Month: August 2019

August 21, 2018

Om Namaha Shivaya
Aaj Ka Suvichaar 🙏🏻🙏🏻 # 184

              Abb Bhi Samay Hai

Yeh kalyuga bhi kaisi mushkil lekar hai aaya
Maansik tanaav kee peeda ne jann jann ko hai sataaya
Ahankaar ne ghor paap itnon se hai karaya
Museebat hee bann gayi hai yeh moh aur maya

Kyun patit bann kar hum sabb hain phirte
Kyun vehem ke roag se hum aksar hain ghirte
Kyun nahin samajhte hum ki yeh ‘mai’ bekaar hai
Jabb ki Guruji hamein samjhaate baar baar hain

Itna pyaara jeevan Guruji ne hamein diya hai
Badle mein kuch bhi toh nahin liya hai
Phir kyun hum sudharne mein karein vilambh
Kyun nahin hum karte paawan sanskaaron ka aarambh

Badi mayavi hai kalyuga kee vaayu
Samajh mein na aaye, chaahe beet jaaye poori aayu
Sabne chale jaana hai, aaj nahin toh kal
Phir bhi kyun karte ya sehte hain hum chhal

Na bann-ne doh saansaarik aakarshan ko jaal
Guruji ke paas aao, na poochho koi savaal
Moh maya kabhi na kar sakey phir kangaal
Guruji kee sharan mein ho jaao achchi soch se maalaamaal

Guruji chaahein hamaara jeevan safal ho jaaye
Hamaari karam-bhoomi mein pavitra fasal upjaaye
Veh sikhaatey hain ki hum achcha sochein aur achcha karein
Jabb Guruji sangg hain, phir kyun hum na-insaafi se darein

Maan lein abb sabb Guruji kee baat
Varna duur nahin hai vinaash kee raat
Tyaag dein paakhand, ahem, aur ohadey ko
Kyun na dekhein milkar Satyuga ke sundar sooryodaya ko

Abb bhi samay hai, aao sambhaalein apne aap ko
Na protsaahan dein badhte huey paap ko
Guruji kee kripa se hoga duur asatya ka andhera
Aur sabb milkar dekhenge satya ka sunehera savera

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 21, 2019

Om Namaha Shivaya
Aaj Ka Suvichaar 🙏🏻🙏🏻 # 549

                Hamaara Uddhaar

Soch se bante karam hain
Karam se banti niyati
Shudh soch aur nek karam se
Praapt hoti hai urdhvagati

Guruji raah dikhaate hain
Par chalna hamee ko hai
Swayam ke bheetar jhaank kar
Pehchaan-na har kamee ko hai

Phir har kamee par gaur kar ke
Kamzori ko duur karna hai
Guruji kee kripa se sudhaar kar apne ko
Guruji ke noor se bharna hai

Aasaan beshaq nahin hai yeh kaam
Lekin namumkin bhi nahin hai
Atma-vishwaas aur subuddhi se
Dhyan rakhna hai ki disha sahi hai

Kyunki Guruji dekhte hain neeyat hamaari
Aur niyati ko behtar banaate hain
Jiskee neeyat aur karam hon achche
Uske bhaagya par mehar farmaatey hain

Guruji kee sharan mein na hotey toh
Na jaane kya ho jaata
Hamaare bheetar ka maasoom bachcha
Kab ka kaheen kho jaata

Is maasoomiyat ko rakhein barkaraar
Taaki hum se khush rahein hamaare parwardigaar
Hamein milta rahey Guruji ka pyaar
Aur hota chaley hamaara uddhaar

🌹🌹🌹🌹🌹🌹🌹

Jai Guruji🙏🏻🙏🏻

Dhirja

August 20, 2018

Om Namaha Shivaya
Aaj Ka Suvichaar 🙏🏻🙏🏻 # 183

       Yeh Mannva Bada Sataaye Re

Yeh mannva bada sataaye re
Baar baar bhatak jaaye re
Kaash abb vash mein aa jaaye re
Yeh mannva bada sataaye re

Bheed mein na kaheen gum jaaye re
Kalyuga kee havaa mein na ud jaaye re
Andhere mein yeh na kho jaaye re
Yeh mannva bada sataaye re

Jagg ke dikhaave se ghabraaye re
Guruji ko baar baar bulaaye re
Magar apne ko moh maya se chuda na paaye re
Yeh mannva bada sataaye re

Kuch maang ke phir pachhtaaye re
Sotey huey bhi jagtaa jaaye re
Ik pal bhi shanti na paaye re
Yeh mannva bada sataaye re

Bande, tu itna kyun sochey jaaye re
Kyun Guruji ke darbar mein na aaye re
Apni doar Unhe tu na saump paaye re
Tabhi toh yeh mannva bada sataaye re

Jo tu Guruji ke dar par ruk jaaye re
Unke charnon mein jhuk jaaye re
Unka hee jo tu ho jaaye re
Yeh mannva phir na sataaye re

Guruji ke gyan se roshan ho jaaye re
Unke vachan sun unpar chal paaye re
Sadaa ke liye Guruji ka ho jaaye re
Phir mannva kabhi na sataaye re

Soch mein itna kyun samay ganvaaye re
Abb Guru milan ko hee manzil tu banaaye re
Phir koi bhi taakat tujhe na roak paaye re
Aur mannva khushi se phoola na samaay re

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 20, 2019

Om Namaha Shivaya
Aaj Ka Suvichaar 🙏🏻🙏🏻 # 548

            Aap Ke Naman Mein

Jod lein haath Aap ke naman mein
Aur jhuka lein apna sheesh
Guru Sahib, sweekar leejiye hamein
Aur deejiye shubh ashish

Anjaan hain hum, naadaan hain hum
Aap hee uddhaar keejiye
Hairaan hain hum, pareshaan hain hum
Hamaare jeevan mein sudhaar keejiye

Hamaare kandhey kamzor hain daata
Hamaare pichhle karmon ka bhaar leejiye
Haath thaame rakhna hamaara
Guruvar, kripa kar hamein taar deejiye

Apne karmon ka uttardaayitva samjhein
Hamein deejiye aisee buddhi aur gyan
Doojon ko chot na pahunchaayein hum
Rakhein apne charitra par dhyan

Karam na karein khotey hum
Koshish karein ki sudhar jaayein
Jis disha mein neki aur sad bhaav ho
Hum usee disha mein kadam badhaayein

Guruji Aapki paawan sharan mein hain hum
Aapka hum par behad upkaar hai
Aapne jageh dee hai Apne charnon mein
Hamaare liye yeh sarvottam uphaar hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 19, 2018

Om Namaha Shivaya
Aaj Ka Suvichaar 🙏🏻🙏🏻 # 182

                   Hamaari Manzil

Kar lein karam hum aise jo
Guruji ke dil ko bhaayein
Sachchaayi kee raah par chalein
Aur neevanpan apnaayein

Tyaag dein ahankaar ko hum
Toad dein deewaar vehem kee
Guruji ke darbar mein jageh nahin
Jhooth, fareb, aur ahem kee

Sewa karein niswaarth hum
Har pal satya ke sangg rahein
Simran ke anand mein magn hon
Chinta chod kar, chintan karein

Kaam krodh ko tyaagne kee karein koshish
Guruji madad karenge zaroor
Badon badon ka Guruji ne
Ek jhatkey mein mitaaya hai guroor

Sumel se jeena seekhein
Irshya mein na jalein hum
Sansaarik mithya ke laalach se
Hameshaan bachh ke rahein hum

Kitne khush hain Guruji humse
Vahee toh sabse mukhya baat hai
Veh neeyat parkhein hum sabki aur kahein
Hamaari cheenti jitni aukat hai

Hamaari kisee bhi baat se
Guruji ko na pahunche koi dukh
Aakhir Vahee toh ekmaatra sahaara hain
Jo detein hain hamein sab sukh

Guruji ko pyaar karein hum agar
Toh yeh sab sach mein mushkil nahin
Jahaan Guru milan ka anant anand ho
Hamaari toh hai manzil vaheen

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 19, 2019

Om Namaha Shivaya
Aaj Ka Suvichaar 🙏🏻🙏🏻 # 547

          Guruji Par Kar Lein Aitbaar

Guruji par kar lein aitbaar
Vahee hain hamaare taaranhaar
Karte hain Ve humse beintehaa pyaar
Unke aanchal mein hai hamaare liye dulaar

Simran mein jod lein Guruji se apne dil kee taar
Phir baaki sab kuch lagne lagega bekaar
Guruji ka dar hamein raha hai pukaar
Ab kee baar na karein inkaar

Guruji kee mahima sunein aur sunaayein baar baar
Uss se milega ashirwaad Unka aur beda hoga paar
Duniya lagti hai laukik karmon ka baazaar
Lekin karam bhog nahin hai koi vyaapaar

Yakeenan khaate mein hain karam aur vikaar
Guruji uthaayenge hamaare karmon ka adhiktar bhaar
Ve toh hain itne kshamaasheel aur udaar
Ki veh laayenge hamaari zindagi mein sudhaar

Na jaana hai hamein jungle mein aur na tyaagna hai ghar baar
Na hamein maan nee hain mannatein hazaar
Buss Guruji ke divya prem ka karna hai ikraar
Aur pehen lena hai Guru naam ke motiyon ka haar

Jeevan ke pal toh hain keval do chaar
Kya maalum kab chodna padey yeh sansaar
Ruhaani gyan ka toh yahee hai saar
Ki Guru milan hai is yaatra kee manzil ka dwaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 18, 2018

Om Namaha Shivaya
Aaj Ka Suvichaar 🙏🏻🙏🏻 # 181

 Guruji Aaye Hain Hamein Bachaane

Kalyuga ka chaahe chha jaaye andhera
Aur agyan kee raat lagey sataane
Guruji banenge hamaara savera
Ve aaye hain hamein bachaane

Guruji chaahein ki hum ek dooje ke
Jeevan mein bharein pyaar ke rangg
Aur satya ko sab dhaaran karein
Dhrid vishwaas ke sangg

Na phailaayein samaj mein andhvishwaas
Aayiye atma ko sashakt banaayein
Kyun na poorna karein Guruji kee aas
Adharma ko mil kar duur bhagaayein

Guruji ko bhagwan maana hai toh
Unka anusaran karna hamaara dharam hai
Sarvagyani Guruji sadaa pehchaanein
Kis bhakt ka kaisa karam hai

Hamaare mann kee maili chaadar ke daag
Guruji Apne divya gyan se mitaayein
Aankhon par padee vehem kee dhool ko
Veh Apni chetna ke malmal se hataayein

Kalyuga kee peeda se bachne ke liye
Guruji kee baat ko hum sab maan lein
Apne Guru ke bataaye huey raaste par chalkar
Kyun na Unhe hum sammaan dein

Itni bakhoobi se kaatein hain karam hamaare
Unki leela sach mein laajawaab hai
Jahaan sachcha pyaar itna durlabh hai
Guruji se hamein veh milta behisaab hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 18, 2019

Om Namaha Shivaya
Aaj Ka Suvichaar 🙏🏻🙏🏻 # 546

              Atma Kee Unnati

Apne hee vyavhaar se banti hai hamaari niyati
Kyun na apne mann kee karein ruhaani sadgati
Pavitrataa hee hai atma kee prakriti
Aur ruhaaniyat se hoti hai atma kee pragati

Guruji sikhaatein hain rehna saral
Saraltaa mein ek anokhi divya gehraayee hai
Guruji kehte hain hum apnaayein sachchaayee
Kyunki usee mein hai hamaare bhavishya kee achchaayee

Kyunki swayam hee bhogna hai apne karmon ka phal
Jhooth toh hai keechad, satya hai nirmal jal
Satya toh atma ka mool sanskaar hai
Aur atma kee pavitrataa hee mukti ka aadhaar hai

Hum sab toh kismat waale hain
Ki Guruji ne hamaare adhiktar karam sambhaale hain
Isliye kyun na apni taraf se koshish karein poori
Ki atma kee unnati na reh jaaye adhoori

Guruji ko Bhagwan maana hai apna
Toh poora karein Unka yeh sapna
Atma ko pragati kee oar badhaayein
Aur Guruji ke honhaar bachche kehlaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 17, 2018

Om Namaha Shivaya
Aaj Ka Suvichaar 🙏🏻🙏🏻 # 180

        Kehte Hain Guruji Bhakton Se

Kehte hain Guruji bhakton se
Nirantar Unko yaad karo
Poorna bharosa hai agar Unpar
Na koi maang na fariyaad karo

Hamaare mann kee maili chadariya
Guruji hee toh saaf karein
Hamaari galatiyon ke liye
Guruji humko maaf karein

Kabhi hamein sikhaane ke liye
Hamaari atma ko jhinjodein
Kabhi hamein taarne ke liye
Ve neembu kee tareh nichodein

Sadaa dhyan rakhtein hain uska
Jo ek baar Unse jud jaaye
Guruji saath na chodein kabhi
Chaahe bhakt waapis mud jaaye

Yaad dilaatey hain humko Veh
Ki Unhonei jeevan hai sanvaara
Vahee toh jaan bachaayein hamaari
Aur niyati ko likhein dobaara

Guruji ke charnon mein aakar
Itna sukoon bhakton ne paaya hai
Khushkismat hain hum itne kyunki
Guruji ne hamein apnaaya hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 17, 2019

Om Namaha Shivaya
Aaj Ka Suvichaar 🙏🏻🙏🏻 # 545

     Sabse Anmol Rishta Hain Aap

Pyaare Guruji,

Srishti ka sabse sowmya phool hain Aap
Phool kee sabse divya khushboo hain Aap
Mere dil mein jo divya pyaar ka nagma hai
Uss nagme kee ruhaani rooh hain Aap

Sangeet ka madhur saaz bhi Aap
Geet ke mool vishay ka raaz bhi Aap
Adhyaatmiktaa ka alaukik andaaz bhi Aap
Gurbani mein bhi Aap, aur namaaz mein bhi Aap

Titlee kee khush mijaaz muskaan mein Aap
Panchhee kee azad udaan mein Aap
Mehnati insaan ke har kaam mein Aap
Har subah mein Aap, aur har shaam mein Aap

Naiya bhi Aap, kinaara bhi Aap
Maajhi bhi Aap, sahaara bhi Aap
Manzil bhi Aap, dwaara bhi Aap
Sooraj bhi, chaand bhi, Dhruv ka taara bhi Aap

Kalyuga kee is duniya mein
Sabse anmol rishta hain Aap
Mere liye toh Khuda bhi Aap
Aur Khuda ka farishtaa bhi Aap

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 16, 2018

Om Namaha Shivaya
Aaj Ka Suvichaar 🙏🏻🙏🏻 # 179

               Aadarneeya Guruvar

Apne aadarneeya Guruvar ke
Charnon mein sheesh jhukaaoon
Bade prem se unn par phir
Shradha ke phool chadhaaoon

Unke charnon ko chhookar jab mai
Apne haathon ko chehre se lagaaon
Toh Guruji kee divya anokhi khushboo
Uss-se mai gadd gadd hoti jaaoon

Unse koi prashn na poochhoon
Buss Unko dekhna chahoon
Jabb Guruji muskaayein thoda
Mai khushi se phooli na samaaoon

Gurbani kee meethi vaani se
Mai atma ko rijhaaoon
Mann ko miley anokhi shanti
Chaahe shabd saare samajh na paaoon

Guruji kahein, “ Kalyan kitta “
Aur mai shukrana kehti jaaoon
Satguru Aapki karunamayee leela par
Mai toh vaari jaaoon

Guruji Aapne apna banaaya
Abb aur mai kyun kuch chaahoon
Jeevan mera safal hua
Guru milan ke geet mai gaaoon

Aapki razaa mein raazi rahoon daata
Bass yeh kehna Aapse chaahoon
Jabb aaye meri jagg se jaane kee bela
Aapke kamal charnon mein samaa jaaoon

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 16, 2019

Om Namaha Shivaya
Aaj Ka Suvichaar 🙏🏻🙏🏻 # 544

       Guruji Ke Rangg Hain Nyaare

Sabke spandan ka mahatva hai srishti mein
Sab kuch har pal spasht hai Guruji kee drishti mein
Ek bahut shaktishali darpan hai kaayinaat
Jo dekhegi, usee ka pratibimb dikhaayegi dekhne ke pashchyaat

Tabhi toh Guruji kahein ki hamaare hon sakaaratamak vichaar
Aur hum sudhaarein apni neeyat aur vyavhaar
Hamaari neeyat par har pal hai Guruji kee nazar
Buri neeyat ka antt mein nishchay hee hoga bura asar

Hamein hee bhugatnaa padega parinaam
Isliye chaahe aaj mil jaaye yash aur aaraam
Lekin uss se kal kee beema nahin hogi pyaare
Jaisi karni, vaisi bharni, Guruji ke rangg hain nyaare

Kyun na chod dein chaalaaki aur yojna
Shuru karein swayam ko khojna
Apni khaamiyon se hum hain anjaan
Kyun na kar lein khud se pehchaan

Guruji jab dekhenge ki hamaari neeyat hai saaf
Toh awashya hee Ve hamein kar denge maaf
Karuna ke mahasaagar hain Ve, Mata pita hain hamaare
Karam kat jaayenge hamaare Unke sahaare

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 15, 2018

Om Namaha Shivaya
Aaj Ka Suvichaar 🙏🏻🙏🏻 # 178

       Guruji Se Judne Kee Kahaani

Yeh Guruji se judne kee kahaani hai
Baat yeh aaj kee nahin, janmon puraani hai
Kabhi yeh meri, aur kabhi aapki zubaani hai
Isi se hee toh khubsoorat yeh zindagaani hai

Aaj bhi yaad hai jaise kal kee baat ho
Hua madhur ehsaas jabb
Ki Guruji kee ho gayee hoon mai
Khushi se phooli na samaayi tabb

Mere jeevan kee andheri raat gayi
Aayi sooraj se sajee seher
Guruji ne itna pyaar diya
Barasne lagi Unki meher

Guruji ko saump dee zindagi
Shuru hui meri yaatra ruhaani
Aisa chamatkaar hai Unki divyataa ka
Ki jeevan kee raftaar hui mastaani

Himmat dee Guruji ne itni
Beemariyon ko duur bhagaaya
Unhee ke divya aur paawan prem ne
Mera utsaah aur vishwaas jagaaya

Unkee dhun mein magan hui mai
Raat din ka na raha hisaab
Guruji ke saamne toh mera jeevan hua
Jaise ho ik khuli kitaab

Isliye toh yeh zindagi kardee
Maine MahaShiv Guruji ke hawaale
Poojya Param pita Parmeshwar hain
Mere sundar Satguru Dugri waale

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 15, 2019

Om Namaha Shivaya
Aaj Ka Suvichaar 🙏🏻🙏🏻 # 543

        Roshan Kar Le Apna Jeevan

Loagon ko badalna mushkil hai
Khud ko badal le toh achcha rahega
Oopar wale ke darbar mein jageh milegi usey
Jo insaan karmon ka sachcha rahega

Pyaar ko banaa le apna dharam
Satya se sajaa le apne karam
Dil ko banaa le mandir
Guruji ke dar ko banaa le manzil

Na kisee mauke kee tu talaash kar
Swayam mein Guruji kee divyataa ka sakaash bhar
Aur antaratma mein tu prakash kar
Sunehra tu apne jeevan ka akash kar

Guruji tere saath hain na
Phir kaahey ka ghabrana
Tu Guruji ka ho jaa
Chaahe ho ya na ho zamaana

Laukik dhan jitna bhi ho jaaye tere paas
Phir bhi dil mein rahegi ik anjaani aas
Jo hogi poori keval Guruji kee sadhna se
Isliye roshan kar le apna jeevan Guruji kee aradhana se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 14, 2018

Om Namaha Shivaya
Aaj Ka Suvichaar 🙏🏻🙏🏻 # 177

 Guruji Ke Charnon Se Na      Jaana Aur Kaheen

Vyarth hai is duniya kee maya
Kisi ko yeh moh kaam nahin aaya
Jeevan kee mithya se kabhi kuch na paaya
Paa lo abb Guru naam kee sheetal chhaaya

Abb bhi kuch nahin bigda hai tumhaara
Guruji ke ashirwaad ka le lo sahara
Vahi jaantein hai sachchaa haal hamaara
Aur Veh dikhaayenge hamein mukti ka kinaara

Isliye bekaar kee baatein toh socho hee nahin
Ghor kalyuga mein chaahe hil jaaye zameen
Guruji ke charnon se na jaana aur kaheen
Tumhe tumhaari divya manzil milegi vaheen

Guruji kee hee baatein suno aur sunaao
Gupt sewa mein tum mastt ho jaao
Mann ko Guruji kee oar lagaao
Aur antaratma ko phirse jagaao

Guruji hee hain hamaare parwardigaar
Unke alaawa na hai koi hamaara madadgaar
Unhee ke paas hai hamaare naav kee patwaar
Vahee le jaayenge hamein bhavsaagar ke paar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 14, 2019

Om Namaha Shivaya
Aaj Ka Suvichaar 🙏🏻🙏🏻 # 542

       Aise Guru Pe Bal Bal Jaayiye

Dugri mein janam liya bashar bann kar
Sangat ka uddhaar kiya umr bhar
Aaj bhi jagg ka kalyan karte hain chola chodkar
Aise Guru pe bal bal jaayiye

Uthaate hain hamaare karmon ka bhaar
Lagaate hain hamaara beda paar
Karte hain humse niswaarth pyaar
Aise Guru pe bal bal jaayiye

Hamein saahas deti hai Unkee shakti
Ve chaahein keval hamaari maasoom bhakti
Unhee ke vash mein hai hamaari mukti
Aise Guru pe bal bal jaayiye

Hamein vehem chodna sikhaatey hain
Sachchaayee kee raah dikhaatey hain
Andhvishwaas hamaara mitaatey hain
Aise Guru pe bal bal jaayiye

Kehte hain ki hum jeevan mein laayein saraltaa
Kehte hain Ve ki hum vyavhaar mein laayein taraltaa
Kehte hain Ve ki hum vichaaron mein laayein komaltaa
Aise Guru pe bal bal jaayiye

Jeevan bhar detey hain hamaara saath
Maut ke samay bhi thaamte hain haath
Maut ke pashchyaat bhi detey hain apni sharan kee saugat
Aise Guru pe bal bal jaayiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 13, 2018

Om Namaha Shivaya
Aaj Ka Suvichaar 🙏🏻🙏🏻 # 176

             Har Saans Mein Ibadat

Awaaz mein bhi ibadat
Saaz mein bhi ibadat
Meri har aas mein ibadat
Meri har saans mein ibadat

Chalakte hain jin aankhon se ye pyaar ke aansoon
Un bheegee huin aankhon mein bhi ibadat
Abb ibadat hee bann jaaye zindagi meri
Guruji, de deejiye mujhe yeh ijaazat

Ik dua yeh meri qubool keejiye
Mujhe Apne charnon mein rehne deejiye
Shradha, saboori, aur niswaarth bhawna
Mujhe yeh pyaare aur anmol gehne deejiye

Kyunki in gehnon ke bina gareeb hoon mai
Inhe pehen kar Aapke kareeb hoon mai
Duniya jo kehti hai kehti rahey
Mai jaanti hoon kitni khushnaseeb hoon mai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 13, 2019

Om Namaha Shivaya
Aaj Ka Suvichaar 🙏🏻🙏🏻 # 541

   Jab Se Guruji Ne Apnaaya Mujhe

Pareshaan mann hua shaant
Chaahne lagaa ekaant
Dard Guruji se liya baant
Jab se Guruji ne apnaaya mujhe

Baadalon ne sooraj par se apna pardaa hataaya
Zindagi ka dastoor kuch kuch samajh mein aaya
Samjhi ki Guruji apne hain aur yeh jagg hai paraaya
Jab se Guruji ne apnaaya mujhe

Sawaalon mein hee milne lagey jawaab
Guruji ne sambhaala karmon ka hisaab Nihaari mainey leela Guruji kee lajawaab
Jab se Guruji ne apnaaya mujhe

Raasta hee manzil banta gaya
Duvidha ka toofan thamtaa gaya
Dil Guruji mein rammta gaya
Jab se Guruji ne apnaaya mujhe

Murjhaa gayee thi mai, ummeed se phir khil gayi
Guruji kee sharan jab se mujhe mil gayi
Ab toh mil mujhe madhur manzil gayee
Jab se Guruji ne apnaaya mujhe

Pyaara lag gaya ab toh Guruji ka dar
Jahaan mainey jhuka diya apna sir
Apne aap ko diya Guruji ke havaale kar
Jab se Guruji ne apnaaya mujhe

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 12, 2018

Om Namaha Shivaya
Aaj Ka Suvichaar 🙏🏻🙏🏻 # 175

                 Buss Chalta Chal

Zindagi ke ye raaste
Baney hain tere vaaste
Guruji ka naam lekar
Tu chalta chal, buss chalta chal

Raah mein aaye jo koi bhi mushkil
Toh niraash na hona kabhi bhi tu
Guruji tujhe dikhaayenge manzil
Tu chalta chal, buss chalta chal

Saaya bhi saath chod de agar
Darna nahin ek bhi pal ke liye
Guruji banenge tere humsafar
Tu chalta chal, buss chalta chal

Utsaah se oorjit kar le har shwaas
Phir bhi kadam dagmagaayein agar
Guruji banenge tera vishwaas
Tu chalta chal, buss chalta chal

Guruji ko thamaakar apna haath
Samarpan karde Unko jeevan
Ve har pal phir hongei tere saath
Tu chalta chal, buss chalta chal

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 12, 2019

Om Namaha Shivaya
Aaj Ka Suvichaar 🙏🏻🙏🏻 # 540

            Guruji Mein Hee Govind

Guruji ka shukrana karte huey karein apne din ko shuru
Hamaari is subah ke liye saari raat jaagey hamaare Guru
Guruji kee hum sab par kripa hai badi
Tabhi toh itnee ehtiyaat se chalti hai hamaare jeevan kee ghadi

Kitne yugon se janam maran ke chakravyu se hum hain peedit
Guruji ke ashirwaad ke bina toh hum ek pal bhi nahin reh sakte jeevit
Jeevan ke har sangharsh mein Unhee ka sahaara hai
Sach poochhiye toh Unke siwa aur kaun hamaara hai

Ek Guruji hee Hain jo har pal hamaare saath hain
Ek Guruji hee Hain jinhe hum keh sakte har baat hain
Ek Guruji hee Hain jinkee leela se hota hum sabka uddhaar hai
Ek Guruji hee Hain jinhe hum sabse sachchaa pyaar hai

Kehte hain, Guru Govind se milvaata hai
Lekin hamaara toh Guruji ke sangg itna anokha naata hai
Ki jo Guruji kee sharan mein aa jaata hai
Veh Guruji mein hee Govind ko paata hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja