Month: July 2019

July 11, 2018

Om Namaha Shivaya
Aaj Ka Suvichaar 🙏🏻🙏🏻 # 143

                        Mandir

Sushobhit kar liya dil ke mandir ko
Apne Guruji kee pyaari divyataa se
Susajjit kar liya tann ke mandir ko
Apne Guruji ke sundar noor se

Kamre ke mandir mein dekha
Guruji har oar nazar aaye
Jab saraahoon ghar ke mandir ko
Toh Guruji kee mehekti khushboo aaye

Sach hee toh kaha hai Guruji ne
Ki Bade Mandir se bhi pehle
Mann ko, tann ko mandir banaao
Suvichaar sadaa hriday mein laao

Phir hee aaye kamre aur ghar kee baari
Jahaan adhiktam zindagi beetey hamaari
Bade Mandir toh inke baad aaya hai
Jisey Guruji ne swayam banaaya hai

Unhee ka saakshaat roop hai Shivlinga
Jisey bahut pyaar se Guruji ne sajaaya hai
Is MahaShivlinga ka anmol prataap
Har taraf Brahmand mein chhaya hai

Bade Mandir ke darshan se
Baarahn teerath ke phal milte hain
Anginat bhakton ke niraash dilon mein
Aashaa ke sundar phool khilte hain

Aakar Bade Mandir mein jo
Shraddha se prasad grehen kare
Veh Guruji ke aashirwaad se
Apne paapon se tarey

Kalyuga kee is ajab bela mein aye bandey
Guru dhyan mein mann ko lagaa le
Jhoothi moh-maya ke andhere se nikal
Guru naam kee akhand jyot dil mein jalaa le

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 11, 2019

Om Namaha Shivaya
Aaj Ka Suvichaar 🙏🏻🙏🏻 # 508

       Dekhta Jaa Tu Dekhta Jaa

Dekhta jaa tu dekhta jaa
Duniya ke rangg hain nyaare
Asamanjas mein tu na ghabraa
Dekh kar ye ajab nazaare

Kaun paraaya kaun hai apna
Yeh sab hai ik sapna
Buss ek Guruji hee apne hain
Unpar hee bharosa rakhna

Buss Guruji ka vichaar rakh mann mein
Aur chalta jaa jeevan mein
Guru prem ka rangg pheeka na ho
Tu ramm ja Guru naam ke dhan mein

Udaasi kee koi baat nahin hai
Sabne hee ek din yahaan se jaana hai
Jo saath jaayega veh toh
Guru naam ka hee khajaana hai

Baaki sab dharaa reh jaayega yahaan
Ye paisa, ye aishon aaraam, yeh shauharat
Tere vash mein kuch bhi toh nahin
Na durghatnaa na koi shubh mahoorat

Na taang apni jaan ko abhimaan kee khoonti par
Yaad rakh, choone kee bani hai deewaar
Har ahem aur vehem ko tyaag de
Guruji se deedar kar ke apna kar le uddhaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 10, 2018

Om Namaha Shivaya
Aaj Ka Suvichaar 🙏🏻🙏🏻 # 142

    Vintee Sweekaar Keejiye Guruji

Guruji Aap Param Parmeshwar hain
Kripa kar suniye meri fariyaad
Buddhi aisee deejiye ki hum
Maya ke jaal se karein apne ko azaad

Zindagi aisee hamein deejiye
Ki chaahe chhoti ho par bhalee ho
Sabke chehre par hasee laayein aisee
Jaise koi muskuraati hui kalee ho

Kaam karein aise hum
Ki Aapko hum par garv ho
Har din ko jeeyein aise
Jaise koi khushi ka parv ho

Soch hamaari sadaa nek ho
Aur karam bhi achche hon hamaare
Roshni aisee jagg mein phailaayein hum
Jaise raat ke aasmaan mein sitaare

Pyaar aisa ho sabke beech
Ki bhaichaara badhta rahei
Na ho samaaj mein bhed-bhaav
Ekta ka swabhaav umadtaa rahei

Tamanna hai ki sachh ho jaaye
Yeh mera pyara sa sundar sa sapna
Vinti sweekaar keejiye Guruji
Kripa kar dikhaayiye chamatkaar apna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 10, 2019

Om Namaha Shivaya
Aaj Ka Suvichaar 🙏🏻🙏🏻 # 507

               Tu Jee Le Is Tarehn

Jee le, jee le, tu jee le is tarehn
Jaise aaj tera aakhiri din hai yahaan
Is ek pal ke baad
Na jaane kaun hoga kahaan

Phir bhi kyun dilon mein nafrat hai
Kyun krodh kee agni mein insaan hai jal raha
Kyun jhooth panap raha hai itna
Kyun fareb hai itna phal raha

Duniya kee is ajab see sthiti se
Guruji hee hamein bachaa sakte hain
Ek Vahee toh hain jinhe hum
Apne dil ka sachchaa haal sunaa sakte hain

Pal doh pal ke jeevan mein
Guruji kee dikhaayee raah par chalein hum
Guruji, hamein aisee subuddhi deejiye
Ki insaaniyat kee misaal banein hum

Vaani aisi deejiye ki ghaayal mein jaan aa jaaye
Karam aise hon hamaare ki niyati sanvar jaaye
Nazar aisee ho hamaari ki achchaayee hee achchaayee dikhey har oar
Soch aisee ho hamaari ki har nakaaraatmakta ko de toad

Kripa kar taar deejiye hum sabko
Hum sab karmon ke maare hain
Hum sab hain bachche Aapke
Aur hum sab Aapke liye pyaare hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 9, 2018

Om Namaha Shivaya
Aaj Ka Suvichaar 🙏🏻🙏🏻 # 141

            Dil Kee Koree Chaadar

Dil kee koree chaadar par
Kitne daag lagey hain
Kab se Guruji samjhaa rahei hain
Phir bhi na hum jagey hain

Kaise maili chaadar ko saaf hum karein
Ispar daag lobh, krodh, moh ke hain padein
Irshya kee chheentein chaadar par bikhar gayeen
Chinta kee boondein chaadar par pad raheen

Kalyuga ke vaataavaran mein
Ajab see beychaini hai chhayi
Insaan ne karmon ke kalam mein
Bhar lee hai jhooth ki syahi

Guruji kripa kar Aap hum sabko sambhaalo
Kshamaa ke amrit se chaadar ke daag hataalo
Hamaare kukarmon ke anjaam se Aap humko bachaalo
Jo paap hum sabne kiye hain, unka praayshchit karvaa lo

Aapke siwa na koi hamaara paalanhaar
Aap hee hain hamaare taral taaranhaar
Aapke alaawa na koi hai bakshanhaar
Aap kee kripa se sanvar jaayega sansaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 9, 2019

Om Namaha Shivaya
Aaj Ka Suvichaar 🙏🏻🙏🏻 # 506

             Kalyuga Mein Satyuga

Dekhne se lagta hai
Ki aansuon mein paani hai
Kareeb se jaano toh
Inmein zindagi kee kahaani hai

Veh kahaani, jo sirf lafzon mein bayaan na ho paati
Veh kahaani, jo aansuon mein hai beh jaati
Kabhi dil tootne kee
Kabhi saathi chhootne kee

Jab se Guruji ne apnaaya hai
Jeevan mein yeh fark aaya hai
Ki hum Unpar vishwaas rakhkar sab sehte hain
Aur hamaari aankhon ke aansoon Guruji kee aankhon se behte hain

Kitne khushnaseeb hain hum
Ki Guruji ke sangg hamaara aisa naata hai
Har koi aisa khushnaseeb kahaan
Har koi nahin Guruji kee sharan ko paata hai

Arzi hai Guruji Aapse
Ki poori duniya ko Apni sharan mein le leejiye
Jis tarehn se Aap uddhaar kar rahein hain hamaara
Vaise hee har jeev ka uddhaar keejiye

Kitnee sukhdaayee ho jaayegi phir srishti
Jab sab par padegi Aapki divya drishti
Kalyuga mein satyuga laut kar aayega
Aur har koi Aapka sachchaa bachchaa bann jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 8, 2018

Om Namaha Shivaya
Aaj Ka Suvichaar 🙏🏻🙏🏻 # 140

Aap Miley, Hain Achche Naseeb Hamaare

Aap miley, hain achche naseeb hamaare
Jeevan safal ho jaayega aapke sahaare
Jo bhi shradha se aataa paas tumhaare
Uske kasht Aap hee har lete ho saare

Zindagi ke chakravyu mein hum sab hain uljhey
Aisi moh maya mein kaise mann yeh suljhey
Aap hee ho hum paapiyon ke sundar Swami
Aapke hotey huey na pahunche hamein koi haani

Guruji, kripa kar thaamey raho hamaara haath
Vinti hai, na chodna kabhi bhi hamaara saath
Aap angg-sangg hain toh hum na kabhi adhoorey
Hongei hamaare karmon ke saare hisaab poorey

Guruji aapke gyan ke kuch gehne mil jaayein
Aur har kshan gehri ho jaaye hamaari bhakti
Hamaare mann mein jaagriti ke deep jal jaayein
Aapke aashirwaad se miley yeh chaitanya shakti

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 8, 2019

Om Namaha Shivaya
Aaj Ka Suvichaar 🙏🏻🙏🏻 # 505

           Tu Aaja Guruji Ke Paas

Saari chinta chod kar tu aaja Guruji ke paas
Unkee divya khushboo se tu mehka le apna har shwaas
Guruji ko paakar duur ho jaayega tere adhoorepan ka ehsaas
Guru praapti ke pashchaat na reh jaayegi teri aur koi aas

Kyunki Guruji hee satya hain
Aur Guruji hee paalanhaar
Guruji hee hain Trilok ke maalik
Kyunki Ve hain Shiv ka avatar

Guruji Param Parmeshwar hain
Dooja naahi koey
Tere sochne se kuch nahin hota
Guru soche toh hoey

Duniya ka saara dhan mil jaaye
Phir bhi sukhi naahi hoey
Guru naam ka dhan jo tu paaye
Phir dukh hee naahi hoey

Isliye samay na zaaya kar
Na ekatrit khokhli maaya kar
Guru naam ke dhan se bann jaa raees
Har pal paa le Guruji kee aasees

Chamak jaayegi teri kismat aise
Ki Kohinoor bhi lagega pheeka
Guruji nazariya badal denge tera
Sanvar jaayega tere jeena ka tareeka

Buss tujhe Unka hukm sweekarna hoga
Apna ahem tujhe maarna hoga
Sab kuch haar kar jab tu aayega Guruji ke dwaare
Guruji swayam par hee le lenge tere dukh saare

Isliye Guruji ka tu dhyan kar
Unke hukm ka tu maan kar
Khush ho jaa tu yeh jaan kar
Ki Ve tere sangg hain umr bhar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 7, 2018

Om Namaha Shivaya
Aaj Ka Suvichaar 🙏🏻🙏🏻 # 139

        Mubarak Mubarak Mubarak

Kisee ne khushi ke geet gaaye
Kisee ne dholak bajaayi
Idhar sangat naache jhoomkar
Udhar bajey shehnaai

Guruji ke darbar mein
Sabne haaziri lagaayi
Is khaas shubhavsar par
Khaai sabne mithai

Sabne milkar utsav manaaya
Rotey huon ko hasee aayi
Saare vaataavaran mein dekho
Kitni masti hai chhaayi

Ab toh pehle se bhi zyada
Aapki divyataa ne jaan bachaayi
Apki sangat hai Aapki deewaani
Yeh Aapki hee hai vadiaayi

Guruji shukrana aapka
Karne saari sangat aayi
Har saal manaayein is din ko
Yeh arzoo dil mein hai laayi

Guruji aapki Mahima
Dekhiye kya rangg hai laayi
Aapki sharan mein hee rahein sadaa
Is darkhwast kee keejiye sunvaayi

Befikr ho jaayein hum tum
Guru bhakti mein hokar gum
Sabko bahut bahut badhaai
Guruji kee janam tithi hai aayi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 7, 2019

Om Namaha Shivaya
Aaj Ka Suvichaar 🙏🏻🙏🏻 # 504

     Guruji Ka Janamdin Hai Aaya

Aayi saari sangat Guruji ke dwaare
Guruji ka janamadin hai aaya
Dekhein sab Guruji ke sangg nehre nazaare
Itna paawan parv hai aaya

Pyare Guruji ka hua darbar mein aagaman
Sangat karey Unka haardik abhinandan
Phir shabad ka shravan hai hota
Aur sab karein Guruji ka vandan

Chai Prasad aur mithai prasad se
Mann gadd gadd ho jaata
Guruji kee divya maujoodagi mein
Har bhakt apne ko paata

Mantra jaap aur Arti ke pashchaat
Bat-ta amrit aur halwa Prasad
Sab bhakt jann khushi mehsoos karte
Sabko milta Guruji ka ashirwaad

Satsang sampann ho jaata prem se
Ruhaani sakaaraatmakta hoti har pal
Sangat saanskritik kaaryakram bhi karti
Ho jaati vaatavaran mein shubh halchal

Chaaron oar hai masti itnee
Khushi ka chhaaya hai mahaul
Koi naache zor shor se
Koi prasann hokar bajaaye dhol

Langar Prasad phir milta sabko
Sab bahut prem se khaate
Phir Guruji kee agya lekar
Apne ghar ko sab jaate

Beintaha Shukrana Aapka Guruji
Ki Aapne humko yeh zindagi dee
Bahut bahut mubarak sabko
Guruji ke janamadin kee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 6, 2018

Om Namaha Shivaya
Aaj Ka Suvichaar 🙏🏻🙏🏻 # 138

  Sarvagyani Guruji Sadaa Jaanein

Sarvagyaani Guruji sadaa jaanein
Hamaare dil ka har ek bhaav
Unke anusaar chalenge hum
Toh jeevan par hoga achchaa prabhaav

Shubh karmon se ho urdhvagati
Divya maarg ka raasta khul jaaye
Guruji swayam hee nirdesh dein
Aur hamein sunehri manzil mil jaaye

Sarvavyaapi bhi hain hamaare Guruji
Jahaan bhi hum, vahaan hai Unki nazar
Unhei hai maalum ki hamaare karmon ka
Kya hoga hamaari niyati par asar

Sabse aasaan tareeka toh yeh hai ki
Vichaar mein khot na laayein hum
Achche hongei phir karam hamaare
Na hoga aaney waale janmon mein gumm

Maan lein aao Guruji ka kehna
Unke vardaan se jholi bhar lein
Pehen lein Unke naam ka gehna
Unka beintehaa shukrana kar lein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 6, 2019

Om Namaha Shivaya
Aaj Ka Suvichaar 🙏🏻🙏🏻 # 503

      Guruji Ke Nakshe Kadam Par

Ab jo Guruji ko apna sab kuch maana hai
Toh Guruji ke nakshe kadam par chalte jaana hai
Ek Vahee toh hain jinhonei saath nibhaana hai
Isliye Unhee ke kamal charan mein apna thikaana hai

Jab Guruji ne hee sabko azmaana hai
Toh kyun auron ko jhootha dikhaawa dikhaana hai
Ab toh apne aap ko yahee samjhaana hai
Ki Guru naam hee sabse anmol khajaana hai

Apna dhyan buss Guruji mein lagaana hai
Apne aap ko ruhaaniyat ke maarg par laana hai
Swayam mein prem poorna vyavhaar laana hai
Shraddha aur saboori ko sadaa ke liye apnaana hai

Guruji se kuch nahin chupaana hai
Unhe dil ka poora haal sunaana hai
Mann mein jo bhi ho, Guruji ko bataana hai
Chaahe Ve sab jaante hain, hamein apna farz nibhaana hai

Jab jeevan kee kisee uljhan ko suljhaana hai
Hamein toh madad ke liye Guruji ko bulaana hai
Chaahe gardish mein yeh zamaana hai
Hamein sachchaayee se nahin ghabrana hai

Guruji ko hee mann mandir mein basaana hai
Unhee se jodna jeevan ka afsaana hai
Apni atma ko Guru naam ke gehne se sajaana hai
Kyunki yeh dil toh buss Guruji ka hee deewana hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 5, 2018

Om Namaha Shivaya
Aaj Ka Suvichaar 🙏🏻🙏🏻 # 137

                Guruji Kee Beti

Baithi mai Guruji ke sangg
Karne lagee apne Guruji se baatein
Unkee prashansaa mein aisee doobi
Ki beet gayeen itnee raatein

Hasee Unkee itnee pyaari
Ki dekhte rehne ko dil chaahe
Awaaz Unkee itnee jaadoomayi
Ki mann usey baar baar saraahe

Roop Unka itna sundar
Ki chaandni bhi pheeki laagey
Sooraj ka tej bhi
Sharmaaye Guruji ke aagey

Bheeni see muskaan hai Unkee
Jaise phoolon kee kaliyaan
Aankhon mein gehraayi aisee
Ki jaise bhool bhoolayiyaan

Noor itna shaktiswaroop
Ki vaataavaran mein phailey urja
Chehra itna shantiswaroop
Ki dekha na kabhi aisa koi dooja

Hum toh so jaayein gehri neend mein
Magar Guruji har pal jaagein
Taaki hamaari zindagi se
Museebatein darr ke bhaagein

Aashirwaad Unka itna pavitra
Maano gangajal hai barsaa
Koi na bhakt aisa hoga
Jo Unke darshan ke liya na ho tarsaa

Haathon ki mudraayein Unkee
Itne sandesh hain deti
Sach mein bahut khushi hai mujhko
Ki mai hoon Guruji kee beti

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 5, 2019

Om Namaha Shivaya
Aaj Ka Suvichaar 🙏🏻🙏🏻 # 502

            Ve Guruji Kehlaate Hain

Hamaare dil mein asha ke diye jalaate hain
Hum dheeraj khoyein toh protsaahan dilaate hain
Hum ghabraayein toh Ve himmat dilaate hain
Har pal jeene ka saleeqa sikhaate hain

Haath hamara thaam kar hamein chalaate hain
Dard hamein hota hai toh aansoon Ve bahaate hain
Hamaare roag duur karne ke liye khud beemar pad jaate hain
Swayam mushkil seh kar hamaare karam katvaate hain

Mann jab vichlit hota hai toh Ve sukoon dete hain
Himmat se jeene ka Ve junoon dete hain
Hamaari raah se har baadha hataate hain
Uljhan ko sulajhaane ka upaay bataate hain

Hum par mata pita ka pyaar barsaate hain
Apni divya leela se hamaari taqdeer khilaate hain
Shraddha aur saboori ka imtihaan jo lete hain
Toh uspar atal rehne kee pragyataa bhi dete hain

Apne ashirwaad se hamaara bhaagya banaatey hain
Har pal Ve sachchaa saath nibhaate hain
Agyantaa ke timir ko gyan se mitaate hain
Tabhi toh sahee maayene mein Ve GURUJI kehlaatey hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 4, 2018

Om Namaha Shivaya
Aaj Ka Suvichaar 🙏🏻🙏🏻 # 136

            Chaaron Oar Gungaan 

Pyaare Guruji ke darshan pe
Mai balihaari jaaoon
Unke nirmal divya roop pe
Mai toh vaari jaaoon

Duniya chaahe saath chod de
Aap toh paas bulaate hain
Yahaan apne paraaye kee pehchaan nahin
Par Aap toh apnapan nibhaate hain

Duniya dekhti hai insaan kee haisiyat
Pariwaar dekhta hai vaseeyat
Aap parakhte hain sabki neeyat
Aur chaahte hain sabki khairiyat

Aapke darbar mein gunaah maaf hai
Agar bande kee neeyat saaf hai
Aapki leela toh bilkul laajawaab hai
Yahaan har chehra benakaab hai

Aapke darbar mein insaaf hoga
Jhooth ka aur sachchaayi ka
Aur chaaron oar gungaan hoga
Guruji, Aapki vadiaayi ka

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 4, 2019

Om Namaha Shivaya
Aaj Ka Suvichaar 🙏🏻🙏🏻 # 501

    Ab Jo Sweekaara Hai Apne Guruji

Poojya Guruji,

Nawaza hai Aapne apne pyaar se hamein
Sambhaala hai Aapne apne dulaar se hamein
Baksha hai Aapne apne aitbaar se hamein
Sukhi kiya hai Apne apne deedar se hamein

Har paristhiti mein Aap par vishwaas hai
Aapki manzoori ka mulazim har shwaas hai
Aapki kripa har pal hamaari zindagi ka raaz hai
Atma kee vaadiyon mein goonjti Aapki ruhaani awaaz hai

Aap se baant sakte hain hum khul kar dil ka haal
Aapke hukm se toh niyati bhi sudhaar leti hai apni chaal
Kal kya hoga, iska kewal Aapko gyan hai
Apne har bhakt ka Aapko har pal rehta dhyan hai

Is asthirta ke haalaat mein Aapka sunishchit sahara hai
Is kalyuga ke samay mein Aapke bina nahin guzara hai
Aapse hee hai hamara sadaacharan
Aapse hee hai mangal vaataavaran

Sadaa ke liye buss Aap mein ramm jaayein
Aisee subuddhi aur shradha hamein bakshiye
Ab jo sweekaara hai Aapne Guruji
Sadaa ke liye Apne charnon mein rehne deejiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 3, 2018

Om Namaha Shivaya
Aaj Ka Suvichaar 🙏🏻🙏🏻 # 135

                  Dhruv Ka Taara

Ummeed kee veh ujlee kiran
Aap hee hain Guruji
Ishwar se veh sunehra milan
Aap hee hain Guruji

Pyaar kee sheetal chhaaon
Bhi Aap hee hain Guruji
Raah dikhaate huey paaon
Bhi Aapke hain Guruji

Chetaavani kee awaaz
Aapki hai Guruji
Zindagi ka madhur saaz
Veh bhi Aapse hai Guruji

Gupt sewa aur daan karna
Aap sikhaatein hain Guruji
Aur bhakton ko sahi raah
Aap hee dikhaate hain Guruji

Gupt paath karein hum
Aap samjhaate hain Guruji
Utsaah ke bujhte diye
Aap jalaate hain Guruji

Simran aur satsang ka mahatv
Aap batlaate hain Guruji
Hamaare marg se baadhaayein
Aap hataatein hain Guruji

Divya pita kee soorat
Aap hee hain Guruji
Mamta kee pyaari moorat
Aap hee hain Guruji

Andheri raat mein Dhruv ka tara
Aap hee toh hain Guruji
Ab toh jeene marney ka sahaara
Buss Aap hee hain Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 3, 2019

Om Namaha Shivaya
Aaj Ka Suvichaar 🙏🏻🙏🏻 # 500

      Sir Par Guruji Ka Haath Jo Hai

Hum maati ke putle Hain
Guruji hamaare kumhaar
Hum paapi gunehgaar hain
Guruji bakshanhaar

Hum ghaat ghaat ka paani peekar
Guruji ke dwaare aaye Hain
Guruji ne Apne pyaar ke anmol moti
Hum naadaanon par barsaaye hain

Hum toh magn hain apne ahankaar mein
Jee rahey hain is kshanbhangur sansaar mein
Vyast rehte hain kaamkaaj aur gharbaar mein
Guruji kee yaad ko aksar bhool jaate hain is tez raftaar mein

Phir bhi, hamaare Guruji nahin bhooltey Hain hamein
Ve toh hum sabko dete Hain Apna keemti samay
Har pal hum par rakhte Hain Apni karunamayee nazar
Taaki tayy kar paayein hum zindagi ka yeh safar

Guruji kahein ki jeevan ko nadiya kee bhanti behne do
Sach ko apnaao, koi kuch kehta hai toh kehne do
Apni urja ko Guru sewa ke liye rehne do
Guru prem ke liye dil ko thoda utaar chadhaav sehne do

Antt mein yahee satya mainey rakhta hai
Ki Guruji ko sab kuch dikhta hai
Ve hee hamaare karmon ka hisaab karte Hain
Aur niyati likh kar hamaari jholi bharte
hain

Isliye doojon ke karmon ka khaata dekhne ke bajaaye
Hum apne khaatey par gaur pharmaayein
Taaki hamaara bojh halka ho
Jabb hum khud is jagg se jaayein

Baaki sab faisley chod dein Guruji par
Kyunki waqt bahut shaktishali hai
Aur Guruji waqt ke bhi shaasak Hain
Isliye Guruji ka nirnay sabse prabhavashali hai

Kuch nahin chupta Guruji se
Ve poori srishti ke khuda hain
Hum toh Unke hee dil ke tukade hain
Isliye Unse nahin hum judaa hain

Sir par Guruji ka haath jo hai
Toh hum maut se bhi na ghabraayenge
Jab aayegi hamaare jaane kee bela
Humko Guruji bade pyaar se le kar jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 2, 2018

Om Namaha Shivaya
Aaj Ka Suvichaar 🙏🏻🙏🏻 # 134

      Pyaare Guruji, Aapke Prem Se

Aap hee hain chetna
Aap hee hain shakti
Aap se hee vaani hai
Aap se hee bhakti

Aap hee hain utsaah hamaara
Aap hee hain gyaataa
Aap hee hain pita hamaare
Aap hee hain mata

Aap se hee hai sooraj
Aapse hee hai chaand
Aapse hee chal raha hai
Har pal yeh brahmaand

Aap se hee hamaari khushi
Aap se hee hamaari muskaan
Aapse hee hai surakshit sadaa
Hamaari aan aur shaan

Aapki sharan mein hain
Phir jo hona hai ho jaaye
Jaise bachhaa maa ki goad mein
Befikr ho kar so jaaye

Aapse hai har saans hamaari
Aapka hee karein vandan
Aapke prem se jeevan mehke
Jaise mehke chandan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 2, 2019

Om Namaha Shivaya
Aaj Ka Suvichaar 🙏🏻🙏🏻 # 499

           Kyun Hai Udaas Khada

Boond boond se bharey ghada
Phir tu kyun hai udaas khadaa
Boond boond kar bator le amrit Guru naam ka
Guruji ke bina yeh jeevan kis kaam ka

Guruji ke naam ke amrit mein
Hai sach mein paawan shakti
Aur dekhna, yeh badhti jaayegi
Jaise jaise gehri hogi teri bhakti

Chaand kee chaandni se bhi zyada
Sheetal hai yeh amrit Guru naam ka
Is naam ke prataap se tu datt kar
Saamna kar har subah aur har shaam ka

Is amrit mein basta hai
Pyaare Guruji ka ashirwaad
Isko paakar kalyan hoga tera
Yeh satya rakh le tu yaad

Guruji ke poojya naam ke simran se
Maansik santulan milega
Tere jeevan ke upvan mein
Ummeed ka phool khilega

Guruji kee divya leela se
Tu beshaq hai bekhabar
Lekin niraasha mein doobkar
Na hona tu besabar

Yahaan takk lekar aaye Hain tujhe
Toh Guruji aagey bhi le jaayenge
Tujhe buss Unkee baat maan kar chalna hai
Raasta toh Guruji hee dikhaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja