Month: May 2019

May 31, 2018

Om Namaha Shivaya
Aaj Ka Suvichaar 🙏🏻🙏🏻 # 102

         Subah Shaam Ka Chakravyuh

Yeh subah shaam ka chakravyuh
Guruji hee iske rachaitaa hain
Jo gupt sewa mein jee-jaan lagaayein
Vahee insaan hee vijaytaa hain

Zindagi kee is daud mein
Kaun galat hai kaun sahee
Sab karmon ke maarey hain
Phirte hain yahee vaheen

Jo samarpan karke Guruji ko
Nibhaate jaatein hain apna farz
Unke karmon ka hisaab ho poora
Aur adaa ho jaate hain unke karz

Guruji hum sabko subuddhi dekar
Hamaare antar mann ko saaf keejiye
Paap kiye hain bahut hum sabne
Aap kripa kar hamein maaf keejiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 31, 2019

Om Namaha Shivaya
Aaj Ka Suvichaar 🙏🏻🙏🏻 # 467

 Guruji Se Kuch Bhi Chhupa Nahin

Guruji se kuch bhi chhupta nahin
Ek bhi lamha rukta nahin
Guru kripa na ho toh aisa koi insaan nahin
Jo niyati ke aagey jhukta nahin

Lekin Guruji kee kripa se niyati badal jaayegi
Aur Guruji kee mahima se ummeed nazar aayegi
Guruji kee leela se bhikhaari bhi raaj karne lagg jaayega
Guruji kee shakti se ghamandi ka abhimaan marne lagg jaayega

Isliye na samajh tu apne aap ko majboor
Na soch ki kiska hai kya kusoor
Aur na kar tu apni khoobiyon par guroor
Neevanpan seekh le tu ab zaroor

Guruji ke liye hum hain keede makodon kee bhanti
Na pareshaan hon hum, buss rakhein dhairya aur shanti
Hamaari chetna kee aslee gehraayee hamaari yeh atma hai jaanti
Hamaara uddhaar karegi Guruji kee kanti

Raakh bannkar ahankaar choor ho jaayega
Jaagriti ke aane se andhkaar duur ho jaayega
Jab tujhe Guruji kee mohabbat ka suroor ho jaayega
Tab Guruji ka har vachan tujhe manzoor ho jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 30, 2018

Om Namaha Shivaya
Aaj Ka Suvichaar 🙏🏻🙏🏻 # 101

   Yeh Jeevan Guruji Kee Dein Hai

Hamaare karmon kee zimmevaari
Hai yeh kewal hamaari
Is janam ke karmon se banegi
Agley janam kee niyati hamaari

Samajhdaar shaayad sab hotei hain
Par vafaadaar har koi nahin
Bharosa toote toh lagta hai jaise
Paaon ke neeche se nikli zameen

Koi badi baat nahin hai kyunki
Sabse badi hai Guruji kee nazar
Jis se na bachh paya koi
Jab taiy ho zindagi ka safar

Yeh jeevan Guruji kee dein hai
Mere dost, isey swacchta se jiyo
Yeh jeevaamrit sabko naseeb nahin hota
Aye dost, isey shradha se piyo

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 30, 2019

Om Namaha Shivaya
Aaj Ka Suvichaar 🙏🏻🙏🏻 # 466

          Sir Par Guruji Ka Haath Ho

Aisee koi mushkil nahin
Jiska hal na ho Guruji ke paas
Ve hamaari har baat samajhte hain
Hum kar ke toh dekhein prayaas

Bhari bheed mein gum honei se achchaa hai
Ki apne aap ko hum dhoondein aur jaanein
Guruji ke pyaar kee varsha mein bheegein
Unkee leela aur mahima ko pehchaanein

Waqt toh ret kee bhanti haath se nikla jaa raha hai
Maano ya na maano sabka antt vela aa raha hai
Achche bano aur changey karam karo, Guruji ne ye kaha hai
Hamaara kalyaan karne ke liye Unhonei itna kuch saha hai

Har pal, har din, Guruji le rahein hain hamaari pareeksha
Ki kaise amal mein laate hain hum Unse paayee hui shiksha
Kya hum itna bhi nahin kar sakte hain apne Guruji ke liye
Ki apne dil mein jalaa lein hum neikee ke diye

Kyun na Guruji se karein hum yeh vaada
Ki apna jeevan rakhein saral aur saadaa
Guruji ke ashirwaad se har kasht talega
Baaki toh karmon ka khel hai jo sangg sangg chalega

Sachchi sangat ka saath ho
Chaahe din ho ya raat ho
Ghabraane kee na koi baat ho
Jab sir par Guruji ka haath ho

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 29, 2018

Om Namaha Shivaya
Aaj Ka Suvichaar 🙏🏻🙏🏻 # 100

             Sapnon Ka Panchhee

Mann ke anant aakash mein
Tayrein soch ke baadal
Nainon mein yeh aise sajtei
Jaise ke ho kaajal

Guruji ne sun lee soch hamaari
Kyunki basein huey Veh mann mein
Unse haal baantkar mann halka hua
Baadal chhat gaye ik kshann mein

Aasman kee saaf neeli chaadar
Dekhi phir mann kee aankhon ne
Sapnon ka jo panchhee thaa
Udaan bhari uske pankhon ne

Saadhna kee urja se hui
Sooraj ke jaisi jyoti
Guruji ke ashirwaad bina
Aisi achchi kismat na hoti

Mann ke neele ambar pe
Chhayi aisi adbhut kanti
Guruji kee kripa se milee
Dil ko itnee shanti

Shukrana Guruvar aapka
Jo safar ko safal banaya
Apki karuna se sapnon ka panchhee
Aazaad hokar ud paya

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 29, 2019

Om Namaha Shivaya
Aaj Ka Suvichaar 🙏🏻🙏🏻 # 465

        Khwaab Yeh Sach Ho Jaaye

Itne bade jahaan mein
Ik nanaah sa bachchaa
Uske chhote se dil mein
Ik khwaab bada hee achchaa

Apne Guruji ke saath hai vo
Natkhat khel veh khel raha hai
Guruji ne phir choom ke usko
Uske kaan mein kuch kahaa hai

Guruji kee baat sunkar baalak ko
Aati hai hasee bahut hee pyaari
Baalak ka chehra khil jaata hai
Nainon mein chamakti hai roshni nyaari

Apne Guruji ke charnon mein vo
Shradha se maatha tekta hai
Phir ek ummeed bhari nazar se vo
Guruji kee oar dekhta hai

Guruji mann hee mann muskuraate hain
Par bachche ko nahin dikhaate hain
Bachcha kuch samajh nahin paata hai
Aur ek pal ke liye udaas ho jaata hai

Tabhi Guruji usey goad mein uthaate hain
Bade pyaar se usey bithaate hain
Usey detey hain Ve sachkhand ka prasad
Aur saath mein Apna ashirwaad

Bachcha khushi se phoola nahin samaata
Dhanya hua uska jeevan
Guruji ka ashirwaad paakar
Prassann hua Uska mann

Guruji, meri arzi hai Aapse
Ki yeh sapna dekhe duniya mein Apka har bachcha
Aur mai vinti karti hoon
Ki har bachche ka khwaab ho jaaye sachcha

Is khwaab ke sach ho jaane se khushiyan darwaza khatkhataayengi
Aapke bachchon ko anginat saugaatein mil jaayengi
Aapki divya leela har baalak kee zindagi mein rangg laayegi
Aur Aapke har bachche kee taqdeer sanvar jaayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 28, 2018

Om Namaha Shivaya
Aaj Ka Suvichaar 🙏🏻🙏🏻 # 99

                   Niraash Na Ho

Niraash na ho musaafir tu
Guruji se kar le baat
Sooryodaya hoga zaroor
Jabb beetegi andheri raat

Guruji kitne shubhchintak hain tere
Iska na hai tujhe abhi gyan
Aise dukh bhi har lenge Guruji
Jin dukhon se hai tu anjaan

Zindagi ke geet ko sur denge Guruji
Pyaar ki varsha tujhpar karenge Guruji
Tere kashton ko yakeenan har lenge Guruji
Teri khushi mein saath tere hasenge Guruji

Tere bikhrey sapnon ko sametenge Guruji
Tere tootey huey dil ko bhi jodenge Guruji
Chaahe neembu jaise nichodenge Guruji
Par tere liye maut se bhi lad lenge Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 28, 2019

Om Namaha Shivaya
Aaj Ka Suvichaar 🙏🏻🙏🏻 # 464

                Ruhaani Mithaas

Ekaant mein baitho Guruji ke sangg
Unse keh do apne dil ka haal
Is anitya anjaan se sansaar mein
Guruji hee hain hamaari dhaal

Kasht aur uljhan toh hai jeevan ka hissa
Udaasi aur pareshaani hai hum sabki zindagi ka kissa
Kyun na is tarehn se Guruji ko dil mein basaa lein
Ki mushkilon kee aad mein bhi jeene ka mazaa lein

Unke drishtikoan ko samaa lein apne nazariye mein
Unpar rakhein poorna vishwaas
Har sukh dukh ko kardein Guruji ko samarpan
Unka naam japey hamaara har shwaas

Guruji toh jahanpanah hain poori srishti ke
Taar dete hain hamein apni ek drishti se
Agar Unkee chhavi se ujjwal kar lein apne nayn
Phir koi bhi nahin chura sakta humse hamaara chayn

Unkee divya maujoodgi mein jitna hoga hamein vishwaas
Utnee hee mamta se Guruji sadaa rahenge hamaare paas
Unke pyaar bhare aanchal mein milega hamein sukoon
Aur Unke sneh se kabhi na hongei hum mehroom

Hamaare armaanon kee jholi mein bahega Unka ashirwaad
Hamaari nishtha ko milega Unke prem ka divya prasad
Is prasad se aayegi zindagi mein ruhaani mithaas
Guru praapti ke pashchyaat na reh jaayegi aur koi bhi aas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 27, 2018

Om Namaha Shivaya
Aaj Ka Suvichaar 🙏🏻🙏🏻 # 98

Har koi kehlaaye Guruji ka bachchaa

Har Koi kehlaaye Guruji Ka Bachchaa
Keh dijiye Unko haal apna sachhaa
Unke jitna nahin koi lage achchaa
Koi vaadaa hota na Unka kachchaa

Har kasht ka nivaaran karte hain
Sabki jholiyaan Veh bharte hain
Sangat ke dukh Veh harte hain
Yamraj bhi Guruji se darrte hain

Har pal, har ghadi, aur kaun tere sangg rahega
Saaya bhi andhere mein saath chod dega
Jab tak tu Guruji ko poojega aur apna Bhagwaan kahega
Tera har aansoo Unki aankhon se bahega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 27, 2019

Om Namaha Shivaya
Aaj Ka Suvichaar 🙏🏻🙏🏻 # 463

        Ruhaani Rangg Mein Guruji

Jitna hum Guruji ko dhyaaenge
Unkee maujoodgee ka hoga utna hamein ehsaas
Jitne pyaar se Unhe saadhenge
Utna hee paayenge Unhe apne paas

Simran se mann ko ekaagra honei kee disha dikhaayein Guruji
Aur dhyan se ekaagrataa ko aur bhi kendrit banaayein Guruji
Isee tarehn se har bhakt se sambandh gehra banaayein Guruji
Aur hamaare ruhaani safar ka anand badhaayein Guruji

Shradha ke saawan kee sugandh mein hain Guruji
Vishwaas kee varsha ke anand mein hain Guruji
Prem ke prakash kee pavitrataa mein hain Guruji
Ashirwaad ke akash kee aseemta mein hain Guruji

Ruhaani rangg mein hain Guruji
Jeene ke dhangg mein hain Guruji
Tere sangg bhi hain Guruji
Mere sangg bhi hain Guruji

Doob jaayein Unke prem ke mahasaagar mein
Taaki kalyuga roopi samudri toofan mein rul na jaayein
Kripa karein Guruji hum par taaki hum
Aise koi paap na karein jo dhul na paayein

Aao Guruji ke rangg mein ranggkar
Unhee ke naam ka shravan karein
Unhee ka chintan aur manan karein
Aur sadaa Unke charnon mein naman karein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 26, 2018

Om Namaha Shivaya
Aaj Ka Suvichaar 🙏🏻🙏🏻 # 97

            Jai Guruji Kee Bol

Jai Guruji kee bol, Jai Guruji kee bol
Pyaar pyaar se zor zor se
Jai Guruji kee bol
Mann se buss tu dhyan lagaa ke
Jai Guruji kee bol

Shivji ka avataar hain Ye
Dayawaan kitne hain
Tabhi toh inke bhakt deewaane
Duniya mein itne hain
Nainon se hain baat samajhte,
Chaahe tu kuch na bol
Jai Guruji Ki Jai Guruji Ki Jai Guruji ki bol

Prem daya aur mamta ka
Saagar Inke dil mein
Sangat ko Ye darshan dein
Satsang mein mehfil mein
Mehekte phoolon ki khushboo mein
Khush hokar tu dol
Jai Guruji Ki Jai Guruji ki Jai Guruji ki bol

Jai Guruji
Dhirja

May 26, 2019

Om Namaha Shivaya
Aaj Ka Suvichaar 🙏🏻🙏🏻 # 462

          Yeh Zindagi Ka Safar Hai

Yeh zindagi ka safar hai yaaron
Yahaan har koi saath chalta nahin
Hisaab hota hai yahaan puraane karmon ka
Isliye sab ka kasht ek saath taltaa nahin

Kisee ke sanskaar hotei hain bade shudh
Koi ho jaata hai apnon ke bhi virudh
Koi doojon ke dilon ko toad kar khush ho jaata hai
Toh koi doojon kee khushi ke liye apna hee dil toad aata hai

Guruji toh hum sabke maalik hain
Ve dekhte hain har pal ka nazaara
Jo bhi bhakt yaad karta hai Unhe
Ve bann jaate hain uska sahaara

Prem ka paath padhaate hain Guruji
Haalaat se ladna sikhaate hain Guruji
Raaste se baadha hataate hain Guruji
Apni mahima dikhaate hain Guruji

Sikhaate hain Guruji jeene ka tareeka
Samjhaate bhi hain Ve badalne ka saleeqa
Phir saump dete hain uttardaayitva insaan ko
Ki veh khush kar sakey apne Bhagwaan ko

Har pal koi paap batortaa hai, aur koi paap dhota hai
Lekin aaj nahin toh kal sabke karmon ka hisaab hota hai
Jis bhi nazariye se isey dekha jaaye
Guruji ke Darbar mein na koi bada na koi chhota hai

Isliye chaahe koi saath chale ya nahin
Sabne ek din jaana hai vaheen
Jahaan asmaan hai na ki hai yeh zameen
Isliye kyun na apnaayein vo raasta jo hai sahi

Guruji yeh dekh kar hongei bahut prassann
Hamaari atma ko mehsoos hoga ki veh hai sampann
Puraane karmon ka bhaar kum ho jaayega
Aur dheere dheere hamaara uddhaar ho paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 25, 2018

Om Namaha Shivaya
Aaj Ka Suvichaar 🙏🏻🙏🏻 # 96

Guruji Hee Prem, Guruji Hee Pooja

Sirf kitaabi paath se faayda nahin
Hamaare Guruji yeh kehte hain
Pehla paath hai gharelu zimmedaari
Phir hai dooje paath kee baari

Kalyuga ka maadaa samay hai
Durlabh sachhayee aur vinay hai
Paath pooja karenge toh bachh jaayenge
Varna mrityu pashchaat bhi thokarein khaayenge

Chaahe is zindagi mein jurmaana bharein
Phir bhi aao Guruji ka shukriya adaa karein
Jinhonei aise waqt par galey lagaaya hai
Jab chaaron oar kalikal ka andhera chhaaya hai

Kya hua agar Guruji ka dikhaaya raasta hai pathreela
Uspar chalkar moksh jo milega veh hoga sureela
Ab Guruji ke anusaran bin kaam na koi dooja
Vahee hain ab prem, aur vahee hain ab pooja

Jai Guruji
Dhirja

May 25, 2019

Om Namaha Shivaya
Aaj Ka Suvichaar 🙏🏻🙏🏻 # 461

                      Aye Raat

Aye raat, tu niraash na ho
Tera aana toh hai bahut zaroori
Tujhse kabhi chhupi nahin
Kisee kee bhi majboori

Tu na ho toh kaun karega intazaar
Subah ke sooraj ke aane ka
Tere timir ke kaaran manorath hota hai
Jaagriti ke ujaale ko paane ka

Tujhpar Guruji kee mehar hai
Jo chaand tujhe deta hai darshan
Tere astitva par noor laatey hain taare
Vishwaas na ho toh dekh le darpan

Guruji kee tujhpar rehmat hai
Ki andhere mein bhi tujhe sajaaya hai
Chaand aur taaron ke roop mein
Guruji ka ashirwaad toone paaya hai

Tere sannaatey mein bhi Guruji ne bakshee hai sheetaltaa
Teri chuppi mein Unhonei bakshee hai tujhe nirmaltaa
Tu karti hai amritvele ka swaagat
Tere har lamhe mein ek adbhut see taakat

Tu Guruji kee rachee hui prakriti ka hissa hai
Tera safar har insaan ke jeevan ka kissa hai
Isliye chalti jaa tu Guruji ka naam gunginaati hui
Apni shanti se har kolaahal ko mitaatee hui

Tere anchal mein har subah ka janam hoga
Toone subah ke aane ke liye kitna kuch hai bhoga
Tu jab jab Guruji ke liye tarasti rahegi
Guruji kee kripa tujhpar barasti rahegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 24, 2018

Om Namaha Shivaya
Aaj Ka Suvichaar 🙏🏻🙏🏻 # 95

            Srishti Ka Paalanhaar

Guruji ne hum sabko pyaar se
Apni mamta ki chhaaon mein sehlaya
Aur hamaare nakhde seh kar
Hamaara dil behlaaya

Jab koi nahin thaa saath hamaare
Ek Unhonei hee saath nibhaaya
Sach mein na mata, na pita, na behna,
Na bhai aur na dost kaam aaya

Vyarth mein hee toh hum sabne
Moh maya ko galey lagaaya
Hamaare mann ko mili na shanti
Aur har apna hua paraaya

Srishti ka paalanhaar swayam Trilok se
Hamaara Guru bann kar hai aaya
Ab toh Guruji ko saump dein jeevan
Aur anmol samay na karein zaaya

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 24, 2019

Om Namaha Shivaya
Aaj Ka Suvichaar 🙏🏻🙏🏻 # 460

               Pyaar Kee Bhaasha

Guruji ne diya hai hamein yeh jeevan
Taaki hum Unke dhyan mein rahein magn
Aur karte rahein Unka shukrana
Jis se nikhar jaaye zindagi ka afsaana

Shukrana toh hai pyaar kee bhaasha
Shukrana se dil mein jaage aasha
Shukrana se shuru karein har baat
Pyaare pyaare Guruji ke saath

Shukrana ka arth yeh nahin hai
Ki hum kar rahei hain mushkilon ko nakaar
Shukrana toh yeh yaad dilaata hai
Ki Guruji ka hukm hamein hai sweekaar

Shukrana se himmat kayee guna badh jaati hai
Shukrana se khoi taakat vaapis aati hai
Shukrana utsaah ko badhaata hai
Aur har bhakt ko raah dikhaata hai

Shukrana se khul jaate hain
Jannat ke dwaar bhakton ke liye
Shukrana se jal jaate hain
Andhere mein sainkdon diye

Shukrana se dharti par rehte huey
Dikhta hai swarg ka nazaara
Shukrana se har paripoorti ka
Anand aata hai dobara

Jo karta hai nirantar shukrana
Uspar barastaa hai ruhaani khazaana
Jo shukrana mein ho jaaye mastaana
Uska baal na baanka kar paaye zamaana

Guruji hamein kabhi na bisraana
Aapke charnon mein hai hamaara thikaana
Guruvar, hum par yeh kripa barsaana
Ki hamaari har saans mein ho shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 23, 2018

Om Namaha Shivaya
Aaj Ka Suvichaar 🙏🏻🙏🏻 # 94

    Guruji Ko Meet Banaayein Apna

Doosron ko kisi bhi tareh kee haani na pahunchaayein
Insaan se nahin, toh Bhagwaan se toh darr jaayein
Guruji hamaari ek ek soch par gaur farmaayein
Chaahe hum oopar se kuch bhi dikhaayein

Atma ko moh aur maya se na baandhein
Adhyaatmik vriddhi ke liye Ishwar ko saadhein
Isey hee zindagi ka uddeshya samjhein
Na ki tuchh maamlon mein uljhein

Shuddhi rakhein karmon mein
Jeevan swarg banaayein apna
Zindagi ke har lamhe mein
Guruji ko meet banaayein apna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 23, 2019

Om Namaha Shivaya
Aaj Ka Suvichaar 🙏🏻🙏🏻 # 459

Guruji Par Vishwaas Karte Huey Chalein

Hum sab toh andhere mein bhatak rahe thei
Guruji ne raah ko ujjwal kar diya
Aanchal hamaara khali thaa
Guruji ne Apne prem se usey bhar diya

Apne pyaar ke amrit se
Hamaare kiye paapon ko dho diya
Jisne bhi Unka naam suna
Veh Unhee ka ho liya

Jab Guruji ne hamaare karmon ka bojh uthaaya hai
Toh farz banta hai yeh hamaara
Ki jo galatiyan humse ho gayeen
Ve hum bilkul na karein dobaara

Koshish karein ki achche karam karein
Aur paapon se na apna jeevan bharein
Har kadam par atyant dhyan dharein
Sachchaayee se jeeyein aur marein

Jo Guruji se karta hai sachcha pyaar
Vo shukrana karne ke liye hai har pal taiyaar
Jab saath mein ho Guruji ka dulaar
Toh veeraanon mein bhi aa jaati hai bahaar

Aao jeevan ke har moad par chalein
Guruji par vishwaas karte huey
Toh zindagi guzar jaayegi
Unke ashirwaad se jholi bharte huey

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 22, 2018

Om Namaha Shivaya
Aaj Ka Suvichaar 🙏🏻🙏🏻 # 93

                        Tajurba

Tajurbaa bura ho ya ho achchaa
Paath sikhaaye veh bilkul sachchaa
Haunsla tu kabhi na chod apna
Shraddha har pal banaaye rakhna

Har tajurbe se seekh miley
Is se praapt hoti hai buddhi
Duniyadaari ka gyan milta hai
Chaahe aaye na aarthik riddhi

Aur koi chaara bhi nahin hai
Zindagi ki yahee toh hai vidhi
Jitne tajurbe aayein jeevan mein
Hamein milti hai utni siddhi

Har tajurbe ke liye kiya kar
Guruji ka vinamr dhanyawaad
Phir har tajurbe mein paayega tu
Pyaare Guruji ka aashirwaad

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 22, 2019

Om Namaha Shivaya
Aaj Ka Suvichaar 🙏🏻🙏🏻 # 458

             Bhaav Se Karo Simran

Bhaav se karo simran
Pyaar se dharo dhyan
Judte jaao Guruji se
Guruji Hain Bhagwaan

Shradha ke bhaav ke bina
Simran se kuch na mil paayega
Lekin jab hoga prem aur vishwaas
Toh Guruvar hee mil jaayega

Hamaare Guruji rehte hain
Hum sab bhakton ke dil mein
Phir bhi hum naadaan hain
Dhoondhein Unhe bheed bhari mehfil mein

Aaspaas chaahe jo bhi ho raha ho
Hamein simran mein hai dhyan lagaana
Har samasya ka samaadhaan hai simran
Jisne kiya simran, usne yeh jaana

Jitna adhik aur gehra hoga simran
Utna asar hoga dil aur atma par
Tabhi toh aantarik anand milega
Aur vishwaas badhega Parmatama par

Simran bhi ek sukhdaayee amrit hai
Simran ka pyaala hum pee lein
Guru gyan ka anusaran kar ke
Bhalee zindagi hum jee lein

Sansaar toh ik saraay hai
Yahaan rehna hai pal do pal ke liye
Simran toh atma kee dhadkan hai
Bin simran ke jiye, toh kya jiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja