Month: July 2020

July 11, 2020

Om Namaha Shivaya
Aaj Ka Suvichaar 🙏🏻🙏🏻 # 874

   Koi Aur Saath Nahin Toh Kya Hua

Kisee aur se hum ye sabb kaise keh paayenge,
Ki is jeevan ka bojh hum akele na seh paayenge,
Akele huey toh hum dishaheen hokar thakk jaayenge,
Guruji ka saath paakar hum ruhaaniyat mein aagey badh paayenge.

Guruji sangg Hain toh andhere mein bhi hai ujaala,
Guruji ke ashirwaad se sab kuch seh lega ye mann matvaala,
Pathreeli raahon par chalkar jab paaon ke chaalon ne hamein rulaaya,
Toh uss dard mein bhi sukh dhoondhne ka hunar Guruji ne hai sikhaaya.

Guruji kee kripa se aankhon se behte ansoon,
Aagey badhne ke liye dete hain prerna,
Guruji kee mehar se insaaniyat ka sanskaar mila hai,
Aur dil mein vaas karti hai samvedana.

Aisa kuch nahin hai jo Guruji se keh na sakein hum,
Guruji ke hukm par amal karne se na kabhi rukein hum,
Saansaarik unnati se kaheen zyada aawashyak hai unnati ruhaaniyat mein,
Kaam, krodh, lobh, jhooth, irshya ye toh rukaavat hain insaaniyat mein.

Isliye Guruji aisee kripa karte rahein,
Ki hum se kabhi bhi na ho sanskaaron mein hera pheri,
Aur Guruji ke nakshe-kadam par chalne mein,
Hamein na ho ek pal kee bhi deri.

Taaki hamaara uddhaar isee pal se ho jaaye shuru,
Hum bhaagyashaali hain ki Guruji Hain hamaare guru,
Neeyat sachchi hai hamaari toh nissankoch chalein hum,
Guruji kee dikhaayee raah par hain toh phir kyun kisee se darein hum.

Koi aur saath nahin toh kya hua,
Guruji Hain hamaare saath,
Raasta kathin bhi ho toh kya hua,
Guruji ka hai hamaare sir par haath.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 10, 2020

Om Namaha Shivaya
Aaj Ka Suvichaar 🙏🏻🙏🏻 # 873

       GURUJI, AAPKA SHUKRANA

Guruji, Aapka shukrana,
Sharan mein lene ke liye,
Sharan ka shukrana,
Suraksha dene ke liye.

Suraksha ka shukrana,
Vishwaas jagaane ke liye,
Vishwaas ka shukrana,
Zindagi sanvaarne ke liye.

Zindagi ka shukrana,
Simran ke pal dene ke liye,
Simran ka shukrana,
Aapke deedar ke avsar ke liye.

Deedar ka shukrana,
Rooh ko raahat dene ke liye,
Rooh ka shukrana,
Deh mein basne ke liye.

Deh ka shukrana,
Sewa mein kaam aane ke liye,
Sewa ka shukrana,
Neevanpann dene ke liye.

Neevenpann ka shukrana,
Insaaniyat sikhaane ke liye,
Insaaniyat ka shukrana,
Ruhaaniyat kee oar le jaane ke liye.

Ruhaaniyat ka shukrana,
Divyataa se deedar karaane ke liye,
Aur is divyataa ka shukrana,
Guruji mein samaane ke liye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 9, 2020

Om Namaha Shivaya
Aaj Ka Suvichaar 🙏🏻🙏🏻 # 872

               Safar Kee Manzil

Jeevan beeta jaa raha hai,
Na kar tu abb aur deri,
Simran mein waqt bitaa le,
Rooh tarr jaayegi teri.

Guruji tere saath Hain,
Tu buss nibha apna farz,
Unkee madad se changaa bann,
Aur adaa kar apne karmon ka karz.

Simran karte karte tu,
Dhyan ka kar le abhyaas,
Abb nahin karega toh kab karega,
Tu Guruji ko paane ka prayaas?

Niswaarth sewa mein lagg ja tu,
Samajhkar niswaarthta ka arth,
Guruji se seedhee taar jod,
Na jaane de ek pal ko bhi vyarth.

Jab koi laukik maajra sataaye,
Jab niraasha se aankh bhar aaye,
Toh bilkul bhi na soch ki tu hai akela,
Guruji ke sangg jhel le tu is jagg ka mela.

Guruji ko har baat kee khabar hai,
Ve jaante Hain kisey Unke hukm kee kadar hai,
Sabki neeyat par Unkee nazar hai,
Ve jaante Hain ki kis par vikaaron ka asar hai.

Isliye tu buss apni Guru praapti kee manzil ko mann mein rakhte huey,
Chalta chal sewa, simran, satsang, sadaachaari aur samarpan ke path par,
Guruji MahaShiv Hain, Ve aayenge tujhe lene,
Apne mokshdayee manohar ruhaani rath par.

Simran ke beetey huey pal rangg laayenge,
Guruji tujhe Apne sangg lekar jaayenge,
Koshish toh kar ke dekh, tujhe ho jaayega yakeen,
Ki tere safar kee manzil hogi bahut hee haseen.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 8, 2020

Om Namaha Shivaya
Aaj Ka Suvichaar 🙏🏻🙏🏻 # 871

                Mujh Nacheez Ko

Pyaare Guruji,

Mujh nacheez ko nacheez hee rehne deejiye
Kehte hain jo kehne wale, unhei kehne deejiye
Jo rishta Aapse hai vaisa pyaara rishta aur koi nahin
Isliye is rishte ko hameshaan azeez rehne deejiye

Duniya ke saare chiraag lekar dhoondhne nikaltee,
Toh bhi Aap jaise Guruvar nahin milte,
Jo nirbhaytaa ke nageene Aapki sharan mein paaye hain mainey,
Veh dhoondhne se bhi na kaheen milte.

Aapne Apni sharan mein mujhe sweekaara,
Aapki karuna milee, aur mila Aapka pyaar itna pyaara,
Mere saare sankoch aur darr duur ho gaye
Jitne sanshay thei ve gehri neend so gaye

Aapke ashirwaad kee shakti se,
Ye sanshay sadaa ke liye shaant ho jaayenge,
Aapke diye huey atma-vishwaas se,
Mere kadam abb aagey badh paayenge.

Buss Aapka saath hai zaroori,
Phir duur ho jaayegi har majboori,
Har bandd dwaar khud bakhud hee khul jaayega,
Har dukhdaayee anusmaran anand ke amrit se dhul jaayega.

Aapse keh dee mainey dil kee baat,
Aap de deejiye buss mujhe yeh daat,
Aapki mamta ke marham se mujhe mere ghaav seene deejiye,
Apne charnon kee dhool bannkar mujhe jeene deejiye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 7, 2020

Om Namaha Shivaya
Aaj Ka Suvichaar 🙏🏻🙏🏻 # 870

           Guruji Ka Avataar Divas

Guruji ka avataar divas hai aaya,
Chaaron oar kitna ullaas hai chhaaya,
Koi khushi se naach raha, toh kisee ne geet hai gaaya,
Sabne Guruji ka ashirwaad hai paaya.

Ghar ghar mein ho raha hai satsang,
Guruji Hain sabke angg sangg,
Aao, rangg jaayein Guruji ke rangg mein,
Aao, dhal jaayein Unke sikhaaye huey dhangg mein.

Poojya mataji aur bapu ji ne
Poore sansaar par kiya ehsaan,
Unkee badaulat hee toh sangat ko miley,
Pyaare Guruji, jo Hain Bhagwaan.

Bachpan se hee divyataa aur ruhaaniyat mein,
Vyast aur mastt Guruji thei rehte,
Aagey chalkar kitnee sangat ke,
Dukh aur kasht chupchap Ve thei sehte.

Hum sab kitne khushnaseeb hain,
Ki hamein Guruji ne Apni sharan mein liya,
Hamaari har fikr le lee Unhonei,
Aur hum sabko itna pyaar hai diya.

Guruji ka janam din hum sabke liye hai khaas tyohaar,
Kyunki Guruji ke janam se hua hai jagg ka uddhaar,
Jiskee aaj nahin aayee, uskee baari kal zaroor aayegi,
Kyunki Unkee divya leela bhavishya mein bhi mehar barsaayegi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 6, 2020

Om Namaha Shivaya
Aaj Ka Suvichaar 🙏🏻🙏🏻 # 869

     Ujaale Kee Khoj Mein

Ujaale kee khoj mein niklee mai,
Ummeed ka chiraag liye haath mein,
Guruji par rakhey huey vishwaas,
Le raha thaa Unka naam har shwaas.

Uss ek ummeed ke chiraag se,
Guruji ne anginat chiraag jalaaye,
Jab jab Unhe pukaara mainey,
Pyare Guruji usee kshan aaye.

Raaste mein itnee divya roshni hui,
Ki sab kuch aane lagaa nazar,
Guruji ke sakaratmak spandan ka,
Honei lagaa mujh par asar.

Guruji kee mamta ke aagey,
Naman mein sees jhuk jaata,
Dukh chaahe zindagi mein ho,
Veh dukh pareshaan karne se ruk jaata.

Guruji jaisa dayalu koi nahin,
Guruji jaisa kripalu koi nahin,
Ve jo raah dikhlaayenge,
Meri manzil hogi vaheen.

Guruji kee divyataa mein Om aur Onkar samaaye hain,
Pyaare Guruji jagg ke kalyaan ke liye dharti par aaye Hain,
Aparampaar Shukrana Unka ki Unhonei mujh nacheez ko sharan mein liya,
Meri antaratma mein jal gaya vishwaas ka akhand diya.

Ab jeena marna Guruji ke bharose hai mera,
Ve sambhaalenge chaahe aagey raasta seedha ho ya ho tedha,
Srishti ke Maalik Hain Guruji, kann kann Unka mohtaaj hai,
Is kalyuga mein poori kaaynaat par Guruji ka hee raaj hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 5, 2020

Om Namaha Shivaya
Aaj Ka Suvichaar 🙏🏻🙏🏻 # 868

    Gurupurnima Ka Parv

Jin Guruji mein Brahma, Vishnu, Mahesh samaaye,
Ve pooran Guru hamaari zindagi mein aaye,
Jis jis ko Unhonei hai sweekaara,
Har uss bhakt ko Unhonei hai tara.

Gurupurnima ka ruhaani parv hai aaya,
Sab Guru bhakton ke mann mein ullaas hai laaya,
Aao, sab karein pyaare Guruji ko naman,
Aur karein Unka shraddhapoorvak manan.

Utsav keh lo isey, ya ek ruhaani reet,
Iska aadhaar hai Guru ke prati aadar aur preet.
Guru aur abhigya murshid ko samarpit hai is din ka mahaatmay,
Jinhonei sangat ko raah dikhaayee bina kisee sanshay.

Guruji kee sharan mein aakar yakeenan,
Jeevan mein kalyaankaari phool khilein hain,
Hamaare pyaare Guruji mein,
Hamein toh pooran Guru miley Hain.

Guru se hee milta hai adhyatmik gyan,
Kalyaankaari hota hai japna Guru ka naam,
Jeevan mein roshni nahin hoti Guru ke bin,
Sach mein bahut mahatvapoorna hai Gurupurnima ka din.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 4, 2020

Om Namaha Shivaya
Aaj Ka Suvichaar 🙏🏻🙏🏻 # 867

      Guruji Hain Zindagi

Guruji Hain zindagi,
Guruji Hain bandagi,
Guruji Hain divyataa,
Guruji Hain vidvataa.

Guruji Hain niswaarth prassanntaa mein,
Guruji Hain ruhaani sampannta mein,
Guruji Hain sachchaayee mein,
Guruji Hain achchaayee mein,

Guruji Hain divya preet mein,
Guruji har paawan geet mein,
Guruji hee simran mein,
Guruji hee manan mein.

Guruji bhakt kee ardaas mein,
Guruji bhakt kee aas mein,
Guruji Hain pooja,
Guruji jaisa koi na dooja.

Guruji se hai har bhakt kee muskaan,
Guruji laate Hain ruhaaniyat ka paigaam,
Guruji saath Hain dukh mein,
Guruji saath Hain sukh mein.

Guruji Hain saadepan mein,
Guruji Hain neevenpann mein,
Guruji ke ashish se hota kalyaan,
Guruji hee jaan Hain, Guruji hee Hain jahaan.

Guruji Hain hum sab mein,
Guruji toh kaayinaat ke Rabb Hain,
Guruji Apne Hain, baaki saara jagg hai begaana,
Guruji ka karein hum har pal shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 3, 2020

Om Namaha Shivaya
Aaj Ka Suvichaar 🙏🏻🙏🏻 # 866

               Is Kalyuga Mein

Pyaare Guruji,

Aaspaas keechad honei ke baavajood bhi,
Apni bhumika aur charitra barkaraar rakhta hai kamal,
Vaise hee kalyuga mein jo bhi ho jaaye,
Hum sadaa karein Aapke hukm par amal.

Mushkil hai pahaad par chadhkar chhooona aasmaan,
Lekin usee pahaad par se gir kar ludak jaana hai bahut aasaan.
Isliye agar kabhi pahaad par chadhein toh mann mein na aaye gumaan,
Yaad rahei hamein ki yeh jeevan hai ek imtehaan.

Aapka saath hai, is daat kee sadaa karein hum kadar,
Yaad rakhein ki hamaari har soch aur har karam par hai Aapki nazar,
Yeh bhi yaad rahey ki tarr jaayenge jo Aap karenge nadar,
Aur Aapke bharose hee kar lein yeh jeevan basar.

Insaan hain hum, Bhagwaan nahin,
Maan ho hamein, lekin abhimaan nahin.
Beparwaah hon, lekin laaparwaah nahin,
Aapki sharan ke alaawa ho hamein koi chaah nahin.

Aapke prem roopi amrit kee boondein,
Hamaari pankhudiyon ko rakhein bedaag aur komal.
Hamaara svabhaav ho snehmayee aur saral,
Hamaari neev ho niswaarth aur nirmal.

Koi laukik aakarshan hamein agar lagey bhatkaane,
Toh Aapki dee hui subuddhi se jaayein hum sambhal,
Ashirwaad deejiye Guruji,
Ki hum is kalyuga mein bann kar rahein kamal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 2, 2020

Om Namaha Shivaya
Aaj Ka Suvichaar 🙏🏻🙏🏻 # 865

Jo Guruji Ke Dwaare Aayega

Jo Guruji ke dwaare aayega,
Bann kar Unka daas,
Usey Ve sadaa ke liye,
Rehne denge Apne paas.

Jo Guruji ke dwaare aayega,
Lekar apne mann kee khaali gaagar,
Uskee uss gaagar mein Ve bhar denge,
Apni mamta ka mahasaagar.

Jo Guruji ke dwaare aayega,
Bann kar Unke charnon kee dhool,
Usey Guruji se ek din mil jaayenge,
Unke ashirwaad roopi prasad ke phool.

Jo Guruji ke dwaare aayega,
Sab kuch kar ke haar,
Uska Ve uddhaar karenge,
Kar ke uska beda paar.

Jo Guruji ke dwaare aayega,
Bannkar kinkar aur fakeer,
Uss bhakt kee toh Ve,
Bilkul chamkaa denge taqdeer.

Jo Guruji ke dwaare aayega,
Aur shraddha aur vishwaas se Unhe pukaarega,
Usey Unka divya prataap,
Zaroor zaroor taarega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja