Month: April 2019

April 20, 2018

Om Namaha Shivaya
Aaj Ka Suvichaar 🙏🏻🙏🏻 # 61

                    Dil Deewaana 

Hamaare Guruji mein hai aisi shakti
Jo bhav saagar se humko taare
Kar lein hum sab Guruji kee bhakti
Vahee toh harte hain dukh hamaare

Unke nirmal pyaar ke aanchal mein
Ho jaaye sabka uddhaar
Vahee hamein sambhaalte hain
Aur suntei hain hamaari pukaar

Hamein apnaane ke liye
Lakh lakh shukrana Guruji ka
Ab hameshaan ke liye ho gaya
Yeh dil deewaana Guruji ka

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 20, 2019

Om Namaha Shivaya
Aaj Ka Suvichaar 🙏🏻🙏🏻 # 426

         Guruji Sangg Rishta Jod Le 

Yeh duniya kisi kee nahin hai pyaare
Guruji sangg rishta jod le pyaare
Vahee chalenge sangg hamaare
Guruji sangg rishta jod le pyaare

Sab karmon ka khel hai pyaare
Sabhi phirte hain maare maare
Yeh khaata saaf hoga Unhee ke dwaare
Guruji sangg rishta jod le pyaare

Insaan toh bhatkey dwaare dwaare
Jagg kee raahon mein andhiyaare
Unhee mein dekh tu sooraj aur taare
Guruji sangg rishta jod le pyaare

Chod de abb aadambar saare
Aur kisi ko kyun tu pukaare
Vahee hain sachche meet hamaare
Guruji sangg rishta jod le pyaare

Unhonei bhakton ke kaaj sanvaare
Unke divya andaaz hain nyaare
Unke aagey duvidha ke daanav haare
Guruji sangg rishta jod le pyaare

Vyarth mein na yoon samay ganvaa re
Apna soya naseeb jagaa re
Apne jeevan kee naiya doobne se bachaa re
Guruji sangg rishta jod le pyaare

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 19, 2018

Om Namaha Shivaya
Aaj Ka Suvichaar 🙏🏻🙏🏻 # 60

 Khila Dein Murjhaaye Huey Phool Ko

Khila dein murjhaaye huey phool ko
Hataa dein Veh raaste ke shool ko
Kathin raah par bhi chalna sikhaa dein
Andheri raat mein bhi chaand dikha dein

Nikhaarte hain ujde huey baag ko Guruji
Jagaate hain sotei huey bhagya ko Guruji
Bhatke huey ko raah dikhaate hain Guruji
Jeene ka saleeqa sikhaate hain Guruji

Apne pyaar bhare aashirwaad ke jaadu se
Sharad ritu ko saawan banaate hain Guruji
Chamatkaar aise lajawaab karte hain
Ki patit ko bhi paawan banaate hain Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 19, 2019

Om Namaha Shivaya
Aaj Ka Suvichaar 🙏🏻🙏🏻 # 425- Yeh suvichaar bachchon kee ek kahaani par aadhhaarit hai

      Har Jeev Ke Hain Apne Karam

Guruji keval insaanon ke nahin
Har jeev ke Bhagwaan hain
Har praani kee karte hain raksha
Sabke upvan ke baagbaan hain

Ek kissa tumhe sunaatee hoon
Jiskee bahut gehri hai shiksha
Dhyan se sunoge toh jaanoge
Guruji de rahein hain deeksha

Choohe ne jab dekha, ki kisaan choohedaan laaya
Toh chooha bahut ghabraya
Jab usne aakar apne pashu mitron ko bataaya
Toh unko choohe kee fikr ne na sataaya

Bakree aur gaay ne kuch shabd saantvanaa ke kahe
Murga, bakree, aur gaay apne apne raaste chalte baney
Jab raat ko chooha darr kar kisaan ke ghar mein jaaga
Toh choohedaan mein ek saamp ko dekh usey darr laaga

Saamp ne kisaan kee patni ko kaata
Aur patni hui beemaar
Itne padosi aaye madad karne
Kisaan ne unke liye bhojan kiya tayyaar

Usne bakree aur gaay kee balee chadhaayee
Aur padosiyon kee bhookh mitaayee
Chooha yeh dekh kar bahut udaas hua
Lekin phir usey is baat ka ehsaas hua

Ki yahee hai chakravyu jeevan ka
Yeh khel hai karam aur mann ka
Zindagi ek karmic safar hai
Har koi hamaara humsafar hai

Hum sab jeev hain ek hee mala ke moti
Kisi kee zindagi lambee, kisi kee chhoti
Lekin jiske saath hai karmon ka khaata
Veh zaroor hamaari zindagi mein hai aata

Ek dooje ke saath jo karmic khaata hai
Jo usey divyataa se nibhaata hai
Aur apne madadgaar ka maan badhaata hai
Veh Guruji ka sachchaa bhakt kehlaata hai

Guruji raasta dikhaate Hain hamein
Achchaa bann-na sikhaate Hain hamein
Guruji ne Apni meher se dee hai jo hamein shakti
Uska prayog kar ke paa lein karmon se mukti

Halkapann mehsoos hoga atma ko
Khushi hogi Guruvar Parmatama ko
Utaar lein apne karmon ka bhaar
Yahee toh hai jeevan ka saar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 18, 2018

Om Namaha Shivaya
Aaj Ka Suvichaar 🙏🏻🙏🏻 # 59

          Veh Ghadi Zaroor Aayegi

Sampoorna brahmaand ko dekh sakein
Guruji ke gehre komal nayan
Jo bhi shabd Unke mukh se nikle
Veh hain hameshaan satya vachan

Dhyan mein baithein jab bhi
Kar lein hum Guruji ka manan
Vaheen par paaon chalein hamaare
Jahaan par jaayein Unke kamal charan

Har pal hum shradha aur prem se
Neeven ho kar lein Unka naman
Duniya ki baaton mein kya rakha hai
Karein hum Guru gyaan ka shravan

Maana ki abhi chal raha hai
Har praani ka janam maran
Kintu veh ghadi bhi zaroor aayegi
Jab hoga hamaara Guruji se milan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 18, 2019

Om Namaha Shivaya
Aaj Ka Suvichaar 🙏🏻🙏🏻 # 424

   Bheed Mein Na Kho Jaayein Hum

Bheed mein kho jaana kitna aasaan hai
Itne loag hain phir bhi dil pareshaan hai
Guruji ke paas har samasya ka samaadhaan hai
Isliye Unkee sharan mein hee sukh aur aaraam hai

Guruji jabb laukik chole mein thei
Ve kehte thei kayee baar
Bheed bahut zyada badh jaayegi
Hazaaron lakhon ko karegi paar

Lekin Guruji ke pakke bhakt
Jo Unke vachan ka paalan karenge
Ve mutthi bhar reh jaayenge
Aur ve hee dheeraj dharenge

Oopar se toh hum mein se sainkdon
Guruji ke bhakt hain kehlaate
Lekin hum mein se kitne hain
Jo sahi maayne mein bhakti nibhaate?

Baat dikhaawe aur prachaar kee nahin hai
Baat hai saaf dil aur nek neeyat kee
Divya keemat hai niswaarth sewa kee
Na ki apne swaarth ke liye dee gayee naseehat kee

Kaash hum mein se koi toh aise hon
Jin par Guruji ko garv ho
Ve, jinke liye Guru milan hee
Sabse pavitra parv ho

Chaahe saaree bheed galat raasta apnaaye
Har sachchaa bhakt sahi raaste par jaaye
Aur galat raah par chalne ke bajaaye
Veh asatya ke khilaaf aawaaz uthaaye

Guruji se sachchee lagan aur niswaarth prem hai toh aisa mumkin hai
Kyunki Guruji kee dee hui himmat mein urja aur dum hai
Buss, zaroorat hai toh Guruji ke vachan ka anusaran karne kee
Rabb se pyaar karne kee, na ki Unse darne kee

Jo kar rahein hain yeh prayatna
Guruji ko iskee khabar hai
Aur unke dil-o-dimaag aur noor par
Chhaya Guruji ka asar hai

Bheed mein na kho jaayein hum
Dil aur atma se Guruji ke ho jaayein hum
Zamaana chaahe kar le hum par sitam
Guruji kee goad mein aashwaasan paayein hum

Guruji kee meher se kaash hum sab tarr jaayein
Bharee bheed mein bhi aise bhakt mil jaayein
Jo divya deewaangee se Guruji se dil lagaayein
Aur apne Guruvar ka maan sadaa badhaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 17, 2018

Om Namaha Shivaya
Aaj Ka Suvichaar 🙏🏻🙏🏻 # 58

             Hamaare Kirpadhaar

Saagar jitnee syahee bhi kumm hai
Jab likhein Guruji ke kiye upkaar
Ambar jitna kaagaz bhi chhota hai
Karein jab Unkee mahima ka izhaar

Unkee divya shakti ke aagey
Anyaay kee hogi sadaa hee haar
Guruji par jisne bharosa kiya
Guruji ne kiya unka beda paar

Sadaa Guruji thaamein haath hamare
Apni sharan mein raakhein kirpadhar
Ab aur kaheen bhatakne kee zaroorat nahin
Jab MahaShiv swayam hain paalanhaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 17, 2019

Om Namaha Shivaya
Aaj Ka Suvichaar 🙏🏻🙏🏻 # 423

      Antaratma Ko Prabal Banaayein

Havaa ke tez jhonkey se
Kamzor daali aksar jhuk jaati hai
Kabhi kabhi toh daali ke dil kee
Dhadkan bhi ruk jaati hai

Aisee hee hai hamaari antaratma
Chaahe tum jaano ya na jaano
Iska saamarthyavaan hona zaroori hai
Chaahe tum maano ya na maano

Jitna Guruji ko saadhoge
Utnee hee milegi prerna
Jitnee tapasya karoge
Atma mein jaagegee chetna

Prerna sadaa shudh sochne kee
Prerna annaay ko rokne kee
Chetna andhvishwaas se muh moadne kee
Chetna vikaaron ko chodne kee

Varna kamzor daalee kee tarehn
Atma nirbal hoti chalee jaayegi
Aur laukik aakarshan kee oar khichkar
Tumhaare vash mein nahin aayegi

Abb bhi samay hai tumhaare paas
Jaagrit karo apne zameer ko
Apni atma ko Guru saadhna mein leen karo
Aur sanvaar lo apni taqdeer ko

Dekhte hee dekhte atma prabal ho jaayegi
Shubh sanskaaron se zindagi safal ho jaayegi
In sanskaaron se atma mein shuddhi aayegi
Aur atma moksh kee manzil ke utna hee kareeb aayegi

Yeh toh tum jaantey ho bhali bhanti
Ki atma jab shudh hogi toh usey milegi shanti
Phir veh Guru milan kee manzil ko paa jaayegi
Aur Guruji kee divya jyot mein samaa jaayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 16, 2018

Om Namaha Shivaya
Aaj Ka Suvichaar 🙏🏻🙏🏻 # 57

      Har Pal Karein Aapka Shukrana

Guruji kee gurbani sunkar
Magan ho jaaye dil deewana
Unke pyaar ke nashey mein
Har bhakt hua mastaana

Guruji hamaare param parmeshwar hain
Unke charnon mein hamaara thikaana
Unhe dil ka haal keh sakein hum
Chaahe jagg se pade chhupaana

Hum paapi aur agyaani hain
Hamein ujjwal raah dikhaana
Ab toh har pal karein aapka
Shukrana shukrana shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 16, 2019

Om Namaha Shivaya
Aaj Ka Suvichaar 🙏🏻🙏🏻 # 422

        Mere Guruvar, yeh toh bataa

Mere pyaaare Guruvar
Yeh toh bataa
Tu rasoole khuda hai
Ya khud hee hai khuda

Mujhe toh tum mein
Dono hee nazar aate hain
Dono ke ashirwaad
Tere naam se jud jaate hain

Kaheen bhi kisi aabid par
Padti hai jab teri mehre nazar
Beintehaa ruhaaniyat chha jaati hai
Chaaron oar is kadar

Dil ko kuch soojhta nahin
Tere naam ke siwa
Tere sajde mein jhuk jaati hai
Jannat kee bhi havaa

Ye meri deewaangee hai
Ya hai tera karishma
Ya phir teri dee huee saugat
Jis se haseen hai samaa

Jis bhi roop mein dekhoon tujhe
Jis bhi roop mein poojoon tujhe
Tera roop lagta hai khoobsoorat
Jis roop mein bhi sochoon tujhe

Abb toh tere khayaalon mein hee
Har pal guzaarne ko chaahta hai mera dil
Tu aur teri rafaqat hee har khushi meri
Chaahe ekaant ho ya ho khush dil mehfil

Abb tu hai, tera deedar hai
Teri hamdardi aur rehmat hai
Mujhe jag se kya lena dena
Tu agar mujhse sehmat hai

Tu hee raasta hai aur tu hee hai manzil
Teri dee huee dhadkan se hee dhadakta hai dil
Zindagi ka har pehlu ho jaaye ruhaani
Teri panaah mein agar beet jaaye zindagaani

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 15, 2018

Om Namaha Shivaya
Aaj Ka Suvichaar 🙏🏻🙏🏻 # 56

             Kisliye Ghabrana

Guruji hamaare saath sadaa hain
Phir kisliye hamein ghabrana
Unse yeh bandhan kabhi na tootey
Lakh koshish kar le chaahe zamaana

Veh hamaari awaaz suntey hain
Phir aur kisi ko kyun bataana
Maun kee vajeh bhi jaan jaate hain
Nahin padta hamein Unko samjhaana

Unhee ke upkaaron se nikhar gaya hai
Hamaari is zindagi ka afsaana
Khush naseeb hain hum ki mil gaya
Hamein Guru naam ka anmol khazana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 15, 2019

Om Namaha Shivaya
Aaj Ka Suvichaar 🙏🏻🙏🏻 # 421

           Insaaniyat Ka Vardaan

Gair agar dhokha de dein
Toh phir bhi kaam chal jaata hai
Magar jab koi apna jhooth kahey
Toh phir dil kaise is chot ko sahey?

Jhooth chhota ho ya bada
Jhooth toh jhooth hee rehta hai
Aur koi jaane ya na jaane
Veh toh jaanta hai jo jhooth kehta hai

Lekin uss se bhi badi baat hai
Ki Guruji jaante hain bhali bhaanti
Isliye aaj nahin toh kal
Jhooth se hoti hai mann ko ashanti

Chhote se jhooth se bhi rishtey toot jaate hain
Sambandhi aur saathi chhoot jaate hain
Aisee bhi kya majboori hai
Jo jhooth bolna itna zaroori hai?

Guruji chaahte hain kee bheetar se aur baahar se bhi
Hum jeeyein sachchaayee aur saralta se
Guruji kehte hain vikaar chodkar
Hum rishtey nibhaayein nirmaltaa se

Zara sochiye, jab hum jhooth kehte hain kisi se bhi
Toh kya Guruji ko achchaa lagta hoga?
Agar is prashn ka uttar hai ‘nahin’
Toh phir aap hee sochiye kya hai sahee

Na karein hum Guru naam ka apmaan
Sach kehkar karein Guruji ka sammaan
Guruji hum sab par sadaa rahein meharbaan
Unhonei hee toh diya hai hamein insaaniyat ka vardaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 14, 2018

Om Namaha Shivaya
Aaj Ka Suvichaar 🙏🏻🙏🏻 # 55

                   Poorna Kalyaan

Devi poojan dhan miley
Aur miley hai gyan
Guruji ki pooja se sab miley
Ho jaaye poorna kalyaan

Jisne Guru ko paa liya
Usne chhoo liya aasmaan
Guruji ko paane ke baad
Aur kya maangey insaan

Guruji se hee jaan hai
Guruji se hee jahaan
Buss Guruji ka naam lete huey
Ab nyochhavar ho jaayein praan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 14, 2019

Om Namaha Shivaya
Aaj Ka Suvichaar 🙏🏻🙏🏻 # 420

                Kripa Ka Ehsaas 

Jeevan kee bhaag daud mein
Kayee baar nahin hota ehsaas
Ki Guruji kee hum sab par
Kripa hai kitnee khaas

Hamaari toh kismat khul gayee
Jab se hum aaye hain Guruji ke dwaare
Sangat badhtee jaa rahee hai
Guruji ke bhakt hain itne saare

Unhee kee kripa ka nateeja hai
Ek ek shwaas hamaara
Guruji ke aashirwaad ke bina
Hum toh hain bilkul besahaara

Sooraj bhi uday ho nahin sakta
Guruji kee ijaazat ke bina
Antaratma ko chayn mil nahin sakta
Guruji kee ibadat ke bina

Andhere mein Guruji hee hain Dhruv ka tara
Dete hain hum sabko pyaar itna pyaara
Dukh dard hamaara le lete saara ka saara
Unke siwa na hai koi bhi rakshak hamaara

Buss phir na koi soch na koi shaq
Chod dein har vikaar aur paakhand
Guruji ko sab kuch saumpkar
Is ruhaani safar ka lein anand

Har bhakt ko taarne ka tareeka
Guruji ka hai bilkul khaas
Jaise bhi dekhein ya mehsoos karein
Guruji hain divyataa ka ehsaas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 13, 2018

Om Namaha Shivaya
Aaj Ka Suvichaar 🙏🏻🙏🏻# 54

              Guruji Ke Sangg Baisakhi

Guruji ke pyaare bhakton ko
Baisakhi par badhhaai
Guruji kee chhavi sabne
Mann Mandir mein sajaayee

Guruji ke sangg tyohaar manaane
Bade pyaar se sangat aayee
Khoob sajaa darbar Guruji ka
Vatavaran mein masti chhaayee

Pyaar se langar khaya sabne
Sabne baantee mithai
Guruji ne sab bhakton par
Apni rehmat barsaayee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 13, 2019

Om Namaha Shivaya
Aaj Ka Suvichaar 🙏🏻🙏🏻 # 419

             Samay Ka Sadupyog

Samay bahut ho ya thoda
Guruji ne tumhe Apne se hai joda
Apnaakar tum Shiv Yog
Is samay ka karo sadupayog

Doosaron ko bhi jee lene doh
Aur khud bhi achche se jiyo
Kitne loag Guruji mein leen hain
Tum bhi Guru naam ka amrit piyo

Kisee kee madad kar sako toh karo
Lekin kisee ka raasta kaato nahin
Chaahe koi aur na dekhe aur na jaane
Guruji dekh sakte hain galat aur sahee

Karam mein kaaj ke bheetar kya bhaav chhupa hai
Guruji uss bhaav ko jaante hain
Bhaav hamaara achchaa hona chahiye
Yeh hum sab bhi maante hain

Picchle kayee janmon ke sanskaaron ne
Ghar banaaya hai hamaare mann mein
Unka prabhaav bhi hota hai
Mann kee ichchaa aur spandan mein

Guruji kee dee hui aadhyatmik shakti
Jab Simran aur Sadhna se hum paayenge
Toh nirpekshataa aur sakaaraatmakta se
Hum anuchit sanskaaron ko badal paayenge

Shubh sanskaar hongei hamaare
Tabb hee jeevan sanvar paayega
Varna toh yeh saara jeevan
Yoon hee guzar jaayega

Baat patey kee hai yeh sach mein
Kar lein hum abb uddhar apna
Guruji kee baaton ka anusaran kar ke
Poora karein ek sundar jagg ka sapna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 12, 2018

Om Namaha Shivaya
Aaj Ka Suvichaar 🙏🏻🙏🏻 # 53

       Mera Baarambaar Pranaam

Guruji, Apki mamta mein hai vo bhaav
Jo bhar deta har ghaav
Aapke darshan se khush ho jata dil
Adbhut see shaanti jaati hai mil

Kabhi gulab kee khushboo, kabhi chandan kee
Prerna deti hai Aapke charan vandan kee
Prafullit kar deti hai shabad kee mithaas
Badhti jaati hai simran karne kee aas

Aapki kripa aur karuna se
Pooran hongei sab kaam
Guruji kripa kar sveekaar karein
Mera baarambaar pranaam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 12, 2019

Om Namana Shivaya
Aaj Ka Suvichaar 🙏🏻🙏🏻 # 418

                       Divya Noor

Mann mein hee tandaav
Mann mein hee Nataraj
Mann par rehne de
Keval Shiv ka raaj

Guruji dikhaayein raasta mann ko swarg banaane ka
Phir kyun hum intazaar karte hain kisi bhi bahaane ka
Mann mein hee hai vichaaron ka vaas
Mann mein hee basein shradha aur vishwaas

Mann jabb hota hai vash mein apne
Toh jeevan mein anand samaata hai
Lekin jo apne hee mann par kaabu na paaye
Veh toh mann ka daas kehlaata hai

Mati kharaab hoti hai, toh mann bhi dagmagaa jaata hai
Irshya aur dwesh mein mann insaan se kya kya karvaata hai
Apne karam ko anuchit jaantey huey bhi insaan rukta nahin hai
Ishwar bhi aakar yaad dilaaye toh bhi veh jhukta nahin hai

Is mann ko sanyam mein rakhne ke liye
Guruji ke maargdarshan ka karein aadar
Achchaa sochein aur changey karam karein
Na mayli karein apne karmon kee chaadar

Guruji ko shradha aur prem se saadhein
Sewa aur Simran mein lagaayein dhyan
Samarpan kar dein Guruji ko apna sab kuch
Saadhna mein paayein Guruji se gyan

Satsang mein Guruji kee mahima sunein aur sunaayein
Bhakti mein leen hokar mann ko vash mein kar paayein
Dekhna, jabb gehri aur ekaagr hogi saadhna
Toh divya noor laayegi hamaari aradhana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 11, 2018

Om Namaha Shivaya
Aaj Ka Suvichaar 🙏🏻🙏🏻 # 52

                       Jai Jaikaar

Guruji MahaShiva hain
Unkee leela hai bemisaal
Vahee Govind hamaare
Hum hain Unke nanhe laal

Sadaa sambhaalein humko
Chaahe jaisa ho hamaara haal
Unkee shakti itnee aseem hai
Ki bhaybheet ho jaaye kaal

Dharti par swarg dikhaate hain Guruji
Hamein Ish se milvaate hain Guruji
Unke alaawa na koi aur abb paalanhaar
Kar lo shradha se Guruji Ki Jai Jaikaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 11, 2019

Om Namaha Shivaya
Aaj Ka Suvichaar 🙏🏻🙏🏻 # 417

               Abb Jaago Tum

Idhar udhar bhatakne kee koi zaroorat nahin
Apne bheetar dhoondne se mil jaayenge Guruji
Prem aur sadbhawna se pukaaro toh sahi
Dekhna tum, daude chaley aayenge Guruji

Bhaavuk hona hai toh Guru prem mein hona
Tum par prem ka amrit nirantar barsaayenge Guruji
Jhooth aur fareb ke saath ko chodo
Kyunki sach ko galey lagaayenge Guruji

Bade saubhagya se aata hai Guruji ka bulaava
Is rishte mein nahin phaltaa hai jhootha dikhaawa
Oopari dikhaawe se chaahe poore jagg ko dedo dhokha
Lekin asaliyat pehchaan-ne ka Guruji ka andaaz hai anokha

Kyun jhooth ka daaman pakdo
Jab Guruji se tumhara naata hai
Aaj nahin toh kal
Jhooth toh pakda hee jaata hai

Buss Unhe kardo tum samarpan
Unhee mein leen kar lo mann
Bator lo Guru naam ka dhan
Ganvaao na abb tum ek bhi kshan

Raasta kathin toh hai, magar tayy kiya jaa sakta hai
Jeevan mein mushkilein aayein, phir bhi jiya jaa sakta hai
Har pal tum tayyaar raho, kabhi bhi imtehaan liya jaa sakta hai
Abb bhi waqt hai, Guru kripa se Unke naam ka amrit piya jaa sakta hai

Tarr jaaoge Guruji kee kripa ke mahasaagar mein
Aashirwaad ka divya amrit hai Guru roopee sudhakar mein
Is amrit mein hai mamta kee mithaas
Jis se aur bhi dridh hoga tumhaara vishvaas

Arey, abb jaago tum
Guruji kee mahima ko jaan lo
Guruji hee kalyaan kar sakte hain tumhara
Is sach ko abb tum maan lo

🌹🌹🌹🌹🌹🌹🌹

Jai Guruji 🙏🏻🙏🏻
Dhirja