Month: June 2020

June 20, 2020

Om Namaha Shivaya
Aaj Ka Suvichaar 🙏🏻🙏🏻 # 853

            Har Pal ‘Jai Guruji’ Bol

Na mushkil se ghabraa,
Apni himmat ko badhaa,
Chod de har shikva,
Guruji ke gunn tu gaa.

Chunauti ko sweekar kar,
Sankat se tu na darr,
Mann mein dheeraj dhar,
Guruji ka Shukrana kar.

Na tu kisee se dwesh kar,
Atma-shakti ke bal par mann ko aadesh kar,
Ruhaani taur par satyuga mein pravesh kar
Guruji kahein, tu aish kar

Agar toone kiya hai koi gunaah,
Agar toone koi sapna hai buna,
Agar toone koi raasta hai chunaa,
Guruji ko ye sab sakta hai tu suna.

Agar museebat khatkhataaye tera dwaar,
Agar samajh na aaye jeevan ka saar,
Agar sanshay ho tujhe baar baar,
Toh Guruji ko tu pukaar.

Agar rishton kee moh maya se ho tu pareshaan,
Agar duniya kee chaalaakiyon se ho tu hairaan,
Agar samasya ke samaadhaan se tu ho anjaan,
Toh Guruji ka kar le tu dhyan.

Agar tujhe tere apne de dein maat,
Agar tujhe jeevan lagey andheri raat,
Ya phir mil jaaye koi saugat,
Guruji se tu kar le baat.

Na hona ab tu daanva dol,
Guruji hege ne tere kol,
Kismat ka darwaaza khol,
Aur har pal ‘Jai Guruji’ bol,

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 19, 2020

Om Namaha Shivaya
Aaj Ka Suvichaar 🙏🏻🙏🏻 # 852

  Har Pal Jeevan Badal Raha Hai

Duniya ke kisee ek konei mein din hai,
Toh dooje konei mein hai raat.
Mausam bhi bhinn bhinn hai,
Lagti hai yeh svaabhaavik baat.

Har pal jeevan badal raha hai,
Kabhi ehsaas hota hai, kabhi nahin.
Guruji kee sharan mein hain toh jaanein,
Ki jo bhi ho raha hai, vahee hai sahi.

Is jeevan mein ek hee cheez nahin badalti,
Veh hai parivartan.
Guru simran se hee parivartan mein,
Sthir reh sakta hai mann.

Kyunki parivartan har pal ho raha hai,
Chaahe hum jaanein ya na jaanein.
Isliye mann ko sthir rakhna zaroori hai,
Chaahe hum maanein, ya na maanein.

Guruji ka simran har pal karne se,
Mann sthir reh paayega har sthiti mein,
Aur hum parivartan ka saamna kar sakenge,
Har tarehn kee paristhiti mein.

Guruji hee Hain maarg darshak hamaare,
Guruji hee Hain madadgaar.
Guruji hee Hain murshid,
Aur Guruji hee Hain parwardigaar.

Guruji sunte Hain hum sabki pukaar,
Guruji se hee hai hamaara uddhaar.
Guruji hee Hain hamaara sansaar,
Yeh dil kehta hai baar baar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 18, 2020

Om Namaha Shivaya
Aaj Ka Suvichaar 🙏🏻🙏🏻 # 851

       Guruji Ke Gungaan Kee Gaadi

Guruji ke bhakt toh anginat hain,
Hamaare Guruji Hain buss eko.
Guruji ke dhyan mein lagg jaao,
Phir iska anand toh dekho.

Paap, klesh, kasht, roag, aur dukh,
Inke baavajood bhi mehsoos karoge sukh.
Guruji ke gungaan kee hai jo gaadi,
Usmein baithkar mitt jaati hai trishna aur laachaari.

Yeh kamaal kee hai savaari,
Theek honei lagti hai beemaari.
Is gaadi mein milta hai shubh spandan,
Jeevan mehekta hai jaise chandan.

Jitnee shraddha aur neevanpann ho,
Utnee zyada miltee hai shanti.
Guruji ke gungaan kee gaadi mein,
Chaaron oar hai Guruji kee kanti.

Is kanti se divya roshni hai anant,
Angg sangg rehte Hain Guru Bhagwant.
Aur bhi kayee yaatri Hain is gaadi mein,
Sabhi hain Guru naam kee ghumaari mein.

Gaadi vaadiyon aur pahaadon ke beech se rahi hai guzar,
Yaatri khidakiyon se kabhi idhar dekhein, kabhi udhar.
Koi nazaara hai bhayy dene waala, koi drishya hai sundar,
Lekin yaatriyon ke mann mein hai bharose ka samundar.

Guruji ke naam ka simran hai yaatriyon ka aahaar,
Guruji ke naman mein jhuk rahi hai bahaar.
Guruji ke naam ke amrit se bujh rahi hai yaatriyon kee pyaas,
Yahee pyaas jagaa rahi hai Guruji ke gungaan kee aur bhi aas.

Pahunch jaayenge yaatri manzil par zaroor,
Trishna mitt gayi hai aur chhaaya hai Guru praapti ka fitoor.
Guruji kee dhun mein mastt yaatriyon ke sangg hai Guruji ka ashirwaad,
Jeete jee hee mil jaayega mukti ka anmol prasad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 17, 2020

Om Namaha Shivaya
Aaj Ka Suvichaar 🙏🏻🙏🏻 # 850

Guruji Kee Chhatrachhaaya Mein

Guruji kee chhatrachhaaya mein,
Kasht kumm hokar hee aayenge,
Kyunki adhiktar kasht toh Guruji,
Swayam par hee le jaayenge.

Guruji kee sharan mein aane ke baad,
Aisa nahin hai ki mushkilein nahin aayegi.
Lekin Guruji kee aseem kripa se,
Ve kat-tee chali jaayengi.

Kabhi kabhi toh sapnon mein dikhaakar,
Kasht ko swapn mein hee khatm kar denge Guruji,
Aur kabhi kabhi swapn mein jo dekhenge hum,
Uss museebat ko kumm kar ke denge Guruji.

Kewal yahee nahin karte Hain Guruji,
Ve saath hee saath badalte Hain hamaara ravaiya.
Unkee bhakti mein shraddha aur vishwaas se,
Sakaaratmak hota jaata hai nazariya.

Yakeenan hamaare haq se bhi adhik,
Khushiyaan hamein dete Hain Guruji,
Aur hum par aane waale sankat,
Kitnee baar toh poori tarehn se har lete Hain Guruji.

Kya karein, insaan hain hum,
Isliye karmon ka hisaab toh chukaana padega.
Varna moksh milne se pehle,
Baar baar is dharti par aana padega.

Aur koi bhi shakti itnee sheeghra,
Kara nahin saktee hamaare karmon ka bhugtaan.
Yeh hum bhakton ka saubhagya hai,
Ki Guruji hum sabb par Hain kitne meharbaan.

Unke angg sangg honei ka ehsaas,
Mithya nahin hai, balki tathya hai.
Unkee sharan mein hai hamaari suraksha,
Yeh kewal ek shubh vichaar nahin, balki bilkul satya hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 16, 2020

Om Namaha Shivaya
Aaj Ka Suvichaar 🙏🏻🙏🏻 # 849

Guruji Par De Sabb Kuch Chod

Na dol re tu praani,
Guruji par de sab kuch chod.
Safal hogi teri zindagaani,
Guruji par de sab kuch chod.

Toh kya hua agar manzil hai duur,
Guruji tujhe vahaan takk pahunchaayenge zaroor.
Tu har vikarshan se muh moad,
Guruji par de sab kuch chod.

Tu bann jaa Unke kehne par bandaa,
Apne galey mein na daal kukarmon ka phandaa.
Vikaaron se juda hua rishta de tu toad,
Guruji par de sab kuch chod.

Kusangati ka tu saath na kar,
Swayam ko sudhaarne se tu na darr.
Achchaayee aur sachchaayee se naata joad,
Guruji par de sab kuch chod.

Sewa, simran, satsang mein lagaa le dhyan,
Guruji ka tu kehna maan.
Samarpan kee chunri le tu odh,
Guruji par de sab kuch chod.

Beparwaah ho jaa, laparwaah nahin,
Guruji tere saare kaaraj karenge sahi.
Shukrana mein jhoomega tere mann ka moar,
Guruji par de sab kuch chod.

Guruji ka dwaar MahaShiv ka hai dwaar,
Unhonei tujhe le jaana hai bhavsaagar ke paar,
Isliye abb na dekh tu kaheen bhi aur,
Buss, Guruji par de sab kuch chod.

🌹🌹🌹🌹🌹🌹🌹

Jai Guruji 🙏🏻🙏🏻

June 15, 2020

Om Namaha Shivaya
Aaj Ka Suvichaar 🙏🏻🙏🏻 # 848

                        Guzaarish

Pyaare Guruji,

Kripa kar sunn leejiye hamaari arzi,
Phir aagey jaise Aapki marzi,
Aap hee se toh kar sakte hain nissankoch guzaarish,
Karte rahiye hum par Apne ashirwaad kee baarish.

Hamaare jeene ka dhangg sudhar jaaye,
Jo raasta Aap dikhaayein mann udhar jaaye,
Surakshit rakhey sadaa hamein Aapki divya kshamta,
Tarr jaayein hum paakar Aapki mamta.

Satsang mein satya ka sangg karein,
Kore mann mein ruhaaniyat ke rangg bharein,
Samarpan karein hum dil-o-jaan se,
Judey rahein sadaa Aapke roop mein basey huey Bhagwaan se.

Neevenpann kee neev par nek rahe charitra,
Neeyat aur soch sadaa rahe pavitra,
Kisee ka bhalaa na kar sakein toh bura kum-se-kum na karein,
Aapke dikhaaye huey raaste par chalne se kabhi na darein.

Bheed mein gumm jaane ke bajaaye,
Kuch sadh sangat ka saath ho,
Sakaaratmak vaataavaran ho aaspaas,
Aapke haath mein hamaara haath ho.

Phir bhatak jaane ka bhayy nahin,
Phir koi bhi sanshay nahin.
Aap par vishwaas aur bhi dridh hota jaaye,
Hamaara ahem bhi duur hota jaaye.

Sahaara milta rahe Aapka aur Aapki baani ka,
Aapki mehare-nazar mein beete har lamha zindagaani ka,
Aapke bharose har kasht sehte rahein hum,
Har saans se Aapko Shukrana kehte rahein hum.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 14, 2020

Om Namaha Shivaya
Aaj Ka Suvichaar 🙏🏻🙏🏻 # 847

Simran Kee Sui Mein Dhyan Ka Dhaaga

Simran kee sui mein hum dhyan ka dhaaga daalein
Achche insaan bannkar thoda sa punya kamaa lein
Sewa mein kabhi swaarth na laayein hum
Guruji ke charnon mein jageh paayein hum

Dhyan ke dhaage se see lein ruhaani chadariya
Uss par prem se rakhein hum shraddha kee gagariya
Gagariya mein Guruji ke ashirwaad ka amrit bhar jaaye
Jisko peene se hamaara antar- mann tarr jaaye

Ruhaani chadariya par ho sadgunon kee baareek kaarigari
Aur sewa, simran, shraddha, kee pyaari si kadhaayee ho hari bharee
Chaadar par rangg birangey phool bhi hon dheeraj ke
Beech beech mein chitra baney hon khiley huey neeraj ke

Is ruhaani chadariya ko odh kar
Har lobh laalach ko chod kar
Guruji kee sharan mein sadaa sukh mehsoos karein
Unke adviteeya sahaare ko paakar kisee se bhi na darein

Ashrudhaara chaahe ho prem kee ya pachhtaave kee
Chadariya uss se aksar dhulti rahe
Rangg kabhi pheeka na ho chaadar ka
Sadaa nutan lagey aur khiltee rahe

Guruji kee kripa aur hamaare nek-neeyat jhukaav se
Aisa hamaari zindagi mein hona bilkul mumkin hai
Isliye shubh kaam mein karein na deri
Kyunki tez raftaar se beet raha har din hai

Guruji ka koti koti Shukrana karte huey
Aayiye chadariya kee silaayee shuru karein
Taaki hum sabka mokshdaayee uddhaar
Hamaare pyaare aur pooran Guruji karein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 13, 2020

Om Namaha Shivaya
Aaj Ka Suvichaar 🙏🏻🙏🏻 # 846

                     Maylaa Mann

Jitnee adhik mayl mann mein hogi
Utne zyada janam lagg sakte hain usey saaf karne ke liye
Jitna adhik simran hum karenge prem bhaav se
Utnee kumm der lagegi hamaare karam bojh ko halka honei ke liye

Dukh ka ilaaj hai simran
Dard kee davaa hai simran
Ahankaar kee aag ko jo bujhaayega
Veh sheetal amrit hai simran

Akelepann ka madhur meet hai simran
Sachche bhakt kee poojya preet hai simran
Atma ka sureela sangeet hai simran
Guruji ke gungaan ka geet hai simran

Simran karne se jo atma-bal badhega
Veh Guruji kee mehar se hamaara kalyaan karega
Uskee madad se hum aur paap karne se swayam ko bachaate jaayenge
Aur saath hee saath pehle kee hui galatiyon kee maafi maang paayenge

Simran karte karte maylaa mann dhulta jaayega
Hamaari niyati ka bandd dwaar khultaa jaayega
Guruji Apni divyataa aur taralta se hamein taarte jaayenge
Aur hamaari taqdeer Ve sanvaarte jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 12, 2020

Om Namaha Shivaya
Aaj Ka Suvichaar 🙏🏻🙏🏻 # 845

Aapki Mahima Gaate Gaate

Bharosa mera banaa rahe bhakti mein,
Simran kee pakki neev ho atma kee shakti mein,
Sadaa banaa rahe Aapka ashirwaad, Guruji,
Yahee hoga mere liye sabse uttam prasad, Guruji.

Samajh nahin aa raha thaa mujhe,
Ki kaun hoon mai aur yahaan aane ka maqsad kya hai mera,
Jabb Aapne aakar disha dikhaayee,
Toh kiya mere jeevan mein savera.

Haath thaama Aapne mera,
Aur pyaar se mujhe chalaaya.
Socha jabb uss pal ka mainey,
Toh mera dil bhar aaya.

Jabb se yaad aata hai mujhe,
Kitnee moortiyon kee mainey kee pooja,
Lekin jabb se Aap miley Hain,
Mann mandir mein na koi Bhagwaan hai dooja.

Kyunki Aapne kaha ki Aap MahaShiv Hain,
Toh phir kaheen aur kyun mai jaaoon?
Aapke kamal charan ko chhookar,
Brahmaand ke darshan mai paaoon.

Abb jo Aapne mujhe Apni sharan mein liya hai,
Toh aise mere antar-mann mein basna,
Ki Aapki mahima gaate gaate,
Kabhi na thakey meri rasna.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 11, 2020

Om Namaha Shivaya
Aaj Ka Suvichaar 🙏🏻🙏🏻 # 844

         Divya Vimaan Mein Yatra

Guruji ke vandan ka hai yeh divya vimaan,
Jismein hum sab safar hain kar rahe.
Kuch yatri toh sarvsamarpan kee avastha mein hain,
Lekin kuch yatri abb bhi hain darr rahe.

Jinhonei baandhi hai bharose kee peti,
Ve surakshit hain is divya udaan mein.
Kyunki Guru naam kee madhur vaani,
Goonj rahi hai har pal unke kaan mein.

Jis tarehn se Guruji ne Apne nirdesh mein kaha hai,
Baadalon ke beech se vimaan vaise hee ud raha hai.
Kyunki Guruji Hain raahnuma is vimaan ke,
Aur sanchaalak Hain Ve iskee udaan ke.

Har pal jo ud raha hai yeh vimaan,
Isey sambhaal rahe Hain Guruji, hamaare Bhagwaan.
Vishwa ke vidhaata Hain Ve,
Is vimaan ke nirmaata Hain Ve.

Satya aur sadbhavna ke spandan se,
Guruji ka satsang chal raha hai,
Waqt beetne kee khabar nahin kisee ko,
Dekhte hee dekhte sooraj dhal raha hai.

Aasmaan geruey rangg kee chaadar lapetey huey hai,
Guruji uspar Apni divyataa ka noor bikherte huey Hain,
Katvaa rahey Hain Ve hum yatriyon ka safar,
Aur har aane wale tufaan kee hai Unhe khabar.

Isliye Guruji ke simran kee dhun mein magn rehkar,
Aao, hum is yatra ko kar lein poori.
Manzil takk pahunchney ke liye,
Shraddha aur saboori hai zaroori.

Tabb takk anand lein is ruhaani safar ka,
Apni karmic bhumika nibhaate huey.
Guruji kee divya khushboo hamaare sangg rahegi,
Hamaare raaste aur safar ko mehkaate huey.

Unke ashirwaad se hum pahunchenge apni manzil par,
Unke pyaar se ek din hamein mil jaayega Unka dar.
Is Vimaan ka shukriya baarambaar,
Jo le jaayega hamein Guruji ke dwaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja