Month: April 2020

April 20, 2020

Om Namaha Shivaya
Aaj Ka Suvichaar 🙏🏻🙏🏻 # 792

   Aap Hee Toh Hain Sachche Meet

Guruji, Aap Hain kalyaan ke mahasaagar
Bhar deejiye sansaar kee vandana kee gaagar
Insaaniyat ke ashirwaad se
Changi sehat ke prashad se

Guruji, kripa kar duur keejiye mahaamaari ko
Khatm kar deejiye vikaaron kee bhi beemari ko
Deejiye hum sabko subuddhi
Keejiye hamaare mann kee shuddhi

Aapke simran mein hum ramm jaayein
Aap sangg hon jidhar bhi hum jaayein
Taaki sanvar jaaye hamaari antaratma kee aakriti
Aur hamaare bheetar aa jaaye yeh jaagriti

Ki jis saadagi se Aap chaahte Hain ki hum
jeeyein
Vahee saadagi sukhdaayee hai
Aur jitna moh maya mein phansey hum
Jeevan utnaa hee dukhdaayee hai

Kyunki kabhi na hogi tripti
Aur phir kaise milegi mukti?
Jhooth aur fareb ka tyaag karna hee hoga
Jisne bhi ye na kiya, usne iska anjaam hai bhoga

Koi mukaabalaa nahin hai ye, ye toh zindagi hai
Ek hee sachchaayee hai yahaan, veh Aapki bandagi hai
Bhautik padaarthon kee daud mein aaj takk koi na jeet paaya
Lekin jisko Aapne sweekaara Guruji, uss shaqs ne Khuda aur meet paaya

Phir aur koi tammanna kee kya zaroorat aur kya faayda
Kyun na chod dein gumaan aur mithyaabhimaan ka kaayda
Guruji, Aapse hee hum lagaa lein preet
Aakhir Aap hee toh Hain sachche meet

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 19, 2020

Om Namaha Shivaya
Aaj Ka Suvichaar 🙏🏻🙏🏻 # 791

Safal Hoga Jeena Aur Marna

Sthirta hogi jabb mann mein
Tabhi toh sunn sakenge hum antaratma kee awaaz
Samanvay hoga jab chitt ka vichaaron ke saath
Tabhi toh samajh aayenge ruhaani raaz

Is sthirta aur samanvay ke liye zaroori hai
Ekagrachitt hokar simran karna
Simran ko apni jeevanshayli mein pirohna hoga
Bhatak jaayenge hum varna

Guruji kee sharan mein simran ka anand hai
Lekin simran kee bhookh lagni zaroori hai
Guruji kahein tu kaheen bhi simran kar sakta hai
Kisee kaayde kee nahin koi majboori hai

Guruji jabb maanav roop mein thei
Toh bhi bhakton se kehte
Ki jabb bhi jahaan bhi simran karne se
Ve suntey kyunki Ve Hain dil mein rehte

Sadh sangat ke sangg honei se
Jaagrit hoti hai prerna simran kee
Aur ekaant kee bhi apni hee khoobi hai
Pyaas badhaane mein Guruji ke smaran kee

Jabb jabb aayegi antaratma kee awaaz
Jaise jaise maalum chalenge ruhaani raaz
Vaise vaise aur bhi gehra hoga Guruji kee maujoodagi ka ehsaas
Aur saath hee saath badhti jaayegi simran kee pyaas

Buss phir simran ke rass mein ramm kar beet jaayegi ye zindagi
Itna nirmal anand laayegi simran se bhari bandagi
Simran se prem badhega, nahin padega Guruji se darna
Guruji ke prati niswaarth prem se safal hoga jeena aur marna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 18, 2020

Om Namaha Shivaya
Aaj Ka Suvichaar 🙏🏻🙏🏻 # 790

Aapka Haardik Abhinandan

Divya mehek Aapki, kabhi gulab toh kabhi chandan
Ujjwal noor Aapka aur itna sakaaratmak Aapka spandan
Kasht tal jaayein kar ke Aapka vandan
Param gyani Guruji, Aapka haardik abhinandan

Shaant, nirmal, nirvikaar
Parampita aur paalanhaar
MahaShiv, niraakaar
Pyaare pyaare Guruji, Aapko namaskaar

Aapke charnon mein hai har teerath dham
Aap Neelkanth Hain, aur Aap hee Hain Shyam
Aap hee Hain maryaadapurushottam Ram
Param poojya Guruji, Aapko saadar pranaam

Shudh hai Aapka har swaroop
Viraat hai Aapka Shiv roop
Prem aur satya hain Aapki bhaasha
Har bhakt ka sukh hai Aapki abhilaasha

Chaahiye nahin Aapko kuch bhi apne liye
Aur hum sab ko kitne vardaan Aapne Hain diye
Sampoorna srishti ke Shehenshah Hain Aap
Brahmand ke Badshaah Hain Aap

Aapki bhakti mein leen rahein, aisa deejiye var
Galatiyon ke liye kshamaa keejiye, khadein hain hum dono kar jodkar
Kabhi bhi bhool kar bhi na chodein Aapka dar
Hamaari baahein thaame rehna, agam agochar Guruvar

Aapki kripa se hee raaste kee baadhaayein hain hatt paayeen
Aap hee Hain Isa Masih, Aap hee Hain Sai
Aapse hee ho hamaari kahaani khatm, kyunki Aapse hee hui shuru
Aap Hain Khuda, Aap hee Hain Wahe Guru

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 17, 2020

Om Namaha Shivaya
Aaj Ka Suvichaar 🙏🏻🙏🏻 # 789

Yeh Vintee Kripa Kar Sweekaar Leejiye

Pyaare Guruji,

Is jahaan ke rangg manch kee katputliyaan hain hum sab
Hamaare karmon ke alaawa kuch aur hamaare vash mein nahin
Phir bhi hum mein se koi shaayad hee hoga
Jo apne karmon kee vajeh se kashmakash mein nahin

Kehna aasaan hai lekin mushkil hai karna
Lekin karam achche hon toh nahin padta hai darna
Aankhon par patti toh hamaare bandhi hai, Aapki aankhon par nahin
Phir bhi na jaane kyun hamaare karam nahin hotey sahi

Swami hamaare, itnee mohalat de dena sabko
Ki apni galatiyon kee maafi maang sakein
Jiska dil dukhaaya ya jis se jhooth kahaa humne
Usey sach kehne kee himmat rakh sakein

Maafi maang bhi lein aur maaf bhi kar dein
Apne karmon ka zimma swayam par le lein
Kya maalum kab yahaan se chal padne kee ghadi aa jaaye
Tabb shaayad koi apna kareeb na aa paaye

Bakshiye aise ki jagg se jaane se pehle
Paapon ka praayashchit yaheen par ho jaaye
Karmon ka bhaar halka ho
Jabb yahaan se jaane kee bela aaye

Aap toh itne dayaalu Hain
Jo Apne charnon mein jageh dee hai Aapne
Inhee charnon mein raahat paayi hai
Hamaare har dukh aur santaap ne

Anginat upkaar hain Aapke hum sab par
Kar ek aur upkaar deejiye
Inhee charnon mein rehne dena hamein
Yeh vintee kripa kar sweekaar leejiye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 16, 2020

Om Namaha Shivaya
Aaj Ka Suvichaar 🙏🏻🙏🏻 # 788

                      Ye Lamhe

Ye lamhe hain parivartan ke
Swayam mein, swayam ke drishtikoan mein
Ye lamhe hain sudhaar ke
Vichaar mein aur vyavhaar mein

Ye lamhe hain buraayiyon se mudne ke
Ye lamhe hain Guruji se aur bhi zyada judne ke
Ye lamhe hain jaagrit honei ke
Na ki ahem kee neend mein sonei ke

Ye lamhe hain apni gyan kee pyaas bujhaane ke
Ye lamhe hain Guruji ko rijhaane ke
Ye lamhe hain khud ko azmaane ke
Ye lamhe hain doojon ko maaf kar paane ke

Ye lamhe hain simran aur smaran ke
Aur Guruji ke dhyan aur manan ke
In lamhon ko na jaane do vyarth
In lamhon ka pehchaano arth

Ye lamhe achche se bitaa lo
Ghar kee aur mann kee mayl nikaalo
Dono se hee bojh kum hoga
Aur pehle se zyada shaant mann hoga

Ye lamhe hain Guruji ka Shukrana karne ke
Ye lamhe vishwaas ke hain, na ki darne ke
Jitna ho sakey, sakaaratmakta phailaao
Ek bhi pal Guruji ko na bisraao

Sewa karo har pal samaaj kee
Ye zaroorat hai khaaskar aaj kee
Praaniyon ka hai vishaal vansh
Tum bhi toh ho isee ka ansh

Is vansh kee raksha karne mein do sehyog
Tum kar lo Guruji ka sikhaaya hua Shiv yog
Changey insaan bano aur changey kaam karo
In lamhon mein satyuga ke swaagat ka intazaam karo

Ye lamhe bhi beete huey lamhon ke jaise
Ret kee tarehn haath se nikal jaayenge
In lamhon ka sadupyog karoge
Toh ye ek madhur yaad bann ke reh jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 15, 2020

Om Namaha Shivaya
Aaj Ka Suvichaar 🙏🏻🙏🏻# 787

         Azaadi Ka Adbhut Anand

Ye samay phir laut ke na aayega
Kar le simran varna bahut pachhtaayega
Kya hai yahaan tera jo tu saath lekar jaayega
Kewal Guru ka naam hee saath lekar jaa paayega

Isliye kar le Guruji ke naam kee kamaayee
Guruji ka naam hee hai ek sachchaayee
Baaki sab kuch Guru naam ke bina vyarth hai
Kewal Guru naam ka hee vajood aur arth hai

Simran hai saadhan Guruji se judey rehne ka

Simran hai sahaara har dard ko sehne ka

Simran marham hai har uss ghaav ka jo apnon ne diya hai

Simran ilaaj hai har uss marz ka jo insaan ne apni atma ko diya hai

Kyunki simran se hee atma ko milegi shakti
Simran se hee badhegi bhakti
Simran se hee hogi atma kee shuddhi
Simran se hee aayegi subuddhi

Simran hee hai yog sadhna
Simran se hee swayam ko baandhna
Kyunki yahee bandhan mukti kee oar le jaayega
Isee bandhan se azaadi ka adbhut anand aayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 14, 2020

Om Namaha Shivaya
Aaj Ka Suvichaar 🙏🏻🙏🏻 # 786

Rasna Par Ho Guruji Ka Naam

Rasna par ho Guruji ka naam
Mann mein ho Guruji ka dhaam
Phir chaahe ho subah chaahe ho shaam
Guruji tera haath har pal lenge thaam

Zaroorat nahin hai tujhe darne kee
Buss zaroorat hai vishwaas karne kee
Vishwaas apne Guru kee shakti mein
Taaki Unkee mehar barsey teri bhakti mein

Guruji toh baithey hee dene ke liye Hain
Bhakton ke liye Unhonei vish ke pyaale bhi piye Hain
Phir kyun nahin dhyan denge Ve teri baat par
Kyun nahin Ve rehem karenge tere haalaat par

Buss tu Unnpar chod de apni khairiyat ka khayaal
Ve MahaShiv Hain, Bholenath aur deen dayaal
Tere kashton ka Ve zaroor nivaaran karenge
Tere jeevan ke veerane chitr mein rangg bharenge

Maayoosi se na kar apni zindagi ko neeras
Satsang aur simran mein gurbani ka tu pee ras
Abhi nahin hui hai khatm teri kahaani
Guruji karam kaat kar sanvaarenge teri zindagaani

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 13, 2020

Om Namaha Shivaya
Aaj Ka Suvichaar 🙏🏻🙏🏻 # 785

     Baisakhi Ka Tyohaar

Guru Gobind Singh ke maargdarshan se
1699 mein banaa Khalsa panth
Upjee hui fasal ekatrit karne ka aaya samaa
Baisakhi par hua pichhle varsh ka antt

Baisakhi ka tyohaar apne sangg hai laaya
Nayi asha aur naya varsh
Kasht aur roag ke duur honei kee ummeed se
Har oar chhaaya hai harsh

Guruji sansaar par aayi mushkil par
Lagaa rahein Hain Apni divyataa ka marham
Taaki vishwa ka sankat duur ho
Aur chayn kee saans le sakein hum

Saath hee saath hum bhi
Apna kartavya nibhaayein
Insaaniyat kee khaatir apna sehyog dein
Aur Guruji ko rijhaayein

Guruji ke naam mein hum khoyein
Achche karmon ke beej hum boyein
Niswaarth sewa aur simran karein
Guruji ko sab samarpan karein

Beej changey honei se
Fasal changee hogi antt mein
Har tyohaar uphaar hoga
Jab Guruji ka naam hoga dil aur kanth mein

Kisaanon ke khet jaise hotey hain harey bharey
Kuch vaisa hee hoga atma kee jot bhumi ka ruhaani rangg
Guruji toh dene ke liye tayyaar baithey Hain
Buss, hamein hee badalna hai hamaare jeene ka dhangg

Kyun na vikaar rikt karma aur vichaar rakhein
Jaisa hamaare poojya Guru kahein
Aur aaj Baisakhi ke shubh avsar par
Aglee Baisakhi kee tayyaari shuru karein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 12, 2020

Om Namaha Shivaya
Aaj Ka Suvichaar 🙏🏻🙏🏻 # 784

   Na Ghabraa Tu Andheri Raat Se

Na ghabraa tu andheri raat se
Sukh kee sehar abb nahin hai duur
Na darr tu kisee bhi baat se
Guruji kee mehar raksha karegi zaroor

Ye mehar toh yugon se barasti aa rahi hai
Guruji ne tujhse ye baat kayee baar kahi hai
Shaayad toone pehle nahin samjhaa isliye abb samajh le
Shaayad tu pehle thaa bahut uljhaa lekin abb sulajh le

Taqleef aayi hai jaane ke liye
Aur tujhe yaad dilaane ke liye
Ki tu mehez ek insaan hai
Aur tujh se shreshth tera Bhagwaan Hai

Guruji toh Maalik Hain is srishti ke
Hum sab mohtaaj hain Unkee drishti ke
Apne vash mein jo bhi hai hum kewal vahee kar sakte hain, kuch aur nahin
Guruji kee soch aur Unke tareeke divya hain, aur hameshaan hotei hain sahi

Unhee ke kehne par sooraj aur chand aayein
Unhee ke hukm se baarish aaye aur chalein hawaayein
Guruji toh abb bhi madad karna chaahein
Isliye thaamne de tu Unhe apni baahein

Unkee kripa se aayegi suraksha kee sunehri sehar
Kar le tu Unka sachche dil se dhyan har pehar
Tera jeevan sach mein safal ho jaayega
Guruji kee sharan mein tu jannat ko paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 11, 2020

Om Namaha Shivaya
Aaj Ka Suvichaar 🙏🏻🙏🏻 # 783

              Nidravastha Se Jaag

Naadaani ke anant andhere mein
Tu kabb takk khota rahega?
Agyaan kee chaadar odhe
Tu kabb takk sotaa rahega?

Is nidra se nahin milega tujhe aaraam
Jabb takk tu na paayega Guruji se gyan
Isliye abb tu is nidravastha se jaag
Agyaan kee chaadar ko tu tyaag

Kalyuga ke is kohare mein
Kabb takk beimaani ka saath tu deta rahega?
Agar tu na jaaga, toh tu hee hai abhaagaa
Kyunki tu mayle paani mein apni gaagar bhigotaa rahega

Guruji ke sangg swaarth ka rishta kar ke
Kabb takk maang maang kar Unse leta rahega?
Maango nahin, manno, Guruji ne sikhaaya hai hameshaan
Kabb takk is hukm ka ullanghan kar ke swayam ko dhokha deta rahega?

Guruji toh kshamaasheel Hain
Unse maang le maafi
Unhe sarvsamarpan kar de
Tere uddhaar ke liye yahee hai kaafi

Kyunki tera saara zimma Guruji Apne par le lenge
Aur tujhe tere haq se kaheen zyada khushiyaan Ve de denge
Yoon hee toh nahin ye saari sangat Unkee deewaani
Unhonei sanvaari hai sabki hee zindagaani

Beemaaron ke roag kiye Guruji ne duur
Ghamandiyon ka ahem kiya Unhonei choor
Har oar chhaaya hua hai Unka noor
Tu bhi pukaarega toh Ve aayenge zaroor

Khuli kitaab hai tera jeevan Unke saamne
Tujhe sweekar kar aayenge tujhe thaamne
Toone toh buss pyaar aur shradha se sir ko jhukaana hai
Aur apne mann ko mai se khali kar Unhe mann mein bithaana hai

Na kar abb tu is shubh kaam mein vilambh
Kar le apne ruhaani jeevan ka shubh aarambh
Jahaan Guruji ke sangg judee ho teri atma
kee taar
Aur tere dil se Unke liye Shukrana nikle baarambaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja