Month: October 2019

October 31, 2018

Om Namaha Shivaya
Aaj Ka Suvichaar 🙏🏻🙏🏻 # 255

     Guruji Ke Poojya Ashirwaad Se

Zoron se chal rahi thi aandhi
Ud rahi thi itnee dhool
Aagey dekhna mushkil ho raha tha
Raasta jaise raha thaa bhool

Aankhein na kholin jaa rahee theen
Kuch na aa raha thaa nazar
Paaon bhi jawaab dene lagey thei
Thakk gayee thi mai is kadar

Tabhi tufaan ke timir mein
Mere kandhe par rakha kisee ne haath
Mud ke dekha jab mainey, toh dekha
Ki Guruji Hain mere saath!

Nainon mein Unke sneh thaa chhalak raha
Hothon par thi mandd muskaan
Unke divya darshan paate hee
Har mushkil lagne lagee aasaan

Pairon mein aa gayi ek nayee himmat
Mai bhaavuk hokar ronei lagee
Unke ruhaani spandan aur tej se
Aandhi bhi shaant honei lagee

Andhere mein ho gaya jaise ujaala
Mil gaya mujhe Guruji ka sahaara
Guruji ke pyaar aur chamatkaar se
Kuch hee pal mein badal gaya nazaara

Raaste par chal kar manzil mil gayi
Guruji kee hui ek baar phir meharbaani
Guruji ke poojya aashirwaad se hee
Dhanya hui hai meri zindagaani

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 31, 2019

Om Namaha Shivaya
Aaj Ka Suvichaar 🙏🏻🙏🏻 # 620

      Guruji Ke Naam Ke Simran Se

Guruji ke naam ke simran se
Tere kasht kumm honei lagenge
Guruji ke naam ke simran se
Tere kaaraj sanvarne lagenge

Guruji ke naam ke simran se
Hota chalega karmon ka bhugtaan
Guruji ke naam ke simran se
Tujhe milega dhyan mein gyan

Guruji ke naam ke simran se
Khatm hogi udaasi aur niraasha
Guruji ke naam ke simran se
Tu seh sakega duniya ka tamasha

Guruji ke naam ke simran se
Shant hoga tera mann
Guruji ke naam ke simran se
Nirogi hoga tera tann

Guruji ke naam ke simran se
Tera saahas bhi badhta jaayega
Guruji ke naam ke simran se
Tu adhyaatmik seedhi chadhta jaayega

Guruji ke naam ke simran se
Tu sabko har haalaat mein kar sakega sweekaar
Guruji ke naam ke simran se
Halka ho jaayega teri antaratma ka bhaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 30, 2018

Om Namaha Shivaya
Aaj Ka Suvichaar 🙏🏻🙏🏻 # 254

Pyaare Guruji, Apne Har Bhakt Ke Sangg Rehna

Jab se Guruji ne apnaaya hai
Dil ne ik adbhut sukoon paaya hai
Har pal dil mein hai vaas Unka
Rehta hai sadaa ehsaas Unka

Ye duniya ye loag ye haalaat
Ye sab hamaare vash mein nahin hai
Hum buss uss raah par chalein
Jo hamaare udhdhaar ke liye sahi hai

Guruji, madad keejiye hamaari
Ki hum apni soch ko rakhein pavitra
Duniya jis disha mein bhi jaaye
Na girne dein hum apna charitra

Guruji, itnee kripa hum par buss banaaye rakhna
Aapke prem ka sadaa behta rahe jharnaa
Jagg se hum chod dein darna kyunki
Aapke haathon mein hai jeena marna

Aapse hee yeh srishti Guruji
Aapse hee jeevan ka saaz
Aapse hee har mausam Guruji
Aapse hee hai yeh awaaz

Kripa keejiye ki Aapke gungaan mein zindagi beet jaaye
Aapke ashish se poori duniya mein sachchaayee jeet jaaye
Himmat se hum seh sakein har pal jo bhi padey sehna
Pyaare Guruji, Aap sadaa Apne har bhakt ke sangg rehna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 30, 2019

Om Namaha Shivaya
Aaj Ka Suvichaar 🙏🏻🙏🏻 # 619

              Guruji Kee Bandagi

Bahut waqt zaaya kar liya darr darr ke
Dekh le abb tu Guruji kee bandagi kar ke
Guruji jo aayein Hain teri zindagi mein
Anand leta chal tu abb Unkee bandagi mein

Dheeraj bandh jaayega pehle se bhi zyada
Jeevan dheere dheere bann-ne lagega saral aur saadaa
Tere karmon ko kumm karte huey tujhe sehensheelta Ve denge
Tere sabb kashton ka zimma Ve Apne par le lenge

Tu kewal Unhe sarv-samarpan kar ke chalta jaa
Unke sikhaaye huey taur tareekon mein tu dhalta jaa
Niyati ko dobaara likhne ka kartavya bhi Unka hai
Guru apne bhakt kee pukaar zaroor suntaa hai

Guruji kee bandagi mein adbhut shakti hai
Is bandagi mein basee prem bhari bhakti hai
Jo bhakt Guruji kee bandagi mein ramm jaata hai
Uske liye kasht bhi haar kar thamm jaata hai

Bandagi kar Guruji kee aur dridh karta jaa Unpar apna vishwaas
Poori na ho koi aas toh bilkul na ho tu niraash
Kalyaankaari hai Guruji kee aseem divya drishti
Tabhi toh kalyuga mein bhi chal rahi hai yeh poori srishti

Mastt ho jaa tu Guruji kee bandagi mein
Kuch aur sthir nahin hai zindagi mein
Unke prem se prerna lekar kar tu shradha aur sabar
Dekhna phir aasaan ho jaayega kaatna jeevan ka safar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 29, 2018

Om Namaha Shivaya
Aaj Ka Suvichaar🙏🏻🙏🏻 # 253

    MahaShiv Guruji Ke Naam Mein 

Kalyuga ka samay hai chal raha
Chhaaya hai ashaanti ka andhera
Maya ka tufaan kab thamega kaun jaane
Kab aayega shanti ka savera?

Laukik dhan ko sab kuch maankar
Insaan mein aa gaya hai kitna ahem
Apne ko shaktishaali dikhaane ke liye
Veh phailaaye andhvishwaas aur vehem

Dhan toh haathon kee mayl hai
Ek din raakh bann ke reh jaayegi
Keval karmon kee poonji hee
Insaan kee kahaani keh jaayegi

Aise haalaat mein mila hai jinhe Guruji ka sahaara
Unhe chhoo na paaye ashanti ka nazaara
Kyunki Guruji unhe bakshenge neevenpan ke sangg atmasammaan
Jis se unkee atma par na rahega kaleh kalesh ka naamo-nishaan

Kalyuga kee tez dhoop mein Guruji denge bhakton ko sheetal chhaaon
Zindagi kee raah par chalte chalte thakenge nahin sangat ke paaon
Hum toh tuchh praani hain aur Guruji hamaare daata
Hamaara uddhaar honei lagaa hai jab se juda hai Guruji se naata

Sabse anmol gehna sach mein hai Guruji ka naam
Isee naam ko japte rahein hum sab subah aur shaam
Phir kaisa darr, kaisi shankaa, buss yaad karein Guruji ko har kaam mein
Hamein toh Rabb mil jaayega MahaShiv Guruji ke naam mein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 29, 2019

Om Namaha Shivaya
Aaj Ka Suvichaar 🙏🏻🙏🏻 # 618

                          Aapse

Pyaare Guruji,

Himmat Aapse
Taakat bhi Aapse
Ijaazat Aapse
Ibadat bhi Aapse

Meher Aapse
Seher bhi Aapse
Rehmat Aapse
Sehmat bhi Aapse

Pyaar Aapse
Dulaar bhi Aapse
Mamta Aapse
Kshamtaa bhi Aapse

Shakti Aapse
Bhakti bhi Aapse
Dhyan Aapse
Gyan bhi Aapse

Mitrataa Aapse
Pavitrataa bhi Aapse
Kanti Aapse
Shanti bhi Aapse

Prassannataa Aapse
Sampannataa bhi Aapse
Yogyataa Aapse
Aarogyataa bhi Aapse

Janam Aapse
Maran bhi Aapse
Dukh haran Aapse
Mangal karan bhi Aapse

Shwaas Aapse
Vishwaas bhi Aapse
Yeh jaan Aapse
Yeh jahaan bhi Aapse

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 28, 2018

Om Namaha Shivaya
Aaj Ka Suvichaar 🙏🏻🙏🏻 # 252

       Guruji Sadaa Sahaay Hain

Dekhte Hain har pal humko
Jahaan bhi hum jaate hain
Jab bhi Unhe hum yaad karein
Ve ik pal mein aa jaate Hain

Kaise Guruji saare bhakton ka
Itna khayaal rakh lete Hain
Hamaare kashton ko kumm kar ke
Ve hamein chayn aur sukh dete Hain

Bhatak jaate hain hum jab bhi
Guruji sahi raah dikhaate Hain
Vikarmon se bachne ka tareeka
Ve yakeenan hamein sikhaate Hain

Guruji kahein nishchay buddhirakhein hum
Aur har mushkil mein dheeraj dharein
Hamein fikr karne kee zaroorat nahin
Kyunki Ve hamaare sab kasht harein

Nuksaan aur faayda dono hain kalyaankaari
Kyunki Guruji hamaare Hain mangalkaari
Unhe duur ka dikhta hai Apni divya drishti se
Tabhi toh dete Hain mukti hamein is srishti se

Bharosa Guruji par atoot hum rakhein
Na khaayein hum dar dar kee thokarein
Ab jo Guruji kee sharan mein jagah mil gayi hai
Toh sach mein hum sabki kismat khul gayi hai

Dil mein Guruji buss gaye Hain
Rooh mein bhi Ve samaay Hain
Datt kar mushkilon ka karein hum saamna
Kyunki Guruji sadaa sahaay hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 28, 2019

Om Namaha Shivaya
Aaj Ka Shukrana 🙏🏻🙏🏻 # 617

Ibadat Se Juda Hai Shukrana

Yeh ibadat ka hai afsaana
Is se juda hai Guruji ko shukrana
Ibadat ke liye bhi Shukrana
Ibadat mein bhi Shukrana

Har pal Shukrana Shukrana Shukrana
Is Shukrana mein jeevan hai bitaana
Chaahe lakh koshish kar le yeh zamaana
Shukrana ke bal par hai aagey badhte jaana

Shukrana ko kabhi bhi nahin hai bhulaana
Har pal swayam ko yeh yaad hai dilaana
Zindagi toh hai dukh aur sukh ka taraana
Har haalaat mein Shukrana ka geet hai gaana

Hamaare jeevan mein kitne loagon ne hai aana jaana
Sabke saath kisee tarehn ka laukik rishta hai nibhaana
Guruji, hamaare dil se har shaq, har niraasha ko hataana
Taaki hum tript mann se karein Aapka Shukrana

Guruji, itnee kripa hum par har kshan karte jaana
Ki Aapko Shukrana karne mein na padey kabhi katraana
Aapka Shukrana karte rehne ka kehna jisne maana
Usey toh sadaa hee meetha laagey Aapka bhaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 27, 2018

Om Namaha Shivaya
Aaj Ka Suvichaar 🙏🏻🙏🏻 # 251

               Agam Agochar Guru

Kar le tu sooryoday ko
Pyaar se bharaa pranaam
Sabse pehle Guruji ka shukrana kar
Phir karna baaki kaam

Paath sikhaa rahei Hain Guruji
Saadapan aur saraltaa ka
Apne ahem ko ab tu bande
Apne pairon taley masaltaa ja

Abb bhi samay hai
Tu Guruji kee baat maan ja
Ve tujhe sudhaar rahey Hain
Yeh tu abb toh jaan ja

Itna anmol jeevan diya hai Guruji ne
Har pal ko achche karmon mein lagaa
Saansaarik moh maya ke peechche
Na tu apne tann mann ko bhagaa

Jab tu jaan jaayega
Guru Naam ka mool
Uss pal sach mein dekhna
Baaki sab jaayega bhool

Bhool jaayega tu apna
Har dard, har dukh
Buss yaad rahega tujhe
Guru milan ka sukh

Is sukh mein hogi aisee tripti
Jo tujhe degi ek adbhut shakti
Teri niswaarth prem bhari bhakti
Tujhe dilaayegi shanti aur mukti

Abb bhi der nahin hui hai
Tu kar le simran shuru
Tujhe praapt hongei awashya
Tere agam agochar Guru

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 27, 2019

Om Namaha Shivaya
Aaj Ka Suvichaar 🙏🏻🙏🏻 # 616

           Diwali Ke Shubh Avsar Par 

Shukrana Guruji Aapka
Ki jeevan mein aayi ek aur Diwali
Asha ke deepak jal gaye
Aapki leela hai itnee niraali

Kripa keejiye Guruji humpar
Ki andhera mitey agyan ka
Vardaan deejiye hamein Guruji
Ki dil deewaana ho Aapke dhyan ka

Buddhi aisee deejiye Guruji
Ki timir khatm ho vikaaron ka
Karuna keejiye maalik hum sab par
Ki janm ho nek vichaaron ka

Ashirwaad deejiye Prabhu hum sabko
Ki Aapke naam ka karein simran
Aapke siwa koi nahin hum sabka
Isliye Aapka hee karein hum vandan

Karuna barsaayiye Apni humpar is kalyuga mein
Ki jeet jaaye sachchaayee
Har ghar mein har aangan mein
Khil jaaye achchaayee

Diwali ke sakaaratmak spandan se
Ashanti aur udaasi na rahei abb mann mein
Guruji, Aapke ashish se
Vriddhi ho ruhaaniyat ke dhan mein

Adhyaatmik unnati ke path par
Hamein kar deejiye agrasar
Is unnati ke ujaale kee tamanna hai
Diwali ke is shubh avsar par

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 26, 2018

Om Namaha Shivaya
Aaj Ka Suvichaar 🙏🏻🙏🏻 # 250

       Pyaar Hamaare Guruji Ka

Bahut hee pyaara hai pyaar hamaare Guruji ka
Dayaa se bharpoor hai dulaar Unka
Har galee har ghar har sheher mein
Naam goonjta hai baar baar Unka

Unkee kripa ke charchey
Duur duur takk hotey hain
Unke bharose hee toh bhakt
Chayn kee neend sotey hain

Kisee ko bakshtey Hain Ve zindagi
Kisee ko aarogyataa ka vardaan dete Hain
Samajhdaar aur agyakari hain ve loag
Jo Guruji kee baat maan lete hain

Zindagi baksh dete Hain Ve
Kayee janmon ke liye dete Hain taar
Nazariya badal dete Hain hamaara
Taaki hum sudhaar sakein apne vichaar

Nirogi kaaya ke pashchyaat
Aati hai baari laukik dhan kee
Guruji se kuch kehne kee zaroorat nahin
Kyunki Ve baat jaantey Hain mann kee

Hum gandey bartan ke jaise hain
Guruji hamein chamkaayein
Pehle bheetar se hamein saaf karein
Phir oopar kee mayl hataayein

Guruji chaahte Hain ki hum apni ‘mai’ ko mitaayein
Chalein hum uss raaste par jo Ve hamein dikhaayein
Vehem aur paakhand se duur rahein hum yeh Guruji hamein sikhaayein
Phir kyun hum apne Guru ke liye itna bhi na kar paayein?

Duniya kee tu-tu mai-mai se
Hum apne aap ko bachaayein
Guruji ke dikhaaye maarg par chal kar
Aao, dharti par swarg banaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 26, 2019

Om Namaha Shivaya
Aaj Ka Suvichaar 🙏🏻🙏🏻 # 615

           Aslee Aur Anmol Dhan

Guruji bakshein zindagi
Phir karein kaaya aur mann ko nirogi
Laukik dhan kee baari baad mein aaye
Samriddhi aur kushaltaa Guru kripa se hogi

Guruji se judkar yeh sab milega
Saath hee bhugtaan hoga karmon ka
Mann ko sadhna se milegi shanti
Bhar halka hoga kayee janmon ka

Mann kee shanti hai
Aslee aur sabse anmol dhan
Isee se haraa-bharaa hota hai
Sabke jeevan ka upvan

Mann kee shanti se hee miley
Atma- bal aur atma-vishwaas
Is shanti ko paane ke liye
Guru naam se seench le tu shwaas

Karta chal tu shradha se
Guruji ka vandan
Mehka le apne jeevan ko
Jaise mehke chandan

Is mehek se tujhe hota rahega
Guruji kee maujoodagi ka ehsaas
Aur Unke naam se jo shanti milegi
Uss-se aur bhi dridh hoga Unpar tera vishwaas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 25, 2018

Om Namaha Shivaya
Aaj Ka Suvichaar 🙏🏻🙏🏻 # 249

     Guruji Ko Tu Kar Baarambaar Namaskar

Guruji Om aur Onkar Hain
Ve suntey sabki pukaar Hain
Guruji dil mein basaa hua veh pyaar Hain
Jisne jeet liya saara sansaar hai

Guruji kee sharan mein shanti hai itnee
Unke noor mein kanti hai itnee
Guruji hakeekat Hain, koi sapna nahin
Unke siwa jagg mein koi bhi apna nahin

Guruji ne diya bhakton ko divya gyaan Hai
Poora karein Ve, jo bhi tere dil mein armaan hai
Guruji yaad dilaatey Hain ki maangna nahin
Andhvishwaas se tu swayam ko baandhna nahin

Guruji kahein tu karde Unko sab samarpan
Mushkil ka hal Ve nikaalenge, tu kar de sab kuch Unhe arpan
Guruji MahaShiv Hain, isme na hai koi shaq
Tujhe yakeenan dilaayenge Ve tere saare haq

Guruji basey Hain har bhakt ke shwaas mein
Lagaa reh tu Unhe khush karne ke prayaas mein
Guruji se hee aadi, Guruji se hee anant hai
Unkee mahima toh aprampaar aur be-antt hai

Guruji hee tere maalik aur tere huzoor hain
Unhe tere saare nakhde sehne manzoor hain
Guruji ka bhola bachchaa tu bann ja
Neevan aur dil ka sachchaa tu bann jaa

Guruji tera awashya karenge kalyaan
Unhee se hai tera astitva aur sammaan
Guruji mitaayenge tere jeevan ka andhkaar
Guruji ko tu kar baarambaar namaskaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 25, 2019

Om Namaha Shivaya
Aaj Ka Suvichaar # 614

        Unke Pyaar Ko Tu Le Jeet

Guruji ke charnon mein sab kuch haar kar
Unke pyaar ko tu le jeet
Poori srishti mein chaahe tu dhoond le
Na milega Unsa koi bhi meet

Haath thaama hai Unhonei tera
Tu sach mein hai khushnaseeb
Tu Unse duur bhi jaane lagega agar
Ve sadaa rahenge tere kareeb

Niraash hoga agar kabhi tu
Unke pyaar se uday hogi asha kee kiran
Bahut kripadhari Hain karunamayee Guruji
Sanvaar denge tera janam maran

Har tarehn ka anubhav apna mahatva rakhta hai
Tu Unkee sharan mein yeh bakhoobi jaanega
Jab kar dega tu Guruji ko poorna samarpan
Tera dil Guruji ke har hukm ko maanega

Tu ek kadam toh badhaa Unkee oar
Dekhna, Ve teri oar sau kadam badhaayenge
Jab uss paar jaane ka samay aayega
Ve tujhe goad mein bitha kar le jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 24, 2018

Om Namaha Shivaya
Aaj Ka Suvichaar 🙏🏻🙏🏻 # 248

                Zindagi Ka Safar

Zindagi ka safar avashya taiy hoga
Guruji kee hai badi meher
Raat ke andhere se kya darna
Aaney wali hai sundar seher

Raaste kee uljhanein sulajh jaayengi khud bakhud
Guruji kee bhakti mein itnee shakti jo hai
Doobne kee naubat kabhi na aayegee
Unkee daya ke saagar mein teri kashti jo hai

Zaroorat nahin hai tujhe ghabraane kee
Deri hai buss tere kadam uthaane kee
Guruji ko ek pal bhi tu na jaana bhool
Unkee leela se kaante bhi banenge phool

Shikaayatein karne ke bajaaye shukrana kiya kar
Sabki khushi kee dua karte huey tu jeeya kar
Guruji dekh rahei hain har pal teri neeyat
Chhupa le tu sabse par Ve jaante hain hakeekat

Unke bharose chod de tu zindagi kee naiya
Tu musaafir hai aur Guruji Hain tere khivaiya
Waqt kee nadee ke paar tujhe le jaana Unka kaam hai
Tujhe toh shradha se buss japna Unka naam hai

Dekhte hee dekhte samay beet jaayega
Apne har sangharsh mein tu jeet jaayega
Guruji se judey rishtey par kar le tu vishwaas
Tera haath thaamey huey sadaa hain Ve tere paas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 24, 2019

Om Namaha Shivaya
Aaj Ka Suvichaar 🙏🏻🙏🏻 # 613

Paa Lee Guruji Ke Naam Mein Veh Kamaayee

Paa lee Guruji ke naam mein veh kamaayee
Jo abhi takk har vele kaam hai aayee
Mujhe ummeed hee nahin, vishwaas hai
Ki isee kamaayee se bujhnee bhakti kee pyaas hai

Paa lee Guruji ke naam mein jeene kee raah
Paa lee Guruji ke naam mein sewa, simran, satsang kee chaah
Ek adbhut anand aane lagaa aradhana ka
Bahut meetha lagne lagaa har pal sadhna ka

Paa lee Guruji ke naam mein aisee kashish
Ki Unkee oar mai khichtee chali aayee
Zamaane kee karvee baatein abb na lagein mujhe vish
Yeh hai mere Guruji kee vadiyaayee

Paa lee Guruji ke naam mein aisee sheetalta
Ki shareer aur atma ke roag duur honei lagey
Bin maange hee poore honei lagey ve sapne
Jo thei kabhi choor honei lagey

Paa lee Guruji ke naam mein meet kee mitrataa
Paa lee Guruji ke naam mein aseem pavitrataa
Sambhaal liya Guruji ne sab kuch, dekar mamta aur dulaar
Mera toh uddhaar ho gaya, paakar Guruji ka pyaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 23, 2018

Om Namaha Shivaya
Aaj Ka Suvichaar 🙏🏻🙏🏻 # 247

     Mujhe Toh Mere Guruji Mein Bhagwaan Mil Gaya

Guruji ne kadam rakha ek leher par
Toh poora saagar tarr gaya
Bhog lagaaya Unhonei ek daane ka
Toh dekho bhandaara bhar gaya

Unke ek phool ko chhooney se
Saara aangan khil gaya
Unki ek prem bhari drishti se
Jahaan bhar ko pyaar mil gaya

Sabr karna sikhaaya Unhonei
Toh utaavlaapan usee kshan gaya
Kadam rakha ghar mein Guruji ne
Toh veh ghar mandir bann gaya

Unhonei jab aankh ka aansoo ponchhaa Toh gumm na jaane kidhar gaya
Unhonei sir par haath jab rakha
Toh yeh jeevan sanvar gaya

Guruji ne kaha, ‘kalyaan kitta’
Toh dil mein umang jaagee
Unhonei kaha, ‘aish kar’
Toh antar mann kee oar utsaah kee tarang bhaagee

Unke ashish se andheri raah par asha ke chirag jal gaye
Unke kehne par taare bhi mere sangg chal diye
Unkee muskaan mein phoolon ka gulistaan mil gaya
Mujhe toh mere Guruji mein Bhagwaan mil gaya

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 23, 2019

Om Namaha Shivaya
Aaj Ka Suvichaar 🙏🏻🙏🏻 # 612

Hawaayein De Rahi Hain Paigaam

Hawaayein de rahi hain paigaam
Ki Guruji aaye Hain tere sheher
Jo tere jeevan kee andheri raat thi
Veh bann gayee hai abb sunehri seher

Tu sunn is paigaam ko dhyan se
Yeh sushobhit hai Guruji ke gyan se
Uddhaar kar apna tu Guruji ke har daan se
Aur ramm jaa Guruji mein tu jee aur jaan se

Isee paigaam mein chhupa hai tera kalyaan
Yeh paigaam keh raha ki Guruji kee baat ko maan
Khokhli baaton par na de tu koi dhyan
Guruji kee mahima ka tu karta chal gungaan

Hawaaon ke is paigaam mein hai yeh sandesh
Ki Guruji Hain sampoorna srishti ke Sarvesh
Chaahe ho koi bhi gaaon, praant, ya desh
Veh swarg bann jaaye jabb Guruji karein pravesh

Phailaaney de in hawaaon ko tu Guruji kee mehek
Nakaaratmakta ke dabaav se tu na jaana behek
Jaise jaise teri antaratma tujhe Guru gyan sikhaayegi
Yeh hawaa tujhe Guruji takk pahunchne kee disha dikhaayegi

Magn hokar phir tu usee disha mein chalte jaana
Divyataa ke kshitij par sooraj kee bhanti dhalte jaana
Jitna jhukega, utna ruhaaniyat kee oonchaayee par tu pahunch jaayega
Uss madhur oonchaayee par pahunch kar tu bahut sukh paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 22, 2018

Om Namaha Shivaya
Aaj Ka Suvichaar 🙏🏻🙏🏻 # 246

           Hamaare pyaare Guruji 

Kabhi hon Unke swapn mein darshan
Kabhi ho Unka mann mein chintan
Kabhi ghar mehke jaise chandan
Har pal ho Unkee oar aakarshan
Buss Unhee ka karte rahein hum vandan

Unke saath kar sakein hum koi bhi baat
Ve jaagein hamaare liye din aur raat
Har kshan Hain Ve hamaare saath
Thaamey huey hamaara haath
Kehte Hain Ve karo gupt paath
Dete Hain Ve hamaare karam kaat

Ve suntei Hain hamaari kahaani dukhdaayee
Unka ashish hai bahut hee sukhdaayee
Unse humne itnee mamta hai paayee
Hamaare jeevan kee naiya Unhonei bachaayee
Yeh sach mein hai Unhee kee vadiaayee

Har pal dil mein hai basti Unkee hee tasveer
Kabhi muskuraate Hain kabhi dikhtey Hain gambheer
Unhee ke haathon mein hai hamaari taqdeer
Veh chaahein toh badal dein hamaare haath kee lakeer
Bachche hain hum Unke, phir kyun hum bann jaate hain fakeer?

Chaahte Hain Ve ki hum karein gupt daan
Dein hum ik dooje ko pyaar aur sammaan
Unke har vachan mein basaa hai divya gyan
Unhonei diya hai hamein jeevan ka vardaan
Unkee mahima toh hai atyant mahaan
Vahee toh Hain hamaare Bhagwaan

Unhe khush rakhna hee ho hamaara kaam
Chaahe ho subah ya chaahe ho shaam
Abb toh hamaara ekmaatra sahaara Unka naam
Unke naam bina ek pal bhi nahin aaraam
Sach mein, Guruji kee sharan mein hai abb Param Dhaam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 22, 2019

Om Namaha Shivaya
Aaj Ka Suvichaar 🙏🏻🙏🏻 # 611

            Sadhna Hai Tera Raasta

Sadhna hai tera raasta
Guruji Hain teri manzil
Phir yoon khade khade
Kya soch raha hai dil

Buss, tu Guruji ka dhyan kiye jaa
Apne jeevan ko changa anjaam diye jaa
Baaki zindagi sab toh dhool hai udtee hui
Ek parchhaayee hai tujhse mudtee hai

Sadhna se tu ho jaayega har dukh se bekhabar
Loagon kee baaton ka bhi na hoga tujhpar koi asar
Duniya ke tamaashe ko tu dekhega darshak bann kar
Guruji tere sangg hongei har pal rakshak bann kar

Haan, yeh sach hai ki karmon ka bhugtaan karna hai
Pichhle janmon ke kukarmon ka bhi jurmaana bharna hai
Par sadhna ke raaste par yeh kaam aasaan hai
Kyunki tere sangg tera Guru, tera Bhagwaan Hai

Tere karam kaat-te huey Guruji tera bhaar halka karenge
Teri sadhna se prasann hokar Ve teri jholi Apne pyaar se bharenge
Unka pyaar paakar tu srishti ka sabse dhanwaan insaan bann jaayega
Bharosa rakh, teri sadhna se zaroor yeh shubh din aayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja