Month: March 2019

March 21, 2018

Om Namaha Shivaya
Aaj Ka Suvichaar🙏🏻🙏🏻 # 31

           Aisa Pal Zaroor Aayega

Guruji ka har bhakt se ik adbhut pyaara naata hai
Ek baar tum vishwaas karo toh jeevan sanvar jaata hai
Har mushkil lagne lagti hai aasaan
Guruji hain Bhagwaanon ke Bhagwaan

Mere dil mein mera Guru hai bastaa
Khush mujhe dekh kar Veh bhi hastaa
Hamaari aankhon ke aansoon Unhey bhi rulaa dete
Har takleef mein hum Unhei hain bulaa lete

Guruji ke gyan ki gehraayi ka
Hum andaaza bhi nahin lagaa sakte
Ab toh Unhi ka bann kar rehna hai
Is ehsaas ko aur nahin dabaa sakte

Yahee ehsaas hamein Unke kareeb laayega
Unka har bhakt khushnaseeb kehlaayega
Tere chehre par Guruji ka noor chhaayega
Aye bande aisa pal ek din zaroor aayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 21, 2019
Thurs

Om Namaha Shivaya
Aaj Ka Suvichaar 🙏🏻🙏🏻 # 396

             Rangon Ka Tyohaar

Guruji kee pyaari Sangat ko
Holi kee haardik shubhkanaayein
Aayiye hum sabb mil kar
Yeh rangon ka tyohaar manaayein

Phoolon se aur rangon se toh
Sabb hee khel lete hain Holi
Guruji ne hamein diye hain aur bhi rangg
Toh aao, bhar lein hum apni jholi

Guruji ne pradaan kiya hai
Hamein rangg shakti ka
Is shakti ke rangg mein mila lein
Aao rangg bhakti ka

Mann ko swachh kar lein hum
Taaki uss par pavitrata ka rangg chadh jaaye
Hamaare dil ke upvan mein aaye nidartaa
Aur bhayy ka har patta jhad jaaye

Madhurtaa ka rangg chhaaye vyavhaar par
Sabko khoob anand aaye is tyohaar par
Sehensheelta aur saboori ka rangg chadh jaaye gehra
Aur jeevan mein sukh paayein pehen kar khushi ka sehra

Shradha ka rangg barse shanti ke rangg ke saath
Prem ke pakke rangg se rangg jaayein sabke haath
Sabke dil mein jeene kee chaahat aur umang ho
Sabke mann mein asha aur ummeed kee tarang ho

In sabb rangon ka gehra rangg kabhi na chhootey
Guruji ke sangg yeh anmol rishta jud ke phir kabhi na tootey
Is rangeele tyohaar par hum sab sadaa ke liye Guruji ke ho jaayein
Guruji ke pyaar mein swayam ko rangg kar
Guruji mein kho jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 20, 2018

Om Namaha Shivaya
Aaj Ka Suvichaar 🙏🏻🙏🏻 # 30

                     Nirmal Naata

Yaad aati hai tumhaari jabb bhi Guruvar
Tumhe usee pal saath apne paati hoon
Tum bante ho chhaon dene vaale taruar
Jab jagg ki bhaag daud se thakk jaati hoon

Tumhaare aanchal mein itni mamta hai
Ki alfaazon mein bayaan na ho paaye
Tumhaari shakti mein itni kshamtaa hai
Ki doobti naiya ko kinara mil jaaye

Tumhee ho pitaa mere aur tumhi ho mata
Sach mein hamaara bada nirmal hai nata
Yeh naata hee ab zindagi ka aadhaar hai
Tumse hee, Guruji, yeh saara sansaar hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 20, 2019
Wed

Om Namaha Shivaya
Aaj Ka Suvichaar 🙏🏻🙏🏻 # 395

                Guruji Ka Sahara

Raat ke andhere se kab talak darega
Haalaat se akele tu kab talak ladega
De de apna haath Guruji ke haath mein
Har kadam par hongei Ve tere saath mein

Unhee se tujhe kasht jhelne kee shakti milegi
Unhee kee pooja mein tujhe bhakti milegi
Unhee ko saadh kar tujhe tripti milegi
Unhee kee baat maankar tujhe mukti milegi

Guruji hee hain jo tujhe samjhenge har pal
Vahee pradaan karenge tujhe atma-bal
Guruji shaant sarovar hain kalyuga hai dal dal
Zamaane ke vish mein Guruji hain amrit roopi jal

Unhee ko samarpan kar milega dil ko chayn
Unhee kee chhavi se tu ujjwal kar apne nayn
Ve tere sangg hain chaahe din ho ya rayn
Unhee kee kripa se jeevit hum sab hain

Guruji ka kehna maan, na maan koi bhi vehem
Har chinta ka kar utsaah kee agni mein dahan
Guruji ke naam ka raksha kavach tu le pehen
Har dukh ko phir tu kar paayega sehen

Doobne lagega toh bachaayenge Guruji
Tere jeevan mein sukoon laayenge Guruji
Teri khoyee hui hasee lautaayenge Guruji
Muskuraayega tu toh muskuraayenge Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 19, 2018

Om Namaha Shivaya
Aaj Ka Suvichaar 🙏🏻🙏🏻 #29

       Sampoorna Srishti Ke Samraat

Pyaare Guruji,

Samraat ho Aap sampoorna srishti ke
Taar dete ho Apni ek hee drishti se
Aapne jab se Apni sharan mein liya hai
Sangat ko itna sabr aur sahaara diya hai

Hum sab swaarthi, buzdil, aur paapi hain
Aap sarvagyani aur sarvavyaapi hain
Aap hee kripa kar udhdhaar kijiye hamaara
Ab takk na jaane kaise kiya humnei guzaaraa

Ab toh hamaari praan shakti bhi Aap
Mitaa do hamaare dukh aur santaap
Mann mein jab se Aapki jyot jal gayi
Zindagi tabb se sach mein safal ho gayee

🌹🌹🌹🌹🌹🌹🌹

Jai Guruji🙏🏻🙏🏻
Dhirja

March 19, 2019
Tue

Om Namaha Shivaya
Aaj Ka Suvichaar 🙏🏻🙏🏻 # 394

         Kar Lein Guruji Par Aitbaar

Akele hain aaye akele chale jaana hai
Duniya waalon ka saath toh ik bahana hai
Mithya aur maya hain ye laukik bandhan
Sach toh hai keval Ishwar ka vandan

Sansaar kee baaton se
Kyun vichlit hotei hain hum
Haalaat burey ho jaayein toh
Behaal kyun hotei hain hum

MahaShiv ke avataar aaye
Dharti par hamaare vaaste
Apni kripa se Unhonei
Ujjwal kiye hamaare raaste

Guruji hamaare karmon ke ilaaj ka raasta dikhaa rahei hain
Guruji hamein achchaa insaan bann-ne ka saleeka sikha rahei hain
Raasta dekhkar bhi uspar na chalein toh phir galati hamaari hee hai
Seekh lekar bhi bande na baney agar toh bewakoofi hamaari hee hai

Na rakhein koi shart
Aur na maanein koi mannat
Guruji ke charnon mein
Hamei toh mil jaayegi jannat

Kalyuga kee badi tez hai raftaar
Kyun maanav jeevan mein phanse baar baar
Guruji par kar lein hum poora aitbaar
Vahee karaayenge hamaara beda paar

Apne mann ko jhoothi bediyon se azaad karein
Har kadam par Guruji ko yaad karein
Pyaare Guruvar, hamein kabhi na thukrana
Hamaari har saans mein ho Aapke liye shukrana hee shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 18, 2018

Om Namaha Shivaya
Aaj Ka Suvichaar

              Ardhnaarishwar MahaShiv

ShivShakti ka madhur milan
Ardhnaarishwar bann ke aaya
MahaShiv ka avataar bann kar
Mera Guru is jagg mein aaya
Chaaron oar Unki karuna ka
Yash hai jagg mein chhaya

Navratron ke shubh avsar par
Aao Unhein poojein milkar
Sab aayein apni dua lekar
Sheesh nivaaein Unke dar par

Sunte hain hamaare dil ki pukaar
Rehmatein sab par karte baar baar
Unko sab samarpan kardo ek baar
Dekho jeevan mein aa jaayegi bahaar

Sangat ko navratron ke shubh avsar par haardik shubhkaamanaayein

Jai Guruji
Dhirja

March 18, 2019

Om Namaha Shivaya
Aaj Ka Suvichaar 🙏🏻🙏🏻

             Koti Koti Namaskar

Badi ummeed se aayee hoon
Guruji Aapke dwaare
Asha hai meri kee mera Guru
Mujh naacheez ka jeevan sanvaare

Kayee janmon se bhatak rahee hoon
Shukr hai Aapne nigaahe rehmat mujhpar hai daali
Apne paap aur karmon se
Sajaayee mainey guzaarish kee arti kee thali

Paap kitne kiye hain mainey
Aapse behtar kaun jaane
Har janam ka hisaab hai Aapke paas
Kisi baat se na hain Aap anjaane

Chaah hai sudharne kee
Ashirwaad mil jaaye buss Aapka
Aur koi sangg chaley ya na chaley
Saath chahiye buss Aapka

Vishwaas aur prem kee jyot jalaakar
Karti hoon Aapko pranaam
Aapki karuna ho jaaye
Toh bann jaayein bigde kaam

Zindagi dee hai Aapne
Aur achchaa swaasthya hai baksha
Karmon anusaar dhan diya Aapne
Hameshaan kee hai meri raksha

Buddhi aisee deejiye Guruji
Kee antaratma jaagrit ho jaaye
Thaam leejiye mujhe aise
Ki mera beda paar ho paaye

Aapki kripa se apnaaoon mai
Shubh aur shudh sanskaar
Aapke charnon mein sees jhukaakar
Karoon mai koti koti namaskaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 17, 2018

Om Namaha Shivaya
Aaj Ka Suvichaar

              Jeevan Isee Ka Naam Hai

Bade bhaag ki manushya tann paya
Bin Guru ke vyarth yoon ganvaaya
Ab Jo Guruji ki sharan mein tu aaya
Apna keemti waqt na kar tu zaaya

Guzaar le zindagi ke chaar din
Haste huey aur hansaate huey
Zarooratmandon ki madad kar
Apni ‘mai’ ko bhulaate huey

Is kalyuga ke zamaane mein
Apne liye jeena aasaan hai
Kaam aaye jo kisi aur ke
Jeevan isee ka naam hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 17, 2019

Om Namaha Shivaya
Aaj Ka Suvichaar 🙏🏻🙏🏻

                    Taral Taraana

Guruji ka pyaar deta hai himmat
Jo bann jaati hai bhakt kee taakat
Jee jaan se kee gayee ibadat
Kartee hai is anmol rishte kee hifaazat

Jabb Guruji thaam lete hain bhakt ka haath
Phir Ve kabhi nahin chodte Apne bhakt ka saath
Bhakt chaahe Guruji ko bhool jaaye
Guruji kee kripa uss par barasti jaaye

Jisne Guruji par sab kuch chod diya
Jisne Guruji se rishta jod liya
Uske jeevan mein hoga sudhaar
Aur uska yakeenan hoga uddhaar

Jabb bhi bhakt simre Unka naam
Guruji ko mil jaata hai paigaam
Jisme ho niswaarth bhakti, sewa, aur pyaar
Aise bhakton ko Guruji dete hain nikhaar

Jo Guruji kee sharan mein aayega
Usey bin maange sab mil jaayega
Khoyega jo apni ‘mai’, veh Guruji ko paayega
Guru prem hee dil mein shanti laayega

Jabb meetha laage Guruji ka bhana
Phir aur kaheen kisliye hai jaana
Guruji sangg jod doh zindagi ka afsaana
Bann-ne doh jeevan ko ek taral taraana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 16, 2018

Om Namaha Shivaya
Aaj Ka Suvichaar

            Sabse Bada Imtehaan

Jeevan kee adbhut maya hai
Kaheen dhoop kaheen chhaaya hai
Kuchh khoya kuchh paaya hai
Jo bhi is jagg mein aaya hai

Khali haath aaye jagg mein
Khali haath chale jaana hai
Jis mitti ke banein hain usi mein
Sabne ek din samaa jaana hai

Guruji jis haal mein rakhein
Vaise hee rehna hamaara kaam hai
Unki razaa mein rehna raazi
Yahee sabse bada imtehaan hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 16, 2019

Om Namaha Shivaya
Aaj Ka Suvichaar 🙏🏻🙏🏻

                 Neevaan Bann

Guruji kehte hain, ‘Neevaan bann’
Aur karta chal Unka shukrana
Jaise bhi chal raha ho jeevan
Guruji ko kabhi na bisraana

Sach mein insaan hai kitna naadaan
Khwaahish hai chhoone kee aasmaan
Magar choda na jaaye jhootha abhimaan
Toh phir kaise madad karenge Bhagwaan

Jitna oopar ugnaa hai vriksh ko
Utnee hee gehraayee mein veh jadein phailaaye
Tabhi toh phir seenche jaane par
Veh vriksh phool aur phal upjaaye

Agar oonchaayee chhoone kee hai chaahat
Bheetar kee gehraayee mein jhaankna hoga
Apne andar ke krodh aur ahankaar ko
Swayam hee tokna aur daantna hoga

Guruji ka kehna maankar
Shukrguzaar sadaa rahein hum
Shukrana se hee har lamhe ko jee lein
Chaahe zyada miley ya kumm

Guruji ke bataaye maarg par chalkar
Apnaayein neevenpan ka sanskaar
Atmasaat karein saralta ka vyavhaar
Maalik ka shukrana karein baarambaar

Isee se hamaari atma kee jadein
Hongee aur bhi divya aur shaktishaali
Jeevan mein mann ke vichaar hongei uttam
Aur saralta se nikhar jaayegi ped kee har daalee

Guruji ko shradha se dhyaayein
Unke vachanon par karein amal
Toh jeevan ke vriksh kee bhujaayein
Upjaayein anek phool aur phal

Sach mein hum vriksh se seekhein
Aur hum mein aisa sudhaar ho paaye
Ki pyaare Guruji ko yeh parivartan dekh kar
Apne har bachche par naaz ho jaaye

🌹🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 15, 2018

Om Namaha Shivaya
Aaj Ka Suvichaar

             Zindagi Ek Naatak

Zindagi ke is ajab se naatak mein
Munch par aati hai sabki baari
Jeevan maran ko samajhne ki koshish mein
Haar chuki hai abb duniya saari

Jabb tann se niklein praan
Guruji hee hamein lein thaam
Zindagi kabhi laut ke na aayegi
Haseen yaad bann ke reh jaayegi

Zamana shaayad zikr karega hamaari baaton ka
Reh jaayega sirf khazana hamaari yaadon ka
Pyaar se sajaao yeh zindagi ka raasta
Tumhe insaaniyat aur shanti ka vaasta

Jai Guruji
Dhirja

March 15, 2019

Om Namaha Shivaya
Aaj Ka Suvichaar 🙏🏻🙏🏻

          Guruji Kee Mehere Nazar

Guruji ke khayaalon kee masti mein
Mai magn hokar chalti gayee
Guruji kee mehere nazar se
Mere dukh kee shaam dhaltee gayee

Museebatein aatee gayeen
Unka ka toh kaam hai aana
Unka samaadhaan kiya Guruji ne
Aur kiya mere jeevan se ravaana

Dhokha jabb jabb diya duniya ne
Guruji ne mujhe tootne se bachaaya
Mera maansik santulan banaa rahey
Mujhe aisa ruhaani raasta dikhaaya

Meri kamzoriyan sudhar jaayein
Guruji ne bakshee aisi buddhi
Aaspaas kee nakaari baaton se na ho dil ashaant
Guruji ne kar dee aisi shuddhi

Jin raahon mein niraasha ka ghor andhera thaa
Guruji ne sainkdon asha ke diye jalaa diye vahaan
Soch kee dhaara mein Apne prem ka Amrit daala
Koi bhi anuchit vichaar aaye jabb aur jahaan

Guruvar Aapse hai yeh fariyaad
Ki jaise Aapne aaj takk hai sambhaala
Aagey bhi sambhaaliyega Guruji
Aapke siwa na hamaara hai koi bhi rakhwala

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 14, 2018

Om Namaha Shivaya
Aaj Ka Suvichaar 🙏🏻🙏🏻

        Dhanya Jeevan Ka Saral Tareeka

Simran mein thoda toh samay guzaar
Kaam toh hameshaan hongei hazaar
Achche karam kar, sach par amal kar
Krodh moh lobh se rehna sambhalkar

Irshya kabhi bhi mann mein na laana
Sewa karne ka vaadaa sadaa nibhaana
Anmol hai satsang ki veh ghadee
Jismein dil ki taar Guruji se judee

Gurbani ke meethe bol ka kar shravan
Guruji ka hee kar tu dhyan aur manan
Jeevan tera dhanya ho jaayega
Guru naam ka khazana tu paayega

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

March 14, 2019

Om Namaha Shivaya
Aaj Ka Suvichaar 🙏🏻🙏🏻

                 Rehmat Ka Amrit

Guruji kee rehmat ka amrit
Milta hai bade naseeb se
Kaun jaane kisne dekha hai
Maut ko kitne kareeb se

Laukik dhan toh nashvar hai, aaj hai toh kal nahin
Hum samay ke vash mein hain, hamaare haath mein ek bhi pal nahin
Karein hum sthir aur prem-mayee sthiti apne mann kee
Apni lagan se paa lein poonji Guruji ke naam ke dhan kee

Khush rehna seekhein
Jeevan ke har haal mein
Zindagi ka geet gaayein
Mangalmayee sur aur taal mein

Sewa aur simran mein leen rahein
Chaahe khushi ho ya gum
Guruji kee sharan mein hain
Kitne khushnaseeb hain hum

Har pal Guruji ka naam dil mein liye
Apna har kaaraj Unhe arpan karein
Unke bataaye asoolon par chalein
Aur sachchaayee se kabhi bhi na darein

Karam hamaare achche hon
Mann mein ho sadbhawna
Niswaarth bhaav se sewa karein
Sabke mangal kee karein kaamna

Satya ka saath dein hameshaan
Simran aur satsang mein dhyan lagaayein
Yeh jeevan jo Guruji kee dein hai
Hum Unhe hee samarpan karte jaayein

Guruji kee rehmat ka amrit peekar
Hoga avashya hamaara kalyaan
Is divya amrit kee hum rakhein laaj
Guruji, kripa kar deejiye yeh vardaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 13, 2018

Om Namaha Shivaya
Aaj ka Suvichaar 🙏🏻🙏🏻

              Mitti Se Mitti Mein

Dukh jo miley, Veh imtehaan mera
Sukh jo miley, dil meharbaan tera
Jab tak ‘mai’ rahegi hum mein
Guruji nahin basengey mann mein

Phir kis baat pe tu itna itraataa hai bandey
Neevaan bann jaa, sach ki raah par chal de
Mitti se hee aayein hain aur mitti mein mil jaanaa hai
Sabke jeevan ki kahaani ka yahi sachcha afsaanaa hai

Antim yaatraa ka samay jab aaye
Keval mera Guruvar mujhe lene aaye
Guruji ke sangg jaane mein hee mazaa hai
Varna maut bhi zindagi ke jaise sazaa hai

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

March 13, 2019

Om Namaha Shivaya
Aaj Ka Suvichaar 🙏🏻🙏🏻

            Jeevan Mein Parivartan

Guruji kee gyan ganga mein
Hum sabb bhi dubki lagaayein
Unkee baaton ko maan kar
Apne jeevan mein parivartan laayein

Lekin yeh tabhi mumkin hai
Agar har koi badalne ke liye tayaar hai
Varna ye sabb mehez baatein hain
Aur yoon hee haan kehna bekaar hai

Guruji ke paawan prem ke madhuban mein
Pavitra vichaaron ke pushp khilein hain ati sundar
Aayiye inkee divya khushboo se hum mehekaayein
Apne dil ka poojneeya mandir

Jeevan ek ruhaani safar hai
Har moad par chunauti hai nayee
Sach mein agar sudharnaa hai
Toh imtehaan dene hongei kayee

Vipattiyon ke baavjood seekhna hoga khush rehna
Kayee kadvee sachaayiyon ka dard padega sehna
Lekin jo pehen lega shradha se Guru naam ka gehna
Veh seekh jaayega jeevan roopi nadiya mein saralta se behna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 12, 2018

Om Namaha Shivaya
Aaj ka Suvichaar 🙏🏻🙏🏻

         Aapke Ashirwaad Ka Amrit

Guruji ki jo insaan karein sachchi bhakti
Pyaare satguru ko unki chinta zaroor lagti
Janam maran ke chakravyu se milti unko mukti
Jo bhi kasht aayein unhei jhelne ki milti shakti

Aap bichhde huon ko phir se mila dein
Aap veeraane mein bhi phool khilaa dein
Khottey ko aap kharaa banaa dein
Roothey huey ko aap manaa lein

Aapki kripa se toh amaavas mein bhi chaand dikh jaaye
Aapki mehar se bin baadal paani baras jaaye
Har boond hai amrit aapke aashirwaad ka
Phir kaise na karein hum dhanyawaad aapka

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

March 12, 2019

Om Namaha Shivaya
Aaj Ka Suvichaar 🙏🏻🙏🏻

              Naashukr Na Bann

Jabb subah ne raat ka daaman pakda
Aur kheenchaa apni oar
Roshni mein andhera gum ho gaya
Aur ho gayee ujlee bhor

Isi tarehn se jabb se Guruji ne
Thaama hai hamaara haath
Sukh mein dukh hai kho gaya
Uska na raha astitva na aukat

Yeh pyaara sach shayad
Hamein aaj maalum nahin
Lekin waqt ke saath ho jaayega
Hamein is sach par yakeen

Hum anjaane toh jaan hee nahin sakte
Ki Guruji ne kitne kum karey hain hamaare dukh
Adhiktar kasht hamaare Ve lete Apne Aap par
Taaki hamein mil sakey zyada sukh

Zyada se zyada bhaar swayam par lekar
Guruji hamaara jeena karte hain aasaan
Ve na taarein toh hamaara haal ho aisa
Jaise sir par toot kar gira ho aasmaan

Guruji kee suraksha ke bina
Bura haal ho jaata hamaara
Isliye naashukr honei se pehle
Kyun na hum soch lein dobara?

🌹🌹🌹🌹🌹🌹🌹

Jai Guruji 🙏🏻🙏🏻
Dhirja