Month: May 2019

May 21, 2018

Om Namaha Shivaya
Aaj Ka Suvichaar 🙏🏻🙏🏻 # 92

     Khandhar Bejaan Nahin Hota 

Sach kehna aasaan nahin hota
Koi insaan Bhagwaan nahin hota
Guruji ki sharan mein hain toh jaanein
Ki Guru sach se anjaan nahin hota

Jiske haath Guruji ne thaamein hon
Veh shaks pareshaan nahin hota
Chaahe achaanak tufaan aa jaaye
Veh bilkul hairaan nahin hota

Kuch baatein aisi hoti hain
Jinka alfaazon mein bayaan nahin hota
Koi toh kahaani sunaati hai har imaarat
Koi khandhar bhi bejaan nahin hota

Guruji ko kehdo apni kahaani aankhon se
Agar honthon se kehne ka kaam nahin hota
Ro lo, jhagad lo, par yeh na kaho
Ki Guruji ko anumaan nahin hota

Duniya mein koi bhakt aisa nahin
Jo Guruji par kurbaan nahin hota
Sach mein koi banda aisa nahin
Jiska Guru ke dar par kalyaan nahin hota

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 21, 2019

Om Namaha Shivaya
Aaj Ka Suvichaar 🙏🏻🙏🏻 # 457

            Keechad Mein Rehkar Kamal Bann Jaao

Keechad mein reh kar kamal bann jaao
Guruji ke sachche bachche bann jaao
Jhooth ka saath dekar girne matt lagg jaao
Abb bhi samay hai, fareb kee neend se jagg jaao

Kyun naadaani karte ho
Kyun apne imaan se tumhaara jhagdaa hai
Guruji ke charnon mein maang lo kshamaa
Abb bhi zyada kuch nahin bigda hai

Duniya ko dhokha dekar ho jaaoge mashhoor
Lekin Guruji toh jaante hain tumhaara kusoor
Bahut kshanbhangur hai tumhara yeh guroor
Jiska chadh gaya hai tumhe fitoor

Guruji kee baat maan lo
Saral kar lo jeevan
Sachchaayee ka saath do
Taaki shaant rahey mann

Jitnee saadagee hogi antarmann mein
Utna hee kum bojh hoga atma par
Jhooth kehne kee zaroorat hee nahin
Bharosa hai agar Guru parmatama par

Saari duniya se chhup jaaye beshaq
Guruji se kuch bhi chhupa nahin
Karmon ka kaanoon hai kuch aisa
Ki phal dene se rukaa nahin

Isliye yeh hum par nirbhar karta ha
Ki hum chaahte hain phal kaisa
Jaisa kaam karenge hum
Guruji phal denge vaisa

Chaahe veh isee janam mein ho
Ya phir ho aagey jaakar
Karmon ka phal padega bhogna
Vaapis yahaan pe aakar

Isliye soch aur karam mein ho sachchaayee
Taaki bhavishya mein apni ho bhalaayee
Achche karmon kee karein kamaayee
Aur pehchaanein Guruji kee vaddi vadiyaayee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 20, 2018

Om Namaha Shivaya
Aaj Ka Suvichaar 🙏🏻🙏🏻 # 91

    Hum Guruji Ke Bina Kuch Nahin

Guruji kee sharan mein hain hum sab
Phir idhar udhar kyun bhatkein
MahaShiv ka aashirwaad paakar bhi
Moh maya mein kyun hum atkein

Guruji hamaare bina bhi Bhagwaan hain
Lekin hum Unke bina kuch nahin
Jo bhi raasta Veh hamein dikhaayein
Yakeenan vahee hai hamaare liye sahi

Phir kaahe ka hamein dambh hai
Kyun sudharne mein vilambh hai
Paap kee gathri ko atma ke kandhon se giraayein
Aao Guruji kee sharan mein aakar tarr jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 20, 2019

Om Namaha Shivaya
Aaj Ka Suvichaar 🙏🏻🙏🏻 # 456

          Guruji Vishaal Taruvar Hain....

Guruji ek vishaal taruvar hain
Sab bhakton ko dete hain mamta kee chhaiyaan
Raah par chalna sikhaate hain
Pyaar se thaam kar sabki baiyaan

Chaand kee chaandni se sheetal hai Guruji ka pyaar
Har bhakt ko deta hai taar
Sooraj ke tej se kaheen oorjaamayee hai Guruji ka prakash
Jo hum sabko deta hai sakaaraatmak sakaash

Indradhanush ke rangon se rangeen hai Guruji kee leela
Jis se bhakton ke safar ka sangeet bantaa hai sureela
Gulab se bhi zyada divya hai Guruji kee khushboo
Jo har bhakt ke deewaane dil ko leti hai chhoo

Kaliyon se bhi sundar hai Guruji kee muskaan
Jisey dekh kar aatee hai bhakton kee jaan mein jaan
Mahasaagar se bhi gehre hain Unke nayn
Jinme jhaank kar milta hai dil ko sukoon aur chayn

Har divya jyot se bhi ujjwal hai Guruji ke mastak ka ujaala
Jo kehta hai humse ki Guru hai sabka rakhwala
Phoolon kee pankhudiyon se bhi komal hain Guruji ke haath
Jo sab bhakton ko detey hain ashirwaad

Srishti mein sabse pyaare hain Guruji hamaare
Hum sab zinda hain Guruji ke sahaare
Hum sab hain Unkee aankhon ke taare
Aur Ve hain poojya parwardigaar hamaare

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 19, 2018

Om Namaha Shivaya
Aaj Ka Suvichaar 🙏🏻🙏🏻 # 90

      Guru Kripa Hai Meetha Ehsaas

Guru kripa se har pal hai suhaila
Guru kripa se tu kabhi na ho akela
Guru kripa se kheton mein hariyaali ho
Guru kripa se ghar mein khush-haali ho

Guru kripa se hothon par Guru naam ho
Guru kripa se simran subah shaam ho
Guru kripa se hriday mein vaas ho bhakti ka
Guru kripa se dil par raaj ho Shiv-Shakti ka

Guru kripa se pavitra ho jaaye shwaas
Guru kripa se gehra ho aatma-vishwaas
Guru kripa se safal ho har shubh prayaas
Guru kripa sach mein hai meetha ehsaas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 19, 2019

Om Namaha Shivaya
Aaj Ka Suvichaar 🙏🏻🙏🏻 # 455

               Mere Dil Se.......

Pyaare Guruji,

Mann ko bhatakne se kaise bachaaoon
Aapke simran mein hee din raat bitaaoon
Yeh duniya na jeene na marne deti hai
Iskee sangdili na ghaav bharne deti hai

Jaantee hoon mai ki Aap karmon ko kum kar ke dete hain
Maantee hoon ki Aap dil ke ghaav bhar dete hain
Phir bhi kabhi kabhi ho jaati hoon pareshaan
Bachchi hoon Aapki, aakhir hoon mai naadaan

Dheeraj kee daat bakshiye
Taaki bechaynee mujhse duur jaaye
Shradha kee saugat deejiye
Taaki meri bhakti par Aapka noor chhaaye

Vishwaas ka deejiye vardaan
Taaki Aapki har baat mai loon maan
Prem ka paath sikhaayiye
Jeene kee raah dikhaayiye

Aap mata pita Hain Aap hee hain swami
Mere dil kee baat jaano Aap antaryaami
Mai toh khatron se hoon bilkul anjaan
Kripa kar surakshit rakhiye mera atma-sammaan

Zindagi kee har chunauti ko kar loon sweekaar
Buss, maangtee hoon Aapse aseem pyaar
Aapke hotey huey kyun mai kisee mushkil se darr jaaoon
Aapke pyaar ke ashirwaad se mai tarr jaaon

Aap Bhagwan Hain, Aapke rangg hain niraale
Jeevan kee naiya kar dee Aapke havaale
Aapka aur mera hai bada hee nirmal naata
Sambhaal lena mujhe har pal mere daata

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 18, 2018

Om Namaha Shivaya
Aaj Ka Suvichaar 🙏🏻🙏🏻 # 89

    Aapke Deedar Ka Divya Nazaara

Guruji, Aapke simran mein jeevan vyateet ho
Dukh ke andhere se mann kabhi na bhaybheet ho
Aapka har bhakt sach ki raah par sadaa chalta rahei
Aapke naam ka diya dil mein sadaa jalta rahei

Vinti hai Aapse, ki hamein lakshya hamaara mil jaaye
Dua hai Aapse, ki jeevan-naiya ko moksh ka kinaara mil jaaye
Guzaarish hai Aapse, ki har besahaay ko Aapka sahaara mil jaaye
Ardaas hai Aapse, ki Aapke divya deedar ka nazaara mil jaaye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 18, 2019

Om Namaha Shivaya
Aaj Ka Suvichaar 🙏🏻🙏🏻 # 454

               Kar Lein Apna Uddhaar

Shaareerik roag na ho koi
Toh bhi zaroori nahin ki hum swaasth hain
Ho sakta hai hamaare mann kee sthiti
Bilkul hee astt-vyast hai

Apne maansik aur bhawnaatmak swaasthya ke liye
Hum karte jaayein Guruji ka simran
Shaareerik swaasthya bhi sudhar jaayega
Aur bharpoor lagne lagega jeevan

Guruji kee baat ko maan kar
Hum karein gupt sewa, paath, aur daan
Simran aur samarpan se paayein shaanti
Aur badhaayein apna adhyaatmik gyan

Adhyaatmik sehat changee honei se
Atma mein ruhaani chetna aayegi
Jeevan ke har moad par yeh chetna
Hamein girne se bachaayegi

Guruji kee razaa mein raazi rehne se
Har tarehn se laabh hamaara hai
Kaisi bhi paristhiti aa jaaye hum par
Guruji ka sadaa sahaara hai

Jis haal mein Ve rakhein hamein, hum karte rahein bardaash
Har haal mein karein shukrana aur har pal Unse karein ardaas
Ki zindagi ke har lamhe mein badhta jaaye hamaara Unpar vishwaas
Aur Unkee bandagi mein hum nyochhaavar kardein apna har shwaas

Zindagi chalti jaa rahi hai ek aviraam raftaar se
Na jaane kab azaad hokar niklenge hum maya ke majdhaar se
Kar lein apna uddhaar hum nek neeyat aur shubh vichaar se
Apne jeevan mein laayein parivartan aaj ke suvichaar se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 17, 2018

Om Namaha Shivaya
Aaj Ka Suvichaar 🙏🏻🙏🏻 # 88

      Chinta Chod Chintan Mein Rahiye

Zindagi mein dard har insaan ko hai
Ilaaj maalum hamaare Bhagwaan ko hai
Phir kyun hum dar dar phirte hain
Kyun dukh ke bojh se girte hain

Kyun hain hum is sach se anjaan
Ki Guruji ke vash mein hai ab jaan
Guruji karenge har mushkil aasaan
Kaise, iska hamein nahin anumaan

Hamaare prashnon ka Veh javaab denge
Jab hamaaraa mann antardhyan hoga
Neembu ke jaise nichodenge bhi
Toh hamaaraa hee kalyaan hoga

Isliye jo bhi dil mein chinta hai
Aap Guruji se bejhijhak kahiye
Unko sab kuch kar samarpan
Chinta chod chintan mein rahiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 17, 2019

Om Namaha Shivaya
Aaj Ka Suvichaar 🙏🏻🙏🏻 # 453

           Guruji Par Dhyan Dharein

Simran karte samay yeh dekhein aur pehchaanein
Ki hum baithey hain Guruji ke charan mein
Unkee hee kripa se jeevan hai, yeh jaanein
Shukrana Unka ki hum hain Unkee sharan mein

Guruji ko jab bhi hum langar ka bhog lagaate hain
Unka diya hua hee Unhe chadhaate hain
Jab Unhee ka diya hua hum khaate hain
Phir kyun hum ghamand se itraatey hain

Hum kitne naadaan hain
Mool gyan se bilkul anjaan hain
Apne aap se bhi sach ko chhupaate hain
Hum toh itne beimaan hain

Moh aur maya ke karmic janjaal mein
Hum aise phans jaate hain
Ki hamein laukik sukh aur aakarshan
Aslee lagne lagg jaate hain

Adhikaar jataane lagte hain cheezon aur logon par
Vaastav mein toh kuch bhi nahin apna hai
Jo sansaar hamein hakeekat lagta hai
Veh toh mehez ek sapna hai

Aur kuch bhi nahin anmol hai
Siwaaye Guruji ke nirmal naam ke
Aao Unke hee bannkar hum
Darshan kar lein paramdhaam ke

Baaki sab mitti mein mil jaayega
Ek Guru ka naam hee reh jaayega
Guru naam se hee uddhaar ho paayega
Simran hee hamein Guruji ke kareeb laayega

Kyun na parivartan laayein apni zindagi mein
Shradha, vishwaas, aur saboori laayein apni bandagi mein
Guruji ne khola hai hamaare liye apna dwaar
Hamein prem se Ve rahein hain pukaar

Guruji hum sab bhakton ke kasht sadaa harein
Aao Guruji ko simar kar hum apna kalyaan karein
Apne mann ko vikaaron se mukt karke mann mein gyan bharein
Baaki baatein chod kar Guruji par dhyan dharein

Nirantar chalta jaa raha hai samay ka pahiya
Kalyuga ke mayavee mahasaagar mein dol rahi hai jeevan kee naiya
Guruji ka simran hee hamein har pal doobne se bachaayega
Ek Guru hee hai jo hamein kinaare par le kar aayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 16, 2018

Om Namaha Shivaya
Aaj Ka Suvichaar 🙏🏻🙏🏻 # 87

Agar Khuda Ka Bandaa Kehlaana Hai

Jhootha dhan kaam nahin aana hai
Hamnei maati mein hee mil jaana hai
Agar Khuda ka bandaa kehlaana hai
Toh shubh karmon ka dhan kamaana hai

Achche karam hongei hamaare
Toh janam maran se mukti hogi
Yahee niyam hai kaayenaat ka
Ki maanav hai ik karam yogi

Guruji ko kiya vaada nibhaayein
Apne andar ki chetna ko jagaayein
Guruji jeene ka tareeka sikhaayein
Unke hukm se hum prerna paayein
Patit se hum paavan bann jaayein
Phir moksh ka raasta Guruji dikhaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 16, 2019

Om Namaha Shivaya
Aaj Ka Suvichaar 🙏🏻🙏🏻 # 452

           Jeevan Ka Salona Saar

Guru naam bin hamaara auda hai gareeb ka
Guru hee aavishkaarak hai har divya tarkeeb ka
Kyun na jod lein Guruji se rishta hum kareeb ka
Aur saump dein Unhe nirmaan apne naseeb ka

De sakte hain Unhe hum apne karmon ka bhaar
Aur saath mein apni shradha aur apna pyaar
Agar maante hain Unhe hum paramatma
Toh kyun na Unke havaale kar dein apni atma

Atma ka mool tatva toh hai vishwaas
Vishwaas hee hai atma kee dhadkan ka ehsaas
Yeh dhadkan hee toh bhakti mein shakti laati hai
Isee shakti se atma mein ruhaani urja aati hai

Guruji mein vishwaas rakhte chalenge hum
Toh hamaari atma ka hoga uddhaar
Mayl aur kalank dhul jaayenge
Beda honei lagega paar

Nek neeyat se dhulne lagenge
Atma par se duraachaari ke daag
Khudgarzi ke andhere mein soyee atma
Chetna kee aawaaz se jaayegi jaag

Guruji kee aseem kripa se
Atma pavitra hoti chalee jaayegi
Aur nekee ke raaste ko apnaakar
Atma sachkhand ko phir paayegi

Ye baatein bahut hee gehri hain
Aur dhyan se samajhne waali hain
Hamaari zindagi mein jitnee uljhanein hain
Ve is vidhi se sulajhne waali hain

Isliye bina kisee bhi shart ke
Guruji se har pal karein vishwaas bhara pyaar
Yeh atma bhi Unkee, ye saansein bhi Unkee
Yahee toh hai jeevan ka salona saar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 15, 2018

Om Namaha Shivaya
Aaj Ka Suvichaar 🙏🏻🙏🏻# 86

               Mera Satguru Aaya

Khushboo ka ik jhonka aaya
Tann mann mera dola
Shaayad mera Satguru aaya
Dil mera yeh bola

Itne mein kadmon kee aahat
Ghar kee chaukhat par aayee
Sooraj se bhi zyada tez
Ek divya roshni chaayee

Maine jaldi se darwaza khola
Dekha Guruji aayein hain
Aur pyaari si saadh sangat
Apne saath Veh laayein hain

Unke divya roop ko dekh
Itni khushi se mai muskuraayee
Unke nyaare darshan paakar
Mai masti mein gungunaayee

Charan sparsh kiye phir mainey
Aur Unhonei aashirwaad diya
Apne haathon ke divya jaadoo se
Mujhe sachkhand ka prasad diya

Dhanya ho gaya jeevan mera
Satguru mere ghar aaya
Usee samay meri aankh khuli
Sooraj mujhe nazar aaya

Guruvar ne swapn mein darshan dekar
Mujh par kitnee kripa barsaayee
Unkee is aseem kripa se
Mai phooli nahin samaayee

Neend khuli jab, dekha mainey
Unke swaroop ka darshan sukhdaayee
Shukrana Guruji aapka
Aapne apni rehmat barsaayee

Aapki kripa se hee Guruji
Aapko mainey pehchaana
Aap hee Param Parmeshwar hain
Yeh satya mainey jaana

Dil se yeh dua karti hoon
Ki sab par Guruji ki kripa barse
Koi bhi bhakt khaali haath na jaaye Satguru ji ke dar se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 15, 2019

Om Namaha Shivaya
Aaj Ka Suvichaar 🙏🏻🙏🏻 # 451

                Tujhmein Tu Nahin

Arey O mannva, tu na ho pareshaan
Arey O mannva, tu na ho hairaan
Duniya ka jo bhi hai dastoor
Veh nahin hai kisee ka kusoor

Karmon ke is jaal se
Na bach sakaa hai koi
Isliye kisee kee kismat hai jaagee
Aur kisee kee taqdeer hai soi

Guruji kee sharan mein aakar mannva
Sunishchit hai tera uddhaar
Tu Guruji par bharosa kar ke dekh toh sahi
Ve suntei hain sabkee pukaar

Na bhatak tu dar dar
Na ho niraash tu
Apna raasta roshan karna hai toh
Khud hee bann prakash tu

Prerna denge Guruji
Tu buss Unka kehna maan
Unhee ke diye huey gyan ko tu
Apni atma ka gehna maan

Teri kismat kee lakeerein badal jaayengee
Guruji kee divyataa mein hai veh shakti
Tere karmon ka adhiktar bhaar Guruji sambhaalenge
Shraddha, prem, aur vishwaas se kar tu Unkee bhakti

Jitna neevanpann tu apne vyavhaar mein basaayega
Utnee adhyaatmik oonchaayee takk tera Guru tujhe pahunchaayega
Tujhe sabr ka meetha phal milega zaroor
Buss, tu tyaag de apna ahem aur guroor

Dekh lena O mannva, veh din zaroor aayega
Jab tu bhataknaa chod dega aur sahee raaste par aayega
Teri chanchaltaa hogi khatm, aur tujhe bholapan raas aayega
Tere roam roam mein Guruji hongei, tujhmein tu nahin reh jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 14, 2018

Om Namaha Shivaya
Aaj Ka Suvichaar 🙏🏻🙏🏻 # 85

  Hamaare Guruji Humse Chaahein

Hamaare Guruji hum bhakton se chaahein
Ki hum gupt paath, daan, aur sewa karein
Vehmon se hum bilkul duur rahein
Na andhvishwaas ko phailaayein ya sahein

Apne mann ko apne vash mein karein
Na ki auron ke kehne par chalein
Behtey paani mein paaon dhona aasaan hai
Lekin usey darrne ki kya zaroorat jiske saath Bhagwaan hai

Guruji kee baat ko hum lein maan
Aur badhaayein apna aadhyatmik gyan
Guruji kehte hain apni atma ko kamzor na karo
Jagg se na daro, aur Guruji se pyaar karo

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 14, 2019

Om Namaha Shivaya
Aaj Ka Suvichaar 🙏🏻🙏🏻 # 450

         Guruji, Aapne Samjhaaya Hai

Nainon mein kuch ashru lekar
Dil mein ik fariyaad liye
Aayee hoon Guruji Aapke dwaar
Ab mera uddhaar keejiye

Aapse hee har saans hai meri
Aapse hee yeh zindagi
Arzi hai is naacheez kee
Ki kartee rahoon Aapki bandagi

Aapka khayaal jab hoga dil mein toh
Seh sakoongee har sadma aur har dukh
Kyunki Aapki snehmayee sharan mein
Praapt hoga mujhe aantarik sukh

Yahee sukh dega paawan prerna
Jeevan kee raah par chalte jaane kee
Aap angg sangg hain, dil ko sukoon rahega
Na zaroorat hogi khush rehne ke liye kisee bahaane kee

Aapki khudaayee ka aalam
Is kadar chhaaye meri shakhsiyat par
Ki ruhaaniyat ka suroor chhaa jaaye
Sadaa ke liye meri haisiyat par

Zindagi kee bhaag daud mein Aapne yeh samjhaaya hai
Aap hee mere apne hain, baaki har koi paraaya hai
Duniya ne toh ek baar nahin, baar baar thukraaya hai
Kewal Guru hai, jo hameshaan kaam aaya hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 13, 2018

Om Namaha Shivaya
Aaj Ka Suvichaar 🙏🏻🙏🏻 # 84

       Guruvar Tere Charnon Mein

Guruvar tere charnon mein
Ab har saans hai meri
Tumne hee sambhaala mujhko
Aayee jab shaam ghaneri

Jab dil ko pahunchi chot
Dekh ke jagg kee hera-pheri
Tumne hee toh aakar Guruji
Baahein thaamee meri

Tumne ummeed ka chirag jalaaya
Jab aayee niraasha kee raat andheri
Teri sharan mein mai rahoon
Sadaa bann ke beti teri

Tumhaara shukrana karne mein
Naa kabhi mujhe ho deri
Sach mein ab yeh dil bhi tera
Aur ab yeh rooh bhi teri

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 13, 2019

Om Namaha Shivaya
Aaj Ka Suvichaar 🙏🏻🙏🏻 # 449

             Guruji Kee Sadhna

Guruji kehte hain simran karo
Shradha, prem, aur vishwaas se
Dhairya se dhyan karo Guruji ka
Ruhaani laabh uthaao apne praayas se

Jitna gehra hoga tumhaara dhyan
Utna apne kareeb tum Guruji ko paaoge
Guruji mein sampoorntaa se leen hokar
Swayam mein parivartan tum laaoge

Vyavhaar sudharne lagega tumhaara
Sthirtaa tum mein aa jaayegi
Jis shanti kee talaash hai tumhe
Veh dheere dheere tum mein samaayegi

Guruji badhaayenge atma-vishwaas tumhaara
Saahas bhi badh jaayega
Guruji madad karenge har moad par
Tumhe anand aur utsaah aayega

Jaise jaise sadhna ke safar mein aagey badhogey
Fikr aur khauf se azad ho jaaoge tum
Jitna leen ho jaaoge sadhna mein
Utna hee Guruji ko mehsoos kar paaoge tum

Saadhna karne se kum ho jaayega
Karmon ka bhaar tumhaara
Ekaagrachit honei lagega mann
Aur na bhatkega maara maara

Sadhna kee sakaaratmak urja se
Mit jaayegi tumhari har laachaari
Sadhna se hee kar paaoge tum
Is shareer ko tyaagne kee tayaari

Sadhna mein swayam ko khokar
Is mukaam takk pahunch jaaoge
Ki maut bhi aa jaayegi agar
Tum bilkul na ghabraaoge

Buss phir zindagi kee yeh yatra
Ho jaayegi badi aasaan
Guru milan kee manzil zaroor milegi
Jab bhi tann se niklenge praan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 12, 2018

Om Namaha Shivaya
Aaj Ka Suvichaar # 83

               Jeevan Ka Aadhaar

Bhookhe ko khilaayein ann dekar
Daridrataa ko mitaayein dhann dekar
Vinaash se bachaayein bhukamp mein
Shanti dilaayein hamein aatank mein

Har sankat ko kamm kar ke katwaayein
Maarg se har baadha ko hataayein
Bhooley ko sahi raah dikhaayein
Bhatkey huey ko sahaara dilaayein

Hamein gyan kee roshni takk pahunchaayein
Hum sabka kalyaan Ve karte jaayein
Sabki zindagi mein Khush-haali phailaayein
Tabhi toh saari sangat ke pyaare kehlaayein

Aur kya kahoon Guruji ke baare mein
Kabhi na chodein beech majdhaar
Ab Guruji hee hain praanon mein bastey
Vahee hain hamaare jeevan ka aadhaar

Jai Guruji
Dhirja

May 12, 2019

Om Namaha Shivaya
Aaj Ka Suvichaar 🙏🏻🙏🏻 # 448

       Bahut Meharbaan Hain Guruji

Apne poojya Guruji mein
Milee hai mujhe maiya meri
Har roop mein lagaayee hai kinaare
Pyaare Guruji ne naiya meri

Maa kee mamta kee karunamayee varsha Karte hain Guruji mujhpar har pal
Kuch kehna bhi nahin padta mujhe
Aur mere kasht jaatey hain tal

Neend naa aaye toh Apne sakaash se
Mamta bharee lori sunaate hain
Mann ashaant hota hai jab
Toh dheeraj rakhna sikhaate hain

Mujhe dil par chot lagtee hai jab
Ve mere hissey ke ashru bahaate hain
Mera parishram safal karne ke liye
Mere liye Ve Apne Aap ko thakaate hain

Guruji mein mujhe meri taqdeer dikhtee hai
Guruji mein meri maa kee tasveer dikhtee hai
Murshid hain mere, aur Bhagwaan Hain Guruji
Jis bhi roop mein dekhoon, bahut meharbaan hain mere Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja