Shaant na hoga jab takk mann, Kaise praapt hoga sukh ka dhan? Guruji , kewal Aapki karunadrishti se yeh mumkin ho sakta hai, Kyunki mann toh idhar udhar bhatakne se nahin rukta hai.
Duur karne mein madad keejiye, Agyaan kee raat ka andhera, Aapki kripa se hee dekhne ko milega, Hamein gyan roopi savera.
Apne ashirwaad ke amrit se, Kar deejiye hamaara uddhaar, Hamein vinaash se bachaa sakta hai, Kewal Aapka kiya upkaar.
Aapke simran aur satsang mein hum, Seekhein vikaaron se chhootne kee kalaa, Varna ye manovikaar hum par bhaari padkar, Denge hamaari satyanishtha (integrity)ko jalaa.
Ek hee mann hai hamaare paas, Usey niyantran mein rakhna sikha deejiye, Buss ye mann Aapka dhyan karey sadaa, Aisa raasta isey dikhaa deejiye.
Jitna hum Aap mein leen rahenge, Utna hee vyarth kee baaton se hongei duur, Aur japp tapp hee veh saadhan hai, Jis se mann ekaagr hoga zaroor.
Jo yeh mann abhi hai itna chanchal, Veh Aapki mehar se ho jaaye nishchhal, Aapka dhyan hee karega shanti pradaan, Aapki rehmat se milega sukh aur hoga kalyaan.
Yahaan vahaan se poochhte huey, Bade Mandir takk banda pahuncha, Adbhut sa ehsaas hua usey, Dekh kar Shivlinga itna ooncha.
Bheetar gaya veh kuch jaane bin, Raat thi, lekin raunak thi jaise ho din, Itnee sangat dekhi usne aur baitha veh darbar mein, Aasan dekhte hee doob gaya veh Guruji ke pyaar mein.
Itna anokha aakarshan, itna suhaana spandan, Usne sees jhukaaya aur kiya vandan, Bhaavuk hokar veh zor zor se ronei lagaa, Guruji ke ashish ka asar uspar honei lagaa.
Chai prasad peekar usne langar prasad bhi chhakaa, Aur amrit peekar usey bahut anand aaya, Mandir mein Guruji ke swaroop dekhkar, Guruji ka divya roop uske dil mein samaaya.
Jodaghar par joote liye toh, Kisee sangat ne usey diya Guruji ka swaroop, Uskee khushi kee seema na rahi, Jabb usmein bande ko dikha Shivji ka roop.
Guruji ke naam kee masti mein, Tabb se usne jeena kar diya shuru, Bahut khushkismat maana usne swayam ko, Kyunki usey mil gaye thei uske Guru.
Buss, phir toh kya kehne uske, Veh toh Guruji kee kripa se tarne lagaa, Jo sankat ek ke baad ek aata thaa jeevan mein, Veh sankat bhi uss-se darne lagaa.
Guruji ne dee usey shakti aur prerna, Aur tabb se uska swaasthya sudharne lagaa, Guruji ne usey dee himmat aur chetna, Aur veh apne kaam-kaaj mein aagey badhne lagaa.
Veh karta raha gupt sewa, aur simran aur satsang, Uspar chadh gaya Guru bhakti ka pakka rangg, Usne Guruji ko shukrana aur sarv-samarpan kar diya, Guruji kee mehar se veh sadaa ke liye tarr gaya.
Guruji kee mahima phaylaate chalo, Guruji kee mehar ke geet gaate chalo, Masti mein gungunaate chalo, Dil mein ullaas tum laate chalo.
Yeh Guruji ka gungaan hai, Iska meetha parinaam hai, Ismein sukh aur aaraam hai, Yahee toh aata kaam hai.
Guruji ke gungaan mein amrit kee pavitrataa hai, Guruji ke gungaan mein chhaaon kee sheetaltaa hai, Guruji ke gungaan mein Guruji ke liye pyaar hai, Guruji ke gungaan mein Guruji ke liye satkaar hai.
Guruji ka gungaan karti hai saari sangat, Guruji ka gungaan sunti hai saari sangat, Guruji ke gungaan mein itna chayyn hai, Guruji ke gungaan se num hotey nain hain.
Guruji ke gungaan mein hai hamaari suraksha ka sandesh, Guruji ke gungaan se Guruji karein dil mein pravesh, Guruji ka gungaan hota rahe baar baar, Guruji ka gungaan hamein deta hai taar.
Guruji ke gungaan se bhakton ka hota hai kalyaan, Guruji ke gungaan se sadaa rehta hai Guruji ka dhyan, Guruji ka gungaan dil se rasna par hai aata, Guruji ka gungaan aathon peher hai bhaata.
Guruji ke gungaan se utsaah badhta hai hamaara, Guruji ka gungaan hai Guru mahima kee behti dhaara, Guruji ka gungaan Guruji ko lagtaa hai pyaara, Guruji ka gungaan hai har asahaay ka sahaara.
Baadal masti mein thaa jhoom raha, Thaa veh akash ko baar baar choom raha, Akash bhi usey tehelne de raha thaa, Aur baadal akash se keh raha thaa.
Ki akash hai kitna anant aur aseem, Aur veh sabko lagtaa hai itna haseen. Akash phir bhi neevenpann mein jhuka dharti kee oar, Aur yeh dekhkar baadal ho gaya bhaav-vibhor.
Itna aseem aur raajsee hai akash, Jisey roshan karta hai sooraj ka prakash, Phir bhi veh neevanpann dikhaata hai, Toh kyun hum insaanon ko itna ahankaar aata hai?
Hum toh itne maamuli aur tuchh hain, Ki Guruji ke liye hum hain keede makodon kee bhanti, Phir bhi hum sochte hain ki hum bahut kuch hain, Jabb ki hum astitvaheen hain bin Guruji kee kanti.
Guruji kee baat maankar, Kyun na neeven bann jaayein, Taaki atma par ahem ka daag na ho, Jabb hum is duniya se jaayein.
Kyunki jitne daag se maylee hogi atma, Utnee der se hoga karmon ka khaatma, Phir avasar der se aayega Guruji mein samaane ka, Aur bhi zyaada intazaar karna padega is shubh ghadi ke aane ka.
Neevenpann mein ek adbhut mithaas hai, Jo Guruji ko hai bahut bhaati, Guruji ko veh adaa bahut pasand hai, Jo neevenpann mein hai samaati.
Isliye seekhein hum akash se, Neevenpann ka andaaz, Aur jitna aagey badhein jeevan mein, Utna aur neeven bann-ne ka karein prayaas.
Kewal chaar din kee hai yeh maanav zindagi, Karte chalein vinamr svabhaav se Guruji kee bandagi, Neevenpann ko atmasaat karein apne vyavhaar aur vichaar mein, Shuddhi aur pyaar ka mahaul banaayein sansaar mein.
Anand le le safar ka, aye musaafir, Aaj ya kal yeh safar poora ho jaayega, Agar har pal ko poori tarehn se na jeeya toone, Toh safar ka mazaa adhoora reh jaayega.
Kar le sadupyog tu har pal ka, Kya bharosa hai kal ka? Khush rehkar aaspaas bhi phaylaa prasannataa, Yahee chaynn ka raaz hai, isee mein hai sanpannataa.
Karta chal tu Guruji ka har pal shukrana, Kyunki har pal hai Unka diya hua khazaana, Khushkismat hain, jinhe yeh mil jaata hai, Kyunki har koi kahaan isey paata hai.
Saanson mein chalta rahe Guruji ka simran, Har pal achchaayee mein beetey, Guruji bhi khush hotei Hain unse, Jo har pal ko hain sachchaayee se jeetey.
Bahut anmol hai zindagi, Kar le tu Guruji kee bandagi. Jeevan ko tuchh vichaaron mein vyarth na ganvaa, Swayam ko waqt ka mahatva tu samjhaa.
Apna har karam kar sadaachaari se, Guruji kee nazar aur nadar sab par hai har pal, Achche burey karam sab tere khaate mein hain, Aur Guruji faisla sunaayenge aaj nahin toh kal.
Vikaar rahit hokar shuddhi se jee le, Guruji ke naam ka amrit tu pee le, Kshamaa maang le aur de de kshamaa, Nikhaar le apna aane wala samaa.
Mann saaf hoga, toh sakaraatmakta aayegi, Har pal mein phir wafaa aur masti chhaayegi, Jabb dil ko zindagi kee asthirtaa rahegi yaad, Tabb koi pal na vyarth hokar hoga barbaad.
Isliye, tu odh le simran kee chaadar, Kar le har pal ka tu shukrana aur aadar, Har pal Guruji kee kripa ka mohtaaj hai, Har pal par MahaShiv Guruji ka raaj hai.
Ateet, vartmaan, aur bhavishya kee Guruji ko saari khabar hai, Unkee Apne har bhakt par har pal nazar hai, Hamaari atma ko pehchaanein, aur jaanein hamaare har karam ko, Pichhle karam katvaate Hain, aur suljhaate Hain hamaare janam maran ko.
Guruji toh swayam hee divya jyot Hain, Na Hain Ve kisee Devi ya Devta ke adheen, Jahaan bhi hum hotei hain, Guruji sangg hotei Hain vaheen.
Guruji koi jaadugar nahin Hain, Balki adhyatmik shakti ka bhandaar Hain, Srishti mein parivartan ke sarjak Hain, Aur bhakton ke paalanhaar Hain.
Jaat mein koi bhed-bhaav nahin karte Hain Guruji, Har praant ke bhakt kee jholi bharte Hain Guruji, Surakshit rakhte Hain Apne ashirwaad ke aanchal mein saari sangat ko, Karmon ka bhugtaan karaakar harte Hain sabke sankat ko.
Srishti ke karta Hain aur pariwaar ka mahatva bataate Hain, Ghar mein saamanjasya poorvak rehna zaroori hai, Ve samjhaate Hain, Maanav jaati ko sakaratmakta se jeena sikhaate Hain Guruji, Maanavtaa aur prakriti ke beech santulan laate Hain Guruji.
Niswaarthta se sewa karne ko kehte Hain Guruji, Sangat ke liye bahut kasht sehte Hain Guruji, Vehemon aur andhvishwaas ko mitaate Hain Guruji, Atma ka pavitrikaran (cleansing) karaate Hain Guruji.
Saari sangat ka sadaa rehta hai Unhe dhyan, Har granth, har puran ka hai Guruji ko poora gyan, Devon ke Dev, MahaShiv Hain Guruji, Kaayinaat mein sabse divya Hain Guruji.
Mrityu ka darr sangat ke mann se hataate Hain Guruji, Samaaj mein sudhaar ka raasta dikhaate Hain Guruji, Insaanon ke beech banee ohde aur dharam kee deewaar ko giraate Hain Guruji, Sabko mil jul kar rehna sikhaate Hain Guruji.
Insaaniyat mein ruhaaniyat ka rangg milaate Hain Guruji, Apne bhakton ko moksh takk le jaate Hain Guruji, Guruji kee sharan mein aate hee kalyaan ho jaata hai shuru, Hamaare itne changey naseeb hain ki hamaare Guruji Hain pooran Guru.
Aapke dikhaane se raasta nazar aane lagaa, Aapki nadar se nazariya badal jaane lagaa, Aapki mamta se hum chayyn kee neend sonei lagey, Aapki karuna se udaasi ke pal kumm honei lagey.
Aapke diye huey utsaah ne jeena sikhaaya, Aapki dee hui suraksha ne kitni mushkilon se bachaaya, Aapki divya leela ne bakshi hamein kriyaatamak buddhi, Aapke diye huey sanskaaron se jeevan mein aayee shuddhi.
Aapke ashirwaad ne sajaaya hai raasta hamaara, Aapke kiye uddhaar ne hai sangat ko taara, Aapki dee hui himmat hamaara sahaara hai, Aapka saath hee jeevan mein sabse pyaara hai.
Aapki mehar se har vehem chhoot gaya, Aapki kripa se andhvishwaas toot gaya, Aapke sneh se bandd kismat ke taale khulne lagey, Aapke shubh spandan se nakaaratmak vichaar dhulne lagey.
Aapki bhakti ka deep akhand jal gaya, Aapke pyaar se asha ka phool khil gaya, Aap mein sangat ko Khuda mil gaya, Aapke charnon mein MahaShiv ka dhaam mil gaya.
Guruji toh veh sab kar sakte Hain, Jo hamaari buddhi aur kalpana soch bhi nahin sakti, Unkee soch toh vahaan se shuru hoti hai, Hamaari vichaar-dhaara jahaan hain rukti.
Hamein toh hamaari maanav buddhi hee bataati hai, Ki kya uchit, anuchit, jhootha, ya sachcha hai, Lekin Guruji kee divya-drishti aur ishwareeya soch ka nirnay, Vahee hamaare liye har tarehn se achchaa hai.
Hamaari haalat aur sthiti ka, Hamaare jeevan kee paristhiti ka, Guruji ko ehsaas hai, chaahe hamein na lagey aisa, Unhe toh poora gyan hai ki kaun hai kaisa.
Pichhle karmon ka bhugtaan karaate huey, Guruji aaj ke pal mein jeena sikhaayenge, Aur Apne pyaar aur anushaasan se, Aane waale kal mein parivartan dikhaayenge.
Hamaari oar se aawashyak hai karna Guruji ka simran, Hamein karna hee hoga Unhe sarv-samarpan, Guruji ke prati shraddha, saboori, vishwaas, aur bhakti, Inse milegi hamein sehensheelta aur shakti.
Guruji kee adaalat jab faisla sunaa deti hai, Tabb raja ko rankk aur rankk ko raja banaa sakti hai, Guruji toh ek pal mein badal sakte Hain bhakton kee kismat, Unhe kewal sachcha pyaar chahiye, na ki dikhaawa aur jhoothi khidmat.
Isliye jab bhi zindagi lagne lagey adhoori, Guruji ko yaad karte rehna hai aur bhi zaroori, Kyunki Guruji hee duur karenge har majboori, Aur phir adhoori zindagi ho jaayegi poori.
Pyaare Shri Ganeshji ke janam ka prateek, Ganesh Chaturthi ka utsav hai aaya, Sabhi Shivganon ke adhyaksh ka padd paakar, Ganesh ji ne Ganapati naam hai paaya.
Brahmaji ne Shiv Puran mein, Naarad ji ko bataaya, Ki kaise Shiv Parvati ke jeevan mein, Itna pyaara Bhagwaan aaya.
Devi Parvati kee sakhiyon ne ek din, Unse kaha karne ko jatan, Ki Ve Apni suraksha ke liye, Rachit karein ek vishesh gann.
Pehle toh Parvati Mata, Bhool gayin jo keh gayi sakhiyon kee rasna, Phir Unhe lagaa ki sakhiyon ne sahi kaha, Aur Unhonei kee Ganeshji kee rachna.
Mata kee raksha karne ke liye, Ganeshji ne kiya Shivji se bhi yudh aur vaad-vivaad, Krodh mein Shivji ne toad dee seema, Aur diya Ganeshji ke sir ko kaat.
Parvati ji ko gussa aaya, Unhonei pralay machaaya, Shaktiyon kee sena kee rachna kar ke, Devaganon ko bahut daraaya.
Devtaaon ne Mata se maangi kshama, Kar ke Mata kee bandagi, Mata ne maafi dene ke badle maangi, Apne putr kee zindagi.
Devtaaon ne Shivji se kiya anurodh, Ki Ve tyaag dein Apna krodh, Rijhaayein Parvati ji ko jo theen peedit, Kar ke Ganeshji ko jeevit.
Shivji ne devtaaon ko diya aadesh, Ki Ve uttar disha mein jaayein, Aur jo bhi pehla praani miley, Uska sir kaat kar ke le aayein.
Shivji ke hukm ko maan kar, Devtaa ekdant haathi ke sees ko lekar aaye, Phir Unhonei Ganeshji ke dhadh ko dhoya, Aur sees ko dhadh par diya lagaaye.
Mata Parvati huin prasann, Unka parivaar ho gaya sampann, Mata ne diya Ganeshji ko bahut maan, Poojaneeya honei ka Unhe diya vardaan.
Ganeshji ke divya mastak par, Thaa abha ka sindoori rangg, Parvati Maa ne kaha ki Unkee pooja hogi, Hameshaan lal sindoor ke sangg.
Ganeshji kee stuti sab Devon ne kee, Aur diya Unhe prem bhara sammaan, Ganeshji ke baad hogi Unn sabki pooja, Diya Unhonei Ganapati ko yeh vardaan.
Ye hai vighn-haran mangal-karan Ganeshji ke janam kee katha, Jaisi bhi vipatti aaye bhakton par, Ganeshji usey dete Hain hataa.
Guruji ke rachaaye Bade Mandir mein, Unhonei sthaapit kiye Shri Ganesh, Jinka naman kar ke saare bhakt, Karte hain Bade Mandir mein pravesh.
Aap sab ko Ganesh Chaturthi ke paawan parv par, Bahut bahut badhaayee aur pyaar, Jis mahamaari ne itna darr phaylaaya hai, Dua hai ki uss-se abb mukt ho jaaye sansaar.
Aaj Ka Suvichaar 