Month: October 2020

October 31, 2020

Om Namaha Shivaya
Aaj Ka Suvichaar 🙏🏻🙏🏻 # 986

          Aane Wala Pal

Aane wala pal bhi ek hee pal mein,
Is pal ke jaise chalaa jaayega,
Kewal yaadon ka saya hee,
Hamaare sangg reh jaayega.

Ye yaadein nibhaayengi saath,
Lekin aakhir kab takk?
Kya yeh duniya nibhaayegi saath,
Agar haan, toh bhi kab takk?

Apnaa le tu koi saathi aisa,
Jo kabhi bhi saath na chodey,
Apnaa le koi meet tu aisa,
Jo kabhi tera bharosa na todey.

Guruji tujhe rahey Hain pukaar,
Na kar tu is baar inkaar,
Unkee pukaar mein basaa hai tere liye aseem pyaar,
Abb daud kar aaja tu Unke dwaar.

Guruji denge saath anant takk,
Tere sangg honge har janam mein,
Guruji ke divya darbar mein,
Nahin koi bhed bhaav hai dharam mein.

Ve toh tere yahaan se jaane ke samay bhi,
Tujhe swayam hee lene aayenge,
Safar ka jabb takk antt na hoga,
Tera saath itne pyaar se nibhaayenge.

Safar khatm ho chaahe jitne bhi janmon ke baad,
Guruji ka tere sir par rahega sadaa haath,
Tere aakhiri janam ke aakhiri pal takk Ve tujhe Apni oat mein panaah denge,
Aur mukti ke uss mubarak pal mein Ve tujhe Apni jyot mein samaa lenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 30, 2020

Om Namaha Shivaya
Aaj Ka Suvichaar 🙏🏻🙏🏻 # 985

         Sharad Purnima Ka Utsav

Suno suno, sab suno suno,
Sharad Purnima ka utsav hai aaya,
Bhakton ne Tulsi ke aagey,
Chaand ko dhaan ka prasad chadhaaya.

Puraanon mein kaha hai, ki Sharad Purnima mein dharti,
Mata Laxmi dwaara apni pradakshina karaane se hai tarti,
Aur sabke karmon par daal kar apni divya nazar,
Mata poojte huey bhakton par karti Hai nadar.

Raas Purnima ke shubh naam se,
Brij ke vaasi manaate hain yeh tyohaar,
Yeh maan na hai ki Bhagwaan Krishna ne is din,
Maha-raas nritya ke dwaara dikhaaya Apna divya pyaar.

Kuch bhakt jann aaj ke din karein upvaas,
Kuch Bhagwaan Indra kee pooja hain karte,
Aur Shivji Parvati ke upaasak is utsav par,
Shiv Shakti mein dhyan hain dharte.

Ganga maiya aur anya dhaarmik nadiyon mein,
Shraddhaalu jann karte hain snaan,
Jiske pashchyaat ve japp tapp karke,
Dete hain doojon ko kayi prakaar ke daan.

Kuch logon ka kehna aisa bhi hai,
Ki is din Kartikeya ne liya thaa janam,
Reet ke anusaar avivaahit stri sundar pati paane ke liye,
Upvaas kar ke karti hai poojan.

Solaahn kala vaala chaand hai aata is raat ko akash mein,
Is chaand mein aarogyataa ke gunn hain hotey,
Raat ko kheer rakhi jaati hai baahar,
Jispar chaand ke sheetal prabhaav hain hotey.

Is prasad ko grehen karne se,
Roag se bachne kee shakti hai aati,
Vishanu shareer se duur rehte hain,
Tabhi milee hai is prasad ko itnee khyati.

Hamaare Guruji toh MahaShiv Hain,
Aur Devon ke Dev kehlaate Hain,
Guruji ke bhakt toh Guruji ke sangg hee,
Har tyohaar manaate Hain.

Hum bhojan ko tyaagein upvaas mein,
Yeh Guruji kadaapi na chaahein,
Ve chaahein ki hum ahem aur vehem ko chodein,
Aur vikaar rahit karein hum apne dil kee raahein.

Koi roak toak nahin hai Guruji ke darbar mein,
Shaukiya upvaas rakhna hai toh bhakt kee hai marzi,
Kripa keejiye Guruji, ki sudhaar ho hamaare har vichaar mein,
Aapse hai yeh vinamr arzi.

Vichaaron mein hota rahega sudhaar,
Aur duur ho jaayenge ahem aur anya vikaar,
Toh mann mein sheetalta hogi shanti kee,
Aur khoobsoorati hogi chaand kee kanti kee.

Guruji kee sharan mein har purnima beet jaayegi,
Bahut hee pyaar aur tasalli ke sangg,
Hamaare roam roam mein thirak thirak kar naachega,
Maha-raas ke nritya ka madhur rangg.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 29, 2020

Om Namaha Shivaya
Aaj Ka Suvichaar 🙏🏻🙏🏻 # 984

         Shivji Ke Anekon Naam

Guruji Hain MahaShiv ke avataar,
Karte Hain har bhakt se Ve pyaar,
Bhakt jann Shivji ko anekon naam se pukaarein,
Aayiye, hum bhi Unke kuch naam uchhaarein.

Param poojya Paalanhaar,
Pranav Pushkar Parwardigaar,
Aapki leela hai aparampaar,
Aapko pooje saara sansaar.

Taral Trilochan taaranhaar,
Bahubhutah Bhudeva bakshanhaar,
Karna pade shaayad intazaar,
Lekin Aap mushkil par karte Hain prahaar.

Adhikarah Akshat antaryaami,
Sundar saral Shankar swaami,
Aapki baat jis jis ne maani,
Uskee toh sanvar gayi zindagaani.

Dakshinamurti Devarshih Deenanath,
Komal Kripanidhi Kailashnath,
Aap sada Hain sabke saath,
Aapne thaama hai sabka haath.

Mokshdaayi Mrityunjay Maheshwar,
Sowmya sarvayoni Sarveshwar,
Aap hee Hain Pita, Aap hee Parmeshwar,
Aapse hee hai sur, sangeet, aur swar.

Nirmal Nityasundar Neelkanth,
Bholenath bahurupah Bhagwant,
Aapki mahima hai aparampaar aur anant,
Aapse hai har sanshay ka antt.

Adhirorah Ashutosh Abhay,
Abhirama Aja Achintyah,
Aap Hain akshay aur ajay,
Aapse mit jaata hai har bhayy.

Akshayguna Amitrajit Alok,
Aap Tejaswini ke niyantran mein hai trilok,
Aapse hee har geet aur Shiv ka shlok,
Aap Hain sangg toh phir kaahe ka shok.

Priya Paramjyoti Pashupati,
Urjaavaan uchchatam Umapati,
Aap nivaarte Hain durgati,
Aapse hee praapt hoti hai sadgati.

Vishwanath Veerabhadra Vyomakesh,
Mokshdayee Mahakala Mahesh,
Aap karein jeevan mein pravesh,
Duur karne sabke kasht aur klesh.

Shrutiprakasha shoolin Someshwar,
Lokapal leeladhari Lingeshwar,
Aapka hai Kailash mein ghar,
Mukti miltee usey jo aaye Aapke dar.

Bhairav Bhavesh Balavan,
Idhyah Ishwara Ishaan,
Har praani hai Aapki santaan,
Aur Aap Hain Bhagwaanon ke Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 28, 2020

Om Namaha Shivaya
Aaj Ka Suvichaar 🙏🏻🙏🏻 # 983

      Phir Chaahe.....

Neeyat parakhte Hain Guruji,
Chaahe anjaam jo bhi ho,
Neeyat aur soch bhi karam hain,
Phir chaahe kaam jo bhi ho.

Har bhakt ka dil pehchaanein Guruji,
Chaahe uska naam jo bhi ho,
Har insaan ka asal mol jaanein Guruji,
Phir chaahe doojon kee nazron mein daam jo bhi ho.

Guruji doojon ka aslee roop dikhaayein,
Chaahe hairaan jo bhi ho,
Zindagi mein kuch hee loag toh reh
jaayenge apne saath,
Phir chaahe mehmaan jo bhi ho.

Guruji beizzat honei se bachaayenge,
Chaahe apmaan jo bhi ho,
Ve chaahte Hain bhakt ahankaar chodein,
Phir chaahe abhimaan jo bhi ho.

Guruji har saudey mein bhakt ka bhalaa Hain karte,
Chaahe nuksaan jo bhi ho,
Ve har uljhan kee suljhan Hain batlaate,
Phir chaahe samaadhaan jo bhi ho.

Guruji bahut dhyan Hain rakhte,
Chaahe pareshaan jo bhi ho,
Har tufaan ka saamna karna Hain sikhaate,
Phir chaahe tufaan jo bhi ho.

Har satsang mein Guruji Hain aate,
Chaahe intazaam jo bhi ho,
Ve sabko darshan Hain dete,
Phir chaahe dhaam jo bhi ho.

Guruji har bhakt ko pyaar Hain karte,
Chaahe insaan jo bhi ho,
Poori duniya Unkee sangat hai,
Phir chaahe kadardaan jo bhi ho.

Shraddhaalu ke mann mein Guruji ghar Hain banaate,
Chaahe makaan jo bhi ho,
Sabke jeevan mein parivartan Hain Ve laate,
Phir chaahe daastaan jo bhi ho.

Guruji sadaa uddhaar Hain karte,
Chaahe hamaara armaan jo bhi ho,
Ve sabko Apne ashish ka tohfa Hain dete,
Phir chaahe veh inaam jo bhi ho.

Har bhakt ko Guruji ke bachche honei ka darja hai milta,
Chaahe uskee pehchaan jo bhi ho,
Sabse seedhi taar jod kar baat karte Hain Ve,
Phir chaahe paigaam jo bhi ho.

Guruji Devon ke Dev MahaShiv Hain,
Chaahe Unka gungaan jo bhi ho,
Ve Apni vadiyaayee karaakar taarte Hain,
Phir chaahe bakhaan jo bhi ho.

Guruji sach mein sarvgyani Hain,
Chaahe gyan jo bhi ho,
Guruji ichchuk ko ruhaani safalta Hain dete,
Phir chaahe imtehaan jo bhi ho.

Guruji ehsaan kar ke kabhi nahin jataate,
Chaahe ehsaan jo bhi ho,
Guruji ke dikhaaye raaste par chalne mein bhalaayee hai,
Phir chaahe parinaam jo bhi ho.

Guruji awashya kalyaan Hain karte,
Chaahe veh kalyaan jo bhi ho,
Guruji saampoorna divyataa mein samaaye Hain,
Phir chaahe hamaara Bhagwaan jo bhi ho.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 27, 2020

Om Namaha Shivaya
Aaj Ka Suvichaar 🙏🏻🙏🏻 # 982

Ruhaaniyat Kee Khushboo

Baazaar se itar khareed kar laaye,
Bade chaav se shareer par liyo lagaaye,
Lekin anand kahaan se aaye,
Agar tere vichaaron se durgandh aaye?

Baazaar jaane ke bajaay,
Jo tu apne bheetar jaaye,
Apne vichaaron ko suljhaaye,
Toh shaayad baat bann paaye.

Jab tera dil leen hoga swayam ke sudhaar mein,
Toh dekhna, khushboo aane lagegi har vichaar mein,
Phir jo ruhaaniyat kee khushboo aayegi,
Uske aagey sabse behtareen itar kee sugandh bhi sharmaayegi.

Tabhi toh Guruji kehte Hain,
Ki tu bann jaa changaa banda,
Sewa, simran, aur satsang kar,
Aur chod de be-imaani ka dhandha.

Khushiyaan phaylaa ghar sansaar mein,
Na kho apne ko oopari dikhaawe ke baazaar mein,
Aatmasaat kar le khushboo ruhaaniyat kee,
Kadar kar ke tu imaan aur insaaniyat kee.

Phir kisee itar kee padegi nahin zaroorat,
Khushboo ke liye nahin dhoondhna padega mauka ya mahoorat,
Kyunki ruhaaniyat kee khushboo tere tann mann mein samaa jaayegi,
Aur teri atma bhi punya ka dhan kamaa paayegi.

Itar kee mehek toh kumm hoti hai samay ke saath,
Lekin ruhaani khushboo mein nahin hai aisee baat.
Ye toh waqt ke saath saath aur bhi zyada mehsoos hoti hai,
Aur apni surbhi aur nirmaltaa kabhi nahin khoti hai.

Ruhaani khushboo laayegi kitnee shuddhi,
Aur vaatavaran mein hogi sakaratmakta kee umangg,
Isliye na malin honei de kalyuga se apni buddhi,
Guruji kee sharan mein jee le shuddh vichaaron ke sangg.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 26, 2020

Om Namaha Shivaya
Aaj Ka Suvichaar 🙏🏻🙏🏻 # 981

                  Chadhdi Kala

Aaj bhi mujhe yaad hai veh din,
Jabb tumhaara har sukh chayyn gaya thaa chhin,
Aankhon mein meri bhi aaya thaa paani,
Sunn kar tumhaari aap beeti kee kahaani.

Tum chup rahe jab poochha gaya ki sab kaise hua,
Aur mere dil se niklee tumhaare liye dua,
Tum ne buss ye kaha ki dil toot gaya,
Kyunki har sangi-saathi chhoot gaya.

Guruji se dosti kar lo, ek awaaz ne tumse kahaa,
Tumne sir hilaakar kahaa abb dosti mein kuch na raha,
Lekin shukr hai tumne baat maan lee,
Aur Guruji kee dosti pehchaan lee.

Tumhe nashaa honei lagaa Guruji ke naam ka,
Tumne Guruji ke charnon mein paaya anand teerath dham ka,
Vaheen chod diya tumne apna ahankaar,
Aur dil mein basaa liya Guruji ke liye pyaar.

Baaki har tammanaa tumne chod dee,
Guruji ke simran kee oar apni chaahat moad lee,
Guruji ke simran mein beetne lagey tumhaare din aur raat,
Tumne chod dee Guruji ke alaawa karni aur koi bhi baat.

Guruji hee basne lagey tumhaare mann mein,
Tumne chaav kho diya baaki har laukik dhan mein,
Zindagi kee mithya tumhe samajh aane lagee,
Tumhaari har uljhan isee satya se sulajh jaane lagee.

Tumhaara dil aisa juda Guruji ke sangg,
Ki badal gaya tumhaare jeene ka dhangg,
Tumhaara aadhyatmikta mein badhta gaya dhyan,
Aur tumhaare spandan par sajne lagaa ruhaani gyan.

Jis Guruji ke noor se roshan ho gaya tumhaara chehra,
Uss noor par thaa swayam Guruji ka paawan pehra,
Tumhaara har pal pichhle pal se behtar hota gaya,
Tumhaara astitva Guruji kee divyataa mein khota gaya,
Guruji ne kar diya tumhaara bhalaa,
Aur Unhonei tumhe baksh dee chadhdi kalaa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 25, 2020

Om Namaha Shivaya
Aaj Ka Suvichaar 🙏🏻🙏🏻 # 980

         Oonchee Udaan

Jo abb tu is meethe sach ko jaan gaya hai,
Ki tu jud gaya hai Guruji ke sangg,
Toh is rishte ka le tu nirmal anand,
Aur swayam par chadhne de Guru Bhakti ka rangg.

Is rangg ke jaisa koi aur rangg nahin,
Aisa koi pal nahin jabb Guruji tere sangg nahin.
Chaahe saara jagg jaa raha ho aur kaheen,
Jidhar tere Guruji le jaayein tu chalte jaana vaheen.

Kyunki jidhar Guruji le jaayein,
Vahee dagar sabse suhaani hai,
Tere har shwaas ka hoga kalyaan,
Kyunki uss dagar kee hawaa ruhaani hai.

Ruhaaniyat se mehekta shwaas,
Tere hriday mein jabb karega vaas,
Toh safar ka har lamha tujhe aayega raas,
Aur tu kabhi na hoga udaas.

Zaroori nahin ki aasaan hogi dagar,
Tu har pal shraddha rakhna magar,
Kyunki teri shraddha aur vishwaas bhari bhakti,
Degi tujhe kasht jhelne kee shakti.

Tere raaste mein phool na bhi aayein pehle pehle,
Toh bhi Guruji kee divya khushboo se tera raasta mehekega,
Yeh duniya beshaq jhamelon ka jaal hai,
Tu ismein azaad parinde kee bhanti chehekega.

Kyunki tere Guruji tujhe tere bheetar le jaayenge,
Apna simran karaane ke dwaara,
Aur tere mann mandir mein rehkar Ve swayam ko banaayenge,
Teri niswaarth bhakti ka sahaara.

Ruhaaniyat basegi tere har angg mein,
Veh dikhegi tere jeene ke dhangg mein.
Jaise jaise Guruji tere mann mein divya sanskaar bharenge,
Oonchee udaan ke liye tujhe ve tayyaar karenge.

Apni mamta ke sukoon bhare aanchal mein,
Tujh parinde ka ghonsalaa swayam Guruji banaayenge,
Aur Guruji kee bhakti ke rangg mein rangg kar,
Teri ruhaaniyat ke pankh tujhe sach khand takk udaa kar le jaayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 24, 2020

Om Namaha Shivaya
Aaj Ka Suvichaar 🙏🏻🙏🏻 # 979

Tu Guruji Ka Naam Lekar Chalte Jaana

Tufaan jo aaye jeevan mein,
Tu rakhna vishwaas aur dheeraj,
Aaspaas agar nakaraatmakta ho,
Toh bhi tu bann kar rehna sakaraatmakta ka neeraj,
Duniya chaahe behte paani ke sangg bahey,
Lekin tu maree hui machhlee na bann jaana,
Sachchaayee aur sadachari ke raaste par,
Tu Guruji ka naam lekar chalte jaana.

Raasta jo ho kathin aur pathreela,
Toh apne vishwaas ko karna aur bhi gehra,
Na darna tu kisee bhi moad par,
Kyunki Guruji ka hoga har pal har jageh par pehra,
Andhere se bilkul na ghabraana,
Guruji ke naam ka deepak tu jalaana,
Apne uddeshya se mann kee nazar ko na hataana,
Tu Guruji ka naam lekar chalte jaana.

Har chunauti ko samajh lena ek aur mauka,
Guruji ke aur bhi kareeb aane ka,
Na rona, na karna afsos,
Saathiyon ka peechhe chhoot jaane ka,
Sabka raasta alagg hai, apne mann ko tu samjhaana,
Duniya ek mela hai, isliye vaastavik hai logon ka aana jaana,
Apni taraf se saral taral komal aur nirmal hokar har rishta tu nibhaana,
Tu Guruji ka naam lekar chalte jaana.

Vikaaron ke asur aayenge raaste mein,
Toh Unka datt kar tu karna saamna,
Unn par vijay paakar tu poori karna,
Swayam ko ekaagrachitt rakhne kee kaamna,
Vyaakulta aur vikarshan se bhatak matt jaana,
Guruji ke simran mein tu mann lagaana,
Sadhna aur dhyan se apni chetna badhaana,
Tu Guruji ka naam lekar chalte jaana.

Tufaan thamne lagenge, andhera khatm ho jaayega,
Chalte chalte raasta bhi tayy ho jaayega,
Har chunauti teri himmat ke aagey kamzor padd jaayegi,
Vikaaron par tu vijayee ho paayega,
Tu Guruji ke charnon mein sadaa sir jhukaana,
Unke kisee bhi ehsaan ko kabhi bhi na bhulaana,
Unka karte rehna tu dil-o-jaan se har pal shukrana,
Buss, tu Guruji ka naam lekar chalte jaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 23, 2020

Om Namaha Shivaya
Aaj Ka Suvichaar 🙏🏻🙏🏻 # 978

         Chod De Jhooth Tu Kehna

Chod de, tu chod de,
Chod de jhooth tu kehna,
Ek jhooth kee vajeh se tujhe,
Kitne aur jhooth ka bhaar padega sehna.

Jhooth kehna chod dega,
Toh koi dikhaawa nahin padega karna,
Jo bheetar hai vahee roop baahar hoga,
Toh saral hoga pichhle karmon ka jurmaana bharna.

Aagey ke liye karmon ka bojh bhi kumm hoga,
Aur teri har baat mein sachchaayee ka dumm hoga,
Toh mann bhi honei lagega saaf,
Aur tu khud ko bhi kar sakega maaf.

Tujhe kisee ka saamna karne mein hichakichaahat na hogi,
Aur tera kahaa sadaa sachcha hoga toh tujhe ghabraahat na hogi.
Tu mann ghadant kisse banaane mein na vyast rahega,
Toh yakeenan Guruji ke dhyan mein aur bhi mast rahega.

Guruji bhi dekhenge teri neeyat ko sudharte huey,
Dekhenge tujhe jhooth kee seedhi se utarte huey,
Toh Ve tujhe aadhyatmikta kee seedhi par aur bhi jald chadhaayenge,
Aur Ve swayam tujhe sunehri manzil takk lekar jaayenge.

Guruji hongei kitne prasann,
Ki badh raha hai tera sadachari ka dhan.
Jabb Ve dekhenge tere jeevan kee kahaani kee kitaab,
Toh Ve denge uss kitaab ko sachchi honei ka khitaab.

Jabb jhooth kee deewar tootegi,
Toh rishton mein bhi madhurta aayegi,
Aur vaatavaran mein saamanjasya ke honei se,
Kitnee sakaratmakta chaa jaayegi.

Jo bachcha jhooth na boley kabhi,
Jaise uss bachche ke mata pita garv se phoolein na samaayein,
Vaise hee tu jhooth kee aadat chod de,
Toh yeh sach hai ki Guruji kitne khush ho jaayein.

Abb bhi mauka hai tere paas,
Jhooth mein na vyarth ganvaa apne shwaas,
Tyaag de jhooth kehne kee aadat,
Guruji denge tujhe maansik taakat.

Guruji kee sadhna se pichhle daag mitt jaayenge,
Sachchaayee ke safar mein karam achche ho paayenge,
Guruji khushi se is safar ko Apne ashirwaad se sajaayenge,
Aur is shringaar se tere mann ke moar mukti ka geet gaayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 22, 2020

Om Namaha Shivaya
Aaj Ka Suvichaar 🙏🏻🙏🏻 # 977

         Param Poojya Paalanhaar

Guruji ne na diye koi pravachan, na hee kiya prachaar,
Sudhaarne aaye Ve hum sabke jeevan ka aakaar,
Sadaa diya hai Unhonei sabko niswaarth pyaar,
Har pal har bhakt ke liye khula hai Guruji ka dwaar.

Guruji Hain hamaari har saans ka aadhaar,
Guruji gira dete Hain niraasha kee deewar,
Ve waqt aane par karte Hain har kalyanmayee sapne ko saakaar,
Aur hamaare bin boley hee kar dete Hain hamaara uddhaar.

Guruji jaante Hain hamaara har vichaar,
Ve sudhaarna chaahte Hain hum sabka vyavhaar,
Unhe sarvsamarpan karne mein hai hamaara upkaar,
Jabb hum Unkee sharan mein hain toh aur kaheen jaana hai bilkul bekaar.

Jeevan mein hum apnaa lein achche sanskaar,
Apne mann ko banaa lein shuddhi ka vihaar,
Guruji par apne vishwaas ko rakhein har pal barkaraar,
Na karne dein kisee bhi sanshay ko is vishwaas par prahaar.

Guruji kee kripa se duur hota hai andhkaar,
Unhee kee karuna se chuur hota hai ahankaar,
Guruji kee mahima hee taar sakti hai sansaar,
Aur kar sakti hai har bhakt jann ka beda paar.

Jab se Guruji huey niraakaar,
Unkee leela ho gayi pehle se bhi zyada aparampaar,
Har pal badh raha hai Unka paropkaar,
Srishti ko sanvaar rahe Hain Ve is prakaar.

Guruji yakeenan Hain MahaShiv ka avataar,
Ve Bhagwan Hain, yeh dikhaaya hai Unhonei baar baar,
Unhee mein samaaya hai poori divyata ka saar,
Unn param poojya paalanhaar ko baarambaar namaskaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja