Month: September 2019

September 20, 2018

Om Namaha Shivaya
Aaj Ka Suvichaar 🙏🏻🙏🏻 # 214

   Har Pal Guruji Karte Hain Raksha 

Registaan mein mai chal rahee thi
Chalte chalte mai thakk rahee thi
Kuch bhi nazar na aa raha thaa
Aur haunsla toota jaa raha thaa

Zoron se lag rahee thi mujhe pyaas
Paani bhi nahin thaa mere paas
Garmee mein hoth sookhe jaa rahey thei
Aur aankhon se ashru behte jaa rahe thei

Anjaan raaste par thi chal rahi
Shaam bhi abb thi dhal rahi
Ret mein mai girti jaa rahi thi
Aur bahut udaasi aa rahi thi

Andhera honei wala hee thaa
Dil ko bahut pareshaani hui
Ik tez hawaa ka jhonka aaya
Aur mujhe bahut hairaani hui

Jaise hee mainey apni aankhein keen bandd
Aayee mujhe gulab ke phoolon kee sugandh
Ek pal ke liye jaise samay ruk gaya
Aur mera sheesh naman mein jhuk gaya

Pyaar se kisi ne sir par phera haath
Jaan gayee mai ki Guruji hain mere saath
Ret kee aandhi thamney lagee
Raah thodi behtar dikhne lagee

Ek divya ujaale se nikhar gaya akash
Aur registaan mein phayl gaya prakash
Guruji ka ruhaani saath paakar mujhe ho gaya vishwaas
Ki abb poori ho jaayegi mere jeevan kee har aas

Hawaa ne rukh badal liya aur baadal lagey chhaane
Guruji apni leela ke dwara lagey mujhe bachaane
Guruji kee dhun mein mai ho gayee magan
Aagey badhne kee abb laagee mujhmein lagan

Hameshaan kee tareh Guruji kee hui meher
Thoda chalne ke baad mujhe dikh gayee ek neher
Jiske sheetal jal se mainey apni pyaas bujhaayee
Jaan meri bach gayee, yeh soch ke mai muskaayee

Kuch hee dooree par dikh gayee sadak
Aur khatam hua safar registaan ka
Guruji ke bina toh asambhav thaa safar
Aise veeran aur nirjan sthaan ka

Har pal Guruji karte hain raksha
Har pal mai Unka shukrana gaaoon
Paropkaari Guruji par mai
Sadaa hee vaari jaaoon

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 20, 2019

Om Namaha Shivaya
Aaj Ka Suvichaar 🙏🏻🙏🏻 # 579

             Safar Hai Yeh Zindagi

Safar hai yeh zindagi, koi baazi nahin hai
Kyun yeh sach maan-ne ko loag raazi nahin hain?
Guruji ne hamein neevan aur achchaa bann-ne ko kahaa hai
Phir kyun bheed mein har banda apni mai mein kho raha hai

Kalyuga kee behki hui bheed mein anek loag hain shaamil
Bin disha kee daud se kuch bhi nahin hoga haasil
Guruji ke dikhaaye huey raaste par jo chalta jaayega
Veh insaan Guruji ke bataaye taur tareeke mein dhalta jaayega

Chaahe bheed saari ek disha mein jaaye
Sachche bhakt ka dil na kabhi bhi ghabraaye
Kyunki usey toh keval Guruji ko khush rakhne kee hai abhilaasha
Aur Guruji ke sikhaaye gyan ko paane kee hai jigyaasa

Sooraj aur chaand toh sabko dete hain apna prakash
Lekin kisee virle ko hee is satya ka hota hai ehsaas
Aise hee sab par phailtaa hai Guruji ka roshan sakaash
Lekin bahut kumm bhakt samajhte hain ki yeh sakaash hai kitna khaas

Yeh khushi aur ameeri ka rishta thoda sa ajeeb hai
Jisne Guruji ke pyaar ko na samjhaa veh toh ameer hotey huey bhi gareeb hai
Guruji ke sakaash ko paakar har bhakt khushnaseeb hai
Prem aur shradha ke bal par har bhakt Guruji ke bahut kareeb hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 19, 2018

Om Namaha Shivaya
Aaj Ka Suvichaar 🙏🏻🙏🏻 # 213

. Guruji Toh Kewal Yeh Chaahte Hain

Sainkdon meel kee yaatra bhi
Hoti hai ek kadam se shuru
Manzil takk pahunchne mein
Madad karte hain hamaare Guru

Pita bhi Vahee hain, mata bhi Vahee
Bandhu bhi Vahee hain, aur bhraata bhi Vahee
Raat din Unhe rehti hai itni chinta hamaari
Unhe toh badi lagti hai hamaari choti si bhi beemaari

Har bhakt ka poora dhyan rakhtein hain, Unko toh khatam hota nahin hai kaam
Hum toh phir bhi so jaate hain, parantu Guruji na karte aaraam
Hamaari har raat kee neend ke liye Guruji sotey nahin hain
Jahaan bhi hum Unhei yaad karein, Veh hotei vaheen hain

Kuch karmon ke kaantey Veh hamein chubhne hain detey
Lekin zyadatar karam Ve Apne par lay letey
Khuda hain hamaare, isliye phir baksh detey Hain hamein
Aur changa bandaa ban-ne ki seekh detey Hain hamein

Guruji bhakton ko pehle bheetar se saaf karein
Itne dayalu hain Ve, galatiyon ke liye maaf karein
Badal detey hain Ve jeevan jeene ka nazariya
Pehle se bhi zyada adbhut ho jaati hai zindagi kee dagariya

Chaahe hum mein se kuch logon ke paas karodon ke makaan hain
Guruji ke liye hum sabb cheentee aur makodon ke samaan hain
Phir na jaane kyun hum mein hai itna ahankaar hai
Jaise jeet liya ho humne saara sansaar hai

Is ahem aur vehem ko chod dein hum
Toh yatra hamaari ho jaaye aasaan
Guruji toh kewal yeh chaahte hain
Ki hum bann jaayein achche insaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 19, 2019

Om Namaha Shivaya
Aaj Ka Suvichaar 🙏🏻🙏🏻 # 578

              Sawaalon Ke Jawaab

Muskuraahat ka kya hai mol?
Bholepan ka kya hai bol?
Kab takk rahegi yeh zindagi?
Kitnee gehri hogi bandagi?

Kyun sooraj itna shaktishaali hotey huey bhi
Raat mein chaand aur taaron ko chamakne deta hai?
Kyun saagar itna aseem honei ke baavjood
Nadiyon se paani leta hai?

Kyun baadal paani kee boondon ke bhaar se thakk kar
Unhe samay se pehle nahin deta barasne?
Kyun insaan ka chanchal mann
Usey Guruji ke liye nahin deta tarasne?

Jabb sooraj itna tejasvi hotey huey bhi
Raat ke aagey jhuk jaata hai
Toh phir kyun hamaare bheetar ka insaan
Aisa neevanpann nahin jutaa paata hai?

Aise kayee sawaalon se aksar
Dil ho jaata hai hairaan
Sawaalon ke jawaab na milein agar
Toh insaan hota hai pareshaan

Guruji Apne anokhe andaaz se
Dete Hain bhakton ke kayee sawaalon ke jawaab
Hairaani aur pareshaani halki kar dete Hain
Unke upkaar toh hain behisaab

Sawaalon ke jawaab agar nahin hain milte
Toh maan lena ki shaayad veh hamaare buss kee nahin hai baat
Aur apni kunthaa ko mitaane ke liye
Guruji ko thaamne dein apna haath

Kuch sawaalon ke jawaab milenge, kuch se hum reh jaayenge anjaan
Lekin kyunki Guruji ne thaama hoga haath, toh jeena hoga pehle se aasaan
Guruji kee kripa se hum hongey pehle se kum pareshaan
Buss yaad rakhein hameshaan ki Ve Hain Bhagwaan aur hum hain insaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 18, 2018

Om Namaha Shivaya
Aaj Ka Suvichaar 🙏🏻🙏🏻 # 212

Aao Sab Mil Kar Bolein, Dhan Dhan Guruji

Roam roam mein samaatey Hain Guruji
Jab bhi bulaao aatey Hain Guruji
Patit ko paawan banaate Hain Guruji
Har pal bahut yaad aatey Hain Guruji

Bhakton kee muskaan Guruji
Sarvashaktimaan Hain Guruji
Doobtey huey ka sahaara Guruji
Akash mein Dhruv ka tara Guruji

MahaShiv ka avataar Guruji
Karte Hain beda paar Guruji
Sangat ka vishwaas Guruji
Har bhakt kee aas Guruji

Pyaar ka aseem saagar Guruji
Mamta kee gehri gaagar Guruji
Hamaari taakat Hain Guruji
Hamaari Ibadat Hain Guruji

Adheer bhakt ka dheeraj Guruji
Jeevan kee jheel ka neeraj Guruji
Dikhaate Hain chamatkaar Guruji
Karte Hain hum par upkaar Guruji

Har deepak ka prakash Guruji
Sakaaraatamak sakaash Guruji
Sabko pehchaante Hain Guruji
Sab kuch jaantein Hain Guruji

Thaamtey Hain hamaara haath Guruji
Kabhi na chodein saath Guruji
Dein hamein jeevan daan Guruji
Sab shaastron ka divya gyan Guruji

Bhagwaan kee har moorti mein Guruji
Har kaaraj kee poorti mein Guruji
Mandir masjid aur ghar mein Guruji
Gurudwaare girjaghar mein Guruji

Neki ka paath sikhaate Hain Guruji
Bhooley ko raah dikhaate Hain Guruji
Taarein hamaara tann aur mann Guruji
Aao sab mil kar bolein, Dhan Dhan Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 18, 2019

Om Namaha Shivaya
Aaj Ka Suvichaar 🙏🏻🙏🏻 # 577

     Sukoon Aur Shanti Ka Raasta

Tez raftaar se badalta jaa raha hai yeh zamaana
Laukikta aur badi badi baaton ka banaa hai yeh zamaana deewaana
Na jaane kyun loagon ko sach ke badle asatya bhaaney lagaa hai
Safaltaa se neevenpann ke bajaaye insaan mein ahankaar aane lagaa hai

Agar tu bhi jhooth aur ahem ka saath de raha hai
Toh swayam ko tu apna dushman banaa raha hai
Aur phir apni atma ke uddhaar mein
Tu khud hee archan bantaa jaa raha hai

Yaad rakh ki Guruji sadaa sikhaate hain Shiv yog
Na de tu swayam ko vichlit vichaaron ka roag
Duniyadari kee vajeh se na apna dhyan kar tu bhang
Guruji kee sharan mein kar le sewa simran aur satsang

Shudh mann se Gurbani ka kar le tu shravan
Sakaaraatamak vichaaron ka kar le tu manan
Maafi maang lei Guruji se aur kar le tu Unka naman
Shradha aur prem bhaav se dil mein chhoo le tu Unke charan

Guruji se pyaar ko banaa le aantrik anubhav
Sweekaar le tu atma kee yeh chunauti
Guruji par kendrit kar tu apne dhyan ko
Taaki adhyaatmik urjaa mein ho badhauti

Badhaa le tu apni adhyaatmik shakti ko
Har pal nikhaarta chal tu apni bhakti ko
Guruji mein rakh tu atoot aseem asthaa
Yahee hai sukoon aur shanti ka raasta

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 17, 2018

Om Namaha Shivaya
Aaj Ka Suvichaar 🙏🏻🙏🏻 # 211

Kar Le Aye Bande, Tu Guruji Kee Vadiyaayi

Zindagi kisee ek pal mein seemit nahin rehti hai
Yeh toh jeevan dhaara hai, saanson ke bal par behti hai
Chaahe behte huey yeh patharon kee thokarein sehti hai
Har pal tu shukrana kar, Guruji kee shiksha yahee kehti hai

Shukr hai pehle ke kuch karam achche hain
Tabhi toh hum Guruji ke bachche hain
Unse hee hamaare jeewan mein ujaala hai
Har moad par Unhonei hamein sambhaala hai

Hum jabb bhi Unhe bulaatey hain
Guruji itne pyaar se aatey hain
Hum roothein toh Ve manaatey hain
Aur hamaare sangg muskuraate hain

Phir mann bhaavuk ho jaata hai
Nainon mein ashru bhar aatey hain
Unke pyaar mein hee ye behte hain
Unko shukrana hum kehte hain

Shukrana karte rahenge
Tabhi toh aagey badhenge
Agar shikaayat hee karenge
Toh phir jholi kaise bharenge?

Shukrana mann mein hoga jabb
Bhakti bhaav badhega tabb
Vyarth hai sach mein baaki sabb
Aye bande, tu seekhega kabb?

Kar le aye bande, tu Guruji kee vadiaayi
Isee sachchaayee mein hai teri bhalaayi
Madhur ho jaayega zindagi ka taraana
Jabb teri har saans mein hoga shukrana, shukrana, shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 17, 2019

Om Namaha Shivaya
Aaj Ka Suvichaar 🙏🏻🙏🏻 # 576

   Guruji Ke Pyaar Ka Asar Hai Aisa

Aankhein jab hon khuli
Toh Guruji hain meri aas
Aankhein jo mainey moond leen
Toh Guruji hain mera vishwaas

Saath chaahe koi na ho mere
Guruji Hain abb humsafar
Aur kisee sahaare kee zaroorat hee nahin
Guruji ne thaama hai mujhe is kadar

Chaahe har taraf sannaata ho
Mera antarmann goonjtaa hai Guruji kee awaaz se
Rooh ke katre katre ko sukoon milta hai
Gurbani ke pavitra sur aur saaz se

Jeevan kee bagiya mehek gayi hai
Guruji kee divya khushboo se
Is khushboo ke anokhe ehsaas ka
Deedar hota hai meri rooh se

Neeras nahin lagta yeh jeevan abb kabhi
Doobi rehti hoon simran ke rass mein
Guruji kee divyata aur pyaar ka asar hai aisa
Ki meri har saans hai Unke hee vash mein

Na zindagi se gila hai na hai koi shiqwa
Na hee lagta hai abb maut se darr
Guruji kee khushboo se mehek gayee hai zindagi
Unka noor chhaa gaya hai mere spandan par

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 16, 2018

Om Namaha Shivaya
Aaj Ka Suvichaar 🙏🏻🙏🏻 # 210

        Buddhi Aisee Deejiye Guruji

Buddhi aisee deejiye Guruji
Ki karam hamaare achche hon
Insaaniyat ka bhaav ho
Aur mann se hum sachche hon

Shradha aisee ho hamaari Guruji
Ki kardein Aapko sarv-samarpan
Antaraatma itni saaf ho
Ki dekh sakein bin laaj ke darpan

Bhakti hamaari itni gehri ho
Ki mahasaagar bhi uthalaa laage
Ahem vehem ko chod kar peechhe
Hum azaad hokar badhein aagey

Paakhand na karein kabhi bhi hum
Sachchaayi kee raah par chalein
Neeyat hamaari saaf ho
Aur karam hamaare phalein

Mann mein asur bhaav ka kachhraa hai
Usey Aap hee daata saaf karo
Paapi hain hum kayee janmon ke
Kripa kar hamein maaf karo

Chhoti see ek jageh de doh Maalik
Aap apne kamal charan mein
Koi bhi aur tamanna na ho dil mein
Buss le lo Aap Apni sharan mein

Khwaayish hai ki Apne dar se
Kabhi na Aap lautaana
Jabb aaye jagg se jaane kee bela
Guruji, tabb Aap hee lene aana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 16, 2019

Om Namaha Shivaya
Aaj Ka Suvichaar 🙏🏻🙏🏻 # 575

               Guruji Ke Bharose

Bekaar kee baaton mein waqt zaaya na kiya kar
Koshish kar ki doojon kee kamzoriyon par dhyan na diya kar
Zindagi ka ek ek pal hai ratnon se bhi anmol
Isliye isey tu kalyuga ke kachche taraazu mein na toal

Tujh mein hain jo khaamiyaan, unpar de tu dhyan
Guruji se tu baat kar, aur Unka kehna tu le maan
Abb takk toh swayam se bhi hai tu anjaan
Phir kis baat ka ghamand, aur kaahe kee jhoothi shaan?

Apni kamzoriyan aur apna har karam kar de Guruji ko arpan
Har pal kee kismat kar de Guruji ko samarpan
Shradha se Guruji ka naam tu japta chal
Agyan kee nidra se abb tu jagtaa chal

Sahaayta karenge teri, Guruji madadgaar Hain
Arzi sunenge teri, Guruji parwardigaar Hain
Murshid Hain Ve tere, jeena sikhaayenge tujhe
Maargdarshak Hain Ve tere, raasta dikhaayenge tujhe

Guruji ke bharose zindagi tu guzaarta chal
Beetey huey kal ko aaj ke marham se sanvaarta chal
Aane waale kal ke liye bhi Guruji ka ashirwaad paata jaa
Har kshan tu Guruji se pehle se bhi zyada kareeb aata jaa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 15, 2018

Om Namaha Shivaya
Aaj Ka Suvichaar 🙏🏻🙏🏻 # 209

           Guruji Tujhko Dekh Rahei Hain

Shiv Yog kehta hai
Har cheez bhaav re
Phir kyun tu apni mukti ko
Lagaata hai daav pe?

Guruji tujhko dekh rahei hain
Tu reh sabke sangg pyaar se
Baaki loag jaisa bhi karein
Tu na mukarnaa achche vyavhaar se

Jhooth aur kapat hai phayl raha
Chhaaya hai kalyuga ka andhera
Lekin tu sachchi shradha rakh
Aur dekh apne bheetar ka savera

Oopari dikhaawe se milegi jo safaltaa
Veh pal doh pal kee hogi
Uske baad kee vifaltaa
Vahee jaane jisne hai bhogi

Guruji bhi dekhein teri shradha
Aur parkhein Ve teri bhavna
Jo Unse karey niswaarth prem
Uskee pooran karein Ve manokaamana

Jo mushkilon ke baavjood bhi
Unka naam prem se gaata jaaye
Uss bhakt ke dil aur chehre par
Guruji ka ujjwal noor chhaata jaaye

Guruji Apne ashish se detein hain
Uss insaan ko sheetal chhaaon
Aise shaqs ko dhonei dete
Guruji Apne paawan paaon

Unhee pairon ke charnaamrit se
Bhakt ka hota punar-janam
Guruji Apni divya leela se
Har letey phir uske karam

Guruji hee Hain jo bachaa sakte hain
Hamaari doobti hui niyati ki naav
Isliye sadaa rakh Apne Guruji ke prati
Tu shradha aur prem ka bhakti bhaav

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 15, 2019

Om Namaha Shivaya
Aaj Ka Suvichaar 🙏🏻🙏🏻 # 574

 Hamaari Kismat Kee Kori Chaadar

Kaun kehta hai ki aansoon bezubaan hain
Ve karte dil kee vyatha ko bayaan hain
Guruji ko toh hamaare har aansoo ka dhyan hai
Aur keval Unhe usey muskaan mein badalne ka gyan hai

Guruji se hee hamaara ateet hai juda
Guruji se ho raha hamaare bhavishya ka nirmaan hai
Har lamhe ke sarkar Hain Guruji
Aur Guruji hee hamaara vartmaan hain

Unke dil jaisa komal dil poori srishti aur uske paar bhi nahin
Guruji jo hamaare liye sochte Hain vahee hai sahi
Isliye hamein sochne kee zaroorat hee nahin
Sarvsamarpan kar dein Unhe, hamaare liye har nirnaya lein Vahi

Hum toh galat soch sakte hain
Lekin Guruji kee soch toh sarvottam hoti hai hameshaan
Hum tark shaashtra kar ke thakte hain
Phir antt mein hotey hain pareshaan

Kyun na shuruaat hee karein samarpan se
Guruji ko saump dein parinaam kee fikr
Buss shudh karam karne mein lagaayein dhyan
Aur simran kar ke paayein Guruji se gyan

Aankhon kee namee muskaan mein badal jaayegi
Hamaari raahon mein ummeed kee jyot jal jaayegi
Guruji kee leela ke indradhanush ke rangon se
Hamaari kismat kee kori chaadar rangg jaayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 14, 2018

Om Namaha Shivaya
Aaj Ka Suvichaar 🙏🏻🙏🏻 # 208

      Hamaara Ekmaatra Sahara

Shanti hee atma ka dharam hai
Aur shanti bhaav changaa karam hai
Phir kyun kalyuga mein hai ashaanti itni
Kyun hai ghor parivartan kee kranti itni?

Kaam aur krodh badhte jaa rahein hain
Moh mein, lobh mein, loag paglaa rahein hain
Ahankaar toh aise ho gaya hai insaan ko
Ki bhool hee gayein hain veh Bhagwaan ko

Ek dooje se aagey badhne kee dhun mein sabb sawaar hain
Pehle se kaheen zyaada insaan beemaar hain
Beghar ho gaye hain kitne loag
Aur sabhi koi dukh rahein hain bhog

Bhukamp, baad, jwalamukhi jaan le rahein hain
Aadmee hee aadmee par vaar kar rahein hain
Goliyaan chalti hain har din kaheen na kaheen
Banjar hoti jaa rahee hai dheere dheere zameen

Aise mein bhi humko mil gayee hai
Guruji kee sharan
Kyun na phir sudhaar lein apne toh hum karam
Guruji ne kiya hai hum par itna upkaar
Ki aise maadey samay mein sunee hamaari pukaar

Guruji, Aap sangg hain toh chaahe toofaan aaye
Chaahe zameen, chaahe aasmaan hil jaaye
Aap MahaShiv aayenge kar Nandi kee sawaaree
Aur Aapka trishul karega raksha hamaari

Guruji, Aap toh hain leeladhaari
Abb toh Aap par chod dee fikrein saari
Hamein toh maalum nahin ek bhi pal ka
Aur Aapko gyan hai kal, aaj, aur kal ka

Guruji, Aapko shukrana hamaara
Aap yakeenan har lenge kasht saara
Aap hee hain hamaara ekmaatra sahaara
Hamaara udhdhaar hoga Aapke hee dwaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 14, 2019

Om Namaha Shivaya
Aaj Ka Suvichaar 🙏🏻🙏🏻 # 573

                   Mool Lakshya

Jeevan ke raaste mein jab bhi aaye koi museebat
Guruji ne haath thaama hai tera, shaant hoja tu jaan kar yeh hakeekat
Agar lagey kabhi tujhe, ki bhar gayee hai tere paap kee gaagar
Toh praayshchit kar le, kyunki Guruji Hain kshamaa ka mahaasaagar

Zamaana kya kehta hai, tu na kar is baat kee parvaah
Tu buss Guruji kee bhakti mein badhaata chal apna utsaah
Mann kee veena se sajaa le tu sur Gurbani ka
Jiske aasre sanvaar le tu kissa apni zindagani ka

Guruji ko sarvsamarpan kar aur mai apni mitaa le
Ruhaani raaste par aane wali har baadha ko tu hataa le
Kyunki ruhaaniyat se duur honei se hoga atma ko nuksaan
Is atma ne shareer ka libaas jo odha hai, veh toh hai do pal ka mehmaan

Guruji ne toh tujhe kisee pravachan ka ghulam nahin hai banaaya
Unhonei toh tujhe sewa aur simran baksh kar bhalaayee ka raasta hai dikhaaya
Phir kis gehri soch mein khadaa hai tu?
Kyun abb bhi asmanjas mein padaa hai tu?

Atma-vishwaas ko banaa le apni dhaal
Aur saamna kar zamaane ka tu datt kar
Atma-gyan kee gehraayee ko khoj
Duniyadari nibhaa le laukikta se tu hatt kar

Divya gyan mein doobna hai mool lakshya ruhaaniyat ka
Achche karam karna hai kartavya aur dharam insaaniyat ka
Na rehne de tu apni zindagi ko ek mithyapoorna afsaana
Har haal mein tu kar Guruji ka beintehaa shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 13, 2018

Om Namaha Shivaya
Aaj Ka Suvichaar 🙏🏻🙏🏻 # 207

  Aapse Hee Har Shubh Aarambh

Ganesh Chaturthi ke shubh avsar par
Sabko haardik shubhkaamnaayein
Guruji kee kripa se Aap sabki
Poorna hon sab manokaamnaayein

Guruji, Aap mein samaatey hain
Brahma Vishnu aur Mahesh
Aap maarg se har baadha hataayein
Isliye Aap hee hain hamaare Ganesh

Pyaar se sabb bhakt Aapko
Modak itiyaadi khilaayein
Shradha se pushp anek
Aapke charnon mein chadhaayein

Shubh kaaraj ke aarambh mein
Bhakt Gajanand ko poojein
Hamein Aap mein hee dikhein Ganesha
Is paheli ko hum kaise boojhein

Aap hee hain sabb dukhon ke harta
Aap hee hamaare sukh karta
Chintamani bhi Aap hamaare
Aapne hee hain kaaj sanvaare

Aap hee hain Avaniish
Aur Aap hee Jagdiish
Aap hee Prathameshwara
Aur Aap hee Vighneshwara

Aap hee hain Siddhipriya
Aur Aap hee Buddhipriya
Aapse hee hai kshamakaram
Aur Aapse hee hai jeevan maran

Aapse hee hai har shubh aarambh
Aapse hee is jagg ka praarambh
Milti rahegi jo Aapki divya drishti
Toh nikhartee rahegi sampoorna srishti

Sabb kuch Aapka hee diya hua hai
Abb kya hum Aapko dein uphaar
Buss dua hai ki yeh paawan tyohaar
Sabki zindagi mein laaye sukh aur pyaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 13, 2019

Om Namaha Shivaya
Aaj Ka Suvichaar 🙏🏻🙏🏻 # 572

              Uth Jaag Musaafir

Uth jaag musaafir bhor bhayee
Guruji kee nazar teri oar gayee
Is se milta hai yeh paigaam
Ki ab hoga tera kalyaan

Guruji toh MahaShiv ka avataar hain
Tera uddhaar karne ke liye bekaraar hain
Tu Unpar vishwaas kar ke dekh toh le
Unhe apne jeevan kee doar toh de

Tere bigde kaaj bann jaayenge
Zindagi ke toofan thamm jaayenge
Tere raaste mein badhaayein jo aayengi
Guruji kee mehar se hatt jaayengi

Tujhe Unse darne kee zaroorat nahin
Unse judne ke liye hai har mahoorat sahi
Tu keval Guruji se pyaar kar
Unke deedar ka tu intazaar kar

Ek din aisa zaroor aayega
Jab tera Unse divya milan ho jaayega
Tab tera shareer toh yahaan reh jaayega
Aur tu atma ke roop mein Guruji mein samaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 12, 2018

Om Namaha Shivaya
Aaj Ka Suvichaar 🙏🏻🙏🏻 # 206

Aapke Naam Ka Jo Lagaaya Hai Tilak

Guru kee khoj mein bhatakte hain kayee praani
Is talaash mein guzar jaati hai zindagaani
Kaheen par bhi jaakar shanti milti nahin
Aur koi bhi raasta lagta nahin sahee

Jo kayee kashtiyon mein daaltey apne paaon
Veh bhatakte rehte hain dar dar, gaaon gaaon
Aapka shukrana ki Aapne apne dwaar par bulaaya
Jahaan sangat ne teenon lok ka sukh aur chayn paaya

Guruji, Aapke naam ka jo lagaaya hai tilak
Chehre par tabb se atmavishwaas raha hai chhalak
Zindagi dekhne ka badal gaya hai nazariya
Swayam ke liye bhi sanvar gaya apna ravaiya

Guruji, Aapki sharan mein toh badal gayee hai kismat
Jee chaahta hai har pal karein Aapki sewa aur khidmat
Aapka naam japne kee har pal rehti hai chaahat
Aur naam japne se milti hai dil ko raahat

Vehmon se duur hongei, tabhi toh Aapke aur bhi kareeb aayenge
Ahem ko khoyenge, tabhi Aapki rehmat ko paayenge
Paakhand tyaag kar achche karam kamaayenge
Varna jeevan ke kshan yoon hee vyarth ganvaayenge

Na rakhein kisee se bhi koi apekshaa
Kewal Aapse milan kee karein prateeksha
Unn intazaar ke lamhon mein kar lein sewa aur simran
Aur apna samast jeevan kar dein Aapko arpan

Agar hum Aapko dhyaayein din aur raat
Toh ghabraane kee koi nahin hai baat
Aapne thaama hai jo hamaara haath
Toh Aap sadaa hain hamaare saath

Aapki baat maanenge hum
Toh hamein hee hoga laabh
Moksh kee oar le jaayenge Aap
Aur kar denge hum sabko maaf

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 12, 2019

Om Namaha Shivaya
Aaj Ka Suvichaar 🙏🏻🙏🏻 # 571

                    Aakhir Ek Din

Is zindagi ka taur tareeka
Hamein nahin aata samajh
Har tarehn kee uljhanon mein
Hum aksar jaatey hain ulajh

Uljanein toh Guruji suljhaayenge
Hamein karni hai ardaas
Guruji ka nirantar dhyan kar ke
Poori karni hai shanti paane kee aas

Yakeenan Guruji hamein apne kareeb laana chaahte hain
Tabhi toh Ve hamein Apne charnon mein bithaate hain
Hum par kripa kar hamein satsang mein bulaate hain
Sangat se divya anubhav suntei aur sunvaatey hain

Guruji ne hamein simran kee dee hai daat
Simran dwaara Ve sadaa rehte Hain hamaare saath
Sewa ka avsar jo miley toh veh bhi hai Unkee inaayat
Buss Ve chaahein ki hum karein dil se Unkee ibadat

Jitnee karenge hum sadhna
Utna aur hoga hamein Guruji se pyaar
Aur sadhna ke dwaara hee hum
Samarpan karne ke liye hongei tayyaar

Guruji hum sabko raah dikhaayein
Jeene ka tareeka sikhaayein
Kyun na hum Guru gyan ko apnaayein
Aur swayam ka drishtikoan badhaayein

Aakhir ek din aisa sabki zindagi mein aayega
Jab apna saaya bhi saath chod jaayega
Jo apna haath Guruji ke haath mein thamaayega
Veh yakeenan Unkee kripa aur karuna se tarr jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 11, 2018

Om Namaha Shivaya
Aaj Ka Suvichaar 🙏🏻🙏🏻 # 205

            Raaste Ka Shukrana 

Aye raaste, tu mujhko lekar chal diya kahaan
Kya mujhe khushi kee seher milegi vahaan?
Kabhi daayein, kabhi baayein, tu mudta jaa raha hai
Mere dil ka panchhee tere sangg udta jaa raha hai

Raaste ne mujhe pyaar se diya yeh jawaab
Thoda sa mai hoon seedha, thoda hoon mai kharaab
Tu mujhpar chalte huey na rakh kadmon ka hisaab
Jahaan mai tujhe pahunchaaoonga, veh manzil hai lajawaab

Poochhne par raaste ne mujhse yeh kaha
Mai tujhe Guruji ke paas hoon le ja raha
Yeh sunn kar jaagrit hui mere dil kee aas
Sochne lagee ki kabb pahunchoongi Guruji ke paas

Is pyaare khayaal se aayee mujhmein itnee oorja
Ki Guruji ke alaava mujhe aur kuch bhi nahin soojha
Mai raaste kee baat maan kar uspar chal padee
Taaki jaldi aaye Guru milan kee shubh ghadee

Guruji ka naam lekar kasht gayee mai bhool
Raaste ke kaantey bann gaye komal phool
Paththar khud bakhud gaayab hotei chale gaye
Andhere mein divya roshni ke deep jal gaye

Guruji ke khayaalon mein hokar magan
Na dekhi zameen aur na dekha gagan
Buss Unkee hee dhun mein mai chalti gayee
Subah se hui shaam, aur veh bhi dhal gayee

Masti mein naach rahei thei vahaan moar
Peeli aur safed titliyaan theen chaaron oar
Gulab ke phoolon ka saundarya aur mehek
Akash mein udti chidiyon kee chulbuli chehek

Jhooley mein baithey Guruji lag rahei thei itne pyaare
Maathe par tejasvi Om aur nayn Unke itne nyaare
Charnon mein jabb Unke mainey sheesh jhukaaya
Toh Unka prem se bhara ashirwaad mainey paaya

Pahunchaaya jisne manzil par, uss raaste ka shukrana
Mera Guru mujhe mil gaya, phir kaisa abb ghabrana
Safal ho gaya abb meri zindagi ka afsaana
Yeh ati-anmol rishta har janam mein hai nibhaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 11, 2019

Om Namaha Shivaya
Aaj Ka Suvichaar 🙏🏻🙏🏻 # 570

           Chaaron Oar Hain Aap

Shaayari mein Aap Hain Guruji
Kavita mein bhi Aap
Maatritva mein bhi Aap Hain
Aur mitrataa mein bhi Aap

Sapnon mein Hain Aap
Hakeekat mein bhi Aap
Maardarshan bhi Aapse
Naseehat mein bhi Aap

Ruhaaniyat mein Aap
Insaaniyat mein Aap
Karam mein bhi Aap
Aur dharam mein bhi Aap

Har granth hai Aapse
Har granth ka saar bhi Aap
Dharti ke is paar bhi Aap
Aur ambar ke uss paar bhi Aap

Aap hee Hain Rab kee moorat
Aap hee Hain farishtey kee soorat
Aapse hee hai har shubh mahoorat
Aap Hain is jind kee saanson kee zaroorat

Mann kee roshni hai Aapse
Gyan kee ujlee bhor Hain Aap
Sabka astitva hai Aapse
Sach mein chaaron oar Hain Aap

🌹🌹🌹🌹🌹🌹🌹

Jai Guruji 🙏🏻🙏🏻
Dhirja