Month: May 2020

May 11, 2020

Om Namaha Shivaya
Aaj Ka Suvichaar 🙏🏻🙏🏻 # 813

    Saadho Saadho Guruji Ka Naam

Saadho saadho Guruji ka naam
Sukhdayee hai Guruji ka dhaam
Lete chaloge jo Guruji ka naam
Toh zaroor pahunchoge Guruji ke dhaam

Ye zaroori nahin ki aasaan hoga raasta
Mushkilein aane kee kaafi hai sambhaavna
Kyunki Guruji karam katvaate Hain hamaare
Isliye shradha aur saboori kee rakhein hum bhaavna

Raaste mein jo mushkilein aayengi
Guruji kee mehar se hal hoti jaayengi
Jab takk hogi dil mein bhakti aur chetna
Tabb takk Unkee har leela hogi ek prerna

Prerna vishwaas badhaane kee
Prerna chalte jaane kee
Prerna na dagmagaane kee
Prerna Guruji ko paane kee

Guruji ke ashirwaad bhare saath se
Raasta tayy hota chalega
Guruji ke naam ka amrit
Hamaare paapon ko dhota chalega

Antt mein dhaam takk pahunchne ke liye
Zaroori hain jalaane niswaarth prem ke diye
Vikaaron ko kabhi na kabhi toh tyaagna hoga
Jitnee jaldi ho sakey unse duur bhaagna hoga

Kyunki sansaar toh bewakoof bann sakta hai jhoothe dikhaawe se
Lekin Guruji har soch jaante Hain hamaari
Unke dhaam mein bholapan aur kharaapan kaam aata hai
Unkee kripa ho toh hee bhakt Unke dhaam jaa paata hai

Isliye kyun na hum koshish karein
Guruji kee chaahat anusaar swayam ko banaane kee
Aur Guruji se ardaas karein
Unke param paavan dhaam mein pravesh kee agya paane kee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 10, 2020

Om Namaha Shivaya
Aaj Ka Suvichaar 🙏🏻🙏🏻 # 812

      Subah Se Lekar Raat Takk

Subah se lekar raat takk badalta hai prakriti ka chehra
Lekin har pal har mukaam par rehta hai Guruji ka paawan pehra
Badalte huey mausam bhi Guruji ko jhuk kar salaam karte hain
Guruji har mausam ke chitr mein prakriti ke rangg bharte Hain

Ve hee toh Hain har kann kann mein viraajmaan
Unkee hee marzi se baadalon ko sambhaalta hai aasmaan
Unke hee hukm se hawaa aandhi se thamne ko kehti kai
Unhee kee mehar se nadiya apni disha kee oar behti hai

Guruji ke prataap se hee koi cheenti takk bhookhi nahin rehti
Unhee kee nadar se mahasaagar kee atma sookhi nahin rehti
Unkee daya se har pashu pakshi ka jeevan hai
Unkee kripa se maanav jaati ka bhi poshan hai

Phir kaisi chinta, kaisa shaq ya ghabraana
Jo vipatti aayi hai, usne ek din hai jaana
Kyunki Guruji kee mehar nirantar baras rahi hai
Aayegi veh subah, jo uday honei ko taras rahi hai

Chinta nahin karo, balki Guruji ka chintan karo
Vikaaron se nahin, balki achche vichaaron se dil ko bharo
Guruji itnee mehnat karte Hain, hamein bhi apna kartavya nibhaana hai
Achche aacharan aur sadbhavna se shubh aur shudh spandan phailaana hai

Guruji ke prataap aur ashirwaad se
Hamaare yogdaan aur paawan jazbaat se
Badalte mausam ke dhangg suhaane hongei
Prakriti ke rangg ruhaani hongei

Shubh kaam mein kaisi deri
Tyaag dein hum vikaaron kee dheri
Prashaanti aur pavitrataa ko hum galey lagaayein
Guruji ke aanchal mein hum sab tarr jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 9, 2020

Om Namaha Shivaya
Aaj Ka Suvichaar 🙏🏻🙏🏻 # 811

  Aap Hain Taruvar Vishaal

Guruji, Aap Hain taruvar vishaal
Mai mehez ek patta laachaar
Jeevit hoon Aapki dee hui oorja kee badaulat
Aapse judee rahoon jabb takk Aap de dein mohalat

Mujhe vaisa patta na bann ne dena
Jo patjhad mein ped se gir jaata hai
Aapse hai ye meri arzi
Kaash yahee ho Aapki bhi marzi

Apni kripa barsaayiye
Mujhe aisa patta banaayiye
Jo juda rahey Aapki baahon kee shaakhaaon ke saath
Kyunki Aap hee Hain mere sab kuch, mere Bholenath

Chaahe jaisa bhi tufaan aaye haalaaton ka
Mujhe na fark pade kisee kee baaton ka
Apne vishwaas mein dagamagaa na jaaoon
Sadaa Aapse jude rehkar atmabal paaoon

Shradha aur saboori salaamat rahey meri
Yeh vinamr guzaarish Aapse atma karey meri
Aap anant Hain, aye prem aur daya ke taruvar
Mujhe bhi sadaabahaar patta honei ka deejiye var

Bharee bheed mein na khone dena mujhe
Agyaanta kee neend na sone dena mujhe
Mujh patte se ek cheenti ko bhi madad mil jaaye toh apne ko samjhoongi khushnaseeb
Aapki dikhaayee raah par chaloon, taaki sadaa rahoon Aapke kareeb

Mera sanyam na kabhi bhi doley
Chaahe duniya kee bheed jo bhi boley
Aapkee ruhaaniyat kee buniyaad se paati rahoon mai dheeraj
Dua hai, ki is kalyuga mein mai banoon jaise keechad mein neeraj

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 8, 2020

Om Namaha Shivaya
Aaj Ka Suvichaar 🙏🏻🙏🏻 # 810

  Kaheen Phool Toh Kaheen Shool

Jeevan vatika mein kaheen phool toh kaheen shool hai
Kaheen sukh ke suman toh kaheen dukh kee dhool hai
Har haal mein hamaari raksha kar raha Guruji ka trishul hai
Guruji ka jaap aur beej mantra sarvottam aur mool hai

Isliye is samay ka karein sadupyog
Guru kee sharan mein seekhein ShivYog
Aakhir jeevan hai karambhog
Guruji milein Hain hamein, ye hai bahut hee shubh sanyog

Kaayinaat ka kaayda hee kuch aisa hai
Ki sukh ka suman sadaa nahin khila rahega, aur dukh kee dhool bhi udd jaayegi
Is dhoop aur chhaaon ke silsile mein
Zindagi apni waapasi ke liye mud jaayegi

Jo hai, veh yahee pal hai
Isey na jaane dein hum vyarth
Jitna simran hum karenge
Utna samjhenge in baaton ka arth

Samay aur srishti ke badalte rangon mein
Naam ka rangg sadaa hoga sabse gehra
Jisne naam ko kar diya sarvsamarpan
Uskee bhalaayee par sadaa hoga Guruji ka pehra

Phir chaahe ho tanhaayee ya ho tufaan
Chaahe akele hon ya saath ho saara jahaan
Kabhi bhi na mehsoos hogi laachaari
Guruji ka naam sadaa raksha karega hamaari

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 7, 2020

Om Namaha Shivaya
Aaj Ka Suvichaar 🙏🏻🙏🏻 # 809

Guruji, Aapka Varnan Kaise Karein

Guruji, Aapka varnan kaise karein
Jitne bhi alfaaz hon, ve kumm padein
Kripa kar is chhoti si koshish ko sweekaariye
Is Jai Jaikaar par Apni mehre nazar daaliye

Aap Hain mamta ka mahasaagar
Garima kee gaagar
Komaltaa ka kunj
Pyaar ka punj

Aap Hain Vadiyaayee kee vatika
Simran kee sarika
Udaarta ka upvan
Daya ka darpan

Aap hee Hain neevenpann ka nagma
Ruhaaniyat kee rasna
Gurbani ka geet
Saralta ka sangeet

Aap Hain taraltaa ka taruar
Saadagi ka sarovar
Amrit ka aangan
Saundarya ka saavan

Aap Hain kripa ka kinaara
Samarpan ka sahaara
Ashirwaad ka akash
Sakaaratmakta ka sakaash

Aap hee Divyataa kee duniya
Badappan kee bagiya
Nirmaltaa ka noor
Kanti ka kohinoor

Aapse hee zindagi shuru hamaari
Aap par hee ho khatm
Buss, hamein toh vaheen jaana hai
Jahaan le jaayein Aapke kadam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 6, 2020

Om Namaha Shivaya
Aaj Ka Suvichaar 🙏🏻🙏🏻 # 808

       Ik Ik Pal Hai Anmol

Aakhir sabko ek din hai marna
Isliye maut se kya darna
Darna chahiye burey karam se
Dosti karni chahiye dharam se

Dharam insaaniyat ka
Dharam ruhaaniyat ka
Hamaari madad karein Guruji, hamaare Parwardigaar
Taaki hameshaan ke liye duur ho sakein hamaare vikaar

Kyunki jab takk vikaaron ka prachaar rahega
Tabb takk kalyuga ka paakhand aur prahaar rahega
Chalna hamein hee hai, chaahe raasta Guruji dikhaate Hain
Anusaran hamein hee karna hai, unn sab baaton ka jo Guruji hamein sikhaate Hain

Ik ik pal hai anmol
Na jaane dein isey bekaar
Guruji ka hum simran kar lein
Sudhaar lein apne vichaar

Hamaare hee achche ke liye
Vyavhaar mein bhi aayega parivartan
Lekin sachchi koshish karni hogi
Jis se nikhar jaaye hamaara Guru vandan

Vichaar aur vyavhaar sudharne se
Vikaar mann mein ghar na banaa sakenge
Simran se mann shaktishali aur sthir banega
Aur hum vikaaron kee oar jhukne se bach sakenge

Jeevan kee asthirtaa ka ehsaas
Kabhi kabhi swayam ko shaayad bhool jaata hai
Simran mein aisa hunar hai
Ki veh is bhooli baat kee yaad dilaata hai

Simran hee yaad dilaayega
Ki Guruji ka ashirwaad hamaara ekmaatra sahaara hai
Guru naam ke simran ne toh
Anginat bhakton ko taara hai

Vikaaron ko tyaagne ka prayatna karein
Nirmaltaa ke noor se antaratma ko bhar paayein
Kyun na hum poori koshish karein
Ki Guruji kee kripa se hum tarr jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 5, 2020

Om Namaha Shivaya
Aaj Ka Suvichaar 🙏🏻🙏🏻 # 807

   Toh Hee Koi Baat Baney

Wafaa se bewafaai jo kee toone
Toh haath mein kuch nahin aayega
Wafa se wafa nibhaa kar dekh tu
Toh hee koi baat baney

Bahut saare logon se rishtey jodna
Koi aisee badi baat nahin hai
Guruji se judey rishtey ko gehra banaa le
Toh hee koi baat baney

Khushi ke aansoon hon
Toh saath mein muskuraana aasaan hai
Gumm ke aansoon mein tu muskuraa le
Toh hee koi baat baney

Apne liye jeene kee koshish
Har koi kar leta hai
Neevenpann se doojon ke liye kuch kar le
Toh hee koi baat baney

Sab changaa chal raha ho
Toh Guruji par vishwaas salaamat rakhna aasaan hai
Sab changaa na honei par bhi jo tu vishwaas rakhey
Toh hee koi baat baney

Jyotish ke aagey sir jhuka kar
Kismat ka lekha bahut loag maan lete Hain
Lekha phir se likh dene waale Guruji ke aagey sees jhuka
Toh hee koi baat baney

Guruji se kuch milne ke baad
Shukrana toh tu kar hee dega
Har saans ka Shukrana kar ke jeeta chal
Toh hee koi baat baney

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 4, 2020

Om Namaha Shivaya
Aaj Ka Suvichaar 🙏🏻🙏🏻 # 806

           Guruji Tere Meet Hain

Guruji tere meet Hain
Teri antaratma ka sangeet Hain
Tere dil kee preet Hain
Isliye kaisa ghabrana

Guruji teri himmat Hain
Guruji teri taakat Hain
Guruji teri ibaadat Hain
Isliye kaahe ka darr jaana

Guruji tere naath Hain
Guruji tere saath Hain
Guruji Bholenath Hain
Isliye kaisa hichkichaana

Guruji divya prakash Hain
Guruji sakaraatmak sakaash Hain
Guruji dharti aur akash Hain
Isliye kaisa bhatak jaana

Guruji tere janmadaata Hain
Guruji tere annadaata Hain
Guruji tere bhraata Hain
Isliye kyun sanshay mein aana

Guruji tera ateet Hain
Guruji tera vartmaan Hain
Guruji tera bhavishya Hain
Isliye Unhee ke bharose tu chalte jaana

Guruji tere paalanhaar Hain
Guruji tere taaranhaar Hain
Guruji tere bakshanhaar Hain
Isliye tu karta chal Unka Shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 3, 2020

Om Namaha Shivaya
Aaj Ka Suvichaar 🙏🏻🙏🏻 # 805

      Guruji Bade Dilwaale Hain

Koi niyam nahin, koi upvaas nahin
Koi dikhaawe ka prayaas nahin
Guruji ke dhang niraale Hain
Guruji bade dilwaale Hain

Koi pravachan nahin, koi ahem nahin
Koi kaanoon nahin, koi vehem nahin
Guruji aish karaane waale Hain
Guruji bade dil waale Hain

Saadagi Unhe pasand, bholapan Unhe laage achcha
Khud bhi Hain nirmal, Ve chaahein Unka har bhakt ho sachcha
Guruji sangat ko taarne waale Hain
Guruji bade dilwaale Hain

Khud jaagte Hain taaki hum chayn kee neend soyein
Raasta dikhaate Hain taaki hum kabhi na khoyein
Guruji manzil par pahunchaane waale Hain
Guruji bade dilwaale Hain

Gupt paath, daan, sewa karne ko kehte Hain
Sangat ke liye itne kasht Ve sehte Hain
Guruji kashton ka nivaaran karne waale Hain
Guruji bade dilwaale Hain

Bin hamaare boley Ve hamaare mann kee baat jaante Hain
Bin hamaare kahey hamaari aslee neeyat pehchaante Hain
Guruji karmon ka hisaab rakhne waale Hain
Guruji bade dilwaale Hain

Adhiktar karam hamaare Ve swayam par le lete Hain
Jitna ho sakey, hamein kasht kum kar ke dete Hain
Guruji udaarta barsaane waale Hain
Guruji bade dilwaale Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 2, 2020

Om Namaha Shivaya
Aaj Ka Suvichaar 🙏🏻🙏🏻# 804

Har Din Pehle Se Behtar Insaan Banoon

Mai gunehgaar Guruji maaf karein
Mera maylaa mann Ve saaf karein
Mai raah mein bhatkoon toh Ve sahi disha dikhaayein
Mai bhaybheet ho jaaoon toh Ve bahadur bann na sikhaayein

Har din pehle se behtar insaan banoon
Is duniyawi ghar pariwaar ke kaam aa sakoon
Guruji, madad keejiye is prayaas mein
Taaki koi kamee na reh jaaye is aas mein

Aap raasta dikhaate jaayein, mai chalti jaaoon uspar
Aap himmat bandhaayein, jab bhi mujhe laagey darr
Mera har pal aur bhi pakka ho vishwaas Aap par
Abb toh ek pal ke liye bhi na chhoote Aapka dar

Aapse simran kee daat milee, Aap se mil jaaye gyan
Gyan se aur gehra ho jaaye mera dhyan
Isee dhyan se Aapki bhakti ka rass aur badh jaaye
Aur atma ruhaaniyat kee manzil kee oar jaane waali seedhi chadh paaye

Uss seedhi par chadhaate samay mann kee shuddhi dena
Neevanpann badhta chaley, aisee subuddhi dena
Aapke sneh aur shikshan se mera anushaasan rahey barkaraar
Aapke pyaar aur ashirwaad ke liye Shukrana baarambaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja