Month: June 2019

June 10, 2018

Om Namaha Shivaya
Aaj Ka Suvichaar 🙏🏻🙏🏻 # 112

      Yahee Chaahein Guruji Humse

Yeh shareer hamaari atma ke liye
Kewal ek libaas hai
Lekin adhiktar logon ko
Nahin is baat ka ehsaas hai

Tabhi toh zindagi ko bahut hee
Sanjeedagi se dekhte hain hum loag
Kyun nahin apnaa lete hain hum
Apne jeevan mein Shiv Yog

Guruji hamaare MahaShiva hain
Buss yahee chaahein Veh humse
Ki chaar din kee zindagi
Hum jee lein thode dhangg se

Vehemon se rahein duur hum
Kaam moh lobh krodh tyaag dein
Sewa simran samarpan seekhein
Ahankaar aur paakhand chod kar vairaagya lein

Kyun jeevan ke maya jaal mein
Hum uljhey hain bann kar deewaane
Guruji Usko sachkhand le jaayein
Jo bhakt Unkee baat ko maaney

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 10, 2019

Om Namaha Shivaya
Aaj Ka Suvichaar 🙏🏻🙏🏻 # 477

           Vilambh Hai Kis Baat Ka

Daatun bhi kiya aur snaan bhi
Lekin parvarish na kee imaan kee
Zaaya kar dee har ghadi dhyan kee
Kadar kee keval jhoothi shaan kee

Guruji ne bahut samjhaaya hamein
Phir bhi hum na maanein
Guruji hamaare bhale ka sochein
Kyun hum yeh na jaanein

Unhe chaahiye sirf hamaara shudh bhaav
Uske alawaa toh apne paap hee de sakte hain Unhe
Jo bhi khayaal hain hamaare mann mein
Guruji toh veh sab dekhein aur sunein

Kyun nahin hum sudhar jaate hain
Jab Guruji hamein samjhaate hain?
Kyun bhatak kar idhar udhar jaate hain
Jab ki Ve sahi raah dikhaate hain

Guruji hamaare bheetar Hain
Guruji hamaare sangg Hain
Guruji bakhoobi dekh rahein hain
Jo bhi hamaare jeene ke dhangg hain

Jaise machhlee ko chahiye
Jeene ke liye paani
Hamaari saanson ke liye zaroori hai
Guruji kee divya baani

Keval Guruji ke naam se hee
Utregaa hamaare ahem ka nashaa
Guruji ko saump denge jeevan
Tabhi sudhregi hamaari dashaa

Phir vilambh hai kis baat ka
Kyun na antt karein agyaan kee raat ka
Kyun na swayam ke bajaaye hum Guruji mein ramm jaayein
Kyun na Guruji kee sharan mein bande bann jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 9, 2018

Om Namaha Shivaya
Aaj Ka Suvichaar 🙏🏻🙏🏻 # 111

            Guruji Ka Diya Gyaan

Thaam letein hain Guruji hamein
Jab aata hai zindagi mein tufaan
Hamein protsaahan detein hain
Jab hotei hain hum pareshaan

Guruji har pal hamaare sangg hain
Guruji ko sadaiv hai bhakton ka dhyan
Nishchay hee karein uddhhar hamaara
Unhee kee ashish se hai hamaara maan

Srishti, paalan, aur buraai ka sanhaar karein
Hamaare Guruji hain itne mahaan
Hum bande banein aur changey kaam karein
Yahee toh hai Guruji ka diya gyan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 9, 2019

Om Namaha Shivaya
Aaj Ka Suvichaar 🙏🏻🙏🏻 # 476

              Raaste Ka Dhanyawaad

Mainey raaste se poochha
Tu chal diya kahaan
Raaste ne kiya uss oar ishaara
Aur mainey dekha vahaan

Dono taraf harey bharey ped thei jhoom rahe
Maano jaise ek dooje ke kandhon ko thei choom rahe
Sooraj kee kirnein patton ke beech mein se thein jhaank raheen
Jahaan raasta chal raha thaa ve roshni phailaa raheen theen vaheen

Thoda sa aagey dekha toh ik pyaara sa ghar dikha mujhe
Itna nyaara ki lagaa veh Ishwar ka dar mujhe
Raaste ne jhoomte huey mujhe vahaan takk pahunchaaya
Kaise karoon bayaan ki uss safar mein mujhe kitna anand aaya

Uss ghar ke darwaaze par aayi mai jaise hee
Gulab ke phoolon kee khushboo aayi vaise hee
Vaataavaran mein ek ruhaani sa noor thaa chhaaya
Darwaaza khula toh iska raaz samajh mein aaya

Saamne dikha ik sundar aasan
Jispar Guruji thei viraajmaan
Abhamandal divya thaa Unka
Tejasvi aur sarvshaktimaan

Guruji kee mehar se raaste ne
Mujhe pahunchaaya Unkee sharan mein
Guruji, Aapka baarambaar shukrana
Jo Aapne jageh dee Apne charan mein

Raaste ka beintehaa dhanyawaad
Ki veh lekar aaya mujhe Guruji ke dar par
Raaste ka yeh ehsaan
Na bhooloongi mai umr bhar

Raaste ne manzil takk pahunchaaya
Itnee shanti milee mere mann ko
Sadaa ke liye mann mandir mein sanjoya mainey
Guru Naam ke anmol dhan ko

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

June 8, 2018

Om Namaha Shivaya
Aaj Ka Suvichaar 🙏🏻🙏🏻 # 110

           Jeevan Ka Shubh Saar

Jab chot pahunchaata hai dil ko sansaar
Toh marham bantaa hai Guruji ka pyaar
Guruji hee lagaayein hamaara beda paar
Hamein museebat se bachaayein baar baar

Zindagi ke din hain keval do chaar
Praani, tu apne bharose ko na maar
Guruji avashya sunenge teri pukaar
Guruji hee hain hamaare paalanhaar

Guruji hamaare Hain vinamrataa ka bhandaar
Ve chaahein ki sangat ke hon shuddh vichaar
Aur prem bharaa ho sabka vyavhaar
Yahee toh hai jeevan ka shubh saar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 8, 2019

Om Namaha Shivaya
Aaj Ka Suvichaar 🙏🏻🙏🏻 # 475

            Taral aur Saral Jeevan

Paani mein kitnee shakti hai
Jo shaant reh kar bhi agni ko bujha sakta hai
Phir kyun insaan pratikool paristhiti mein
Ashaant aur vichlit hokar thaktaa hai

Paani ko dekhein dhyan se
Jab pathreela moad hai aata
Paani kuch bhi kahey bina
Raasta naya hai banaata

Paani ke taral swabhaav se
Aao seekhein hum sab
Shaayad aasaan ho jaayega
Mushkilon ko jhelna tabb

Guruji kehte hain swayam ko banaao taral
Guruji kehte hain jeevan ko rakho saral
Guruji kee baat maan lene mein bhalaayee hai
Is baat mein poori sachchaayee hai

Guru naam bin hum jaayenge kahaan
Aakhir aisa kya rakha hai yahaan
Kyun na jaane kee koshish karein vahaan
Sachkhand ka paawan dhaam hai jahaan

Guruji ko jab saump diya hai jeevan
Toh farz banta hai ki hum maan lein Unka kehna
Jeevan ko saral aur taral rakhne ka prayatn karein
Aur sadaa pehnein Guru naam ka anmol gehna

Is gehne se hamaari atma ka shringaar ho jaayega
Is shringaar se hamaara mai bhi kho jaayega
Jisey khokar hamein praapti hogi Guruji ke charan kamal kee
Is se anmol saugat ho hee nahee sakti Guruji ke vachan par amal kee

Jeevan taral honei se shaant rahegi atma
Mann saaf hoga toh kareeb hongei Parmatama
Jeevan saral honei se kum ho jaayengi pareshaaniyaan
Yaad rahengi sadaa hamein Guruji kee meharbaaniyaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 7, 2018

Om Namaha Shivaya
Aaj Ka Suvichaar 🙏🏻🙏🏻 # 109

        Guruji Kee Leela Aprampaar

Guruji ne apne kandhon par uthaaya
Saari sangat ke kashton ka bhaar
Unke charnon mein sthaan paane ke liye
Vyaakul hua yeh saara sansaar

Guruji bhakton kee raksha karein
Aur dete sab ko dhed saara pyaar
Un insaanon ko bhi vijay dilaate
Jinhonei diya hai sab kuch haar

Asambhav ko sambhav karte Guruji
Unkee leela sach mein hai aprampaar
Chaaron dishaaon mein goonjti
Hamaare Guruji kee hee Jai Jaikaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 7, 2019

Om Namaha Shivaya
Aaj Ka Suvichaar 🙏🏻🙏🏻 # 474

   Hamaare Guruji Kee Vadiyaayee

Hamaare Guruji kee vadiyaayee toh dekho
Ki baadal bhi jhuk kar karte hain Unka naman
Ve apni tadap jab Guruji ko sunaate hain
Kitna bharaa hota hai Unka mann

Apni aankhon ke ashru jab
Ve Guruji ke samaksh bahaa lete hain
Toh Guruji Unhe ashish dekar
Unn aansuon ko varsha banaa dete hain

Hamaare Guruji kee vadiyaayee toh dekho
Ki havaayein Unke sajde mein sheesh jhukaati hain
Guruji ke paawan sparsh se Ve
Guruji kee khushboo se swayam ko sugandhit paati hain

Hamaare Guruvar kee vadiyaayee toh dekho
Ki raja aur rank sab baraabar hain Unke dwaar par
Har jeev ka moksh nirbhar karta hai
Guruji dwaara kiye uddhaar par

Hamaare Guruji kee vadiyaayee toh dekho
Nirogi karte hain kaaya
Unhe prassann karta hai hamaara shudh bhaav
Na ki dikhaawa aur maya

Hamaare Guruvar kee vadiyaayee toh dekho
Hamaare adhiktar karam Apne par le lete hain
Hamaare dukh dard Ve sehkar
Hamein sukh aur chayn dete hain

Hamaare Guruji kee vadiyaayee toh dekho
Har taare par hai Unkee nazar
Har taara pyaar se timtimaata hai
Jab Guruji kee hoti hai uspar mehar

Hamaare Guruvar kee vadiyaayee toh dekho
Sooraj aur chaand bhi Unke hukm ke hain ghulaam
Unkee ijaazat ke bina ve uday nahin hotey
Chaahe lakh taare kar lein Unhe salaam

Hamaare Guruji kee vadiyaayee toh dekho
Ki Ganga Unke ashirwaad se behti hai
Guruji hee mere janmadaata hain
Ve saare jahaan se kehti hai

Hamaare Guruvar kee vadiyaayee toh dekho
Ki ati sukhdaayee hai Unkee divya drishti
Har jeevatma ka Ve kalyaan kar rahey hain
Aur sanvaar rahein hain Ve sampoorna srishti

Hamaare Guruji kee vadiyaayee toh dekho
Patta bhi nahin hil sakta Unkee ijaazat ke bina
Hum toh sadaa shukrguzaar hai Unke
Kyunki hamaara jeevan chal hee nahin sakta Unkee hifaazat ke bina

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 6, 2018

Om Namaha Shivaya
Aaj Ka Suvichaar 🙏🏻🙏🏻 # 108

                Guruji Ke Bharose

Hass ke beete sabki zindagi
Sabke kasht tal jaayein
Sabki jeevan yaatra alagg hai
Sabb apni manzil paayein

Guruji ke bharose chodi jisne
Apni kismat kee dori
Guruji ne apne ashish ke saath
Uskee niyati hai jodi

Samarpan aur simran karey jo
Aur sewa mein dhyan lagaaye
Uske paap dhulein yakeenan
Aur usey moksh mil jaaye

Har insaan ne jaana hai jagg se
Har shareer ka astitva kho jaaye
Jo apna adhyaatmik bhalaa karey
Vahee satchittanand ko paaye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 6, 2019

Om Namaha Shivaya
Aaj Ka Suvichaar 🙏🏻🙏🏻 # 473

                Itnee See Saugat

Jhonka aaya havaa ka
Lekar Guruji kee khushboo
Karne lagee mai mann hee mann mein
Pyaare Guruji se guftgu

Pyaar se mainey Unko dekha
Dil se Unka naam liya
Shukrguzaar hoon mai Unkee
Ki Unhonei mera haath thaam liya

Guruji ke paawan pyaar ne
Baksha mujhe jeevan naya
Museebaton ko jhelne ka
Mera andaaz ab badal gaya

Bina vajeh ke bhi aksar
Ab mai khush ho jaati hoon
Apne Guruji ke baare mein soch kar
Mai phooli nahin samaati hoon

Meri rooh ke katre katre mein
Amrit hai Guruji ke ashirwaad ka
Maalik ko beintehaa shukrana karti hoon
Is jeevan roopi prasaad ka

Guruji itnee himmat dena
Ki parishram karte huey na thakoon
Guruji itnee buddhi dena
Ki Aapke nakshe kadam par chal sakoon

Jo divya jyot Aapne mere antarmann mein jalaayee hai
Mai usme samaa jaaoon, mujhe itnee see saugat deejiye
Aapke charnon kee dhool mai bann sakoon
Aye parwardigaar mere, mujhe buss itnee see aukat deejiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 5, 2018

Om Namaha Shivaya
Aaj Ka Suvichaar 🙏🏻🙏🏻 # 107

          Guruji Aaye Is Jagg Mein

Guruji aaye is jagg mein
Karne hamaara uddhaar
Tabhi toh Veh sadaa hee
Suntei hain hamaari pukaar

Unke paas hamaare liye
Hai aseem durlabh divya gyan
Vahee bhakt paaye isey
Jo karey Unka niswaarth dhyan

Kya karega musaafir tu
Bator ke jhootha dhann
Guruji ke simran mein lagaa dei
Apna yeh paapi mann

Guruji khud tere ashru ponchhenge
Jab jab bhi tu royega
Punya milega kayee janmon ka
Chayn kee neend tu soyega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 5, 2019

Om Namaha Shivaya
Aaj Ka Suvichaar 🙏🏻🙏🏻 # 472

                'Jai Guruji Kee' Bolo

Sabko hotey hain darshan bhinn bhinn roop mein
Kisee ko chhaaon mein dikhte hain kisee ko dhoop mein
Guruji ka sabke sangg alagg hee andaaz hai
Unkee mahima ka sach mein ek anokha sa raaz hai

Guruji ka naam lekar chalte chalo
Jeevan ke saanche mein dhalte chalo
Guruji ke pyaar se phalte chalo
Taaki bebasee mein haath na malte chalo

Guru milan kee agar tumhe hai aas
Toh dridh kar lo apna Guruji par vishwaas
Jab lagaaoge atma ke mastak par is vishwaas kee vibhooti
Tab sach mein hogi nirmal anand kee anubhooti

Isee anubhooti ka hoga tumhaari atma par prabhaav
Isliye jagaa lo apne mann mein prem ka bhaav
Guruji ke prem mein magn hokar kho lo apne aap ko
Phir dekh lo apne jeevan mein Guruji ke prataap ko

Ek pal ke liye bhi na akele tumhe chodenge
Ek pal ke liye bhi tumse muh nahin modenge
Unkee mehar kee chhayiyaan mein tum masti se dolo
Apne har shwaas se tum buss ‘Jai Guruji Kee’ bolo

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 4, 2018

Om Namaha Shivaya
Aaj Ka Suvichaar 🙏🏻🙏🏻 # 106

      Guruji Ko Apne Saath Tu Paayega

Kitna alag hai har insaan ka safar
Kitni alag hai har insaan kee nazar
Phir bhi hum sab baraabar hain Guruji ke liye
Hum sabko mamta ke phool Guruji ne hain diye

Unke ashirwaad se aasaan ho jaaye
Har mushkil ko jhelna hamaare liye
Unke pyaar se mumkin ho jaaye
Har gumm ko sehna hamaare liye

Chaar din kee mayavee zindagi hai
Baad mein sab maati mein mil jaayega
Jab Guruji ne liya hai tujhe sharan mein
Unhe har janam apne saath tu paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 4, 2019

Om Namaha Shivaya
Aaj Ka Suvichaar 🙏🏻🙏🏻 # 471

       Guruji Ko Kabhi Na Bisraana

Safar hai yeh zindagi ka
Kayee aise mukaam aayenge
Jab dharma-sankat hoga
Aur jo imtehaan bann jaayenge

Aise mein kaam na chalega chaturaayee se
Aise mein bhalaa hoga sirf khudaayee se
Karmon ka dard na jaayega kisee davaayee se
Uddhaar hoga keval Guruji kee vadiyaayee se

Guruji neeyat ko parakhte hain
Guruji hum sabko samajhte hain
Guruji se maangein hum bheekh
Ki hum sab achchaayee lein seekh

Guruji hee hain hamaari himmat
Guruji hee hain hamaari taakat
Bahut sukhdaayee hai Guruji kee sharan
Atyant kripalu hain Guruji ke charan

Guruji ke paawan charnon mein
Bastaa hai swarg hamaara
Vaheen hamaari manzil hai
Vaheen hai moksha ka dwaara

Kyun kaheen aur phir hai jaana
Jab Guru charnon mein hai apna thikaana
Chaahe lakh lubhaaye yeh zamaana
Apne pyaare Guruji ko kabhi na bisraana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 3, 2018

Om Namaha Shivaya
Aaj Ka Suvichaar 🙏🏻🙏🏻 # 105

          Zindagi Khuli Kitaab Hai

Jitni bhi boondein hon paani kee
Unhe apna leta hai samundar
Insaan har lamhe ka ghulam hai
Kyunki waqt hee toh hai sikandar

Har pal ka hisaab hai paas Guruji Ke
Har chehra benakaab hai saamne Guruji ke
Zindagi khuli kitaab hai samaksh Guruji ke
Vyarth hai har khitaab darbar mein Guruji ke

Unke liye hum sab ek samaan hain
Chaahe hum jaise bhi insaan hain
Guruji toh hum sabke Bhagwaan hain
Tabhi toh Veh hum sab par meharbaan hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 3, 2019

Om Namaha Shivaya
Aaj Ka Suvichaar 🙏🏻🙏🏻 # 470

             Unhee Kee Mehar Se

Abhi toh tu naadaan hai
Abhi tera dil pareshaan hai
Aaj bhi tu haalaat se kyun hairaan hai
Tere Guruji ko har baat ka gyan hai

Guruji kee kripa se yeh jahaan hai
Unhee kee mehar se tann mein praan hai
Yeh jeevan Unka tujhpar ehsaan hai
Guruvar tujhpar bada meharbaan hai

Tere dil mein jo Guruji ke liye sammaan hai
Unke vachan ka jo tu rakhta maan hai
Toh chaahe tu aane waale kal se anjaan hai
Sarvagyani Guru tera Bhagwaan hai

Tere dil mein jo bhi armaan hai
Tere jeevan kee jo bhi daastaan hai
Tu dekh raha Guruji ke kadmon ke nishaan hai
Unhee par chalne mein tera kalyaan hai

Agar teri zindagi mein taqleefon ka toofaan hai
Toh kyun duvidha aur uljhan mein teri jaan hai
Toone karna gupt paath, sewa, aur daan hai
Aur har pal karna Unkee mahima ka gungaan hai

Guruji ko shukrana karne mein teri shradha ka bakhaan hai
Tu sadaa reh shukrguzaar, yahee Guruji ka farmaan hai
Guruji ka neevan bhakt bann ne mein hee teri savinay shaan hai
Kyunki tu toh Guruji kee rehmat ka kadardaan hai

Guruvar sach mein hamaara kirpanidhaan Hai
Ve har pal kar raha hamaari niyati ka nirmaan hai
Unka hum sabke liye prem atyant nivaan hai
Unhee kee mehar se hona hamaara nirvaan hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 2, 2018

Om Namaha Shivaya
Aaj Ka Suvichaar 🙏🏻🙏🏻 # 104

 Jab Takk Praan Basein Is Tann Mein

Vichaar jab lagaataar aayein mann mein
Ve soch ko shaktimaan banaayein
Vahee soch banei dhaarana hamaari
Jisey hum phir hriday mein basaayein

Sabka achchaa sochein har pal
Hamaare vichaar hon jaise hai jal
Mann mein aakar beh ye jaayein
Na ki hamein apna ghulam banaayein

Swachh ho dhaarana hamaari Guruji
Prem kee ho bhawna hamaari Guruji
Tuchh vichaar se duur rahein hum
Sakaaraatamakata se bharpoor rahein hum

Guruji, humko subuddhi dena
Hamaare vichaaron ko shuddhi dena
Heen soch na aaye mann mein
Jab tak praan basein is tann mein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 2, 2019

Om Namaha Shivaya
Aaj Ka Suvichaar 🙏🏻🙏🏻 # 469

Aap Kripa Kar Hum Par Kripa Barsaayiye

Pyaare Guruji,

Bheed mein gum na jaayein hum
Buss, Aapki oar aayein hum
Buddhi ko ksheen honei se bachaayiye
Hamaare antarmann ko shudh banaayiye

Kalyuga pad raha hai sab par bhaari
Phail rahi hai shaareerik aur maansik beemari
Roag aur peeda se hamein bachaayiye
Hamaari atma ko shaktishaali banaayiye

Dharma-sankat aur duvidha mein phanse hain
Vehem aur ahem ke daldal mein dhanse hain
Kya karein, Aap hee bataayiye
Mann se har shankaa mitaayiye

Adheer hokar vichlit hai hamaara mann
Chayn nahin zaraa ek bhi kshan
Hamaara dheeraj badhaayiye
Adhyaatmik seedee par hamein chadhaayiye

Laukikta kee lapet mein kho gaye hain hum
Kamzor aur doshpoorna ho gaye hain hum
Hum sabko raah dikhaayiye
Hamein Aap jeena sikhaayiye

Agyan ka timir mitaayiye
Ujjwal savera dikhaayiye
Gyan ka amrit pilaayiye
Aap kripa kar hum par kripa barsaayiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 1, 2018

Om Namaha Shivaya
Aaj Ka Suvichaar 🙏🏻🙏🏻 # 103

            Satsang Kee Ghadiyaan

Satsang ki ghadiyaan anmol hain
Inhe vyarth na ganvaa tu bande
Idhar udhar ke khayaalon mein
Tu kho na jaa, aye bande

Shabad ka shravan kar, Guruji ka manan kar
Prasad le aashirwaad ke sangg
Satsang sun kar, apna kalyaan kar
Lagan aur vishwaas ke sangg

Guruji har Satsang mein aate hain
Isme koi shaq ki gunjaayish nahin
Lekin dil mein Unke liye jab pyaar ho
Toh jahaan tu hoga, Veh hongei vaheen

Satsang mein agar na pahunch paaye tu
Toh isey bhi Guruji ki agya jaan lena
Koshish karna tera kaam hai bande
Baaki sab Unka hukm maan lena

Hum sab prem aur daya ke pyaase hain
Guruji, hum sab ko karuna ka daan dena
Hamaare janam se lekar maran takk
Aap kripa hamaari baahein thaam lena

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 1, 2019

Om Namaha Shivaya
Aaj Ka Suvichaar 🙏🏻🙏🏻 # 468

               Simran aur Dhyan

Pyaar bahut zaroori hai dhyan lagaane ke liye
Simran bahut zaroori hai swayam ko jagaane ke liye
Guru naam ke alaawa kuch nahin chaahiye jeevan bitaane ke liye
Guru naam ka shringaar sarvasreshth hai atma ko sajaane ke liye

Phir kaisi uljhan aur kaahe ka vilambh
Shubh sanskaaron ka karein aarambh
Simran aur dhyan karein zyada se zyada
Achchaa bann ne ka karein Guruji se vaada

Simran se Guruji kee divya jyot jal jaayegi
Dhyan se hamaari ekaagrataa badh jaayegi
Guruji ko mehsoos karenge apne bheetar aur apne sangg
Unke prem se khushnuma banega apne jeevan ka rangg

Guruji ko simar simar kar humko
Milegi shanti aur shakti
Dekhna kaise jeevan mein
Rangg laayegi bhakti

Gehra hoga prem, vishwaas, aur dheeraj
Chitt khilega jaise jheel mein neeraj
Sehensheelta aayegi, sehej ho jaayega svabhaav
Guruji khush hongei dekh kar hamaara bhaav

Jannat ka anubhav hoga dharti par rehte huey
Hamein sukoon mehsoos hoga sabse yeh kehte huey
Ki dayaalu Guruji ne hamein apnaaya hai
Aur humne Guruji ke roop mein Khuda ko paaya hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja