Month: February 2020

February 19, 2020

Om Namaha Shivaya
Aaj Ka Suvichaar 🙏🏻🙏🏻 # 731

           Har Peher, Har Pal

Har roaz subah aati hai
Subah se dopeher ho jaati hai
Dopeher jaate jaate karti hai shaam ke aane ka ailaan
Aur shaam lekar aati hai aane waali raat ka paigaam

Ye silsila kitne yugon se chalta aa rahaa hai
Har peher ne apne hisse ka sukh dukh sahaa hai
Ek peher se dooje peher kee oar har pal samay bahaa hai
Na jaane har lamhe ne beete huey lamhe se kya kahaa hai?

Kabhi socho ye gehraayi mein
Ki kya moolya chhupa hai jeevan kee dhaara mein
Jo ek lamhe se dooje lamhe ko jodti hui
Pirohtee hai kshan roopi moti samay kee mala mein

Guruji ne hee har din ko banaaya hai
Aur itne prem se usey lamhon se sajaaya hai
Ve chaahte Hain ki hum karein samay ka sahi prayog
Ve MahaShiv Hain, sikhaate Hain Ve Shivyog

Apne jeevan ke lamhon ko lagaayein gupt sewa, gupt paath, aur gupt daan mein
Doojon ke kaam aakar chaar chaand lagaayein atma-sammaan mein
Saadagi, pyaar, aur neevanpann apnaa kar poornaviraam lagaayein apne abhimaan mein
Aur ramm jaayein apne Guru apne Bhagwaan mein

Karmic hisaab chukaane mein bilkul na karein bewafaai
Ghar aur kaaryaalay ke saath saath mann mein bhi rakhein safaayee
Simran aur satsang se apne taur-tareeke sudhaar lein
Apne karam aur kartavya achche se kar ke har pal ko sanvaar lein

Chhal kapat na karein, nahin toh baad mein dil pachhtaayega
Paapon ka praayashchit kar lein, toh Guru kripa se har janam sanvar jaayega
Jitnee bhi koshish kar lein, beeta waqt laut kar nahin aayega
Har pal agley hee pal mein itihaas ka hissa bann jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 18, 2020

Om Namaha Shivaya
Aaj Ka Suvichaar 🙏🏻🙏🏻 # 730

          Thoda Sa Waqt

Jo jeevan hamein Guruji ne bakshaa hai
Usmein se thoda sa waqt Guruji ko de dein
Unse baatein kar lein, Unka kar lein Shukrana
Bator lein Guruji ke naam ka khazaana

Is waqt ke liye har pal shubh hai
Is waqt se mann hota shudh hai
Is waqt se badhti hai Guruji ke liye preet
Is waqt ko banaa lein hum jeene kee reet

Waqt bitaayein simran aur dhyan mein
Kyunki shanti toh bastee hai adhyaatmik gyan mein
Saansaarik jhameley toh hain maya ka jaal
Inmein saara waqt bitaane se vichlit hota hai dil ka haal

Haan, ye satya hai, ki sansaar mein jeena hai toh laukikta ke bina mumkin nahin
Lekin, ruhaani nazariye se dekhein, toh moh maya se judna nahin hai sahi
Kyunki moh aur maya, yahee kaaran hain lobh aur ashanti ka
Aur inmein phanskar, hum bhool jaate hain mahatva Guruji kee kanti ka

Guruji kee kanti mein hai divyataa anant
Guruji kee kanti se hota hai har andhere ka antt
Guruji kee kanti toh dusht ko bhi banaa de sant
Guruji kee kanti mein samaay Hain Guru aur Bhagwant

Phir kyun hamein hota hai Guruji ke sangg samay bitaane se inkaar
Kyun na Guruji ko yaad kar ke karein Unse hum Unke prati apne prem ka izhaar
Guruji ke sangg waqt bitaane se jeevan mein awashya hoga sudhaar
Guruji mein dhyan lagaane se nishchay hee hoga hamaara uddhaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 17, 2020

Om Namaha Shivaya
Aaj Ka Suvichaar # 729

Guruji Ke Prem Ke Mahasaagar Mein

Jab kabhi bhi aisa lagey tumhe
Ki duniyadari mein andhera hee behtar thaa ujaale mein jeene ke bajaay
Jabb aankhein khulen tumhaari
Aur dil ke tootne ka koi kissa tumhe sataay

Toh Guruji ke swaroop ke paas baith jaana
Ya phir Guruji ka dhyan kar sachche mann se Unhe bulaana
Guruji mein leen kar lena apne shwaas
Phir dekhna, Guruji ko paaoge apne paas

Guruji tumhe denge sahaara
Isliye himmat na haarna
Guruji ne Apne har bhakt ko
Antt mein bhavsaagar se hai taarna

Safar mein ho sakta hai
Ki lagg jaaye kuch samay
Lekin Guruji haath na chodenge
Chaahe jeevan mein aa jaaye pralay

Shradha aur saboori aur saath mein vishwaas
Inkee khushboo se jabb mehekega tumhaara shwaas
Toh Guruji kee divya khushboo se jeevan mehek jaayega tumhaara
Unkee kripa se tum dekh paaoge dharti par bhi sachkhand ka nazaara

Ye mumkin hai sirf Guruji ke prataap se
Ve mukt karenge tumhe har dukh aur har santaap se
Unhe arpan kardo apni zindagi
Kar lo sachche mann se Unkee bandagi

Guruji kee dee hui himmat se
Tum har mushkil se ladd paaoge
Guruji ke prem ke mahasaagar mein
Tum doobkar tarr jaaoge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 16, 2020

Om Namaha Shivaya
Aaj Ka Suvichaar 🙏🏻🙏🏻 # 728

Poori Srishti Par Drishti Hai Jinkee

Har jeev apne agley janam mein
Maanav bann-na chaahe
Aur maanav aisa jeev hai jo na jaane kyun
Is saugat ko nahin saraahe

Chauraasi lakh yooniyon ke baad
Milta hai kismat se maanav janam
Phir bhi kyun bhool jaate hain
Hum karne is janam mein achche karam?

Itne yatna se milee hai ye zindagi
Isko vyarth na jaane dein
Apne insaaniyat ke kirdaar ko
Is sansaar ke kaam aane dein

Moksh praapti karne ke liye
MahaShiv mein samaana zaroori hai
Lekin karam achche jo na huey hamaare
Toh hamaari atma aur moksh mein bahut duuri hai

Is duuri ko khatm karne ka hai ek pakka ilaaj
Guruji kee baat maan lo aur banaa lo Unhe apna sartaj
Guruji kahein ki hum bandey banein aur kar lein changey karam
Sachchaayee aur neki se nibhaayein insaaniyat ka dharam

Koi kaayde kaanoon niyam nahin
Buss, jo Guruji kahein hum karein vahee
Is se zyada aasaan ho nahin sakta Ishwar ko paana
Sach mein Guruji ka naam hai moksh ka khazaana

Kuch nahin bigdega koshish kar ke dekh leejiye
Shradha aur prem se Guru naam ka amrit peejiye
Devon ke Dev MahaShiv taaranhaar Hain Guruji
Poori srishti par drishti hai jinkee Ve parwardigaar Hain Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 15, 2020

Om Namaha Shivaya
Aaj Ka Suvichaar 🙏🏻🙏🏻 # 727

Guruji, Aisee Kripa Karna

Dil ko na dukhaaye zamaane kee choat
Mann mein na aaye koi bhi khoat
Koi chaahe karey mere sangg duraachaar
Mere swachh rahein vichaar aur vyavhaar
Guruji, aisee kripa karna

Kabhi rona aa bhi jaaye, toh uske baad mast ho jaaoon
Buss, Aapke hee dhyan mein hameshaan ke liye vyast ho jaaoon
Sansaar ke kaam aa sakoon kisee tarehn
Kisee ke dard kee na banoon kabhi bhi vajeh
Guruji, aisee kripa karna

Lakhon ayb hain mujhmein, mai hoon nacheez aur heen
Aap hee uddhaar kar sakte Hain, Aap Hain divya aur deen
Ek Aap hee Hain, Prabhu, jo sikhaa sakte Hain ye adaa
Ki Aapki nazron mein gir na jaaoon, aur neeveen rahoon sadaa
Guruji, aisee kripa karna

Haalaaton kee majboori se na padd jaaoon kamzor
Aapke sakaash se shakti paaoon dekhoon jis bhi oar
Mann magn rahey Aapke dhyan mein
Atma ramm jaaye Aapke gyan mein
Guruji, aisee kripa karna

Har kshan mere nayn rahein Aapke daras mein
Jis se har pal mera roam roam ho harsh mein
Seekhoon chalna Aapke nakshekadam par
Aapki karunadrishti se jaaoon mai tarr
Guruji, aisee kripa karna

Aapka Shukrana karna kabhi na bhooloon
Aapki mamta ke aanchal mein jhooloon
Aapka diya har dukh sukh aa jaaye mujhe raas
Aapki Jaijaikaar karte huey sadaa rahoon Aapke paas
Guruji, aisee kripa karna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 14, 2020

Om Namaha Shivaya
Aaj Ka Suvichaar 🙏🏻🙏🏻 # 726

Sabse Anmol Kamaayee

Guruji, jab jab Aapke paas baithtee hoon
Ek divya sukoon sa milta hai
Dil mein kitnee bhi niraasha kyun na ho
Aapki mehar se ummeed ka phool khilta hai

Aapke amrit se milta hai jeevan daan
Aapke prasad se bach jaati hai jaan
Aapke simran se milta hai aisa chayn
Ki Aapke khayaalon mein muskuraate hain ye nayn

Aapke darshan se vishwaas badhta jaata hai
Aapki divya khushboo se dil itnee khushi paata hai
Sadhna mein Aapka divya aabhamandal jab nazar aata hai
Toh aksar Aapki awaaz ka ashirwaad saath laata hai

Charan sparsh kar ke Aapke
Jab vaheen par sir ko jhukaati hoon
Aur chupke se Aapko
Apne dil kee baat bataati hoon

Toh Aap kisee na kisee tareeke se
Jawaab ya sandesh de dete Hain
Jab satsang mein hum sab baith kar
Shabad aur anubhav sunn lete Hain

Waqt ko apne palle mein tezi se kheenchte huey is kalyuga mein
Aapke angg sangg honei ka jo ehsaas hai
Uss-se bechayni aur ashanti ka ilaaj ho jaata hai
Isliye yeh ehsaas bahut hee khaas hai

Isee ehsaas mein jeevan kee sachchaayee hai
Isee ehsaas mein meri suraksha samaayee hai
Ye saugat jo Aapki sharan mein aane se mujhe mil paayi hai
Yahee toh meri sabse anmol kamaayee hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 13, 2020

Om Namaha Shivaya
Aaj Ka Suvichaar 🙏🏻🙏🏻 # 725

              Namaha Shivaya

Namaha Shivaya par hai aadhaarit
Aaj ka ye Suvichaar
Namaha Shivaya kehne aur sunn-ne se
Khulte hain Guruji ke deedar ke dwaar

Ye uddhaar aur upaasana kee divya jyoti hai
Iske uchhaaran se bhog aur moksh kee praapti hoti hai
Kyunki na, ma, shi, va, ya basey Hain ismein
Shivji ke saare kaaraj sajey hain jismein

Namaha Shivaya mein ‘na’ jo hai
Uska taatparya hai dharti hamaari
Shivji dwaara sansaar kee rachna yahaan hoti hai
Aur ye rachna hai itnee divya aur pyaari

Dooja kaaraj Shivji ka
Hai paalan is srishti ka
Paalan aur vriddhi ke liye jal hai zaroori
Jal se ‘ma’ kee paribhaasha hoti hai poori

Agni hota hai ‘Shi’ ka arth
Isko bilkul bhi na samajhna vyarth
Kyunki ye bhi Shivji ka kaarya hai
Kyunki sanhaar karna bhi anivaarya hai

‘Va’ toh hai vaayu, veh jhonka jo gaya ya aaya
Is se samajh aata hai Shivji ka tirobhaav yaani ki maya
‘Ya’ ka matlab hai moksh ke baad milne wala akash
Shivji se anugreha aur ashirwaad mil jaaye sabko kaash

Shivji ke paanch mukh jo Hain
Ve Hain in krityon ke liye
Shivji har uss bhakt mein Hain bastey
Jo Om Namaha Shivaya japte huey jiye

MahaShiv Hain pyaare Guruji hamaare
Is mantra ke dwaara Unka bhakt Unhe pukaare
Is mantra se poori ho manokaamna
Aur aasaan ho jaaye karna mushkilon ka saamna

Namaha Shivaya ka panchaakshar mantra
Shivji ke paanch kaaraj samjhaaye
Om ke Pranav mantra sangg jod lo isko
Aur shradha se japte raho ‘Om Namaha Shivaya’

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 12, 2020

Om Namaha Shivaya
Aaj Ka Suvichaar 🙏🏻🙏🏻 # 724

                        Uss Paar

Guruji pyaar hamaara Hain
Guruji doobte huey ka kinaara Hain
Guruji udaasi ka sahaara Hain
Hum khushnaseeb hain ki Unhonei hamein sweekaara hai

Toote dil kee Guruji sunte Hain pukaar
Koi dhokha de hamein toh dete Hain hamein dulaar
Guruji ka pyaar hamein sambhaal leta hai
Aur hamaare har ghaav ko bhar deta hai

Guruji hamaare Bhagwaan hokar
Hamein har bhool ke liye kar dete Hain maaf
Toh kyun nahin hum doojon ko kshamaa kar ke
Kar sakte hain dil ko saaf

Mushkil lagey ye chaahe hamein
Lekin namumkin nahin ho sakta hai
Kyunki Guruji ka saath dega hamein shakti
Aur is safar mein nikhar jaayegi hamaari bhakti

Apni galatiyon ke liye maafi maangein
Aur doojon ko maaf karein
Apni ruhaani yaatra mein
Mayle mann ko saaf karein

Is se karmic bojh bhi kumm ho jaayega
Is jagg se jaane mein anand aayega
Kyunki atma Guruji ke rangg mein rangg jaayegi
Jab Guruji kee preet hamein uss paar bulaayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 11, 2020

Om Namaha Shivaya
Aaj Ka Suvichaar 🙏🏻🙏🏻 # 723

     Aapki Kripa Se Tartey Jaayein

Guruji kee praapti karni hai toh
Mann ko vash mein karna hai sabse zaroori
Aur mann ka ghulaam nahin bann-na hai
Chaahe ho kaisi aur kitnee bhi majboori

Ye mann hee badha hai sabse badee
Jispar nigraani rakhnee padti hai kadee
Guruji takk pahunchne ke raaste par ye baadha
Aksar bhulvaa deti hai atma-sanyam ka vaada

Isliye bhakt jann jaate hain bhatak
Aur adhyaatmik safar mein jaate hain atak
Na milta hai phir dil ko sukoon aur na chayn
Bebasi mein bechayni se kayee baar bhar aate hain nayn

Mann kaamuk sukh kee oar khichtaa chalaa jaata hai
Laukikta ke laalach ke kaaran bhatakta jaata hai
Shareer nashwar hai, mann yeh bhool jaata hai
Apni ahem se bhari harkaton se baaz nahin aata hai

Guruji, kripa keejiye hum sab par
Ki hamaari buddhi shuddhi se chale
Vicharadhara nek rahey
Mann mein paap na paley

Baahar khushi dhoondhne ke bajaay
Hum khushi aur shanti ko bheetar paayein
Mann ko buss Aapki sadhna mein leen kar ke
Hum Aapki kripa se tartey jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 10, 2020

Om Namaha Shivaya
Aaj Ka Suvichaar 🙏🏻🙏🏻 # 722

Pooran Guru Hamaare Guruji Jaisa

Guruji toh sab kuch jaante Hain
Kuch kehne kee nahin hai zaroorat
Jab jab Unhe yaad karna chaaho
Tabb Tabb hai shubh mahoorat

Isliye kyun na yaad karein Unhe har pal
Taaki sudhar jaaye hamaara aaj aur kal
Beete huey kal ka bhi uddhaar hoga
Kyunki pichhle karam katne se aagey ka sudhaar hoga

Hamein toh buss karna hai Unko yaad
Aur karni hai Unse fariyaad
Ki Ve haath thaame rakhein hamaara
Kyunki Unke bina nahin hai hamaara guzaara

Hamaare jeevan ke geet ka sur likhte Hain Guruji
Bhakton ko anek sundar roop mein dikhte Hain Guruji
Hamaari har aah mein aur har chaah mein Hain Guruji
Shaktishali sahara bannkar hamaari raah mein Hain Guruji

Hamaare karam Apne oopar le lete Hain
Guruji
Hamaari hatheli kee lakeerein badal dete Hain Guruji
Unke alaawa koi kar hee nahin sakta hai aisa
Na aaj takk hua hai aur hoga kabhi pooran Guru hamaare Guruji jaisa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja