Month: October 2020

October 11, 2020

Om Namaha Shivaya
Aaj Ka Suvichaar 🙏🏻🙏🏻 # 966

   Dhonndan Jo Mai Chali Guru Ko

Dhoondhan jo mai chali Guru ko,
Guru kaheen na milya paaye,
Jo haar maan lee mainey phir toh,
Guruji ne Aap hee liya bulaaye.

Niraasha se bhare pyaale ko phainka jo mainey,
Aur Guru vandan ka tilak jo liya lagaaye,
Guruji ne charnon mein baithaaya mujhko,
Aur sir par haath diya dharaaye.

Pyaar se dekhat thi Guruji ko,
Dil ka haal Unhe diya sunaaye,
Guruji ne kaha, ‘kalyaan kitta,’
Aur phir diyo muskuraaye.

Unkee muskaan mein prem aisa,
Ki mann kee shankaa ko diyo bhagaaye,
Kalyaan ke karunamayee ashirwaad ne,
Dukh ke bojh ko diya ghataaye.

Guruji ka simran karte karte,
Mann halka hota jaaye,
Itnee niswaarthtaa se Unhonei apnaaya,
Ye soch dil khushi se phoola nahin samaaye.

Dua hai ki Guruji ka Shukrana karte karte,
Mera mann kabhi bhi na thakk paaye,
Dua hai ki Guruji ko poojte huey,
Vishwaas aur shukrana kee mitrataa ho jaaye.

Khushi bann jaaye in dono kee sakhi,
Toh jeevan mein anand hee anand aa jaaye,
Shukrana, vishwaas, aur khushi ke yog mein magn hokar,
Mera roam roam har pal Guruji kee mahima gaaye.

Guruji kee mahima likhte aur gaate,
Yeh zindagaani beet jaaye,
Guruji ne mujhe sweekaar liya hai jabse,
Mera toh jeevan safal hui jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Om Namaha Shivaya
Aaj Ka Suvichaar 🙏🏻🙏🏻 # 965

 Ruhaaniyat Ka Aaftaab

Sannaate kee parchhaayiyon se aakhir kabb takk,
Yoon hee dabee rahegi ye udaasi kee rayn?
Yahee sochte sochte,
Jabb bhar aaye mere nayn,
Tabhi andhere mein ek hawaa ka mehekta jhonka aaya,
Jisne jaise poochhaa mere dil ka haal,
Aur jaise hee uss jhonke ne mujhe chooma,
Vaise hee mai honei lagi nihaal.

Uss jhonke kee khushboo mein basaa thaa,
Mere sawaal ka ruhaani jawaab,
Ki rayn ko abb aur na dabna padega,
Kyunki usey azad karega ruhaaniyat ka aaftaab.

Veh khushboo thi Guruji kee divyataa kee,
Jisne jeevan kee rayn ko sannaate se mukt kiya,
Rayn ne azad hokar apna astitva khoya,
Aur sooraj ne apne tej se akash ko tript kiya.

Guruji yakeenan aftaab kee roshni ko rakhenge barkaraar,
Har aandhi, tufaan, aur baarish ke paar mujhe le jaayega Unka pyaar,
Yeh kewal ummeed nahin, yeh mera vishwaas bol raha hai,
Is vishwaas bhare vandan mein mera mann dol raha hai.

Jaise jaise rayn mukt hoti jaaye,
Guruji, meri atma Aap mein khoti jaaye,
Aaftaab se roshan hoti rahe ruhaaniyat kee raah,
Aapko paane ke alaawa na ho aur koi bhi chaah.

Is vandan ko kar leejiye sweekaar Guruji,
Yeh vintee hai mujh naadaan kee,
Aap mein mujhe sampoorna chhavi dikhtee hai,
Mere antar-mann mein basey Bhagwaan kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 9, 2020

Om Namaha Shivaya
Aaj Ka Suvichaar 🙏🏻🙏🏻 # 964

           Ye Kalyuga Hai Janaab

Is akash mein bin garajte huey baadal ko baraste dekha hai,
Is duniya ko girgit se bhi tez rangg badalte dekha hai,
Kehte hain taali ek haath se nahin bajti,
Lekin ye kalyuga hai janab, yahaan toh neki ko thappad padte dekha hai.

Kalyuga ke aise samay mein Guruji ne le liya hai apni sharan mein,
Shukr hai is baat ka, varna na jaane kya ho jaata,
Maada waqt hai aaya itna, aur hum baithey hain Guruji ke charan mein,
Nahin toh sach mein hamaara kalyaan kaise ho paata?

Guruji ke oopar har pal bharosa rakhna,
Hamaari fitrat bani rahe toh achchaa hoga,
Guruji ke naam ka simran karne se,
Hamaari himmat bani rahe toh achchaa hoga.

Jis yug mein lobh itna badh gaya hai,
Ki apne apnon ke saath bhi baant kar nahin khaate hain,
Aise mein Guruji ne sab kuch kaise sambhaala hai,
Ye soch kar Shukrana ke aansoon aankhon mein bhar aate hain.

Atma-sammaan diya hai hamein,
Atma-vishwaas ke saath,
Hum mushkil mein chod bhi dein chaahe,
Par Guruji na chodein hamaara haath.

Pyaar diya hai itna saara,
Ki hamaari ek jholi mein na ye samaaye,
Isliye kyun na sab kuch Unpar chod dein,
Taaki Unka pyaar hamaare roam roam par chhaaye.

Koyle ko Guruji banaa sakte Hain heera,
Aur paaras ko banaayein Ve sona,
Abb jo Unkee sharan mein Hain hum,
Toh ho jaaye jo bhi hai hona.

Sabse pyaare meet Ve hee Hain,
Phir aur kaheen kyun jaana hai?
Guruji toh sampoorna Srishti ke shehenshaah Hain,
Unke payron taley saara zamaana hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 8, 2020

Om Namaha Shivaya
Aaj Ka Suvichaar 🙏🏻🙏🏻 # 963

      Jeevan Ke Is Daur Par

Pyaare Guruji,

Hamaare khoon ka katra katra ,
Aapki mehar ka mohtaaj hai,
Dil ke roam roam par,
Aapki marzi ka raaj hai.

Kal jo hua so ho gaya,
Abb hamaare saamne aaj hai,
Aapki mehar se isey sanvaar lein,
Hamaare karmon ke haath mein hamaari laaj hai.

Duniya ka drishya toh dekh liya,
Yahaan se chala jaayega jo bhi yahaan aaya hai,
Chaahe jitna bhi gehra rishta ho kisee se,
Phir bhi yahaan har koi paraaya hai.

Kyunki sabke saath laukik naata hai,
Jisne vyarth mein kayee baar sataaya hai,
Sadhna mein archan hai yeh sansaar,
Lekin karmon ka khel bhi isi mein samaaya hai.

Isliye yahaan par rehte huey hee,
Seekhna hai alag hona adhyatmik taur par,
Taaki dil ko chot na pahunche,
Jeevan ke is daur par.

Kyunki ruhaani seedhi par chadhte huey,
Dil kamzor ho toh nahin hai achchaa,
Niswaarth bhakti ke sangg yeh bhi chaahiye,
Ki iraada ho nek, dridh, aur sachchaa.

Isliye dikhaawe ka koi kaam nahin,
Na hee faayda hai kisee vikaar ka,
Banda bann ne ke liye hona zaroori hai,
Changey vyavhaar aur vichaar ka.

Jo khushi hum bhautikvaad mein dhoondh rahe hain,
Uss se zyada khushi ruhaaniyat mein paayein hum,
Guruji, aisee kripa keejiye humpar,
Ki abb toh bande bann jaayein hum.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 7, 2020

Om Namaha Shivaya
Aaj Ka Suvichaar 🙏🏻🙏🏻 # 962

         Sab Rishton Ka Samraat 

Guruji kee mamta kee mithaas,
Sangat kee Guruji ko paane kee aas,
Guruji ka naam leta hua sangat ka shwaas,
Sangat kee Guruji ke charnamrit ke liye pyaas,
In sabse banta hai yeh rishta bahut hee khaas.

Guruji ka laad aur pyaar,
Sangat par Unke kiye upkaar,
Guruji ka sangat ko diya dulaar,
Sangat kee Guruji ko pukaar,
In sabse rehta hai yeh rishta barkaraar.

Guruji ka sangat ko diya maargdarshan,
Sangat ka karte rehna Guruji ka smaran,
Guruji kee har bhakt par karuna har kshan,
Sangat ka pehen lena Guru naam ka aabhushan,
In sabse hota hai yeh rishta bahut paawan.

Guruji kee Apne bachchon par nadar,
Sangat kee Guruji par pyaar bhari nazar,
Guruji kee bhakti karne ka hamaari chetna par asar,
Sangat ke sukh mein na rahey koi kasar,
In sabse hota hai yeh rishta agrasar.

Guruji ka diya hua langar prasad,
Sangat kee Guruji sunte Hain fariyaad,
Guruji ka diya hua anant ashirwaad,
Sangat ko Guruji se milee hui uddhar kee buniyaad,
In sabse rehta hai yeh rishta sadaa yaad.

Guruji kee maujoodagi har pal,
Sangat ke kasht jo jaate hain tal,
Guruji ke paas hai har mushkil ka hal,
Sangat ka Guruji par bharosa atal,
In sabse hai salaamat yeh rishta kal, aaj, aur kal.

Guruji ne tabb tabb bhi diya sahaara,
Sangat ne jabb jabb Guruji ko pukaara,
Guruji bin hamaare boley bhi jaanein haal hamaara,
Sangat ka jeevan Guruji ne hai sanvaara,
In sabse banaa hai yeh rishta duniya mein sabse pyaara.

Guruji ne dee hai simran aur dhyan kee daat,
Sangat ka Guruji ke prati komal jazbaat,
Guruji ne dee hai sewa aur satsang kee saugat,
Sangat ke karam Guruji dete Hain kaat,
In sabse yeh rishta hai sab rishton ka samraat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 6, 2020

Om Namaha Shivaya
Aaj Ka Suvichaar 🙏🏻🙏🏻 # 961

              Saal Beet Raha Hai

Saal beet raha hai,
Waqt jeet raha hai,
Insaan haar raha hai,
Waqt maar raha hai.

Abb bhi nahin samjhenge,
Toh phir kabb samjhenge,
Ki insaan Bhagwaan nahin hai,
Aur Bhagwaan hee sahi hai.

Hum toh sach mein keede makode hain,
Apne hee karmon se humne apne bhagya madode hain,
Ye toh Guruji kee mehar hai,
Ki jeevan mein abb bhi sehar hai.

Is sehar ka ujaala rahe barkaraar,
Guruji kee kripa rahe aparampaar,
Isliye kyun na hum sab sudhar jaayein,
Jo raasta Guruji dikhaayein, hum udhar jaayein.

Guruji ke aagey waqt bhi har waqt jhuk jaata hai,
Guruji ke aagey har tarehn ka sankat ruk jaata hai,
Guruji kee kripa se hamaara bura ho hee nahin sakta,
Kyunki waqt bhi Guruji ko salaam karte nahin thakta.

Guruji hamein har pal neeven hokar jeena sikhaayein,
Aur hum Guruji ke charnon mein sadaachaari se waqt bitaayein,
Har pal hai boond ashirwaad kee aur waqt hai gehra saagar,
Waqt ke saagar mein basey ashish se hum bhar lein apne jeevan kee gaagar.

Madad karein kalyuga kee vidaayee mein,
Surakshit rahein Guruji kee vadiyaayee mein.
Kadar karein Guruji ke diye huey aashiyaane kee,
Taral hokar tayyaari karein satyuga ke aane kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 5, 2020

Om Namaha Shivaya
Aaj Ka Suvichaar 🙏🏻🙏🏻 # 960

        Simran Kee Kalee

Ruhaani saugat hai ye,
Baahar nahin milegi,
Ye simran kee kalee hai,
Jo dhyan bannkar khilegi.

Guruji Apne prem ke amrit se,
Is komal kalee ko seenchenge,
Niswaarthta ka adhyatmik aahaar dekar,
Kalee ko divyataa kee oar kheenchenge.

Samarpan ka noor chhaayega kalee par,
Toh veh tarr jaayegi khilte huey,
Simran dhyan mein parivartit hoga,
Bahaar kalee ko chhoo jaayegi milte huey.

Guruji kee soch mein rehte rehte,
Kalee bann jaayegi sundar phool,
Uskee sakaratmakta hataati rahegi,
Uspar padne waali saari dhool.

Har bhakt ke simran kee kalee,
Jab phool mein badal jaayegi,
Toh sangat kee bagiya lagegi pyaari,
Vatavaran mein khoobsoorati aayegi.

Guruji kee divya mehek,
Bagiya mein khushboo phailaayegi,
Poore gulistaan mein,
Is khushboo se raunak aayegi.

Isliye, aayiye, Guruji ka kar lein simran,
Prem, bhakti, vishwaas ke saath,
Kyunki dhyan ka phool khilaane mein,
Guruji ka hee toh hai hitkaari haath.

Phool ke liye mokshdaayi ho jaaye,
Karna Guruji ke charnon mein sarvsamarpan,
Isliye aayiye dhyan suman ko shraddha se,
Karein Unkee sharan mein arpan.

Buss, phir simran kee kalee kee kahaani ka hoga sundar anjaam,
Kyunki dhyan ke phool ko mil jaayega MahaShiv ka dhaam,
Har phool ko deedar hoga Bhagwaan ka,
Aur uddhaar ho jaayega poore gulistaan ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 4, 2020

Om Namaha Shivaya
Aaj Ka Suvichaar 🙏🏻🙏🏻 # 959

  Bandagi Kee Chunariya

Guruji, Aapki bhakti ka har pal,
Mann ko meetha laagey,
Dua hai ki Aapki bhakti karte karte,
Pakke ho jaayein bandagi ke dhaage.

In dhaagon mein kabhi gaanth na pad jaaye,
Aapse vintee hai mere Bhagwan,
In dhaagon se pyari si chunariya banaa do,
Jisey atma par odh kar sajaaoon mai apna jeevan.

Meri atma par ho Aapki bandagi kee chunariya,
Uspar Aapki ruhaaniyat kee khushboo chhaaye,
Toh makhmali hogi janam aur maran kee dagariya,
Chaahe kaisa bhi kasht saamne aaye.

Is chunariya ko odhe huey,
Baadalon ke paar mai ud jaaoon,
Akash kee aseemta ko paar kar ke,
Baaki har bandhan se azad ho jaaoon.

Buss Aapke saath juda naata,
Veh sadaa rahe salaamat,
Toh aanch bhi na aayegi mujh par,
Chaahe aa jaaye poori srishti mein kayamat.

Swaarthi bann rahi hoon agar yeh maangkar,
Toh Aap kripya mujhe kar dena kshama,
Kya karoon, yeh ruhaani tamanna hai meri,
Ki Aapke sangg hee guzrey mera saara samaa

Isliye is tamanna ko poori karne kee koshish mein
Mera saath dena, mere daata
Buss itna yogya banaa dena mujhe
Ki Aapke charnon se juda rahe mera naata

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 3, 2020

Om Namaha Shivaya
Aaj Ka Suvichaar 🙏🏻🙏🏻 # 958

               Shukrana Ka Suvichaar

Pyaare Guruji,

Suprabhaat kee shuruaat Aapse,
Jeene ka jazbaat Aapse,
Divyataa kee daat Aapse,
Sewa kee saugat Aapse.

Bhalaayi ka bhaana Aapse,
Shanti mein samaana Aapse,
Kalyaan ka khazaana Aapse,
Aapke gungaan ka gaana Aapse.

Sukh kee mani Aapse,
Hariyaali ghani Aapse,
Sangat dhani Aapse,
Har baat bani Aapse.

Mann par mehar Aapse,
Shuddhi kee sehar Aapse,
Paath aathon pehar Aapse,
Lagan kee leher Aapse.

Shraddha bharaa shwaas Aapse,
Waqt par vishwaas Aapse,
Ehsaanon ka ehsaas Aapse,
Pavitrataa kee pyaas Aapse.

Mamta bhari muskaan Aapse,
Vaibhav ka vardaan Aapse,
Umangg ko udaan Aapse,
Daata ka dhyan Aapse.

Ruhaaniyat ka raasta Aapse,
Vishwaas ka vaasta Aapse,
Dil kee daastaan Aapse,
Ashirwaad kee aastha Aapse.

Simran ka shringaar Aapse,
Satsang ka sansaar Aapse,
Pyaar aur parivaar Aapse,
Shukrana ka suvichaar Aapse.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 2, 2020

Om Namaha Shivaya
Aaj Ka Suvichaar 🙏🏻🙏🏻 # 957

         Kisee Ne Na Jaani

Guruji kavach Hain suraksha ke,
Guruji bhandaar Hain shiksha ke,
Guruji uttardaayi Hain deeksha ke,
Guruji rahnuma Hain raksha ke.

Guruji Gurbani ke dwaara dard ghataate Hain,
Simran se bheetar kee mayyl hataate Hain,
Soye huey ko chetna dekar jagaate Hain,
Vikaar bhare mann ko saaf karaate Hain.

Guruji ko sarvsamarpan karne se,
Hamaari mushkilein nahin rehti hamaare paas,
Unke har satsang mein aane se,
Simran kee aur badhti jaati hai pyaas.

Guruji kee har ruhaani saugat ke liye,
Mann mein jageh banaani hai,
Isliye mann ke bheetar hamein,
Sadbhaavna aur sweekriti laani hai.

Tabhi toh shiksha aur deeksha aakar,
Basengi hamaare mann ke mandir mein,
Aur vikaar na ghar banaa sakenge,
Kabhi bhi hamaare bheetar mein.

Kyun na apne mann ka saanchaa saaf karein,
Maangein maafi aur doojon ko maaf karein,
Mann ka bojh halka ho jaayega,
Zindagi jeene mein anand aayega.

Jab Guruji par chod dee jeevan kee kahaani,
Phir kisee baat kee nahin hai pareshaani,
Do chaar din kee toh hai zindagaani,
Jaane kee bela toh kisee ne na jaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja