Month: January 2019

Kya karenge hum snaan kar ke
Agar bhaav ho maylaa hamaara
Agyan ke saagar mein dolegi naiya
Toh kaise milega usey gyan ka kinaara

Satya ka dhol bajaakar hum
Jhooth ka saath dein agar
Yeh kyun bhool jaatein hain
Ki Guruji ki hai hum sab par nazar

Saral hai bhaasha Guruji ki
Agar hum isey samajhna chaahein
Khud jeeyein doojon ko jeene dein
Pyaar se ujjwal hon hamaari raahein

Shiv Yog sikhaatey hain Guruji hamaare
Jisme bhaav hee sabse zaroori hai
Phir kyun bekaar ke vehmon se
Humne bhar lee dil ki tijori hai

Isme koi sanshay nahin
Ki Guruji toh Bhagwaan hain
Yeh baat bhi nishchit hai
Ki Guruji bahut dayawaan hain

Itni madad karte hain hamaari
Hamaare karmon ko katwaane mein
Bhakt par jab bhi vipda aaye
Guruji vilambh na karte aane mein

Guruji kahein ki Banda bann
Aur maang nahin, sirf maan
Aayiye Guruji ke hukm ka
Hum sab karein sammaan

Zindagi mein paise aur rishtey
Ye aayenge aur jaayenge
Jinka thaama hai Guruji ne haath
Ve bhakt santosh paayenge

Hamaare naseeb achche hain ki hamein
Mila hai Guru naam ka gehna
Har kshan yaad rakhein hum
Pyaare Guruji ko shukrana kehna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jaise meethe phal ko khaa kar
Hota hai uski mithaas ka ehsaas
Vaise hee Guruji ke naam ke amrit se
Bujha lo apni ruhaani aas ki pyaas

Guruji se prem hee Unki pooja hai
Guruji ke alaava na hamaara koi dooja hai
Unki leela toh bejaan ko de de naya jeevan
Unki saadhna mein leen hokar magan ho jaaye yeh mann

Unhe kuch nahin chahiye humse
Ve dekhein hamaara bhaav
Hamein chot se bachaate huey
Ve lete hain swayam par ghaav

Aasmaan ke sitaaron se bhi zyada
Guruji ki rehmatein hain hum par
Hamaari toh saansein bhi chal rahi hain
Sach mein Guruji ke hee damm par

Har haal mein khush rehna seekhein
Toh veh hoga Guruji ka shukrana
Varna toh udaas honei ke liye
Mil hee jaayega koi na koi bahaana

Jeevan safal hua hai hamaara
Guruji ne thaama hai jo haath
Buss Guruji se paa lein hum
Janam janam ka saath

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Is duniya ka kya hai bharosa
Isne toh badalte hee jaana hai
Aaj yahaan, toh kal vahaan
Na kaheen kisi ka thikaana hai

Har pal sirf ek hee pal mein
Bann jaata hai itihaas
Har pal se kuch seekhne ka
Aao kar lein prayaas

Guruji ki vadiaayi ko hum jaanein
Guruji ki baat ko hum maanein
Ek bhi pal hum kyun ganvaayein
Aao, sewa aur simran mein lag jaayein

Jeevan ka jharna toh behta rahega
Is tarangi safar mein dil kya kya sahega
Dharti ka mausam badalta rahega
Waqt ka paiya bhi chalta rahega

Guruji mein apna dhyan dharenge jo sadaa
Unhe na sataayegi jag ki bewafaa adaa
Ve sandhi kar lenge har sangharsh se
Aur Guruji ka hukm sweekarenge harsh se

Phir raasta khud bakhud hee khul jaayega
Har paap praayashchit se dhul jaayega
Guruji ki kripa ka itna pyaara hoga asar
Ki Guru milan se mehekega zindagi aur maut ka safar

Jai Guruji 🙏🏻🙏🏻
Dhirja

Raaste mein chaahey aayein mushkilein hazaar
Keh dein unse hum ki hamaare Guruji hain paalanhaar
Buss, Guruji ka naam lete huey hum
Is jag mein chalte chalein chalte chalein

Baksh dein Ve hamaare gunaahon ko
Ujjwal kardein Ve hamaari raahon ko
Buss, Guruji ka naam lete huey hum
Is jag mein chalte chalein chalte chalein

Doojon mein galatiyan dhoondhne se pehle
Yeh dil khud ko sambhalne ke liye kehle
Buss, Guruji ka naam lete huey hum
Is jag mein chalte chalein chalte chalein

Unke simran se yeh mann sukh paata rahey
Sewa aur satsang se dil ka dukh jaata rahey
Buss, Guruji ka naam lete huey hum
Is jag mein chalte chalein chaltey chalein

Kaam, krodh, jhooth se duur rahein aur thaamein haath sachchaayee ka
Lobh, moh, ahankaar ko tyaagein aur saath dein achchaayee ka
Buss, Guruji ka naam lete huey hum
Is jag mein chalte chalein chaltey chalein

Koi poochche agar ki hamaara ghar hai kahaan
Toh keh dein ki Guruji ka dar hai jahaan
Buss, Guruji ka naam lete huey hum
Is jag mein chalte chalein chaltey chalein

Unki bhakti aur pyaar mein ho jaaye aisi dashaa
Ki hum par chhaa jaaye ruhaaniyat ka nashaa
Buss, Guruji ka naam lete huey hum
Is jag mein chalte chalein chaltey chalein

Jab jaane ki bela aaye toh Unki sharan mein panaah paayein
Duniya ko alvida kehte huey Unke charnon mein samaa jaayein
Buss, Guruji ka naam lete huey hum
Is jag se chalte chalein chaltey chalein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guru bhakt ki tapasya ko karey vifal
Kisi bhi saansaarik shakti mein nahin hai itna bal
Buss tere dridh honei ki der hai
Guruji ki tujhpar hameshaan meher hai

Indradhanush ka astitva jis tarehn
Hota hai saat rangon se hee
Jeevan ko sampoorna banaane ke liye
Tu sewa simran satsang mein jee

Guruji ko kar poorna samarpan tu har pal
Aasmaan mein tehelte baadal sa tu chalta chal
Chaahe aaye kalyuga ki aandhi ya toofaan
Tu na bhatakne de apna dhyan

Ye laukik sukh, ye aishon aaraam
Chaahe mil jaayein subah aur shaam
Phir bhi jab takk na lo Guruji ka naam
Ruhaani jeevan toh hai bilkul bejaan

Pyaar aur shradha se agar seenchey koi
Toh veeraane mein bhi phool khilta hai
Bin maange hee unhe sab milta hai isliye
Khushnaseeb hain ve jinhe Rab milta hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji se yeh jaan hai Guruji se jahaan
Guruji ne sanvaari hai jeevan ki dastaan
Guruji jaisa aur nahin koi meharbaan
Guruji se hee hai yeh zameen asmaan

Guruji hamein jaante hain kitne janam se
Hum andaaza nahin lagaa sakte hain kasam se
Unhe pyaar hai shanti se aur aman se
Unka hukm bada hai har reet aur har rasam se

Raat ka andhera ho ya din ki kadak dhoop
Kabhi saakshat darshan toh kabhi Unka swaroop
Guruji bachaane aayein lekar anek roop
Bhakton ko Guruji laad ladaayein khoob

Buss, Unki baat maante chalein
Chaaron oar pyaar baant-te chalein
Khud bhi jeeyein doojon ko bhi jeene dein
Sabhi ko Guru charan ka amrit peene dein

Guruji ki razaa mein raazi hain jo
Aur jo Unki agya ka paalan karte jaayein
Guruji unn bhakton ki jholi
Apne ashirwaad se bharte jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Hamaari zindagi ke darwaaze par
Kayee loag dastak dete hain
Kuch bheetar aakar samaa jaate hain
Kuch alvidaa keh dete hain

Yeh bhi toh karmon ka hee khel hai
Isme na koi paas hai na koi fail hai
Hum sab hee karmon ke maare hain
Tabhi toh aaye Guruji ke dwaare hain

Guruji apne bhakton ka rakhein bahut dhyan
Raksha karein hamaari karmon ke sangharsh ke dauraan
Adhiktar karam hamaare Ve Apne par le lete
Hamaare karmon ko hamein kumm kar ke hain dete

Kyun atma ko svatantrataa ke anubhav se rakhein vanchit
Kyun karein hum jeevan mein karmon ko sanchit
Kyun na apni taraf se haath thaamein sachchaayi ka
Kyun na daaman pakdein hum achchaayi ka

Guruji dekhtein hain hamaari neeyat
Isliye kyun na nek rakhein hum iraada
Yeh toh nishchit hai ki dayalu Guruji
Hamaari madad karenge zyada se zyada

Guruji hamein neembu ke jaise nichodenge
Hamaari antaratma ko jhinjhodenge
Lekin Ve zaroor sunenge hamaari fariyaad
Janam maran ke chakravyu se karenge hamein azad

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Rooh se nikalti hai awaaz
Dil ki taar se bajta hai saaz
Guruji ka itna pyaara hai andaaz
Na jaane kya hai iska raaz

Unki divya khushboo, kabhi gulab kabhi chandan
Unka swapn mein aana, Unka divya komal spandan
Kabhi lagte Ve Sai, kabhi lagte Raghunandan
Har roop mein jag karta Unka vandan

Sneh Guruji ka aisa ki aankhein namm ho jaayein
Leela Unki aisi ki sabke dukh kumm ho jaayein
Khushiyaan aise aayein ki sab gumm kho jaayein
Karuna Unki aisi ki shukrguzaar hum ho jaayein

Baahar se pehle bheetar se hamein saaf karein
Hamaare gunah baksh kar Ve hamein maaf karein
Hamaare kasht Apne par lekar hamaare dukh harein
Hamaari zindagi ke liye Ve maut se bhi ladein

Guruji hamaare hain itne mahaan
Is sach se na raha koi bhi anjaan
Ik din jaan jaayega sara jahaan
Guruji hamaare hain sab par meharbaan

Unse kuch maangne ki nahin zaroorat
Unpar na chale kisi ki hukoomat
Ve hee ujala hain sooraj aur chand ke
Ve toh shehenshaah hain Brahmand ke

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guru naam hai sabse mahaan
Guru naam hai har samasya ka samaadhaan
Guru naam se milta hai jahaan
Guru naam se tar jaata hai insaan

Guru naam sab simrein kaash
Guru naam se timir mein ho prakash
Guru naam se phailey sowmya sakaash
Guru naam se goonjey dharti akash

Guru naam se jeevan mein ho sudhaar
Guru naam se atma ka ho udhdhaar
Guru naam se Guruji sunein pukaar
Guru naam se khulein kismat ke dwaar

Guru naam se hota hai beda paar
Guru naam bina hain hum laachaar
Guru naam hee jeevan ka aadhaar
Guru naam se hee chalta hai sansaar

Guru naam ko japte chale jaao
Guru naam ki dil mein jyot jalaao
Guru naam se divya dhan kamaao
Guru naam se nirmal anand paao

Guru naam se duur karo andhera
Guru naam se kar lo jeevan mein savera
Guru naam ka kar lo dil mein baseraa
Guru naam se kalyaan ho tera aur mera

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aye mannva tu pareshaan na hona
Tere Guruji tere saath mein hain
Kabhi bhi tu dheeraj na khona
Tera haath Guruji ke haath mein hai

Jab bhi tere saamne duvidha aayegi
Guruji dikhaayenge tujhe raasta
Isliye tu niraash na hona
Tujhe hai teri bhakti ka vaasta

Jab kabhi andhere se ghir jaayega tu
Guruji jalaayenge gyan ki roshni ke diye
Isliye tu udaas na hona
Guruji sab kuch karenge tere liye

Aye mannva tu pareshaan na hona
Tere Guruji ne tujhe apnaaya hai
Tere koi karam toh achche rahei hongei
Jo toone Guruji ko paaya hai

Agar tu karne lagega koi galat kaam
Guruji chetaavani denge tujhe
Tere uddhaar ke liye har janam mein
Guruji sharan mein lenge tujhe

Jab bhi tu Unhe yaad karega
Guruji daude chalein aayenge
Bannkar tera suraksha kavach
Teri mushkil ko duur bhagaayenge

Aye mannva tu pareshaan na hona
Jab Guruji neembu ke jaise nichod denge
Kyunki teri jaan bachaane ke liye
Ve Yamraj ki bhi baahein marod denge

Jab bhi tu bhatakne lagega
Guruji tujhe sewa simran satsang ki yaad dilaayenge
Tu kar dega Unhe poorna samarpan
Toh Guruji tujhe mamta ka amrit pilaayenge

Jab sataaye tujhe agley pal ki soch
Guruji chinta duur bhagaayenge
Isliye tu anand le zindagi ke safar ka
Guruji manzil takk pahunchaayenge

Aye mannva tu pareshaan na hona
Tere Guruji tere paalanhaar hain
Har saans mein kar shukrana Unka
Ve tere murshid aur parwardigaar hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja