August 23, 2020
Om Namaha Shivaya
Aaj Ka Suvichaar 🙏🏻🙏🏻 # 917
Adhoori Zindagi
Guruji toh veh sab kar sakte Hain,
Jo hamaari buddhi aur kalpana soch bhi nahin sakti,
Unkee soch toh vahaan se shuru hoti hai,
Hamaari vichaar-dhaara jahaan hain rukti.
Hamein toh hamaari maanav buddhi hee bataati hai,
Ki kya uchit, anuchit, jhootha, ya sachcha hai,
Lekin Guruji kee divya-drishti aur ishwareeya soch ka nirnay,
Vahee hamaare liye har tarehn se achchaa hai.
Hamaari haalat aur sthiti ka,
Hamaare jeevan kee paristhiti ka,
Guruji ko ehsaas hai, chaahe hamein na lagey aisa,
Unhe toh poora gyan hai ki kaun hai kaisa.
Zaroori nahin ki jo aaj hamaari haalat hai,
Vaisi hee aagey bhi rahegi,
Srishti mein Guruji kee adaalat sabse mahaan hai,
Vahee sahi faisla karegi.
Pichhle karmon ka bhugtaan karaate huey,
Guruji aaj ke pal mein jeena sikhaayenge,
Aur Apne pyaar aur anushaasan se,
Aane waale kal mein parivartan dikhaayenge.
Hamaari oar se aawashyak hai karna Guruji ka simran,
Hamein karna hee hoga Unhe sarv-samarpan,
Guruji ke prati shraddha, saboori, vishwaas, aur bhakti,
Inse milegi hamein sehensheelta aur shakti.
Guruji kee adaalat jab faisla sunaa deti hai,
Tabb raja ko rankk aur rankk ko raja banaa sakti hai,
Guruji toh ek pal mein badal sakte Hain bhakton kee kismat,
Unhe kewal sachcha pyaar chahiye, na ki dikhaawa aur jhoothi khidmat.
Isliye jab bhi zindagi lagne lagey adhoori,
Guruji ko yaad karte rehna hai aur bhi zaroori,
Kyunki Guruji hee duur karenge har majboori,
Aur phir adhoori zindagi ho jaayegi poori.
🌹🌹🌹🌹🌹🌹🌹
Jai Guruji 🙏🏻🙏🏻
Dhirja
Aaj Ka Suvichaar 