Month: October 2020

October 21, 2020

Om Namaha Shivaya
Aaj Ka Suvichaar 🙏🏻🙏🏻 # 976

Jinke Haath Mein Hai Trishul

Jinke haath mein hai trishul,
Aur jinka dil komal hai jaise phool,
Unn aadaraneeya Guruji ko naman,
Bahut kalyaankaari hai Unka manan.

Jinke darbar mein sab hain ek samaan,
Jo sabke mann kee baat lete Hain jaan,
Unn antaryaami Khuda ko salaam,
Unka har hunar hai itna mahaan.

Jinse sangat seekhti hai jeene ka saleeqa,
Jinke samjhaane se raas aata hai har taral tareeka,
Unn maan-neeya murshid ko namaskaar,
Unkee shiksha se tarr jaata hai saara sansaar.

Jinke saath naath aur meet ka hai naata,
Jinke pyaar mein bhakt bhai ka sehyog hai paata,
Unn priya Parwardigaar ko dhanyawaad,
Jinke aanchal mein bhakton kee duniya hai aabaad.

Jinke maathe par teesra divya nayn hai,
Jinkee sharan mein sukh aur chayyn hai,
Unn shashvat Shiv ko baarambaar pranaam,
Unke charnon mein hain saare teerath dham.

Jinkee divyata kee sangat deewani hai,
Jinkee leela itnee anokhi aur ruhaani hai,
Unn Devon ke Dev ka haardik abhinandan,
Kitna sukhdaayee hai Unka vandan.

Jinkee mehar se yeh din aur raat hai,
Jinkee rehmat se hee banti har bigdee baat hai,
Unn Trilokinath ko dil se dhanyawaad,
Kitna sunehra hai Unse judne ka jazbaat.

Jinkee kripa mein samaaya hai har ashirwaad,
Jinkee meharbaani hai sabse uttam prasad,
Unn Shambhunaath ka pal pal shukrana,
Sabse khoobsoorat hai Unkee karuna ka khazaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 20, 2020

Om Namaha Shivaya
Aaj Ka Suvichaar 🙏🏻🙏🏻 # 975

    Chulbuli Chidiya Se Seekhein

Ek chulbuli chidiya thi ghoom rahi,
Guruji kee dhun mein jhoom rahi,
Phoolon ke sundar chaman mein,
Vyast hokar Guruji ke manan mein.

Chidiya ka satrangi rangg,
Uska hona Guruji mein malang,
Yeh dekh chaman ka maali muskuraaya,
Lekin chidiya ko raaz na samajh mein aaya.

Chidiya dhoondh rahi thi uss phool ko,
Jis se pyaari khushboo thi aa rahi,
Aur MahaShiv Guruji kee leela se,
Chidiya ko paheli samajh na thi aa rahi.

Guruji hee chaman ke maali ke roop mein,
Chidiya par veh mehek thei barsaa rahe,
Apni maujoodagi ka ehsaas dila rahe thei,
Chidiya se bina kuch bhi kahe.

Chidiya Guruji ke diye sanket se,
Uss khushboo ke peechhe mandraati rahi,
Atoot bharosa thaa usey khushboo ke divya prataap par,
Aur veh apna kalyaan karaati rahi.

Hum bhi is chidiya kee bhaanti,
Bin tark vitark ke Guruji kee baat maanein,
Guruji ke divya pyaar mein bandh kar,
Azaadi se udkar ruhaaniyat ke akash ko pehchaanein.

Chulbuli chidiya se seekhein hum,
Guruji par karna atoot vishwaas,
Chulbuli chidiya kee bhanti hum bhi,
Mehsoos karein agochar Guruji ka ehsaas.

Jabb poorna vishwaas aur samarpan hoga,
Tabb nishchit hai hamaara bhi kalyaan,
Guruji toh Guru aur baagbaan ke roop mein,
Nissandeh Hain Bholenath Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 19, 2020

Om Namaha Shivaya
Aaj Ka Suvichaar 🙏🏻🙏🏻 # 974

          Pyaar Kee Pyaari Adaa

Pyaar kee kitnee pyaari hai adaa,
Ye badhtaa hee rehta hai sadaa.
Jitna kisee ko dein, ye utna hee zyada hota hai,
Aur pyaar dene waala pyaar dekar bhi usey nahin khota hai.

Kyunki pyaar ko mila vardaan hai,
Ki veh nahin hota kabhi bhi kumm,
Isliye pyaar aushadhi ka kaam karta hai,
Aur mitaa deta hai sabke gumm.

Guruji kitne yugon se Apne bhakton ko pyaar de rahey Hain,
Unhonei Apne bachchon ke liye kitne kasht khud hee sahey Hain,
Dete dete badhta gaya hai Unka pyaar,
Unka pyaar phailaa hai is paar se uss paar.

Beshaq Guruji ke pyaar ke anginat chamatkaar hain,
Lekin Guruji nahin Hain jaadugar,
Ve toh adhyaatmikta ka bhandaar Hain,
Aur niswaarth pyaar ka divya aadhaar Hain.

Guruji ke pyaar ke rangg kayee hazaar hain,
Unke pyaar ke andaaz beshumaar hain,
Rotey huey ko hansaa sakta hai Guruji ka pyaar,
Marte huey ko jeevit kar sakta hai Unka pyaar.

Guruji ka pyaar kab se manzil kee talaash karte huey musaafir ko,
Safalta dekar khatm kar sakta hai uske barson ka intazaar,
Aur yahee pyaar kisee niraash bhakt ke jeevan mein laata hai aisee bahaar,
Ki is bahaar ke aane se asha se bhar jaata hai uska ghar sansaar.

Guruji ka pyaar har bachche ke liye hai,
Unka pyaar jhoothe aur sachche ke liye hai,
Yeh pyaar hai paawan aur itna anokha,
Ki Guruji ko koi na de sakta hai dhokha.

Guruji ka pyaar na bhooley kabhi karmon ka katvaana,
Guruji ka pyaar sadaa yaad rakhey khush-haali phailaana,
Guruji ka pyaar zaroor nyaaya dilaata hai,
Guruji ka pyaar guroor ka pathhar bhi hilaata hai.

Is pyaar mein Guruji ka anushaasan bhi hai,
Is pyaar mein Unka aashwaasan bhi hai.
Yahee pyaar bichde huon ko mila deta hai,
Yahee pyaar veeraane mein phool khila deta hai.

Guruji ka pyaar Unkee khushboo aur darshan mein hai,
Guruji ka pyaar hamaare jeevan ke har kshan mein hai,
Guruji ka pyaar prakriti ke har hisse mein hai,
Guruji ka pyaar hamaari kahaani ke har kisse mein hai.

Dhoondhne kee zaroorat hee nahin hai,
Kyunki Guruji ka pyaar zarre zarre mein hai,
Behta rahega yeh pyaar hamaari hasti mein basskar,
Kyunki Guruji ka pyaar hamaare khoon ke katre katre mein hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 18, 2020

Om Namaha Shivaya
Aaj Ka Suvichaar 🙏🏻🙏🏻 # 973

  Kaahe Ko Tu Tukur Tukur

Kaahe ko tu tukur tukur,
Dekhta hai kachhe kaanch ka mukur,
Karte huey Guruji ka shukar,
Dekh le apne mann ka mukur.

Is mann ke mayle mukur par,
Jo dhool padi hai usey saaf kar,
Guruji kee kripa se jaa tu tarr,
Taaki Unka noor chhaaye is mukur par.

Guruji kee kar le tu niswaarth bhakti,
Is bhakti mein sach mein hai shakti,
Jo mann ke mukur kee dhool hataayegi,
Aur uspar noor ke phool sajaayegi.

Tu buss pakka kar le apna iraada,
Guruji toh nibhaayenge Apna vaada,
Tujhe hameshaan ke liye taarne ka,
Tere jeevan ko sanvaarne ka.

Apni bhakti mein piroh le tu pyaar ka ehsaas,
Aur sajaa le is pyaar mein shraddha tu khaas,
Phir karte huey har pal poora vishwaas,
Bayaan kar de Guruji ko mukur saaf karne kee aas.

Guruji kabhi tera kehna na taalenge,
Ve karuna nidhaan Hain, Ve sab sambhaalenge.
Ve apni leela se tujhe vikaaron se mukti denge,
Tujhe sachchi khushi mehsoos karne kee yukti denge.

Tere mann ka mukur saaf honei lagega,
Toh tu swayam ke bheetar jhaank paayega,
Aur apne antar-mann mein Guruji ka roop basaakar,
Tu Unkee bhakti mein aur bhi ramtaa jaayega.

Sulajhne lagegi teri uljhan bhari dagar,
Tu sadaa karta rahega Guruji ka shukar,
Aur phir jabb bhi tu dekhega tukur tukur,
Toh Guruji ke noor se chamkega tere mann ka mukur.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 17, 2020

Om Namaha Shivaya
Aaj Ka Suvichaar 🙏🏻🙏🏻 # 972

       Poochha Mainey Saagar Se

Poochha mainey saagar se,
Tu itna aseem hai kaise,
Saagar ne muskuraate huey kahaa,
Mujhe Guruji ne banaaya hai aise.

Phir veh karne lagaa Guruji kee vadiyaayee,
Uskee har leher mein taareef thi samaayee,
Taareef pyaare paalanhaar kee,
Taareef taral taaranhaar kee.

Saagar ne kaha Guruji bade dayaalu Hain,
Dayaalu honei ke saath Ve bade kripalu Hain,
Ve har leher mein bharte Hain umangg,
Aur usmein sanjote Hain taralta aur tarang.

Jis sooraj ke prakash se mujh mein basaa hua paani chamakta hai,
Uss balshaali sooraj par hai Guruji ka hee niyantran,
Aur jis chaand kee aakarshan shakti se uchh aur nimn jwaar-bhaata hota hai,
Vo chaand bhi karta hai Guruji ka hee vandan.

Guruji kee kripa se hee badhta hai mera utsaah,
Unhee ke maargdarshan se dikhtee hai meri leheron ko raah,
Duniya mujhe bahut hee mahaan samajhti hai,
Lekin meri toh har leher Guruji ko salaam karti hai.

Guruji ka naam lete huey jab har leher ret takk aati hai,
Toh Guruji kee leela se veh mayl ko vaheen chod jaati hai,
Simran ke saath nirantar chalta rehta hai yeh silsila,
Paani saaf hota rehta hai bin kiye mitti se shikva ya gila.

Mera angg angg Guruji kee dein hai,
Mera rangg aur dhangg bhi Guruji kee dein hai,
Meri gehraayi jitnee bhi ho, Guruji kee vadiyaayee se yakeenan kumm hai,
Guruji kee mehar-e-nazar se hee meri lehron mein dumm hai.

Mujh mein yeh kaabiliyat hee nahin,
Ki mai apna astitva sambhaal sakoon,
Tabhi toh Guruji kee kripa ke liye,
Mai Unka shukrana karte huey kabhi na thakoon.

Meri har leher kee her boond,
Guruji kee kripa kee mohtaaj hai,
Kal bhi Guruji ka mujh par raj thaa,
Aur Guruji ka hee aaj bhi raj hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 16, 2020

Om Namaha Shivaya
Aaj Ka Suvichaar 🙏🏻🙏🏻 # 971

     Guruji Ne Dikhaaya Ye Raasta

Raaste ne kuch kaha nahin mujhse,
Mainey bhi nahin kuch poochha,
Chalti rahi magar mai uspar,
Na dhoondha koi raasta dooja.

Kyunki Guruji ne dikhaaya ye raasta,
Mere vishwaas ko hai Guruji ka vaasta.
Na koi kintu-parantu, na koi agar-magar,
Buss, shraddha aur prem se chalun apni dagar.

Guruji ne chalaaya hai is dagar par,
Toh yeh buri ho hee nahin sakti.
Buss, dua hai Guruji se ki is raaste par,
Pal pal khiltee rahe meri naadaan bhakti.

Guruji ka naam lekar,
Is raaste par mai chaloon,
Koi mushkil jo aa jaaye,
Toh mai bilkul na daroon.

Guruji par kiye vishwaas se,
Mai itnee himmat paaoon,
Ki har chunauti ka saamna kar ke,
Mai aagey badhti jaaoon.

Raaste mein jo laukik aakarshan aayein,
Unse mera atma-bal na ho jaaye kamzor,
Isliye raaste par simran karti chaloon,
Thaam kar Guruji ke naam kee doar.

Safar karte huey Guruji kee mahima gaati jaaoon,
Har avsar par Unkee vadiyaayee sunoon aur sunaaoon,
Unke kahe anusaar gupt paath, sewa, aur daan karna rakhoon mai yaad,
Aur vinamrataa aur khushi se apanaaoon Unkee dee hui har saugat.

Andhere se na ghabraaoon mai,
Roshni ka karoon intazaar,
Uth kar chaloon har baar nayee umang ke sangg,
Chaahe giroon mai jitnee baar.

Guruji har pal saath Hain mere,
Ye har dum rakhoon yaad,
Ve mujhe sambhaalte rahein,
Buss, yahee karoon fariyaad.

Shukrana karoon Guruji ka,
Ki abhi takk ka safar tayy hai karaaya,
Isee raaste par chalte huey mainey jaana,
Ki Guruji apne Hain, baaki jagg hai paraaya.

Yoon hee shukrana karte karte,
Safar rakhoon mai jaari,
Guruji, kripa kar Apne sangg lekar jaana,
Jabb bhi aaye meri baari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 15, 2020

Om Namaha Shivaya
Aaj Ka Suvichaar 🙏🏻🙏🏻 # 970

                    Simar Simar Le

Simar simar le,
Naam simar le praani,
Guruji ka simran karne se,
Dhanya hogi teri zindagaani.

Sukh aur dukh toh aate jaate rahenge,
Kabhi tu muskuraayega, kabhi karega naadaani,
Kabhi kisee pal tere aansoon bhi bahenge,
Aisee hee hoti hai jeevan kee kahaani.

Simran se tu dukh jhel sakega thodi aasaani se,
Kuch na kuch toh seekhega tu har kahaani se,
Simran kee urja jab jud jaayegi teri zindagaani se,
Toh yeh madad kar ke nikaalegi tujhe har pareshaani se.

Simran se karam kat-te jaayenge,
Simran se utsah ke lamhe aayenge,
Simran se agyaan ka andhera hoga duur,
Simran se har vikaar honei lagega chuur.

Simran zindagi mein aisa prakash laayega,
Simran jeevan mein aisa sakaash laayega,
Ki tu aur bhi khichta jaayega uskee oar,
Kyunki simran se anubhav hogi sukh kee bhor.

Jitna karega tu is naam ka gungaan,
Yeh naam tujhe utnee shanti karega pradaan,
Simran se tu banta jaayega dhanwaan,
Kyunki tujhe ashish dete jaayenge Bhagwaan.

Isliye simar simar simar le naam,
Rakhta chal tu Guruji ka maan,
Jinhonei diya hai naam ka daan,
Is naam ko banaa le is rishte kee pehchaan.

Rishta Guruji aur tera,
Jo har pal aur bhi gehra ho,
Simran se kar le jeevan mein aisa savera,
Jis par har pal pyaare Guruji ka pehra ho.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 14, 2020

Om Namaha Shivaya
Aaj Ka Suvichaar 🙏🏻🙏🏻 # 969

  Hamaara Mann, Swaami Ya Das?

Jaisa bhi karaayein hum mann ko abhyaas,
Veh banega ya toh hamaara swami ya phir das.
Hum par hee karta hai yeh nirbhar,
Ki hamaara kitna niyantran hai mann par.

Mann hee dost hai, mann hee dushman,
Sach mein bada hee chanchal hai mann,
Isey vash mein karna hai bahut zaroori,
Chaahe ichchaa se karein ya phir samajhkar majboori.

Mann toh atma kee unglee pakad kar,
Sach mein pauncha hee pakad leta hai,
Atma ko vivash karta rehta hai,
Aur antt mein nirbaltaa ke kaaran dukh deta hai.

Bahut aawashyak hai mann ko sikhaana,
Taaki isey aa jaye atma se sahi rishta nibhaana.
Nahin toh der nahin lagti isey galat raasta apnaane mein,
Aur atma ko kayee janam lagg jaate hain apne asli ghar takk jaane mein.

Guruji kee dikhaayee simran kee raah par,
Jitnee wafaa se hum chalenge,
Utnee hee wafaa se,
Hamaari atma kee kamzori ke bhaari greh talenge.

Atma-bal jitna zyaada hoga,
Utna aasaan hoga mann par kaabu paana,
Jaise jaise simran aur dhyan badhta rahega,
Mann ko padega aur bhi kum samjhaana.

Kyunki Guruji kee dee hui simran kee jo hai deeksha,
Ye degi mann ko niyantran mein rehne kee shiksha,
Dheere dheere mann banega hamaara das,
Aur hum hotey jaayenge Guruji ke aur bhi paas.

Har buraayee se khud hee duur rehne lagega phir mann,
Jis se swasth rahenge hamaare vichaar, atma, aur tann,
Badhne lagega achche karmon ka sunehra dhan,
Guruji mein mann sadaa rehne lagega magan.

Dekhna, jaise jaise mann maanega atma ko sarkaar,
Hamaare vaatavaran ke spandan mein bhi hoga sudhaar,
Guruji mauka de rahein hain, humne toh buss koshish karni hai,
Changi neeyat ho, Guruji poori madad karenge, humne toh buss jholi bharni hai.

Toh kyun na is pal se hee le lein yeh prann,
Ki Guru naam ke simran ka batorenge hum dhan,
Jis se har pal atma-bal ka sewak bann jaayega mann,
Aur Guru kripa se kalyaan se phalega jeevan ka har kshan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 13, 2020

Om Namaha Shivaya
Aaj Ka Suvichaar 🙏🏻🙏🏻 # 968

       Atma Ka Pratibimb

Jheel ke shant paani mein dekho,
Toh apna pratibimb aata hai saaf nazar,
Jaisa chehra hai uss samay,
Pratibimb vaisa dikhne mein na chode koi bhi kasar.

Lekin agar paani mein leher bann jaaye,
Ya phir phaynko koi pathhar,
Toh pratibimb bigad sa jaata hai,
Chehre se bilkul hatkar.

Moh maya aur lobh kee leheron se,
Hamaari atma ka pratibimb bhi bigad gaya hai,
Jis maasumiyat ke saath hum yahaan aaye thei,
Uss maasumiyat ka astitva toh jaise ujad gaya hai.

Krodh aur ahankaar ke patharon ne,
Jeevan kee jheel ko kar diya hai ashaant,
Dhyan se sochein aur sunein hum,
Toh humse yahee kahega hamaara ekaant.

Hamaare liye bahut anmol saugat hai,
Ki Apni sharan mein Guruji ne hamein liya hai,
Kyunki jo hamaari atma ka asal charitra hai,
Humne shaayad abhi takk uske anusaar nahin jiya hai.

Guruji ke simran aur dhyan se,
Karte chalein hum atma ka pavitrikaran,
Taaki jaise jaise waqt beetey,
Hamaara sudharta jaaye chaal chalan.

Sudhar jaayein hamaare vichaar,
Sudhar jaaye hamaara vyavhaar,
Nek neeyat ho jeevan ka aadhaar,
Varna hamaara jeevan ho jaayega bekaar.

Akhandata jab aayegi atma mein,
Tabhi samaa sakegi veh Paramatama mein,
Guruji ne dikhaaya hai raasta mangalkaran ka,
Yahee toh hai uddeshya maanav janam ka.

Toh kyun karein hum aur vilambh?
Aayiye karein apne uddhaar ka praarambh.
Guruji kee kripa se har leher, har pathhar raaste se ho jaayega duur,
Aur atma ke pratibimb par chhaa jaayega Guruji ka divya noor.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 12, 2020

Om Namaha Shivaya
Aaj Ka Suvichaar 🙏🏻🙏🏻 # 967

   Abb Guruji Ke Dar Tu Aaja

Bahut bhatak liya tu pyaare,
Abb laut ke ghar tu aaja,
Bahut ghoom liya bin disha ke,
Abb Guruji ke dar tu aaja.

Guruji kee divya sharan mein,
Unse baatein karne tu aaja,
Unke ashirwaad ke amrit se,
Mann kee gaagar bharne tu aaja.

Vyaakulta aur bechayni mein kabb takk jeeyega,
Shaant hokar dheeraj dharne tu aaja,
Guruji tujhe bulaava de rahey Hain,
Swayam ko sadaa ke liye tarne tu aaja.

Kabb se tu uljhaa hai jagg mein,
Abb kee baar sulajhne tu aaja,
Guru praapti ke sukh se bada koi sukh nahin,
Is sachchaayee ko samajhne tu aaja.

Sewa, satsang, simran mein jo anand hai,
Usey karne mehsoos tu aaja,
Guruji ko sarvsamarpan karne mein jo suraksha hai,
Usmein honei mehfooz tu aaja.

Adhyatmik oonchaayee par chadhte chadhte,
Guruji ke charnon mein jhukne tu aaja,
Guru praapti ko apni manzil banaakar,
Is takk pahunch kar yahaan rukne tu aaja.

Ateet kee kadvaahaton ke ghaav,
Aaj ke sakaraatmak marham se bharne tu aaja,
Aaj har shikva, har shikaayat chod kar,
Guruji ka shukrana karne tu aaja.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja