Month: May 2019

May 12, 2018

Om Namaha Shivaya
Aaj Ka Suvichaar # 83

               Jeevan Ka Aadhaar

Bhookhe ko khilaayein ann dekar
Daridrataa ko mitaayein dhann dekar
Vinaash se bachaayein bhukamp mein
Shanti dilaayein hamein aatank mein

Har sankat ko kamm kar ke katwaayein
Maarg se har baadha ko hataayein
Bhooley ko sahi raah dikhaayein
Bhatkey huey ko sahaara dilaayein

Hamein gyan kee roshni takk pahunchaayein
Hum sabka kalyaan Ve karte jaayein
Sabki zindagi mein Khush-haali phailaayein
Tabhi toh saari sangat ke pyaare kehlaayein

Aur kya kahoon Guruji ke baare mein
Kabhi na chodein beech majdhaar
Ab Guruji hee hain praanon mein bastey
Vahee hain hamaare jeevan ka aadhaar

Jai Guruji
Dhirja

May 12, 2019

Om Namaha Shivaya
Aaj Ka Suvichaar 🙏🏻🙏🏻 # 448

       Bahut Meharbaan Hain Guruji

Apne poojya Guruji mein
Milee hai mujhe maiya meri
Har roop mein lagaayee hai kinaare
Pyaare Guruji ne naiya meri

Maa kee mamta kee karunamayee varsha Karte hain Guruji mujhpar har pal
Kuch kehna bhi nahin padta mujhe
Aur mere kasht jaatey hain tal

Neend naa aaye toh Apne sakaash se
Mamta bharee lori sunaate hain
Mann ashaant hota hai jab
Toh dheeraj rakhna sikhaate hain

Mujhe dil par chot lagtee hai jab
Ve mere hissey ke ashru bahaate hain
Mera parishram safal karne ke liye
Mere liye Ve Apne Aap ko thakaate hain

Guruji mein mujhe meri taqdeer dikhtee hai
Guruji mein meri maa kee tasveer dikhtee hai
Murshid hain mere, aur Bhagwaan Hain Guruji
Jis bhi roop mein dekhoon, bahut meharbaan hain mere Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 11, 2018

Om Namaha Shivaya
Aaj Ka Suvichaar 🙏🏻🙏🏻 # 82

           Har Saans Mein Shukrana

Sab kuch Guruji ke haath mein hai
Har pal Satguru saath mein hai
Unka komal sneh jo mil jaaye
Is dil ka udaas upwan khil jaaye

Guruji ke charan mein nishchay hee
Milega sabko maa aur pita ka pyaar
Guruji kee sharan mein yakeenan
Har bhakt ka hoga uddhaar

Mil jaaye hamein jo Guru naam ka khazana
Phir chaahe poora jagg ho jaaye begaana
Magn hoga Guruji mein yeh dil hokar deewana
Aur har saans mein hoga Guruji ka beintehaa shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 11, 2019

Om Namaha Shivaya
Aaj Ka Suvichaar 🙏🏻🙏🏻 # 447

Aapke Pyaar Mein Magn Hui Kuch Aise

Pyaare Guruji,

Aapke pyaar mein magn hui kuch aise
Ki apni koi sudbudh na rahee
Yaad rakhne kee koshish karti hoon
Har vo baat jo hai Aapne kahee

Basein Hain Aap mere roam roam mein
Aapki kripa se leti hoon har shwaas
Jidhar bhi dekhoon Aap Hain dikhte
Mere bheetar aur mere aas paas

Meri deewaanagee par hasta hai zamaana
Mai keh detee hoon, ki bahut haseen hai yeh safar
Buss, Aap hee Aap mein ramm jaaye meri atma
Chaahe poore jahaan se ho jaaoon mai bekhabar

Aap hakeekat Hain, na Hain Aap koi khwaab
Aapki leela ka har anubhav hai lajawaab
Aapki karuna se pooran hota hai har kaaj
Samay ka har pal Aapke hukm ka hai mohtaaj

Guruji, kripa keejiye ki chaltee rahoon Aapke dikhaaye huey raaste par
Apne jeevan ke har pehlu ko qurbaan kar doon
Aapse judey huey is nirmal vaaste par

Aap hee ek sachchaayee Hain, baaki sab toh vyarth hai
Aapke simran mein jeena hee zindagi ka arth hai
Kyun mai khush-haal jeevan ke liye maangoon koi bhi mannat
Jab Aapke kamal charnon mein mujhe milee hai suneheri jannat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 10, 2018

Om Namaha Shivaya
Aaj Ka Suvichaar 🙏🏻🙏🏻 # 81

           Guru Prem Ka Shringaar

Bhatkee hui hai jeevan kee naiya
Isey mukti ke kinaare par lagaayein
Farz ko sachhayee se nibhaayein
Sewa simran mein dhyan lagaayein

Phoolon kee bhanti hum khilein
Laayein sabke jeevan mein bahaar
Guruji chaahte hain ki hum sab
Aapas mein baantein aseem pyaar

Jo anmol jeevan Guruji ne diya hai
Usme paawan preet kee jyot jalaayein
Aur Guru prem ke sowmya shringaar se
Hum sadaa ke liye sajj sanwar jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 10, 2019

Om Namaha Shivaya
Aaj Ka Suvichaar 🙏🏻🙏🏻 # 446

                        Simran

Simran ka har pal jo miley
Veh hai ek bahumoolya mani
Koi bhi ratna is-se anmol nahin hai
Kyunki isme basey Guru naam kee dhvani

Simran mein dhyan lagta hai jab
Toh dikhtee hai divya jyoti
Jo kabhi kabhi puraane janam kee
Ruhaani yaatra se hai judee hoti

Jab bhi simran ka miley avsar
Usey maan lena Guruji ka prashad
Shradha aur prem se karna simran
Usme basaa hai Guruji ka ashirwaad

Guruji ke naam ko japte japte
Guruji mein magn ho jaana
Simran mein baithey baithey hee
Guruji ke darshan paana

Bahut aasaan hai mann ka bhatak jaana
Saral hai maya mein saanson ka atak jaana
Isliye simran mein Guruji par dhyan dharo
Aur har saans mein Guruji ka gungaan karo

Simran dikhaaye bhakti se shakti ka vaasta
Simran hai janam maran se mukti ka raasta
Simran se hee adi, simran mein hee anant
Simran se praapt ho jaayein Bhagwant

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 9, 2018

Om Namaha Shivaya
Aaj Ka Suvichaar 🙏🏻🙏🏻 # 80

                  Tu Dheeraj Dhar

Guruji tujhe pukaar rahein hain
Sun le, na tu inkaar kar
Kuch achche karam toh kiye honge toone
Jo pahuncha hai Unke mazaar par
Tu dheeraj dhar, tu dheeraj dhar

Tera aane wala kal sudhaar rahein hain
Tu is baat ka iqraar kar
Teri mushkilon ke baare mein jaante hain
Na zikr unka tu baar baar kar
Tu dheeraj dhar, tu dheeraj dhar

Moh maya ke jaal mein na ulajh tu
Guruji ki saadagi se pyaar kar
Guruji swayam hee Bhagwan hain
Unke charche tu beshumaar kar
Tu dheeraj dhar, tu dheeraj dhar

Andheri raat jaayegi, sunehri subah aayegi
Na jaag kar tu fikr mein dil ko bekaraar kar
Ek Guruji hee hain jo aayenge tere liye
Sach mein saat samundar paar kar
Tu dheeraj dhar, tu dheeraj dhar

Mayavee jeet ke jhoothe dilaase par
Tu ik pal bhi na aitbaar kar
Guruji tabhi tujhe taarenge aye bande
Jab tu aayega sab kuch haar kar
Tu dheeraj dhar, tu dheeraj dhar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 9, 2019

Om Namaha Shivaya
Aaj Ka Suvichaar 🙏🏻🙏🏻 # 445

           Bhakti Ka Deewanapan

Guru prem kee masti mein dil deewaana ho gaya
Har dukh jo apna lagta thaa veh begaana ho gaya
Guruji se baatein karne ka niyam rozaana ho gaya
Kya fark padta hai agar zaalim yeh zamaana ho gaya

Sachchaayee toh hai Bhagwaan mein bastee
Guruji swayam Bhagwaan hain
Unhonei hee toh sambhaala hai hamein
Varna hum toh kitne naadaan hain

Guruji ke saamne gumm kee numaaish karnee bilkul nahin zaroori
Ve samajhte hain hamaari har duvidha aur har majboori
Unhee ke paas hai hamaari har mushkil ka hal
Ve uddhaar zaroor karenge, aaj nahin toh kal

Duniya mein ho chaahe koi raja, runk, fakeer
Guruvar pyaare ne har insaan ko diya hai shareer
Guruji kehte Hain is tann ko hum sachchee sewa mein lagaayein
Vinamrata se ek dooje kee madad karke apna ahem ghataayein

Hamaare Guruji bade dil waale hain
Ve hee jaan bachaane waale hain
Jo bhi kasht humne kiye Unke havaale hain
Unhonei Apni divyataa se sambhaale hain

Phir kyun na hum apne saare dukh dard Unhee ko saump kar
Unhee ke sowmya simran mein apna aaj aur kal bitaayein
Bin kuch maangey karte rahein Unka Shukrana
Aur Unkee ruhaani rehmat ka meetha phal paayein

Zamaane ka kya hai yeh toh rukh badalta rahega
Guruji kee kripa ke bin yeh dil kaise yeh sab sahega
Kyun na hum Guruji aur Unkee divyataa mein kho jaayein
Aur Guru bhakti ke deewaanepan mein nirmal anand paayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 8, 2018

Om Namaha Shivaya
Aaj Ka Suvichaar 🙏🏻🙏🏻 # 79

                Sabse Badee Baat

Guru kripa bin phool murjhaayein
Guru kripa bin deep bujh jaayein
Guru bin chhaaye ghor andhera
Guru kripa se har pal ho savera

Guru kripa bin sab sukh ganvaaya
Guru kripa bin sab hai moh maya
Guru kripa se vish mein amrit ka prabhaav
Guru kripa se nirmal ho jaaye swabhaav

Guru kripa se miley jeevan daan
Guru kripa se miley mool gyan
Aur sabse badee baat toh yeh hai ki
Guru kripa se hee milein Bhagwaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 8, 2019

Om Namaha Shivaya
Aaj Ka Suvichaar 🙏🏻🙏🏻 # 444

            Guruji Ke Pyaar Ka Asar

Guruji ke pyaar ka asar kuch is kadar hai
Ki ab toh Unke siwa kuch na aata nazar hai
Guruji dikhaayee dete hain prakriti ke har nazaare mein
Unkee chhavi sushobhit hoti hai har galee aur chaubaare mein

Chal detee hoon Guruji ka naam lekar
Raasta khud bakhud bann jaata hai
Dil chaahe kitna bhi pareshaan kyun na ho
Guruji ka naam lete hee shaant ho jaata hai

Guruji bastey hain mere khayaalon mein
Unkee aawaz goonjtee hai mere kaanon mein
Sapna nahin, hakeekat hai Unka yeh saath
Tabhi toh be-jhijhak karti rehtee hoon Unse baat

Har taraf chhaa gaya hai aalam Guruji ke pyaar ka
Pheeka lagta hai prem mata pita bhai bandhu aur yaar ka
Intazaar hai Guruji se divya deedar ka
Har lamha bahut lamba lagta hai is intazaar ka

Is intazaar se milegee jo manzil, veh hogi itnee nyaari
Guruji, apni har saans mein paaoon mai Aapki maujoodgee pyaari
Aap sameep hain toh yeh manzil nahin hai duur
Aapka aashirwaad sangg hai toh yeh milegi zaroor

Isee vishwaas ko dil mein liye masti mein likhtee jaati hoon
Aap likhwaane waale hain, yeh soch ke phoolee nahin samaatee hoon
Kalam bhi Aap, vichardhara bhi Aap, bhaav bhi Aap hain Guruji
Jis Khuda kee rehmat ne mujhe sambhaala hai, Ve Aap hee hain Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 7, 2018

Om Namaha Shivaya
Aaj Ka Suvichaar 🙏🏻🙏🏻 # 78

      Ab Kee Baar Inkaar Na Karna

Pathhar ko paaras banaayein Guruji
Har pal tujhe saahas dilaayein Guruji
Khud jaagein tujhe sulaayein Guruji
Khud royein par tujhe hasaayein Guruji

Teri mushkil ka hal bataayein Guruji
Tujhe himmatwala banaayein Guruji
Tere kashton ka khaatma karein Guruji
Shaant teri atma karein Guruji

Tujhe jeene ka tareeka sikhaayein Guruji
Aur moksh takk bhi le jaayein Guruji
Isliye ab kee baar inkaar na karna
Jab Apne paas tujhe bulaayein Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 7, 2019

Om Namaha Shivaya
Aaj Ka Suvichaar 🙏🏻🙏🏻 # 443

              Tu Akela Nahin Hai

Aye Guruji ke bande, tu udaas na ho
Aye Guruji ke bande, tu niraash na ho
Guruji ne thaama hai tera haath
Har kadam par Ve hain tere saath

Tujhe maanav jeevan dekar
Tere Guruji ne tujhe baksha hai
Zindagi ke har pal mein tera Guru
Kar raha teri raksha hai

Nishchint hokar tu chalta chal
Guruji sab kuch sambhaal rahein hain
Tujhe toh andaaza bhi nahin hai
Ki Ve tere kitne saare kasht taal rahein hain

Tu Shukrana kar Unka har pal
Is-se badhega tera atma-bal
Shraddha, saboori aur vishwaas
Inse seench le tu apna har shwaas

Guruji ko tu dil mein basaa le sadaa ke liye
Ve jalaayenge tere liye sainkadon asha ke diye
Tu hairaan aur pareshaan na ho, jeevan ka yahee rangg hai
Tu akela nahin hai, Guru tera tere sangg hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 6, 2018

Om Namaha Shivaya
Aaj Ka Suvichaar 🙏🏻🙏🏻 # 77

           Azmaa Kar Dekh Leejiye

Guruji ke darbar mein
Na dekhi jaatee hai haisiyat
Yeh veh sthaan hai jahaan
Parkhi jaatee hai neeyat

Ahem aur paakhand kee
Hoti nahin hai izzat
Uskee Guruji suntei hain
Jo dil se karta hai ibaadat

Jo bhakt karey shukrana
Uski chamak jaati hai kismat
Uske liye yeh zindagi
Bann jaati hai jannat

Yakeen nahin aata
Toh azmaa kar dekh leejiye
Pachhtaava na hoga aapko
Buss, thoda sabr keejiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 6, 2019

Om Namaha Shivaya
Aaj Ka Suvichaar 🙏🏻🙏🏻 # 442

              Musaafir Tu Na Darr

Raat ke andhere se musaafir tu na darr
Raaste mein chalte chalte tu gum gaya agar
Guruji teri raahon mein jalaayenge diye
Aur andhere ko Ve mitaayenge tere liye

Mushkilon ke pahaad jab tujhe denge chunauti
Tu apne utsah mein na karna koi katauti
Kyunki Guruji kee kripa se vijay hogi teri
Guru kripa tere sangg hogi har ghadi

Archanon kee dhoop mein jab tu mehanat ka paseena bahaayega
Guruji ka aashirwaad tere liye sunehera bhavishya banaayega
Unke naam ke amrit se sheetalta hogi tujhe naseeb
Jahaan bhi tu hoga, Guruji hongei tere kareeb

Chalte chalte manzil kee oar agar tu thakk
jaayega
Guruvar tera haath thaamkar tujhe lakshya takk laayega
Apne vishwaas aur prem ko tu rakhna barkaraar
Aur dekhte jaana Guruji kee leela aparampaar

Tere jeevan ke akash ko indradhanush ke rangon se sajaa denge Guruji
Tere dil ke har ghaav ko marham aur davaa denge Guruji
Guruji ko sab kuch samarpan karke jo tripti tujhe milegi
Uss-se tere jeevan kee bagiya kee har kalee khilegi

Banjar zameen se bann jaayega upavan tera jeevan
Guruji ke pyaar mein gadd gadd ho jaayega tera mann
Satguru tujhpar yoon apni kripa barsaayega
Ki tujhpar Unkee divyataa ka noor chhaa jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 5, 2018

Om Namaha Shivaya
Aaj Ka Suvichaar 🙏🏻🙏🏻 # 76

          Guruji Kee Sharan Mein

Guruji ka har bhakt se hai
Ik aisa anupam naata
Jo bhi Unki sharan mein aaye
Veh apna lakshya hai paata

Jiske dil mein Guru bhakti hai
Usko milti phir bahut shakti hai
Har kasht ka saamna karne kee
Usey nahin zaroorat phir darne kee

Guruji apne divya andaaz se
Kaatenge hamaari saari balaayein
Aao ab Unkee sharan mein aakar
Jeevan ko hum sukhad banaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 5, 2019

Om Namaha Shivaya
Aaj Ka Suvichaar 🙏🏻🙏🏻 # 441

       Aao Samjhein Guruji Ka Ishaara

Hum sab mein hai divyataa ka vaas
Aao, usey dhoondhne ka karein hum praayas
Guruji raasta rahein hain dikha
Sudharne ka tareeka rahein hain sikha

Guruji mein hamaari jo bhakti hai, usey pehchaanein
Apne bheetar kee divya shakti ko hum jaanein
Vairaagya lekar jungle mein rehne ke kissey ho gaye puraane
Duniya kee bheed mein rehkar vikaaron ko tyaag kar banein sayaane

Iraada nek rakhein, baakee Guruji sambhaalenge
Aadhyaatmik unnati kee karein koshish, raasta Guruji dikhaayenge
Mushkil jo aayegi koi, toh upaay Guruji nikaalenge
Neeyat hamaari ho sachchee, manzil takk Guruji pahunchaayenge

Hamein toh buss rakh kar Guruji par bharosa
Unkee dikhaayee hui raah par chalte jaana hai
Jaise bhi karam karenge hum
Unka phal hamein hee paana hai

Achche bano, achche kaam karo, Guruji yeh kehte hain
Phir kyun hum burey karmon ka bhaar sehte hain
Bhagwaan baahar nahin, hamaare dil mein rehte hain
Ve jaante hain jo bhi bhaav hamaare mann mein behte hain

Kyun na samajh jaayein Guruji ka ishaara?
Kyun Unhe kehna pade hamein dobara?Koshish karna hai kaam hamaara
Aur Guruji ka hai har pal sahaara

Hamaari koshish zaroor safal hogi
Hamaare sir par Guruji ka aashirwaad hai
Hum sab bahut bhaagyashaali hain
Hamaare paas Guru prem ka poojya prasad hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 4, 2018

Om Namaha Shivaya
Aaj Ka Suvichaar 🙏🏻🙏🏻 # 75

         Apne Pyaare Guruji Ke Liye

Apne pyaare Guruji Ke liye
Pyaara sa jhoola laaoon
Bade chaav se phoolon se
Phir jhoole ko mai sajaaoon

Kuch phoolon kee pankhudiyon ko
Jhooley ki gaddi par bichhaaoon
Shradha se Unka swaagat kar ke
Mangalmayee geet mai gaaoon

Charan sparsh karke Guruji ke
Unko jhooley mein bithaaoon
Phir jhoole kee dori ko thaamey
Prem se jhoola jhoolaaoon

Guruji divya shubhashish dein
Aur mai apna sheesh nivaaoon
Unke naam ke deep mein mai
Baati bann kar samaa jaaoon

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 4, 2019

Om Namaha Shivaya
Aaj Ka Suvichaar 🙏🏻🙏🏻 # 440

         Aao, Prakriti Se Seekhein

Paani neeche kee oar behta hai
Neevan ho ja, veh kehta hai
Taral hokar jeena aasaan hai
Zindagi Guruji ka diya imtehaan hai

Pathhar apni sthirtaa dikhaaye
Dridh atma-bal ka paath sikhaaye
Vahee pathhar rukaavat bann kar sharmaaye
Kisi ke raaste mein baadha na bano, hamein yeh bataaye

Phoolon se bhi shiksha miltee hai
Kitne pyaar se har kalee khiltee hai
Phoolon kee bhanti khilkhilaate rahein
Mushkil mein bhi koshish karein ki muskuraate rahein

Kaante bhi ugtey hain phoolon ke sangg
Phir bhi barkaraar rehta hai phoolon ka rangg
Rehna padega kayee logon ke sangg
Lekin hum achchaa rakhein apne jeene ka dhangg

Vriksh ugta hai har sheher aur gaaon mein
Raahat deta hai raahi ko sheetal chhaaon mein
Kitne phal dekar bhookh hai mitaataa
Panchhee ko apni daalee par bithaataa

Chidiya kitne chaav se ped mein ghonsla banaatee
Usee mein apne bachchon ko veh suraksha se rakh paatee
Kyun na vriksh se seekhein aur doojon ke kaam aayein
Niswaarth sewa ka bhaav rakhein aur uss se shanti paayein

Aasmaan jitna aseem hai
Utna hee dil hamaara udaar ho
Duniya ke rangmanch par kharey utrein
Chaahe hamaara koi bhi kirdaar ho

Soorya ke jaise phailaayein prem ka prakash
Aise chamkein jaise chaand aur taaron se sajaa hua akash
Raat ke andhere se seekhein rakhna dheeraj
Khiley rahein jaise keechad mein neeraj

Kitne prassann hongei Guruji humse
Agar hum aise jeene lagein
Neevenpann aur sachchaayee ko apnaayein
Aur doojon ke kaam aa sakein

Nekee aur anukampaa kee raah par chalein
Niswaarth sewa mein lagaayein dil aur jaan
Saralta aur taraltaa apnaayein
Karte rahein Guruji kee mahima ka gungaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 3, 2018

Om Namaha Shivaya
Aaj Ka Suvichaar 🙏🏻🙏🏻 # 74

               Phool Aur Kaante

Phool khilaane kee koshish mein
Kaante bhi hain ugtey
Nahin hataao unko toh phir
Kuch kuch kabhi hain chubhtey

Achche karmon ka beej bo lein hum
Toh moksh ke phool hain khilte
Varna ashaanti, chinta, aur gumm
Ke dukhdaayi kaante hee milte

Apne jeevan ko phoolon ki bagiyaa banaayein
Pyaar aur sadbhawna kee khushboo phailaayein
Aur Guruji ke ‘bandey’ bann kar hum
Sadaa Unka divya aashirwaad paayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 3, 2019

Om Namaha Shivaya
Aaj Ka Suvichaar 🙏🏻🙏🏻 # 439

              Aap Hee Hain, Guruji

Prem ka prakash
Sadbhavna ka sakaash
Ashirwaad ka akash
Aap hee Hain Guruji

Sneh kee seher
Praarthana ka peher
Mamta kee mehar
Aap hee Hain Guruji

Shanti ka saagar
Garima kee gaagar
Chayn kee chaadar
Aap hee Hain Guruji

Dhanyataa ka dhan
Mahaanta ka mann
Tej se bharaa tann
Aap hee Hain Guruji

Ahem ka antt
Atma-bal anant
Bholenath Bhagwant
Aap hee Hain Guruji

Urja ke ujaale
Raah ke rakhwaale
Sabse bade dil waale
Sirf Aap hee Hain Guruji

Sab bhakton ka sansaar
Sumangal ka sanskaar
Adiyogi Ka Avataar
Aap hee Hain Guruji

Sachchaayee ka sangeet
Mata pita aur meet
Parwardigaar kee preet
Aap hee, Aap hee Hain Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja