Month: June 2019

June 30, 2018

Om Namaha Shivaya
Aaj Ka Suvichaar 🙏🏻🙏🏻 # 132

                    Aapki Kripa Se

Guruji zindagi mein aaye Aap
Bhar gaya is dil ka ghaav
Aapko khush rakhna chaahe
Hamaare dil ka sachchaa bhaav

Aapka hamaare jeevan par
Hua aisa prabhaav
Ki aapke pyaar ko paakar
Na raha koi bhi abhaav

Hamaara sadaa achchaa rahe
Sabke saath swabhaav
Ab toh aapke darshan ka
Badhtaa jaata chaav

Aapki kripa se hee pahunchegi
Kinaare par apni naav
Chaahe zindagi mein aayein
Jitne bhi utaar-chadhaav

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 30, 2019

Om Namaha Shivaya
Aaj Ka Suvichaar 🙏🏻🙏🏻 # 497

    Guru Naam Ke Chintan Kee Leela

Jahaan vishwaas ho vahaan chinta ka kya kaam
Buss lete chalo shraddha se Guruji ka naam
Guru naam ke chintan kee leela hai aparampaar
Guruji kabhi na chodenge tumhe beech majdhaar

Haan, kabhi kabhi rona aata hai kayee haalaat mein
Aur kayee prasang chhupe hotei hain ek hee sawaalaat mein
Lekin jabb Guruji par atal vishwaas hai
Toh yaad rakho, raahat bilkul hee paas hai

Raahat milegi har chinta se
Raahat milegi karmon ke bhaar se
Zindagi zaroor sanvar jaayegi
Guruji ke diler dulaar se

Guruji kee razaa mein hogi manzoori
Phal laayegi tumhaari shraddha aur saboori
Karmon kee yatra na reh jaaye adhoori
Yeh baat bhi toh hai bilkul zaroori

Guruji kee pooja se mann ko milegi shanti
Tumhaare noor mein chamkegi Guruji kee kanti
Karmon ko jhelna aasaan hoga
Jabb tumhaare sangg Bhagwaan hoga

Buss, phir aur kuch kyun sochna
Na karo pichhle karmon kee aalochanaa
Guru kripa se kar lo tum apna uddhaar
Bade bhagya hain ki Guruji ne kiya tumhe sweekaar

Vahee hain Param Parmeshwar
Mushkil se Vahee nikaalenge
Samarpan kar diya hai Unko
Toh Vahee sab sambhaalenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 29, 2018

Om Namaha Shivaya
Aaj Ka Suvichaar 🙏🏻🙏🏻 # 131

             Kayinaat Ka Kaayda

Khwaahishein kitni adhik hamaari
Par mehanat karein itnee kumm
Tamanna hai ki hum khush rahein
Phir kyun doosron ko dete hain gumm

Niyati chaahein paaras ke jaisi
Lekin karam hamaare khotey
Baatein itnee badi hamaari
Parantu vichaar hain itne chhote

Bol hamaare itne aadarshavaadi
Aur khayaalaat hain kitne tuchh
Oopari vyavhaar itne sunehere hamaare
Hakeekat hai aur hee kuch

Guruji kehte hain ki hum sudhar jaayein
Bhatak kar na idhar udhar jaayein
Saadagi aur sachchaayi apnaayein
Apna aadhyaatmik gyan badhaayein

Guruji kee baat maan lene mein
Hamaara hee toh faayada hai
Guru hai Govind se bhi mahaan
Yahee kainaat ka kaayada hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 29, 2019

Om Namaha Shivaya
Aaj Ka Suvichaar 🙏🏻🙏🏻 # 496

             Sabse Khaas Ehsaas

Guruji kahein hum bhakton se
Na karein hum tark, aur chod dein ahem
Guruji chaahein hum bachchon se
Ki tyaag dein hum andhvishwaas aur vehem

Apni tuchh buddhi ke daav-pech lagaakar
Hum sochte hain swayam ko samajhdaar
Phir bhi hamaari har naadaani ko
Maaf kar dete hain hamaare parwardigaar

Maati ke putle hee toh hain hum
Phir kyun itna itraate hain
Sukh mein simran bhool kar
Baad mein hum pachhtaate hain

Kyun na Guruji ko yaad karein har pal
Guruji se hee hamaara har shwaas hai
Hamaare jeevan ke har anubhav mein
Guruji kee divyataa sabse khaas ehsaas hai

Jab paristhiti apne pratikool ho
Himmat lein hum Guruji kee shakti se
Bahut dayaalu aur pyaare hain Guruji
Prabhaavit ho jaate hain sachchee bhakti se

Mann kee aankhon mein basaakar shraddha aur vishwaas
In aankhon se jeevan ko dekhne ka hum karein agar prayaas
Hamein Guruji kee mahima dikh jaayegi zaroor
Aur veh hamaare jeevan mein rangg laayegi zaroor

🌹🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 28, 2018

Om Namaha Shivaya
Aaj Ka Suvichaar 🙏🏻🙏🏻 # 130

                  Aadi Aur Anant 

Har soch mein Guruji
Har kaam mein Guruji
Sukh mein bhi Guruji
Aur dukh mein bhi Guruji

Mere bheetar bhi Guruji
Mere baahar bhi Guruji
Mere angg sangg Guruji
Mere roam roam mein Guruji

Janmadaata bhi Guruji
Annadaata bhi Guruji
Paalanhaar mere Guruji
Bakshanhaar bhi Guruji

Jyotiswaroop mere Guruji
Shantiswaroop mere Guruji
Prem ka saagar mere Guruji
Kripa kee gaagar mere Guruji

Jaagte huey Guruji
Sotey huey Guruji
Hastey huey Guruji
Rotey huey Guruji

Maun mein Guruji
Shor mein Guruji
Har phool mein Guruji
Har pattey mein Guruji

Asthaa bhi Guruji
Utsaah bhi Guruji
Har ann mein Guruji
Kann kann mein Guruji

Idhar bhi Guruji
Udhar bhi Guruji
Dharti par Guruji
Akash mein bhi Guruji

Bhai bhi Guruji
Bandhu bhi Guruji
Mata bhi Guruji
Pita bhi Guruji

Raasta bhi Guruji
Aur manzil bhi Guruji
Kashish bhi Guruji
Ashish bhi Guruji

Taal mein Guruji
Har haal mein Guruji
Ab toh aadi bhi Guruji
Aur anant bhi Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 28, 2019

Om Namaha Shivaya
Aaj Ka Suvichaar 🙏🏻🙏🏻 # 495

Jab Jab Hum Guruji Ko Bulaayenge

Mann kee mayli soch se dooshit ho gayi atma
Udtee hui dhool aur mitti se malin hua shareer
Shukrana karna bhool jaatey hain Guruji ka
Phir kyun hum kehte hain ki doob gayee hai taqdeer

Chinta nahin , hum karein chintan
Shikaayat nahin, hum karein vandan
Maathe par lagaayein shukrana ka chandan
Aur Guruji ke sangg baandh lein har janam ka bandhan

Apni vichardhara ko sudhaarein
Aur Guru simran kee oar moad lein
Praarthana karein Guruji se
Aur sab kuch Unhee par chod dein

Guruji kee raza se darne ke bajaaye
Unkee marzi ko neeven hokar hum sweekaar lein
Guruji hee hain parwardigaar hamaare
Nishchint hokar unhei apni niyati ka hum adhikaar dein

Bigdee huee taqdeer sanvar jaayegi
Dekhte hee dekhte zindagi badal jaayegi
Kasht toh phir bhi aayenge jeevan mein
Lekin unhei jhelne kee himmat mil jaayegi

Guruji ke ashirwaad se milega aashvaasan
Guruji ke pyaar se milega protsaahan
Zindagi jeene kee kalaa sikhaayenge Guruji
Hameshaan hamein raasta dikhaayenge Guruji

Jab jab hum Guruji ko bulaayenge
Guruji hamaari madad ke liye aayenge
Hum apne ruhaani safar mein aagey badh paayenge
Aur nishchay hee Guruji ke prem se hum tarr jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 27, 2018

Om Namaha Shivaya
Aaj Ka Suvichaar 🙏🏻🙏🏻 # 129

                Guruji Kehte Hain

Guruji kehte hain ki banda bann
Swacch rakh apna tann aur mann
Jitna bhi ho tere paas dhan
Kuch daan kar tu sampatti aur ann

Daan apna gupt rakh tu
Taaki tujhme guroor na aaye kabhi
Gupt daan aur gupt sewa kar
Guruji ka shishya kehlaaye tabhi

Aur sun ek zaroori baat
Chaahe din ho ya ho raat
Tu baith Guruji ke saath
Aur kar le gupt paath

Kalyuga kee uljhanon mein
Jitna uljhega phans jaayega
Jitna saral rakhega tu jeevan
Utna anand tu paayega

Guruji kehte hain bhakton ko baar baar
Dil mein basaao satya aur nirmal vichaar
Saadhaaran jeevan aur saral vyavhaar
Isko banaa lo apne jeevan ka uttam saar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 27, 2019

Om Namaha Shivaya
Aaj Ka Suvichaar 🙏🏻🙏🏻 # 494

      Guru Milan Ka Haseen Pal

Jaagein hum jaagein
Samay beeta jaa raha hai
Laukik laalach ke nashe mein
Insaan jeeta jaa raha hai

Andhere ko kostey huey
Yoon hee rotay hain hum
Yeh dekhte huey bhi andekha kar dete hain
Ki Guruji ne kumm kar ke diye hain gumm

Guruji ne haath thaama hai hamaara
Hamein diya hai janm janmaantar ka sahaara
Unkee divyata ka prakash roshan kar raha hai hamaara raasta
Is prakash ko jagg mein hum phailaayein ,hamein hai Guruji ka vaasta

Unke ashirwaad kee amritvarsha se hum sab bheeg jaayein
Unke har vachan se hum sab kuch seekh jaayein
Ho sakey toh doojon ke kaam aayein
Taaki Guruji ko hamaare karam bhaayein

Shukrana hai Maalik ka ki Unhonei hai apnaaya
Sambhal jaayein hum aur na karein waqt ab zaaya
Saanson mein samaa ke shradha aur vishwaas ko
Safal karein Guru prem paaney ke prayaas ko

Raasta khud bakhud bann jaayega
Hum uspar chalne waale toh banein
Guru Milan ka haseen pal zaroor aayega
Hum lagan se intazaar karne waale toh banein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 26, 2018

Om Namaha Shivaya
Aaj Ka Suvichaar 🙏🏻🙏🏻 # 128

                 Jagg Ke Swami

Hum paapi maangein Guruji se
Jo hamein laagey hai achchaa
Moh maya ke vash mein na jaanein
Kya jhootha hai kya sachchaa

Guruji hain hamaare janmadaata
Har bhakt hai Unka bachchaa
Duniya ke rishton ka bandhan
Hai dhaage se bhi kachchaa

Virle hee loag hain aajkal kharey
Kalyuga mein raj paakhand ka hai
Keval Guruji se juda rishta hai jo
Pavitra divya sachkhand ka hai

Jab Guruji ki surakshit sharan mein hai tu
Phir kyun itna sochey hai tu praani
Guruji se apna atoot naata tu le joad
Vahee hain antaryaami, aur Vahee hain jagg ke swami

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 26, 2019

Om Namaha Shivaya
Aaj Ka Suvichaar 🙏🏻🙏🏻 # 493

              Samay Ka Samundar

Guruji kee mehar se hoti hai har din kee shuruaat
Guruji ke hee aashirwaad se aati hai har raat
Jeevan ka chakravyu chalta rehta hai
nirantar
Waqt ke har pal se bann jaata hai samay ka samundar

Isee samundar mein beh jaate hain lamhe beete huey
Aksar unn lamhon ko hum yaad karte hain jeete huey
Lekin vartmaan kee maang hai ki hum chalein uske saath
Isliye samay ke saath chalne se hee banegi baat

Guruji hamein waqt ke samundar mein doobne se bachaa sakte hain
Chalte huey gir jaayein hum, toh Guruji hee hamein uthaa sakte hain
Unkee mahima aur meharbaani se hum tartey jaa rahein hain
Unkee karuna se hum mushkilon se ladte jaa rahein hain

Guruji kee sharan mein rehkar milta hai atma bal
Guruji ke charan mein rehkar aasaan bann jaate hain mushkil pal
Koi purani yaad agar dil ko sataati hai
Toh Guruji kee kripa se himmat badh jaati hai

Insaan hain hum sab, karmon ke jaal mein phanse huey
Kirdaar nibha rahein hain apna, kalyuga ke daldal mein dhanse huey
Keval Guruji kee kripa se ho sakta hai hamaara kalyan
Guruji, kripa kar deejiye hamein Apne aashirwaad ka vardaan

Aapse hee hai jeevan mein ummeed
Aapse hee hai haunsla aur himmat hamaari
Aapkee hee divya leela se chal rahi hai
Yeh srishti saari kee saari

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 25, 2018

Om Namaha Shivaya
Aaj Ka Suvichaar 🙏🏻🙏🏻 # 127

 Kyun Dharma Sankat Mein Baitha Hai

Jeevan keval mithya hai
Satya hai Shiv Yog
Jis se atma swasth rahei
Aur lagey na koi roag

Peeda sehni padey agar
Shiv Yog takk pahunchne ke liye
Toh sabr, sneh, aur shradha ke
Tu apne dil mein jalaa le diye

Unkee ujjwal roshni se
Tera raasta jagmagaayega
Guruji kee sharan mein hoga tu
Toh moksh ko tu paayega

Apne aap ko kabhi na paayega akela
Chaahe saari duniya de tujhe chod
Phir kyun dharma-sankat mein baithaa hai tu
Guruji se atoot rishta tu le joad

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 25, 2019

Om Namaha Shivaya
Aaj Ka Suvichaar 🙏🏻🙏🏻 # 492

               Jeene Kee Tehzeeb

Guruji ko saadhein pyaar se aur shraddha se
Darne kee koi baat nahin
Jiske baad subah na aaye
Aisi koi bhi raat nahin

Saadhna hee maarg hai nirbhay honei ka
Vilambh hai toh buss nishchay honei ka
Yeh nishchay ki Guruji kee dikhaayee raah par chalna hai
Yeh nishchay ki sadaa Unke hee aanchal mein palna hai

Saadhna karein aisi ki Guru prasann ho jaaye
Ekaagrataa ho aisi ki atma-bal badh jaaye
Chaahe koi bhi laukik aakarshan saamne aaye
Guruji ka dhyan chod kar dil dhar udhar na bhatak jaaye

Koi bhi nahin chheen sakta humse hamaari saadhna
Shraddha niswaarth ho toh zaroor safal hogi aradhana
Saadhna ko banaa lein jeevan ka niyam
Saadhna se laayein swayam mein sainyam

Saadhna se hum ho jaayenge Guruji ke itne kareeb
Ki phir na koi baat hamein sataayegi na hee lagegi ajeeb
Guruji se jud jaayega hamaara naseeb
Aur sanvar jaayegi hamaare jeene kee tehzeeb

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 24, 2018

Om Namaha Shivaya
Aaj Ka Suvichaar 🙏🏻🙏🏻 # 126

       Zindagi Jeene Kee Adaa

Guruji ka hai noor aisa
Jaise andheri raat mein chaand
Unke gungaan se goonjta
Sampoorna samast brahmaand

Unhee ke pyaar se aan hai
Unhee ke aashirwaad se maan
Unhee kee divya leela se
Surakshit hai hamaari jaan

Apne paraaye toh sab pal ke hain
Hamaari zindagi mein mehmaan
Sachchaa saath Guruji ka hai
Yeh hakeekat lein hum maan

Isliye Guru naam ke anmol gehne se
Aao hum sab apne jeevan ko lein sajaa
Har saans mein samarpan aur shukrana ho
Kuch aisi bann jaaye zindagi jeene kee adaa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 24, 2019

Om Namaha Shivaya
Aaj Ka Suvichaar 🙏🏻🙏🏻 # 491

                 Daat Aisi Bakshiye

Mere pyaare Guruji,

Is nacheez kee arzi kubool keejiye
Apne charnon mein thodi see jageh deejiye
Kaheen bhi aur sukoon nahin milta hai
Aap apna banaakar mujhpar rehem keejiye

Zamaane kee oonch neech samajh na aaye mujhe
Is duniya ka jhooth aur fareb sataaye mujhe
Yahaan kitne cheharon par hain nakaab
Aur mayavee aakarshan hain behisaab

Pyaar kee khushboo phailaa sakoon, mujhe itni aukaat dena
Auron ka dard mai baant sakoon, mujhe yeh saugat dena
Hameshaan yaad rakhun ki Aapki nazar hai mujhpar, taaki koi galat kaam na karoon
Hameshaan Aapka haath hai mere sir par, yeh yaad rakhun taaki mushkilon se na daroon

Aapki mahima ka kar sakun mai gungaan
Bataa sakun sabko ki Aap hain Bhagwaan
Sewa Simran satsang ka mahatva samjhoon aur bataaoon
Aapki har shiksha ko mai apni rooh mein basaaoon

Dagmagaane lagoon toh sambhaal lena mujhe
Hichkichaane lagoon toh atma-vishwaas dena mujhe
Pareeksha lein Aap toh buddhi dena aisi kee safal bann paaoon
Aaspaas keechad bhi ho toh Apki kripa se kamal bann jaaoon

Jaanti hoon ki yeh aasaan nahin
Kyunki mujh mein avgun kee kamee nahin
Jis saanche mein Aap mujhe dhaalenge
Mere liye hoga vahee sahee

Daat aisi bakshiye ki Aapse judee rahoon sadaa
Aap mere Bhagwaan hain, yahee jaanoon aur kahoon sadaa
Aapse hee mere jeevan ka raasta, Aapse hee aagey kee bhi manzil
Aapki saraahanaa aur Aapka shukrana sadaa karta rahey mera dil

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 23, 2018

Om Namaha Shivaya
Aaj Ka Suvichaar 🙏🏻🙏🏻 # 125

              Guruji Ke Divya Haath

Jab bhi pukaaro Guruji ko tum
Saath Unhe tum paaoge
Vahee sambhaalenge tumko
Jabb jabb tum thokar khaaoge

Angg sangg sadaa rahenge Veh
Jitna bhi duur talak tum jaaoge
Niswaarth prem milega tumko
Jabb bhi Unke dar pe aaoge

Niraash na hona tum bilkul bhi
Kyunki Guruji tumhaare saath hain
Gir bhi pade toh uthaa lenge tumko
Itne prabal Unke divya haath hain

Buss tum ik pal bhi na ghabraana
Agar chunauti de tumhe zamaana
Mushkil se mushkil kaam bhi hai aasaan
Agar liya tumne Guruji ko Khuda maan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 23, 2019

Om Namaha Shivaya
Aaj Ka Suvichaar 🙏🏻🙏🏻 # 490

            Hamaari Jholi Mein

Zindagi kayee laukik tohafe lekar aati hai
Saath mein karmon ka bhaar dekar jaati hai
Ab toh sirf yahee baat samajh mein aati hai
Ki Guruji ke aashirwaad se zindagi behatar ho jaati hai

Mushkilein toh karmon ke anusaar aati hain
Lekin Guru kripa se jhelni aasaan ho jaati hain
Andhere mein bhi roshni kee kiranein nazar aati hain
Aur mann kee shankaayein duur ho jaati hain

Jab bhakt mein Guru prem kee bhavna utpan ho jaati hai
Toh ek adbhut see saantvanaa dil mein samaa jaati hai
Raat kee tanhaayee subah kee jyoti mein badal jaati hai
Barson kee udaasi shukrana kee khushi bann kar muskuraati hai

Ab toh yahee hai tamanna
Ki zindagi Guruji kee sharan mein vyateet ho
Mil jaaye agar Guruji ka pyaar aur saumya saath
Phir kya fark padta hai ki koi bhi aur na meet ho

Kanth mein ho Guruji ke Simran ka haar
Jeevan mein ho Guruji kee kripa kee bahaar
Hamaari jholi mein ho Guruji ka pyaar
In sabse anmol na hai koi bhi uphaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 22, 2018

Om Namaha Shivaya
Aaj Ka Suvichaar 🙏🏻🙏🏻 # 124

              Guruji, Beda Paar Karo

Guruji, beda paar karo
Apni saari sangat ka
Aap hee sabke ghaav bharo
Marham lagaakar rehmat ka

Aapke darshan se tar jaate
Hum paapi itne janmon ke
Aapke divya sparsh se hee
Bhagya khultei hain karmon ke

Aap chaahein toh ik pal mein hee
Kismat kee durgati sanvar jaaye
Aapki leela se zindagi mein
Khushiyon kee leher aaye

Itna hai vishwaas hamein
Aapki divya shakti mein
Ab kho jaaye astitva hamaara
Guruji, Aapki bhakti mein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 22, 2019

Om Namaha Shivaya
Aaj Ka Suvichaar 🙏🏻🙏🏻 # 489

   Na Karna Hamein Apne Se Judaa

Is kalyuga ka kolahal
Is zamaane kee halchal
Kabhi idhar kheenche kabhi udhar
Kaise hum phir paayein sudhar

Sthirtaa ka yahee tareeka hai
Ki hum idhar udhar kee awaaz na sunein
Jis raaste kee oar Guruji karein ishaara
Hum usee raaste ko chunein

Hamaare liye hukm ho Guruji ka har vachan
Guruji kee kripa se sulajh jaaye hamaari har uljhan
Apni kamzoriyon ko pehchaanein hum
Guruji ko Apna sab kuch maanein hum

Murshid bhi hain Guruji, Mata pita bhi Vahee
Jo bhi Ve kahein humse, veh hai hamaare liye sahi
Bhai bandhu bhi hain Guruji, Guruji hee hain Khuda
Pyaare Guruvar, kabhi na karna hamein Apne se judaa

Ab toh jaan bhi hai Aapse, aur Aapse hee jahaan
Jahaan Aap le chalenge, hum chal denge vahaan
Aapke aashirwaad ke bina hum jaayenge kahaan
Aap hee hamaari dharti maa hain aur Aap hee aasmaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 21, 2018

Om Namaha Shivaya
Aaj Ka Suvichaar 🙏🏻🙏🏻 # 123

         Niswaarth Prem Ka Daan

Haar jeet mein kya rakha hai
Sabka hee alagg safar hai
Kisi ko izzat, kisee ko shauharat
Kisi kee daulat par nazar hai

Koi chaahe shanti kuch pal kee
Kisi ko shor aur masti kee talaash hai
Koi chhoti see kutiya mein tript hai
Koi chhoona chaahta akash hai

Guruji har kshan saath hamaare
Toh phir kyun dil ho pareshaan
Vahee toh hain jo sangg rehkar
Banaayein safar ko aasaan

Guruji ko khabar hai sabki
Unhei maalum hai sabka haal
Tabhi toh Devta kehlaate hain Veh
Unkee leela hai bemisaal

Humko Apni sharan mein liya hai
Na bhed- bhaav kiya hai aukaat ka
Niswaarth prem ka daan diya hai
Guruji, beintahaa shukrana is saugaat ka

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 21, 2019

Om Namaha Shivaya
Aaj Ka Suvichaar 🙏🏻🙏🏻 # 488

               Paawan Sanskaar

Hamaari soch se rachna hoti hai bhavna kee
Vahee bhavna bann jaati hai aadat
Aadat se janam leta hai ravaiya
Jiske bal par tairtee hai jeevan kee naiya

Ravaiya se hoti hai niyati utpan
Jo sajaati hai zindagi ka upvan
In sabke prabhaav se shaqsiyat kee rachna hoti hai
Yeh shaqsiyat vyavhaar ka beej boti hai

Guruji kee sharan mein aakar
Humne itna sukh hai paaya
Kyun na apni shaqsiyat sanvaarein hum
Aur na karein hum samay zaaya

Achchi soch laayein mann mein
Bhaav ko rakhein shudh
Aadatein achchi apnaayein
Na hon sachchaayee ke virudh

Ravaiya baney sakaaratmak
Safar baney adhyaatmik
Guruji ke ashirwaad se swayam kee niyati sudhaarein
Guruji kee prerna se apni shaqsiyat ko sanvaarein

Tabhi toh jaagrit hoga shubh spandan
Aur zyada gehra hoga Guruji ka vandan
Jis se urjaamayee ho jaayega sansaar
Aur sabke hongei paawan sanskaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja