Month: April 2020

April 10, 2020

Om Namaha Shivaya
Aaj Ka Suvichaar 🙏🏻🙏🏻 # 782

           Jeevan Diya Hai Aapne

Pyaare Guruji,

Aapke divya prem kee badaulat hum jaanein fark dharam aur adharam mein
Aapki dee hui chetna se shreshthta laa paayein hum apne karam mein
Aap hee kar sakte Hain upkaar
Taaki badkismati na aaye hamaare dwaar

Aapki aradhana se badhkar kuch bhi nahin
Aapki mehare nazar se har kaaj ho sahi
Aap hee mitra Hain, Aap hee Hain bhraata
Aap hee Hain naath, Aap hee Hain mata

Kripa keejiye ki Aapke ashish ke amrit se
Pavitra ho jaaye hamaara mann
Rehmat aisee keejiye ki Aapki upaasna se
Shudh ho jaaye hamaara jeevan

Har pal karein hum Aapka chintan
Shradha se karein hum Aapka vandan
Dayaalu kripaalu Guruvar, safal keejiye hamaari upaasna
Karte hain hum dil se Aapse kshamaa yachna

Aapke dikhaaye huey raaste par chalein
Aapse na darein aur burey kaam na karein
Baaghbaan Aap Hain, lekin karam toh hain hamaare
Sansaar behtareen ho jaaye agar har koi yeh vichaare

Apne se jodey rakhna hamein, isee mein hai hamaari suraksha
Kyunki kewal Aap hee kar sakte Hain har kasht se hamaari raksha
Uddhaar kiya hai Aapne, paalanhaar Hain Aap
Jeevan diya hai Aapne, praanon ka aadhaar Hain Aap

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 9, 2020

Om Namaha Shivaya
Aaj Ka Suvichaar 🙏🏻🙏🏻 # 781

            Sunn Le Unkee

Guruji kee kripa se khatm hoga kashton ka toofan
Sunn le Unkee, kyunki Ve Hain Ishaan
Guruji sab sambhaalenge chaahe toofan ho bhayankar
Sunn le Unkee, Ve Hain Shiv Shankar

Guruji kahein, tu reh saavdhaan
Sunn le Unkee, Ve Hain Bhagwaan
Guruji kahein, tu bilkul na darr
Sunn le Unkee, Ve Hain Ishwar

Guruji kahein, tu karta chal niswaarth sewa
Sunn le Unkee, Ve Hain Devadhideva
Guruji kahein, Unko tu sarvsamarpan kar
Sunn le Unkee, Ve Hain Parmeshwar

Guruji kahein, Unhonei thaama hai tera haath
Sunn le Unkee, Ve Hain Trilokinath
Guruji kahein, na kar tu kisee prakaar ka sanshay
Sunn le Unkee, Ve Hain Mrityunjay

Guruji kahein, langar hai teri dawaai
Sunn le Unkee, Ve Hain poojya Sai
Guruji kahein, Unke naam mein ho jaa madhosh
Sunn le Unkee, Ve Hain Ashutosh

Guruji kahein, jod le tu Unse nirmal nata
Sunn le Unkee, Ve Hain Guru ke roop mein Mata
Guruji kahein, har mushkil ka hoga antt
Sunn le Unkee, Ve Hain Neelkanth

Guruji kahein, der se hee sahi, simran kar le shuru
Sunn le Unkee, Ve hee Hain Wahe Guru
Guruji kahein, na kho tu apni hansee
Sunn le Unkee, Ve Hain Isa Masih

Guruji kahein, Unka dwaar bhakton ke liye sadaa hai khula
Sun le Unkee, Ve Hain Maula
Guruji kahein, Ve denge tujhe bhakti ka var
Sun le Unkee, Ve Hain Gangadhar

Guruji kahein, tera koi nahin hai Unke siva
Sunn le Unkee, Ve Hain Mahaan MahaShiva
Guruji kahein, apni antaratma mein karne de Unhe pravesh
Sunn le Unkee, Vahee Hain Brahma, Vishnu, aur Mahesh

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 8, 2020

Om Namaha Shivaya
Aaj Ka Suvichaar 🙏🏻🙏🏻 # 780

      Pal Pal Kal Kee Fikr Na Kar

Guruji tere saath Hain har kadam par
Tu chalta chal, buss chalta chal
Apna uttardayitva zaroor sambhaal tu
Aur waqt ke saanche mein dhalta chal
Mushkilon ka baar baar zikr na kar
Pal pal kal kee fikr na kar

Waqt ka saancha bhi Guruji ke niyantran mein hai
Isliye har ghadi, har lamha hai Unkee nigraani mein
Tere har karam ko Ve parakh rahei Hain
Ye baat tu rakh yaad zindagaani mein
Unse pyaar kar, Unse bilkul bhi na darr
Pal pal kal kee fikr na kar

Guruji sab sambhaal rahein Hain
Toone akele koi kasht kahaan sahei Hain
Maanav jeevan mein karmon ka karz toh chukaana hoga
Insaan ko Bhagwaan ke saamne sir toh jhukaana hoga
Guruji tere liye tere dukh lenge har
Pal pal kal kee fikr na kar

Tere bin boley hee Unhe tere sankat kee hai jaankaari
Chaahe veh ho dhan se judee museebat ya phir koi beemaari
Phir bhi kehne ka mann hai toh tu Unse keh daal
Har haal mein Ve tere kasht denge taal
Isliye jeete jee tu na mar
Pal pal kal kee fikr na kar

Unn jaisa dayaalu aur koi nahin
Unn jaisa kripaalu aur koi nahin
Ve bakshanhaar Hain, Ve paalanhaar Hain
Ve murshid Hain, Ve taaranhaar Hain
Kal, aaj, aur kal ka Unhe shukr kar
Pal pal kal kee fikr na kar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 7, 2020

Om Namaha Shivaya
Aaj Ka Suvichaar 🙏🏻🙏🏻 # 779

     Aapke Naam Ke Bina

Pyaare naath, jagat ke pyaare swaami
Hey Parampita Guruji, poojya antaryaami
Aisee kripa keejiye ki hamaare mann ka bhakti bhaav kabhi na ho khandit
Aisee mehar barsaayiye ki Aapke prem se na hon hum kabhi bhi vanchit

Jab raasta bhi Aap Hain aur manzil bhi Hain Aap
Toh phir ghabraane kee koi baat nahin
Aapne haath thaama hai hamaara
Is se suhaana aur sukhdaayee koi saath nahin

Isliye sadaa hamein Apna deewaana bann kar jeene dena
Apni rehmat ka amrit sadaa hamein peene dena
Maya ke khinchaav se phatt gayi hai hamaare mann kee chaadar
Aap hamein Apne prem ke dhaagon se isey seene dena

Har saans Aapki mohtaaj hai aur rahey, aisa hee karna prabandh
Aapke sangg ho jaaye hamaara har janam ka sambandh
Uddhaar ho jaayega jo is tarehn se jaayenge Aapke saath hum bandh
Aur hamaare safar ke har moad ko mehkaayegi Aapki divyataa kee sugandh

Chaahe hon khushi ke lamhe, chaahe hon gumm ke kshan
Har pal dena daata Aap Apne naam ka dhan
Kalyuga kee Lanka ho ya ho satyuga ka Vrindavan
Abb toh kaheen bhi Aapke naam ke bina lagta nahin hai mann

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 6, 2020

Om Namaha Shivaya
Aaj Ka Suvichaar 🙏🏻🙏🏻# 778

            Jidhar Dekhoon Mai

Pyaare Guruji,

Koi ghazal mein karey Aapki taareef
Koi geet mein Aapke gunn gaaye
Aap Hain Apne har bhakt ke kareeb
Har pal mann mein Aapke simran kee dhun chhaaye

Koi kavitaaon mein Aapki mahima bayaan karey
Koi apni shaayari ke gulistaan mein Aapkee prashansa ke phool bharey
Kisee gaayak ke bhakti sangeet mein Aap samaaye
Toh koi apne nritya dwaara Aapke Shiv avataari roop ke baare mein bataaye

Phoolon kee khoobsoorati mein Aapki chhavi basee hai
Har bhakt ke chehre par Aapki hee dee hui hansee hai
Jabb se Aap dil mein basein Hain, akelapan ho gaya hai duur
Abb toh har waqt har oar chhaaya hua hai Aapki divyataa ka noor

Jo bhi jud jaaye Aapse, Aap uss bhakt ke dil ko lete Hain jeet
Itna ruhaani rishta hai Aapse aur itnee pyaari hai Aapki preet
Bhakton ke bin kahey hee Aap dil kee baat lete Hain jaan
Insaan ke roop mein aaye Aap, par Hain Aap saakshaat Bhagwaan

Lafzon mein kahein, ya geet gungunaayein
Aap dil mein karein vaas aur aankhon kee namee mein samaayein
Aapke hukm se hee rukh badlein ye hawaayein
Jidhar dekhoon mai, mujhe toh buss Aap hee Aap nazar aayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 5, 2020

Om Namaha Shivaya
Aaj Ka Suvichaar 🙏🏻🙏🏻 # 777

       Simran Ke Beej Se

Guruji ke shradhapoorna simran se
Kumm ho jaaye gunehgaar kee sazaa
Aaj nahin toh kal zaroor uss bhakt ka uddhaar ho jaaye
Jo bhakt maanta chale Guruji kee razaa

Guruji ke naam ke simran ne toh
Mrityu takk hai rukvaayee
Guruji ke naam ka simran karo
Guru naam kee hai vaddi vadiyaayee

Simran ke beej se jo aadarshwadi ankur le janam
Veh sach mein sanvaar de bhakt ke karam
Jaagriti, neevenpann, aur sachchaayee kee kaliyaan karein naman
Sadaachaari aur nipuntaa ke khil jaayein suman

Simran kee shakti se apraadhi ka dand maaf ho jaaye
Simran kee mahima se simarne waale ka dil saaf ho jaaye
Jitna simran karenge hum, hamaare liye achchaa hai
Kyunki chaahe baaki sab jhooth ho, Guru ka naam toh sachchaa hai

Na aawashyakta phursat kee, na chaahiye koi shubh mahurat
Simran karna toh hai har insaan kee zaroorat
Simran se yakeenan hamaara uddhaar hoga
Simran se hee jeevan mein sudhaar hoga

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 4, 2020

Om Namaha Shivaya
Aaj Ka Suvichaar 🙏🏻🙏🏻 # 776

                   Kabb Takk

Kabb takk tu karega ‘mai’ aur ‘mera’
Abb toh maan le ki ye sabb nahin tera
Jabb na ye atma teri, na hee tera astitva tera
Toh tera nahin hai ye ‘mai’ aur ‘mera’

Maati ka putla hee toh hai tu
Mitti se aaya hai aur mitti mein hee mil jaayega
Oopar waale ke haath mein teri saanson kee doar hai
Uske bina toh tu bilkul bhi na hil paayega

Ye ‘mai’ toh sach mein mahaamaari hai
Bahut hee gambhir ye beemari hai
Jis bhi insaan kee atma-shakti is beemari ke aagey haari hai
Ye bann gayee uss shaqs kee sabse badi laachaari hai

Tabhi toh Guruji kehte Hain
Is ‘mai’ ko tu bilkul chod de
Achchi sangati ke sangg raha kar
Vikaaron se tu muh moad le

Kabb takk imaan ko jokhim mein daal kar
Ahankaar bhara jeevan tu jeeta rahega
Abb toh prakriti ne bhi apni mahima dikhaayee phirse
Abb bhi kya ahem ka ghoont peeta rahega?

Maan le abb toh Guruji kee baat
Aur na kar nainsaafi apne saath
Sabke shareer mitti mein mil jaayenge
Ye paap aur ye karam hee saath jaayenge

Paramatama ne bheja atma ko dharti par
Dekar kshanbhangur libaas nashwar insaan ka
Aur insaan apni ‘mai’ mein yoon kho gaya
Ki bhool hee gaya ye ehsaan Bhagwaan ka!!

Ye saansein, ye tann, mann, dhan, kuch bhi toh nahin hai apna
Phir kyun dekhta rehta hai tu adhkhuli aankhon se mithya ka sapna
Agar sach mein safal karna hai ye jeevan
Toh ho lene de tu Parmatama se atma ka punar milan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 3, 2020

Om Namaha Shivaya
Aaj Ka Suvichaar 🙏🏻🙏🏻 # 775

                  Nishchay

Nishchay se shuru hoti hai ruhaani sadhna
Nishchay se hee shuru hoti hai Guruji kee aradhana
Nishchay moksha kee manzil ko paane ka
Nishchay Guruji ke nakshe kadam par chalte jaane ka

Nishchay lobh aur maya ka aakarshanon se oopar uthne ka

Nishchay satya aur neevenpann ke samaksh jhukne ka

Nishchay saansaarik baaton mein na ulajhne ka

Nishchay Guruji ke hukm anusaar khud bhi sulajhne ka

Nishchay insaaniyat ke dharam ka paalan karne ka
Nishchay imaan aur neevenpann se har karam karne ka
Nishchay ki Guruji se pyaar karenge, Unse darenge nahin
Nishchay ki vahi karenge jo Guruji ko lagta hai sahi

Nishchay Guruji se judey rehne ka
Nishchay vikaaron se mudey rehne ka
Nishchay niswaarth sewa aur simran ka
Nishchay Guruji ke shravan aur manan ka

Nishchay ki Guruji ko karenge sarv samarpan
Nishchay ki Unhee ko paane ke dhyan mein rahega mann
Nishchay ki Guruji par sadaa atoot hoga vishwaas
Nishchay ki atma aur shareer ke kann kann mein hoga buss Guruji ka vaas

Nishchay ki maanenge Guruji kee hidaayat
Nishchay ki chod denge karna shikaayat
Nishchay ki karenge har pal Guruji ka Shukrana
Nishchay ki kisee bhi kshan Guruji ko nahin bisraana

Nishchay ki Guruji ke hukm anusaar sadaa sachchaayee apanaayenge
Nishchay ki Guruji kee kripa se antardrishti (introspection) hum badhaayenge
Nishchay ki jeete jee har pal Guruji ke gunn gaayenge
Nishchay ki antt vele mein bhi Guruji ka naam lete huey is jagg se jaayenge

Nishchay aur nishtha se tayy karenge ye ruhaani safar
Nishchay se yaad rakhenge ki Guruji kee har pal hai hum par nazar
Nishchay karne ka nishchay nibhaayenge
Sadaa Guruji ke charnon mein sees jhukaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 2, 2020

Om Namaha Shivaya
Aaj Ka Suvichaar 🙏🏻🙏🏻 # 774

                  Uth Jaag Musaafir

Uth jaag musaafir
Himmat kar, tu himmat kar
Guruji tere saath Hain
Isliye tu bilkul na darr
Unke haathon mein tere haath hain
Isliye tu yoon jeete jee na marr
Uth jaag musaafir
Himmat kar, tu himmat kar

Kalyuga ka bhanvar aaya hai toh kya hua
Aaj ya kal guzar jaayega ye daur
Tere maanav janam ka maqsad
Is sabse parey hai kuch aur
Apni manzil aur apne raaste par
Zaraa tu abb kar le gaur
Uth jaag musaafir
Himmat kar, tu himmat kar

Guruji ne tujhe sweekaara hai
Aur saumpa hai tujhe farz
Sansaar ke sudhaar mein yogdaan dene ka
Taaki kumm ho tere karmon ka karz
Isliye sachchaayee aur neki ka saath de
Na bann is behti bheed mein tu khudgarz
Uth jaag musaafir
Himmat kar, tu himmat kar

Tera sabse anmol gehna
Guruji ke prati teri bhakti hai
Is gehne ka sabse bahumoolya heera
Is bhakti se utpann honei waali shakti hai
Phir kyun teri chetna aur teri jaagrookta
Zamaane ke jhooth aur fareb se haarti aur thakti hai?
Uth jaag musaafir
Himmat kar, tu himmat kar

Guruji kehte Hain
Ki maree hui machhlee hee bahaav ke sangg hai behti
Zaraa dhyan aur itminaan se soch
Is vachan mein chhupi baat tujhse kya hai kehti
Tu samajh gaya hai ya samajh jaayega isey zaroor
Kyunki teri antaratma mein kaheen toh chetna hai rehti
Uth jaag musaafir
Himmat kar, tu himmat kar

Abb bhi zyada der nahin hui
Apna uttardayitva sambhaal le
Guruji chaahte Hain tu sachkhand pahunche
Isliye apne karam sanvaar le
Anyaaya aur anuchit vichaaron ka saath chod
Aur apne vichaar aur vyavhaar ko sudhaar le
Uth jaag musaafir
Himmat kar, tu himmat kar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 1, 2020

Om Namaha Shivaya
Aaj Ka Suvichaar 🙏🏻🙏🏻 # 773

                        Zidd 

Neend bhi aa rahi ho toh
Zidd ke liye apni neend se lado
Duniya agar vyarth ke chakkaron mein phansey
Tum zidd poori karo aur na unn chakkaron mein pado

Zidd simran karne kee
Zidd sewa karne kee
Zidd vehem se na darne kee
Zidd andhvishwaas se ladne kee

Zidd Guruji ko yaad karne kee
Zidd jagg kalyaan ke liye fariyaad karne kee
Zidd apne mann mandir ko shabad se aabaad karne kee
Zidd apni antaratma ko oopari bandhanon se azad karne kee

Phir der kis baat kee hai
Guruji ka naam lene kee zidd kar lo
Baaki baat apne apne jazbaat kee hai
Chaaho toh zidd se apna hit kar lo

Aisee zidd ka kar lo maan
Aisee zidd se swayam se kar lo pehchaan
Aisee zidd se duur kar lo apna abhimaan
Aisee zidd se kar lo Guruji ka dhyan

Aisee zidd hoti hai vardaan
Kyunki aisee zidd se hota hai kalyaan
Is zidd se khush hongei Bhagwaan
Is zidd se mitega bheetar ka shaitaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja