Guruji hee Hain taarahnaar Guruji hee Hain paalanhaar Guruji hee Hain bakshanhaar Guruji hee Hain parwardigaar
Har mushkil mein Ve Hain hamaare madadgaar Unke jaisa aur jitna na hai koi bhi udaar Unhee se judee rahe sadaa dil kee taar Ve awashya denge hamein taar
Jabb Guruji par kiya hai aitbaar Toh phir Unhee ko maan kar apna sarkaar Hum karein na kisee aur ka intazaar Aur Guruji se karein hameshaan niswaarth pyaar
Chaahe jeevan mein gumm ho ya ho khushi kee bahaar Chaahe nirdhantaa ho ya ho dhan kee bauchhaar Sabse anmol hai Guruji ka deedar Kyunki Unkee kripa se hee chal raha hai sansaar
Guruji sadaa suntey Hain bhakton kee pukaar Ve hee halka kar sakte Hain hamaare kashton ka bhaar Unkee mahima sach mein hai aparampaar Atyant sukhdaayee hai Unka dayaalu dulaar
Naach uthaa mere mann ka moar Guruji aaye meri kutiya kee oar Mit gaya raat ka andhera ghanghor Dikh gayi mujhe sunehri bhor
Unke kamal charnon ka sparsh kar Unka kiya mainey hardik abhinandan Unke aane se Unkee divya khushboo ne Sugandhit kar diya vaataavaran
Pyaar se Unka swaagat kar ke Guruji ko aasan par baithaaya Shradha se Unko tilak lagaakar Unke charnon mein sheesh jhukaaya
Guruji ne dee ik mandd muskaan Unka divya noor thaa chhaaya Unkee gehri aankhon mein Mahasaagar thaa samaaya
Chai ko chakh kar sneh bhaav se Chai prasaad ka anandmayee kar diya swaad Phir Unhonei langar ka bhog lagaaya Aur langar bhi bann gaya prasaad
Gurbani ke madhur sur se goonj uthaa darbar Dhanya hua jeevan mera, paakar Guruji ka deedar Guruji ne jholi mein bhar deen khushiyaan beshumaar Karti chaloon mai Guruji ka shukriya baarambaar
Kisee ne tere saath agar galat kiya Toh bhi usey dil se de tu dua Usne vaisa kiya toh kya hua Guruji ne mamta ke marham se tere ghaav ko chhua
Is marham se tera har ghaav bhar jaayega Is marham ke prabhaav se tu tarr jaayega Agar tu bhi galat kaam karne par adh jaayega Toh phir adhyaatmik raaste par kaise badh paayega?
Isliye Guruji kee baat le tu maan Bann jaa tu changaa insaan Karta chal gupt sewa, paath, aur daan Apne karmon par har pal de tu dhyan
Is zindagi ke ajab se safar mein Kaun apna hai kaun paraaya Yeh samajhne kee koshish mein Na kar tu apna waqt zaaya
Ek satya hameshaan rakh yaad Ki Guruji sadaa tere apne Hain Baaki sab chaahe hakeekat lagey Magar dar-asal sab mithya aur sapne hain
Guruji ka naam liye tu mann mein Zindagi bitaa le sadhna aur simran mein Sukh dukh jabb aayenge tere jeevan mein Tu sthir reh paayega Guruji ke manan mein
Chaahe aaye kabhi kaisi bhi majboori Smaran rahe ki Guruji kee khushi hai sabse zaroori Tere karam bhi Apne sir par le leta hai jo Bhagwaan Unkee taraf tera itna farz toh banta hai, aye insaan
Unhee se hee milta hai pyaar Unhee se hai yeh sansaar Unhe hum sab kar sakte hain izhaar Phir abb aur kiska hai intazaar?
Ve denge jo hamaare liye hoga sahi Apne bhakton kee laachaari dekh sakte Ve nahin Hum rotey hain toh Unkee aankhon se bhi aansoon behte hain Kyunki hum sab har kshan Unke dil mein rehte hain
Mata pita bhi Guruji Hain, meet bhi Hain Ve hamaare Ve sadaa aayein jabb bhi koi bhakt Unhe pukaare Kabhi ichchaa na ho poori toh samajh lena Unke ishaare Ve poore karenge tumhaare mangalkaari sapne saare
Jo tumhaare liye uchit nahin, Guruji tumhe dena nahin chaahte Isliye maang maang kar na Unhe majboor karo Balki jabb aur jaisa bhi Ve kar rahein Hain pradaan Unka shukrana karte huey apni jholiyaan bharo
Jeevan kee raahon par chalte chalte Thakk gaye hain tere paaon Kashton kee dhoop mein tu jal raha hai Kaheen na miley tujhe chhaaon
Jo kehte thei ki veh tere apne hain Vahee paraaye huey aaj Tu bahut asamanjas mein hai Ki kaun sanvaarega tere kaaj
Ummeed kee kiran kee talaash mein Tu bhatakta jaa raha hai Andhere mein akele chalkar Tera dil ghabraa raha hai
Ek Guruji hee Hain jo har pal Tere mann kee sthiti ko jaanein Tu kin haalaat se guzar raha hai Guruji bakhoobi pehchaanein
Guruji tujhe rahein Hain pukaar Unpar kar le tu poora aitbaar Unhee se chal raha hai sansaar Vahee Hain srishti ke paalanhaar
Unhee ke bharose jeena shuru kar Unhee ko karde tu jeevan arpan Sotey jaagte karta ja abb tu Sewa simran satsang aur samarpan
Matt soch ki bura kyun hua Jab ki tera na thaa koi bhi kusoor Buss Guruji se praarthana kar Unkee kripa tujh par barsegi zaroor
Jitne dukh teri kismat mein hain Guruji unhe kumm kar ke denge Tu vishwaas rakh Guruji par Dekhna, Ve tere kasht har lenge
Guruji ke sangg jod le atoot rishta Aur Unke ashish ko banaa le apni dhaal Guruji ke aashirwaad kee divya daulat se Tu ho jaayega maalaamaal
🌹🌹🌹🌹🌹🌹🌹
Jai Guruji 🙏🏻🙏🏻 Dhirja
Sunn Le Guruji Kee Pukaar (12/17/2018)
December 17, 2019
Om Namaha Shivaya Aaj Ka Suvichaar 🙏🏻🙏🏻 # 667
Sabse Shreshth Uphaar
Baadal yoon hee tehel raha thaa Neele se aakaash mein Mann anand se behel raha thaa Guruji ke ruhaani sakaash mein
Aaspaas koi phool nahin thei Phir bhi gulab kee khushboo aa rahi thi Ek adbhut se chayn se Dil kee udaasi jaa rahi thi
Guruji kee ruhaani maujoodagi ka ehsaas thaa Yeh ehsaas bahut sukhdaayee aur khaas thaa Mera meet mera Bhagwaan mere paas thaa Unke manan mein vyast mera har shwaas thaa
Kaayinaat ne kee meri sifaarish Jab dil ne kee Guruji se guzaarish Ki Ve sadaa rahein mere saath Apne haathon mein thaamein Ve mera haath
Guruji ne sunn lee meri ek baar mein pukaar Mujhe kehna hee nahin pada baar baar Abb mere sangg Guruji Hain aur hai Unka pyaar Yahee hai mere liye sabse shreshth uphaar
Apni kismat tu jagaa le Mann Guruji mein lagaa le Guruji ko dil mein samaa le Unke charnon mein panaah le
Sewa, simran, satsang mein lagaa le dhyan Kisee ko na aane de Guru aur apne darmiyaan Sach bolkar rakh tu Guruji ka maan Unko samarpan kar ke kar tu Unka gungaan
Guruji tujhe nikhaarenge Tere karmon ka bhaar uthaalenge Bigdee hui taqdeer sanvaarenge Guruji sab sambhaalenge
🌹🌹🌹🌹🌹🌹🌹
Jai Guruji 🙏🏻🙏🏻 Dhirja
Guruji Sab Sambhaalenge (12/16/2018)
December 16, 2019
Om Namaha Shivaya Aaj Ka Suvichaar 🙏🏻🙏🏻 # 666
Dhanya Hua Hai Jeevan
Dhanya hua hai jeevan jab se Guruji ne hamein apnaaya hai Hamaare pyaare Guruji mein Humne Khuda ko paaya hai
Kabhi jeevan lagta hai aasaan Lekin kabhi aate hain ismein tufaan Duniya ke rangg toh badalte rehte hain Guruji kee madad se hum sab kuch sehte hain
Girne lagte hain toh Ve uthaatey Hain hamein Bhatakne lagte hain toh raasta dikhaate Hain hamein Zindagi jeena sikhaatey Hain hamein Imtehaan lekar azmaatey Hain hamein
Khuda ke alawa aur koi aisa kar sakta nahin Jo Guruji kee marzi hai, vahee hai sahi Guruji ka pyaar mil raha hai, sabse badi saugat hai yahee Unkee sadaa hum par nazar hai, sabse badi baat hai vahee
Phir chinta aur udaasi kis baat kee Beet jaayegi ghadi niraasha kee raat kee Hamaare har khwaab se behtar hai Guruji kee marzi Unkee marzi chalti rahey, aao Unse karein yeh arzi
Har satsang mein aatey Hain Guruji hamaare Dugri waale Kayee divya roop dikhaatey Hain Guruji hamaare Dugri waale
Andhvishwaas se duur le jaate Hain Guruji hamaare Dugri waale Sachchaayee ke kareeb hamein laate Hain Guruji hamaare Dugri waale
Bhooley ko raah dikhaate Hain Guruji hamaare Dugri waale Dukh ka timir mitaatey Hain Guruji hamaare Dugri waale
Hamaari kamiyaan hamein bataate Hain Guruji hamaare Dugri waale Shishyon kee uljhan ko sulajhaate Hain Guruji hamaare Dugri waale
Bujhe huey dil mein asha kee jyot jalaate Hain Guruji hamaare Dugri waale Hamein banda bann na sikhaate Hain Guruji hamaare Dugri waale
🌹🌹🌹🌹🌹🌹🌹
Jai Guruji 🙏🏻🙏🏻 Dhirja
Guruji Hamaare Dugri Waale (12/15/2018)
December 15, 2019
Om Namaha Shivaya Aaj Ka Suvichaar 🙏🏻🙏🏻 # 665
Jabb Kabhi Aisa Lagey
Jab kabhi aisa lagey ki Guruji se ho gaye ho duur Toh mann kee aankhon se dekh lo Unka noor Pyaar bhare vishwaas se le lo mann mein Unka naam Unn takk tumhara sandesh pahuncha degi yeh dhalti hui shaam
Jabb tum pyaar se karoge Guruji ko yaad Toh Ve yakeenan sunenge tumhari fariyaad Unhe masoom dhvani lagegi tumhaari pukaar Aur meetha anjaam layega tumhaara intazaar
Guruji tumhaare angg sangg Hain Aur bastey Hain dil mein tumhaare Ve bhakt se kabhi duur nahin ho sakte Hain Unhe apne sab bhakt lagte hain pyaare
Jo raasta Guruji ne chuna hai tumhaare chalne ke liye Uss raaste par jalaayein Hain Unhonei Apni divyataa ke diye Ve sangg Hain tumhaare har kadam par Taaki tumhe ek pal ke liye bhi na laagey darr
Dene ko toh Ve ek pal mein tumhe saari khushiyaan de dein Lekin tumhaare karam bhi toh Unhonei katvaane Hain Chaahe raaste mein mushkilon ke pahaad aayein Ve bhi Unhonei hee apni shakti se hataane Hain
Isliye tum buss dheeraj rakh kar aagey badhte chalo Unhonei haath thaama hai tumhaara, tum surakshit ho har kadam par, har moad par Duniya ke bandhan chaahe tumhe aagey badhne se rokna chaahein Guruji tumhe aagey badhaayenge har bandhan toad kar
Dekhte hee dekhte tumhaare karam kat-te jaayenge Guruji kee sadhna karne se tumhaare paap dhultey jaayenge Guruji ek din tumhe adhyatmik manzil par pahunchaayenge Jidhar ruhaaniyat ke saumya sitaare jagmagaayenge
Guruji ke naam ka jo pehna mainey gehna Abb Unke naam bina nahin rehna Unhee ke naam se shuru hota hai din Ek saans bhi nahin hai Unkee kripa ke bin
Pyaar Guruji ka komal itna Ki antaratma sheetal ho jaati hai Unhee ka naam le leti hoon Koi mushkil paas jo aati hai
Guruji hee rakhte Hain dhyan Har zaroorat aur har chaahat ka Guruji hee sankat mein aate Hain Intazaar rehta hai Unkee aahat ka
Mai toh phir bhi kabhi bhool jaati hoon Magar Guruji ko har pal hai mera dhyan Jab uljhan aati hai jeevan mein Toh Guruji karte Hain uska samaadhaan
Guruji hee raah dikhlaatey Hain Mai toh sirf uspar chal deti hoon Khushi se mai phooli nahin samaati Ki mai Apne Guruji kee beti hoon
Unse juda hokar toh astitva hee nahin hai mera Unhonei hee Apne gyan se kiya hai mere jeevan mein savera Unhee kee kripa se katega yeh janam maran ka phera Unhee ke charnon mein hai abb hai mera baseraa
🌹🌹🌹🌹🌹🌹🌹
Jai Guruji 🙏🏻🙏🏻 Dhirja
Guruji Ke Naam Ka Gehna (12/14/2018)
December 14, 2019
Om Namaha Shivaya Aaj Ka Suvichaar 🙏🏻🙏🏻 # 664
Achche Bhavishya Ka Nirmaan
Guruji ke naam ka kar tu shravan Guruji kee mahima ka kar tu gungaan Guruji ke naam ke manan mein lagaa de Tu apni bhakti aur jaan
Guruji se preet badhaa le Unhe apna meet banaa le Har pal Unhe apne saath paa Kaisi bhi paristhiti ho, tu na ghabraa
Yaad rakh ki Guruji ke har vachan ko Nibhaana hee hai param dharam Isliye Unke vachan ka anusaran kar ke Sudhaar le tu apne karam
Guruji Hain sampoorna siddhaanton ke gyaata Guruji Hain poori srishti ke daata Guruji ka hai har praani se naata Guruji ko apna har bachcha hai bhaata
Guruji ke gyan ke paalan se Hoti hai atma kee shuddhi Niswaarth bhaav se Guruji se judne se Praapt hoti hai ruhaani buddhi
Guruji ka kehna maan kar Bann jaa tu banda, aye insaan Kyun na apne hee bhaley ke liye kar le Achche bhavishya ka nirmaan
Guruji kee sharan mein aate hee Jeevan badal sa jaata hai Jo atma vishwaas kho gaya thaa kaheen Veh laut ke vaapis aata hai
Aur kaheen veh chayn nahin Jo milta hai Guruji kee sharan mein Aur kaheen veh amrit nahin Jo behta hai Guruji ke charan mein
Jab tu anubhav karega Unki ruhaani chhavi ko swayam Toh dekhna bhaav vibhor hokar Bhar aayenge tere bhi nayan
Bheetar kee ruhaani dhwani dil ko behlaayegi Kisee bhi laukik vastu se veh masti nahin aayegi Dil kee bechayni toh itihaas bann ke reh jaayegi Jab atma sadhna mein leen hokar anand paayegi
Kasht toh zindagi mein phir bhi aayenge Lekin Guruji kee kripa se adhiktar kasht tull jaayenge Tu taqleefon se guzrega Guruji ke diye haunsle ke saath Har pal Guruji teri raksha karenge kyunki Ve Hain tere Bholenath
Guru naam ke divya amrit se dil mastt ho jaayega Guru naam ko japne se nirmal anand aayega Guru naam ke jaadu se khatm hogi niraasha kee nisha Guru naam ke tapp se milegi divyataa kee disha
🌹🌹🌹🌹🌹🌹🌹
Jai Guruji 🙏🏻🙏🏻 Dhirja
Guruji Kee Sharan Mein (12/13/2018)
December 13, 2019
Om Namaha Shivaya Aaj Ka Suvichaar 🙏🏻🙏🏻 # 663
Dekh Lo Azmaakar
Dekh lo azmaakar Ki jabb bhi Guruji ko dhyan mein rakhoge Toh soch hogi sakaaratmak Aur yaatra banegi adhyatmik
Bhavishya kee fikr mein ulajhnaa nahin Varna utkanthaa se ho jaaoge bechayn Guruji kee paawan divytaa kee khoobsoorati se Tum seench lo apne mann ke nayn
Guruji ka pyaar hai hee itna pyaara Ki is pyaar ne jeet liya hai jagg saara Veh shaqs phirtaa hai dar dar maara maara Jisne liya nahin Guruji ke pyaar ka sahaara
Guruji ke pyaar ke liye bheed kee zaroorat nahin Guruji ke pyaar jitna kuch bhi khoobsoorat nahin Yeh veh divya junoon hai jo seedhi taar jodne se mehsoos ho jaata hai Yeh veh kashish hai jismein bhakt chaahte huey hee kho jaata hai
Guruji ka pyaar mamta bhari jholi hai Guruji ke pyaar kee badi meethi boli hai Jo maun mein itne sneh ka ehsaas karaati hai Aur pareshaani ke samay dheeraj bandhaati hai
Guruji se zyada sachcha aur achcha meet nahin Guruji ke prem se badhkar koi preet nahin Guruji kee baani se madhur koi sangeet nahin Aur Guruji ka anusaran karne se badi koi reet nahin
Hum sab hain ajeeb insaan Sochte hain apne aap ko mahaan Kitni kshanbhangur hai hamaari jaan Yeh bhool jaatey hain hum naadaan
Apni ‘mai’ mein mehfooz hokar Sochte hain ki duniya par hamaari hukoomat hai Ek pal ka bharosa bhi nahin hai Phir bhi bhool jaate hain, ki hamein Guruji kee zaroorat hai
Waqt ke mahatv ko jaanei na hum Guruji kee baatein maanei na hum Maut har pal sir par mandaraa rahi hai Aakhiri ghadi har din paas aa rahi hai
Phir bhi, ahem kee tedhi seedi hum chadhey jaa rahey hain Apne ahankar kee zidd par adhey jaa rahey hain Vehemon ke bann rahey hain hum gulaam Andhvishwaas kee pakadte hain hum lagaam
In sabse toh atma hoti chali jaayegi kamzor Is timir ko duur karein, aur laayein jaagriti kee bhor Shaktishaali banaayein apni antaratma ko Poojein Guruji ko, hamaare Paramatma Hain jo
Guruji kee dikhaayee raah par chalna hee Unkee sachchi pooja hai Guruji ke siva na koi maargdarshak dooja hai Swayam MahaShiv ke avataar Hain Guruji Hamaare Dev, hamaare paalanhaar Hain Guruji
Sewa aur Simran mein dhyan lagaayein Apne Guruji ka maan badhaayein Satsang mein baithein aur Unkee mahima suney aur sunaayein Har insaan ke bhaley kee hum karein duaayein
Hamaari rooh kee chetna hamein har pal pukaare Hamaara uddhaar ho sakta hai keval Guruji ke sahaare Sab kuch chod kar aa jaayein hum Guruji ke dwaare Baksh denge hamein Guruji, bakshanhaar Hain Ve hamaare
🌹🌹🌹🌹🌹🌹🌹
Jai Guruji 🙏🏻🙏🏻 Dhirja
Hamaari Chetna Kee Awaaz (12/12/2018)
December 12, 2019
Om Namaha Shivaya Aaj Ka Suvichaar 🙏🏻🙏🏻 # 662
Bhakti Vishwaas Samarpan
Bhakti vishwaas samarpan Inke arth ko tum jaano Inko jeevan mein apnaa lo Yeh kehna Guruji ka maano
Bhakti se milegi shakti Jis se sukh dukh ko dekh paaoge ek samaan Vishwaas se milega veh santulan Jis se har lamha lagega vardaan
Samarpan ka darja toh hai itna ooncha Ki saari chinta duur ho jaayegi Mastt hokar Guruji ke chintan mein jiyoge Koi bhi fikr na tumhe sataayegi
Bhakti vishwaas samarpan teenon ka Zindagi par padta hai prabhaav Jeevan mein agar koi laukik kamee ho Toh mehsoos nahin hota hai abhaav
Kyunki in ratnon kee chamak se Jagmagaati hai yeh zindagi Jis haal mein bhi Guruji rakhtei Hain Nirmal Anand deti hai Unkee bandagi
Aaj Ka Suvichaar 