Month: July 2019

July 21, 2018

Om Namaha Shivaya
Aaj Ka Suvichaar 🙏🏻🙏🏻 # 153

      Guruji Ka Anusaran Kar Le Tu

Ghaas ne odh lee barf kee chaadar
Zindagi ka raasta bhi hai kuch is tarehn
Sambhal kar chal aye bandey ispar
Tere padd-chinh ke reh jaayenge nishaan

Beshaq jeevan mein tu raasta badal ley
Tere pairon ke nishaan sunaayenge teri kahaani
Jahaan bhi tu jaaye, yaad chod ja aisee tu apni
Ki yaad karne waale saraahein teri zindagaani

Kshanbhangur hai yeh jeevan
Jaise paani ka ho budbudaa
Guruji ke bharose chalta chal
Kyunki Guru hee hai tera Khuda

Guruji ka anusaran kar le tu
Aur hameshaan achche karam kar
Na kabhi bhi aanch aaney dey
Apne shubhkaram ke dharam par

Nek iraadon aur sukarmon se susajjit hon
Tere jeevan kee prernamayi raahein
Jo insaan dekhein aur jaanein tujhe
Ve tere padd-chinh par chalna chaahein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 21, 2019

Om Namaha Shivaya
Aaj Ka Suvichaar 🙏🏻🙏🏻 # 518

Yeh Duniya Kisee Kee Jaageer Nahin

Sabke bheetar baste Hain Guruji
Sabki muskuraahat mein hastey Hain Guruji
Isliye chaahe jiska ho jaisa bhi roop
Yaad rakh, sabhi hain devswaroop

Gunaah hai buraa
Gunehgaar nahin
Gunehgaar se nafrat karna
Yeh toh nahin hai sahi

Isliye agar teri neeyat hai saaf
Toh galat sochne waale ko karde tu maaf
Kyunki Guruji toh sab kuch jaante Hain
Ve toh teri neeyat pehchaante Hain

Sach toh saamne aayega
Aaj nahin toh kal
Jeevan ke yeh lamhe hain raahi
Keval pal do pal

Aakhir ek din toh sab ne
Yahaan se hai jaana
Yeh duniya kisee kee jaageer nahin hai
Har banda hai yahaan begaana

Kya fark padta hai agar
Duniya mein hai tera bada khitaab
Tere har karam ka
Guruji rakh rahein hain hisaab

Guruji kee baat maankar mann mein
Prem kee jyot jalaa le
Guruji kee baat maankar sabke hitt kee
Ichchaa is mann mein jagaa le

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 20, 2018

Om Namaha Shivaya
Aaj Ka Suvichaar 🙏🏻🙏🏻 # 152

                Aaj Nahin Toh Kal

Guru kripa ka mol
Aye bande pehchaan le
Abb bhi deri nahin hui hai
Guru ko Govind maan le

Guruji hee lekar jaayenge
Tujhe bhavsaagar ke paar
Unhee kee meharbaani se
Tu samjhega jeevan ka saar

Panchhee ko din bhar udne ke baad
Pukaartaa hai uska ghonslaa
Vaise hee tujhe sachkhand milega
Rakh bandey tu haunslaa

Har praani ke bheetar hai atma
Jo divya jyoti mein hai samaa jaati
Agar karmon ka silsila jaari hai
Toh atma kisee aur roop mein hai aati

Buss Guruji se judey rehna tu
Chaahe aaye koi bhi kathinaayi
Aaj nahin toh kal moksh milega
Yeh hai pyaare Guruji kee vadiyaayi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 20, 2019

Om Namaha Shivaya
Aaj Ka Suvichaar 🙏🏻🙏🏻 # 517

         Zindagi Behti Dhaara Hai

Zindagi behti dhaara hai
Tohfa yeh bahut hee pyara hai
Guruji ne yeh uphaar hamein diya hai
Beintehaa upkaar hum par kiya hai

Sewa karein hum nishkaam
Lekar Guruji ka naam
Barkaraar rakhkar apna imaan
Rakhein hum Guruji ka maan

Simran mein rahein hameshaan
Na hon niraash aur pareshaan
Chaahe hum yahaan hon ya vahaan
Yeh jeevan hai ek imtehaan

Satsang mein jab bhi aayein
Guruji kee mahima sunein aur sunaayein
Shradha se langar Prasad khaayein
Gurbani sunkar Guruji ka ashirwaad paayein

Har pal Guruji ka karein shukrana
Guruji ko na ek pal bhi hai bisraana
Chaahe lakh sitam dhaaye ab yeh zamaana
Hamaare paas hai Guru naam ka khazaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 19, 2018

Om Namaha Shivaya
Aaj Ka Suvichaar 🙏🏻🙏🏻 # 151

                Yeh Anmol Rishta

Pyaare Guruji,

Vaadiyon ke shaant ekaant mein Aap
Jharne ke behte huey paani mein Aap
Akash mein tehelte baadal mein Aap
Chaand ki bholi naadani mein Aap

Bagiya kee pyari khoobsoorati mein Aap
Khiltey huey phoolon ki mehek mein Aap
Jheel ke neer ki sheetalta mein Aap
Chidiyon ki meethi chehek mein Aap

Hothon kee haseen muskaan mein Aap
Maasoom nigahon kee nazar mein Aap
Khwaabon aur khayaalon mein hain Aap
Is jeevan ke har pehlu ke safar mein Aap

Har bachche ke bholepan mein Aap
Sabki dhadkan aur shwaas mein Aap
Har vriksh aur paudhey mein Aap
Bhakton ke vishwaas mein Aap

Suneheri subah ke sooraj mein Aap
Raat mein sitaaron kee chamak mein Aap
Shrishti ke har jann jann mein Aap
Aur har jann ke kann kann mein Aap

Guruji, har lamhe mein Aap hee Aap
Aap se hee hai ujjwal har savera
Akash se bhi anant aur aseem hai
Yeh anmol rishta Aapka aur mera

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 19, 2019

Om Namaha Shivaya
Aaj Ka Suvichaar 🙏🏻🙏🏻 # 516

      Guruji, Aap Bhagwaan Hain

Hamaari chaahat poori na ho
Toh veh nahin hai Aapki namanzoori
Balki hamaare hee bhaley ke liye
Shaayad Aapki oar se vilambh hai zaroori

Kyunki Aapke mann mein hai
Hamaare liye aur bhi behtar yojna
Baaki apne karmon ke anusaar
Hamein niyati ko hai bhogna

Kya milega hamein aur kab milega
Keval Aap hee jaante hain
Hamein is sachchaayee se santosh milna chahiye
Kyunki hum Aapko apna Bhagwaan maante hain

Jo hamaari niyati mein hai daata
Usey Aap hee sudhaar sakte hain
Aap Bhagwaan hain toh yeh kar sakte hain
Varna hum kukarma karne se kahaan thakte hain

Phir bhi Aap karte hain hamaari sahaayta
Kabhi bhi nahin dekhte hain Aap Apna faayda
Balki hamaare kasht aur roag aur karmon ka bhaar
Aap toh swayam par hee le lete hain har baar

Kaash hum sab poori tarehn se nahin toh thoda sa hee sudhar jaayein
Jis raaste kee oar Aap nirdesh karein hum sab udhar kee oar jaayein
Aapke ashirwaad se apne jeevan mein parivartan laayein
Aapke maargdarshan se moksh ke nazdeek aayein

Kyunki yeh zindagi toh aaj hai kal nahin
Kyun na koshish ho ki hamaare karam hon sahee
Taaki jab aaye Aapse divya milan kee bela
Toh sundartaa se samaapt hoga yeh janam maran ka mela

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 18, 2018

Om Namaha Shivaya
Aaj Ka Suvichaar 🙏🏻🙏🏻 # 150

     Guruji Aaye Bann Kar Bashar

Guruji aaye bann kar bashar
Is kalyuga ke sansaar mein
Maanav ka uddhaar karne
Aaye Shivji ke avataar mein

Na dekhi jaat na dekhi bhaasha
Sabke dil mein bhar dee asha
Bhakton ko Ve dikhaayein jeene kee raah
Sabke mann mein Ve jagaayein utsaah

Saadaapan Unko bahut bhaata hai
Bhakton se Unka ek nirmal naata hai
Kehte hain Guruji ki jhooth na bolo
Apne karmon mein vish na gholo

Guruji ka naam lekar jo aagey badhega
Guruji ko sab kuch jo samarpan karega
Jo Unke dikhaaye huey maarg par chalega
Vahee bhakt Unkee komal kripa se tarega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 18, 2019

Om Namaha Shivaya
Aaj Ka Suvichaar 🙏🏻🙏🏻 # 515

        Guruji Kee Mahima Ka Noor

Pyaare Guruvar,

Aapka prem aur Aapka prataap
Har leta hai bhakton ke dukh aur santaap
Aapki mamta aur Aapki divya pavitrataa
Duur kar deti hai is atma kee daridrataa

Aapse pyaar hai itna Guruji
Ki har pal Aapko yaad karne ka dil karta hai
Aapke bharose har pal jeete hain
Yeh pyaar aur bharosa simran ke liye utsaahit karta hai

Yakeen hai ki Aapki sadhna se aur bhi badh jaayegi
Aapke prati shradha aur preet
Aapke simran mein leen hokar yeh jaana
Ki Aap jaisa na hai koi aur meet

Lafzon mein bayaa karna shaayad ho mushkil
Ki kaise Aapki kripa se mil jaati hai manzil
Karishma hai yeh Aapki khudaai ka
Ab sawaal hee nahin uthta Aapse judaai ka

Aapke hee charnon mein subah ka sooraj
Aapke hee charnon mein raat ka chand
Aapki hee mahima ke noor se
Roshan hua hai yeh sampoorna brahmand

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 17, 2018

Om Namaha Shivaya
Aaj Ka Suvichaar 🙏🏻🙏🏻 # 149

  Jai Guruji Dhan Guruji Kehte Jaao

Guruji dhoop mein, chhaaon mein
Har ghar mein, har gaaon mein
Gaaon ki sab galiyon mein
Phoolon mein aur kaliyon mein

Guru naam ameeron ka khazana
Gareebon ne bhi jisey gehna maana
Sabki taakat aur himmat Guruji
Sabka maan aur izzat Guruji

Baarish kee boondon kee tapp tapp mein
Saagar kee lehron kee chhap chhap mein
Guruji bastey hain kann kann mein
Guruji hain har jann ke mann mein

Guruji sardi mein garmi mein
Makhmali ghaas kee narmi mein
Dharti mein hain aur nabh mein bhi
Guruji basey hain hum sab mein bhi

Jai Guruji Dhan Guruji kehte jaao
Har gumm ko tum sehte jaao
Khushiyon ka bhi batoro khazana
Gumm aur khushi ka karo shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 17, 2019

Om Namaha Shivaya
Aaj Ka Suvichaar 🙏🏻🙏🏻 # 514

           Is Adaa Se Jeene Mein

Kabhi niraash ho aur khidki ke baahar dekho
Aur mandraati hui titlee nazar aaye
Toh samajh jaana ki Guruji paas hee hain
Ve titlee ke roop mein tumhe darshan dene hain aaye

Kabhi havaa ka jhonka
Haule haule se tumko rijhaaye
Toh jaan lena ki Guruji
Tumhe pyaar karne hain aaye

Aksar baithey huey ya phir chalte chalte
Khushboo laayegi udtee huee dhool bhi
Veh nishchay hee hogi
Guruji kee divya mehek gulab ke phool kee

Akash mein chhaaye huey ghaney baadal se na ghabrana
Ve shaayad Guruji kee gehri soch ka prateek hai
Kehta hai veh baadal tumse
Ki kasht ka antt nazdeek hai

Baarish kee boondon mein amrit ke roop mein
Andheri raat mein aur kadakti dhoop mein
Chaahe sangg koi ho ya phir tum ho akeli jaan
In sabko hee Guru ka ashirwaad lena maan

Kyun ki Guruji jaisa raakhein humko
Yeh toh Unkee razaa hai
Hamaari oar se shukrana aur vinamr sweekriti ho
Is adaa se jeene mein hee mazaa hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 16, 2018

Om Namaha Shivaya
Aaj Ka Suvichaar 🙏🏻🙏🏻 # 148

      Guruji Ko Apne Saath Paaoon

Guruji ko apne saath paaoon
Jabb jabb mai duun Unhe aawaz
Unhee se har muskaan meri hai
Vahee hain mere har nagmei ka saaz

Guruji ke bina toh ik pal nahin hai jeena
Ab toh jagg se chupaa nahin yeh raaz
Unke naam ke deewaanepan mein khoye
Unke har bhakt ka yahee hai andaaz

Veh kahein kewal ki changaa banda bann
Yeh baat Guruji ki hai bahut hee khaas
Unkee leela mein baat hai kuch aisi
Ki har bhakt bann jaaye Unka daas

Chaahe yeh duniya kuch bhi boley
Chaahe mera karey uphaas
Dil mein abb umadtee rehti hai
Guru bhakti ki meethi pyaas

Yeh arzoo, yeh tamanna, yeh khwahish hai
Ki Guruji ka sadaa ho mere dil mein vaas
Mujhe kabhi Apne se judaa na karna
Guruji, kripa kar suniye yeh meri ardaas

🌹🌹🌹🌹🌹🌹🌹

Jai Guruji
Dhirja

July 16, 2019

Om Namaha Shivaya
Aaj Ka Suvichaar 🙏🏻🙏🏻 # 513

                Hamaara Mann

Cell phone ke jaisa hai hamaara mann
Sandeshon aur vichaaron se bhar jaata hai
Jab samay par swachh nahin hota
Toh ayogya aur aksham ho jaata hai

Cell phone mein jab anek sandesh ekatrit ho jaate hain
Toh unhei delete kar hum naye sandesh kee jagah banaate hain
Agar cell phone kee oorjaa kumm honei lagey
Toh usey charge kar ke hum jagaate hain

Yahee sthiti hai hamaare mann kee
Jisme anginat vichaar ghar banaate hain
Mann ka kachda yadee khaali na karein
Toh ye vichaar ashaanti laate hain

Phir in vichaaron ke dabaav se
Mann ho jaata hai pareshaan
Kabhi kabhi aisee baatein sochta hai
Ki swayam par hee hota hai hairaan

Is duvidha ka upaay hai saral
Is upaay se mann hoga saaf aur taral
Guruji ke simran mein jab hum ramm jaayenge
Vichaaron ke toofan thamm jaayenge

Simran mein hai itnee shakti
Ki rangg laati hai bhakt kee bhakti
Satsang sunkar aur sunaakar
Mann ko raahat milne hai lagti

Mann nutan aur halka ho jaata hai
Simran aur satsang ke amrit se tarr jaata hai
Koi ksheen aur nakaaratmak vichaar hota hai toh
Is sheetal amrit se uska vish dhul jaata hai

Isliye hee toh Guruji kehte hain
Ki bahut zaroori hai satsang aur simran
Yeh atma ke liye pushtikaarak hai
Is se swachh rehta hai mann

Apni atma aur apne mann ke liye
Itna toh hum kar hee lein
Aayiye sewa simran satsang kar ke
Guruji ke dhyan mein hum jee lein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 15, 2018

Om Namaha Shivaya
Aaj Ka Suvichaar 🙏🏻🙏🏻 # 147

          Guruji Kee Aseem Shakti

Guruji trilokinaath hain
Karein rachna, paalan, aur dushton ka sanhaar
Guruji har pal saath hain
Yeh hai ati uttam uphaar

Guruji kee aseem shakti se
Abhimaani ka abhimaan chuur ho jaaye
Guruji mein atoot bhakti se
Saare kasht duur ho jaayein

Chetna ke daata hain Guruji
Hamaari atma ko jagaayein
Sankatmochak hain Guruji
Har lein hamaari balaayein

Jyotiswaroop hain Guruji
Jeevan ke timir ko mitaayein
Shivji ka roop hain Guruji
Moksh ke kareeb le aayein

Guruji kee sharan mein aaye hain jabb se
Tabb se kalyaan ho gaya hamaara
Ab darr aur ghabraahat nahin hai jagg se
Mila hai hamein MahaShiv ka sahaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 15, 2019

Om Namaha Shivaya
Aaj Ka Suvichaar 🙏🏻🙏🏻 # 512

       O Raahi Tu Himmat Na Haar

Guruji ka ashirwaad sunehri kiran kee bhanti hai
Jo har pal tere jeevan ko roshan karti hai
Chaahe uss din dikhaayee na de jab sukh ka sooraj chamakta hai
Lekin dukh ke andhere mein veh dil ko ummeed se bharti hai

Isliye o raahi tu himmat na haar
Tera bhi zaroor hoga beda paar
Chaahe teri zindagi mein udaasi ke kuch pal hain diye
Guruji ne kuch achchaa soch kar rakha hai tere liye

Na toofan se ho tu pareshaan
Na kisee bhanvar se ho tu hairaan
Buss tu jeeta jaa har lamha
Saump kar Guruji ko apni jaan

Tu rakh Guruji par atoot vishwaas
Unka har bhakt ke sangg rishta hai khaas
Ve karam awashya katvaate hain
Aur har pal saath nibhaate hain

Guruji sangg jod apni har soch ko tu
Unhee kee soumya chhavi se dil ko kar le ujjwal
Dekhna phir kitna ashwaasan milega tujhe
Tujhe Guruji mehsoos hongei apne sangg har pal

Guruji sangg tera rishta hai kayee janmon puraana
Unhonei hee nirdhaarit kiya tera is dharti par aana
Srishti kee koi bhi taakat nahin toad sakti tera aur Guruji ka naata
Guruji hee tere maalik, tere murshid, aur Vahee hain tere annadaata

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 14, 2018

Om Namaha Shivaya
Aaj Ka Suvichaar 🙏🏻🙏🏻 # 146

     Ek Guru He Hai, Aur Koi Nahin

Guruji kee leela ka jawaab nahin
Detey hain Ve itna ki hisaab nahin
Koi kaayade, koi niyam kee kitaab nahin
Dhokha Unko de sakey, aisa koi nakaab nahin

Sab jaante hain Guruji, duniya jaane ya na jaane
Kuch chhupaa nahin hai Unse, jagg maane ya na maane
Unke aagey kabhi na chalein jhooth aur fareb ke bahaane
Ek Vahee hain apne, baaki sabb hain begaane

Aankhein kholega tu, toh jagg nazar aayega
Bandd aankhon se tujhe Rabb nazar aayega
Vishwaas aur shradha rakh, Guruji ko phir tu saath apne paayega
Ek Guru hee hai, aur koi nahin, jo tera beda paar lagaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 14, 2019

Om Namaha Shivaya
Aaj Ka Suvichaar 🙏🏻🙏🏻 # 511

         Safar Mushkil Ho Ya Aasaan

Safar mushkil ho ya aasaan
Tayy toh karna padega
Dil mein ho jo bhi armaan
Poora karne ka dil toh karega

Niyati nirdhaarit karegi
Naseeb mein jo hoga
Jaisa niyati chaahti hai
Vahee karam hai humne bhoga

Ek Guruji hee Hain
Jo niyati likh sakte Hain dobara
Haathon kee lakeer badal kar
Ve chamkaa sakte Hain kismat ka tara

Guruji ke ashirwaad se
Zindagi ka safar tayy karne kee milti hai shakti
Guruji kayee tareekon se
Aazmaatey Hain bhakt kee bhakti

Guruji, kripa aisee keejiye
Ki Aapke diye har imtehaan mein hum safal ho jaayein
Guruji, himmat aisee deejiye
Ki Aapke bharose hum har dukh ko jhel paayein

Aap sangg Hain toh safar kat-ta jaayega
Aap sangg Hain toh kasht talta jaayega
Aapke sahaare se hee lete hain hum har shwaas
Ashirwaad deejiye ki sadaa badhta rahey Aap par hamaara vishwaas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 13, 2018

Om Namaha Shivaya
Aaj Ka Suvichaar 🙏🏻🙏🏻 # 145

    Guruji Ke Ashirwaad Ka Pehra

Guruji ne sajaayein hain tere vaaste
Apne pyaar ke motiyon se tere raaste
Himmat se kadam tu le badhaa
Chaahe saamne aaye kasht bada

Guruji haina, Veh sambhaalenge
Tere raaste se patharon ko hataa lenge
Sangg tere rahenge Veh hameshaan
Isliye tu bilkul na ho pareshaan

Sewa Simran aur Guruji ko sabb arpan
Kar ke phir tu dekhega jabb darpan
Guruji ke noor se chamkega tera chehra
Kyunki Guruji ke aashirwaad ka hai pehra

Unkee suraksha ka kavach pehen kar chal
Duniya ke nakhde tu sehen kar chal
Tere jeevan mein bahaar zaroor aayegi
Guruji kee mahima awashya rangg laayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 13, 2019

Om Namaha Shivaya
Aaj Ka Suvichaar 🙏🏻🙏🏻 # 510

        Simar Simar Guruji Ka Naam

Niyati jis paristhiti mein lekar aayi tumhe
Saamna toh padega karna
Simran se milegi saamna karne kee shakti
Is shakti se swayam ko hai bharna

Har pal har din kar simran
Toh laabhkaari hoga jeevan
Buss dil se kar tu pooja
Aur koi niyam nahin hai dooja

Shradha aur prem se tu simar Guruji ko
Vishwaas se leta chal Unka naam
Toh kya hua agar Unke prem kee khaatir
Tujhe dena padta hai koi balidaan

Ve toh kitna kuch sehte Hain
Apne har bhakt ke liye
Unhee ke maan mein tu jalaa le
Dil mein bhakti ke diye

Unhonei hee diya hai bhakti ka daan
Unke simran se hee hai tu dhanwaan
Aasaan lagega tujhe har kaam
Buss simar simar Guruji ka naam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 12, 2018

Om Namaha Shivaya
Aaj Ka Suvichaar 🙏🏻🙏🏻 # 144

              Guruji Saa Dayaalu

Waqt ke saath saath toh kayee baar
Tasveeron ka rang feeka padd jaata hai
Ek din parinda vriksh kee tehnee se
Achaanak duur kahin udd jaata hai

Ik din aisa aayega zaroor
Vidaai hogi is jeevan se
Shareer dharaa reh jaayega yaheen
Aur niklenge praan is tann se

Sabne ek din hai jaana
Na chalega koi bhi bahaana
Tabb jhoothi maya ka khazana
Kuch bhi kaam nahin aana

Guruji ka naam tu le le
Simran mein tu kho jaa
Ek Vahee hain tere apne
Abb tu bhi Unhee ka ho jaa

Guruji sa dayaalu na kaheen milega tujhe
Unsaa kripaalu na kaheen dikhega tujhe
Apni jholi Unke ashish se tu bharta jaa
Buss har pal Unka shukrana tu karta jaa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 12, 2019

Om Namaha Shivaya
Aaj Ka Suvichaar 🙏🏻🙏🏻 # 509

              Zindagi Ka Raasta

Guruji kee divya maujoodagi kee roshni se Ujjwal kar le tu apna jeevan
Yahee toh hai zindagi ka raasta
Tujhe tere mann kee shanti ka vaasta

Guruji teri har mushkil, har dard se bade hain
Isliye tu Unhee ka dhyan kar
Vahee karenge har mushkil ko aasaan
Isliye Unkee mahima ka tu maan kar

Guruji vaakif hain teri har kamzori se
Unse madad maangne se tu na darr
Tere zameer ke khilaaf jo bhi kaam ho
Veh karne se tu saaf inkaar kar

Agar tu Guruji ka sachchaa bachchaa hai toh
Tu sachchaayee se nahin darega
Agar tu Guruji ko murshid maanta hai apna
Toh tu Unke hukm ka paalan karega

Faisala toh sirf tere haath mein hai
Chaahe tu inkaar kar ya kar ikraar
Guruji ko saump de apna sab kuch
Aur sanvaar le apna ghar sansaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja