Month: June 2019

June 20, 2018

Om Namaha Shivaya
Aaj Ka Suvichaar 🙏🏻🙏🏻 # 122

     Guruji Ke Sivaay Kaun Hai Apna

Guruji ke sivaay kaun hai apna
Zindagi yeh sikhaatee hai
Dar dar par thokar khaakar
Yeh baat samajh mein aati hai

Yakeen nahin aata toh
Swayam aazmaa leejiye
Phir bhi har rishtey ko
Apni taraf se maan deejiye

Kyunki tabhi toh halkaa hoga
Karmic karzon ka bojh
Aur saath hee safal hogi
Hamaari shanti kee khoj

Mukti dey dein Guruji humko
Hum yeh vintee karte hain
Lekin Unke samjhaane par bhi
Kyun hum galati karte hain

Aayiye antaraatma kee chetna ko
Nidraavastha se jagaayein hum
Guruji jaisa chaahte hain
Vaise hee bann jaayein hum

Swayam ke chitt mein sudhaar karna
Hamaare liye yakeenan achchaa hai
Tabhi keh sakenge ki Guruji ke liye
Hamaara pyaar pavitra aur sachchaa hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 20, 2019

Om Namaha Shivaya
Aaj Ka Suvichaar 🙏🏻🙏🏻 # 487

          Guruji Hain Akhand Jyot

Guruji Hain akhand jyot
Guruji Hain Divya aawaaz
Guruji kee leela hai anokhi
Koi na jaane iska raaz

Guruji ka simran pyaar hai
Guruji ka simran hai pooja
Guruji swayam MahaShiv Hain
Guruji jaisa koi na dooja

Is kalyuga ke maade samay mein
Chhaayee hai ashanti aur gadar
Vahee insaan sukhi reh sakta hai
Jispar Guruji kee ho nadar

Guruji mata pita aur bhai bandhu hain
Phir kyun tum bhatko dwaare dwaare
Chaahe tumse ho jaayein galtiyaan
Guruji phir bhi sangg rahenge tumhaare

Bharosa hai agar Guruji par
Toh tum chinta karna chodo
Guruji ke sangg joda hai jo rishta
Toh sachchaayee kee oar zameer ko modo

Guruji mein paaoge tum swayam kee sampoorntaa
Jiske bal par tum doojon kee sahaaytaa kar sakoge
Guruji kee divyataa ke prakash se ujjwal kar lo apna jeevan
Toh doosron ka jeevan roshan karte huey na thakoge

Guruji mein dharo dhyan
Yahee hai har samasya ka samaadhaan
Sarvsamarpan Unhe kar ke do Unhe poorna sammaan
Kyunki Guruji bhakton par rehte Hain sadaa meharbaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 19, 2018

Om Namaha Shivaya
Aaj Ka Suvichaar 🙏🏻🙏🏻 # 121

                         GURUJI

G-Gyan karte hain pradaan
Bina kisee pravachan ke
Jeet lete hain bhakton ka dil
Apne satya vachan se

U-Umeed aur dheeraj dilaatey hain
Veh apne saare bhakton ko
Har lete hain Veh hameshaan
Hamaare saare kashton ko

R-Raasta sahi Ve dikhaatey hain
Uspar chalna hamaara farz hai
Karmic hisaab toh chukaana hee hai
Kyunki veh toh hum par karz hai

U-Utsaah Veh hum bachchon ka
Bade pyaar se badhaatey hain
Hamaare Bhagwaan hain Vahee
Har pal hamein yaad dilaatey hain

J-Jyoti divya aur akhand hai Unkee
Hamaari zindagi mein roshni laate hain
Jabb hamaare mann mein shankaa ho
Ve Apni kripa se usey mitaatey hain

I-Iraada nek ho sadaa hum sabka
Yeh Ve hamein sikhaatey hain
Hamaare angg sangg rehkar Veh
Kalyuga kee leela bhi dikhaatey hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 19, 2019

Om Namaha Shivaya
Aaj Ka Suvichaar 🙏🏻🙏🏻 # 486

 Bahuton Se Behtar Hai Teri Zindagi

Jab udaasi ka aalam chhaaye
Jab tera mann ghabraaye
Jab tera kadam ladkhadaaye
Tu Guruji ko yaad kar

Jab tu duvidha mein pad jaaye
Jab tujhe kuch samajh na aaye
Jab koi uljhan tujhe sataaye
Tu Guruji ko yaad kar

Jab ojhal ho rahi ho kiran aasha kee
Jab chhaaye badlee niraasha kee
Jab zaroorat ho pyaar kee bhaasha kee
Tu Guruji ko yaad kar

Jab ho raha ho tera har kaam
Jab poore ho rahein ho tere armaan
Jab sukhdaayee ho har anjaam
Tu Guruji ko yaad kar

Chaahe tu rogi ho ya swasth
Chaahe tera jeevan sukhi ho ya ast-vyast
Chaahe tu chintit ho ya mast
Tu Guruji ko yaad kar

Har pal har kshan har lamha
Jab Guruji kee yaad mein beetega
Toh har paristhiti mein
Tu shukrana karna seekhega

Jaise bhi haalaat hain tere, yaad rakh
Bahuton se behtar hai teri zindagi
Isliye shukrana karta chal Guruji ka
Aur poori zindagi kar Unkee tu bandagi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 18, 2018

Om Namaha Shivaya
Aaj Ka Suvichaar 🙏🏻🙏🏻 # 120

Aapki Sharan Mein Surakshit Hain Hum

Aapki Divya Drishti se sabka udhdhaar ho jaaye
Aapki prerna se charitra mein sudhaar ho jaaye
Kyun Aapka koi bhi bhakt bhatak kar idhar udhar jaaye
Jab aapke hee charnon mein sampoorna brahmand samaaye

Jab aapke shishya banei rehne kee khaayi hai kasam
Aur Aapko saump diye apne jeevan ke saare gumm
Phir zamaana chaahe jitne bhi dhaaye hum par sitam
Aapki sharan mein bilkul surakshit hain hum

Museebat se ghabraate nahin hain hum, yeh
Aapka ashirwaad hai Guruji
Hamein protsaahan detei hain Aap, Aapka dhanyawaad hai Guruji
Aapne hai hamein apnaaya, varna hamaari kya aukaat hai Guruji
Aapka sahaara mila hai hamein, yeh sabse anmol saugaat hai Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 18, 2019

Om Namaha Shivaya
Aaj Ka Suvichaar 🙏🏻🙏🏻 # 485

Humne Nahin Hai Aur Kaheen Bhi Jaana

Jab se pyaare Guruji ka
Vaas hua hai mann ke mandir mein
Tab se ek naya vishwaas samaaya hai
Bhavnaaon ke samundar mein

Sotey jaagte dikhta hai Guruji ka chehra
Guruji kee divyataa hai hamaare jeevan ka pehra
Guruji sangg Hain toh duniya se kya darna
Unhee ke charnon mein abb hai jeena aur marna

Guruji kee mehre-nazar har pal hamein hai taare
Phir kyun nahin sudhar jaate hain hum saare
Kyun karmon ka bhaar liye phirte hain maare maare
Jab ki Guruji karte Hain sudharne ke liye kitne ishaare

Unhee kee panaah mein Hain toh nishchint hokar jee rahein hain hum
Unhee kee rehmat hai jo Unkee karuna ka amrit pee rahey hain hum
Varna toh kab ke niraasha se ghir jaate
Aur ummeed kho kar haar kar hum gir jaate

Mahima hai Guruji kee ki Unhonei hai bachaaya
Is kalyuga ke kalikaal mein raasta hai dikhaaya
Hamaari har duvidha aur har uljhan ko hai suljhaaya
Hamein sach kee raah par chalna hai sikhaaya

Isee tarehn se barkaraar rahey Guruji ke sangg hamaara naata
Khushkismat hai har veh shaqs jo Guruji ka pyaar hai paata
Abb Aapka dar chodkar humne nahin aur kaheen bhi jaana
Guruji, Aapke charan kamal mein karte hain hum shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 17, 2018

Om Namaha Shivaya
Aaj Ka Suvichaar 🙏🏻🙏🏻 # 119

               Poojya Pita Hamaare

Poojya pita hamaare
Aap hee ho Guruji
Aayein hain Aapke dwaare
Hum bachche Aapke Guruji

Jeevan ab hai Aapke sahaare
Aap hee sambhaalo Guruji
Hum sab Aapki aankhon ke taare
Aapka ashish maange hum, Guruji

Dijiye humko kripa kar aisa gyan
Ki sadaa banaa rahei atmasammaan
Neki karein, achche insaan banein hum
Aapki agya ka anusaran karein hum

Zindagi mein chaahe khushi ho ya gumm
Kabhi duur na hon Aapki nazron se hum
Aapke sneh ki sheetal chhaaon mein rahein hum
Aapka aur hamaara pyaar kabhi bhi na ho kumm

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 17, 2019

Om Namaha Shivaya
Aaj Ka Suvichaar 🙏🏻🙏🏻 # 484

           Shukrana Ka Mahatva

Maan ho, maryada ho
Chaahe laukik dhan kum ho ya zyada ho
Guruji ko kabhi na bisraana
Hamaari har shwaas mein ho shukrana

Chhaaon ho ya dhoop ho
Jeevan ka jo bhi rangg roop ho
Guruji ko kabhi na bisraana
Hamaari har shwaas mein ho shukrana

Chaahe ghor museebat aaye
Saamne koi kadvee hakeekat aaye
Guruji ko kabhi na bisraana
Hamaari har shwaas mein ho shukrana

Yahee shukrana dega himmat
Sach ka saath nibhaane kee
Yahee shukrana dega taakat
Swayam ko nipuntaa sikhaane kee

Kyunki is shukrana mein basaa hai
Guruji ka ashirwaad aur pyaar
Jaisi bhi vipda aaye bhakt par
Yeh lagaata hai beda paar

Shukrana mein jo shakti hai
Usmein basee bhakt kee bhakti hai
Shukrana mein jo ehsaas hai
Veh sach mein uttam aur khaas hai

Guruji ka shukrana karne se
Unkee mehar aur bhi zyada ho jaati hai
Bhakt kee har zaroorat aur khwaayish
Guru kripa se poori ho paati hai

Lekin jo kuch maange bina bhi karta rahey shukrana
Guruji swayam hee likhte Hain uskee zindagi ka afsaana
Aur Apni divya nazaakat se Uske karmon ka bhaar Ve sambhaal lete Hain
Usey himmat dekar Ve har mushkil se nikaal lete hain

‘Maango Nahin, Maano,’ Guruji kehte Hain
Hamaare liye Ve itna kasht sehte Hain
Agar sach mein adaa karna hai hamein karmon ka karz
Har haal mein shukrana karna hai hamaara farz

Isliye shukrana ke mahatva ko jaanein
Aur Guruji kee mahima ko maanein
Aur agar jeevan samarpan mein hai bitaana
Toh hamaari har saans mein ho Guruji ka shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 16, 2018

Om Namaha Shivaya
Aaj Ka Suvichaar 🙏🏻🙏🏻 # 118

       Jabb Jaage Tabb Ho Savera

Shiv yog kehta hai
Jabb jaage tabb ho savera
Kyun phir praani soya hai tu
Guruji kee sharan mein kar le baseraa

Bekaar kee baaton mein ulajhkar
Kitne keemtee varsh bitaaye
Dosti ke naam par logon ne
Din mein hee taare dikhlaaye

Isliye kahoon mai baat patey kee
Keval Guruji se jud jaa tu
Maya aur ahem kee sangat se duur
Neevein ho kar tur ja tu

Guruji karenge divya jyoti pradaan
Unke hee dhyan mein rehna achchaa hai
Bhajj le pyaare Guruji ka tu naam
Keval Unhee ka naam hee sachchaa hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 16, 2019

Om Namaha Shivaya
Aaj Ka Suvichaar 🙏🏻🙏🏻 # 483

                 Guruji Ka Prataap

Guruji hee Hain sansaar kee rachna karne waale
Ve hee Hain sabki jholiyaan bharne waale
Guruji hee sabke kashton ko Hain harne waale
Bhakton ka uddhaar aur kalyan karne waale

Jeevan kee har subah hai dein Guruji kee
Har jeev ka har shwaas hai Unkee meharbaani
Jab Guruji le lete Hain Apni sharan mein
Tabb badal jaati har bhakt kee zindagaani

Unkee maujoodgee kee gawaahi detein hain
Yeh dharti, sooraj, chaand, aur taare
Unke sajde mein sir ko jhukaate hain
Prakriti se saare ke saare nazaare

Guruji kee mahima aprampaar
Bhakton ke liye Unka aseem pyaar
Yeh dekh kar bhaav vibhor ho jaata hai mann
Unka pyaar hai hamaare liye anmol dhan

Guruji kee divyataa kee bhavyataa mein
Bhakt jab kho dega apne aap ko
Tabb uska roam roam jaan paayega
Pyaare Guruji ke prataap ko

Jitna gehra hoga Guruji ke sangg naata
Utnee hee jaldi saaf hoga karmon ka khaata
Jitnee ghanisht hogi hamaari sadhna
Utna hee ruhaani rangg laayegi hamaari aradhana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 15, 2018

Om Namaha Shivaya
Aaj Ka Suvichaar 🙏🏻🙏🏻 # 117

 Guruji Ke Paas Aayein Hain Hum

Guruji ke paas aayein hain hum
Unke dikhaaye huey raaste par chalein
Unkee baat ko dhyan se sunn kar
Unke hukm par hum amal karein

Neki sikhaatey hain Guruji
Phir kyun karein hum koi chhal
Kaarmic hisaab toh hoga zaroor
Chaahe aaj ho ya chaahe ho kal

Pavitra banaayenge paapi ko
Bachaayenge Vahee mushkil se
Guruji kshamaa kar denge
Agar hum maangenge sachhe dil se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 15, 2019

Om Namaha Shivaya
Aaj Ka Suvichaar 🙏🏻🙏🏻 # 482

          Guruji Ke Aanchal Mein

Musaafir ke liye raasta anjaan hai
Yeh kaisi duvidha hai, yeh kaisa imtehaan hai
Is yaatra ka kya hona anjaam hai
Guruji hee sambhaalein, kyunki har koi naadaan hai

Bheed ka ajab nazaara hai
Ismein koi nahin hamaara hai
Ek oar mehfil mein bhi tanhaayee hai
Dooji oar apnepan ke pyaar kee shehnaayee hai

Kabhi aslee pushp par bhi
Chadh jaati hai dhool
Toh kabhi khushboo se mehekne lagne hain
Kaagaz ke bhi phool

Zindagi ke mayavee aadambar mein
Toot-te huey dekhein hain aalishaan mehel
Aur saath mein dekhi hai chhoti see
Jhompdi mein khushi kee chehel pehel

Sab Guruji kee hee leela hai
Aur karmon ka bhi silsilaa hai
Sabke sapnon ka anokha kila hai
Jo sabko apni soch se mila hai

Sab bachchon ko milta hai Guruji ka prem
Guruji ka sahaara hai sabse badi dein
Isliye har paristhiti ko maankar Unkee manzoori
Hum jee lein, basaa kar dil mein shradha aur saboori

Jeevan ke safar mein Guruji le jaayein jahaan
Imaarat ho ya khandhar, apni toh manzil hai vahaan
Kya fark padta hai ki aur koi hai kahaan
Guruji ke aanchal mein humne jab paa liya hai aasmaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 14, 2018

Om Namaha Shivaya
Aaj Ka Suvichaar 🙏🏻🙏🏻 # 116

Guruji Hee Jaan, Guruji Hee Jahaan

Maa kee mamta pitaa ka pyaar
Nainon mein sabke liye dulaar
Guruji hamaare paalanhaar
Yahee satya hai ab jeevan ka saar

Kaarmic rishtey khoon ke rishton se bhi badh kar hotei hain
Har nazariye se Guruji bade aur hum tuchh aur chhote hain
Guruji ko mata pita bhai bandhu maankar hum jaagtey aur sotei hain
Unhee ko samarpan kar sab kuch, hum apna astitva khotei hain

Guruji jahaan le jaayenge, hum chalengey vahaan
Na poochhenge hum Unse ki kyun aur kahaan
Guruji hum sab par sadaa rahein meharbaan
Ab toh Guruji hee jaan hain aur Guruji hee jahaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 14, 2019

Om Namaha Shivaya
Aaj Ka Suvichaar 🙏🏻🙏🏻 # 481

                Atma Kee Mukti

Shareer ka astitva kuch bhi nahin
Chaahe hum maanein ya na maanein
Atma hee shareer kee maalik hai
Chaahe hum jaanein ya na jaanein

Yeh atma toh swayam shantiswaroop hai
Phir kyun mann ko ashant kar atma kee shanti bhang karte hain hum
Yeh atma toh shaktiswaroop hai
Phir kyun laukik lobh se isey ksheen karte hain hum

Guruji ka sachchaa aunsaran karenge
Toh hum mein adhyatmiktaa aayegi
Simran mein leen rahenge toh
Atma mein sakaraatamakta aayegi

Guruji kehte Hain hum sabse
Ki hum judei rahein simran mein
Guruji kehte Hain Humse
Ki hum bandh jaayein Unke bandhan mein

Laukik sukh aur yash mein phanskar
Atma unnati na kar paayegi
Guruji se bandhe bandhan mein
Atma sahi mainey mein mukt ho jaayegi

Jitnee dridhtaa se hum Guru shishya ke rishtey mein jud jaayenge
Guruji utnee hee mamta se hamein laukik zanzeeron se mukti dilaayenge
Lekin hamein bhi apna farz nibhaana hoga
Aur sachchaayee aur neevanpan apnaana hoga

Guruji ko saralta pasand hai
Guruji ko taralta pasand hai
Guruji kee jyot jalaa lein hum apne bheetar
Kyunki Guruji ke naam kee jyot akhand hai

Yeh sab karne se hamaari atma khil jaayegi
Jis izzat kee veh adhikaari hai, veh izzat usey mil jaayegi
Moksh ka ashirwaad Guruji se paakar
Veh jhoomti hui sachkhand kee oar jaayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 13, 2018

Om Namaha Shivaya
Aaj Ka Suvichaar 🙏🏻🙏🏻 # 115

               Savera Hoga Zaroor

Guruji baagbaan, hum sab hain phool
Hain hum keval Unke charnon kee dhool
Kabhi bhool se bhi na Unhei jaayein hum bhool
Vahee toh hataayein hamaare maarg ke shool

Guruji ke dhyan mein mann khushi se kho jaaye
Guruji ke hotei huey jo bhi hona hai ho jaaye
Janmadaata hain Guruji, sambhaalenge Vahee
Ab jeevan hamaara sanvaarenge Vahee

Haalaat badlenge, uday hoga sooraj
Buss thoda sa aur rakh le tu dheeraj
Na soch ki tu hai haalaat se majboor
Der se ho chaahe, par savera hoga zaroor

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 13, 2019

Om Namaha Shivaya
Aaj Ka Suvichaar 🙏🏻🙏🏻 # 480

              Jeevan Ka Tathya

Guruji, kripa kar sabko apni sharan mein leejiye
Guruji, kripa kar poore brahmaand ka mangal keejiye
Aapki kripa se safal ho sabka poojan
Aapki kripa se safal ho sabka jeevan

Aap hee Hain bhakton ka ekmaatra sahaara
Aapke bina nahin hum mein se kisee ka bhi guzaara
Aapki karuna ke bin insaan bhatkey maara maara
Aapse hee har janam mein uddhaar hai hamaara

Buddhi aisee deejiye hamein
Ki shukrana mein jeevan bitaayein
Daat aisee bakshiye
Ki shukrana mein hee jeete jaayein

Jhooth ka saath chodne kee rakhein taakat
Sach ka saath dene kee rakhein himmat
Sadhsangat ko hum apnaayein
Aur Aapke bahadur bachche kehlaayein

Sachchaayee apnaakar paap ka bojh halka karein
Apni taraf se poori koshish kee humne, is yathaarthta se dheeraj dharein
Aapse kuch bhi chhupa nahin, is hakeekat se miley hamein shanti
Hamaari atma ke mandir mein sadaa basee rahey Aapki kanti

Is jeevan ke janjaal mein humne kya khoya aur kya paaya
Kyun baar baar yeh sochkar karein hum waqt zaaya
Bahut khushkismat hain hum, ki Aapne hamein hai apnaaya
Tathya toh yeh hai ki ab baaki sab hai paraaya

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 12, 2018

Om Namaha Shivaya
Aaj Ka Suvichaar 🙏🏻🙏🏻 # 114

Jab Unko Saump Diya Jeevan Saara

Guru ka naam tu saadhe mann se
Guru ka naam tu dhyaae
Phir jagg se kya karna tujhko
Jahaan har rishta hai vyavsaay

Japp le naam Guruji ka tu
Har pal karle Unko yaad
Aur koi nahin, ek Vahee hain
Jo sadaa sunenge teri fariyaad

Baatein kar le Unse har pal
Dukh kee hon ya hasee kee
Guruji dikhaa denge tujhe
Har baat mein kiran khushi kee

Andaaz Guruji ka bada hee pyaara
Asahaay ko detein hain Ve sahaara
Jab Unko saump diya jeevan saara
Phir kya raha hamaara aur kya tumhaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 12, 2019

Om Namaha Shivaya
Aaj Ka Suvichaar 🙏🏻🙏🏻 # 479

 Antarmann Ko Ujjwal Kar Lein Hum

Sadhna hee veh saadhan hai
Jis se hum Guruji ko paayenge
Guruji hum se prassann hongei
Jab hum Unko dhyan se dhyaayenge

Jab Guru prem banega hamaari prerna
Toh tapasya ka nirmal anand aayega
Jab advait gyan kee tadap hogi
Toh saadhak saadhna mein leen ho jaayega

Isee se anubhav hoga Parmatama ka
Isee se milan hoga Khuda aur hamaari atma ka
Guruji kee ichchaa ka maan hoga
Jab har pal dhyan mein Bhagwaan hoga

Baaki sab toh vyarth hai
Baaki sab hai nashwar
Guruji se hee jeevan ka arth hai
Guruji hee Hain Ishwar

Sach mein chaahat hai agar
Guru Naam ko paane kee
Toh dhyan mein rehkar karein prateeksha
Guruji ke bulaave ke aane kee

Bin khaaye idhar udhar ke dhakke
Jo Guru par sadaa bharosa rakhe
Guru uspar Apni mehar sadaa barsaaye
Guru ke bharose uska jeevan sanvar jaaye

Isliye chitt ko Guruji mein ekaagra karein hum
Na jagg ke behkaave se darein hum
Simran, dhyan, aur bhajan kar lein hum
Guru prakash se antarmann ko ujjwal kar lein hum

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 11, 2018

Om Namaha Shivaya
Aaj Ka Suvichaar 🙏🏻🙏🏻 # 113

                          Ek Din

Ek din jaana hai sabne
Chaand aur taaron se bhi duur
Phir kyun hain jhooth ka paldaa bhaari
Kyun chhaaya hai itna guroor

Jaisi karni karenge hum
Vaisa hee phal paayenge
Guruji ka sahaara lenge toh
Veh madad ke liye aayenge

Maafi maang lein Guruji se
Ab bhi thoda samay hai
Is janam mein miley ya agley mein
Kukarmon ka anjaam toh pralay hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 11, 2019

Om Namaha Shivaya
Aaj Ka Suvichaar 🙏🏻🙏🏻 # 478

           Guruji Aapke Roop Anek

Guruji Aap hee Brahma Hain
Aur Aap hee Hain Vishnu aur Mahesh
Hataane baadha mitaane kalesh
Aap hee aate Hain bannkar Ganesh

Mushkil mein pade jab jaan
Tabb Aap hee sankatmochak Hanuman
Sachchaayee ka jab jab ho imtehaan
Tabb Aap hee Hain Maryadapurshotam Ram

Jab jab bhakton par vipdaa hai aayee
Aap aaye bannkar Shirdi Ke Sai
Aur Krishna ke pyaare bhakt ko
Aap mein dikhey Vasudeva kee parchhaayee

Girjaghar jaane waale ko
Eesaa Maseeh hain dikhte Aap mein
Masjid mein Aap upaasak ko darshan dete
Jab jab ve Allah ka naam lein

Jis bhi mazhab ke shradhaalu jann hon
Aap sabko pyaar se apnaate hain
Jisey bhi zaroorat hoti hai Aapki
Aap uskee madad ke liye aate hain

Aap saari sangat ka jeevan
Roshan karein ruhaani gyan se
Kaash hum sab Aapki baat maankar
Apne bheetar jhaankein dhyan se

Aap hain Param parmeshwar hamaare
Aap sab bhakton ke kaaj sanvaarein
Uss bhakt kee naiya awashya lagg jaaye kinaare
Jo har pal shukrana kar Aapko pukaare

🌹🌹🌹🌹🌹🌹🌹

Jai Guruji 🙏🏻🙏🏻
Dhirja