Month: October 2019

October 11, 2018

Om Namaha Shivaya
Aaj Ka Suvichaar 🙏🏻🙏🏻 # 235

    Guruji Ko Banaa Lein Apna Meet

Hum sab kitne khushnaseeb hain
Kyunki hum Guruji ke itne kareeb hain
Par hum bahut hee ajeeb hain
Kyunki kehte apne ko gareeb hain

Asal dhan toh hai Guruji ka naam
Jitna japenge utna dhanwaan banenge
Agar hum karenge nishthaa se kaam
Toh bhalaa hamaara Bhagwaan karenge

Pehle toh hum maante nahin hain
Guruji ka hukm aur Unkee raai
Baad mein hum pachchtaatey hain
Aur phir hum karte hain ‘hai hai’

Guruji har pal sab kuch dekh rahein hain
Yeh sach sadaa yaad rahei hum sabko
Nyaay ka saath dein aur karam achche hon
Taaki pachchtaana na padey hamein kal ko

Jisne hamaare saath bura kiya
Karte chalein hum unko maaf
Jabb jaane kee bela aaye
Tabb dil ho hamaara bilkul saaf

Padaarthon kee bhaag daud ko chodkar
Rakhein hum shradha aur saboori
Oopari dikhaawon se muh moad kar
Karein Guru milan kee aas ko poori

Yeh heere moti paise kaam nahin aayenge
Laukik dhan hum saath lekar nahin jaayenge
Guruji ko toh hum keval tabb paayenge
Jabb hum sabb kuch haar ke aayenge

Vahee hogi hamaari sachchi jeet
Jabb Guruji se hogi sanchi preet
Chod dein abb har riwaaz har reet
Buss Guruji ko banaa lein apna meet

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 11, 2019

Om Namaha Shivaya
Aaj Ka Suvichaar 🙏🏻🙏🏻 # 600

                 Shukrana Karoon

Shukrana karoon har uss hawaa ke jhonke ka
Jo Guruji kee ruhaani khushboo lekar aata hai
Shukrana mere shareer ke har uss khoon ke katre ka
Jo Guru kripa se mujhe zindagi de paata hai

Shukrana karoon uss jal aur ann ka
Jismein Guruji ka ashirwaad milta hai
Shukrana mere dil ke darpan ka
Jismein Unka sowmya roop khilta hai

Shukrana karoon is maanav jeevan ka
Jismein Ve karam katvaa rahei Hain
Shukrana karmon ko katvaane ka
Is se Guruji mujhe Apne kareeb la rahei Hain

Shukrana karoon chaand, sooraj, aur taaron ka
Jinmein Guruji kee chhavi basti hai
Shukrana is dharti aur akash ka
Jinkee Guruji bin nahin koi hasti hai

Shukrana karoon har uss shaqs ka
Jisne kee hai mujhse bewafaai
Guruji ne haath thaam liya mera
Unkee divyataa se dhanya hui meri tanhaayee

Shukrana karoon har uss shaqs ka bhi
Jisne mera dil hai toda
Na jaante huey unhonei mujhe
Mere Guruji ke sangg aur bhi zyada joda

Shukrana karoon har uss insaan ka
Jisne mujhe dosti ka haath aur pyaar diya
Shukrana karoon har uss insaan ka bhi
Jisne kuch sikhaakar mera jeevan sanvaar diya

Shukrana karoon uss din ka uss pal ka
Jab jaan gayee ki Guruji se juda hai mera naata
Shukrana uss beete huey kal ka
Jisne mere saath safar hai kaata

Shukrana karoon unn sangaton ka
Jinhonei Guruji ke baare mein bataaya mujhe
Anantam Shukrana karoon mere pyaare Guruji ka
Jinhonei itne pyaar se apnaaya mujhe

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 10, 2018

Om Namaha Shivaya
Aaj Ka Suvichaar 🙏🏻🙏🏻 # 234

             Guruji Ka Nirmal Noor

Guruji ka nirmal noor andhere ko haraa deta hai
Guruji ka protsaahan utsaah ko badhaa deta hai
Guruji kee leela se paththar bhi moam hai bann jaata
Guruji ka prem bhakton ke mann mein hai samaata

Keh de Guruji ko tu apne dil kee baat
Ve na chodenge kabhi bhi tera saath
Unke liye tu sadaa bachcha hee rahega
Achchaa hoga agar tu sachchaa hee rahega

Ve sangg hain tere toh zaroorat nahin tujhe ghabraane kee
Unhe fikr hai teri har mushkil ke hal ko paaney kee
Aur kaun hai jo tera rakhega itna khayaal
Isliye tu na kiya kar Unse koi bhi sawaal

Karde apna dharam aur karam Guruji ko samarpan
Karde tu apna saara jeevan abb Unhee ko arpan
Guru naam ka geet tu har pal gaaye jaa
Guru ashish ke suman tu har pal paaye jaa

Jabb Guruji ka ho jaayega tera hriday
Hoga tere jeevan ke sooraj ka uday
Uss sooraj ke tej mein tu khil paayega
Uski roshni kee madad se Guruji ko mil paayega

Buss phir aur koi tamanna na reh jaayegi adhoori
Guru milan se hogi divyataa kee teri khoj poori
Chayn se is janam ko alvidaa tu keh paayega
Guruji kee jyot mein samaakar amar tu reh paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 10, 2019

Om Namaha Shivaya
Aaj Ka Suvichaar 🙏🏻🙏🏻# 599

 Aapke Ehsaanon Ka Karz

Pyaare Guruji,

Aapke ehsaanon ka karz adaa karoon toh karoon kaise
Mujhmein aisee kaabiliyat kahaan
Jahaan bhi Aapki maujoodgi ka ehsaas hota hai
Mera toh sir jhuk jaata hai vahaan

Aap mere dil mein Aap meri rooh mein
Is kadar buss gaye Hain spandan bannkar
Aksar jab Aapke dhyan mein hoti hoon
Aati hai Aapki ruhaani khushboo gulab aur chandan bannkar

Aapse hee hota hai maargdarshan mera
Aapse hee shaam hai aur Aapse hee savera
Chaahe pareshaaniyon ne daala hai jeevan mein dera
Khushi bhi nahin, aur gumm bhi nahin hai mera

Kyunki asal satya toh hai Aapke sangg naata
Aapse hee sanvarega mere karmon ka bhi khaata
Jeevan kee laukik yatra ka anubhav toh har koi hai paata
Lekin kewal Aapse judne mein sachcha sukh hai mere daata

Raas aaye mere Bhagwan mujhe ruhaaniyat kee gehraayee
Sewa aur simran se mitt jaaye jeevan kee tanhaayee
Aapne Apni mehar hameshaan hameshaan hai barsaayee
Yeh hai khushkismati meri aur hai Aapki vaddi vadiyaayee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 9, 2018

Om Namaha Shivaya
Aaj Ka Suvichaar 🙏🏻🙏🏻 # 233

Kyun Tu Dar Dar Phirta Hai Maara Maara

Mehsoos karne kee koshish jo karey
Vahee jaan sakta hai yeh ehsaas
Ki chaahe Guruji agochar hain
Veh Hain hamaare bilkul paas

Guruji jal ke pravaah mein Hain
Guruji is andekhi havaa mein Hain
Guruji ka ashish teri davaa mein hai
Guruji ka naam teri har dua mein hai

Guruji bagiya kee sundartaa mein Hain
Guruji har pushp kee komaltaa mein Hain
Guruji antar-mann kee namrataa mein Hain
Guruji vaani kee madhurtaa mein Hain

Guruji bhakton kee awaaz mein Hain
Guruji uss awaaz kee mithaas mein Hain
Guruji teri zindagi ke har saaz mein Hain
Guruji teri har shubh aas mein Hain

Guruji toh tere matwaale mann mein Hain
Guruji maujood kann kann mein Hain
Guruji dharti aur gagan mein Hain
Guruji shradha kee jyot kee agan mein Hain

Guruji teri bhakti aur vandan mein Hain
Guruji tere pyaar ke har bandhan mein Hain
Guruji tere subah aur shaam ke abhinandan mein Hain
Guruji tere aadhyaatmik spandan mein Hain

Dil mein utaar le sadaa ke liye tu Guruji kee tasveer ko
Sanvaar le hameshaan ke liye apni bigdee hui taqdeer ko
Guruji mein atoot vishwaas se hee tujhe shakti milegi
Guruji kee baat maanegaa toh hee is jeevan janjaal se mukti milegi

Guruji hee hain abb tera ekmaatra sahaara
Guruji bin abb toh na jeena ganvaara
Kyun tu dar dar phirta hai maara maara
Guruji mein paa le tu Brahmaand saara ka saara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 9, 2019

Om Namaha Shivaya
Aaj Ka Suvichaar 🙏🏻🙏🏻 # 598

              Aapki Nazar Ka Asar

Pyaare Guruji,

Kalyuga ke vash mein hai yeh saari srishti
Is srishti par kripa kar daaliye Apni karunamayee drishti
Hum patit praaniyon ko taar de Aapki mehre nazar
Hum bann jaayein paawan, aisa ho Aapki nazar ka asar

Har insaan par Apni kripa barsaayiye
Hamein sadhna ka mahatva samjhaayiye
Hamaare bheetar soyi hui chetna ko jagaayiye
Hamaare mann mein jhulasti hui vikaaron kee agni ko bujhaayiye

Aapki sharan mein zindagi jeene ka anand lein hum
Na khud ko aur na aur kisee ko hum dein koi gumm
Kisee ke kaam aa sakein toh isey apna saubhagya samjhein
Tuchh aur khokhle maamlon mein vyarth mein na uljhein

Swayam ko behtar insaan banaane kee koshish karein har pal
Badon se bhi aur chhoton se bhi kuch seekh paayein toh hai achchaa
Is baat ka dhyan rahey hamein aaj aur kal
Ki Aap sadaa jaante hain kaun jhootha hai aur kaun hai sachchaa

Aap se hee judee rahey ummeed hamaare kalyaan kee
Aapne hee thaami hai doar har bhakt kee jaan kee
Aapke ashirwaad bina yeh zindagi nahin hai kisee kaam kee
Aap mein basee hai chhavi har Bhagwaan kee

Aapki karuna se hee ho sakta hai uddhaar hamaara
Aap hee Hain hum naadaan shishyon ka sahaara
Aapke bina na jeena aur na marna ganvaara
Sach toh yeh hai ki Aapke bina ek pal bhi nahin hai guzaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 8, 2018

Om Namaha Shivaya
Aaj Ka Suvichaar 🙏🏻🙏🏻 # 232

Dhanya Hai Guruji, Aapki Vadiyaayee

Oopar dekhoon toh, Guru gyan ke saumya sitaare akash mein timtimaate hain
Saamne dekhoon toh, Guru gyan ke divya deep meri raah mein jaagmagaate hain
Aankhein moondoon, toh bandd nainon mein bhi Vahee samaate hain
Jidhar dekhti hoon, mujhe toh mere Guruji hee nazar aatey hain

Guruji hee mere maat pita hain
Guruji hee mere rakshak
Guruji hee mere meet hain
Aur Guruji hee mere shikshak

Jeevan toh bilkul neeras thaa
Bin bhakti, vishwaas, aur samarpan
Abb toh chehre par Guruji ka noor
Dikhta hai jabb dekhoon mai darpan

Sach mein, Guruji se oonchaa nahin koi naam
Guruji ke charan se divya na koi dham
Guru sewa aur simran se bada na koi kaam
Abb toh Guru naam bin nahin hai aaraam

Apni sharan mein rakhna mujhe daata tu sadaa
Subuddhi dena aisee, ki apna farz kar sakoon adaa
Aapne toh jeene kee raah hai dikhaayee
Dhanya hai Guruji, Aapki vadiaayee

Jeevan toh kshanbhangur hai, bharosa nahin aaj aur kal ka
Jabb Aapne apnaaya mujhe, shukrana karoon uss pal ka
Duniya ke darr se abb mai apne aap ko azaad karti hoon
Pyare Guruvar mere, is himmat ke liye mai Aapko dhanyawaad karti hoon

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 8, 2019

Om Namaha Shivaya
Aaj Ka Suvichaar 🙏🏻🙏🏻 # 597

        Guruji Ke Naam Ka Kavach

Jeevan par na padne dein hum jhooth kee parchhaayee
Mann ke mandir mein basaa lein hum sachchaayee
Dhyan rahey na vash mein karey hamein koi buraayee
Guruji khush hongei dekh kar hamaari achchaayee

Safar chhota ho ya lamba, shuru karne ke liye badhaana padta hai kadam
Kahaani jaisi bhi ho, kaagaz par likhne ke liye chahiye kalam
Zindagi ke jis bhi moad par jaayein, karte hain hum kayee karam
Isliye Guruji ko na bhoolne kee khaayein hum kasam

Guruji ke naam ka kavach jo humne pehna hai
Veh hamaara sabse anmol gehna hai
Ab humne jo bhi kuch sehna hai
Is naam se ab judey rehna hai

Guruji ka naam hee bhakti hai
Guruji ke naam mein shakti hai
Guruji ke naam se miley mukti hai
Guru naam se miley mann ko tripti hai

Guru naam ke teer se vikaaron ka asur mar jaaye
Guruji ka naam japne se dil mein sukoon bhar jaaye
Guruji ka naam banaa dega bhakt ko sadgunon ka farishta
Abb bhi kuch nahin bigda hai, mazboot kar lein Guruji ke sangg rishta

Har lamha jab beetega Guruji kee yaad mein
Aur shukrana hee shukrana hoga har fariyaad mein
Guruji ke dhyan mein ramm jaayenge praan
Unhee se shuru aur Unhee se poora hoga phir har armaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 7, 2018

Om Namaha Shivaya
Aaj Ka Suvichaar 🙏🏻🙏🏻 # 231

        Ek Din Aisa Zaroor Aayega

Guruji ke pyaar kee khushboo se apne raaste ko mehekte dekh tu
Guruji ke gyaan kee roshni se apni raahon ko ujjwal hotei dekh tu
Bahut thakk gaya hai tu duniya ke tamashe se
Abb Guruji kee bhakti se shakti paakar dekh tu

Chhoti chhoti baatein jo tujhe thein bahut sataati
Unse na tu hoga pehle jitna pareshaan
Duniyawaalon ke taane jo tujhe chaunkaa dete thei
Unse na tu hoga pehle jitna hairaan

Jaise jaise apni ruhaani raahon par tu aagey badhega
Tera aur bhi dridh ho jaayega atma-vishwaas
Jaise jaise tu sewa aur Guruji ka simran karega
Tera aur bhi sthir ho jaayega Guruji par vishwaas

Guruji haath thaamei rahenge tera, aur tu chalta jaayega
Niraasha ka andhera mitegaa, asha ka savera aayega
Unkee madad se yakeenan tu apna lakshya paayega
Tera Guru teri kismat phir se likhkar tujhe safalta dilaayega

Uth, jaag musaafir
Guruji mein lagaa abb dhyan
Ek Vahee hain jo tujhe denge
Zindagi jeene ka gyan

Ve jaante hain tera bhalaa kismein hai
Isliye tu Unse kuch bhi maangna nahin
Unpar befikr hokar sab kuch chod dey
Jo Ve karenge tere liye hoga sahee

Dekh lena, ek din aisa zaroor aayega
Guruji ka noor tujhpar chhaayega
Tu Guruji mein magnho jaayega
Aur har pal Unkee mahima gaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 7, 2019

Om Namaha Shivaya
Aaj Ka Suvichaar 🙏🏻🙏🏻 # 596

                Saadar Pranaam

Guruji Aapko hamaara saadar pranaam
Aap takk pahunchaane wale raaste ko salaam
Aapne diya hai Apne naam ka jo daan
Khushnaseeb hain paakar hum yeh vardaan

Kripa kar hamein deejiye ruhaani gyan
Vehem mein rehkar na banein hum naadaan
Apni khaamiyon se bhi hain hum anjaan
Aapke dwara hee hoga hamaara kalyaan

Na prabhaavit karey hamein laukik saamaan
Na andha karey hamein kabhi jhoothi shaan
Na dhoondhtey rahein hum Aapki maujoodgi ka pramaan
Aapke ashirwaad ke dhan se banein dhanwaan

Kaayam rahei hamaara atma-sammaan
Doojon ka bhi karein hum sammaan
Aap mein lagaa rahei hamaara dhyan
Aap mein hee ramm jaayein praan

Sadaa rakhein hum Aapka maan
Kyunki Aap hee hamaare Bhagwaan
Ab jo hamein hai is baat ka gyan
Har mushkil ka hal hai Guru naam ka baan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 6, 2018

Om Namaha Shivaya
Aaj Ka Suvichaar 🙏🏻🙏🏻 # 230

Guruji, Abb Aur Hum Kya Maangein Aapse

Jabb bhi girey hum, Aapne uthaaya
Ghaav par hamaare marham lagaaya
Hum mein naya utsah jagaaya
Guruji, abb aur hum kya maangein Aapse

Jabb bhi zindagi mein milee niraasha
Aapne bandhaayi hamein nayee asha
Aur hum seh sakey duniya ka tamaasha
Guruji, abb aur hum kya maangein Aapse

Apnon ne jabb chod diya saath
Aapne hee thaama hamaara haath
Aap hee hain mata, Aap hee hain naath
Guruji, abb aur hum kya maangein Aapse

Hameshaan sunein Aap hamaari fariyaad
Chaahe hamein khud ko na rahey yaad
Har pal hamein dete hain ashirwaad
Guruji, abb aur hum kya maangein Aapse

Patit hain hum, Aapne Apna paawan naam diya
Hamaari har zaroorat ka Aapne intazaam kiya
Hamaare har sangharsh ko achchaa anjaam diya
Guruji, abb aur hum kya maangein Aapse

Hamaare roag aur kasht Aapne har liye
Jeevan ke din khushiyon se bhar diye
Hamein aagey badhne ke avsar diye
Guruji, abb aur hum kya maangein Aapse

Zindagi hamaari Aapne sanvaar dee
Buree aadatein kayion kee sudhaar dee
Khushiyaan deein hamein har prakaar kee
Guruji, abb aur hum kya maangein Aapse

Bhatkey huey thei hum Aapne raasta dikhaaya
Zindagi se haar chukey thei hum, Aapne jeena sikhaaya
Vehem aur ahem mein phanse thei, Aapne andhkaar mitaaya
Guruji, abb aur hum kya maangein Aapse

Humko sadaa ke liye sharan mein liya Aapne
Hamein niswaarth prem hai diya Aapne
Hamaare liye kya kya nahin kiya Aapne
Guruji, abb aur hum kya maangein Aapse

Jo bhi chaaha humne, uss-se kaheen zyada diya Aapne
Hamein apnaa kar hamaari raksha ka vaada kiya Aapne
Jabb dil mein tuchh khayaal aaya, nek hamaara iraada kiya Aapne
Guruji, abb aur hum kya maangein Aapse

Hameshaan hamaara itna dhyan kiya Aapne
Hamaara har dukh har dard liya Aapne
Bin maangey hee sabb de diya Aapne
Guruji, abb aur hum kya maangein Aapse

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 6, 2019

Om Namaha Shivaya
Aaj Ka Suvichaar 🙏🏻🙏🏻 # 595

                        Simran Se

Jab Guruji se ho jaaye pyaar
Aur Guru milan ka ho intazaar
Bhari bheed mein lagta nahin hai dil
Sooni lagne lagti hai har mehfil

Lekin phir Guruji yaad dilaatey Hain
Ki har lamha unka diya hua uphaar hai
Aur har pal ko achchee tarehn se jeena hai
Kyunki hum par hamaare karmon ka udhaar hai

Isliye chaahe vyast hon kisee kaam mein
Ya mehfooz hon aaraam mein
Sadaa magn rahein Guruji ke naam mein
Simran karein har subah har shaam mein

Simran har pal karne se
Guruji dil mein basey rahenge
Guruji ke angg sangg honei se
Hum har haalaat sahenge

Isliye na zaaya karein ek bhi pal
Simran hee hai vireh ka hal
Simran se Guruji kee maujoodgi ka ehsaas rahega barkaraar
Aur simran se bhari bheed mein bhi hota rahega Guruji se deedar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Simran Se (10/06/2019)

October 5, 2018

Om Namaha Shivaya
Aaj Ka Suvichaar 🙏🏻🙏🏻 # 229

             Jeev Rachna Ka Chakr

Jeev rachna ka chakr toh nirantar chalta rehta hai
Jaise prakriti ka jharna jhar jhar kar ke behta hai
Janm aur mrityu ke chakrvyu ke chakkar ko sehta hai
Aur anaadi kaal takk sanaatan kahaani yeh kehta hai

Hum sabb is jeevan chakr mein abhineta bann ke aaye hain
Kayee dikhte apne hain aur kayee dikhte paraaye hain
Sabki zindagi mein kuch khushiyan hain aur kuch gumm ke saaye hain
Lekin khush-kismati se Guruji hamaare Bhagwaan bann ke aaye hain

Jeevan ka naatak jabb shuru hua, toh satyuga ka sukh thaa chhaaya
Har insaan ke dil mein keval pyaar hee pyaar thaa samaaya
Iske baad tretayuga saasaarik aakarshan le kar aaya
Dwaaparyuga mein toh insaan ne apna imaan takk ganvaaya

Phir aaya kalyuga ka samay, jo abb bhi jaari hai
Buree aur anuchit soch kee phayl rahee beemaari hai
Hum bhagyashaali hain ki Guruji ne baah thaami hamaari hai
MahaShiv Guruji kee leela sach mein bahut hee nyaari hai

Vahee toh taarenge hum sabko aur karenge beda paar
Unhonei hee toh kasht hamaare taale hain baar baar
Antaryaami hain Guruji aur Unkee Mahima hai aprampaar
Hum sab hain Unke bachche aur Ve hamaare paalanhaar

Pehle Ve zindagi bakshein phir karein nirogi kaaya
Ehsaas dilaate hain Ve ki bekaar hai yeh moh maya
Unkee kripa se na daraa sakega hamein pareshaaniyon ka saaya
Vahee hamaare sab kuch hain, Unhonei yeh ehsaas hamein dilaaya

Guruji kee sharan mein hain hum kyun na Unkee baat lein maan
Na dhoondhein oopari dikhaawe aur fareb mein hum apni shaan
Guruji ne diya hai hamein bhakti aur adhyaatmik shakti ka gyan
Badi achchee kismat hai hamaari, jo humne paaya hai Unse yeh Vardaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 5, 2019

Om Namaha Shivaya
Aaj Ka Suvichaar 🙏🏻🙏🏻 # 594

     Guruji Tere Saath Hain Har Ghadi

Guruji se kalam ko chheen-ne kee koshish na kar
Guruji teri zindagi kee kahaani har pal likh rahei Hain
Raaste mein aane wali mushkilon se na dar
Guruji sab jaante Hain, chaahe Ve khaamosh dikh rahei Hain

Kshanbhangur hai har museebat
Chaahe aisa lagta nahin hai
Uss dauraan bhi Guruji ke hukm se
Jo ho raha hai vahee sahi hai

Tujhe toh shaayad yaad hee nahin
Tere pichhle karmon kee kahaani
In karmon ka bhi bhugtaan karaa rahein hain Guruji
Sanvaar rahein hain teri zindagaani

Agar tujhe lagta hai kisee bhi kaaran se
Ki Guruji na dekhein tere santaap ko
Toh dekh le unhei jo tujhse zyada dukhi hain
Aur samjhaa le tu apne aap ko

Guruji ko tere har kasht ka gyan hai
Chaahe veh bada ho ya chhota
Guruji kee sharan mein na hota tu
Toh tera haal aur bhi bura hota

Isliye dil mein jalaaye rakh vishwaas ka deep
Yakeen kar ki Guruji hain tere bilkul sameep
Aur Unke ashirwaad se museebat ka kar le tu saamna
Kyunki Unhonei hee tujhe har pal hai sambhaalna

Zaroori hai Guruji par bharosa aur Unse niswaarth prem karna
Na duniya waalon ke peechche bhaag aur chod de ab tu darna
Teri antaratma mein Guruji kee shakti hai bhari
Aur Parwardigaar Guruji tere saath hain har ghadi

Mamta kee siyaahi bhar kar Apne divya kalam mein
Guruji atma-vishwaas daal denge tere har kadam mein
Taaki tu zindagi kee kahaani mein changaa kirdaar nibhaayega
Aur phir tera Guru tujhe sachkhand ka dwaar dikhaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 4, 2018

Om Namaha Shivaya
Aaj Ka Suvichaar 🙏🏻🙏🏻 # 228

        Guruji Ko Hum Par Garv Ho

Chaahe kabhi kabhi yeh yaatra lagtee hai dukhdaayee
Phir samajh mein aata hai ki asal mein hai yeh sukhdaayee
Kyunki jo hamein lagta hai nuksaan
Veh asal mein hota hai hamaara imtehaan

Guruji hee hamein sambhaaltey hain
Bhakton kee buree aadatein sudhaarte hain
Hamaara bhavishya sanvaarte hain
Aur har pal hamein Ve taarte hain

Unhonei agar haath na thaama hota hamaara
Toh is jagg mein hamaara nahin thaa guzaara
Guruji ne jo banaaya hamein Apni aankhon ka taara
Toh humne saump diya Unko yeh jeevan saara

Raah mein jo aayein kasht, toh Guruji dete hain hamein himmat
Museebaton se ladne kee Guruji hamein dete hain taakat
Jo karne kee hamaari aukat nahin, uss kaam ke liye dete hain kaabiliyat
Aur anaaya ke khilaaf awaaz uthaane kee Veh dete hain ijaazat

Aur kisee se nahin, keval Guruji se darein hum
Kyun irshya, jhooth, aur paakhand kee aag mein jalein hum?
Jis kaam se Guruji khush na hongei, ve kabhi bhi na karein hum
Guruji kee dikhaayee raah par chalein, aur sadaa Unse prem karein hum

Kyun na hum apne taur tareeke badal paayein?
Saral rakhein jeevan, kyun isey uljhaayein?
Pehle kya kamm hain, jo aur vikarma badhaayein
Guruji kee kripa se kyun na apne ko adhogati se bachaayein

Aadatein sudhaarenge, tabhi toh hogi hamaari adhyaatmik unnati
Guruji ke bataaye maarg par chalne se hee hogi pragati
Phir kyun vilambh mein samay ko vyarth ganvaayein
Guruji ko hum par garv ho, kyun na hum aise bann jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 4, 2019

Om Namaha Shivaya
Aaj Ka Suvichaar 🙏🏻🙏🏻 # 593

               Srishti Mein Aman

Jo hum har kisee ko de sakte hain
Kya hai veh anmol uphaar?
Na zaroorat hai kisee mauke kee
Aur chaahe na ho koi tyohaar?

Na kharch hoga koi laukik dhan
Na udaas hoga jis-se apna mann
Dooje ka bhi sanvar jaayega jeevan
Aur hamaara na vyarth hoga ek bhi kshan

Na hai veh tohfa paisa
Na hai veh paise ke jaisa
Na hai veh anmol ratan
Jiske liye karna padey koi jatan

Guruji bhi humse prasann hongei
Agar hum denge kisee ko veh uphaar
Guruji phir hum par barsaayenge
Apna dhed saara ashirwaad aur pyaar

Yeh tohfa hai shubhkaamna ka
Jo hum yakeenan sabko de sakte hain
Yeh tohfa itna haseen hai
Isey dekar hum bhi bheetar se jagte hain

Jab hum doojon ke liye chaahenge achchaa
Aur hamaara iraada hoga nek aur sachchaa
Toh Guruji hamaara bhi bhalaa karenge zaroor
Chaahe hum hon jitne bhi bebas aur majboor

Hum doojon ko denge jab shubhkaamnayein
Toh Guruji hamein denge dugna ashirwaad
Yahee hamaare jeevan ko sanvaarega
Bannkar bahumoolya prasad

Doojey ka bhi bhalaa ho jaayega
Hamaara bhi uddhaar ho paayega
Yeh sakaaraatamak vichaar aur vyavhaar
Srishti mein aman phailaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 3, 2018

Om Namaha Shivaya
Aaj Ka Suvichaar 🙏🏻🙏🏻 # 227

            Tu Pareshaan Na Ho

Guruji ne thaama hai tera haath
Guruji hain har kadam par tere saath
Isliye tu pareshaan na ho

Ghabraane kee nahin hai koi bhi baat
Purnima bann jaayegi amaavas kee raat
Aye bande, tu pareshaan na ho

Guruji denge tujhe suraksha aur sahara
Veh aate hain jabb bhi tooney hai Unhe pukaara
Buss phir, tu pareshaan na ho

Guruji tere achche bure ko jaanein
Guruji tere dil ke pyaar ko pehchaanein
Isliye tu pareshaan na ho

Duniya waalon ne dhokha diya toh kya hua
Tu phir bhi unhe apne dil se dete jaa dua
Buss tu pareshaan na ho

Tere apne bann gaye jo loag tere sukh mein
Vahee muh moad lenge tujhse tere dukh mein
Par tu pareshaan na ho

Sabko apni karni ka phal milta hai zaroor
Na jaane kyun duniya waalon mein aa jaata hai guroor
Lekin tu pareshaan na ho

Dheeraj dhar, rakh tu utsah aur vishwaas
Samay ke saath saath Guruji poori karenge teri aas
Isliye tu pareshaan na ho

Neembu kee tarehn Veh tujhe nichodenge
Par kabhi bhi tujhse muh na modenge
Buss tu pareshaan na ho

Aatmik bal badhaa tu kar ke sewa aur simran
Sarvasamarpan kar ke tu har pal paa le Unke darshan
Taaki phir tu kabhi bhi pareshaan na ho

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 3, 2019

Om Namaha Shivaya
Aaj Ka Suvichaar 🙏🏻🙏🏻 # 592

               Aye Mere Mannva

Aye mere mannva vahee karna jo Guru tujhe bataay
Chaahe jo bhi ho jaaye Guruji sadaa tero sahaay
Koi bhi na kar sakey Guruji karein vo upaay
Buss, tu sadaa japte hee rahiyo Om Namaha Shivaya

Guruji ke hotei huey koi tero baal na baanka kar paaye
Tere oopar barasti museebat kee varsha bhi amrit bann jaaye
Tere dil kee pukaar Guruji takk zaroor pahunch jaaye
Teri har ek soch ka tere Guruji ko gyan ho jaaye

Guruji par bharosa karne se tero har sankat tal jaaye
Guruji kee jyotirmayee kanti se tohe bhi bal aaye
Guruji kee kripa se nakaaraatamakta khud hee jal jaaye
Zindagi mein khushi aaj nahin toh kal zaroor aaye

Guru chaahe hamein vilambh ka kaaran nahin bataay
Phir bhi kabhi bhi na hamein chodein asahaay
Guruji haath thaamein tera beech majdhaar chodne ke bajaay
Antt mein Guru hee achche se beda paar karaaye

Jo tu har pal Guruji kee mahima ko gaaye
Aur sadaa Unko apna dukh dard bataay
Guru teri har museebat ko bhagaay
Aur hameshaan teri raksha ke liye aaye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 2, 2018

Om Namaha Shivaya
Aaj Ka Suvichaar 🙏🏻🙏🏻 # 226

       Mera Guru Mujhe Sambhaale

Guru naam ke bina meri koi shwaas na ho
Mann ko mai kahoon ki veh udaas na ho
Aisa koi pal nahin jabb Guruji mere paas na hon
Mere jeevan mein Unse zyada koi bhi aur khaas na ho

Shukrana karte huey shuru hota hai mera toh har savera
Guruji ka naam lete huey beet jaata hai din mera
Jabb bhi pareshaani daalne lagti hai dil mein dera
Toh keh deti hoon usey ki yahaan koi kaam nahin hai tera

Sandhya ke akash par jabb chhaati hai divya laali
Pancchhee ghonsle mein aakar jhukaatey hain ped kee daali
Din ka shukrana karte huey mehsoos karti hoon mai khush-haali
Sajaati hoon phir bahut pyaar se pooja kee mai thaali

Jyot jalaati hoon pyaare Guruji ke naam kee
Mann hee mann nihaarti hoon chhavi apne Bhagwaan kee
Unse baatein karti hoon apne har armaan kee
Jaantee hoon ki Unhe bahut parvaah hai meri jaan kee

Guruji ke mandir mein baith kar shabad kee sunti vaani
Dil ko bahut shanti milti sunkar yeh gurbani
Guruji ne bhakton kee toh badal hee dee hai zindagaani
Bhakton ke liye Unhonei dee hogi kitni baar qurbaani

Abb jo kar dee hai mainey apni zindagi Guruji ke havaale
Toh chalchitr ki tarhen lagte hain jeevan ke khel niraale
Chaahe taqdeer mujhe kitni bhi baar aazmaale
Mera Guru bahut prem se har pal mujhe sambhaale

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 2, 2019

Om Namaha Shivaya
Aaj Ka Suvichaar 🙏🏻🙏🏻 # 591

             Is Daas Ka Shukrana

Pyaare Guruji,

Zindagi jeena sikhaane ka shukrana
Duniya kee asliyat dikhaane ka shukrana
Khushi dekar gumm ko mitaane ka shukrana
Hum par beintehaa pyaar lutaane ka shukrana

Is dil aur jaan ka shukrana
Aapke diye huey gyan ka shukrana
Is bhakti ke daan ka shukrana
Aapki sharan ke vardaan ka shukrana

Hamein kabhi na thukraane ka shukrana
Hamein kabhi na bisraane ka shukrana
Raaste ko hee manzil banaane ka shukrana
Mann ko mandir banaane ka shukrana

Jo bhi Aapne diya ya nahin, uska shukrana
Zyada aur kumm ka shukrana
Jiskee vajeh se hum karein ardaas
Aapko uss gumm ka shukrana

Din raat ke har pal ka shukrana
Kal, aaj, aur kal ka shukrana
Har tarehn kee halchal ka shukrana
Atma-vishwaas aur atma-bal ka shukrana

Is shukrana bharey shwaas ka shukrana
Aapko paane kee aas ka shukrana
Aapki maujoodgi ke ehsaas ka shukrana
Aapke charnon mein Aapke is daas ka shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja