Month: July 2020

July 31, 2020

Om Namaha Shivaya
Aaj Ka Suvichaar 🙏🏻🙏🏻 # 894

 Is Se Bada Nahin Hai Koi Kalyaan

Shraddha ho jab Ishwar ke prati,
Toh ‘kyun’ aur ‘kaise’ aise shabdon ka nahin hai koi kaam,
Guruji MahaShiv Hain isliye,
‘Kintu-parantu’ ko na chheen- ne dein hum apna chayyn aur aaraam,

Kyunki agar sach mein Guruji par hai vishwaas,
Aur samarpan kar diya hai Unhe har shwaas,
Toh buss Unke maargdarshan se karte jaayein apne karam ,
Sachchaayee aur achchaayee ke sahaare nibhaayein hum insaaniyat ka dharam.

Ye na poochhein Guruji se hamaare saath jo ho raha hai,
Veh kyun ho raha hai,
Kyunki Guruji ko sab maalum hai,
Tabhi toh vo ho raha hai.

Lagta hai agar ki aise prashn swaabhaavik hain,
Toh phir swabhaav ko sudharna hoga,
Agar lagta hai ki aise khayaal hee fitrat bann gaye hain,
Toh phir fitrat aur khayaal ko badalna hoga.

Kyunki hamein toh maalum nahin hai,
Lekin Guruji ko hai hamaare pralabhd aur sanchit karmon ka gyan,
Hamaari bhalaayee kis mein hai,
Iska bhi hamaare se zyada hai Guruji ko dhyan.

Isliye hamein seekhna hoga,
Ki shraddha ko kamzor karne waale sawaalon se rahein hum duur,
Agar hum ye nahin seekhenge,
Toh phir toh shraddha ho jaayegi chuur-chuur.

Jo Guruji ke har hukm ko bin kisee sawaal ke karega qubool,
Jisey Guruji ka diya har sukh aur dukh hoga maqbool,
Uskee bhakti ka ek pal bhi na jaayega fizool,
Guruji kalyaan karenge uska banaa kar uss bhakt ko Apne charnon kee dhool.

Is se bada nahin hai koi kalyaan,
Kyunki Guruji Hain sabse mahaan.
Sabse mangal hai Unka dhaam,
Sabse paawan hai Unka naam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 30, 2020

Om Namaha Shivaya
Aaj Ka Suvichaar 🙏🏻🙏🏻 # 893

  Yahee Mauka Hai Janaab

Jabb bhi Guruji ko hum bulaate hain,
Ve hamaari madad karne aate Hain.
Guruji kee aankhon mein sadaa hoti hai pyaar kee namee,
Hum mein hee har baar reh jaati hai koi kamee.

Yakeenan hamaari ‘mai’ hamein sharminda karti hai,
Phir bhi ye hamaare roam roam ko bharti hai,
Dar-asal yahee hamaara sukh aur chayyn hai harti,
Jaan le leti hai ye, magar khud nahin hai marti.

Satsang aur shabad jalaate hain hamaare liye gyan ke diye,
Jaante hain hum ki Guruji ke hukm kya Hain hamaare liye.
Lekin jabb unn par amal karne kee aati hai baari,
Tabb hamein sirf yaad aati hai unhe bhoolne kee beemaari.

Guruji simran karne ke liye bolein,
Aur hum idhar udhar kee baaton mein dolein,
Aur agar simran ko waqt nahin dete hain,
Toh koi na koi bahaana dhoondh hee lete hain.

Guruji ne toh koi rasmein, koi vehem nahin rakhe,
Phir kyun vyarth hee hum yahaan vahaan khaate hain dhakke?
Guruji ne hum sabko diya saral aur sadaa bulaava hai,
Phir kyun hamaari oar se chaturaai aur dikhaawa hai?

Guruji kahein ki hum kar dein samarpan,
Lekin hum aur bhi uljha lete hain mann,
Galati khud kee ho toh bhi maante nahin,
Aur soch lete hain ki Guruji ye jaante nahin.

Abb bhi sudhar jaayein hum,
Toh aagey mushkil ho jaayegi kumm,
Varna bekaar ke chakkaron mein padey rahenge,
Aur antt mein haath malte rahenge.

Guruji ke liye hum keede makodon ke jaise hain,
Aur hum Guruji ke bina kuch bhi nahin,
Abb faisla hamein hee karna hai,
Ki jo hum kar rahey hain, kya vo hai sahi?

Guruji ke paas sabke karmon ka khaata hai, aur Ve hee karenge hisaab,
Guruji se toh nahin chhupa hai kuch bhi, chaahe ho veh hakeekat, ya phir ho koi khwaab,
Sabke liye sawaal vahee hai, magar shaayad alagg alagg hai jawaab,
Abb nahin sudhrenge toh kabb sudhrenge, yahee toh mauka hai janaab.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 29, 2020

Om Namaha Shivaya
Aaj Ka Suvichaar 🙏🏻🙏🏻 # 892

          Ghareeb Nawaz

Har kisee ke paas maa nahin hoti,
Pyaar se goad mein sulaane ke liye,
Har kisee ke paas pita nahin hotey,
Dulaar se chalna sikhaane ke liye.

Har kisee ke paas veh mitr nahin hota,
Galey lagaane ke liye,
Har kisee ke paas aulaad nahin hoti,
Laad barsaane ke liye.

Har kisee ke paas aisa murshid nahin hota,
Jo hitkaari aur nishpaksh gyan aur mashwaraa de,
Har kisee ke paas aisa sahodar nahin hota,
Jo har sukh aur dukh ka hissa baney.

Lekin jisko Aap mil gaye, Guruji,
Apna bulaane ke liye,
Uska toh jeevan safal ho jaata hai,
Sadaa, sadaa ke liye.

Aap se miltee hai komal mamta maa kee,
Aapse milta hai pita ka aseem dulaar,
Aap mein dikhtee hai dost aur bhai kee nirmal chhavi,
Aur murshid ka maargdarshan aur vo maasumiyat bharaa pyaar.

Aapse milta hai sowmya sahaara,
Aapse milta hai atma-vishwaas,
Aapki meher se milta hai manzil ka kinaara,
Aapke protsaahan se oorjit hota hai har prayaas.

Aap Hain strot prerna ke,
Aap Hain srot chetna ke,
Aap Hain prateek sampoorna divyataa ke,
Aap Hain mool sootra vikaar-rahit vidvataa ke.

Aapki taareef mein jitne bhi kahoon alfaaz,
Aapki mahima ke bakhaan ke liye jitnee bhi sajaa loon yeh awaaz,
Aapke prataap ke aagey tuchh lagega har nagma, har sur, har saaz,
Kyunki Aap Hain Khuda, Aap Hain Qadr E Mutaaliq Ghareeb Nawaz.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 28, 2020

Om Namaha Shivaya
Aaj Ka Suvichaar 🙏🏻🙏🏻 # 891

        Janma-Janmaantar Takk

Kabhi kabhi duniya lagti hai itnee zaalim,
Ki maut ke baad bhi shaayad chayyn na lene de,
Isliye jitna ho sakey simran se jud jaayein,
Aur simran kee sheetal chhaaon ko sukh dene dein.

Shareer mein reh kar bhi,
Is se adhyaatmik taur par alagg honei ka prayatna karein,
Duniya mein rehte huey bhi,
Iske moh se bichadne ka yatna karein.

Kyunki duniya toh yaheen reh jaayegi,
Awaaz saanson ke sangg beh jaayegi,
Yeh kaaya dil kee kahaani na keh paayegi,
Sochein, ki kya atma karmon ka bojh seh paayegi?

Yeh sawaal mann mein aate hee,
Lagta hai atma ka bojh kumm se kumm ho,
Isliye kyun na sakaaratmakta se jee lein hum,
Chaahe jeevan mein khushi ho ya gumm ho.

Guruji ka shukrana karte huey har pal,
Saath hee saath galatiyon ke liye maang lein maafi,
Kisee se bhi gilah shikwa na karein kyunki,
Naaraazagi ke toh mil jaayenge sabko mauke kaafi.

Kyunki zaroori toh nahin ki sabka ek sa ho nazariya,
Aur kya maalum kis haalaat se guzar rahi hai har kisee ke jeevan kee dagariya,
Shaayad jo unhe lagey uchit vo kisee aur liye kumm ho,
Shaayad jis baat par koi khush ho, usee baat se kisee aur kee aankh numm ho.

Lekin simran kee leela kuch aisee hai,
Ki kisee na kisee tarehn se shaant ho jaata hai sabka mann,
Dhyan bhi na lagg raha ho toh koi baat nahin,
Simran mein bator lein hum Guruji ke naam ka dhan.

Isliye Guruji ke simran ko banaakar apna sahaara,
Swayam ko yaad dilaayein ki jeevan mein kya hai uddeshya hamaara,
Do-chaar din kee toh hai yeh laukik zindagi,
Lekin janma-janmaantar takk chalti rahegi Guruji kee bandagi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 27, 2020

Om Namaha Shivaya
Aaj Ka Suvichaar 🙏🏻🙏🏻 # 890

    Jabb Bhi Tere Saamne

Jabb bhi tere saamne,
Aaye koi bhi chunauti,
Jabb bhi uss chunauti ke kaaran,
Teri himmat mein ho katauti,
Tu chunauti se keh dena,
Ki veh asafal ho jaayegi,
Guruji ke hotey huey,
Veh tere saamne zyada der na reh paayegi.

Jabb bhi tera vishwaas,
Thoda sa bhi dagamagaane lagey,
Jabb bhi tera shwaas,
Duniya ke naatak ke kaaran ghabraane lagey,
Tu mann ko simran mein lagaana,
Guruji ke dhyan mein tu ramm jaana,
Swayam ko bhatakne se bachaana,
Satsang sunn-na aur sunaana.

Jabb bhi koi ahem ya koi vehem,
Bhakti mein daalne lagey baadhaa,
Toh khud ko yaad dilaana,
Ki Guruji ko jeevan pasand hai saada.

Banda bannkar changey karam karte huey,
Tu nibhaate rehna apna vaada,
Unka Shukrana karte rehna,
Chaahe jeevan mein tere paas kumm ho ya ho zyaada.

Jeevan ke har moad par,
Apni mai ko chod kar,
Laukik bandhan ko toad kar,
Guruji ko haath jod kar,
Kar lena tu yeh ardaas,
Ki Ve rahein sadaa tere paas.

Ki Ve pooran karein yeh aas,
Ki tujhe banaa lein Apna daas,
Is ardaas mein baat hai khaas,
Kyunki iskee poorti se tera har shwaas,
Jagaayega aur bhi simran kee pyaas,
Jis se badhegi tere mann kee divya mithaas.

Tere hriday mein umadta rahega,
Santushti ke sangg ullaas,
Aur Guruji sadaa ke liye karenge,
Tere dil mein vaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 26, 2020

Om Namaha Shivaya
Aaj Ka Suvichaar 🙏🏻🙏🏻 # 889

Poori Duniya Rahey Aabaad

Guruji ke liye pyaar ho,
Har vichaar mein,
Vaastav mein, vyavhaar mein,
Saare ke saare sansaar mein.

Guruji ka manan ho,
Har baar naman mein,
Gurbani ke Shravan mein,
Bhagwaan ke har bhajan mein.

Guruji ke laad kee aas,
Banaaye rakhe rasna kee mithaas,
Jagaaye rakhey sewa simran ka abhyaas,
Nikhaare hamaare samarpan ka prayaas.

Guruji kee divyataa,
Sanvaar le jagg kee sundarta,
Shudh karey sabki vidvataa,
Gehri karey sabki mitrataa.

Guruji kee saraltaa,
Ujaagar karey hum sab mein taraltaa,
Laaye har insaan mein komalta,
Pradaan karey sabko nirmaltaa.

Guruji ke liye paawan bhakti,
Deti rahey har bhakt ko shakti,
Sabko de dayaalu drishti,
Karey sadbhavna kee pushti.

Guruji se bandhee doar,
Laaye sabke jeevan mein bhor,
Shaant karey kalyuga ka karkash shor,
Mitaa de yeh andhera ghanghor.

Guruji ka anant ashirwaad,
Isse har aahaar baney prasad,
Isse pavitra ho har jazbaat,
Isse poori duniya rahey aabaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 25, 2020

Om Namaha Shivaya
Aaj Ka Suvichaar 🙏🏻🙏🏻 # 888

         Guruji Ke Naam Ka Mahasaagar

Mahasaagar ke aaspaas,
Har pal sab kuch shant nahin hota,
Mahasaagar ke aaspaas,
Har pal ekaant bhi nahin hota.

Lekin suna hai, ki mahasaagar kee gehraayiyon mein,
Paani kee rahasyamayee parchhaayiyon mein,
Kayee anubhav shaant aur ekaant hain,
Iska pramaan sahitya ke kayee drishtaant hain.

Jab takk hum Guruji ke naam ke mahasaagar ke aaspaas,
Asthir tareeke se vicharte rahenge,
Tabb takk chaahe kabhi kabhi hamein leheron ka sparsh naseeb hoga,
Lekin har sparsh ke pehle aur baad hum uss sparsh se bichadte rahenge.

Aur toh aur, agar tayrna na aata ho,
Mahasaagar ke bahut paas khade honei se lagega darr,
Ki kabb koi ugr leher hamein nigal hee jaaye,
Aur hum bemaut hee jaayein marr.

Iska ek sanaatan upaay hai,
Kyunki Guru toh sadaa sahaay Hai,
Mahasaagar chunein hum Guruji ke naam ka,
Taaki anand aaye saare teerath dham ka.

Guruji ke naam ka mahasaagar anokha hai,
Ismein tayrne kee zaroorat hee nahin,
Kyunki yeh toh veh anandmayee anubhav hai,
Jismein doobna hee hoga sahi.

Guruji ke naam mein toh aisee shakti hai,
Jo ismein doobne waalon ko deti hai taar,
Lekin jabb takk ismein ramm kar doobna na aaye,
Tabb takk tayrne se bhi naseeb hoga hamein Guruji ka pyaar.

Simran aur dhyan ke abhyaas se,
Shraddha aur saboori se bhare prayaas se,
Is naam ke mahasaagar mein tayrte tayrte,
Utsaah banaa rahega ismein doobne kee aas se.

Guru naam mein rammte rammte,
Ek din aisa bhi aayega,
Jab mahasaagar mein basaa hua Om aur Naad,
Hamein pyaar se bheetar lekar jaayega.

Veh pal hoga bahut hee pyaara aur shubh,
Mitt jaayega mann ka har vikaar aur dukh,
Chitt mein kalyaan kee kalee khil jaayegi,
Aur hamaari atma Paramatama se mil jaayegi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 24, 2020

Om Namaha Shivaya
Aaj Ka Suvichaar 🙏🏻🙏🏻 # 887

       Moksh Ka Mubarak Mauka

Guruji par vishwaas tu kar,
Haalaat se bilkul bhi na darr,
Is kshanbhangur jeevan mein,
Guruji ko sarvsamarpan kar.

Sab mithya hai, moh maya hai,
Ek Guru hee apna hai, baaki sab paraaya hai.
Guruji kee sharan jabb takk na miley,
Tabb takk kisee ne na chayyn paaya hai.

Guruji ne tujhe sweekaara hai,
Yeh khushnaseebi hai teri,
Isliye Guruji ko khush karne mein,
Na kar abb tu kisee tarehn kee bhi deri.

Sewa kar nishkaam tu,
Simran par de dhyan tu,
Satsang sunta sunaata chal,
Guruji kee mahima tu gaata chal.

Insaaniyat kee bann jaa tu ek maahir misaal,
Itna santusht ho jaa ki khud-bakhud hee chup ho jaaye har sawaal,
Chod de mann ke khaali bartan mein bharne khokhle khayaal,
Mann par chhaane de tu Guruji kee leela bemisaal.

Yeh jagg toh vaise bhi hai saraay,
Yahaan hameshaan rehne ka nahin hai koi upaay.
Koi pehle, koi baad mein yahaan se jaayega,
Phir agley janam mein kisee aur roop mein aayega.

Yeh silsila jaari rahega moksh milne se pehle,
Isliye tabb takk Guruji ke bharose tu rehle,
Taaki moksh ka mubarak mauka jabb bhi aaye,
Tabb tu Guruji kee divya surbhi mein samaa jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 23, 2020

Om Namaha Shivaya
Aaj Ka Suvichaar 🙏🏻🙏🏻 # 886

        Mann Mein Shukr Ka Aana

Sahi mainey mein dekhein toh,
Dhyan se zaraa sochein toh,
Mann mein shukr ka aana,
Yahee toh hai Shukrana.

Shukrana hee bachaa sakta hai atmataras se,
Shukrana hee hai shikaayat ke marz kee davaa,
Shukrana se hee mann shaant hota hai,
Shukrana se poori hogi jagg ke kalyaan kee dua.

Shukrana ne hai yeh ehsaas diya,
Ki Maalik ne jo theek samjha veh diya,
Aur jo nahin hai abhi hamaare paas,
Shaayad thoda waqt lagega usey aane mein raas.

Kyunki aur karein bhi toh kya karein,
Insaaniyat ke dhaanchey mein jo hain hum khadey,
Seema todna toh sahi aacharan nahin hai,
Lekin kuch logon ke jeene ka dhangg vahee hai.

Shukrana se hee Guruji,
Seema todne waalon ko paath padhaayenge,
Shukrana mann mein hoga toh hum,
Seema mein rehkar Guruji ka aur bhi shukriya kar paayenge.

Shukrana karne se puraane zakhm bhi jaldi bhar paayenge,
Shukrana karne se hum zaroor tarr jaayenge,
Shukrana se milti rahegi aagey badhne kee shakti,
Shukrana se rangg laayegi hamaari bhakti.

Isliye shukrana ke bhaav ko mann se na jaane dein duur,
Nahin toh iska arth ho jaayega bilkul chuur chuur,
Shukrana sadaa barkarar rakhein mann mein,
Tabhi vriddhi ho paayegi ruhaani dhan mein.

Guruji kee aseem kripa se yeh jeevan jaayega guzar,
Shukrana mein rahenge toh sukh dukh kee maya ka na hoga hum par asar,
Shukrana se Guru aur Govind ke rahenge kareeb,
Aslee dhan vahee hai, isliye aayiye, Shukrana se bann jaayein khushnaseeb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 22, 2020

Om Namaha Shivaya
Aaj Ka Suvichaar 🙏🏻🙏🏻 # 885

       Mukammal Hogi Teri Zindagi

Shanti, bhakti, aur bairaag,
Ye paana hai toh nidra se jaag,
Laukikta ko de tu mann se tyaag,
Jeevan jee, lekin mithya ke peechhe matt bhaag.

Kyunki Guruji ne tujhe bheja hai yahaan,
Karmon ka karne bhugtaan,
Aur Ve chaahte Hain ki tu,
Bann jaaye changa insaan.

Unhe zaroorat bilkul nahin,
Dene kee koi bhi pramaan,
Lekin tere liye anivaarya hai,
Maan-na Unhe Bhagwaan.

Kyunki yeh koi mashwaraa nahin bilkul tathya hai,
Uss baat se inkaar nahin hota mumkin jis baat mein poorna satya hai,
Satya jo bhi ho, usey koi chunauti de nahin sakta,
Satya jaisa bhi ho, veh na hai chhupta aur na hai thaktaa.

Guruji sab kuch dekh rahei Hain,
Guruji sabko parakh rahei Hain,
Aaj nahin toh kal satya saamne aayega,
Aakhir kab takk kalyuga chalta jaayega.

Srishti ke niyam se hokar majboor,
Samay ka pahiya ghoomega zaroor,
Satyuga ke saawan ne aana hee aana hai,
Chaahe abhi ye pratyaya lagta begaana hai.

Aaj nahin toh kal, Guruji kee hogi tujh par bhi rehmat,
Is meethe satya se bhi tu reh sadaa sehmat,
Guruji kee kar le beintehaa bandagi,
Isee se mukammal hogi teri zindagi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja