Month: February 2020

February 29, 2020

Om Namaha Shivaya
Aaj Ka Suvichaar 🙏🏻🙏🏻 # 741

          Imaan Insaaniyat Ka

Khand-har bataata hai ki imaarat shaandaar thee
Insaan ka karam bataata hai ki neeyat imaandaar thee
Yeh mahatvapoorna nahin ki koi ameer hai ya gareeb
Kyunki Guruji ke kareeb jo bhi hai, vo hai sabse khushnaseeb

Seekhein hum isee tathya se
Ki jeevan jiyein hum satya se
Kyunki spasht karte hain neeyat aur karam
Ki Kya hum nibha rahein hain apna imaan aur dharam?

Imaan insaaniyat ka
Rutba ruhaaniyat ka
Aacharan adhyaatmikta ka
Sanskaar sakaratamakta ka

Guruji karte Hain apne sab bachchon se pyaar
Unkee kripa kee badaulat hee roshan hota hai bhakton ka ghar sansaar
Agar phir bhi hamein Unkee baat maan-ne se hai inkaar
Toh phir bheed mein gumm kar jeevan ho jaayega bekaar

Chaahe koi aur hamaare sangg chaley ya nahin
Guruji sangg hum chalein uss raaste par jo hai sahi
Mushkilein aa bhi jaayein, toh bhi is safar mein ek divya anand aayega
Sachchaayee aur neevenpann se chalein agar, toh mann bhi sukoon aur shanti paayega

Mukti paane ke liye aawashyak hai
Ki atma nishkapat-ta aur nirmal anand kee sthiti mein ho
Mann kee shanti ke liye sewa bhaav aur saraltaa zaroori hai
Chaahe insaan jaisi bhi paristhiti mein ho

Isliye aayiye, Guruji ke sangg ke is safar ko rakhein nirmal
Apne vichaar aur vyavhaar rakhein taral
Apni bhavna rakhein komal
Aur apne jeevan ko banaayein ujjwal

Imaandaari se jiya jeevan sach mein hoga shaandaar
Guruji bhar denge hamaara adhyaatmik bhandaar
Ye duniya chaahe hai ek bheed se bhara bazaar
Hum toh tarr jaayenge paakar Guruji ka pyaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 28, 2020

Om Namaha Shivaya
Aaj Ka Subichaar 🙏🙏 # 740

               Jabb Lagey Tumhe

Jabb lagey tumhe
Ki pairon taley zameen khisak rahi hai
Aur aisa lagne lagey tumhe
Ki jo ho raha hai veh sahi nahin hai

Jabb lagey tumhe ki hakeekat jaante huey bhi
Kuch kar nahin sakte ho tum
Toh bhi pareshaan ya udaas na hona
Na ho jaana niraasha ke andhere mein gumm

Sabse pehle Guruji ko karna dhanyawaad
Ki Unhonei tumhara parichay karaaya hakeekat se
Guruji se tum sadupadesh kee karna fariyaad
Aur seekhna Guruji kee is naseehat se

Ki dhyan dete raho tum apne karam par
Aanch na aane do tum sachchaayee ke dharam par
Guruji toh sab kuch dekh rahein Hain
Faisla karenge Ve sahi waqt aane par

Guruji hee sansaar kee adaalat ke nyaayakarta Hain
Isliye faisla Unhee par chod do
Buss apne vichaar shudh rakho aur
Aur nakaratamakta se muh moad lo

Guruji kee oar dhyan lagaakar
Apne bheetar kee sakaratamakta badhaao
Jo atma-sammaan aur samarpan ka raasta Guruji dikhaa rahein Hain
Uss ruhaani raaste par kadam badhaate jaao

🌹🌹🌹🌹🌹🌹🌹

Jai Guruji 🙏🙏
Dhirja

[7:02 PM, 2/26/2020] Dhirja Bhat: February 27, 2020

Om Namaha Shivaya
Aaj Ka Suvichaar 🙏🏻🙏🏻 # 739

              ‘Mai’ Kee Dhool

Nirmal anand hai Guruji ke dhaam mein
Satchittanand hai Guruji ke naam mein
Divyataa hai Guruji ke har kaam mein
Kuch nahin rakha hai laukik aishon-aaraam mein

Isliye in laukik padaarthon ka na kar tu gumaan
Abb bhi samay hai chod de tu jhooth aur abhimaan
Chaahe tu khareed lega loagon ko bhi zameen ke saath saath
Tera haath khaali hoga agar usmein na hoga Guruji ka haath

Mann mein Guruji basenge zaroor
Tyaagna hai buss ahankaar ko
Kyunki mann se ‘mai’ kee mayl ko saaf karna hoga
Agar mann mein sajaana hai Guruji ke darbar ko

‘Mai’ kee dhool bahut nakaaratmak hai
Is se mann ka darpan dhundhlaa ho jaayega
‘Mai’ ne jo banaaya mann mein ghar
Toh Guru kaise uss ghar mein aayega?

Duniya ke saare teerath sthaanon kee yatra kar ke bhi
Agar mann na hua saaf
Toh phir jitne bhi heere aur resham arpan kar de Guru ko
Chaahte Huey bhi Guru na kar sakega tujhe maaf

Isliye ahankaar ke zaalim andhere se baahar nikal
Aur pravesh kar neevenpann ke komal ujaale mein
Pyaar aur shradha ke phool arpan karde Guruji ko
Anand le mann mein Unka darbar sajaane mein

Tere har karam ka hisaab karne mein sahaayata karenge Guruji
Tere liye teri har museebat se ladenge Guruji
Buss, tu apni ‘mai’ Unhe dene ka kar de kaam
Sewa, simran, samarpan, satsang kar ke tu le Guruji ka naam

Tere bigde bhaag sanvar jaayenge
Tere karmon ke lekh sudhar jaayenge
Jo bhi sukh toone kho diye ya toone chaahe
Uss-se kaheen zyada sukh tujhe mil jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 26, 2020

Om Namaha Shivaya
Aaj Ka Suvichaar 🙏🏻🙏🏻 # 738

         Aye Mere Mann

Aye mere mann, tu na ho niraash
Duniya kee baaton se na ho tu udaas
Guruji Hain tere bheetar aur tere aas paas
Ve sunn rahei Hain teri aahein aur teri awaaz

Tere dukh dard ko Guruji samajhte Hain
Chaahe tu Unse kuch kahey ya na kahey
Tere aansoon Unkee aankhon se behte Hain
Chaahe tujhe dikhey ya na dikhey

Aye mere mann, ek manch hee toh hai yeh duniya
Isliye na dekh tu isey itnee sanjeedagi se
Dekhte hee dekhte abhineta bhi badalte rahenge
Na prabhaavit ho tu kisee bhi tarehn se inkee maujoodagi se

Jiske saath tera jitna karmon ka hisaab hai
Utnaa hee tera hoga uss shaqs se aamna-saamna
Chaahe veh karmic rishta sukhad ho ya napasand
Guruji ne har vele tera haath hai thaamna

Jo aaj tere saath Hain, kya maalum kal vo tere saath hon ya nahin
Kalyuga kee duniya ko toh matlab ka dastoor hee lagta hai sahi
Insaan ne toh Bhagwaan ko bhi baant liya dharti ke saath saath
Lekin Guruji kabhi bhi nahin chodenge tera haath

Isliye aye mere mann, tu Guruji mein ramm ja toh achcha hai
Saara jagg chaahe jhootha ho, tera Guru hameshaan sachchaa Hai
Aye mere mann, tu jo Guruji ko apne mein samaa lega
Toh tu kaayinaat kee sabse anmol dein ko paa lega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 25, 2020

Om Namaha Shivaya
Aaj Ka Suvichaar 🙏🏻🙏🏻 # 737

     Paawan Punarjanam Hamaara

Guruji bashar ke roop mein aaye
Aur phir MahaSamadhi lekar huey sanaatan aur anant
Unkee divya jyoti aaj bhi sansaar ko ujjwal karti hai
Kyunki Ve Hain MahaShiv, hamaare Bhagwant

Guruji ka sakaash hai atyant tejmayee
Ve nirantar hamaare mann mein karte Hain vaas
Hum apne mann mandir mein jabb jabb dhoondhein Unko
Hamein hota hai Unkee divya maujoodagi ka ruhaani ehsaas

Guruji ka hai hamaari salaamati par har pal pehra
Sab rishton mein Guru aur shishya ka rishta hai sabse gehra
Simran se nishchay hee anubhav hota hai Guruji kee divya upasthiti ka
Is adhyaatmik chetna se bahut sudhaar hota hai mann kee sthiti ka

Guruji ke dikhaaye raaste par riwaaz hai ruhaaniyat ka
Guruji ke vachanon mein dikhta hai mahatva insaaniyat ka
Isliye ahem aur vehem kee deewaaron se mann mein khokhle ghar kyun banaayein hum
Balki changey insaan banein taaki Guruji ko khush kar paayein hum

Jabb neki aur sachchaayee se mehkega har karam hamaara
Jabb chod denge hum lena ahem aur vehem ka sahaara
Jabb sewa, simran, satsang, aur samarpan mein ramm jaayega mann hamaara
Toh adhyatmik taur se isee jeevan kaal mein hoga paawan punarjanam hamaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 24, 2020

Om Namaha Shivaya
Aaj Ka Suvichaar 🙏🏻🙏🏻 # 736

               Sachchaa Faayda

Har insaan kee zindagi ek see nahin hai
Isliye shaayad sabke liye alagg raasta hee sahi hai
Lekin sabke liye ek samaan hain raaste par chalte huey sadachari ke kaayde
Kyunki in kaayadon se hee judey hain hamaare sachche faayde

Atma ka sukh hee hai faayda sachchaa
Isliye koshish karein ki hamaara har karam ho achchaa
Taaki antar-mann ko mil jaaye shanti
Aur usmein samaa jaaye Guruji kee kanti

Chaahe sabka bhinn bhinn hai zindagi dekhne ka nazariya
Guruji kee sharan mein rehkar badal sakte hain hum apna ravaiya
Sabka asamaan hai pichle karmon ka bhaar
Jo ek tarehn se bantaa hai vartmaan kee niyati ka aadhaar

Guruji ke vachan ko sab bhakt hain jaante
Lekin sab Guruji ka kaha nahin hain maante
Guruji kee raah par sab chalte hain apni shradha aur soch ke anusaar
Aur Guruji sabki soch ko jaankar Apne hukm se chalaate Hain ye sansaar

Isliye Guruji kee bhakti se shakti paakar
Saralta aur taraltaa ka raasta apnaayein
Asatya aur duraachaari se muh moadkar
Apni atma ka saamarthya badhaayein

Atma-bal se milegi shanti aur santushti
Aur Guruji swayam karenge is satya kee pushti
Poore sansaar par hameshaan ke jaise padegi Guruji kee divya drishti
Guru kripa se aur sudhrey huey nazariye se yakeenan sanvar jaayegi srishti

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 23, 2020

Om Namaha Shivaya
Aaj Ka Suvichaar 🙏🏻🙏🏻 # 735

          Sachkhand Ke Dhaam

Guruji ko hum apna meet banaayein
Mann kee baat Guruji ko bataayein
Guruji toh vaise hamaare bin boley hee haale-dil Hain jaan lete
Na jaane kyun hum apne Guruji kee har baat nahin hain maan lete

Guruji kahein ki hum rakhein shradha aur saboori
Chaahe hamaari khwaayish ho ya na ho poori
Unpar hamein hona chaahiye vishwaas atoot aur sachcha
Kyunki Ve hee jaante Hain ki kya hai hamaare liye achchaa

Guruji adhiktar kasht Swayam par lekar
Hamaare kashton ko kumm kar ke dete Hain
Isliye chaahe burey waqt ke dauraan hum samajh na paayein
Hum Unhee kee dee hui himmat se uss waqt kasht seh lete hain

Agar saara ka saara kasht hum par aa jaata
Toh ye dil aur ye shareer uss dukh ya dard
ko na seh paata
Isliye Guruji ka shukrana hai baarambaar
Ki Ve hamaara itna dhyan rakhte Hain har baar

Meet bhi Hain Ve, aur Ve hee Hain hamaare naath
Guru ke roop mein MahaShiv Hain, aur hal pal Hain hamaare saath
Itne saubhagyashali hain hum, phir kyun hum laukik dukh se rotey hain
Kyun hum duniyaadaari ke jaal janjaal mein phanskar apne ruhaani sukh ko khotey hain

Aagey bhi sukh dukh ke pal aate rahenge
Aur pehle bhi aise kayee lamhe gaye hain beet
Guruji kee sharan kee suraksha mein hum sab sahenge
Aur yaad ke saath saath sabak bann ke reh jaayega hamaara ateet

Isliye beetee hui khatti-meethi yaadon se seekh kar
Bhavishya ka swaagat karein lekar Guruji ka naam
Bande banein aur changey karam kar ke tarne kee koshish karein
Taaki antt mein Guruji chalein hamein lekar Sachkhand ke dhaam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 22, 2020

Om Namaha Shivaya
Aaj Ka Suvichaar 🙏🏻🙏🏻 # 734

MahaShivratri Kee Beet Gayi Raat

MahaShivratri kee beet gayi raat
Lekin bhool na jaana tu veh raasta aur veh baat
Jo raasta MahaShivratri hamein dikhaati hai
Aur jo baat MahaShivratri hamein sikhaati hai

Guruji Hain MahaShiv Bholenath
Guruji Hain trishuldhari Trilokinath
Guruji sadaa Hain bhakton ke saath
Guruji jaantein Hain teri aur meri har baat

Hamaare karmon ke anusaar dete Hain hamaare jeevan ko roop
Har pal hamaare angg sangg hotey Hain, chaahe chhaaon ho ya dhoop
Jabb takk Guruji kee marzi nahin, tabb takk koi abhilaasha na ho poori
Guruji kee kripa se poorna ho har ichchaa adhoori

Guruji kee sadhna mein leen hokar
Agyaan ke timir ko mitaata chal
Guruji ke har vachan ka anusaran kar ke
Apne zameer ko tu sahi raah dikhaata chal

Maanav janam mila hai tujhe
Shubh avsar hai ye Guruji ke simran ke liye
Antargrehen kar le ve buddhi aur adhyaatmik gyan ke ratna
Jo tujhe tere kalyaan ke liye Guruji ne Hain diye

Apni galatiyon ke liye maang le kshamaa
Simran se tu Guru naam ka dhan kamaa
Vikaaron aur jhooth ko de abb tyaag
Na lagne de abb atma par aur koi daag

Jo daag lagg chukey hain atma par
Guruji se anurodh kar ki Ve daag hataa dein
Unse keh de ki tu bilkul naadaan aur nasamajh hai
Taaki Ve hee tujhe teri zindagi behtar banaane ka tareeka sikha dein

Yeh duniya nahin hai hamaara aslee ghar
Sachcha ghar toh hai Guruji ka dar
Isliye aye bande, tu apni manmaani na kar
Jo ashish Guruji tujhe de rahey Hain, shukraguzaar hokar uss se tu apni jholi bhar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 21, 2020

Om Namaha Shivaya
Aaj Ka Suvichaar 🙏🏻🙏🏻 # 733

 MahaShivratri Ka Paawan Utsav

Maha Shivratri ka utsav jabb jabb hai aaya
Sab Shiv bhakton ne khushi se isey hai manaaya
Hamaare Guruji hamaare liye MahaShiv bannkar aaye
Unka har bhakt bhi ullaas se MahaShivratri manaaye

MahaShivratri kee gaathaayein hain anek
Ek hai ki Parvati ji aur Shivji is din vivah se huey ek
Aur jahaan takk srishti, paalan, sanhar kee hai baat
Shivji ne Taandav nritya bhi kiya thaa is raat

Samudra manthan iti aadi jaisi hain aur bhi anek kathaayein
Jo MahaShivratri ke tyohaar ka mahatva bataayein
Shivratri kee kathaayein insaaniyat ka raasta dikhaayein
Kitnee pavitra aur gehri hai hamaari sanskriti, ve hamein ye bhi samjhaayein

MahaShivratri kee shuruaat hui Brahmaji aur Vishnuji kee ek kahaani se
Yoon kahein, ki dono Devta majboor huey Apne ahem aur Apni naadaani se
Ve sabse pramukh Hain, dono ne kahaa
Aur dono ne ek dooje ka abhimaan na saha

Isliye Unn dono mein ho gaya vaad-vivaad
Ghabraakar baaki sab devtaa gaye Shivji ke paas iske baad
Shivji huey phir Nandiji par savaar
Gaye dekhne Brahma Vishnu ka aapasi prahaar

Apni leela se liya Unhonei stambh ka roop
Jiska prataap thaa maha-agni ke anuroop
Brahmaji hans ka aakaar banaakar oopar gaye dhoondhne stambh ka praarambh
Vishnuji ne vaaraah ka roop lekar neeche jaakar stambh kee seema ko khojna kiya aarambh

Lautkar Vishnuji ne satya kaha
Ki Unhe stambh ka antt milne se raha
Lekin Brahmaji ne kiya chhal-kapat aur kaha jhooth
Jis se Shivji krodhit hokar gaye Unse rooth

Phir Vishnuji aur Brahmaji ne Shivji ko
Shreshth susajjit aasan par baithaaya
Dhoop deep aur anya pushp vastuon se
Prem aur shradha se pooja kar ke Unko rijhaaya

Shivji ke charnon mein girkar
Unhonei sachche dil se maangi kshamaa
Bholenath ne Unhe maaf kiya
Aur sakaaratmak hua vaataavaran aur veh samaa

Shivji ne pavitra aur mahaan tyohaar ka ailaan kiya
Aur srishti ko MahaShivratri ka utsav pradaan kiya
Poore saal mein lagaataar Shiv poojan se miley jo phal
Vaise hee Shivratri par Shiv poojan se sanvar jaaye ateet, aaj, aur kal

Jab Devon ne bhi kiya jhooth ke liye praayashchit
Toh hum nacheez insaan kyun jhooth nahin chodte?
Jabb Devtaaon ne bhi Shivji se maafi maang kar kiya pashchaataap
Toh kyun hum insaan paapon se nahin muh modte?

Aao, aaj hum MahaShivratri ke paawan parv par
Agyaan ka timir mitaakar moksh ke kareeb aayein
MahaShiv Guruji se apne gunaahon ke liye maafi maangein
Aur apne bhavishya ko nirmal banaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 20, 2020

Om Namaha Shivaya
Aaj Ka Suvichaar 🙏🏻🙏🏻 # 732

        Paawan Mann Aur Simran

Nahin khareed sakta koi kisee bhi keemat par tripti
Na hee kisee bhi bazaar mein biktee hai mukti
Kyunki tripti aur mukti shareer kee nahin, balki atma kee dashaa ka karte hain varnan
Ye tabhi milte hain agar paawan ho jaaye ye mann

Laukikta se agar shanti mil jaati
Toh ashanti ke roag se kyun tadaptaa ye jahaan
Bheed se agar sukoon mil jaata
Toh kyun tanaavpoorna hota kalyuga ka ye samaa

Mukti aur tripti milne ke liye zaroori hai mann ko rakhna paawan
Mann ko paawan rakhne ke liye zaroori hai karna simran
Tanaav aur ashanti ka ilaaj bhi hai simran
Simran se sach mein nikhar jaaye jeevan

Kalyuga kee bheed mein hum kaheen gumm na jaayein
Isliye Guruji ke simran mein mann lagaayein
Guruji ke paawan prem se bandh jaayein
Aur jeevan ke har pehlu ko ruhaani nazariye se dekh paayein

Phir hamein yaad rakhna aasaan hoga
Ki kshanbhangur hai hamaara jeevan
Aur jabb is rangmanch par karenge adaa apna kirdaar
Toh chhoti ya badi baaton se pareshaan nahin hoga mann

Guruji ke simran mein hai shanti aur shakti
Guruji ke simran se rangg laati hai bhakti
Guruji kee sadhna mein hai sukh ati-ruhaani
Guruji kee upaasna se sanvar jaaye
ye zindagaani

🌹🌹🌹🌹🌹🌹🌹

Jai Guruji 🙏🏻🙏🏻
Dhirja