Month: September 2020

September 20, 2020

Om Namaha Shivaya
Aaj Ka Suvichaar 🙏🏻🙏🏻 # 945

Is Dharti Par Hum Mehmaan Hain

Hum toh mehez insaan hain,
Is dharti par hum mehmaan hain,
Mool gyan se kitne anjaan hain,
Sach maano toh hum bilkul naadaan hain.

Apni saanson par hamaara hukm nahin chalta,
Hamaari lakh koshishein karne par bhi kasht nahin talta,
Jabb takk divyataa ka ashirwaad saath na ho,
Jabb takk Guruji ke haath mein hamaara haath na ho.

Hum sab jo Guruji kee mahima ko maante hain,
Jo Unko Bhagwaan ke roop mein pehchaante hain,
Hum vaakeyi mein itne kashton se bachey huey hain,
Hamaare jeevan ke pal Guruji ne Apni divyataa se chuey Hain.

Kabhi kabhi Guruji kee kripa se,
Swapn darshan mein kasht hai mil jaata,
Is tarehn se aksar kasht asal mein
Aane se pehle hai tal jaata.

Aur jab bhi hakeekat mein kabhi
Kasht ka saamna karna padta hai,
Guruji is tarehn se katvaate Hain
Ki adhiktar asar Unhee par padta hai.

Hamein toh kewal dus pratishat,
Buss, itna hee hota hai sehna,
Aur ye sab Guruji khud karte Hain,
Hamein nahin padta hai Unhe kehna.

Aise Guru roopi Ishwar kahaan milenge,
Inhee kee karuna se hamaare paap dhulenge.
Apni goad mein baithakar bhavsaagar jo paar karaate Hain,
Na vehem ke adheen karte Hain, na hee niyamon se daraate Hain.

Kewal hamaara sadbhaav Ve chaahein,
Sadaa ujjwal karein hamaari raahein,
MahaShiv Hain, sabka kalyaan Hain karte,
Isliye toh Unke bhakt Unpar vishwaas hain dharte.

Isliye is dharti par rehte rehte,
Isey apni jaageer na maan lena,
Guruji ke kahey anusaar gupt sewa, gupt paath hai karna,
Aur hamein gupt daan hai dena.

Guruji ka ashish saath hoga,
Toh Ve har naadaani maaf karenge,
Guruji ko sarvsamarpan jo hoga,
Toh Ve saare kasht harenge.

Yahaan toh mehmaan hain hum,
Lekin kaash jab yahaan se jaayein,
Toh hamein janam maran ke chakkar se mukti dekar,
Guruji pyaar se sachkhand lekar jaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

SeptembVer 19, 2020

Om Namaha Shivaya
Aaj Ka Suvichaar 🙏🏻🙏🏻 # 944

            Abb Toh Dil Chaahe

Abb toh dil chaahe,
Simran karna raat aur din,
Kuch bhi achcha nahin lagtaa,
Abb toh simran kiye bin.

Simran mein Guruji kee bhakti hai,
Simran se miltee mann ko shakti hai.
Simran karne ko jee karta hai har pal,
Simran se hee kasht jaayenge tal.

Guruji ka simran karne mein,
Aisa anand hai aata,
Jaise registaan mein musaafir ko,
Sukhad antaraal hai mil jaata.

Simran prateek hai bhakti kee pyaas ka,
Simran prateek hai Guru praapti kee aas ka.
Simran gehra honei se lagne lagta hai dhyan,
Aur dhyan kee gehraayiyon mein basta hai divya gyan.

Isliye simran toh veh oonchi seedhi hai,
Jo le jaati hai ruhaaniyat ke shikhar par,
Lekin neevenpann ko pakka saathi banaana hai zaroori,
Nahin toh adhyatmik unnati reh jaati hai bikhar kar.

Pehle pehle mann ekaagrachitt na ho paaye,
Toh bhi koi baat nahin,
Seedhi taar jod kar Guruji se,
Simran kee koshish karte rehna bhi hai sahi.

Simran ke liye koi paabandi nahin, Guruji kehte Hain,
Sabse badi baat hai ki Ve hamaare dil mein rehte Hain.
Isliye har pal aur har jageh par kiya jaa sakta hai simran,
Kewal chaahiye shraddha aur vishwaas se bharaa mann.

Guruvar ke simran se karam kat-te jaayenge,
Simran se hum Guruji ke kareeb aa paayenge,
Isliye karte chalein hum Unka simran aur dhyan,
Kar ke Guruji ko mann mandir mein viraajmaan.

Jaise jaise hum karenge prayaas,
Dheere dheere ho jaayega abhyaas,
Simran mein milega itna ruhaani anand,
Aur simran aur dhyan dwaara praapt hoga satchittanand.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 18, 2020

Om Namaha Shivaya
Aaj Ka Suvichaar 🙏🏻🙏🏻 # 943

       Aapse Hee Hai Jeena Marna

Guruji, hamein chod na dena,
Kabhi hum se muh moad na lena,
Aapne bigde kaaj Hain sanvaare,
Aapko hee ye dil hai pukaare.

Parinde akash mein azad udd rahey hain,
Aur insaan jhel rahey hain chaar deewari,
Adhyatmik vikas kee kamee hai jagg mein,
Maansik santulan par bura asar kar rahi hai beemari.

Beemari ka naam hai ‘mai aur meri,’
Duniya banee hai maya kee dheri,
Aapke bin raahein hain andheri,
Abb na keejiye aane mein deri.

Kyunki sansaar ko aa raha hai nazar,
Ki chaahiye Aapki daya bhari nadar,
Beemaari phayl gayi hai is kadar,
Ki duniya mein ho rahi hai gadar.

Saath mein aayee hai mahamaari,
Saabit karne insaan kee laachaari,
Yaad dilaane ki insaan nahin hai Bhagwaan,
Chaahe insaan ko ho jitna bhi vaigyaanik gyan.

Padd jaaye jo Aapki drishti,
Toh sanvar jaaye yeh srishti,
Mahamaari ka bhi ho jaaye antt,
Kripa keejiye, pyaare Bhagwant.

Nirogta ka deejiye vardaan,
Tann mann se swasth ho har insaan,
‘Mai’ kee beemari aur mahamaari,
Dono se hee mukt ho yeh dharti saari.

Sadbuddhi deejiye,
Shuddhi keejiye,
Taaki hum sab na karein aur gunah,
Aur pichhlon ke liye kar deejiye kshamaa.

Guruji, Aap Hain paalanhaar,
Guruji, Aap Hain parwardigaar,
Aapse hee hai hamaara tarna,
Aapse hee hai jeena marna.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

[10:55 PM, 9/16/2020] Dhirja Bhat M. D.: September 17, 2020

Om Namaha Shivaya
Aaj Ka Suvichaar 🙏🏻🙏🏻 # 942

                  Suhaana Safar

Samarpan ka suhaana safar hai ye,
Yahaan raasta khud bakhud hee manzil bann jaata hai,
Dil itnee khushi aur anokha sukoon paata hai,
Jab bhi Guruji ka khayaal zehen mein aata hai.

Safar ke har moad par,
Guruji muskuraate huey nazar aate Hain,
Peechhe mudo toh Guruji dikhte Hain,
Aur aagey bhi Ve hee raasta dikhaate Hain.

Koi bandish nahin, kewal azaadi niswaarth bhakti kee,
Hamaara uddhaar ho raha hai, yeh mehar hai Unkee shakti kee.
Koi thakaan nahin, kewal Guruji ka diya hua utsaah aur oaj,
Guruji ne sweekaara hai, Unke charnon mein hee hai mehar aur mauj.

Baatein bhi Guruji ke sangg, aur Unke saamne hee rona aur hasna,
Unkee mahima ka gungaan karne mein ramti rahey yeh rasna.
Har kaam Unkee manzoori se,
Sahi waqt par ho saboori se.

Koi dikhaawa nahin, koi chadhaava nahin,
Koi shart nahin, koi behkaava nahin,
Buss divya rishte kee ruhaani reet,
Aur Guruji se paawan preet.

Is safar mein saanson ko miltee hai raahat,
Is safar mein hai Guruji ko paane kee chaahat,
Koi karkash shor nahin, kewal Guruji kee kanti mein shanti,
Isee safar ke antt ko atma apni manzil hai maanti.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja
[10:58 PM, 9/16/2020] Dhirja Bhat M. D.: 💚🌹🌹🌹🌹🌹🌹🌹💚
💜💛💜💛💜💛💜

September 16, 2020

Om Namaha Shivaya
Aaj Ka Suvichaar 🙏🏻🙏🏻 # 941

                     Aye Dil

Aye dil, abb aur na phirta jaa yoon bannkar awaara,
Na kehne de kisee ko, ki tu hai bechaara,
Kyunki Guruji ne lee hai teri zimmedaari,
Aakhir aa gayi hai abb teri bhi baari.

Karta chal tu Guruji ka shukrana,
Shuru kar le naam ka dhan kamaana.
Ismein hai ek anokhi vinamr si shaan,
Bahut anmol hai sewa, simran, satsang ka daan.

Aye dil, samay aa gaya hai tere pavitrikaran ka,
Anusaran kar le tu shudh aacharan ka,
Guruji kee sharan mein mitaa de apni hasti,
Dekh lena, tere bheetar aayegi kitnee masti.

Duniya kee achchaayiyon se khush rehta chal,
Aaj kee galatiyon se seekh kar sudhaar le apna kal,
Har mushkil ko chunauti samajh kar tu kar le sweekaar,
Apni har dhadkan mein sanjo le tu Guruji ke liye pyaar.

Tu bilkul bhi na darr kisee aur se,
Tu buss Guruji par gaur kar gaur se.
Zamaane ka kya hai, veh toh kalyuga ka gulam hai,
Yahaan beimaani ko uchit saabit karne ka har intazaam hai.

Karne de duniya waalon ko jo bhi ve hain karte,
Guruji kee adalat mein sab hain apna jurmaana bharte,
Aaj bharein ya kal bharein, ye Guruji aur Unke beech ka vishay hai,
Tu bilkul mastt rehna, kyunki tera nek nishchay hai.

Guruji ko samarpan karne ka nishchay,
Sachchaayee se na darne ka nishchay.
Har pal Guruji ke aur kareeb aane ka nishchay,
Unke charnon mein samaane ka nishchay.

Buss, inhee baaton ko rakhte huey dhyan mein,
Tu swayam ko dubo le Guruji ke gyaan mein.
Is tarehn se doobega toh tu bilkul tarr jaayega,
Aur tera khaalipan Guruji ke ashish se bhar jaayega.

Tujh mein tu na rahega jis din,
Tu na reh paayega Guruji ke bin,
Toh tujhe mil jayegi teri sunehri manzil,
Phir tu na rahega awaara, aye dil.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 15, 2020

Om Namaha Shivaya
Aaj Ka Suvichaar 🙏🏻🙏🏻 # 940

   Na Kar Tu Soch Vichaar

Raasta bhi hai Guruji se,
Guruji se hee hai manzil,
Jeevan bhi Unhee se hai,
Unhee se hee hai mehfil.

Unke bina toh bheed mein bhi hai akelapann,
Isliye Unhee ke saath ko le tu apnaa,
Ek Unhee ka saath hee hakeekat hai,
Baaki sab hai mithya aur sapna.

Mithya toh ek din mitt jaayegi,
Hakeekat hameshaan saath nibhaayegi,
Guruji ke haath mein tera haath honei se,
Tujhe poori suraksha mil jaayegi.

Nishchint mann hoga toh,
Tu har pareshaani se duur jaa paayega,
Tere dil-o-jaan par,
Guruji ka noor chhaa jaayega.

Guruji ke anant sahaare se tu har chunauti se ladd paayega,
Aur tera simran aur sewa ka bhaav aur bhi badh jaayega.

Tu kaam aa sakega insaaniyat ke,
Tu kareeb aa paayega ruhaaniyat ke,
Guruji kee anukampa se tera charitra sudhar jaayega,
Guruji tere sangg hongei tu jidhar bhi jaayega.

Is se zyada sukhad raasta aur koi nahin,
Jahaan dukh mein bhi sukh chhupta hai,
Yahee hai is raaste aur manzil kee khoobi,
Ki yahaan kabhi kalyaan nahin rukta hai.

Isliye na kar tu soch vichaar,
Vyarth hai yeh laukik baazaar,
Apnaa le tu Guruji ka pyaar,
Ismein hai shanti kee sukhad bahaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 14, 2020

Om Namaha Shivaya
Aaj Ka Suvichaar 🙏🏻🙏🏻 # 939

             Jeevan Ka Uddeshya

Tu akela hai toh kya hua,
Tere sir par Guruji ka haath hai,
Koi aur sangg nahin hai toh kya hua,
Tera Guru sadaa tere saath hai.

Kyun bhar aaye hain tere nayyn?
Kyun ho raha hai tu bechayyn?
Guruji ko tere sukoon kee parvaah hai,
Unke pyaar se roshan teri raah hai.

Tu bilkul na ho daanva dol,
Tu buss ‘Jai Guruji’ bol,
Guruji tujhe kabhi nahin chodenge,
Ve kabhi tujhse muh nahin modenge.

Laukik ichchaaon ke paar rakh tu apni drishti,
Unn par hee dhyan lagaa jo sambhaalte Hain saari srishti,
Neeyat nek rakh, baaki Guruji Hain sambhaalne ke liye,
Unka ashirwaad sadaa hai teri zindagi sanvaarne ke liye.

Maanav jeevan mila hai tujhe,
Tu kar le sachchaayee se karmon ka niptaara,
Baaki har chinta chod de,
Tera dhyan rakhne wala Guru hai bahut hee pyaara.

Guruji ko maalum hai dashaa tere mann kee,
Tu buss arzoo rakh aslee dhan kee,
Aur kuch na maang asal cheez ke alaawa,
Shukr kar, ki tujhe aaya hai Unka bulaawa.

Guruji ko paakar aur koi khwaahish na rahegi teri,
Unhee kee mahima sunaane mein bhavna bahegi teri,
Yahaan se jaane kee bela lagegi tujhe sukhdaayee aur suhaani,
Kyunki tere safar ka antt hoga itna khoobsoorat aur ruhaani.

Jab neki aur pavitrataa samaayegi teri atma mein,
Tabhi toh atma samaa sakegi Paramatama mein,
Poori kaayinaat mein nahin hai is se zyada shubh aur shudh dhan,
Isliye isee ko jeevan ka uddeshya banaane mein tu ho jaa abb magan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 13, 2020

Om Namaha Shivaya
Aaj Ka Suvichaar 🙏🏻🙏🏻 # 938

       Kab Judey Hum Guruji Se

Kab judey hum Guruji se,
Is sawaal ka jawaab hum nahin hain jaante,
Isliye hum sab apne nazariye se jo mehsoos karte hain,
Hum usee ko apne rishte ka aarambh hain maante.

Hamaari insaani buddhi na jaan paaye,
Ki kab thaa Unse judne wala haseen pal,
Lekin uss se shaayad koi fark nahin padta hai,
Kyunki Guruji toh jaante Hain sabka kal, aaj, aur kal.

Chaahe hamaari maanav soch ka jo bhi hum par asar hai,
Uss se kaheen zyada gehri Guruji kee divya nazar hai.
Guruji ne kab kisko liya sharan mein, kewal Unhe hee iskee khabar hai,
Aur apne har bhakt par pyaare Guruji kee nirmal nadar hai.

Isliye Guruji ko samarpan kar ke aur Unka anusaran kar ke,
Unke ashish kee varsha mein hum bheegte rahein,
Guruji ke sangg naate ka aadar karte huey,
Hum sachchaayee aur achchaayee kee raah par chalna seekhte rahein.

Hazaaron lakhon ayb jo hum mein hain,
Ve Guruji kee kripa se kum hotey chalein,
Jis saanche mein Guruji hamein dhaalein,
Hum shraddha aur vishwaas se uss mein dhalein.

Isliye Guruji ka simran karte huey,
Unke naam ka gungaan aur shravan karte huey,
Hum har pal aayein Guruji ke aur bhi kareeb,
Guruji se jud kar khil gaya hai murajhaaya hua naseeb.

Yahee sabse badi saugat hai,
Ki Guruji ne hamein sweekaara hai,
MahaShiv ke kamal charnon mein,
Abb toh sansaar hamaara hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 12, 2020

Om Namaha Shivaya
Aaj Ka Suvichaar 🙏🏻🙏🏻937

                  Sunehri Ghadi

Na koi niyam na kaanoon,
Kewal bhakti ka junoon,
Jis mein ho saralta aur saadagi,
Aur dil ko miley sukoon.

Simar simar le Guruji ka naam,
Poora kar le apna armaan,
Armaan Guruji kee praapti ka,
Armaan aslee ghar kee oar vaapasi ka.

Jahaan teri atma ka milan hoga,
Paramatama ke sangg,
Jahaan har duuri mitegi,
Aur tujh par chadhega divyataa ka pakka rangg.

Jitna simran karega aur jitna judega Guruji ke saath,
Utne hee gehre rangg mein tujhe rangg denge tere naath.
Jitni sachchaayee se tu chalega Unkee dikhaayee hui raah par,
Utna niyantran tu kar paayega apni har laukik chaah par.

Jab paak hogi tere bheetar kee insaaniyat,
Toh poori tarehn se roshan hogi teri ruhaaniyat,
Guruji kee sharan mein tere paap dhul jaayenge,
Tere liye aagey ke ruhaani dwaar khul jaayenge.

Lekin, is se pehle Guruji jaise bhi karam katvaayein tere,
Tu buss shukrana karte rehna,
Yaad rakh ki tere uddhaar ke liye,
Unhe bhi kasht padta hai sehna.

Guruji kee chhatrachhaaya mein,
Samarpan kee naav mein hokar savaar,
Tu buss Unke hukm ke anusaar dolna,
Aur apna vishwaas tu rakhna barkaraar.

Veh samaa zaroor aayega,
Jab karmon ka khatm ho jaayega bhaar,
Moksh kee veh sunehri ghadi aayegi,
Jiska kitne janmon se tujhe hai intazaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 11, 2020

Om Namaha Shivaya
Aaj Ka Suvichaar 🙏🏻🙏🏻 # 936

      Ek Ve Hee Sunenge

Saanson mein Guruji ke naam ko basaa lo,
Mann mandir mein Unka divya roop tum sajaa lo,
Karte raho tum Guruji se baat cheet,
Phir sabse pakke saathi ke sangg zindagi jaayegi beet.

Dil pareshaan ho toh bhi Guruji se kehna,
Har pal Guruji se seedhi taar jode rehna,
Chaahe tumhe jo bhi pad raha ho sehna,
Tum kisee ke behkaave mein matt behna.

Guruji ke sangg har kshan judey rehne se,
Apne mann kee har baat Unhe kehne se,
Tum ho paaoge Unke aur bhi kareeb,
Aur swayam ko jaanoge khush naseeb.

Kyunki chaahe ekaant milega, toh bhi akelapann nahin hoga mehsoos,
Aur Unkee sharan mein tum hameshaan rahoge mehfooz,
Unke naam ka suraksha kavach tumne hai pehna,
Vahee hai tumhaara sabse bahumoolya gehna.

Isliye Guruji ka naam lekar,
Tum karo pyaare Guruji ko yaad,
Ek Ve hee Hain jo sunenge,
Tumhaari har fariyaad.
Unkee mehare- nazar se,
Tumhaari zindagi rahegi aabaad,
Bin maange hee poori karenge,
Guruji tumhaari har kalyaankaari murad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja