Month: July 2019

July 31, 2018

Om Namaha Shivaya
Aaj Ka Suvichaar 🙏🏻🙏🏻 # 163

                  Guruji Kahein...

Jabb takk praani apni ‘mai’ mein phasey
Uske dil mein uska Guru kaise basey
Guruji kahein is ‘mai’ ko tyaago
Aham kee jalti aag se duur bhaago

Jalaa degi yeh aag tujhe bhi ek din
Nahin jee sakega tu Guruji ke bin
Jaise jaise samay raha hai beet
Tu Guruji se lagaa le pavitra preet

Bande, ‘mai’ ko chod kar dekh toh sahi
Prabhu milan kee raah tera intazaar kar rahi
Isee raah par mitenge dukh aur santaap
Aur tera Guruji se hoga sundar milaap

Milaap kee uss ghadi ko galey se tu lagaa
Apni divya antaraatma ko tu le abb jagaa
Jalaa le tu dil mein bhakti kee jyot akhand
Guruji mil gaye, toh kabhi toh mil jaayega sachkhand

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 31, 2019

Om Namaha Shivaya
Aaj Ka Suvichaar 🙏🏻🙏🏻 # 528

          Zindagaani Ka Afsaana 

Zindagi mein udaasi aur khushi ke bahaane milenge kayee
Lekin zindagi ke lamhon ke liye shukrana karna seekh lein
Is tarehn se apna drishtikoan sudhaarein
Shukrana kar apna jeevan sanvaarein

Maana ki shukriya karna kathin hai gumm mein
Kyunki niraasha aa jaati hai mann mein
Kintu Guruji kee sharan mein na hotei toh gumm hota aur bhi zyada
Guruji ne sadaa nibhaaya hai hamaari raksha karne ka vaada

Shukrana jo karenge hum udaasi aur dukh ke pal mein
Toh Guruji ko aur bhi garv hoga humpar
Aakhir hamaari har saans jo hai
Veh chalti hai Guruji kee kripa ke dum par

Guruji ka shukrana karenge jitna
Guruji karam kaat-te chalenge utna
Mushkilein hal hoti hui nazar aayengi
Udaas ghadiyan jald hee guzar jaayengi

Shukrana ka ehsaas sach mein itna hai khaas
Isliye swayam ko samjhaayein aur na hon hum udaas
Har pal Guruji ka hum karein shukrana
Shukrana mein guzaar lein zindagani ka afsaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 30, 2018

Om Namaha Shivaya
Aaj Ka Suvichaar 🙏🏻🙏🏻 # 162

         Aapki Leela Badi Niraali

Karmon se hee banti sabki kismat hai
Kya rakhaa hai haathon kee lakeer mein
Varna sabb insaan ek jaise hain
Koi fark nahin raja aur fakeer mein

Guruji, Aap hamaare MahaShiv hain
Aapki leela hai sach mein badi niraali
Aap paristhiti sanvaar sakte hain
Aur banjar bhoomi par bhi laayein hariyaali

Pichhle karmon se banee niyati ko
Aap Apni divyataa se sanvaarein
Hamaare aaj ke achche karam dekh kar
Hamaare agley janam ko bhi nikhaarein

Shubh karam hon hamaare sadaa
Aur neeyat hameshaan achchi ho
Paap na karein, neki se jeeyein
Aur hamaari bhakti hameshaan sachchi ho

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 30, 2019

Om Namaha Shivaya
Aaj Ka Suvichaar 🙏🏻🙏🏻 # 527

                    Shradhanjali

Guruji se na kar sakey koi bhi chori
Guruji jaantein Hain hamaari har kamzori
Phir Unse kuch chhupaane kee koshish bekaar hai
Ve antaryaami Hain aur Unhe hum sabse pyaar hai

Chaahe ho rogi kaaya
Chaahe dil mein basee ho laukik maaya
Chaahe adhyaatmik asthirta ho
Ya phir mann bhatakta phirta ho

Guruji ko in sabka gyan hai
Har ek bhakt ka Unhe dhyan hai
Isliye Unkee razaa hamein ho khushi se sweekaar
Kyunki Guruji hee hain hamaare parwardigaar

Na maangein Unse hum kuch bhi
Buss, khush rahein jis haal mein ve rakhein
Na karein Unse koi shikaayat
Har pal dil se Unhe shukrana kar sakein

Kabhi jab chinta sataane lagey
Ya dil mein anuchit vichaar aane lagey
Toh buss Guruji ko yaad karein hum
Aur dil ko samjhaakar dheeraj dharein hum

Hum toh kalpana bhi nahin kar sakte hain
Guruji ke saamarthya aur Unkee shakti kee
Hum toh Unhe shradhanjali de sakte hain
Keval apne pyaar aur niswaarth bhakti kee

Shaayad pehle pehle thoda sa bhayy hoga
Lekin jaise jaise ruhaani safar tayy hoga
Hum keval Guru milan ke liye lagenge tarasne
Aur Guruji ka ashirwaad har pal hum par lagega barasne

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 29, 2018

Om Namaha Shivaya
Aaj Ka Suvichaar 🙏🏻🙏🏻 # 161

    Saanchi Preet Aur Sachchi Jeet

Aayi Tumhaare divya dwaar par
Guruji, mai sabb kuch haar kar
Abb aur imtehaan na lo mere aitbaar ka
Aap toh mahasaagar ho pyaar ka

Jitne paapi aaye Aapke charan mein
Unko le liya Aapne Apni sharan mein
Apni rehmat barsaakar unka uddhhaar kiya
Kitnon ke bikhrey huey jeevan ko sudhaar diya

Asahaay ka ho Aap sahaara
Aapke bina na hai abb guzaara
Jo bhi rishta hai hamaara aur Tumhaara
Koi bhi rishta na hai is se pyaara

Duniya se judnaa ek bhool hai
Moh maya mein padna fazool hai
Bass mai Aapse kar loon saanchi preet
Vahee hogi yakeenan meri sachchi jeet

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 29, 2019

Om Namaha Shivaya
Aaj Ka Suvichaar 🙏🏻🙏🏻 # 526

          Dil Se Guruji Kee Ibadat

Akhbaar ke har panne par beshaq kaisi bhi khabar ho
Phir bhi akhbaar hai bikta
Vaise hee jeevan ke safar mein har moad par
Har tarehn ka nazaara nainon ke jharokhe se hai dikhta

Karmic bojh ko halka karna
Guruji kee kripa ke bina mumkin nahin
Guruji par tu sada vishwaas rakh
Ve jo raasta dikhaayein vahi hai sahi

Sangharsh aur duvidha mein
Phansee hai teri atma
Guruji kee kripa se
Is mushkil ka hoga khaatma

Jitna karmon ka bhaar hai
Kum se kum utnee sadhna toh karni padegi
Tabhi toh teri atma
Uddhaar kee seedi par chadhegi

Guruji kee jab barsegi mehar
Tere jeevan mein honei lagegi sehar
Kyunki Guruji karenge tujhpar upkaar
Aur halka hoga tere karmon ka bhaar

Idhar udhar bhatakna chod de
Guruji se rishta jod le
Kayee janmon se tere karam ho rahein hain sanchit
Ab Guruji ke ashirwaad se kaheen reh na jaana tu vanchit

Kar le dil se Guruji kee ibadat
Kar le apne zameer kee tu hifaazat
Chaahe aa jaaye koi bhi kayaamat
Guruji kee sadaa rahegi tujh par inaayat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 28, 2018

Om Namaha Shivaya
Aaj Ka Suvichaar 🙏🏻🙏🏻 # 160

           Satyuga Kee Shuruvaat

Is kalyuga ke adhiktar rishte naatey
Swaarth kee neev par kyun khadey hain
Pyaar aur vishwaas se bhi zyada
Sona aur chandi kyun bade hain

Durlabh hai niswaarth bhawna
Aur dooje ke mangal kee kaamnaa
Na dhokhe ke pachhtaavey hain
Oopar se aur dikhaawey hain

Aao hum sab mil jul kar
Guruji kee karuna aur kripa se
Sabke bhaley kee baat karein
Aur Satyuga kee shuruvaat karein

Pyaar hee pyaar chhalke har oar
Niswaarth prem ka bhaav ho
Raaj ho wafaa aur sachchaayi ka
Na koi nishaan ho bewafaai ka

Sabb insaan ek dooje kee madad karein
Aur badle mein kabhi kuch na chaahein
Ik dooje ke raaste ke hataa dein kante
Sadbhawna se bharee hon sabki raahein

Vishwaas kar sakein sab ek dooje par
Sabke liye prem, aadar, aur satkaar ho
Vinamrataa se sabke kaam bann jaayein
Na jhagdaa, ladaayi, na daant phatkaar ho

Guruji chaahein ki hum neevein rahein
Aur sadaa dil se rahein hum sachche
Kitna achchaa lagey jabb Guruji kahein
Ki hum sab hain Unke achche bachche

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 28, 2019

Om Namaha Shivaya
Aaj Ka Suvichaar 🙏🏻🙏🏻 # 525

               Sun Le Aye Insaan

Kehte hain Guru Govind se milvaata hai
Guru jeevan ka andhkaar mitaata hai
Tera toh Guruji ke saath aisa naata hai
Ki tu Guru mein hee Ishwar ko paata hai

Kar le tu har paristhiti ka saamna
Guruji ke sahaare
Tere jeevan kee bhatakti hui naiya ko
Guruji lagaayenge kinaare

Na dagmagaane de apna vishwaas
Buss, jaari rakh tu apna prayaas
Neeyat shudh rakh, yahee hai raaz
Kyunki uddhaar ke liye yeh raaz hai bahut hee khaas

Sewa simran satsang mein dhyan lagaaya kar
Samarpan kar Guruji ko, aur buss tu dheeraj dhar
Chaahe aayein lakh mushkilein teri raahon mein, tu na darr
Guruji tere angg sangg Hain aur Unhe hai teri fikar

Guruji ne liya hai tujhe sharan mein
Lutaa de sab kuch Unke charan mein
Madad karenge Ve teri har karam mein
Tere sangg rahenge tere har janam mein

Tyaag de tu abb jhoothi shaan
Miley Hain tujhe Guruji mein Bhagwaan
Tera jeena ho jaayega pehle se aasaan
Apne bhaley kee baat sun le aye insaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 27, 2018

Om Namaha Shivaya
Aaj Ka Suvichaar 🙏🏻🙏🏻 # 159

           Mann Kee Ichhaa

Chiraag jalaaye hazaaron mainey
Phir bhi roshni milee nahin
Haunsla rakhne kee koshish kee magar
Ummeed kee kalee khilee nahin

Himaat kar ke ek baar phir
Dil ka bujha hua deep jabb jalaaya
Ek sundar chamatkaar hua tabb
Guruji ka divya chehra nazar aaya

Unkey gehrey nainon mein
Apne pratibimb ko dekha
Unhonei thaam liya mujhe
Aur badli mere haath ki rekha

Maarg mera ujjwal hua
Unke maathey ke noor se
Apni manzil ka dwaar mujhe
Dikhaayee de gaya duur se

Guruji maargdarshan karte rahei
Mai Unke bharose chalti rahee
Subah se dopeher se shaam ho gayee
Shaam bhi dheere dheere dhaltee rahee

Sachkhand ke dwaar par le aaye Guruji
Khushi se mai phooli nahin samaayi
Guruji kee sharan mein jageh paaney kee
Mere mann kee ichhaa pooran ho paayi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 27, 2019

Om Namaha Shivaya
Aaj Ka Suvichaar 🙏🏻🙏🏻 # 524

            Guru Naam Kee Mala

Guruji ne hee hamein hai sambhaala
Guru hee hai hamaara rakhwaala
Guru hamaara hai bade dil waala
Guruji ke ashirwaad se hee jeevan hai niraala

Yeh sansaar toh hai mithya mein hua matvaala
Yahaan kalyuga ne dera hai daala
Ahem kee dhool se iska rangg ho gaya hai kaala
Aise mein Guruji ke naam se hee hua hai ujaala

Sach mein, hamaara Guru hai itne pyaar waala
Jisne itnee mamta se hum sabko hai paala
Hamein har mushkil ke changul se baahar hai nikaala
Unhee ke simran se dil mein hai ummeed kee jwaala

Kyun na apne har vichaar ko rakhein hum bhola bhaala
Taaki mann kee nirmal nadiya na bann jaaye keechad ka naala
Har kshan dil mein samaay pyara Guru pratipala
Har pal japein hum Guru naam kee mehekti mala

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 26, 2018

Om Namaha Shivaya
Aaj Ka Suvichaar 🙏🏻🙏🏻 # 158

      Na Koi Asha Na Koi Niraasha

Na koi asha na koi niraasha
Chaahe koi paraaya ho ya apna
Dekhoon duniya ka tamaasha
Jaise ki ho veh ek sapna

Jo Guruji ko manzoor ho
Usee mein khush rahoon
Shikaayat ke taur pe Unse
Kuch bhi na kabhi kahoon

Guruji kee razaa mein raazi rehna
Mera sarvpratham dharam ho
Unke pyaar bharey ashirwaad se
Hameshaan nek mera har karam ho

Dhyan mein mere sadaa rahey
Apne satguru ke prati pyaar aur bhakti
Vahee toh hain jo detey hain
Mujhe aatmavishwaas aur shakti

Kabhi kuch aisa na karoon
Jis se mere Guruvar dukhi hon
Meri vinamr dua hai Unse
Ki duniya mein sab sukhi hon

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 26, 2019

Om Namaha Shivaya
Aaj Ka Suvichaar 🙏🏻🙏🏻 # 523

                Gumm Aur Khushi

Jab gumm aur khushi
Dono hee Aapke banaaye huey asool hain
Toh phir inke prabhaav se bekaabu hona
Sach mein bilkul fizool hai

Guruji maati ke putle hain hum sab
Kshanbhangur hai hamaari zindagi
Uddhaar kar lein kaash hum apna
Kar ke Aapki bandagi

Kuch bhi nahin hai hamaare haath mein
Asthaa hai toh Aapke divya saath mein
Gyan ke taare dikhaayiye hamein is agyan kee raat mein
Aapke prati pyaar kee chhavi chhalke hamaari har baat mein

Gumm aur khushi dono hee
Pehlu hain is jeevan ke
Inse faayda hota hai ya nuksaan
Ye toh mehez vichaar hain mann ke

Daata, daat aisee bakshiye hamein
Ki na khushi mein aaye ahem aur na gumm mein hon udaas
Buss har anubhav se hum kuch seekhein
Aur swayam ko behtar banaane ka karein prayaas

Aapki razaa ke mutaabik
Zindagi toh chalti rahegi
Aapka simran karne se milegi shanti
Aur yeh atma har paristhiti ko sahegi

Buss, itna toh nishchit hai
Ki Aapke bina guzaara nahin
Saare brahmand mein bhi khoj lein
Toh Aapke jaisa pyara sahaara nahin

Buss, phir Aapki sharan mein rehte huey
Hum rehna seekhein santusht har samay
Chaahe ho khushiyon kee barsaat
Chaahe aa jaaye kashton ka pralay

Aap hamaare mata pita hain Guruji
Sadaa karte hain hamaara kalyaan
Shukrana hai Guruvar Aapka
Aapse mila hai hamein jeevandaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 25, 2018

Om Namaha Shivaya
Aaj Ka Suvichaar 🙏🏻🙏🏻 # 157

          Guruji Kee Mehar Barsey

Jaise nadiyon mein paani bahey
Patharon par se bhi bina thakaan
Vaise hee Guruji kee mehar barsey
Hain Veh sab par meharbaan

Guruji samjhein bhakton ke pyaar ko
Chaahe veh pyaar ho bezubaan
Ve dukh bhi Guruji jaantey hain
Jis dukh se hum hain abhi anjaan

Chinta chhod ke Guruji ko dhyaayein
Guruji hain hamaare Bhagwaan
Sukh ka ho ya dhan sampatti ka
Guruji hee denge hamein veh daan

Jeevan ka har lamha, har pehlu
Guruji par hai abb qurbaan
Guruji se hee toh yeh jaan hai
Aur Guruji se hee yeh saara jahaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 25, 2019

Om Namaha Shivaya
Aaj Ka Suvichaar 🙏🏻🙏🏻 # 522

         Mann Mein Shankaa Kyun

Mann mein shankaa kyun hai pyaare
Tooney Guruji ka ashirwaad paaya hai
Kumm kar ke hee mila hai tujhe
Jo bhi dukh tere hissey mein aaya hai

Kabhi beghar hota hai koi insaan
Kabhi kisee kee hoti nahin hai santaan
Har kisee ka poora nahin hota har armaan
Aakhir yeh zindagi hai sabke liye karmon ka imtehaan

Guruji kee sharan mein na hota agar tu
Toh tujhe aur bhi zyada kasht jhelne padte
Jaise Guruji tujhe taar rahey Hain
Vaise hee Unke aur bhakt bhi hain tartey

Guruji hee jaante hain
Ki kab kya uchit hai tere liye
Sahi samay aane par sadaa
Sapne poore hain tere kiye

Agar kabhi dikhaa diya Unhonei
Ki Unke bina tera haal kya hota
Toh yakeenan kaamp uthega tu
Aur thakk jaayega rota rota

Isliye Guruji rakhein jis haal mein
Na guzaar zindagi tu sawaal mein
Balki har pal ko maan le ek haseen uphaar
Aur har pal badhaa le Guruji se pyaar

Jaise har subah aur dopeher ke baad hoti hai shaam
Vaise hee sabke jeevan ka hota hai anjaam
Aur phir jisne Guruji ko hee apni manzil banaa liya
Usne toh srishti ka sabse divya inaam paa liya

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 24, 2018

Om Namaha Shivaya
Aaj Ka Suvichaar 🙏🏻🙏🏻 # 156

        Guru Milan Kee Bela Aayee

Guru milan kee bela aayee
Sab kuch abb mai chod chalee
Mann mein utsaah ka ehsaas jaaga
Khil gayee dil mein muskaan kee kalee

Guruji ne Apne paas bithaaya
Charan sewa ka mauka diya
Jisko paakar dhanya hui mai
Unhonei aashirwaad diya

Unka diya hua chai prasad
Shradha se pee liya mainey
Langar prasad bhi khaya rajj kar
Uska nirmal anand toh kya kehne

Guruji ke vachan se sajaya dil ko
Vahee hain sabse sundar gehne
Unke kehne par mai mastt ho gayi
Jagg ke nakhde nahin pade sehne

Guruji ko apne saadhaaran se pyaar ka
Ek chhota sa nazraana diya mainey
Apni sharan mein mujhe lene ke liye
Unka koti koti shukrana kiya mainey

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 24, 2019

Om Namaha Shivaya
Aaj Ka Suvichaar 🙏🏻🙏🏻 # 521

            Sadhna Ka Aadhaar

Guruji, Aapne hamein sharan mein liya hai
Kaise kahein ki hum kitne shukrguzaar hain
Aapne thaama haath toh hum bach gaye hain
Varna hum toh haalaat se laachaar hain

Shabdon mein karna bahut hee mushkil hai
Aapke prati bhakti aur prem ko bayaan
Yeh toh aisa nirmal bhaav hai
Jo hum bhakton ke liye hai vardaan

Aapki hee kripa se rehta hai ujjwal
Mandir hamaare mann ka
Aapki hee mehar se kalyaan ho raha hai
Aapke har bhakt jann ka

Prem se karein yaad Aapko, na ki bhayy se
Vishwaas se poojein Aapko, na ki sanshayy se
Na darr ho kisee ka, na mann mein ho paap
Buss simran mein dikhein Aap, keval Aap

Aapke liye beintehaa aadar aur pyaar
Banaa rahey hamaari sadhna ka aadhaar
Aapke prem se miltee hai hamein shakti
Aapki karuna se hoga hamaara beda paar

Saadaapan aisa bakshiye ki sukh mein guroor na ho jaaye
Atma-vishwaas aisa bakshiye ki dukh mein dil choor choor na ho jaaye
Ashirwaad aisa deejiye ki koi bhi bhakt Aapse duur na ho jaaye
Saath aisa deejiye ki Aapki bhakti ka suroor sa ho jaaye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 23, 2018

Om Namaha Shivaya
Aaj Ka Suvichaar 🙏🏻🙏🏻 # 155

 Guruji Par Bharosa Kar Ke Jee Lee

Bhagya kee patdee par chalti hai
Har maanav ke jeevan kee rail-gaadi
Har station par koi chadhta gaadi mein
Aur utar jaati hai koi aur savaari

Sabki apni manzil hai
Hai sabki apni raah
Koi humsafar saath deta hai
Koi bilkul na kareh parwaah

Guruji par bharosa kar ke jee le
Sab kuch kar de Unko arpan
Shradha se buss kar le har pal
Sewa, simran, aur samarpan

Guruji hee MahaShiva hain
Tere bhagya ko saktein hain badal
Unko haath thamaa dey tu apna
Apne jeevan ko kar le tu safal

Buss, yoon hee hastey hastey
Zindagi ka safar katt jaayega
Khushkismati choomegi tere kadam
Guru naam ka dhan tu paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 23, 2019

Om Namaha Shivaya
Aaj Ka Suvichaar 🙏🏻🙏🏻 # 520

       Abb Toh Yahee Ichchaa Hai

Sula lo Apni goad mein Guruji
Bitha lo Apne paas
Aapke divya deedar ke alaawa
Rahe na koi aas

Karmon ka hisaab poora karvaane ke liye
Aapne is duniya ko banaaya
Phir laukik aakarshan se
Iska rangmanch Aapne sajaaya

Dekhte rehte Hain Aap bade dhyan se
Kiska kahaan jhukaav hai
Kiske dil mein vikaar hain
Aur kiske dil mein shudh bhaav hai

Kaam krodh moh lobh ahankaar
Inse duur rahein hum, Aap sikhaate Hain
Sabhi ko Aap takk pahunchne ka raasta
Guruji, Aap dikhaate Hain

Kripa kar sadbuddhi deejiye
Ki is raaste par bhatak na jaayein hum
Saansaarik chakravyu ke vikaaron mein
Galati se atak na jaayein hum

Abb takk toh hum sabne
Paap ke kooen hain khodey
Kisee ne daulat kamaayi khoob
Kisee ne haasil kiye bade audey

Asal dhan toh hai Aapka deedar
Kripa kar hum sabko yaad dilaayiye
Duniya ke mele mein aur na uljhein
Hamein yeh baat sikhaayiye

Galat socha humne ki duniya kee
Pehchaan see honei lagee hai
Kalyuga ke is bhanvar mein daata
Thakaan see honei lagee hai

Beintehaa shukrana hai Aapka
Aapne diya jeevan jeene ka anmol avsar
Aap saath Hain toh hum jee rahey hain
Kripa keejiye ki karam bhog mein na reh jaaye koi kasar

Is maayavee sansaar kee baaton mein kuch nahin rakha
Poorna vishwaas hai Aapke diye huey is gyaan mein
Isliye abb toh yahee ichchaa hai
Ki buss guzar jaaye har pal Aapke hee dhyan mein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 22, 2018

Om Namaha Shivaya
Aaj Ka Suvichaar 🙏🏻🙏🏻 # 154

                  Dua Hai Aapse

Guruji ke pyaare darbaar mein
Sab kuch hai divya prasad
Bhakton ko hai raas aata
Langar ka hai anokha swaad

Guruji sach mein suntei hain
Bhakton ke dil kee fariyaad
Jo paaya ya na paaya humne
Hai Guruji Aapka aashirwaad

Dua hai Aapse Guruji, ki sab khush rahein
Ho jaaye sabki zindagi aabad
Is jeevan ke chakravyu mein
Moh maya ke jaal se ho jaayein azaad

Burey vichaar aur kukarma na karein
Bachh jaayein honei se barbaad
‘Banda bann, changey kaam kar’
Guruji, Aapke ye shabd sadaa rakhein yaad

Guruji, Aap sabke parwardigaar hain
Samjhein Aap bhakton ke jasbaat
Aapne Apne charnon mein jagah dee hai
Is se badi aur anmol nahin koi bhi saugaat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 22, 2019

Om Namaha Shivaya
Aaj Ka Suvichaar 🙏🏻🙏🏻 # 519

                    Koshish Hai...

Koshish hai gumm ko bhulaane kee
Guruji, madad keejiye
Koshish hai shanti paane kee
Guruji, kripa kar madad keejiye

Koshish hai khud ko jaan-ne kee
Guruji, madad keejiye
Koshish hai sabko pehchaan-ne kee
Guruji, kripa kar madad keejiye

Koshish hai khush rehne kee
Har gumm ko bhi khushi se sehne kee
Waqt ke saath saath behne kee
Guruji, kripa kar madad keejiye

Koshish hai sadbhaav badhaane kee
Koshish hai pyaar kee khushboo phailaane kee
Koshish hai insaaniyat ka rishta nibhaane kee
Guruji, kripa kar madad keejiye

Koshish hai sewa aur satsang mein lagan kee
Magn hokar gurbani ke shravan kee
Aapke hee naam ke shubh manan kee
Guruji, kripa kar madad keejiye

Koshish hai Aapko prasann karne kee
Aapke ashish se apni jholi bharne kee
Aapke charnon mein jeene aur marne kee
Guruji, kripa kar madad keejiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja