Month: November 2020

November 30, 2020

Om Namaha Shivaya
Aaj Ka Suvichaar 🙏🏻🙏🏻 # 1016

Guru Nanak Dev Ka Avtar Divas

Sikhon ke sabse pehle Guru,
Jinse hui Unke baad aane wale Guruon kee parampara shuru,
Ve thei poojya Guru Nanak Dev ji pyaare,
Jinhonei aaj takk saari sangat ke kaaj Hain sanvaare.

Lahore ke paas Nankana Sahib mein,
Pandravi sadi mein Baba Nanak ka hua janam,
Khud Nirankar dharti par aaye,
Kaatne saari sarbat ke karam.

Bachpan se hee ruhaaniyat kee chhavi thee Unke jeevan mein,
Ek anokha sa pyaar jagaaya Unhonei sabke mann mein,
Rehte thei magn Ve sadhna aur dhyan mein,
Bahut abhigya thei Ve adhyatmik gyan mein.

Jaise jaise Unkee umr badhi,
Unhonei andh-vishwaas ke khilaaf awaaz uthaayee,
Unkee divyataa ke kisse mashhoor honei lagey,
Aur har oar roshan hui Unkee vadiyaayee.

Kaha jaata hai ki jab Ve thei takreeban tees saal ke,
Tabb ek neher ke paas se Ve teen din ke liye adrishya huey,
Aur lautne par Guru Nanak ji maun rahey,
Phir bataaya ki kaise Unhe Divya jyot ke darshan huey.

Buss, phir uss divyataa ke paawan amrit ko,
Sab takk pahunchaane ka Ve karne lagey prayatna,
Har insaan mein dekh kar divyataa kee moorat,
Ve karne lagey samaaj ke uddhaar ka yatna.

Ek Onkar Satnam ka paath padhaaya,
Uss Akal moorat takk pahunchne ka raasta dikhaaya,
Niswaarthta aur sachchaayee ka mahatva samjhaaya,
Aur sabko Naam japna sikhaaya.

Bheetar kee jagriti kee dee Unhonei prerna,
Samaaj kee oonch neech ko mitaane ke liye jagaayi chetna,
Tibet bhi gaye aur Mecca, aur Sri Lanka bhi,
Jahaan gaye, vahaan kee Unhonei shuddhi kee.

Rogiyon ko bakshi arogyata,
Nirdhan ka kiya uddhar,
Patit ko banaaya paawan,
Sudhare sangat ke sanskaar.

Anant bhalaa kiya insaaniyat ka,
Dekar ashirwaad ruhaaniyat ka,
Aaj bhi kar rahe Hain aur sadaa karenge sangat ka kalyaan,
Dekar Apne Divya Naam ka daan.

Sadaa sabko Apni sharan mein rakhein Nirankaar,
Nirankaar hee toh Hain sabke taaranhaar,
Unkee mahima hai aparampaar,
Ve hee Hain sabke kirpadhaar.

Sabko Guru Nanak ke avtar divas par,
Badhaayi ho bharpoor,
Saari duniya par chhaa jaaye,
Ek Onkar ka divya spandan aur noor.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 29, 2020

Om Namaha Shivaya
Aaj Ka Suvichaar 🙏🏻🙏🏻 # 1015

                 Jeevan Ka Geet

Khush rehne ka dhoondh lein koi bahaana,
Aur har pal karte rahein Guruji ka Shukrana,
Unkee kripa se saansein chal rahi hain,
In saanson mein bhaavanaayein aur yaadein bahi hain.

Kuch yaadein meethi meethi hain,
Kuch yaadein hain namkeen,
Kuch yaadon se mann khush hota hai,
Kuch se ho jaata hai sangeen.

Zindagi sach mein pal do pal kee hai,
Kyun vyarth ka bojh uthaane mein isey bitaayein,
Isliye khud bhi jeeyein doojon ko bhi jeene dein,
Aur har taraf khush haali phailaayein.

Utkrishtta ko madhe nazar rakhte huey,
Mann mein koi aise vichaar ko ghar na banaane dein,
Jo pahunchaaye hamaare spandan ko nuksaan,
Ya jis se hum bhool jaayein ki sab kuch dekh rahey Hain Bhagwaan.

Hum sab adhyaatmik ansh hain,
Param pita Paramatama ke,
Phir apni taraf se kyun vikaaron ke,
Daag lagaayein hum atma pe.

Shukrana aur khushi ko banaayein meet,
Inhee ke sangg nibhaayein jeevan jeene kee reet,
Jeevan ke har pal ko dikhaayein apni preet,
Toh jeevan ka geet bann jaayega hamaara meet.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 28, 2020

Om Namaha Shivaya
Aaj Ka Suvichaar 🙏🏻🙏🏻 # 1014

   Maran Kee Pakki Hai Buniyaad

Kaheen tedha, toh kaheen pathreela,
Kaheen sookha, kaheen baarish se geela,
Kaheen aruchikar, toh kaheen suhela,
Kaheen saaf, toh kaheen keechad se mayla.

Aisa hee hota hai sabke jeevan ka raasta,
Jispar hota hai hamaara hamaare karmon se vaasta,
Ye karam hee manzil ka nishchay karte hain,
Ye hee hamaare khaate mein paap aur punya bharte hain.

Raaste mein chalte huey koshish hoti hai,
Ki pathar aur keechad se rahein duur,
Phir burey karam karne ke liye,
Kyun hum ho jaate hain majboor?

Raaste par chalna toh hai zaroori,
Aur mukti ke liye karmon ka bhugtaan hai majboori,
Jitna saral ho raasta, chalna lagta hai utna aasaan,
Jitne kukaram kumm hongei, utnee jaldi mukti denge Bhagwaan.

Guruji ka naam lete lete raasta karein tayy,
Unke naam se shakti milegi aur mitt jaayega har bhayy,
Phir himmat hogi sadaa achche karam karte rehne kee,
Aur kaam krodh moh lobh ahem ke bahaav mein na behne kee,

Nirnay toh hamaare haath mein hai,
Guruji ka ashish hamaare saath mein hai,
Kyun nahin har pal yeh rakhein yaad,
Ki janam kee nahin, lekin maran kee pakki hai buniyaad.

Guruji hamaare sangg Hain har jageh,
Paa lein hum apni har kamzori par fateh,
Raaste par chalte huey na maanein hum haar,
Aur is buniyaad kee yathaarthta ko kar lein hum sweekar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 27, 2020

Om Namaha Shivaya
Aaj Ka Suvichaar 🙏🏻🙏🏻 # 1013

   Tayrnaa Sikha Kar Taar Dete Hain

Na dekha idhar, na dekha udhar,
Maar lee ruhaaniyat ke saagar mein chhalaang,
Baaki har armaan ko chod kar,
Buss, Guruji ka saath liya maang.

Guruji ke saath se mil gaya Unka pyaar,
Mil gaya Unkee bhakti ka uphaar,
Sab kuch Unke aagey diya haar,
Aur maan liya Unhe apna sansaar.

Pyaare Guruji ke saath hotey,
Jabb gyan saagar mein lagaaye gote,
Toh atma sheetal aur tript hui,
Aur har nakaratmakta se rikt hui.

Guruji ne taarne se pehle tayrnaa sikhaaya,
Guruji ne Apna prataap dikhaaya,
Ek anokha sa ruhaani raaz bataaya,
Aur mere mann ka har sanshay mitaaya.

Jaise jaise Unke sangg waqt bitaaya,
Duniya ka asal roop achche se nazar aaya,
Kaun apna hai aur kaun paraaya,
Guruji ne ye ehsaas dilaaya.

Jo ghaav huey dil mein, Guruji ne Unhe bharaa Apni mamta se,
Gyan ke saagar kee boondon se marham diya Apni kshamta se,
Jab simran ka naam aur shabd saagar kee lehron mein mila,
Toh atyant sundar Om aur Naad ka sur khila,
Uss sur aur uskee taal ke aalam se,
Saagar kee lehron par Guruji ka noor chhaaya,
Uske jeevandayi jal kee pavitrataa mein,
Mera toh saans saans samaaya.

Jitna saagar hai gehra aur anant,
Uss se kaheen zyada leeladhari Hain Guruji mere Bhagwant,
Doobte huey ko tayrne ka mil gaya shubh avsar,
Jabb sab kuch chod diya Guruji par.

Tayrnaa sikha kar taar dete Hain,
Sab kuch sambhaal lete Hain,
Sach mein aur koi nahin hai Guruji ke jaisa,
Jaise haal mein Ve rakhna chaahein, jeevan ho jaaye vaisa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 26, 2020

Om Namaha Shivaya
Aaj Ka Suvichaar 🙏🏻🙏🏻 # 1012

Guruji Bade Meharbaan Hain

Guruji bade meharbaan Hain,
Guru ke roop mein Ve swayam hee Ishaan Hain,
Har bhakt ka har pal rakhte dhyan Hain,
Sadaa karte bhakton ka kalyaan Hain.

Hum bhakt chaahe itne naadaan hain,
Andhere mein hain aur anjaan hain,
Guruji shuddhi ke spandan kee khan Hain,
Aur dete hamein sadachari ka gyan Hain.

Hamaare bin boley hamaare dil kee baat lete jaan Hain,
Guruji dete bhakt ko adhyatmikta ka inaam Hain,
Unkee nazron mein sab bhakt ek samaan hain,
Ve hum sabke karuna nidhaan Hain.

Guruji jaante hum sabke karmon ka anjaam Hain,
Ve neembu kee bhanti nichod kar baad mein dete aaraam Hain,
Ve chaahe lete imtehaan Hain,
Saath hee karte jeene ka intazaam Hain.

Guruji ka itna mangalkaari naam hai,
Guruji ne diya sangat ko Apne naam ka daan hai,
Koi niyam ya kanoon nahin, Unkee pooja karni aasaan hai,
Shraddha vishwaas ke sangg Unkee bhakti ka hitkaari parinaam hai.

Jis bhi tarehn se dekhein, Guruji itne mahaan Hain,
Unkee har bakhshish ke liye hum bhakt karte Unhe pranaam Hain,
Unke Shukrana ka karte hum gungaan Hain,
Hamaare liye toh Ve Guruji ke roop mein saakshaat Bhagwaan Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 25, 2020

Om Namaha Shivaya
Aaj Ka Suvichaar 🙏🏻🙏🏻 # 1011

            Sansaar Ka Kalyaan

Subah bhi aakar beet gayi,
Din ke baad aa gayi shaam,
Har pal yoon hee vyarth gaya,
Agar japaa na Guru ka naam.

Kal, aaj, aur kal,
In sab mein thode se bhi pal,
Agar bitaa dein hum simran mein,
Toh shanti aane lagegi mann mein.

Har pal jo beetega simran aur dhyan mein,
Uskee badaulat aur bhi pal yoon bitaane kee hogi chaahat,
Har uss pal jismein hum batorenge naam ka khazaana,
Uss se milegi baaki ke har pal mein bhi raahat.

Simran karne se mann ko vash mein
Na kar sakegi koi bhi pareshaani ya hairaani,
Simran karte karte duur honei lagegi
Mann kee apoorntaa aur naadaani.

Simran mein jaise jaise beetenge pal,
Toh yahee aas lekar aayega aane wala kal,
Ki simran ka sunehra mauka miley baar baar,
Aur Guruji hum par mehar kar ke dein hamein taar.

Mann ka khokhlaapan bhar jaayega Guruji ke naam se,
Toh mann-mandir na dooshit hoga kisee neech vichhar se,
Sukh mein simran, dukh mein simran,
Atma tript rahegi simran ke aahaar se.

Guruji kee kripa se mann ko milegi shanti,
Atma par noor laayegi Guruji kee kanti,
Ghar mein ek bhi sadasya ke simran karne se uddhaar hoga poore pariwaar ka,
Aur ghar ghar mein simran honei se kalyaan hoga poore sansaar ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 24, 2020

Om Namaha Shivaya
Aaj Ka Suvichaar 🙏🏻🙏🏻 # 1010

     Pyaar Se Dhoondha Pyaar Ko

Pyaar se dhoondha pyaar ko har jageh,
Poore jahaan mein mila nahin,
Jab mai Guruji ke dar par pahunchi,
Pyaar mera intazaar kar raha thaa vaheen.

Guruji, shukar hai Aapka,
Ki Aapne aane kee de dee izaazat,
Abb sadaa ke liye Apne charnon mein rakhna,
Karoon mai Aapse ye ibaadat.

Aapka pyaar paaya toh jaana,
Koi swaarth nahin hai is pyaar mein,
Tabhi toh is divya pyaar ke jaisa,
Aur koi pyaar nahin hai sansaar mein.

Is pyaar mein koi bewafaai nahin,
Ismein chaahiye koi gawaahi nahin,
Buss, bhaav ho taral aur komal,
Aur neeyat ho nek aur nirmal.

Koi shart nahin, na hai koi dikhaawa,
Buss kewal Aapka saath aur Aapka bulaava,
Jodni hai Aapse seedhi taar,
Aur karna hai pyaar ka izhaar.

Is pyaar mein andh-vishwaas nahin, vishwaas hai,
Is pyaar mein shraddha se leen har shwaas hai,
Is pyaar mein hai bairaag aur bhakti,
Is pyaar se milti hai atma ko shakti.

Is pyaar ka ehsaas bahut paawan hai,
Anant, aseem, aur mann- bhaavan hai,
Vishwaas hai ki agar badal bhi jaayein haalaat,
Phir bhi kumm nahin hoga is pyaare pyaar ka jazbaat.

Shukrana Aapka is paawan pyaar ke liye,
Shukrana Aapka is divya deedar ke liye,
Abb toh chaahe jeeoon ya mar jaaoon,
Buss, Aapke pyaare pyaar se tarr jaaoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 23, 2020

Om Namaha Shivaya
Aaj Ka Suvichaar 🙏🏻🙏🏻 # 1009

Guruji Ke Haath Mein

Guruji ke haath mein hai kismat likhne ka kalam,
Lekin hamaare haath mein hain hamaare karam.
Guruji kar rahe Hain hamaara uddhaar,
Lekin hamein hee laana hoga jeevan mein sudhaar.

Guruji toh har pal dete rehte Hain pyaar,
Kintu karna hamein hai uss pyaar ka maan aur ikraar.
Guruji sikha rahei Hain ki hum jeevan rakhein saadaa,
Baaki toh hamein nibhaana hai vikaaron ko tyaagne ka vaadaa.

Guruji zaroor dobaara likhenge lekh kismat ka,
Lekin hamein prayaas karna hai Guruji kee khidmat ka,
Kar ke Unhe apne achche karmon se prassann,
Aur neki ke dhan se hokar sampann.
Kar lein hum paapon ka praayashchitt,
Aur pachhtaave se ho shant yeh chitt.

Sach hai ki Guruji ke vash mein hamaara har shwaas hai,
Lekin hamaare vash mein is shwaas ka ruhaani riyaaz hai.
Isliye Guruji kee kripa se in saanson se simrein Unka naam,
Taaki Unhee kee mehar se ho hamaara kalyaan.

Jabb hongei hamaare achche karam,
Toh tabb jabb Guruji uthaayenge Apna kalam,
Apne ashirwaad kee siyahi se Ve muqaddar likh denge dobaara,
Aur jeevan ke raaste ko roshan karega sanvari hui taqdeer ka sitaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 22, 2020

Om Namaha Shivaya
Aaj Ka Suvichaar 🙏🏻🙏🏻 # 1008

Niraasha Kee Baatcheet, Asha Ke Saath

Niraasha ne asha se kaha,
Tumhaari aankhein har pal kaise muskuraati hain?
Asha ne jawaab diya pyaara sa,
Kyunki mere ek bahut hee pyaare saathi hain,
Ve sadaa mera saath dete Hain,
Aur meri har chinta har lete Hain.

Niraasha ne poocha, kaun hain ve aur kya hai unka naam,
Toh asha ne kaha, Ve mere Guruji Hain jo Hain bahut meharbaan.
Chaahe din ho ya ho raat,
Mai karti rehti hoon Unse baat,
Koi bhi dukh jo mujhe sataata hai,
Toh Unka sahaara marham bann jaata hai.
Jabb kabhi mera hota hai bura haal,
Unka pyaar banta hai meri dhaal.
Mujhe kuch kehna hee nahin padta,
Mera Guru mere kasht se khud hee hai ladta.
Jab mujhe hota hai zaraa sa bhi dard,
Guruji bante Hain mere hamdard,
Jab kabhi mujhe lagne lagta hai darr,
Ve dete Hain nirbhay honei ka var,
Mai maanti hoon khud ko bahut khushnaseeb,
Kyunki mere Guruji Hain mere bahut hee kareeb.

Niraasha ne asha se kaha,
Tumhaara bhaav kitne prem se baha,
Tumhaari baaton se mai gayi hoon jaan,
Ki Guruji Hain itne udaar aur mahaan,
Ve rakhte Hain tumhaara itna dhyan,
Is baat ka bhi mujhe ho gaya gyan.

Niraasha bhi karne lagi Guruji ka vandan,
Guruji kee kripa se badalne lagaa uska bhi spandan.
Niraasha ne apne vyarth aksharon ko diya tyaag,
Unhe peechhe chod kar veh aagey gayi bhaag.
Dekhte hee dekhte veh bhi asha bannkar muskuraane lagi,
Aur Guruji kee prashansa ke geet gaane lagi.
Guruji kee mehar niraasha ke jeevan mein kya rangg laayi,
Yeh dekh kar niraasha khushi se phooli nahin samaayi.

Niraasha bhi palat leti hai apni kaaya,
Ye hai leela dhari Guruji kee manohar maya.
Pyaare Guruji par
Poorna vishwaas ho jiske mann mein,
Aaaj nahin toh kal,
Asha vaas karne lagegi uske jeevan
mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 21, 2020

Om Namaha Shivaya
Aaj Ka Suvichaar 🙏🏻🙏🏻 # 1007

        Guruji Ke Geet Tu Gaa Le

Guruji ke geet tu gaa le,
Jeevan ko safal banaa le,
Sukh dukh apna Unhe suna le,
Apne mann kee dashaa bataa le.

Dil mein vishwaas jagaa le,
Har sanshay ko mitaa le,
Unke dhyan mein chitt ko lagaa le,
Simran ka waqt badha le.

Guruji ko paas bulaa le,
Unse adhyatmik rishta banaa le,
Unkee sharan mein tu panaah le,
Unpar apna haq tu jataa le.

Unse seedhi taar mila le,
Satsang mein ashish tu paa le,
Samarpan kee jyot jalaa le,
Aur kar khud ko Unke havaale.

Sewa se punya kamaa le,
Rotey huon ko tu hansaa le,
Gareeb ko ann khilaa le,
Apni pavitrataa ko azmaa le.

Galatiyon ke liye tu sazaa le,
Maafi maang kar Unhe manaa le,
Muskuraa kar tu Unhe hansaa le,
Changey karam kar Unhe rijhaa le.

Mann mandir mein Unhe sajaa le,
Unke naam ka prasad tu khaa le,
Shukrana mein tu sees jhukaa le,
Roam roam mein buss Unhe basaa le.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja