Month: April 2020

April 30, 2020

Om Namaha Shivaya
Aaj Ka Suvichaar 🙏🏻🙏🏻 # 802

    Shanti, Shuddhi, Sampannataa

Paisa, dhan, aishon aaraam
Sab yaheen reh jaana hai
Kuch bhi toh saath nahin jaana
Jabb antt vela aana hai

Yeh zindagi toh darasal mithya hai
Mrityu hai par satya
Isliye maut se darna chod dein
Kyunki maut hee hai tathya

Har din hum behtar insaan banein
Apni kamzoriyon par kaam karein
Taaki bhavishya mein purani galatiyon ko na doharayein
Aur har din vikaaron se duur honei kee koshish karte jaayein

Yeh bhi ek safar hai, isliye samay se hee tayy hoga
Lekin Guruji hamaare sangg Hain, isliye na koi bhayy hoga
Hum kya anuchit soch ya kar rahein hain, hamaari chetna ko hai khabar
Aur har soch aur karam ka ho raha hai hamaare bhavishya par asar

Apna nijee safar hai ye har insaan ka
Lekin sab ko ashish mila hai Bhagwaan ka
Sabko alagg alagg samay par manzil milegi
Karmanusaar niyati kee chakri phiregi

Uddhaar kee disha mein phir jaaye toh hai achchaa
Lekin uskey liye bann na hoga changaa aur sachchaa
Neki kee oar liya har kadam safar ko chhota banaa sakta hai
Aur mukti kee manzil par thoda sheeghr pahuncha sakta hai

Apni taraf se kar lein prayatna
Ki swayam mein sudhaar laayein har din
Lekin yeh mumkin nahin
Niswaarthtaa aur shradha ke bin

Isliye Shukrana ke saath guzarish karein
Ki Guruji hamaare paap harein
Aur jo buddhi aur jaagriti Ve Hain de rahey
Hum uske dwara apni yatra poori karein

Hamaari neeyat aur koshish ko Guruji pehchanate Hain
Kitne nishkapat aur nekneeyat hain hum, Ve bhali bhanti jaante Hain
Hamaara behtar insaan bann na Guruji ko dega prassannataa
Aur hamein milegi shanti, shuddhi, aur sampannataa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 29, 2020

Om Namaha Shivaya
Aaj Ka Suvichaar 🙏🏻🙏🏻 # 801

        Mann Kee Mayl

Kaash mann kee mayl bhi
Tann kee mayl jaise aasaani se dhul jaati
Kaash hamaare burey karmon kee khaad
Aaney waale janmon kee mitti mein na ghul paati

Lekin aisa nahin hai
Aur yahee toh sahi hai
Kyunki Trilokinath ne banaaya hai ye kaayda srishti ka
Aur har oar dekhne ka hunar hai Unkee divya drishti ka

Guruji MahaShiv ke avataar Hain
Saare sansaar ke parwardigaar Hain
Ve kehte Hain hamein, “Banda bann”
Taaki swachh rahe hamaara mann

Itna toh kartavya bantaa hai hamaara
Ki jis tann aur mann ke bina nahin hai hamaara guzaara
Unhe har insaan swachh rakhey aur swasth rakhey
Aur na khaaye agle janmon mein dhakkey

Tabhi toh Bade Mandir se bhi pehle
Guruji ne chaar mandir bataaye Hain
Mann, tann, kamra, aur ghar
In mandiron ke mahatva samjhaayein Hain

Jab Guruji hamaara maargdarshan kar rahey Hain
Toh hamein toh keval Unke vachanon par hai chalna
Aur apne karmon par dhyan dekar
Guruji ke bataaye saanche mein hai dhalna

Jhooth aur maadi baaton se
Hum hee bhogenge din raat ashaanti aur pareshaani
Har pal agar ye dhyan rahe ki Guruji sab dekh rahe Hain
Toh hamein banda bann ne mein yakeenan hogi aasaani

Guruji ke kahe anusaar
Chod dein anuchit karam karne kee naadaani
Aur Guruji kee pyaar bhari prerna se
Saral aur satyapoorna banaayein hum apni zindagaani

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 28, 2020

Om Namaha Shivaya
Aaj Ka Suvichaar 🙏🏻🙏🏻 # 800

         Yahee Hai Mauka

Yahee hai mauka
Na apne aap ko de aur dhokha
Apni galatiyon par gaur kar le
Simran thoda aur kar le

Maafi maang le apne kiye kee
Jyot jalaa le dil ke diye kee
Sewa se punya kamaa le
Satsang se bigdee banaa le

Samarpan kar le Guruji ko Ve Hain Bhagwaan
Sach bol le kyunki ye jeevan toh hai imtehaan
Mrityu toh nishchit hai kyunki janam hua hai
Shukrana kar le unka jinhonei teri atma ko chhua hai

Khaaskar Unka jinhonei chot pahunchaayi hai
Kyunki Unkee badaulat teri raah aur bhi zyada ruhaani ho paayi hai
Shukrana kar Guruji ka jinhonei liya hai tere karmon ka bhar
Shukrana karte karte apne gunaahon kee maafi maang le baar baar

Bholenath Hain Guruji, tere bhaav ko samajh jaayenge
Koshish kar ke dekh le, tere bhaag sulajh jaayenge
Guruji ka anusaran kar le, raasta Ve dikhaayenge
Guruji se har baat kar le, Ve sab kuch sunn paayenge

Tere bin boley bhi Ve jaan lenge
Teri neeyat Ve pehchaan lenge
Tu chaahe bekhabar hai Unkee shakti se
Lekin Ve poori tarehn se waakif hain teri bhaavna aur bhakti se

Khud se tu beshak chhupa sakta hai kuch, lekin Guruji se na chhupa paayega
Tu bulaayega pyaar se, toh phir thode hee na Unse rukaa jaayega
Tu jabb bhi jahaan bhi Unhe pukaarega, Ve aayenge zaroor
Unhe achchaa lagega agar tu chod dega karna gharoor

Ve tera har pal dhyan rakhte Hain, toh tu bhi toh Unhe khush rakhney ka yatna kar
Saadagi, sachchaayee, achchaayee apnaane ka tu prayatna kar
Zindagi ka kya bharosa hai, aaj ya kal le lega tu apni antim shwaas
Jo tujhe antt takk sambhaalega, Vo hai tera Guru aur Unpar tera vishwaas

Kyunki tere har janam ke safar mein Guruji hongei tere saath
Aur tu chaahe chod de, magar Ve kabhi na chodenge tera haath
Guruji ke ashirwaad bin har din lagta hai amaavas kee dishaheen raat
Gaur farmaa le ispar, bade patey kee hai yeh baat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 27, 2020

Om Namaha Shivaya
Aaj Ka Suvichaar 🙏🏻🙏🏻 # 799

             Moam Ke Putle

Moam ke putlon ko dekha hai kabhi?
Kitne sajeev lagte hain, magar hotey hain naklee
Vaise hee toh hain hum sab bhi
Maalum hee nahin chalega ki kab shareer se jaan niklee

Dikhaawe ke liye ye putle khade rehte hain
Apni laachaari kee kahaani kehte hain
Ek pal ka astitva bhi inke haath mein nahin hai
Koi sachcha saathi bhi saath mein nahin hai

Kitne loag inhe saraahne ke liye aayenge
Lekin ye akele hee hongei jab ye pighal jaayenge
Kisee se apni dastaan na keh paayenge
Pighalne par moam kee dheri bann ke reh jaayenge

Hum bhi darasal in putlon kee tarehn hain
Guruji ne hee hamein sambhaala hai
Phir bhi kyun vyarth ka vehem humne paala hai
Ki hamein maut ka saaya kabhi na chhoone wala hai

Ek pal mein ye saansein ruk jaayengi
Jab antim bela aayegi
Tabb shareer ke sangg ahankar bhi ho jaayega nasht
Lekin vikaaron ke sanskaaron se atma ko hoga kasht

Kyunki ye atma sanskaar lekar kisee aur shareer ka vaahan banegi
Aur na jaane moksh ke intazaar mein kitnee lambi yatra karegi
Har janam mein atma par sanskaar judte jaayenge
Achche aur burey sanskaar, jo atma kee niyati banaayenge

Isliye ek putle se dooje mein na jaana pade atma ko
Kyun na aisee koshish toh kar lein
Guruji kee oar dhyan lagaakar
Atma kee gaagar ko achche sanskaaron se bhar lein

Taralta, komalta, nirmaltaa ke jal se
Seenchein hum apni atma ko
Niswaarth prem aur vinamrataa se
Naman karein Guru parmatama ko

Taaki hamaare moam shareer ke sanche mein basee
Atma ko suavsar miley shuddhi ka
Aur Guruji kee vaddi vadiyaayee hai
Atma ko ujaala miley is gyan aur buddhi ka

Phir moam roopi nashwar shareer
Nahin bigaad sakega atma kee taqdeer
Atma mein sadaa basegi Guruji kee mokshdaayi tasveer
Aur atma mukt ho paayegi toadkar karmon kee zanjeer

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 26, 2020

Om Namaha Shivaya
Aaj Ka Suvichaar 🙏🏻🙏🏻 # 798

      Simar Simar Simar Lein Naam

Guruji ka naam hee
Hamein bhav saagar ke paar utaarega
Guruji ka naam simrega jo
Veh simran se jeevan sanvaarega

Simar simar simar lein naam
Maanav jeevan ka rakh lein maan
Sadaa rahein jo sangat par meharbaan
Maang lein Unn Guruvar se bhakti daan

Simran hee bachaa sakta hai atmataras se
Simran hee hai shikaayat ke marz kee davaa
Simran se krodh shaant hota hai
Simran se poori hogi jagg ke kalyan kee dua

Simran se ehsaas hota rahega
Ki hum kitne khushnaseeb hain
Bahuton se zyada hai hamaare paas
Aur hum Guruji ke kareeb hain

Simran karne se zakhm jaldi bhar jaayenge
Simran se hum ruhaani raaste par badh paayenge
Simran se hoga har beemari aur peeda ka ilaaj
Simran se sanvar jaayenge saare kaaj

Jeevan kee asthirtaa ka ehsaas
Kabhi kabhi shaayad hamein bhool jaata hai
Simran mein aisa hunar hai
Ki veh har bhooli baat yaad dilaata hai

Simran yeh bhi yaad dilaata hai
Ki anuchit hai jhooth aur jhooth ka saath
Simran se hee swayam ke mann mein jhaank kar
Kar sakte hain hum swayam se atma nirmaan kee baat

Hamaare hee achche ke liye
Vyavhaar mein bhi aayega parivartan
Lekin sachchi koshish karni hogi
Jis se nikhar jaayega hamaara Guru vandan

Guruji ke bina toh hum hain dukhiyaare
Kyun dar dar phirein hum maare maare
Yeh dil Guruji ko kabhi na bisaare
Ve toh Param parmeshwar Hain hamaare

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 25, 2020

Om Namaha Shivaya
Aaj Ka Suvichaar 🙏🏻🙏🏻 # 797

    Jitnee Bhi Ho Yeh Zindagaani

Guruji ka roop noorani
Guruji kee hai bahut meharbaani
Jitnee bhi ho yeh zindagaani
Ispar sadaa rahey Guruji kee nigraani

Har raaste par Ve sangg chalein
Unke hotey huey chaahe lakh sooraj dhalein
Jabb Unkee sharan mein hee basera hai
Toh zindagi ka har pal savera hai

Guruji ka prem hai saari sangat ke liye ek samaan
Ek taraf baaki sab, dooji taraf Guruji jo Hain Bhagwaan
Baaki sab chhoot jaaye, Guruji ka dar na chhoote
Saara jagg chaahe rooth jaaye, Guru kabhi na roothe

Har vipatti ka samaadhaan hai Guruji ke paas
Buss, hamein rakhna hai shradha aur saboori ke sangg vishwaas
Waqt beet raha hai, veh nahin rukega
Yahee waqt Guruji ke aagey zaroor jhukega

Guruji ka prataap hai aparampaar aur anant
Isee se mahamaari ka bhi hoga antt
Karmon ka hisaab saath saath Guruji katvaayenge
Aur niyati dobaara likh kar anarth se bachaayenge

Haath thaama hua hai bhakton ka Guruji ne
Yoon beech majdhaar mein Ve kabhi nahin chodenge
Khivaiya Hain Ve bhakton ke jeevan kee naiya ke
Bhakton kee raksha ke liye Ve har tufaan ke rukh ko modenge

Krodhit samundar ko kar denge shaant Guruji
Bhakton ko simran ke liye de rahei Hain ekaant Guruji
Ye mauka hai Guruji ke aur bhi kareeb aane ka
Ye safar hai bigda hua naseeb banaane ka

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 24, 2020

Om Namaha Shivaya
Aaj Ka Suvichaar 🙏🏻🙏🏻 # 796

   Rasna Par Hai Pukaar

Bhakton ka dil hai tarse
Ki Maalik kee mehar jald barse
Andhere se ghabraa raha tera insaan
Ummeed kee sehar dikha de Aye Bhagwaan

Kalyuga mein samajh baitha insaan
Ki vo khud hee hai Bhagwaan
Itnee badi gustaakhi ho gayi insaan se
Abb maafi maangta phir raha hai Bhagwaan se

Guruji, Aap sabka maargdarshan keejiye
Safaltaa deejiye chaahe pareeksha leejiye
Aapke sikhaane se har koi toh nahin seekh paaya
Isliye kaam krodh lobh moh ahem ne hai sabko sataaya

Tammanna sabke mann mein hai
Rasna par hai pukaar
Guruji, Aap MahaShiv Hain
Aap Hain taaranhaar

Beda paar kar deejiye Aap
Aapki kripa se duur hon santaap
Aapki mahima, Aapka prataap
Isee se dhul sakte hain hamaare paap

Sabko apni bhool ka ho jaaye ehsaas
Sabhi sudharne ka kar lein prayaas
Sakaratmakta hogi jabb vaataavaran mein
Sadbhaavna hogi jabb sabke chaal chalan mein

Tabb hee toh laut kar aayegi Satyuga kee bela
Lekin yeh kaam nahin kar sakta koi bhi akela
Is samay kee yeh majboori hai
Ki sabhi ka yogdaan zaroori hai

Isliye Aap sotey huon ko jagaayiye
Sabke chitt mein jaagriti laayiye
Ahem ka libaas tyaag kar sabb neeven bann jaayein
Aur sab apne karmon dwaara dharti par swarg banaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 23, 2020

Om Namaha Shivaya
Aaj Ka Suvichaar 🙏🏻🙏🏻 # 795

               Guru Kripa

Guru kripa bin buddhi na aaye
Guru kripa bin moh maya sataaye
Guru kripa bin sansaar bojh laage
Guru kripa bin praani hon abhaagey

Guru kripa bin dil ho jaaye bechayn
Guru kripa bin hon andhere mein nayn
Guru kripa bin mann kee mayl na dhul paaye
Guru kripa bin jeevan mein vikaar ghul jaaye

Guru kripa bin sab rishtey bhi sataayein
Guru kripa bin duniya ke chakkar uljhaayein
Guru kripa bin sukoon na miley kaheen
Guru kripa bin ajnabi lagey ye aasmaan aur ye zameen

Guru kripa bin mann mandir kee jyot na jaley
Guru kripa bin koi kaaraj na phaley
Guru kripa bin kaise shudh hon vichaar
Guru kripa bin sab hai bekaar

Guru kripa se aantrik sukh ka suman khiley
Guru kripa se antaratma ko shanti miley
Guru kripa se tarr jaaye mann
Guru kripa se safal ho jeevan

Guru kripa se shikaayat shukrana mein badal jaaye
Guru kripa se kumm mein bhi tripti zyada aaye
Guru kripa se Guru naam laagey sabse anmol gehna
Guru kripa se dil chaahe Guru naam mein sadaa magn rehna

Guru kripa se pavitra ho jaaye shwaas
Guru kripa se dridh ho atma vishwaas
Guru kripa se hee paap dhulein
Guru kripa se hee Govind milein

Isliye Guru kripa kee aas tu kar le
Guru ko paane ka prayaas tu kar le
Guru naam japne ka abhyaas tu kar le
Guru naam jap kar Guru kripa se jholi bhar le

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 22, 2020

Om Namaha Shivaya
Aaj Ka Suvichaar 🙏🏻🙏🏻 # 794

        Kar Le Tu Naam Kee Bandagi

Na koi mol hai paison ka
Na heere moti ka hai kaam
Guruji ko rijhaana hai
Toh kaam ka hai keval Guru naam

Naam ka hee vajood hai
Naam ko jap le bande
Duniya toh maya ka mela hai
Chalte rahenge duniyawi dhande

Achcha insaan ban ne kee
Prerna milegi Guru naam se
Antarmann ekaagrachitt hoga
Saakshaatkaar hoga Guru dham se

Antarmann mein jo andhera hai
Veh Guru naam se hoga duur
Jo ahem insaan mein koot koot kar bhara hai
Guru naam hee kar sakta hai usey chuur

Isliye Guru naam kee jyot jalaa le mann mein
Roshni aa jaayegi jeevan mein
Naam se hogi badhauti asal dhan mein
Ruhaani shakti aayegi spandan mein

Naam hee sabse pehle thaa
Naam hee sabke baad bhi reh jaayega
Kar le tu naam kee bandagi
Varna antt vele bahut pachhtaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 21, 2020

Om Namaha Shivaya
Aaj Ka Suvichaar 🙏🏻🙏🏻 # 793

 Shukrana Mein Sees Jhukaao

Ghar mein rehne ka Shukrana karo
Achchi sehat ke ashirwaad se jholi bharo
Tum kehte ho ki ghar baithey mann pareshaan ho jaaye
Unka socho jo aspataal se ghar laut kar hee nahin aaye

Socho unke baare mein jinhonei khoya hai apnon ko
Aur apnon ke sangg hee khoya hai na jaane kitne sapnon ko
Thodi samvedna laao apne dil mein Unke liye
Jinhonei jaan par khelkar jalaaye hain tumhaare liye ummeed ke diye

Aur jo har roz apni jaan kee parvaah kiye bina
Beemaaron kee sewa kar rahe hain taan ke apna seena
Arey tum toh ghar mein baithey ho aaraam se
Phir kyun shikaayat karte ho tum Bhagwaan se?

Ghar mein rehkar kar rahe ho tum sewa samaaj kee
Mahamaari ko na phaylaana hee bahut badi zaroorat hai aaj kee
Itna aasaan hai tumhaare yogdaan ka tareeka
Phir bhi kyun nahin rakhte Shukrana ka saleeqa

Kar lo simran, kar lo satsang, parivaar ke sangg waqt bitaao
Ghar kee safaai kar lo aur mann kee mayl bhi hataao
Baatein karo ghar waalon ke saath, aapas mein khel lo thoda
Kalyuga mein sab apne mein hee vyast thei, lekin haalaat ne sabko hai joda

Is nikat-taa ka le lo tum anand prassannataa se
Khush raho apni aur apne parivaar kee sampannata se
Shikaayaton ke toh kitne mauke milte hain
Lekin jo shukraguzaar hon, Unhe toh Bhagwaan milte Hain

Guruji shaayad chaahte Hain sabko sikhaana
Guruji shaayad chaahte Hain sabko samjhaana
Ki insaanon ko insaan bankar rehna chaahiye, pashu bankar nahin
Vikaar aur galat kaam chod dene chahiyein, aur raasta apnaana chaahiye sahi

Tumhaara ghar mein rehna toh kuch dinon ya hafton kee baat hai
Lekin aisa nahin hai unke liye jinka hameshaan ke liye chhoota apnon ka saath hai
Koi beemaar hokar chal basaa, kisee ne unkee sewa karte huey apni saans chod di
Socho kaise jee rahe hain unke sambandhi, jinse taqdeer ne hee nazar moad lee

Isliye kar lo khud ko neevan aur karo Shukrana
Ki tumhaare paas hai rehne ke liye thikaana
Tumhe toh sirf manaa hai ghar se baahar aana jaana
Unka socho jinke paas khaane ke liye nahin hai aaj khaana

Isliye aankhein thodi num kar lo
Dil ko sahaanubhuti se bhar lo
Apni soch mein parivartan laao
Aur Shukrana mein tum sees jhukaao

🌹🌹🌹🌹🌹🌹🌹

Jai Guruji 🙏🏻🙏🏻
Dhirja