Month: May 2020

May 31, 2020

Om Namaha Shivaya
Aaj Ka Suvichaar 🙏🏻🙏🏻 # 833

 Arpit Karein Shradhanjali

Girne lagenge hum, toh hamein uthaayenge Guruji
Roney lagenge hum, toh mukh par muskuraahat laayenge Guruji
Jab bhi hum pukaarenge, zaroor aayenge Guruji
Kyunki Guruji yaheen Hain, hamaare angg sangg

Bhatakne lagenge hum, toh raasta dikhaayenge Guruji
Kadam na badhe hamaare, toh chalna sikhaayenge Guruji
Zindagi bikhar jaaye, toh naye sire se kahaani likhwaayenge Guruji
Kyunki Guruji yaheen Hain, hamaare angg sangg

Bashar roop mein nahin Hain Guruji toh kya hua
Hum sab par har pal amrit bann kar baras rahi hai Unkee dua
Unka ashirwaad hai har rogi kee divya dawaa
Unkee maujoodagi ka sandesh deti hai ye hawaa

Unke nirankaar roop ko hum maanein
Unke niraakar roop ko hum pehchaanein
Unkee ruhaani khushboo ko mehsoos karein
Unkee kripa se apni jholi bharein

Guruji yaheen Hain, hum sabke paas
Kitna sukhdayee hai yeh ehsaas
Ve samajhte Hain hamaare dil kee baat, chaahe bolein ya na bolein hum
Ve jaante Hain hamaare mann kee dashaa, chaahe hamein khushi ho ya ho gumm

Seedhi taar judee rahei sadaa Guruji se
Yeh tamanna buss ho jaaye poori
Guruji se yeh pyaara aur anmol rishta banaa rahei
Buss, Unse kabhi bhi na ho duuri

Duniyavi manch par toh kirdaar badalte rahenge
Waqt kee behti dhaara ke sangg kuch rishte bhi bahenge
Guruji kee kripa se hum har utaar chadhaav ko sahenge
Guruji ne hee srishti banaayee aur Ve hee anant takk rahenge

MahaSamadhi lekar Guruji huey aur bhi prataapi aur shaktimaan
Devon Ke Dev Hain Ve, poori kaayinaat ke Bhagwaan
Aur koi kar nahin sakta jo hamaare Guruji kar sakte Hain
Tabhi toh bhaktjann Unkee mahima gaate nahin thakte Hain

Aaj ke din apne Guruji, apne Bhagwan ko
Aayiye arpit karein shradhanjali jhukakar apna sheesh
Guruji ke vachan bin tark vitark ke maanein
Aur shraddha se Shukrana kar ke lein hum Unka ashish

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 30, 2020

Om Namaha Shivaya
Aaj Ka Suvichaar 🙏🏻🙏🏻 # 832

         Aapki Mehar Kee Sehar

Pyaare Guruji,

Raaste ke kaante honei lagey kum
Aapki vinamr ibadat se
Khushi mein badal gaya gum
Aapki ibadat kee inaayat se

Har mushkil ka hal mil paaya
Aapke magn manan se
Dil mein bhakti ka noor khil paaya
Aapke sumangal smaran se

Bheetar ka darpan honei lagaa saaf
Aapki dee hui chetna se
Insaan insaan ko karne lagaa maaf
Aapki dee hui chetna kee prerna se

Aur bhi zyada ho jaaye hamaari bhakti
Aapke chandanmayi charan mein
Aur bhi zyada ho jaaye hamaari shakti
Aapki sheetal sharan mein

Dil se nikla dhanyawaad baarambaar
Aapki taraltaa aur nirmaltaa ke liye
Shukraguzaar hain hum Aapke
Aapki komalta aur saralta ke liye

Aapki kripa se har vehem duur ho
Aur atma-bal badh jaaye hamaara
Aapki karuna se ahem chuur ho
Aur antar-mann tarr jaaye hamaara

Raahein ujjwal hain ho gayeen
Aapki mahima aur mehar se
Abb toh roshni har taraf hai chhaa gayi
Aapki mehar kee sehar se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 29, 2020

Om Namaha Shivaya
Aaj Ka Suvichaar 🙏🏻🙏🏻 # 831

         Guruji Ka Dhyan

Din charya ke kaam kaaj toh hongei hameshaan
Inke kaaran Guruji ka dhyan na khona
Dukh aur vikaar bhi jeevan mein karenge pareshaan
Lekin inse tum vyaakul na hona

Jitna vikaaron se duur rahoge, Guruji ko paaoge apne utna hee kareeb
Jitna samarpan karoge Unhe, utna hee Ve sambhaalenge tumhaara naseeb
Isliye sarvsamarpan karna hai sabse achchi tarkeeb
Phir kabhi na mehsoos karoge tum swayam ko gareeb

Yaad rahey ki hamaara mukhya lakshya hai har pal paana Guruji ka saath
Kabhi bhi itne unmatt na hona ki na kar paao Guruji se tum baat
Kabhi bola na jaaye toh aankhon se keh dena
Aur jo bhi haalaat aaye usey seh lena

Guruji ke kehne par rukh badal leti hai hawaa
Guruji kee manzoori ho toh asar laati hai dua
Guruji agochar Hain magar sunte Hain tumhaari sadaa
Guruji hee Parameshwar Hain, Unke sangg tum nibha lo wafaa

Tumhaara koi haalaat Guruji se nahin chhupa Hai
Tumhaara kalyaan Guruji dwaara kabhi nahin ruka hai
Tumhaare adhiktar karam swayam par lekar tumhaara kalyaan kar rahey Hain Guruji
Tumhe toh maalum bhi nahin chal sakta ki tumhaare liye kya kya kasht seh rahey Hain Guruji

Tark ya akal lagaakar koshish bhi na karna maalum karne kee
Ye tumhaare buss kee baat nahin
Jismein Guruji kee kripa na ho tum par
Aisee koi saugat nahin

Ve hee kar sakte Hain aisa
Kyunki Ve MahaShiv Hain, Parvardigaar Hain
Poori Srishti mein aur kisee mein yeh kshamta nahin
Isliye kewal Guruji hee hamaare madadgaar Hain

Kann kann par hai Guruji kee hukoomat
Tum buss bharosa rakho aur karo ibadat
Nakaar do shikaayat ka har bahaana
Har moad par karte chalo Unka Shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 28, 2020

Om Namaha Shivaya
Aaj Ka Suvichaar 🙏🏻🙏🏻 # 830

 Apne Se Kabhi Bhi Judaa Na   Karna

Apne se kabhi bhi juda na karna mujhe aye Maalik
Yeh dukh na mai seh paaoongi
Apne aanchal mein Aapki bachchi bann kar jeene dena
Toh mai phooli nahin samaaoongi

Aap aagey aagey chalna mere pyaare Guruji
Mai Aapke peechhe chalti jaaoongi
Aapke diye noor se nikhroon Aapki kripa se
Varna toh mai shaam kee tarehn dhalti jaaoongi

Aapki mahima gaaoon din raat
Varna yeh awaaz kis kaam kee
Aapke devatva kee taareef karoon
Varna yeh likhaayee bhi nahin kisee kaam kee

Aapke satsang sunoon aur sunaaoon
Taaki Aapka ashirwaad sangat aur mujhe milta rahey
Zamaane ke sitam na sataayein mujhe
Aapka pyaar mere har ghaav ko silta rahey

Yoon hee loag kehte hain ki Ve apne hain
Sach mein Apne toh kewal Aap hee Hain
Baaki sab toh mithya aur sapne hain
Satya aur tathya toh kewal Aap hee Hain

Aap Hain sampoorna jagat ke Bhagwaan
Aapne hee ruhaaniyat aur divyataa ka kiya hai nirmaan
Mai hoon ek naadaan insaan
Bhool chuk ke liye kripa kar ke dena kshama daan

Mai khushnaseeb hoon kyunki
Meri saanson kee doar Aapke haath mein hain
Mai ek pal ke liye bhi nahin gareeb hoon
Aap mere naath jo mere saath mein Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 27, 2020

Om Namaha Shivaya
Aaj Ka Suvichaar 🙏🏻🙏🏻 # 829

             Panchsheel

Guruji se karte hain hum pyaar
Toh kar lein thoda sa intazaar
Ve rahein Hain hamaare kaaj sanvaar
Unkee leela hai aparampaar

Waqt beeta jaa raha hai
Insaan jeeta jaa raha hai
Abb toh Guruji ka kehna maan lein
Unkee ichchaa ko jaan lein

Guruji kehte Hain hum banein sajjan
Kardein Guruji ko sarvsamarpan
Indriyon par niyantran rakhein bann kar damansheel
Sajjan bann-ne ke liye apna lein yeh panchsheel

Guruji par rakhein achal Vishwaas
Unkee praapti ke liye karein dridh Prayaas
Is dridh prayaas mein vikaaron ka nahin hai sthaan
Aur is prayaas mein simran, satsang, samarpan ka hai mahatvapoorna yogdaan

Sadh Sangat ka karein hum Sangg
Apne Dhyan mein bharein niswaarth shraddha ka rangg
Na karein kusangati ke kaaran apni tapasya ko bhangg
Niswaarth Sewa se shudh banaayein apne jeene ka dhangg

Aisa atal VISHWAAS aur aisa paawan PRAYAAS
Vikaar rahit aur ekaagrachitt DHYANABHYAAS
Guruji kee nishkapat SEWA aur saath mein SADH SANGAT aur satya ka sangg
Aise PANCHSHEEL se jeevan ke chitr mein bhar jaayega suhaana ruhaani rangg

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 26, 2020

Om Namaha Shivaya
Aaj Ka Suvichaar 🙏🏻🙏🏻# 828

 Guruji Pyaare Aaye Hain

Guruji pyaare aaye Hain
Hamein taarne ke liye
Jeevan sudhaarne ke liye
Srishti ko sanvaarne ke liye

Guruji pyaare aaye Hain
Simran kee saugat lekar
Simran mein dawaa kee daat lekar
Mehar kee mulaakaat lekar

Guruji pyaare aaye Hain
Mitaane vikaaron kee beemaari
Sikhaane sachchaayee aur sadaachaari
Giraane vehem kee chaar deewari

Guruji pyaare aaye Hain
Moh maya kaam krodh ko duur karne
Ahem aur madsar ko chuur karne
Hamaare bheetar noor bharne

Guruji pyaare aaye Hain
Karne hamein maaf
Karne hamaare dil ko saaf
Dilaane hamein insaaf

Guruji pyaare aaye Hain
Dheeraj rakhna sikhaane
Raasta hamein dikhaane
Manzil takk hamein pahunchaane

Guruji pyaare aaye Hain
Hamein sikhaane saraltaa
Hamein samjhaane taraltaa
Hamaari soch mein sajaane nirmaltaa

Guruji pyaare aaye Hain
Hamein aish karaane
Hamein insaaniyat sikhaane
Aur hamein ‘banda’ banaane

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 25, 2020

Om Namaha Shivaya
Aaj Ka Suvichaar 🙏🏻🙏🏻 # 827

       Roop Manohar Hai Guruji Ka

Roop manohar hai Guruji ka
Aur Ve Hain nirvikaar
Bashar ke roop mein aaye hamaare liye
Lekin Hain Ve MahaShiv niraakaar

Na kul ya gotra se kuch lena dena, na koi vehem
Na koi dikhaawe ka aadambar, na hee koi ahem
Swabhaav Unka saral aur taral
Dil itna komal aur nirmal

Guruji Hain karuna nidhaan
Sangat ke liye dete Hain balidaan
Har bhakt ke dil mein rehte Hain
Gurbani sun-ne ke liye kehte Hain

Kaise hisaab karte Hain hamaare karmon ka
Kab aur kaise Ve niyati likhte Hain dobaara
Kaise samay ko bhi vash mein karte Hain
Aur dete Hain hamein sahaara

Hamaare mein saamarthya nahin
Ki hum Unkee kisee bhi soch ko pehchaanein
Unkee leela kaisi hai
Yeh toh kewal Ve hee jaanein

Guruji toh ye chaahte Hain
Ki hum vikaaron ka upvaas karein
Aur Unhe sarvsamarpan kar ke
Unke charnon mein har shwaas dharein

Kyunki Ve hee bakshanhaar Hain
Aur Ve hee taaranhaar Hain
Greeshm ritu kee chhaaon ke roop mein Ve Hain
Aur sharad ritu kee meethi dhoop mein bhi Ve hee Hain

Har tarehn se hamein dena chaahein Guruji aaraam
Ve hee hamaare naath Hain aur hamaare Bhagwaan
Aur koi rakh sakta nahin hamaara itna khayaal
Unke pyaar se hum sabb ho gaye hain nihaal

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 24, 2020

Om Namaha Shivaya
Aaj Ka Suvichaar 🙏🏻🙏🏻 # 826

     Yahaan Abb Mann Lagta Nahin

Yahaan abb mann lagta nahin
Abb toh jee chaahta jaaoon vaheen
Jahaan hawaa mein niswaarthta kee mehek ho
Jahaan azaad parindon kee nirantar nidar chehek ho

Jahaan insaan insaan se prem karey
Jahaan vinamrataa se sabka aanchal bharey
Jahaan jhooth fareb na ho logon kee baat mein
Jahaan darr na ho din mein ya raat mein

Jahaan har oar ho Guru prem kee layy
Jahaan Guruji kee mahima ke prati na ho koi sanshay
Jahaan Guruji se sab niswaarth pyaar karein
Aur doojon ke darr kee vajeh se Guruji se na darein

Jahaan Guruji kee hoti rahei vadiyaayee
Jahaan buss Unkee hee mahima de sunaayee
Jahaan asatya ka ho jaaye pardaafaash
Jahaan satya se goonje dharti aur akash

Jahaan har asahaay ko mil jaaye sahaara
Jahaan koi bhi na rahei bechaara
Jahaan chayyn miley dukh aur santaap ko
Jahaan badhaava na miley paap ko

Jahaan pavitrataa kee kadar ho sadaa
Jahaan neevenpann kee sab mein ho adaa
Jahaan mann kee khoobsoorati mainey rakhey, dikhaawa nahin
Jahaan Bhagwaan ko shraddha aur prem diya jaaye, laukik chadhaava nahin

Shaayad yeh beeta hua satyuga hai
Lekin Guruji kee mehar se yeh laut kar aayega
Yahee ummeed ki jo aaj ka kalyuga hai
Ye vishay vikaar ko saath lekar jaayega

Janam hoga satyuga ka yaheen
Toh shaayad kaheen aur nahin jaane kee hogi zaroorat
Intazaar hai abb toh
Ki kab aayega yeh shubh mahoorat

Waqt kar de haseen vaada
Ki saari nakaaratmakta ko bahaa paayega
Guruji angg sangg Hain
Isliye yakeenan veh suhaana samaa aayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 23, 2020

Om Namaha Shivaya
Aaj Ka Suvichaar 🙏🏻🙏🏻 # 825

                  Ruhaani Aakriti

Nidravasthaa se hota hai atma ka punarnirmaan
Lekin shithiltaa se lagta hai adhyaatmik unnati ko poornaviraam
Isliye shithiltaa ko tyaag do
Adhyaatmik vikaas ke liye jaag lo

Yeh baat kewal sonei aur jaagne kee nahin hai
Ye hai aantrik chetna kee aur jaagriti kee
Kyunki karmic uddhar ke liye zaroorat hai
Rachna pavitra aur ruhaani aakriti kee

Jitna simran karenge hum, chetna badhti chalegi
Laukikta ke aakarshan kee jo mayl hai mann par, veh dheere dheere ghategi
Apni din-charya mein simran ko nigamit kar lo
Is simran mein prem, shraddha, aur dheeraj bhar lo

Saanson mein samaa jaayega simran
Har pal mann mein hoga simran
Udne lagegi mayl mann se
Sampann ho jaaoge simran ke dhan se

Sotey huey simran, jaagte huey simran
Sukh mein simran, dukh mein simran
Har vele mann mein chalta rahei simran
Toh awashya saaf hoga ye mayla mann

Yeh karne se koi nuksaan nahin
Balki hai faayda hee faayda
Kaheen bhi simran kar sakte ho
Iska nahin hai koi kaanoon ya kaayda

Guruji sarv-vyapi Hain, Guruji Hain sarv-shaktimaan
Tum simran kee lagan lagaao, Unhonei diya hai tumhe naam ka daan
Guruji ko chitt mein samaakar mitaa lo apni pehchaan
Aur Guruji se paa lo pavitra aur ruhaani aakriti ka vardaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 22, 2020

Om Namaha Shivaya
Aaj Ka Suvichaar 🙏🏻🙏🏻 # 824

Koshish Karein Khwaab Ko Sachcha Karne Kee

Kalyuga kee kala se kar lee kanchan kaaya
Apne vyaktitva mein samaa liya moh aur basaa lee maya
Itne badal gaye ki pehchaan na sakaa apna hee saya
Guruji ke bina hum kuch nahin, phir bhi yeh satya samajh na aaya

Maasumiyat toh kaheen peechhe chhoot gayi na jaane kabb
Har cheez mein dekha jaata hai faayda aur matlab
Jaante huey bhi insaan anuchit kaam kar rahe hain
Vikaaron kee aag mein kitnon ke imaan jal rahei hain

Guruji ke hum bhakt hain agar
Kyun bante hain Mann mukh
Koshish karein ki banein Gurmukh
Chaahe jeevan mein sukh aaye ya dukh

Jab takk haumai nahin chhootegi
Gurumukh ban-na namumkin hai
Agley janmon kee taqdeer humse roothegi
Aur haath se nikaltaa jaa raha har din hai

Guruji raasta dikhaa rahei hain
Par haumai kee patti aankhon par se hataani hogi
Guruji sadgunon kee daat dene ke liye baithey Hain
Lekin hamein apne chitt mein jageh toh banaani hogi

Har vikaar ko kyun na apne chitt aur charitra se kar dein judaa
Taaki humse prassann ho jaaye hamaara Khuda
Mann kee gaagar ko sadgunon aur sadbhaav se bhar lein
Apne bheetar sab satyuga ka nirmaan kar lein

Khwaab bhi lagta hai agar yeh, toh kyun na koshish karein is khwaab ko sachcha karne kee
Jab Guruji angg sangg Hain, toh koi zaroorat nahin hai kisee se bhi darne kee
Bheetar satyuga aayega, toh baahar bhi vahee spandan chhaayega
Har insaan swayam ko aur sansaar ko apni insaaniyat ka anmol uphaar de paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja