Month: March 2020

March 31, 2020

Om Namaha Shivaya
Aaj Ka Suvichaar 🙏🏻🙏🏻 # 772

    Na Chodo Guruji Par Vishwaas

Na chodo Guruji par vishwaas
Na todo tum divyataa kee aas
Karte raho apna adhyaatmik vikas
Karte raho Guruji ke kareeb honei ka prayaas

Niswaarth hokar karo Guruji ka vandan
Jagat ke har praani ko bhejo sakaaratmakta ka spandan
Kya maalum kiskee dua kis ke kaam aa jaaye
Kya maalum kisko apni beemaari mein aaraam aa jaaye

Jo bhakti niswaarth na ho
Veh bhakti kis kaam kee
Mann ke mandir mein jalaaye rakho
Akhand jyot tum Guruji ke naam kee

Jitna samay simran mein bitaa sakte ho, achchaa hai
Insaaniyat ke prati sewa ka niswaarth bhaav sachcha hai
Guruji ka satsang karo pyaar se pariwaar ka sadasyon ke saath
Guruji ke liye toh badi se badi beemaari bhi bann jaati hai chhoti si baat

Isliye yeh daur bhi jaayega guzar
Guruji ke ashirwaad ka zaroor hoga asar
Unkee hee sharan mein zindagi ho basar
Aur ruhaani raaste par hum hon agrasar

Samarpan kar dein Guruji ko, samarpan mein aseem shakti hai
Changa hai ki Guruji ke rangg mein rangee hui hamaari bhakti hai
Kyunki Guruji toh sarv-vyapi, sarv-gyani aur sarvshaktimaan Hain
Hamein Guruji ke roop mein miley saakshaat Bhagwaan Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 30, 2020

Om Namaha Shivaya
Aaj Ka Suvichaar 🙏🏻🙏🏻 # 771

             Hamaara Atma-bal

Kyun yash aur dhan ke lobh mein
Apne spandan ko hum pahunchaayein chot
Kyun laukikta ke laalach mein
Hamaare mann mein hum paalein khot

Kyun ahankaar karein aur inkaar karein?
Kyun na sach ko sweekar karein?
Kyun hum Guruji se darein?
Kyun na Unse hum pyaar karein?

Guruji se pyaar karenge toh komal hoga simran
Unkee mamta ke aanchal mein jhoom uthega ye mann
Prabhu se darenge toh kaise Prabhu ko paayenge
Zindagi ke anmol pal bin Guru prem ke vyarth hee beet jaayenge

Kamzor atma ko ahankaar ka jhootha sahaara lena padta hai
Isliye ahankaar mitaane ke liye zaroori hai atma-bal ko badhaana
Atma-bal deta hai satya ke raaste par chalne kee himmat
Aur satya deta hai neevanpann aur ruhaani taakat

Jitna karkash hota hai ahankaar ka vyavhaar
Uss se kaheen zyada madhur hoti hai neevenpann kee jhankaar
Isliye na karne dein hum ahankaar ko hamaari ruhaani vriddhi par vaar
Aur simran se atma-bal badhaakar karein Guruji ke hukm ko sweekar

Atma-bal badhne se ahankaar ke bajaaye
Praapti hogi neevenpann aur atma-vishwaas kee
Jeene mein aasaani hogi aur mann nahin hoga pareshaan
Kyunki atma-bal se milee chetna hum par hogi meharbaan

Guruji kitne prassann hongei ki hum Unke maargdarshan se
Atma-bal badhaakar apni madad kar rahei hain
Itna farz toh hamaara swayam aur Guruji kee oar bantaa hai
Aakhir Unhonei Hamaare liye kitne kasht sahei hain

Hum Guruji ke har vachan ka paalan karenge
Toh atma-bal awashya badhega hamaara
Hamaari changee neeyat ko dekhkar sahaayata karega
Agam agochar Guruvar hamaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 29, 2020

Om Namaha Shivaya
Aaj Ka Suvichaar 🙏🏻🙏🏻 # 770

Guzaarish Hai Aap Angg Sangg Hon

Pyaare Guruji,

Bakshiye hamaare gunaahon ko
Ujjwal keejiye hamaari raahon ko
Itnee himmat deejiye hamaari baahon ko
Ki ye sahaara pahunchaa sakein begunaahon ko

Mann kee mayl ko saaf keejiye
Kukarmon ke liye maaf keejiye
Bekusoor insaanon ke haq mein insaaf keejiye
Har oar sadbhaav ho, aisa mukammal ittefaq keejiye

Duur keejiye sabka andhvishwaas se bhara har vehem
Chuur kar deejiye ahankaariyon ka ahem
Aapki kripa se har toofan jaaye sehem
Aur har buraayee ka ho jaaye hameshaan ke liye dehen

Sabko sachchaayee kee raah par chalne kee deejiye himmat
Sabko dukh aur kasht jhelne kee deejiye taakat
Sabko aashwast aur viveksheel honei kee deejiye shakhsiyat
Sabko swatantra aur atma-nirbhar honei kee deejiye haisiyat

Neevanpann ho hamaare vichaar aur karam mein
Nyaaya aur insaaniyat basaa ho hamaare dharam mein
Aapkee divyataa kee chhavi ho hamaare mann aur chaal-chalan mein
Aapke ashirwaad kee aushadhi ho hamaare har zakhm ke marham mein

Aur kaheen veh sukoon nahin milta, jo milta hai Aapki sharan mein
Vaisi suraksha aur kaheen nahin, jaisi suraksha hai Aapke charan mein
Ye samast srishti basee hai Aapke kamal nayan mein
Guzaarish hai Aap angg sangg hon hamaare jeevan mein aur maran mein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 28, 2020

Om Namaha Shivaya
Aaj Ka Suvichaar 🙏🏻🙏🏻 # 769

        Gurbani Ka Amrit

Guruji ne kaha sewa, simran, satsang karne ke liye
Guruji ke ashirwaad se Unka har bhakt Gurbani ka amrit piye
Guruji ne Gurbani ka mahatva sab bhakton ko baar baar samjhaaya
Jisne Gurbani ka kiya shravan, Gurbani ne uss bhakt ka beda paar karaaya

Guruji kahein Gurbani kee hai vaddi vadiyaayee
Jitna suna jis bhakt ne Gurbani ko, uskee hui bhalaayee
Guruji kahein Gurbani suno, chaahe veh samajh na aaye
Ek anokhe divya tareeke se ye rooh par asar kar jaaye

Baar baar ek hee shabad sun-ne se
Baar baar kalyaan ho jaaye
Duniya mein shaayad aisa koi shaqs nahin
Jo gurbani sunkar uske rass mein na kho jaaye

Gurbani ke prataap se roag duur ho sakta hai
Gurbani kee mehar se ahankaar choor ho sakta hai
Gurbani ka rass aushadhi jaise tann aur mann par asar karey
Gurbani hai ek marham jo dil ke har ghaav ko bharey

Shabad sunkar sees jhukaate hee
Haasil ho sakta hai neevenpann ka gehna
Jisne Gurbani ko apni zindagi mein apnaa liya
Uska namumkin hai phir iske bina rehna

Gurbani hai saanson ke liye divya oorja
Gurbani hai ruhaaniyat, Gurbani hai pooja
Gurbani se jab goonj uthega ye aasmaan
Toh yakeenan jagg ka ho jaayega kalyaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 27, 2020

Om Namaha Shivaya
Aaj Ka Suvichaar 🙏🏻🙏🏻 # 768

                     Ramayana

‘Ra’ka arth hai ‘prakash’, ‘ Ma’ ka matlab hai ‘swayam mein’
Toh Rama ka taatparya ye hua, swayam ke bheetar ka prakash
Isliye Ramayana shabd ka arth aur mahatva hai ruhaani
Aur ismein hai sampoorna satya ka sakaash

Ramayana kewal ek kahaani nahin
Jo sadiyon pehle thi beeti
Ye toh veh satya hai
Jo hai hum sabki aap beeti

Dashrath ka maayne ‘dus rath’, jo paanch gyaanendriyon aur paanch karamendriyon ke prateek hain
Aur Kaushalya hain Veh kaushal saarathi jinhonei Rama ko janam diya
Janam hua sadaachaari Vishnu avataar Rama ka
Jab saari indriyon ka kushaltaa se prayog hua

Ayodhya ka arth- veh dhaam jahaan yuddh na ho kabhi
Aur sadbhaav se reh paayein sabhi
Jaise Rama ka uss Ayodhya mein hua janam
Vaise hee prem ke prakaash ke liye yuddh ko hona hoga khatam

Abb dekhein, yeh satya kaise apne par laaghoo hota hai
Ramayana kee katha ka saar kaise hamaare hee bheetar hota hai
Mann hai Sita, atma hai Ram
Chetna hai Laxman, aur praan hain Hanuman

Mann roopi Sita ka ap-haran karta hai jab ahankaar roopi Raavan abhimaan se
Toh atma roopi Rama madad maangte Hain praani shakti wale Hanuman se
Chetna roopi Laxman thaamte Hain Ram ka haath
Aur Rama aur Sita punarmilan se ho jaate Hain saath saath

Jaise ahankaar roopi Raavan kee hoti hai haar
Aur Hanuman aur Laxman kee madad se jeet jaata hai Rama Sita ka pyaar
Vaise hee kaash hum sabka ahankaar ho jaaye chuur chuur
Aur chetna aur praan shakti se chchaa jaaye hamaare mann aur atma par Guruji ka noor

Kyunki hamaare Guruji prem ka prakash Hain
Guruji gyan ka sakaash Hain
Guruji Hain chetna, Guruji Hain praan shakti
Kyun na apne bheetar kee Ramayana ko saarthak karein kar ke Guruji kee niswaarth bhakti

Guruji ke prakash aur sakaash se
Antarmann aur atma mein Ayodhya ka Ram raaj hum laayein
Aur praan shakti aur chetna jagaakar
Swayam ka uddhaar kar paayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 26, 2020

Om Namaha Shivaya
Aaj Ka Suvichaar 🙏🏻🙏🏻 # 767

Koyle Ko Banaa Sakte Hain Jo Heera

Koyle ko banaa sakte Hain jo heera
Uss illee ko banaa dein titlee jo kal takk thaa ek keeda
Parjeevi (parasite) aur ret ko seep ke moti mein badalte Hain Guruji
Har badi museebat ko chhoti mein badalte Hain Guruji

Kyunki Unhonei swayam par le liya hum sabke karmon ka bhar
Ve param parmeshwar Hain aur Unke hain hum sab par anginat upkaar
Jinhonei koyle ko heere mein parivartit kar diya, Ve hamein bhi taarenge
Jinhonei parjeevi ko moti ka roop diya, Ve hee hamaara bhi astitva sanvaarenge

Buss, hamein apna uttardaayitva nibhaana hai
Aur Guruji kee dikhaayee raah par chalte jaana hai
Unke vachanon ka karna hai hamein paalan
Vishwaas aur shradha se pakde rehna hai Unka daaman

Guruji toh har pal khade Hain tayyaar
Hamaare liye har kasht se ladne ke liye
Isliye hamein bhi vilambh nahin karna chahiye
Unka simran karne ke liye

Simran kee shakti bhi Guruji denge
Buss hamaari oar se pakki ho koshish aur nek ho iraada
Hamein Guruji kee honhaar santaan bann kar rehna hai
Ve toh hameshaan nibhaate Hain Apna har vaada

Guruji, hum par kripa aisee keejiye
Ki Aapka simran aur satsang bann jaaye hamaari zindagi
Hum koyle aur ret kee bhanti hain, Aap heera aur moti banaa deejiye hamein
Aur Apne prataap se karaate rahiye humse Aap apni bandagi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 25, 2020

Om Namaha Shivaya
Aaj Ka Suvichaar 🙏🏻🙏🏻 # 766

               Aaj Kee Paristhiti

Aaj kee paristhiti aisee hai
Ki ghar se baahar nikalnaa hai mushkil
Ve sthaan bhi sannaatey mein hain
Jahaan kabhi lagti rehti thi mehfil

Baahar nahin jaa sakte hain Aap
Toh uthaayiye is avsar ka laabh
Apne bheetar jaane ka prayatna keejiye
Aur keejiye antarmann ko saaf

Kalyuga mein jo sthiti hui hai
Aaj poore sansaar kee
Aise mein divya ghadiyaan batorein
Guruji ke deedar kee

Zidd karni hee hai toh
Guruji ke naam ko simarne kee zidd karein
Kisee aadat par adhnaa hee hai
Toh naam japne kee aadat par adhein

Shabad kee amritvani kee varsha se
Seench lein apne dil ka upvan
Is upvan mein shradha ke suman upjaayein
Taaki vandan kee vatika bann jaaye ye mann

Vishwaas ka tripund aur tilak lagaayein
Samarpan ka bhaav antaratma mein jagaayein
Apna dharam nibhaayein insaaniyat kee oar
Apne kadam badhaayein ruhaaniyat kee oar

Guruji kee mehar toh abb bhi baras rahi hai
Varna aur bhi burey hotey haalaat
Isliye Guruji ko har pal yaad karein
Aur Unka anantam Shukrana karein din raat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 24, 2020

Om Namaha Shivaya
Aaj Ka Suvichaar 🙏🏻🙏🏻 # 765

   Guruji Kee Baani Pukaarti Hai

Guruji ke divya prem ko apni ragg ragg mein behne do
Shankaa aur bhayy ke daag hatt jaayenge
Unkee divya chhavi ko har pal apne mann mandir mein rehne do
Udaasi ke pal dekhna phir jald hee katt jaayenge

Guruji ka pyaar veh vaada hai jo kabhi tootega nahin
Guruji ka ashirwaad veh saath hai jo kabhi chhootega nahin
Guruji kee sharan veh suraksha hai jis se milta hai har pal chayyn
Guruji kee divya sundartaa se tarr jaate hain ye nayyn

Dheeraj kee dhun mein Guruji sangg tum chalte jaao
Jis saanche mein Guruji tumhe dhaalein usee mein tum dhalte jaao
Bejhijhak hokar chalo sadaachaari ke raaste par
Guruji ko tumhara nek iraada aa jaayega nazar

Neeven hokar maan lo ki tumhe Unkee pal pal zaroorat hai
Jabb bhi yeh sweekaaro tum, vahee shubh mahoorat hai
Dekhna phir kaise Guruji kee shakti
Nikhaar degi tumhaari bhakti

Navjaat shishu ko jis pyaar se uskee maa
Seene se lagaakar dulaarti hai
Vaisa hee prem dene ke liye tumhe
Guruji kee baani pukaarti hai

Is baani kee oar jabb tum jaaoge
Toh Guruji ko apne aur bhi kareeb mehsoos kar paaoge
Unke paawan prem ke rass mein doobkar
Tum hameshaan ke liye tarr jaaoge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 23, 2020

Om Namaha Shivaya
Aaj Ka Suvichaar 🙏🏻🙏🏻 # 764

            Waqt Ka Yeh Tathya

Waqt ka yeh tathya
hai bilkul sachchaa
Ki chaahe veh bura ho ya ho achchaa
Veh kabhi bhi ek pal ke liye bhi rukta nahin
Ishwar ke alaawa kisee ke samaksh veh jhukta nahin

Guruji Ishwar Hain, kyunki Ve MahaShiv Hain
Unke saare upaay bilkul anokhe aur divya Hain
Varna kabhi paan ke patte ya chammach se ilaaj kaise hota?
Aur jisko neend naa aati veh bhakt Guruji kee kripa se aaraam se kaise sota?

Isliye waqt bhi Guruji ke vash mein hai
Aur Guruji ka raaj niyati aur waqt pe hai
Waqt ke vyavhaar ko burey se achche mein badal denge Guruji
Ghabraao nahin, har bhakt ke sankat ko har lenge Guruji

Waqt ne jo hum par paabandiyaan lagaayeen hain
Ve bhi Guruji se chhupee nahin
In paabandiyon mein abhi hamaari hee bhalaayee hai
Isliye hona chaahiye hamein dukhi nahin

Ye bhi toh Guruji ka hee tareeka hai
Karmic hisaab aur kalyuga ko sambhaalne ka
Guruji kee marzi se hai toh kalyaan awashya hoga
Aur is mein koi rahasya chhupa hoga yug ko sanvaarne ka

Jeevan ke chakravyu ke mutaabik
Kalyuga ke pashchaat hee satyuga aayega
Vikaaron, beemaariyon, aur buraayiyon ka antt hoga
Satyuga sadaachaari, sadbhavna aur changi sehat laayega

In sab baaton par agar bharosa nahin, toh bhi chalta hai
Lekin waqt ke saath saath subah ka sooraj shaam ko zaroor dhaltaa hai
Is se toh koi nahin kar sakta hai inkaar
Aur subah phir sooraj uday hota hai, is baat ka bhi hai sabko ikraar

Guruji ne thaama hai hamaara haath
Isliye kyun na hum chalein waqt ke saath saath
Katt jaayegi yeh kathin raat
Kyunki hamaare sangg Hain hamaare naath

Mil kar karenge subah ka swaagat
Guruji ke paawan ashirwaad se
Dhanya hongei hum sabb
Guruji ke diye jeevan daan ke prashad se

🌹🌹🌹🌹🌹🌹🌹

Jai Guruji 🙏🏻🙏🏻

March 22, 2020

Om Namaha Shivaya
Aaj Ka Suvichaar 🙏🏻🙏🏻 763

                      Panaah

Kaheen par hoti madhu kee varsha
Toh kaheen par amrit hai barsa
Kaheen par khushboo gulab ya chandan kee
Toh kaheen jyot jalti hai Guruji ke vandan kee

Kaheen kaheen par Om Onkar hain bann jaate
Darbar mein, ya chai prashad ya naivedyam prashad mein
Kabhi Guruji, Shivji, Nandi ya Ganpati ke saakaar roop ke darshan ho jaate
Toh kabhi swapn darshan hotey satsang ke pehle ya baad mein

Kabhi kabhi saakshat darshan
Kabhi shabad mein sandesh
Jis bhi tarehn se Guruji chaahein
Ve hamaare dil mein karte Hain pravesh

Kabhi kabhi toh
Kisee insaan ya titlee ya panchhee ke roop mein
Ya kabhi labh ya aankhein ya haath hilaa dete Hain Guruji
Apne kisee swaroop mein

Jabb jabb dekho mann kee aankhon se
Aur saraaho Guruji ko pyaar se
Jabb jabb shradha suman arpit karo
Ve ashirwaad denge Apne deedar se

Har roop mein Guruji ka deedar bada pyaara hai
Is deedaar aur darshan se milta dil ko sahaara hai
Ye achchaa naseeb tumhaara aur hamaara hai
Ki pyaare Guruji ne hum sabko sweekaara hai

Guruji ka sabse pyaara darshan
Hai hamaari antaratma mein
Jahaan Ve ruhaani taur pe sadaiv rehte Hain
Aur hamaare liye jo uchit hai, veh humse kehte Hain

Chaahe hamein Guruji nazar naa aayein
Hum sabke naseeb mein Unn ka divya pyaar hai
Aur Ve hum sabko har pal dekh rahein Hain
Is satya se sabko milta karaar hai

Guruji har kshan hamein sambhaal rahei Hain
Hamaari har saans is sachchaayee kee hai gavaah
Hum sabka jeevan dhanya hua hai kyunki
Hum sabko Guruji kee sharan mein milee hai panaah

🌹🌹🌹🌹🌹🌹🌹

Jai Guruji 🙏🏻🙏🏻
Dhirja