Month: August 2019

August 31, 2018

Om Namaha Shivaya
Aaj Ka Suvichaar 🙏🏻🙏🏻 # 194

               Zindagi Kee Kitaab

Har din zindagi kee kitaab ka
Ek anmol panna hai
Hamaari kitaab padhne yogya ho
Yeh hum sabki tamanna hai

Har panne par likhtey jaa rahein hain
Hum apne jeevan kee kahaani
Yeh kahaani kisee aur kee nahin hai
Yeh hai aapki aur meri zubaani

Maana ki Guruji ke anumodan ke bina
Ek patta bhi nahin hil sakta
Lekin hamaare karmon ka phal toh
Hamaare bhogne ke liye hee hai paktaa

Jaisi khaad baag mein daalenge
Phool vaisa hee khilega
Jaise karam karenge hum sabb
Phal vaisa hee milega

Karve phal ko khaakar
Maali ko na dena dosh
Niyati aisi badlegi
Ki ud jaayenge tere hosh

Meethe phal ka anand lekar
Karna Maalik ka shukrana
Aise karam na karna kabhi
Jis se baad mein padey pachchtaana

Tere yahaan se jaane ke baad bhi
Teri kitaab kabhi toh padhi jaayegi
Teri atma ko shanti milegi agar
Veh kitaab har chehre par muskaan laayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 31, 2019

Om Namaha Shivaya
Aaj Ka Suvichaar 🙏🏻🙏🏻 # 559

            Guruji Kee Divya Leela

Andhere se tu na hona niraash
Guruji har pal hain tere saath
Ve laayenge tere jeevan mein prakash
Unhee ka kar tu simran aur paath

Akelepan se nahin tu ghabrana
Guruji hain tere meet
Chalte huey peechhe na hatt jaana
Kyunki antt mein hogi teri jeet

Dhaane de zulm zamaane ko
Sabka hisaab hai Guruji ke paas
Ansunaa kar de tu har taane ko
Aur ab bilkul bhi na ho udaas

Museebaton ke pahaad dey rahei hain tujhe chunaauti
Guruji ka naam lekar tu badhta chal
Guruji kar rahei hain tere karmon kee kataauti
Tu safaltaa kee seedhi par chadhta chal

Teri suraksha ka kavach hain Guruji
Teri zindagi ka meetha sach hain Guruji
Khushnaseeb hai tu ki tu Unkee sharan mein hai
Tu Unka phool jaisa bachcha hai jo Unke charan mein hai

Ab toh yakeenan hee ho raha hai tera uddhaar
Buss sukh mein dukh mein tu Guruji ko pukaar
Guruji kee divya leela hai aprampaar
Tera bhi awashya hoga beda paar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 30, 2018

Om Namaha Shivaya
Aaj Ka Suvichaar 🙏🏻🙏🏻 # 193

 Aapse Hee Jeene Kee Shakti Guruji

Aapse hee jeene kee shakti Guruji
Aap hee mere jeevan ka geet
Aap hee hain mera atmavishwaas
Aur Aapse hee meri preet

Aapse hee ummeed ke chirag jalein
Aap hee dikhaatey hain raah
Aapse hee milta protsaahan
Aur Aapse hee jeene kee chaah

Aapse hee hai gurbani ka arth
Aap hee shabad ka sangeet
Aapse hee har sangharsh mein sahaara
Aur Aapse hee meri har jeet

Aapse hee yeh chaand aur sooraj
Aap hee hain Dhruv Tara
Aapse hee har rachna hai
Aur Aapse hee jagg saara

Aapse hee srishti ka nirmaan Guruji
Aap hee hain Ram aur Shyam
Aapse hee sabka uddhhaar Guruji
Aur Aapse hee sarv-kalyaan

Aapse hee mere shabd Guruji
Aap hee shabdon ka saaz
Aap hee detey hain prerna
Aur Aapse hee yeh awaaz

Aapse hee abb zindagi hai
Aap hee hain Bhagwaan
Aapse hee har saans hai meri
Aur Aapse hee hai nirvana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 30, 2019

Om Namaha Shivaya
Aaj Ka Suvichaar 🙏🏻🙏🏻 # 558

                Har Janam Ke Liye

Shradha se sajaa lein nainon ka darpan
Nishchint ho jaayein kar Guruji ko sarvsamarpan
Unhee ke divya prem mein kho jaayein
Har janam ke liye Guruji ke ho jaayein

Simran mein har pal Guruji ko yaad karein
Unke khayaalon se dil kee nagri ko aabaad karein
Neevenpann ke beej hum bo paayein
Har janam ke liye Guruji ke ho jaayein

Sewa kar lein niswaarthta aur chaav se
Satsang mein baithein bhakti ke bhaav se
Unhee ke gungaan ke nagme ko gaayein
Har janam ke liye Guruji ke ho jaayein

Seekh jaayein Guruji kee razaa mein raazi rehna
Guruji ke naam kee mala ko banaa lein apna gehna
Unhee ko arpan kar dein hum jo paayein
Har janam ke liye Guruji ke ho jaayein

Bahuton se achche hain haalaat hamaare
Hamaari saansein chal rahi hain Guruji ke sahaare
Apne aur doojon ke jeevan mein sakaaraatamakta laayein
Har janam ke liye Guruji ke ho jaayein

Guruji ka karein har pal shukrana
Unhe dein hum apne paak prem ka nazraana
Unhee kee goad mein sadaa ke liye so jaayein
Har janam ke liye Guruji ke ho jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 29, 2018

Om Namaha Shivaya
Aaj Ka Suvichaar 🙏🏻🙏🏻 # 192

   Aye Musaafir Kahaan Chalaa Tu

Aye musaafir kahaan chalaa tu
Is agyan ke timir mein
Aa Guruji ke charnon mein aaja
MahaShiv ke shivir mein

Kyun tu itna ghabraa raha hai
Dekh ke chaaron oar andhera
Waqt ke saath Guruji kar denge
Teri zindagi mein sunehra savera

Itna tu kyun soch raha hai
Yoon hee baithey baithey
Kya teri aankhein thaki nahin hain
Jo tere ashru abhi bhi hain behte?

Peeth par jabb milti hai shabaashi
Tabb toh anand aata hai
Lekin peeth peeche hee milta hai dhokha
Toh veh sukh aur chayn le jaata hai

Guruji tere raksha kavach hain
Tujhe sambhaal Ve lenge
Jo karmon ke khaatey mein likhein hain
Veh kasht bhi kumm kar denge

Guruji ka prem aur ashish mil jaaye
Is-se anmol na hai koi bhi saugaat
Yeh bhi toh Guruji ki hee vadiaayi hai
Varna teri aur meri toh itni bhi nahin hai aukaat

Guruji kee sharan mein aane ke baad
Burey din burey nahin rehte
Subah ka bhoola shaam ko ghar aa jaaye
Toh usey bhoola nahin kehte

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 29, 2019

Om Namaha Shivaya
Aaj Ka Suvichaar 🙏🏻🙏🏻 # 557

        Kar Lein Guruji Kee Bandagi

Hum Guruji ko paakar kitne dhanwaan hain
Shaayad hum is sach se anjaan hain
Ve sanvaarte hamaare jeevan kee daastaan hain
Guruji toh sach mein itne mahaan hain

Bahut shakti hai Unki jai jai kaar mein
Bahut shanti hai Unke nirmal pyaar mein
Hamaare kalyan ka hee ikraar hai Unke inkaar mein
Isliye bahut meetha phal chhupa hai har intazaar mein

Guruji Apne har bhakt se karte hain aseem pyaar
Unke prem aur Unki shakti se hee chal raha hai yeh sansaar
Har pal har bhakt ke liye khulein hain Guruji ke dwaar
Har pal Guruji suntei hain Apne har bhakt kee pukaar

Kyun na kaam karein hum aise
Ki Guruji ko hum par garv ho
Kyun na har din ko jee lein aise
Jaise koi vishesh parv ho

Ek anmol saugat hai yeh insaaniyat
Anokhi shanti deti hai ruhaaniyat
Aayiye, Guruji kee kripa se jee lein ruhaani zindagi
Aayiye, shudh bhaav se hum sab kar lein Guruji kee bandagi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 28, 2018

Om Namaha Shivaya
Aaj Ka Suvichaar 🙏🏻🙏🏻 # 191

        Paa Lo Har Mandir Ka Sukh

Guruji ne sangat ke liye
Bade Mandir hai banaaya
Kalyuga kee kadak dhoop mein
Vahaan miley taaki sheetal chhaaya

Aajkal ke haalaat mein toh
Pareshaan karey apna bhi saaya
Aise mein Guruji kee sharan mein
Anginat bhakton ne chayn hai paaya

Chaar prakaar ke mandir hain
Jahaan hum sabb rehte hain
Ve Bade Mandir se bhi pehle aayein
Hamaare Guruji yeh kehte hain

Pehla toh hai mann Mandir
Jahaan prem ko vaas karaana hai
Mann mein shudh vichaar aur niswaarth-taa basaakar
Paana Guruji ke naam ka khazaana hai

Uske baad hai tann Mandir
Apne shareer ko swasth banaana hai
Swachhataa aur aarogya shastra se
Yeh farz bakhoobi nibhaana hai

Phir aati hai kamra Mandir kee baari
Jahaan raho sumel ke bhaav se
Saaf rakho sadaa kamre ko
Prem se aur bade chaav se

Ghar Mandir aata hai phir
Isko bhi jannat banaao
Pyaar se raho sabke sangg
Aur khushiyan phailaao

In sabke pashchaat hee aaye
Bade Mandir ka naam
Jahaan pahunch kar mil jaata hai
Bhakton ko Shiv Dhaam

Guruji kehte hain ki pehle sanvaaro
Mann, tann, kamra, aur ghar
Phir baaraahn teerath ka anand lo
Bade Mandir ke dar par

Kismat se hee milta hai
Avsar kisee ko itna shubh
Jaane na doh isey vyarth tum
Paa lo har Mandir ka sukh

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 28, 2019

Om Namaha Shivaya
Aaj Ka Suvichaar 🙏🏻🙏🏻 # 556

             Guruji Kee Jai Jai Kaar

Duur kshitij kee oar dekh kar
Saagar ne poochhaa lehron se
Mann ke darpan mein dekh kar
Nainon ne poochhaa chehron se

Vahee sawaal thaa sabka
Ki manzil chhupi kahaan hai
Vahee fikr thee sabko
Ki kaise pahunchnaa vahaan hai

Ambar mein uday hotey sooraj ne
Sabki fikr kee vajeh lee jaan
Usne muskuraakar vahaan ishaara kiya
Jahaan Guruji thei viraajmaan

Guruji ke abhamandal ka itna divya thaa noor
Ki ek pal mein hee mann ke saagar par chhaaya bhakti ka suroor
Dheere dheere har shankaa honei lagee duur
Aur har vehem aur ahem honei lagaa chuur chuur

Guruji kee karuna se antt hua agyan ke andhere ka
Dekhte hee dekhte aagaman hua gyan ke savere ka
Lehron ne kinaare par dee apne aane kee dastak
Chehron ne Guruji ke charnon mein jhukaaya mastak

Guruji kee kripa se sabka hua uddhaar
Manzil paa kar sabne kee Guruji kee jai jai kaar
Har bhakt kee yeh sundar kalpana kaash bann jaaye sachchayee
Sabka uddhaar ho jaayega, yeh hai hamaare Guruji kee vadiyaayee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

AUGUST 27, 2018

Om Namaha Shivaya
Aaj Ka Suvichaar 🙏🏻🙏🏻 # 190

       Kyun Udaas Sa Baitha Hai Tu

Kyun udaas sa baitha hai tu
Guruji se kar le deedar
Is duniya se kya haasil hoga
Guruji se tu kar le pyaar

Teri doobti naiya bachaayenge Ve
Aur Vahee lagaayenge paar
Har kasht tera nivaarenge
Na kabhi chodenge beech majhdaar

Chhoot jaaye dhan daulat aur saathi
Chhoot jaaye chaahe ghar-baar
Guruji tere sangg rahenge hameshaan
Tujhe kabhi na maan-ne denge Ve haar

Kalyuga ke maadey samay mein
Guruji hee hain paalanhaar
Neeyat apni saaf rakhein hum
Yeh samjhaayein Ve baar baar

Galatiyon ke liye maaf karenge
Guruji hain bakshanhaar
Haalaat tere jaise bhi hon
Guruji denge unko sudhaar

Jab bhi yaad karega tu Unko
Guruji sunenge teri pukaar
Vahee toh hain jo laayenge
Tere jeevan mein chamatkaar

Unke naam kee akhand jyot jalaa dil mein
Unka ashish hai tere liye sabse uttam uphaar
Unke charan kamal mein sharan paakar
Tera nishchay hee hoga udhdhaar

Guruji ko apne kann kann mein basaa le
Vahee hain praanon ka aadhaar
Guru milan hee zindagi ka maqsad hai
Yahee toh hai jeevan ka saar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 27, 2019

Om Namaha Shivaya
Aaj Ka Suvichaar 🙏🏻🙏🏻 # 555

             Meharbaani Aapki

Guruji, Aapki razaa mein raazi rehna hee hai hamaara farz
Aakhir kabhi toh chukaana hai apne karmon ka karz
Guruji, Aap hee himmat deejiye hum thake haaron ko
Aapse hee jod liya hai humne dil kee taaron ko

Kamzori nahin hai balki kartavya hai karmon ko chukaana
Soch le jo bhi sochta hai zamaana
Karam jitne bhaari hon, utnee himmat deejiye saugat mein
Kripa keejiye, ki hum sadaa rahein apni aukat mein

Guruji, Aapki sadaa rahey hum par nazar
Meharbaani Aapki ki Aapki hai hum par nadar
Aapke har hukm ka ho humpar aisa asar
Ki Aapka kahaa maanein hum umr bhar

Sadhna ke saagar mein ramm jaaye hamaara mann
Aapke naam mein magn rahein hum har kshan
Batortey rahein Aapke naam ka divya dhan
Taaki kisee bhi janam mein na hon hum nirdhan

Kripa kar sunn leejiye hamaari yeh vinamr arzi
Aagey phir jaise Aapki marzi
Buss Apne se hamein kabhi na karna juda
Kyunki Aap hee hain mata pita, aur Aap hee hain Khuda

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 26, 2018

Om Namaha Shivaya
Aaj Ka Suvichaar 🙏🏻🙏🏻 # 189

Guruji Ke Pyaar Ka Atoot Bandhan

Bhai aur behen ke rishtey kee doar
Itne sundar bandhan mein deti hai jod
Aao sabb baant lein aapas mein pyaar
Raksha bandhan ka jo aaya hai tyohaar

Guruji hamaare kitne nirmal hain
Har naata nibhaatey hain hum sabke saath
Har pal har din Unhonei sneh se
Thaama hai hum sabka haath

Kitna komal Guru-shishya ka bandhan hai
Kayee janmon se chalta aaya hai
Isee pavitra bandhan kee neev par
Humne apna yeh astitva paaya hai

Aashirwaad Unka har behna par
Jo kitne pyaar se thaal sajaati hain
Aur itne prem bhaav se apne
Veer ko rakhi pehnaati hain

Ashish Unka uss bhaai par
Jo behna se rakhi bandhwata hai
Laad se mithai aur tohfa dekar
Uskee raksha karne kee kasam khaata hai

Is bandhan se judey rahein hum
Aur agyan ke bandhan ko todein
Raksha bandhan ke divas par sadaa ke liye
Andhvishwaas se hum muh modein

Raksha bandhan ke tyohaar ka andaaz
Bhai behen ke komal prem ka saaz
Niswaarth prem hai is rishtey kee awaaz
Hameshaan rakhna is rishtey kee laaj

Laukik bandhan toh nibhaane hain
Jab tak yeh maanav jeevan hai mila
Chalta rahega is duniya mein
Choti badi baaton ka silsila

Isliye asal baat par dhyan dein
Aur shradha se Guruji ka gyan lein
Unke simran mein hum ramte jaayein
Guruji ke pyaar ke atoot bandhan mein
bandhte jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 26, 2019

Om Namaha Shivaya
Aaj Ka Suvichaar 🙏🏻🙏🏻 # 554

Guruji Toh Swayam Hee Bhagwaan Hain

Guruji hum sabka jahaan hain
Guruji toh swayam hee Bhagwaan hain
Maargdarshak hain, Baagbaan hain
Guruji karunanidhan hain

Kaun kehta hai ki jeene ke tareekey aasaan hain
Har shaqs ke dil mein sainkdon armaan hain
Hamaare sahi samay par ho rahey sab kaam hain
Hamaari badalti haathon kee lakeerein is satya ka pramaan hain

Hamaare neech karmon ke jo anisht anjaam hain
Guruji unhe kum karne ka karte intazaam hain
Guruji kar lete hamaare har karam kee pehchaan hain
Guruji ke hum sab par anginat ehsaan hain

Aane dein jo aa rahey zindagi mein toofan hain
Un toofaanon mein bhi Guruji dete hamein jeevan daan hain
Jeevan ke sab pehlu hamaare liye imtehaan hain
Vifaltaa aur safaltaa dono Guruji ke diye huey vardaan hain

Chaahe hum jaise bhi insaan hain
Hum sabhi Guruji kee santaan hain
Karmon ke maare hain aur naadaan hain
Shukrana Guruji ki Aap har pal hum sab par meharbaan hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 25, 2018

Om Namaha Shivaya
Aaj Ka Suvichaar 🙏🏻🙏🏻 # 188

 Guruji, deejiye hamein itnee shakti

Guruji, deejiye hamein itnee shakti
Ki sadaa karein hum Aapki bhakti
Sanchit karmon se hamein miley mukti
Bann jaayein hum niswaarth vyakti

Kartey rahein hum Aapke naam ka simran
Aapka hee naam pukaare hamaari har dhadkan
Apne mann ko laalach ka daas na banaayein
Atma ko shradha aur bhakti ke ratnon se sajaayein

Aapki prembhari prerna se paak banein hum
Aapke har hukm par sachchaayi se amal karein hum
Duur rahein paakhand aur ahem se
Chhoot jaayein har tarehn ke vehem se

Chaahe yeh saara jaag humse rooth jaaye
Chaahe har naata har rishta toot jaaye
Kamzor lamhe mein bhi hamaare labhon par hasee rahei
Aapki divya chhavi har pal mann mein basee rahei

Koi vipatti hum par aa jaaye agar
Na royein, na chillayein, na cheekhein
Aapke prem ka lekar hum sahaara
Apne aap ko samarth banaana seekhein

Raah mein jo milein kaantein bhi agar humko
Toh Aapki kripa se vahaan pyari bagiya hum banaayein
Sundar se phoolon par rangeeli titliyaan
mandarayein
Aapki mehek ko phailaate huey vahaan chalein jhoomti hawaayein

Aapki divya jyot sadaa jaley hamaare dil mein
Aapka pyaar baney hamaara aashray har pal mein
Kabhi bhi na samjhein hum apne aap ko akela
Aapki goad mein chayn paayein jabb aaye jagg se jaane kee bela

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 25, 2019

Om Namaha Shivaya
Aaj Ka Suvichaar 🙏🏻🙏🏻 # 553

Jabb Se Guruji Ka Ashirwaad Hai Mil Gaya

Jabb se Guruji ka ashirwaad hai mil gaya
Tabb se dil ka soona upvan hai khil gaya
Badal gaya hai jeevan ko dekhne ka nazariya
Dhanyawaad se roshan ho rahi hai zindagi kee dagariya

Guruji ke ashirwaad se chinta baney chintan
Guruji ke ashirwaad se shikaayat baney simran
Guruji ke ashirwaad se pareshaani baney vandan
Guruji ke ashirwaad se shaant honei lagey mann

Kuch aisa karishma hai Guruji ke ashirwaad mein
Jo badal deta hai sazaa ko bhi saugat mein
Kripa karein Guruji ki hum sadaa rahein apni aukat mein
Aapke shukrguzaar rahein hum achche aur burey haalaat mein

Guruji ke alaawa aur hai hee kaun hamaara
Vahee hain prerna, Vahee hain sahaara
Unke bina ab ek pal bhi nahin hai guzaara
Unkee mehar se toh dikhta hai dharti par swarg ka nazaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 24, 2018

Om Namaha Shivaya
Aaj Ka Suvichaar 🙏🏻🙏🏻 # 187

      Chaar Din Kee Laukik Zindagi

Guruji toh hain gyan ke bhandaar
Guruji kee mahima hai aparampaar
Guruji ka aishwarya aur noor hai anokha
Guruji sabko dete hain sudharne ka mauka

Jo maan le Unkee har baat
Aur phir sahi raah apnaaye
Uski chali jaaye kashton kee raat
Aur uski zindagi sanvar jaaye

Kisee yagya kee zaroorat nahin
Karna nahin hai ann ka upvaas
Keval preet kee reet nibhaakar
Jodna hai Unse rishta khaas

Buniyaad itnee pavitra hai is naatey kee
Mata bhi Guruji hain, pita bhi hain Vahee
Bhai, bandhu, Bhagwaan bhi Vahee
Unke jaisa sach mein koi bhi nahee

Satsang karein sahee maayney mein
Guruji aur saadh sangat ke saath
Satya kee neev par jeevan ka nirmaan karein
Guruji thaamenge sadaa hamaara haath

Unkee hee pyari chhavi dikhaayee de
Jabb dekhein mann ka darpan
Jabb bhi chaahein mil jaayein hamein
Guruji ke paawan aur divya darshan

Saralta se yeh jeevan jeeyein
Sewa Simran hum karte rahein
Guruji ke shubh ashish se
Jholiyan hum apni bharte rahein

Duniyavi maya toh nashwar hai
Isne kabhi kaam nahin hai aana
Chaar din kee hai yeh laukik zindagi
Ekatrit kar lein Guru naam ka asal khajaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 24, 2019

Om Namaha Shivaya
Aaj Ka Suvichaar 🙏🏻🙏🏻 # 552

      Zindagi Ka Har Pal Sajaa Lein

Hum koshish toh karein Guruji kee sadhna karne kee
Nek neeyat aur shradha pehchaante hain Guruji
Dhyan lagaane ka prayatna toh karein
Hamaare iraada kya hai, yeh jaante hain Guruji

Kabhi kabhi ho sakta hai ki ekaagrachit na ho paayein
Lekin yeh zaroori hai ki hum is vifaltaa se na ghabraayein
Kyunki kaamyaabi chhupi hai is vifaltaa mein
Guruji kee kripa badal degi isey safaltaa mein

Nek iraade se kee gayee har koshish ko Guruji sweekarenge
Karmon ka bojh halka honei lagega
Har bhakt apni sachchi neeyat ke dwaara
Sadhna se apne paap dhonei lagega

Isliye jo bhi waqt hum de sakein simran ko
Veh hamaare liye hoga laabhkaari
Guruji kee rehmat se uddhaar hoga
Na rahega karmon ka bojha bhaari

Loagon ke beech mein hon ya akele
Kyun na simran mein rahein har vele
Zindagi ka har pal sajaa lein Guru naam se
Dharti par rehte huey jud jaayein param dhaam se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 23, 2018

Om Namaha Shivaya
Aaj Ka Suvichaar 🙏🏻🙏🏻 # 186

               Har Bhakt Kee Aas

Param poojya Guruji
Aapko saadar pranaam
Dil se nikle huey ye alfaaz
Sirf Aapke naam

Aapko pukaara jabb bhakton ne
Toh goonj utha akash
Aapke sooryaroopi tej ka phail gaya
Chaaron oar divya prakash

Kalyuga kee maara-maari se
Jo jann bann gaye thei zinda laash
Unka toh jaise hua punar-janam
Paakar Aapka sakaaraatmak sakaash

Roti hui aankhein muskuraane lageen
Sunkar Aapki jaadooyi aawaaz
Kaise Aap sab sambhaal letey hain
Jaan na sakaa koi yeh raaz

Aapne bhakton ko bade prem se
Dilaaya apnepan ka ehsaas
Aap hee Parmeshwar hain hamaare
Hamein hai poorna vishwaas

Zindagi mein aayeen mushkilon se
Abb mai nahin niraash
Aapne jo apnaaya hai
Safal hui meri talaash

Guruji abb toh Aapke charnon ke
Amrit se hee bujhti hai pyaas
Buss Aap Aap Aap mein samaa jaayein
Abb toh yahee ho har bhakt kee aas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 23, 2019

Om Namaha Shivaya
Aaj Ka Suvichaar 🙏🏻🙏🏻 # 551

               Guruji Ka Shukrana

Shukrana karte huey karo din kee shuruaat
Aur har din ke antt mein shukrana karo har raat
Guruji ka shukrana bahut labhkaari hai
Is se hee chalti hamaare jeevan kee gaadi hai

Guruji ka shukrana karne ka ravaiya
Jab banta hai zindagi ka hissa
Toh Guruji kee kripa se sulajhne lagta hai
Jeevan kee kahaani ka har kissa

Yeh shukrana hee deta hai himmat
Mushkilon se ladne kee
Yeh shukrana hee deta hai taakat
Har paristhiti ka saamna karne kee

Shukrana har pal karne se
Badhta hai atma-vishwaas
Yahee phir bann jaata hai
Utsaah aur ummeed ka raaz

Guruji bahut pyaar se
Sab sankat hain har lete
Apne shukrguzaar bhakton kee jholi
Ve sahi samay par bhar dete

Guruji ka shukrana karte rehne se
Hum ho jaate hain Unke aur bhi kareeb
Unke karunamyee ashirwaad se
Sanvar jaata hai bhakton ka naseeb

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 22, 2018

Om Namaha Shivaya
Aaj Ka Suvichaar 🙏🏻🙏🏻 # 185

   Sowmya Shivdhaam Hai Jahaan

Hum sabb chaahe hon jitne bhi naadaan
Hain toh hum sabb pyaare Guruji kee santaan
Unhonei hamein yeh zindagi kee hai daan
Aur kayee baar bachaayi hai hamaari jaan

Kaun sahi, kaun galat, Guruji ko iskee hai pehchaan
Har pal, har ghadi, Unhe hamaara hai dhyan
Hum paapi, Guru anant amrit kee hai khan
Phir kyun hum Unki mahima se hain anjaan?

Guruji ke hukm ke anusaar karein hum gupt daan
Unke har vachan ka paalan kar hum rakhein Unka maan
Neevanpan apna kar chod dein hum abhimaan
Hamaare roam roam mein buss jaaye Guruji ka divya gyan

Dhyanmagn hon Unke sneh mein, kyunki veh toh nirantar behta hua jharna hain
Agar magar nahin sochna, sirf Guruji par bharosa karna hai
Na apna zameer bechna hai, na hee duniya se darrna hai
Guruji kee razaa mein hee jeena hai, aur Unhee kee hee ichchaa-shakti se marna hai

Karein hum har sewa ko Unhe hee arpan
Nishchint ho jaayein kar ke Unhe sarv-samarpan
Shaant kar lein apna yeh bechayn mann
Banaa lein isey ek mehekta hua madhuban

Guruji hain sarvashaktimaan aur mahaan
Har soch aur har karam ho Guruji par qurbaan
Phir dekhiye kaise Veh hamein le jaate hain vahaan
Sachkhand mein basaa sowmya Shivdhaam hai jahaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 22, 2019

Om Namaha Shivaya
Aaj Ka Suvichaar 🙏🏻🙏🏻 # 550

             Tere Karmon Kee Raat

Guruji hee sunenge tera haale dil
Guruji hee hain teri manzil
Chaahe tujhe lagey ki Ve kuch nahin kar rahey hain tere liye
Itminaan rakh kyunki Unhonei bahut achcha socha hai tere liye

Abhi toh tujhe pataa nahin hai
Ki tere liye kya sahi hai
Teri atma sun rahi hai
Jo tere dil kee dhadkan keh rahi hai

Dil ko tu samjhaa le baar baar
Ki karle veh thoda aur intazaar
Guruji sun rahei hain tere dil kee pukaar
Tere jaane bina bhi Ve kar rahey hain tera upkaar

Unki razaa mein raazi rehkar chalta chal
Shukrana karne mein bitaa le apna aaj aur kal
Haalaat ka maara hai, tu sachchaa hai
Par phir bhi tera haal bahuton ke haal se achchaa hai

Guruji ne thaama hai tera haath
Keh de Unse apne dil kee baat
Bura nahin honei denge Ve tere saath
Unkee karuna se kategi tere karmon kee raat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja