Month: January 2020

January 11, 2020

Om Namaha Shivaya
Aaj Ka Suvichaar 🙏🏻🙏🏻 # 692

Aane Wala Hai Samay Aisa

Aane wala hai samay aisa
Jismein hamein pehle se kaheen zyaada hogi zaroorat Guruji ke saath kee
Aane wala hai samay aisa
Jismein jeevan kee naiya na paar hogi bin Guruji ke divya haath kee

Guruji ne hee kaha hai
Ki maada samay aa raha hai
Spandan ksheen hota dikh raha hai
Kalyuga chhaa raha hai

Roag, peeda, niraasha, paarivaarik samasyaayein badhne ko hain
Maadak padaarthon kee latt chadhne ko hai
Aise mein hamein Guruji ne jo le liya hai apni sharan mein
Toh hum yakeenan surakshit hain Unke kamal charan mein

Guruji, kripa keejiye aisee
Ki is sansaar mein sukh aur saamanjasya banaa rahey
Guruji karuna barsaayiye aisee
Ki pyaar aur bhaichaara ghanaa rahey

Sunn leejiye yeh dard bhari awaaz
Bhakton ne pukaara hai Guruji
Is maadey samay mein hamein toh kewal
Aap hee ka sahaara hai Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 10, 2020

Om Namaha Shivaya
Aaj Ka Suvichaar 🙏🏻🙏🏻 # 691

                 Guruji Kee Kanti

Guruji ke naam ka simran karta jaa
Guruji kee sewa tu karta ja
Sewa se bada koi kaam nahin
Sewa bin atma ko aaraam nahin

Sewa kar tu bhaav se
Guruji ko khush karne ke chaav se
Koi mannat koi shart na rakh tu
Niswaarth pyaar ka jataa le haq tu

Guruji ko maalum hai tu jhootha hai ya sachchaa
Ve jaanein tera karam bura hai ya achchaa
Ve samjhein tera iraada galat hai, ya hai nek
Unhonei tere jaise dekhein hain bhakt anek

Guruji Bholenath Hain
Unhe pasand hai bholapan
Guruji MahaShiv Hain
Unhe pasand hai neevanpan

Jo mil raha hai Guruji se
Vahee tere liye achchaa hai
Jo nahin mila veh abhi tere liye uchit nahin
Unka yeh vachan bhi bilkul sachchaa hai

Bahut shaktishali hai Guruji kee kanti
Yeh pradaan karegi teri atma ko shanti
Isko paane ke liye sab kuch chhoot jaaye toh bhi dukh nahin
Kyunki atma kee shanti se bada aur koi sukh nahin

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 9, 2020

Om Namaha Shivaya
Aaj Ka Suvichaar 🙏🏻🙏🏻 # 690

      Ummeed Ka Sooraj

Aapne hee aaj takk sambhaala hai hamein
Guruji, kripa kar aagey bhi sambhaaliye
Jagg ke kalyugi josh se ghabraa raha hai dil
Guruji, Aap hum par Apni mehre nazar daaliye

Aapki nadar se daata, hum sab rahenge surakshit
Chaahe jo bhi dukh dard aaye, no hongei ghaayal ya peedit
Aapki karuna se museebaton ka mahasaagar paar kar sakenge
Na darenge, na himmat haarenge, na chalte chalte thakenge

Aapne toh kitnon ko taara hai

Hamein bhi taar deejiye 

Aapne itnon ko bhavsaagar ke paar utaara hai

Hamaara bhi beda paar keejiye

Aapka pyaar jo milta raha, toh duniya kee bewafaai seh lenge hum
Aapki karunadrishti jo hum par padti rahi, toh mushkilon ka pahaad chadh lenge hum
Aapke divya gyan prakash se raahein ujjwal hongee hamaari
Aapne Apne sakaaratmak sakaash se kitnon kee zindagi hai sanvaari

Kaise karein bayaan hum daata
Ki Aap kitne paropakaari Hain
Aapki mehar se parivartan zaroor aayega
Kyunki Aap toh leeladhaari Hain

Aapka Shukrana karne ke liye toh
Sainkdon janam bhi kumm hain
Aapkee sharan mein seh sakenge
Jo bhi zindagi mein gumm hain

Gumm dene ke liye bhi Aapka Shukrana aye maalik
Kyunki hum ho gaye hain Aapke aur bhi kareeb
Aapke alaawa aur koi bhi nahin
Jo sanvaar sakta hai hamaara naseeb

Aapko saump diya yeh jeevan aur ye saansein
Abb swayam se kuch bhi sambhaltaa nahin
Jis bhi shaqs par Aapki rehmat ho jaaye
Uskee zindagi mein ummeed ka sooraj kabhi dhaltaa nahin

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 8, 2020

Om Namaha Shivaya
Aaj Ka Suvichaar 🙏🏻🙏🏻 # 689

     Jeene Ka Sabse Bada Sahaara

Chalchitr hai yeh zindagi
Asal toh hai sirf Guruji kee bandagi
Baaki sab toh hai mithya ka khel
Aur karmon se karmon ka mail

Phir kyun tu pareshaan hai mere dil
Guruji mein tu rammta jaa
Shukr kar ki tu bhi praapak hai
Guruji kee mehar aur mamta ka

Ve hee madad kar sakte Hain
Tere moh ko duur karne mein
Pyaar kar niswaarth tu Unse
Kuch nahin rakha darne mein

Isliye vehem aur ahem ko chod tu
Daraane waalon se abb muh moad tu
Kyunki Guruji toh pyaar ka prateek Hain
Ve tere bheetar aur tere bilkul nazdeek Hain

Ek anokhi shanti hai Unke dhyan mein
Azad ruhaaniyat hai Unke divya gyan mein
Jo na miley kabhi kisee laukik armaan mein
Veh khushi bass jaati hai praan mein

Kyunki pyaar Guruji ka bahut hee pyaara hai
Yeh pyaar hee jeene ka sabse bada sahaara hai
Deedar Unka bahut hee nyaara hai
Is deedar mein hee samaaya sukh saara hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 7, 2020

Om Namaha Shivaya
Aaj Ka Suvichaar 🙏🏻🙏🏻 # 688

        Jis Bhi Roop Mein Dekho

Guruji jo dharam sikhaate Hain
Guruji jo raasta dikhaate Hain
Uss dharam ka naam hai insaaniyat
Uss raaste ka naam hai ruhaaniyat

Hindu Muslim Sikh Isaayi
Ya phir ho koi bhi aur dharam
Guruji ke liye sab ek samaan hain
Maayne rakhte hain hamaare karam

Baba Nanak aur Sai bhi Guruji ke hee roop Hain
Isa Masih aur Allah ke naam mein bhi Ve Hain baste
Baat toh hai shradha aur vishwaas kee
Phir kyun bhakt andhvishwaas mein hain phanste

Ram bannkar Guruji
Sadaachaari kee raah dikhaate Hain
Shyam bannkar baansuri kee meethi dhwani se
Mann ko Ve rijhaate Hain

Bahubali Hanuman ke roop mein
Wafaadaari kee moorat Hain Guruji
Maa Laxmi aur vighn vinaayak Ganesh kee
Soorat Hain Guruji

Mata Rani ke roop mein dein hamein mamta aur pyaar
Maa Saraswati ke roop mein adhyaatmik gyan kee karein bauchhaar
Brahma bhi Hain Guruji mein samaay
Vishnu kee chhavi bhi Unpar chhaaye

Guruji Hain MahaDev MahaShiv ka avatar
Jis bhi roop mein dekho Ve Hain parwardigaar
Unhonei hee rachaa aur sambhaala hai yeh sansaar
Ve hee kar sakte Hain bhakton ka beda paar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 6, 2020

Om Namaha Shivaya
Aaj Ka Suvichaar 🙏🏻🙏🏻 # 687

      Tootey Huey Dil Kee Awaaz

Tootey huey dil kee awaaz hai ye
Guruji se darkhwaaz hai ye
Ki Ve dil ke ghaav par marham lagaa dein dulaar ka
Abb toh kewal sahaara hai Guruji ke divya pyaar ka

Apne hee abb dene lagey hain dhokha
Ganvaata jaa raha hai insaan sudharne ka mauka
Jhooth ke oopar aur jhooth ka odhe jaa raha hai nakaab
Aise mein karam sanchit hotey jaa rahe hain behisaab

Guruji ne sab bhakton kee zindagi hai sanvaari
Lekin hamaare hee karmon se niyati banegi hamaari
Guruji toh Apni oar se niyati likh sakte Hain dobaara
Lekin iraada zaroor parakhte Hain Ve
hamaara

Neeyat jab ho saaf
Toh Ve zaroor karenge maaf
Lekin neeyat mein hon vikaar bhare
Toh phir Guruji bhi kaise madad karein?

Abb bhi samay hai, kaash hum sab sudhar jaayein
Jidhar sachchaayee hai, kaash hum sab udhar jaayein
Guruji dekh rahe Hain sab kuch, kaash hum rakhein har pal is satya ko yaad
Aur Guruji kee sadhna ke sangg kar lein Guruji se maafi kee fariyaad

Guruji toh Bholenaath Hain
Zaroor karenge hamein kshamaa
Unkee kripa aur hamaari jaagriti se
Sanvar jaayega ye samaa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 5, 2020

Om Namaha Shivaya
Aaj Ka Suvichaar 🙏🏻🙏🏻 # 686

Hamaari Kismat Se Bhi Zyada Sukh

Hum Guruji ko dhoond nahin sakte
Guruji ne hee dhoonda hai hamein
Unkee sharan paakar hum khushnaseeb hain
Kyunki bahut maada hai yeh kalyuga ka samay

Yeh samaa hai vipda aur roag ka
Aur hamein mila hai mauka Shiv Yog ka
Guruji dobaara likh rahey Hain hamaara bhaagya
Yeh sach mein hai hamaara saubhagya

Yeh samaa hai shaktiheenataa ka
Lekin Guru prateek Hai himmat aur naveentaa ka
Guruji kee divyataa se milegi sakaaratmakta aur shakti
Guruji kee kripa se gehri ho jaayegi hamaari bhakti

Itne kasht toh hum takk pahunchne se pehle hee
Guruji ke hukm se tal gaye
Jo thode se achche karam bhi kiye hon humne
Ve Guruji kee kripa se phal gaye

Guruji ke naam ka suraksha kavach hai humne pehna
Himmat aur shobha deta hai hamein Guru naam ka divya gehna
Is naam ko lete huey seh lenge jo bhi pade sehna
Kyunki sehte huey hamein Guruji kee sharan mein hai rehna

Dhanya hain hum
Ki hum Guruji kee nigraani mein hain
Hamaari kismat se bhi zyada sukh
Tabhi toh hamaari zindagaani mein hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 4, 2020

Om Namaha Shivaya
Aaj Ka Suvichaar 🙏🏻🙏🏻 # 685

Kuch Bhi Nahin Hai Guruji Ke Pyaar Se Pyaara

Guruji kee kanti se ghanghor andhera bhi sharmaata hai
Guruji ke jeevan daan kee shakti se Yamraj bhi ghabraata hai
Guruji ke divya noor ke aagey
Duniya kee saari khoobsoorati pheeki laagey

Guruji Hain akhand jyot poori srishti ke liye
Sabb bhakt ichchuk rehte hain Guruji kee drishti ke liye
Guruji ke naam mein hai aisa prabal prataap
Jo mitaa deta hai saare dukh aur santaap

Guruji ke har swaroop mein
Ek adbhut aakarshan hota hai
Jo bhi dekhta hai nishthaa se swaroop ko
Veh Guruji kee chhavi mein khota hai

Guruji ke har roop mein shakti hai anant
Kyun na ho, akhir Ve Hain sabke Bhagwant
Unse hee srishti kee rachna, paalan, aur asatya ka vinaash
Unse hee yeh dharti, vaayu, jal, agni, aur akash

Kuch bhi nahin hai Guruji ke pyaar se pyaara
Sabb Devi Devta bhi maanein Guruji ka ishaara
Kyunki Guruji toh MahaShiv ka avataar Hain
Aur srishti ke taaranhaar Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 3, 2020

Om Namaha Shivaya
Aaj Ka Suvichaar 🙏🏻🙏🏻 # 684

 Hamaara Baanvra Mann

Kisee ko bhi duniya ka saara sukh mil nahin sakta
Kisee ko duniya ka saara dukh bhi nahin mil sakta
Ye toh sab pichhle aur abhi ke karmon ka bhog hai
Jisey koi kehta hai kismat, koi kehta sanjog hai

Guruji sikha rahey Hain hamein
Seekhna hamaare vash mein hai
Lekin ye jo hamaara baanvra mann haina
Ye paglaa rehta bahut kashmkash mein hai

Jaanta hai ye mann, ki kya hai sahi
Jaanta hai, ki kaunsa karam karna chaahiye nahi
Phir bhi bekaaboo aksar ye ho jaata hai
Aur ahankaar ka ghulam apne aap ko banaata hai

Guruji bhi imtehaan lete Hain is mann ka
Ki kitna ichhuk hai ye ruhaani dhan ka
Ki ye kewal dikhaawe ke liye Unke gunn gaata hai
Ya phir Unkee dikhaayee raah ko apnaata hai

Dhanya ho jaata hai veh insaan aur uska mann
Jo Guruji kee sharan mein aakar karta hai apni mai ko samarpan
Guruji kee sharan toh hai asal dhan
Kaash is satya ko maan le har bhakt jann

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 2, 2020

Om Namaha Shivaya
Aaj Ka Suvichaar # 683

     Sachkhand Kee Oar

Sachkhand kee oar ka raasta
Bahut hee pathreela thaa
Guruji ke rangg mein rangey huey
Musaafir ka andaaz rangeela thaa

Pareekshaaon ke patharon se hokar lahu-luhaan
Lete huey har saans mein Guruji ka naam
Veh kashton aur arachanon ke pahaadon par
Kabhi rengtaa, kabhi chalta, kabhi uthtaa gir kar

Sachchaayee ko banaaya usne apna sahaara
Dhoondtaa raha apne moksh ka kinaara
Duniya mein kya ho raha thaa, unn sab baaton se thaa veh bekhabar
Kisee kee chiknee chupdee baaton ka na ho rahaa thaa uspar asar

Aaspaas laukik aakarshan bhi thei
Jinse raasta aasaan ho jaata
Lekin musaafir unse aakarshit nahin hua
Nahin toh veh sachkhand ko kaise paata

Isliye Guruji mein shradha aur vishwaas rakh
Veh kadee mehnat se raasta tayy karta raha
Guruji toh sadaa ke jaise sab dekh rahey thei
Musaafir Unke ashish se apni jholi bharta raha

Jo ahem aur vikaaron kee chaadar usne saari zindagi odhee thee
Imtehaan kee in ghadiyon mein phatt kar nasht ho gayi veh chaadar
Abhimaan uska choor choor ho gaya
Neevenpann ka kiya usne aadar

Tartaa raha musaafir har kadam par
Jaagriti kee jyot jal gayee uskee antaratma mein
Jab uskee mai bilkul khatm ho gayi
Toh uska milan hua Parmatama mein

Guruji kee kripa se hua musaafir ka uddhaar
Guruji ati-prassann huey dekhkar usmein yeh sudhaar
Guruji ne rakha musaafir ke sir par Apna haath
Aur sachkhand kee manzil kee oar le gaye Apne saath

🌹🌹🌹🌹🌹🌹🌹

Jai Guruji 🙏🏻🙏🏻
Dhirja