Month: January 2019

Jab saari duniya chod de
Toh Guruji tujhe sambhaalein
Uchit samay ke aane par
Tujhe mushkil se nikaalein

Raaz jo Unki leela ke hain
Jaan sakaa na koi
Har pal kaisi chinta mein
Kyun toone neend hai khoi

Chinta na kar, chintan kar
Vajeh na dhoond, buss vandan kar
Tere sochne se kya ho jaayega
Sahi bela aane par tu sab paayega

Waqt ki hera pheri par
Akele na hogi teri jeet
Guruji hain tere maargdarshak
Unse lagaa le saanchi preet

Phir aaye aandhi ya toofaan
Tu Guruji ka kehna maan
Tu sun-ne wala toh bann
Aur ekatrit kar Guru naam ka dhan

Teri andheri raat bhi jagmagaayegi
Guruji ke ashirwaad ke prakash se
Mere Guruji MahaShiv ke avataar hain
Keh de tu dharti aur akash se

Bhakton ki raah ki mushkil ki mayl
Guruji ne Apne amrit se dhoi
Guruji srishti ke paalanhaar hain
Guruji jaisa aur na koi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shareer ka libaas odh kar
Atma dharti par janam leti hai
Har janam mein moksh paane ka
Swayam ko mauka deti hai

Kaam krodh lobh ke chakkar mein
Bhatak jaati hai aksar
Moh aur ahankar mein phanskar
Isey milta na mukti ka avsar

Hindu muslim sikh aur isaayi
Yeh mazhab ki deewaar insaan ne banaayi
Tabhi toh kisi ne bhi nahin paayi
Khuda ki meharbaan khudaai

Kyun na hum apnaayein
Insaaniyat ka dharam
Hamaara har kaaj ho
Ruhaaniyat ka karam

Guruji chaahein ki hum rahein vikaaron se duur
Guruji toh dena chaahein hamein Apna noor
Toh kyun na vikaaron ko hum tyaag dein
Kyun na apni unnati mein hum bhaag lein

Guruji ke sneh se jag ka nazara ho nyara
Har bhakt ho paak aur Guruji ko ho pyara
Phir kya din ka sooraj aur kya raat ka tara
Har pal hee anand se khila rahei sansaar hamaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji se jud gayi hai
Ab toh niyati hamaari
Sankat mochak Guru hamaare
Pyaare Shiv avataari

Unke trishul mein Tridev samaate
Brahma, Vishnu, Mahesh
Sab bhakton ka dhyan Ve rakhein
Mitaayein har tarehn ke kalesh

Guruji hee karte hain jag mein
Rachna, paalan, buraai ka sanhaar
Bhakton ki beemari aur kasht ka
Uthaatey hain Ve bhaar

Swarg lok, Bhu lok, aur paataal lok
Unke hee aadesh se chalta
Beetay samay ke, vartmaan ke, aur Bhavishya ke Ve hain karta dharta

Trishul mein divya urja behti hai
Ati shubh aur saubhagyashaali
Trishuldhaari Guruji taarein jag ko
Unkee leela hai itni niraali

Janam maran ke chakkar se
Guruji hee de sakte hain mukti
Agam agochar MahaShiv hain Ve
Hai Unki bhakti mein shakti

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dein hai sab Guruji ki
Apna toh kuch naahi
Saath bhi kuch leke naiyon jaana
Waqt deta hai gavaahi

Na amar hai jaan, na jahaan
Phir kaahe ka jhagda aur gumaan
Sab mein bastaa hai Bhagwaan
Guruji hain sabke kirpanidhaan

Guruji hain hum sabke andar
Guruji hain karuna ka samundar
Hum ekaant mein hon ya mehfil mein
Guruji sadaa rehte dil mein

Har patte har phool mein
Damru aur trishul mein
Dharti par Ve aur akash mein bhi
Sooraj aur chaand ka prakash Ve hee

Sabke bheetar basey Guruji ko dekh lein
Sab mein basee divyataa ko maatha tek lein
Koshish karein kisi ka kabhi dil na dukhaayein
Satya aur sadbhaav ki raah par chalte jaayein

Guruji humse khush rahein
Is se badi koi baat nahin
Guruji se zyada vishwasneeya
Brahmand mein kisi ka saath nahin

Duniya toh maya ka jaal hai
Is par toh kisi ka zor nahin
Har pal jinhonei sambhaala hai
Ve Guruji hain, koi aur nahin

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aksar manzil ki sudbudh mein kho kar
Raahi raaste par gaur nahin karta
Jo bhi mukaam safar mein aate hain
Unpar veh dhyan nahin dharta

Guruji dikhaayein jeevan ka raasta
Aur Guru milan hai manzil hamaari
Jeevan ki yaatra ke anubhav se seekhna
Yeh hai hamaari zimmedaari

Zindagi ke haseen lamhon ki yaad
Aayiye, dil mein basaate chalein
Khud bhi shukrana mein khush rahein
Aur doojon ko bhi hasaate chalein

Dukh aur kasht jo aaye raaste mein
Toh shukrana ke sangg ardaas karein
Uska kalyaan toh avashya hoga
Jiske mann mein Guruji vaas karein

Kisi bhi kitaab mein milega nahin
Mushkilein hal karne ka upaay
Yeh toh Guru ke vash mein hai
Jo bhakton ko raasta dikhaaye

Zindagi ke har moad par
Apne anubhav se seekhein hum sab
Uss seekh se swayam ko behtar banaayein
Adhyatmik unnati karein hum tab

Guruji ki sharan mein aaye hain
Manzil toh mil hee jaayegi
Raah ka bhi aadar karenge
Toh veh ruhaani rangg dikhaayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye jeevan ka rahasyapoorna raasta
Hamaara ek dooje se vaasta
Khel hai yeh sab karam ka
Aur avsar hai Guruji ke naman ka

Guruji ko toh hum sab
Keede makode ki bhanti nazar aate hain
Phir kyun hum apni yeh aukat bhool kar
Itna gumaan kar ke itraatey hain?

Meher rakhein hamaare maalik hum par
Ki hum kabhi na bhoolein apni aukat
Maati se hum aayein hain aur maati mein mil jaayenge
Maanav jeevan hai kshanbhangur saugat

Is saugat ka karna hai agar sach mein shukrana
Toh hamein Guru shishya ka rishta hai nibhaana
Kya laaye thei yahaan jo saath hai le jaana
Hum sabko yahaan se hona hai ravaana

Guruji toh buss ye chaahein humse
Ki hum jeevan ko rakhein saral
Hameshaan satya aur nyaay ka dein saath
Aur in asoolon par rahein hum atal

Sukh mein bhi aur dukh mein bhi
Karte rahein Unka shukrana
Guruji ne tabb tabb bhi saath hai dena
Jab duniya ne hai thukrana

Maangein nahin hum Guruji se
Unke alaava kuch bhi aur
Unhe maang kar mil jaayegi
Divyataa ki suneheri doar

Guruji arzi hai Aapse ki hamein
Apni sharan mein panaah deejiye
Aapke nakshe kadam par chalein
Hamein is kaabil banaa deejiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kya karenge heere moti dhoondh kar
Pehle apne aap ko toh jaanein
Kya karein doojon ko seekh sikhakar
Pehle khud toh Guruji ka kaha maanein

Apne andar ki khaamiyaan humse behtar koi na jaane
Duniya waalon ke liye chaahe banaa lein hum anek bahaane
Kyun na apne bheetar jhaank kar apne ko sudhaarein
Taaki swayam ke liye toh na rahein hum begaaney

Guruji kahein ki saralta se jeevan jiyein hum
Phir bhi hum uljhanon mein ulajhte jaayein
Toh kaise phir hum ummeed karein
Ki hum Guruji ke kareeb aayein?

Shanti ka raasta shuru hota hai apni antaratma se
Aur khatm bhi hota hain vaheen
Kyunki Guruji hamaari atma ke mandir mein hain
Phir kyun hum Unhe dhoondhein aur kaheen?

Guruji toh mann mandir mein basey hain
Buss hamein shradha se karni hai saadhna
Apni ‘mai’ ko mitaakar hee milenge Bhagwan
Aur tab hee safal hogi hamaari upasana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aprampaar hai leela jinki
Maha Shiv ka Ve hain avataar
Sabki raksha zimmedaari jinki
Ve hain Guruji paalanhaar

Mata ji Surjit Kaur aur Bapuji ka shukrana
Jinhonei diya Shivavataari Guruji ko janam
Hamein Guruji ne apnaaya
Taaki sudhaarein hum apne karam

Ve raah dikhaatey hain sabko
Chalne ka daayitva hamaara hai
Bina Unke aashirwaad ke
Hamaara nahin guzaara hai

Jo Guru apne bhakton ke liye
Itne kasht hai sehta
Jo Guru apne har bachche ke
Angg sangg hai rehta

Uss poojaneeya Parampita ko
Aao sab Pranaam karein
Unki ichchaa ke anusaar
Hum sab achche kaam karein

Ve toh chaahein hamaara kalyaan
Unka Apna swaarth na koi hai
Jab jab bhakton par aaye dukh
Toh Guruji ki aankhein roin hain

Itne pyaare Guruvar ko
Hum na karein niraash
Aao hum aise hum bann jaayein
Ki Guruji kahein humse, ‘Shabash’

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sadak chaahe kitni lambi kyun na ho
Tujhe manzil milegi zaroor
Raaste mein phoolon ke sangg kaante bhi milenge
Yahee hai zindagi ka dastoor

Jo aaj tere sangg hain
Ve kab muh moad lein kaun jaane
Teri himmat dekh ke jo dangg hain
Ve shaayad Guruji ko na pehchaanein

Guruji naam hai uss shakti ka
Jisme aseem urja samaayee hai
Guruji naam hai uss daulat ka
Jo virlon ne paayee hai

Guruji se kuch bhi chhupa nahin
Ve toh sach mein sab kuch jaante hain
Unhe is baat ka gyan bhi hai
Ki kaunse bhakt Unki baat maante hain

Guruji pe kar vishwaas tu
Haunsla rakh barkaraar
Museebaton ko dekh kar
Tu himmat na haar

Guruji ke naam ki jyot tu dil mein jalaa ke chal
Vahee teri har museebat ka nikaalenge hal
Dekhte hee dekhte tere kasht jaayenge tal
Guru ki vadiaayi tu jaanega aaj nahin toh kal

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji ka tu kar le dhyan
Kyun samay ko vyarth ganvaay
Aur kisi ne tere kaam na aana
Keval Guruji hee sadaa sahaay

Apni antaratma ko lagaa le saadhna mein
Aur kar le Guruji ka tu vandan
Guruji ke naam ko apne dil mein samaa le
Jaise chandan ki lakdi mein chandan

Niklega jab Guru naam ke baan se
Yeh atma roopi teer
Chhoo lega divya jyoti ke lakshya ko
Toh teri sanvar jaayegi taqdeer

Divya jyoti ke spandan se
Har ruhaani tamanna hogi poori
Guruji ki is dein se teri
Koi chaahat na rahegi adhoori

Guruji mein ramm kar tera mann
Guruji ki dhun mein kho jaayega
Tujhe praapt hoga Guru prem ka dhan
Tera sach mein kalyaan ho jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja