🌹🌹🌹

Jai Guruji 🙏🙏
Dhirja

Aapki Duaon Ka Khoobsoorat Asar (12/12/2025)

December 11, 2025

Om Namaha Shivaya
Aaj Ka Suvichaar 🙏🏻🙏🏻

#2853

                           Sambandh

Shraddha aur prem ke bhaav se ankurit honei dein apna sambandh
Param poojya Guruji Maharaj ke sangg
Kyunki Guruji hee Hain Jinhonei
Bhare Hain hamaare jeevan mein anokhe rangg.

Guruji se judne se pehle
Yakeenan aisee na thi zindagi
Jabb se ehsaas hua is judaav ka
Tabb se Unkee kripa se nikhar gayi bandagi.

Kitna nirmal anand hota hai na mehsoos
Guruji ko dekhkar Unke har swaroop mein
Aur kitnee prasannata hoti hai unhe
Jinhe Guruji dikhte Hain swapn roop mein.

Kyunki Guruji ke swapn darshan
Guruji kee marzi se hee hain ho sakte
Aur Guruji anya tareekon se bhi
Uddhaar karte nahin Hain thakte.

Guruji ke tareeke hain anokhe aur anginat
Jinse Ve karte Hain bhakton ka kalyaan
Ve hee bakhshte Hain sewa, satsang, aur sumat
Ve hee Apni kripa se karaate Hain Apna simran aur dhyan.

Koi sambandh aisa nahin, jaisa hai Guruji ke sangg
Is sambandh kee pavitrata kabhi na honei paaye bhangg
Guruji kee kripa se nikharta jaaye hamaari insaaniyat aur ruhaaniyat ka rangg
Mann sada Unkee yaad mein rahe malang.

Guruji ko paane ke liye bhaav hota jaaye pehle se zyada prabal
Antakaran Guruji kee daya se hota jaaye pehle se zyada nirmal
Guruji ke charnon mein samarpit ho jaaye rafl aur akal
Toh janam maran ka safar yakeenan ho jaayega safal.

🌹🌹🌹🌹🌹🌹🌹

Jai Guruji 🙏🙏
Dhirja

Sambandh (12/11/2025)

December 10, 2025

Om Namaha Shivaya
Aaj Ka Suvichaar 🙏🏻🙏🏻

#2852

               Bandagi Ka Bandhan

Himmat dene wale Guruji
Taakat dene wale Guruji
Guruji se hee miley bakhshish
Guruji se hee miley ashish
Bakhshte Hain Ve vishwaas
Poshit karte Hain ehsaas
Apne sangg aise apnepann ka
Ki badh jaata hai bal mann ka.

Guruji ka saanidhya, Unka chintan
Unse baatein, Unse bandhan
Utsah badhaane ke liye chahiye nahin kuch aur
Is satya par kiya nahin toh abb zaroor kar lo gaur.

Guruji angg sangg hon toh chaal nahin rukegi
Guruji angg sangg hon toh kismat nahin jhukegi
Kisee aur ke samaksh
Kyunki Guruji denge tumhe bakhsh.

Kab aur kaise, ye Guruji ko hee gyat
Tum bhoolo nahin ki Ve Hain tumhaare saath
Guruji ke saanidhya mein milta rahega dilaasa
Unke chintan se duur hoti rahegi niraasha.

Guruji se baatein kar ke halka hoga mann
Badhta jaayega mann ka sanyam
Sukh dukh kee leheron mein vo sthir rehna seekhega har kshan
Sehej sa swaroop lene lagega tumhaara jeevan.

Guruji ke tareeke samajhna mushkil hai, aye jann
Par Unkee leela yakeenan sanvaarti hai bhakt ka janam maran
Unkee sharan milee hai, ye hai sabse anmol dhan
Bahut adbhut hai Guruji sangg bandagi ka bandhan.

🌹🌹🌹🌹🌹🌹🌹

Jai Guruji 🙏🙏
Dhirja

Bandagi Ka Bandhan (12/10/2025)