August 1, 2020
Om Namaha Shivaya
Aaj Ka Suvichaar 🙏🏻🙏🏻 # 895
Guruji Mein Hain Rabb
Kayee insaanon ko Khuda ne dukhi hotey dekha,
Aur kayiyon ko dekha haalaat kee khaatir hotey huey majboor,
Kayee aur ko dekha shoshan aur atyaachaar ko sehte huey,
Kisee mein dekhi laachaari aur niraasha, aur kisee mein dekha guroor.
Khuda ne chetaavani dee,
Phir bhi insaan ne ek na suni,
Khuda ne kaha sachchaayee Khuda khud hee Hai,
Lekin insaan ne fareb aur maya kee chaadar buni.
Khuda ne Guruji ka roop liya aur dharti par aaye,
Bin pravachan hee sarbat ko insaaniyat ke taur tareeke samjhaaye,
Anginat bhakton par aaj bhi Guruji kee mehar kee varsha hai ho rahi,
Bhavishya mein unka uddhaar bhi hoga jinkee kismat aaj shaayad hai so rahi.
Bhagwaan ke roop mein farishta Hain Guruji,
Aur farishte ke roop mein Bhagwaan,
Divyataa kee sabse tejasvi jyot Hain Guruji,
Jinkee lau se ujjwal hua hai saara jahaan.
Hamein mil raha hai Unkee jyot se,
Apne jeevan ko roshan karne ka shubh avsar,
Is anmol mauke ko haath se na jaane dein,
Kyunki isee se hongei hum ruhaani raaste par agrasar.
Guru aur Ishwar ke sahaare ke bina,
Mushkil hee nahin, balki namumkin hai is raaste par chalna,
Hamein khushakismati se Guruji mein Rabb mil gaye hain,
Phir kyun sanshay ya sankoch ke saanche mein dhalna?
Isliye shraddha, bhakti, aur vishwaas ke sangg,
Guruji ke prem ke rangg mein hum jaayein rangg,
Guruji ka pyaar jeevan mein bhar raha hai jo umangg,
Usmein apne aap ko khokar hum ho jaayein mastt malang.
🌹🌹🌹🌹🌹🌹🌹
Jai Guruji 🙏🏻🙏🏻
Dhirja
Aaj Ka Suvichaar 