Month: November 2019

November 10, 2018

Om Namaha Shivaya
Aaj Ka Suvichaar 🙏🏻🙏🏻 # 265

                  Kalyaan Hamaara

Kshamaa yaachna kar lein
Hum apne burey karmon kee
Subudhi kee chhaaon mein aayein
Vikarmon kee agni mein na jal jaayein

Samay ka sadupyog karein hum
Mann ko simran mein lagaayein
Niswaarth bhaav ko jaagrit karein
Aur sewa mein lagg jaayein

Waqt toh paani ke budbudey ke jaise
Dekhte hee dekhte beet jaayega
Hum vaheen reh jaayenge
Aur waqt aagey nikal jaayega

Simran aur sewa se hee shaanti milegi
Varna mann bhataktaa reh jaayega
Simran aur sewa se hee shakti milegi
Taaki mann kasht aur peeda seh paayega

Antaraatma bahut shaktishaali hai
Phir kyun isey ksheen hum banaayein
Divyaswaroop hai yeh toh
Phir kyun hum isey moh maya mein phansaayein

Ab bhi samay hai Satsang mein dhyan lagaayein
Na hum vyarth kee baaton mein yoon hee samay ganvaayein
Guruji hamaare kalyaan ke liye hamein sewa simran ka paath padhayein
Veh kahein hum sarvsamarpan kar ke Satsang se jud jaayein

Guruji kee baat maan lene mein hee hai kalyaan hamaara
Guruji hee Hain hum sabka ekmaatra sahaara
Khud bhi jeeyein aur doosron ko bhi jeeney dein hum
Guruji se judne ka nirmal anand lein hum

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 10, 2019

Om Namaha Shivaya
Aaj Ka Suvichaar 🙏🏻🙏🏻 # 630

              Jeevan Kee Gaadi

Guruji kee banaayee jeevan kee gaadi mein
Vishwaas ka eendhan bharte chalo
Jaise jaise Ve ghumaayein pahiye
Is yaatra mein sayr karte chalo

Raaste mein jab kabhi bhi
Moad koi aayenge
Guruji chalaa rahein Hain gaadi
Ve hee moad par mudvaayenge

Ek pahiya sewa ka
Dooja pahiya hai simran
Teesra pahiya satsang hai
Aur chautha pahiya samarpan

Sab pahiyon ka mahatva hai
Saare hee anivaarya hain
Jeevan kee gaadi mein safar karte huey
Inhee se safal hotei sab kaarya hain

Kabhi kabhi toh safar hoga haseen
Aur lagega sab kuch aasaan
Lekin agar aisa na ho kabhi toh bhi niraash na hona
Kyunki saath mein hain Bhagwaan

Kashton ke pathar aayenge raaste par
Toh ho sakta hai gaadi ladkhadaayegi
Lekin pahiye aur eendhan salaamat hongei toh
Guruji kee kripa se gaadi aagey badh paayegi

Guruji kee banaayee is gaadi ke kann kann mein
Guruji ne baksha hai oorjaamayee shwaas
Ismein baithey ho toh jagaa lo dil mein
Shradha aur niswaarth prem ka ehsaas

Jeevan ke is ruhaani safar mein
Guruji karam katvaayenge
Ve hee maargdarshak Hain aur Ve hee sanchaalak
Tumhaari gaadi ko awashya manzil takk le jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 9, 2018

Om Namaha Shivaya
Aaj Ka Suvichaar 🙏🏻🙏🏻 # 264

 Guruji Divya Gulaab Ka Phool Hain

Guruji divya gulaab ka phool Hain
Hum sab hain Unkee pankhudiyaan
Unse judey hain toh hum surakshit hain
Alagg hokar hamaara astitva kahaan

Guruji kee ruhaani khushboo
Hum mein bhi samaa jaati hai
Unke mulaayam spandan se
Hum mein bhi komaltaa aati hai

Apni har pankhudi ko Guruji
Apne prem se sanvaarte rehte Hain
Girne vaali pankhudiyon ko bhi
Bade sneh se taartey rehte Hain

Bichad gaye kabhi hum Unse
Toh hum bilkul murjhaa jaayenge
Unka pyaar na mila agar
Toh hum kaise jee paayenge

Isliye guzaarish hai Aapse Guruji
Ki Apne se jodey rakhna sadaa hamein
Aapne hee toh sikhaayee hai
Muskuraaney kee yeh adaa hamein

Zaroorat na hogi kisee aur sahaare kee
Agar Aapka pyaar milta rahega
Aapke ashirwaad se har pal
Hamaara ruhaani roop khilta rahega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 9, 2019

Om Namaha Shivaya
Aaj Ka Suvichaar 🙏🏻🙏🏻 # 629

    Guruji Ne Dhoond Liya Mujhko

Asha toot chuki thee
Ummeed chhoot chuki thee
Zamaane kee aandhi se ud gaye hosh
Lagaa jaise kismat ka hai dosh

Phir Guruji ne dhoond liya mujhko
Aur badi mamta se Apne aanchal mein sanjoyaa
Mainey Unke simran kee mala mein
Apni masoom bhakti ka moti pirohya

Kahaan se kahaan le jaayega yeh ruhaani safar
Mujhe toh bilkul bhi nahin hai khabar
Haan, yeh zaroor honei lagaa hai ehsaas
Ki Guruji ke sangg safar mein hai baat bahut khaas

Karmon ko katwaana kiya hai Unhonei shuru
Adhiktar bhaar uthaane lagey Hain mere Guru
Jo thoda bahut mujhe jhelna hota hai
Veh bhi Unkee nigraani mein hota hai

Isliye surakshit hoon har prakaar se
Guruji sambhaalte Hain bahut pyaar se
Har pal Guruji kee mujhpar hai nazar
Har pal Unkee Mamta ka ho raha hai asar

Unpar sab kuch chod dene mein hee bhalaayee hai
Ve toh parampita Hain, Unkee vaddi vadiyaayee hai
Guruji, kripa kar sewa, simran, aur satsang mein beet jaaye abb yeh zindagi
Dua hai Aapse ki mann ko shanti miltee rahe kar ke Aapki bandagi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 8, 2018

Om Namaha Shivaya
Aaj Ka Suvichaar 🙏🏻🙏🏻 # 263

      Duniya Ke Is Rangmanch Par

Kisee kisee ke naseeb mein
Agley din ka sooraj dekhna nahin hota
Isee pareshaani se kayee raatein
Uss insaan ka pariwaar nahin sota

Koi bhookh aur paise kee tadap mein
Daane daane ko taras jaata hai
Toh kisee kee kismat mein ann aur dhan
Baarish kee tarehn baras jaata hai

Khuda kee dee hui aankhein laajawaab hain
Lekin yahaan bhi toh karmon ka hisaab hai
Kisee badnaseeb ko nazar nahin aata
Toh koi aur jhooth fareb dekhne se nahin ghabraata

Duniya ke is rangmanch par
Aise udaaharan hain itne saare
Kaise sabka jeevan chal raha hai
Pichhle karmon ke sahaare

Beete huey karam jo huey so huey
Lekin aaj ke karam hain hamaare vash mein
Shaayad dil saaf aur neeyat sachchi ho
Toh na khaani padein hamein jhoothi kasmein

Bahut khushkismat hain hum sab
Jo Guruji kee sharan mein aayein hain
Unhee kee kripa aur karuna se
Hum ne saare sukh paaye hain

Ye saansein, ye shareer aur is shareer mein jaan
Ye sab hai Guruji ka diya hua vardaan
Shukrana karte chalein toh hee rahega
Zindagi ka yeh safar zyada aasaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 8, 2019

Om Namaha Shivaya
Aaj Ka Suvichaar 🙏🏻🙏🏻 # 628

Mann Mandir Ke Mahadev

Guruji hamaare har vichaar mein basey Hain
Ve hamein har pal rahein Hain dekh
Guruji hamaare iraade mein basey Hain
Toh phir aao apne iraade rakhein hum nek

Guruji basey Hain hamaare har karam mein
Isliye kyun na apna har karam ho achchaayee ka
Guruji hamaare dharam mein Hain
Toh aao hum tum dharam rakhein sachchaayee ka

Guruji aapsi pyaar mein Hain
Guruji sur mein aur sangeet mein Hain
Guruji insaaniyat ke riwaaz mein Hain
Guruji sachchaayee kee reet mein Hain

Guruji basey Hain shudh bhavna mein
Guruji basey Hain nek kaamna mein
Guruji basey Hain tere dil mein
Guruji basey Hain mere dil mein

Guruji neevenpan kee neev mein Hain
Guruji saraltaa mein Hain
Guruji shukraguzaar ke shukrana mein Hain
Guruji komalta aur taraltaa mein Hain

Guruji ka ashish har ann ke daane mein Hain
Guruji ka prem har bhakt ke gaane mein Hain
Devon ke bhi Dev Hain Guruji
Mann mandir ke MahaDev Hain Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 7, 2018

Om Namaha Shivaya
Aaj Ka Suvichaar 🙏🏻🙏🏻 # 262

           Guruji Ke Pyaar Ka Diya

Guruji ne liya hamein sharan mein
Mitaane hamaare jeevan ka andhkaar
Guruji se judte hee shuru hua
Hamaare liye diwali ka tyohaar

Guruji kehte hain ‘banda bann’
Phir kyun nahin maantey hain hum Unkee baat
Unkee agya ka paalan karne se hee toh
Khatam hogi yeh agyaan kee raat

Kuch bhi aur na chaahein Ve humse
Buss chaahein ki hamaare achche hon karam
Unke maargdarshan aur protsaahan se
Saral hai nibhaana sachchaayee ka dharam

Aaj is avsar par kyun na hum sab
Guruji kee ichchaa karein poori
Koshish toh kar hee sakte haina
Nek iraada hona hai zaroori

Guruji ke pyaar ka diya jalta rahei dil mein
Mit jaaye ahem ka andhera
Bhaasha samjhein sab pyaar kee
Uday ho ek shaant savera

Jhooth ka saath chod kar
Sachchaayee ka saath nibhaayein
Sabko aaj ke shubh avsar par
Dhed saari shubhkaamnaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 7, 2019

Om Namaha Shivaya
Aaj Ka Suvichaar 🙏🏻🙏🏻 # 627

MahaShiv Is Dharti Par Bashar Bann Kar Aaye

MahaShiv is dharti par bashar bann kar aaye
Pyaar se Ve Guruji kehlaaye
Saari sangat ka karte Hain uddhaar
Sabke Hain Ve paalanhaar

Jab Guruji maanav chole mein thei
Toh aksar sangat se thei kehte
Pehle vi Mai, hun vi Mai, aggey vi Mai
Aaj bhi Ve hee Apni gaddi par Hain baithte

Mahasamadhi lekar Ve huey sarvshaktimaan
Guruji sadaa Hain sarv-vyaapi sarvgyani Bhagwaan
Chaahe dhokha khaa le kisee se saara jahaan
Guruji toh sabko lete Hain pehchaan

Guruji kahein na karein hum sab koi bhi ahem
Guruji kahein na karein hum sab koi bhi vehem
Har shishya ka Guruji ke sangg rishta hai nijee aur seedha
Har bhakt ko sikhaane ka Guruji ka hai alagg alagg tareeka

Jo Guruji kehte Hain kisee ek sangat se
Veh baat usee bhakt par laaghoo hai hoti
Uss baat par amal karne ke liye sabko kehna
Veh sahi salaah nahin hai hoti

Har tarehn ka bhojan prashad hai
Agar shudh hai bhavna
Guruji toh buss dekhein bhakt ka bhaav
Aur parkhein uskee sadhna

Guruji kahein ki bhakt aslee cheez par dhyan dein
Guruji se jud kar bandhan-rahit ruhaani gyan lein
Saansaarik haan aur ‘na kee zanjeeron se mukt hon
Guruji kee sadhna aur satya ke sangg se tript hon

Guruji ka har bhakt ke sangg vyaktigat naata
Yahee toh hai is pavitra rishtey mein khoobsoorati laata
Har insaan aur uska kasht alagg aur anokha hai
Andhvishwaas se sabka ek jaisa ilaaj karne se Guruji ne roka hai

Isliye kisee sandeshvaahak kee zaroorat nahin
Har ghadi shubh hai, chaahiye koi mahoorat nahin
Buss, chaahiye toh prem, shradha, aur vishwaas
Aur Guruji mein leen ho jaaye shwaas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 6, 2018

Om Namaha Shivaya
Aaj Ka Suvichaar 🙏🏻🙏🏻 # 261

Guruji Kee Bhakti Mein Hai Aseem Shakti

Koi bhi kasht asaadhya nahin hai tere liye
Phir kyun is gehre sach se hai tu anjaan Guruji ne haath thaama hai tera
Tere sangharsh ka hoga uttam anjaam

Agar raah par tujhe kaante chubhne lagenge
Guruji mamta ke phool bichhaa denge vahaan
Guruji tujhe taar denge aise
Ki dekhta reh jaayega yeh jahaan

Kaam chhota ho ya bada
Rakhna tu apni neeyat sahee
Guruji tere mata aur pita hain
Teri raksha karenge Vahee

Guru kripa se tere kasht taltey jaayenge
Kyunki Guruji swayam tere sangg chalte jaayenge
Dekhna, jald hee sukh ke din bhi aayenge
Tere kashton ka adhiktar bhaar Guruji khud uthaayenge

Guruji kee kripa se kar tu Guruji kee bhakti
Guruji kee bhakti mein hai aseem shakti
Guruji har pal Hain tere murshid aur madadgaar
Guruji Hain rakshak aur Guruji hee Hain parwardigaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 6, 2019

Om Namaha Shivaya
Aaj Ka Suvichaar 🙏🏻🙏🏻 # 626

Ye Pal Bhi Guzar Jaayenge

Chaahe duniya mein teri parvaah kisee ko na ho
Guruji ko teri fikr hai
Chaahe kisee ke dil mein tere liye jageh na ho
Guruji kee har saans mein tera zikr hai

Teri har kamzori ko aur har taakat ko
Guruji se zyada koi nahin pehchaanta
Tere dil mein kya hai
Yeh Unse zyada koi nahin jaanta

Jab chot lagti hai tujhe
Toh tujhse zyada dard Guruji ko hai hota
Tera har gumm Guruji jaante Hain
Chaahe veh bada ho ya ho chhota

Dukhi na ho tu, pareshaan na ho
Duniya kee baaton se hairaan na ho
Kalyuga hai, isliye ye sab toh hai hona
Phir kyun is sabki vajeh se hai apna santulan khona

Dheeraj rakh, tere kaaraj sanvar jaayenge
Haalaat tere sudhar jaayenge
Aaye hain jo imtehaan ke pal
Toh Guruji kee mehar se ye pal bhi guzar jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 5, 2018

Om Namaha Shivaya
Aaj Ka Suvichaar 🙏🏻🙏🏻 # 260

               Jeevan Kee Doar

Yaheen par dharaa reh jaayega har gehna
Ye paise, ye kapde, ye makaan
Saath mein le kar jaayenge nahin
Koi bhi cheez ya saamaan

Isme nahin hai kisee ka kusoor
Zindagi aur maut ka yahee hai dastoor
Chale jaana hai yahaan se bahut duur
Phir na jaane kyun insaan ko hai guroor

Apni yaadein hee chod ke jaayenge
Hamaare karam hamaare sangg aayenge
Unhee se Guruji nirnay le paayenge
Ki hum agley janam kis roop mein aayenge

Guru naam ka simran hee hamein taarega
Guru naam hee hamaari ‘mai’ ko maarega
Guru naam par jo bhakt sab kuch vaarega
Guru naam uss insaan ka jeevan sanvaarega

Simran karna na hum bisaarein
Sewa kar apne bigde kaaj sanvaarein
Satya kee sangat kar Guruji kee mahima phailaayein
Satsang kee reet ko sahi mainey mein nibhaayein

Guru naam ko kar dein sab arpan
Shanti paayein kar ke samarpan
Guru naam ke amrit se rasna jaaye bheeg
Guru naam se aa jaayein hum Guruji ke kareeb

Ek kadam badhaayenge hum Guruji kee disha mein
Toh Guruji sainkadon kadam badhaayenge hamaari oar
Phir kyun hichakichaahat, kyun aur kaisa vilambh
Aao saump dein Guruji ko apne jeevan kee doar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 5, 2019

Om Namaha Shivaya
Aaj Ka Suvichaar 🙏🏻🙏🏻 # 625

                   Pooran Guru

Har subah hamaare jaagne se bhi pehle
Guruji hamaara raasta Apne ashirwaad se sajaate Hain
Guruji se seedhi taar jodo
Toh Ve har mushkil ka hal bataate Hain

Jaise bhi haalaat hamein gher lein
Guruji saamna karne kee kshamtaa detey Hain
Jaisi bhi pareshaani mann ko sataaye
Guruji hamaara dukh dard apnaa lete Hain

Har pal hamaare angg sangg rehkar
Hamey nidarr hona sikhaate Hain
Apne maargdarshan dwaara
Hamein sahi disha dikhaate Hain

Isliye kyun na hum Guruji ko
Prem se har kshan yaad karein
Unkee kripadrishti hum par banee rahey
Unse yeh fariyaad karein

Jahaan par hamaari soch khatm hoti hai
Vahaan se hoti hai Guruji kee soch shuru
Hum toh itne khushnaseeb hain
Ki Guruji ke roop mein hamein mil gaye hain pooran Guru

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 4, 2018

Om Namaha Shivaya
Aaj Ka Suvichaar 🙏🏻🙏🏻 # 259

        Har Pal, Har Din Ka Shukrana

Har pal, har din hamaara
Guruji kee dee hui saugaat hai
Kyun hum yeh bhool jaate hain ki hamaari
Unke samaksh nahin koi aukaat hai

Is pal, is din ka shukrana karne ke bajaaye
Hum bhavishya ke tohfe ka karte hain intazaar
Har pal, har din ko achche se bitaane ke bajaaye
Hum keemtee waqt ganvaa dete hain baar baar

Raah par chalne ke liye zaroori hai
Har kadam par dhyan dena
Koi bhi archan aa sakti hai
Kyun naadaani mein khatra mol lena

Kyun na har pal ka shukrana karte karte
Har pal ka sadupayog karein
Kyun na apni tamannaon kee jholi
Guruji ke aashirwaad se bharein

Vikarmon se duur rahein hum hameshaan
Aur kisee ka bhi buraa na chaahein
Kisee kee madad kar sakein toh karein
Kabhi kisee ko haani na pahunchaayein

Ek ek pal, ek ek din jo milta hai hamein
Veh hai Guruji ka diya hua vardaan
Uss pal, uss din mein jee lein hum tum
Lekar Guruji ka divya naam

Guruji Hain parampita hamaare
Hum sab hain Unkee santaan
Unke naam ke sahaare hee hum Paayenge Sachkhand ka param dhaam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 4, 2019

Om Namaha Shivaya
Aaj Ka Suvichaar 🙏🏻🙏🏻 # 624

        Guruji Ke Naam Ka Simran

Guruji ke naam ka simran
Mann ko bhatakne se bachaaye
Guruji ke naam ka simran
Chinta ko duur bhagaaye

Guruji ke naam ka simran
Guruji se judey rehne ka hai tareeka
Guruji ke naam ka simran
Guruji ke dhyan mein rehne ka hai saleeqa

Guruji ke naam ka simran
Beetey huey kal kee yaad bhulaaye
Guruji ke naam ka simran
Bhavishya kee fikr se bachaaye

Guruji ke naam ka simran
Bekaar kee baaton se dhyan hataaye
Guruji ke naam ka simran
Har saansaarik dukh ko mitaaye

Guruji ke naam ka simran
Dil mein achche khayaalon ko karey utpann
Guruji ke naam ka simran
Banaa de mann ko ek sundar upvan

Guruji ke naam ka simran
Is upvan mein pradaan karey shanti
Guruji ke naam ka simran
Is upvan mein phailaaye Guruji kee kanti

Guruji ke naam ka simran
Tujhe sadaa dikhaaye raasta
Guruji ke naam ka simran
Badhaaye Guruji mein aastha

Guruji ke naam ka simran
Badhaaye ruhaani dhan ko
Guruji ke naam ka simran
Bahut hee meetha laagey mann ko

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 3, 2018

Om Namaha Shivaya
Aaj Ka Suvichaar 🙏🏻🙏🏻 # 258

         Yeh Guruji Ka Darbaar Hai

Bin maange milta hai pyaar yahaan
Yeh Guruji ka darbaar hai
Bin boley hota hai izhaar yahaan
Yeh Guruji ka darbaar hai

Neeyat parkhi jaati hai yahaan
Sawaalon ke jawaab milte hain
Guruji kee meharbaani se
Ummeedon ke phool khilte hain

Har insaan ek jaisa hai yahaan
Koi bhed-bhaav nahin hai jaat ka
Prem kee bhaasha hai samjhi jaati
Antt hota hai dukh kee raat ka

Guruji kee sharan mein bandaa
Surakshit sach mein rehta hai
Kitna bhi kasht jeevan mein aaye
Guru ke ashish se veh sehta hai

Yahaan sapne ve hotey hain sach
Jo hamaare kalyaan ke liye hain
Ab takk ke bhi saare sukh ke tohfe
Guruji ne hee toh hamein diye hain

Jyot jalaa le tu asthaa ke diye kee
Varna jeena bekaar hai
Mayoos na ho ek pal ke liye bhi
Yeh Guruji ka darbaar hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 3, 2019

Om Namaha Shivaya
Aaj Ka Suvichaar 🙏🏻🙏🏻 # 623

  Guruji Sangg Jo Joda Hai Rishta

Guruji sangg jo joda hai rishta
Toh buniyaad rakh sachchee, neeyat rakh nek
Tere liye toh kewal Guruji hee sahaara Hain
Par Guruji ke liye bhakt hain anek

Tu toh Guruji ke liye cheenti ya makode kee bhanti hai
Tera uddhaar ho raha hai, yeh sirf Guruji kee mahima aur kanti hai
Jab kabhi tere jeevan mein aati museebat kee aandhi hai
Guruji kee karuna se hee milti tere mann ko shanti hai

Lekin jab takk tu sachchaayee ko nahin apnaayega
Tu Guruji ko kaise paayega?
Jab takk tera ahem nahin jaayega
Tu niswaarth sewa kaise kar paayega?

Soch le tera uddeshya hai kya
Jaan le tera lakshya hai kya
Ruhaani raasta apnaakar Guruji ko paana
Ya phir moh maya ke chakkar mein phans jaana

Agar tu maangna chaahta hai toh maang le
Guruji karenge teri har tamanna poori
Lekin dhyan rakh ki laukik dhan aur yash kee khwaayish mein
Teri adhyaatmik yaatra na kaheen reh jaaye adhoori

Kyunki antt mein na yash kaam aayega na paisa
Sab kuch dharaa reh jaayega vaise ka vaisa
Sach mein tujhe kabhi na milega phir kabhi Guru aisa
Jo sweekaarega tujhe bin soche ki tu hai kaisa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 2, 2018

Om Namaha Shivaya
Aaj Ka Suvichaar 🙏🏻🙏🏻 # 257

   Guruji Ko Saump Diya Hai Jeevan

Har bhakt ka hai Guruji se
Ek bada hee nirmal naata
Beech mein dooja koi na aaye
Guruji ko yahee hai bhaata

Guruji kee mamta behti hai
Bhakton kee ragg ragg mein
Unke alaawa hamaara rakshak
Koi bhi nahin is jagg mein

Har pal Unkee nazar hai hum par
Jaante Hain Ve hamaare mann kee dashaa
Unse jude rehna bahut hee zaroori hai
Taaki hum par na chhaaye moh maya ka nashaa

Sadaa rehte Hain sajag Guruji
Hamaari suraksha ke liye
Yakeenan Unhonei kasht hamaare
Kumm kar ke hee Hain diye

Jin kashton se hum anjaan hain
Guruji ko toh unka bhi gyan hai
Kabhi kabhi toh Yamraj se bhi ladkar
Hamein Unhonei diya jeevandaan hai

Guruji ko saump diya hai jeevan
Vahee banaayenge bigde kaam
Kripa kar sweekaariye Guruji
Hamaara shukrana aur pranaam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 2, 2019

Om Namaha Shivaya
Aaj Ka Suvichaar 🙏🏻🙏🏻 # 622

Veh Guruji Ka Naam Lekar Chalta Raha

Haalaat kee aandhi ne roka
Kashton ke toofaan ne toka
Magar raahi nahin ghabraaya
Veh Guruji ka naam lekar chalta raha

Guruji par usey thaa vishwaas
Aur koi nahin thaa uskey paas
Magar raahi nahin harbaraaya
Veh Guruji ka naam lekar chalta raha

Manzil bahut hee duur thee
Uskee taakat thakk kar chuur thee
Magar raahi nahin hichkichaaya
Veh Guruji ka naam lekar chalta raha

Guruji ke liye aseem shradha thee uskey dil mein
Seh sakk raha thaa jo faasla thaa manzil mein
Isliye raahi nahin dagmagaaya
Veh Guruji ka naam lekar chalta raha

Guruji ke liye uske mann mein basaa thaa jo pyaar
Usee kee shakti se usey meetha lagg raha thaa intazaar
Isliye raahi nahin kapkapaaya
Veh Guruji ka naam lekar chalta raha

Dil mein Guru milan ka thaa armaan
Hothon par thaa Guruji ka naam
Sooraj dhalne lagaa ho gayi shaam
Chalte chalte veh pahuncha Guruji ke dhaam

Tabhi raahi kee neend khuli
Usne Guruji ko kiya shukrana
Guruji ne usey sapne mein
Dikhaaya uskee zindagi ka afsaana

Swapn se prerna lekar
Raahi ne Guruji ko kiya pranaam
Jo Guruji ne dee usey
Uss kismat ko kiya salaam

Isee prerna se protsaahit hokar raahi ne
Guruji ko kiya dhanyawaad baarambaar
Veh Guruji ka naam lekar chalne lagaa
Guruji ne manzil par pahunchaakar kiya uska beda paar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 1, 2018

Om Namaha Shivaya
Aaj Ka Suvichaar 🙏🏻🙏🏻 # 256

Maan Liya Hai Jo Guruji Ko Bhagwaan

Hamein koi faayda nahin hoga
Apne gumm kee numaaish se
Jo Guruji ne hamaare liye socha hai
Veh yakeenan behtar hai hamaari har khwaayish se

Unhe toh veh bhi nazar aata hai
Jo hum soch bhi nahin sakte hain
Phir kyun hum apne dil aur mukh se
Unse maang maang kar thakte hain?

Uchit samay aane par Guruji
Bin maange denge jo Ve nishchit karenge
Hamaare jeevan ke is safar mein
Guruji hee Hain jo hamaare kasht harenge

Maan liya hai jo Guruji ko Bhagwaan
Toh Ve hee basey Hain abb dil mein
Hazaaron logon kee bheed mein bhi
Ve hee dikhein har mehfil mein

Mann mein Unke saath honei ka ehsaas
Hamein nidarr honei kee prerna deta hai
Guruji aakar hamaara haath thaamtey Hain
Jabb bhi koi kasht baahn pakad leta hai

Buss phir, ghabraane ka toh uthta hee nahin sawaal
Leeladhaari Guruji kee mahima hai bemisaal
Hum buss kar dein Unhe sab kuch arpan
Satguru toh chaahein hum karein sarvsamarpan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 1, 2019

Om Namaha Shivaya
Aaj Ka Suvichaar 🙏🏻🙏🏻 # 621

                          Sewa

Sewa toh veh niswaarth karam hai
Jis-se Guruji humse prasann Hotei Hain
Sewa hee hum bhakton ka dharam hai
Isee se sab bhakt sampann hotei hain

Pehli sewa tann se, jis-se apna ahem kumm karein
Hum doosre jeevon ke kaam aayein
Sabke saath pyaar se rahein, sabki madad karein
Aur apne bheetar vinamrataa ko jagaayein

Dooji sewa hai mann kee
Jiske liye karna hai simran aur dhyan
Sadhna ka anand aayega
Aur praapt hoga adhyaatmik gyan

Dhan kee sewa hai ati aawashyak
Varna dhan se badh jaata hai ahankaar
Isliye is dhan se agar sansaar ka ho upkaar
Toh ho sakta hai sewak ka bhi beda paar

Guruji ko sewa bhaaye vo
Jismein ho shradha aur pyaar
Vishwaas se kee jaaye jo sewa
Vo Guruji awashya karenge sweekaar

Tann mann dhan se kee gayee sewa
Antaratma ko saaf karey
Hamaara Guru karam katvaate huey
Hamaari galatiyon ke liye hamein maaf karey

Guruji se seedhi taar jodkar
Jiskee antaratma leen ho sadhna mein
Veh toh sarvottam sewa hai
Bahut phal hai is upaasana mein

Aao, sadhna kar lein Guruji kee
Taaki jeevan mein sudhaar ho
Guruji ke kareeb aa paayein hum
Aur antaratma ka uddhaar ho

🌹🌹🌹🌹🌹🌹🌹

Jai Guruji 🙏🏻🙏🏻
Dhirja