Month: November 2020

November 10, 2020

Om Namaha Shivaya
Aaj Ka Suvichaar 🙏🏻🙏🏻 # 996

Aisa Guru Sach Mein Aur Kaheen Nahin Milega

Jo Apni mamta ke marham se tere ghaav silega,
Aisa Guru sach mein aur kaheen nahin milega.
Jo tere dukh mein Apni aankhon se aansoon bahaayega,
Aisa matvaala meet tujhe dhoondhne se bhi na mil paayega.
Jo tujhe mata pita ka pyaar dekar Apni goad mein sambhaalega,
Aise niswaarth Guru ko paakar tera dil saari kaayinaat kee khushiyaan paa lega.

Isliye,
Na karne de apne aansuon ko tu apne haunsle par vaar,
Keh de unse ki tere saath Hain tere taaranhaar.

Na karne de paristhitiyon ko apne santulan par aakramann,
Samjhaa de unhe ki teri raksha kar rahei Hain tere Bhagwan.

Na aane de aanch apni akhandataa par,
Tujhe prerna de rahein Hain tere Guruvar.

Na chhaane dena tu apne par maayusi ko akelepann mein,
Tu apna dhyan lagaaye rakhna Neelkanth Niranjan mein.

Na karna tu buraayee chaahe ve buraayee karein ek ya har baar,
Unhe bhi dekh rahey Hain MahaShiv kirpadhaar.

Duniya kee bheed ko na chheen lene dena tu apna utsaah,
Kyunki Guruji ko har pal hoti hai teri parvaah.

Ateet ko na churaane dena tu khushi vartmaan kee,
Tere saath prem bhari mitrataa hai Guruji ke roop mein Bhagwaan kee.

Kalyuga ke keechad se na honei dena malin apni atma ke kamal kee khoobsoorati,
Teri pavitrataa ko poora sahaara de rahei Hain Trilokinath Pashupati.

Isliye,
Shukrana kar ke mastak jhukaa tu Guruji ke naman mein,
Har chunauti ko sweekar kar tu magn ho Guruji ke manan mein,
Aisee koi uljhan nahin hai jo nahin suljhegi Unki sharan mein,
Tera bura waqt yakeenan haar maanega Unke kamal charan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 9, 2020

Om Namaha Shivaya
Aaj Ka Suvichaar 🙏🏻🙏🏻 # 995

  Tum Guruji Ke Paas Chale Aana

Zindagi toh hai ek imtehaan,
Karte huey Khudaayee ko salaam,
Tum salaamat rakho apni muskaan,
Aur Guruji kee baat lo tum maan.

Guruji milenge simran aur dhyan mein,
Na ki kitaabi gyan mein.
Ve milenge sewa mein zarooratamand kee,
Na ki chaaploosi mein ghamandi aur ghamand kee.
Guruji dikhenge maasumiyat bhari muskaan mein,
Na ki chhal-kapat kee aan aur shaan mein,
Ve milenge vinamrataa ke saaz mein,
Ve na milenge oonchi abhimaan wali awaaz mein.

Guruji na basenge jhoothe dikhaawe mein,
Balki hameshaan rahenge saadagi ke daawe mein,
Ve na milenge vehem aur andh-vishwaas mein,
Balki Ve toh basein Hain ruhaani azaadi ke shwaas mein.
Guruji na milenge maanav ke manovikaar mein,
Balki milenge vikaar rahit niswaarth pyaar mein,
Ve na milenge vyarth vaadon ke vaaste par,
Balki praapt hongei hamaare kartavya ke raaste par.

Guruji kabhi na milein heen bhavna mein,
Ve milte Hain saadagi aur sadbhavna mein.
Ve na milein tark-vitark aur vaad-vivaad mein,
Ve milein shraddhaalu bhakt ke jazbaat mein.
Ve nahin baste Hain dharam kee deewar mein,
Ve toh baste Hain Om aur Ek Onkar mein.

Isliye chaahe jo bhi kahe ye zamaana,
Apne pyaar ko tum banaakar nazraana,
Apni ibadat mein piroh kar shukrana,
Tum Guruji ke paas chale aana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 8, 2020

Om Namaha Shivaya
Aaj Ka Suvichaar 🙏🏻🙏🏻 # 994

     Mere Param Poojya Bhagwaan

Pyaare Guruji,

Aapse hai niswaarthtaa ka nagma, aur Aapse hai sneh ka saaz,
Aapse kuch bhi boloon na, toh bhi Aap sunein meri awaaz,
Aapki maujoodagi ka anubhav hai itna khoobsoorat aur khaas,
Aapki hee kripa aur karuna se hua hai is sachchaayee ka ehsaas.

Subah ka sooraj kahoon Aapko,
Ya phir kahoon mai raat ka chaand,
Aapse hee hai sooraj aur Aapse hai ye chaand,
Aapse hai yeh sampoorna brahmaand.

Ekaant mein divya saathi Hain Aap,
Aur akelepann mein Hain madhur meet,
Allah kahoon Aapko, yaa kahoon phir MahaShiv,
Jis roop mein bhi dekhoon, Aapse hee laagi hai preet.

Vikaaron ke vishaal vann mein nakaraatmakta kee nadiya hai behti,
Mere Guruji mera uddhaar keejiye, meri har dhadkan Aapse hai kehti,
Kalyaan bhi Aapse hai, aur Aapse hee nirmaan,
Bilkul agyaani hee sahi mai, lekin is satya se mai nahin anjaan.

Duniya kee bheed ke paraayepann mein Aap Hain mere apne,
Aapke protsaahan se aagey badhti hoon jabb mera utsaah lagta hai thakne,
Saahas bhi Aapse milta hai, aur Aapse hee miltee hai muskaan,
Bheed mein mujhe gumne na dena, mere param poojya Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 7, 2020

Om Namaha Shivaya
Aaj Ka Suvichaar 🙏🏻🙏🏻 # 993

          Ismein Koi Shak Nahin

Chiraag jalaa kar roshni har koi kar le apne aaspaas,
Lekin khud ke bheetar prakash kaise aaye?
Jo mann mein divya gyan kee jyot jal jaaye,
Toh bheetar bhi ujaala ho jaaye.

Ek taraf sainkdon chiraag hon haath mein,
Dooji taraf ho mann mein Guruji ka naam,
Toh boojho zaraa ki zyada kahaan roshni hogi,
Aur kahaan dikhegaa ujjwal dham?

Guruji ke naam mein hai sundartaa aisee,
Jo bhakti ko deti hai nikhaar,
Aur naam kee shakti se honei lagta hai,
Prakaashit poora ghar sansaar.

Isliye apne mann ke mandir mein,
Guruji ke naam kee jyot jalaakar,
Shraddha, bhakti, aur prem se,
Guruji ko shudh bhaav se bulaakar,
Is mandir mein asthaa ke aasan par,
Viraajmaan honei ka karo Unse nivedan,
Aur Unke paawan kamal charnon mein,
Tum sir rakh kar, kar do sarvsamarpan.

Guruji ke ashirwaad ke prasad se,
Tumhe naam ka milega jo vardaan,
Uss vandaneeya vardaan se,
Ujjwal rahega tumhaara jahaan.

Jitnee hogi shraddha, saadagi, aur bhakti,
Utnee praapt hogi divyataa aur shakti,
Mann mein akhand jyot jalegi phir divya gyan kee,
Aur madhur dhwani goonjegi Guruji ke naam kee.

Is dhwani se goonj uthega tumhaara vartmaan,
Is se sadaa ke liye mitt jaayenge pichhle dukh dard ke nishaan,
Aur jabb bhavishya ka swaagat karoge tum Guruji ke naam ke saath,
Toh ismein koi shak nahin, ki bann jaayegi har bigdi baat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 6, 2020

Om Namaha Shivaya
Aaj Ka Suvichaar 🙏🏻🙏🏻 # 992

Ho Gaya Mujhe Paawan Pyaar

Ho gaya mujhe paawan pyaar,
Aakar pyaare Guruji ke darbar,
Anandit hua hai ghar pariwaar,
Paakar Guruji mein Parwardigaar.

Aayi jeevan mein kabhi bahaar,
Aur kabhi tufaanon ne kiya vaar,
Na maani mainey haar,
Kyunki mere sangg Hain kirpadhaar.

Kar liya mainey sweekaar,
Ki Guruji Hain taaranhaar,
Denge mujhko bhi Ve taar,
Is satya ka hai mujhe ikraar.

Bayaan karun apna aabhaar,
Mann hee mann mein baar baar,
Hua hai poora aitbaar,
Ki Unkee mahima hai aparampaar.

Jaisa bhi hai ye sansaar,
Yahaan mere din hain buss do chaar,
Paakar mainey Guruji ka dulaar,
Paa leen meharabaaniyaan kayee hazaar.

Guruji MahaShiv ka Hain avataar,
Mere jeene ka Hain Ve aadhaar,
Unse jud gayi hai seedhi taar,
Toot gayi sanshay kee har deewar.

Mai jis naiya mein hoon savaar,
Guruji ke haath mein hai uskee patvaar,
Ve lekar jaayenge jis bhi paar,
Vaheen hoga meri sunehri manzil ka dwaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 5, 2020

Om Namaha Shivaya
Aaj Ka Suvichaar 🙏🏻🙏🏻 # 991

  Mann Ka Manohar Mandir

Ardhnareeshwar roop hai jinka,
Unhe laal chola pehnaane ka mann hai karta,
Jitna bhi nihaartee rahoon mai Unko,
Mera toh dil hee nahin hai bharta.

Guruji hee bhakton ke annadata Hain,
Aur kheton mein dete Hain hariyaali,
Bhoore aur harey rangg ke chole mein bhi,
Unkee shaan toh hai badi niraali.

Jis tareh se poori dharti par hukoomat karta hai akash,
Vaise hee Guruji poore sansaar mein phailaate Hain Apna sakaash.
Neele rangg ke chole mein bhi lagte Hain kitne pyaare,
Neel kanth Hain, isliye lagte Hain aur bhi nyaare.

Sooraj dhalne lagta hai jabb,
Aur gerua honei lagta hai gagan,
Vaise hee gerue rangg mein sajaaon Guruji ko,
Toh Unhee mein ho jaati hoon magan.

Baisakhi jo hai fasal kataayee ka tyohaar,
Peele rangg mein sajta hai ghar parivaar,
Uss rangg kee shobha badh hai jaati,
Jabb peelee chunri chole ke saath Guruji ko hai sajaati.

Safed rangg se pavitrata, suraksha, saadapan ka sanket milta hai,
Safed rangg bhi Guruji par kitnee ujjwaltaa se khilta hai.
Aur kaale rangg mein dekho toh Guruji mahaan,
Lagte Hain kitne ramya aur aalishaan.

Gulabi chola ho ya bhoora ya phir rangg ho koi aur,
Har rangg mein Guruji ko dekhkar ho jaaoon mein bhaav-vibhor.
Guruji kee divya chhavi ka itna leelamayee hai spandan,
Ki sees khud hee jhuk jaata hai karte huey Unka vandan.

Guruji ke chole ka jo bhi ho rangg,
Veh chola toh tarr jaata hai,
Guruji kee ruhaaniyat ka dhang,
Har bhakt par asar kar paata hai.

Har rangg kee shobha ko nikhaarein Guruji,
Unke noor ke aagey toh har rangg kee khoobsoorati chhoti hai,
Har rangg kee raunak ka kantimayee kaaran,
Guruji kee param paawan divya jyoti hai.

Jis bhi roop rangg mein dekhein Guruji ko,
Ve har baar lagein aur bhi sundar,
Jabb se Guruji aakar basey Hain mann mein,
Tarr gaya hai mann ka manohar mandir.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 4, 2020

Om Namaha Shivaya
Aaj Ka Suvichaar 🙏🏻🙏🏻 # 990

             Sulekha

Is tathya se tum ho jaao sehmat,
Ki Guruji kee hai tum par bahut rehmat.
Unka saath mil raha hai tumhe tumhaare dukh mein,
Yaad karo, Unhee ka ashish thaa pehle bhi tumhaare sukh mein.

Har haal mein jeena Ve hee sikhaa rahey Hain,
Samjhauta paristhitiyon se kaise karna hai, Ve hee dikha rahey Hain.
Unhonei tumhaare kalyaan ke liye anginat kasht sahey Hain,
Unkee divya aankhon se tumhaare dard bhare aansoon bahey hain.

Tum jaano ya na jaano,
Tum maano ya na maano,
Ve tumhaare bahut kareeb Hain,
Likh rahe tumhaara naseeb Hain.

Chaahe jo bhi kahe tumhaare haath kee rekha,
Tumne shaayad Guruji kee leela ko nahin dekha,
Ve sanvaar denge tumhaari kismat ka lekha,
Tumhaari nayee pehchaan kehlaayegi sulekha.

Har tarehn se sundar hogi tumhaari kismat kee likhaayee,
Divya ashirwaad se jeevan mein pyaar kee hogi kamaayee,
Srijansheelta aayegi aur gehri hogi ruhaaniyat tumhaari,
Chunauti ka saamna karne kee hogi himmat aur duur hogi laachaari.

Oopari dikhaawe aur vyarth ke niyam kee zanjeerein toad kar,
Andhvishwaas aur vehem ko hameshaan ke liye chod kar,
Tum adhyatmikta ke akash mein azaadi ka logey shwaas,
Yeh sapna hakeekat mein badal jaayega, dekhna, tumhe ho jaayega vishwaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 3, 2020

Om Namaha Shivaya
Aaj Ka Suvichaar 🙏🏻🙏🏻 # 989

            Thoda Aur Sabr Tu Rakh

Aayegi veh subah sunehri,
Jiska tujhe hai intazaar,
Thoda aur sabr tu rakh,
Na hota chal bekaraar.

Is andheri raat ke lamhon mein,
Apne aap ko tu kar tayyaar,
Simran aur dhyan mein ramta jaa,
Inhee se hoga beda paar.

Ekaagrachitt na bhi ho sakey,
Toh koshish karne se na tu haar,
Guruji toh neeyat parakhte Hain,
Neeyat mein piroh le tu wafaa aur pyaar.

Tu bilkul niraash na ho,
Agar chaand taare na sunein teri pukaar,
Tu shraddha ka deepak mann mein jalaa,
Na karne de sanshay ko apne vishwaas par vaar.

Apne dil kee awaaz ko banaakar ek nagma,
Tu bann jaa jeevan ke manch par fankaar,
Guruji ko poora karne de tu apni zindagi ke har pehlu ka chitra,
Kyunki poori srishti mein nahin hai unse kaabil chitrakaar.

Ho sakta hai ki chalte chalte,
Tujhe bhatkaane lagein tere manovikaar,
Tu unko paraajit kar ke jhuka de,
Banaakar neki aur nirmaltaa ko hatyaar.

Is raat mein chaahe tu samjhe tu akela hai,
Tere saath Hain tere paalanhaar,
Ek Ve hee Hain jo tere apne Hain,
Na ki tera yeh ghar sansaar.

Lekin kyunki is karam bhoomi par tu aaya hai,
Guruji ne diya hai tujhe laukik parivaar,
Isliye karmon ka hisaab hona bhi zaroori hai,
Aakhir zindagi ke din toh hain kewal do chaar.

Isliye is raat ko imtehaan maan kar,
Ho jaa tu Guruji kee naiya mein savaar,
Sabke liye mann mein rakh sadbhavna aur pyaar,
Aur sakaratmak rakh tu apna vyavhaar.

Sooryoday hoga ummeed ke akash mein,
Tera swaagat hoga uske tejmayee prakash mein,
Ujjwal hogi tere raaste kee har moad,
Tu aagey chalega ateet ko peechhe chod.

Tujhe Guruji denge adhyatmik unnati ka uphaar,
Aur tere jeevan mein sunehri subah hogi phir ek baar,
Imtehaan mein tujhe safalta denge tere Parwardigaar,
Dekhna, pyaare Guruji tujhe zaroor denge taar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 2, 2020

Om Namaha Shivaya
Aaj Ka Suvichaar 🙏🏻🙏🏻 # 988

          Guruji Kee Kahi Hui Baat

Kitne hunar Ishwar karte Hain pradaan,
Insaan ko chahiye ki rakhey unka maan,
Yahee baat laagoo hoti hai shaql soorat par,
Isliye shukrana karna zaroori hai Prabhu ke dar par.

Guruji sikhaate Hain ki naak kaan aadi angg kee sahi sanrachna hai,
Iska bhi hum karein shukrana,
Kitna mushkil ho agar shareer kisee vishamtaa kee vajeh se,
Chod de hamaara saath nibhaana.

Laukik dhan aur yash ne toh paani ke jaise,
Zamaane kee dhoop mein hai lupt ho jaana,
Isliye naadaani ke saath saath bewakoofi hai,
Inhe apne divya rishte kee buniyaad banaana.

Jo kaam, krodh, lobh, mohahem ke hain manovikaar,
Ye karte hain sahi mainey mein hamein
buree tarehn se beemaar,
Aur inhee se bante hain hamaare aur bhi karam,
Toh chalta hee rehta hai jeevan aur maran.

Kuch beemaariyon ka kaaran samajh mein nahin hai aata,
Karmon ka khel ya laaparawaahi ya kisee vaigyaanik kaaran se naata,
Inmein bhi shukrana karna jo nahin hai bhool paata,
Veh insaan toh yakeenan adhyaatmik taur se nirogi hai reh paata.

Aur jahaan takk sawaal hai hamaare manobhaav aur ravaiye ka,
Aur jeevan mein ho rahi har ghatna kee oar nazariye ka,
Ye toh hai vash mein hai hamaare har baar,
Toh kyun na hum laayein ismein sudhaar.

Agar sakaaraatmak hoga nazariya,
Aur vikaaron se rahenge hum duur,
Saath mein har pal ka shukrana karenge,
Toh kadaachit na hongei hum paristhiti se majboor.

Guruji sikhaate Hain shukrana karte rehna,
Ve himmat dete Hain jabb koi roag padta hai sehna,
Ve jooton ke sangg ahem aur tark-vitark chodne ke liye kehte Hain,
Kyunki ahem aur tark-vitark mein hamaare insaani vikaar aur vichaar rehte hain.

Maankar Guruji kee kahi hui baat,
Kyun na nibhaayein divyata ka saath,
Ek yahee saath hamein sakta hai taar,
Aayiye is saath ka karein shukrana baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 1, 2020

Om Namaha Shivaya
Aaj Ka Suvichaar 🙏🏻🙏🏻 # 987

Aisee Lagg Jaaye Lagan

Shraddha aur prem se jo karey,
Guruji ka simran aur dhyan,
Uss nishtha waale bhakt ko,
Awashya milta hai ruhaani gyan.

Pyaar ke bhaav se jabb veh bhakt,
Gurbani mein leen ho jaata,
Seedhi taar jodta Guruji se,
Toh mann ko kendrit kar paata.

Jabb jabb hota gurbani ka shravan,
Tabb tabb hota Guruji ka manan,
Aum, bindu, aur naad ka hota mishran,
Aur divya prakash se roshan hota mann.

Aankhein bandd honei par andhkaar ke bajaay,
Is divya prakash se milta nirmal anand,
Uskee gehraayi mein jaane ka dil karta,
Taaki praapt ho satchittanand.

Lekin iske liye zaroori hai karna prayaas,
Ki simran aur dhyan ka hota rahey abhyaas,
Dheere dheere raas aane lagega yeh ruhaani riyaaz,
Aur veh hoga jeevan ka sabse khoobsoorat ehsaas.

Koshish kar ke hee bharosa hoga agar abhi nahin hai is satya par vishwaas,
Isee koshish se hogi poori adhyatmik manzil par pahunchne kee aas,
Jisko lagne lagti hai aisa karne kee paawan pyaas,
Uske liye aise lamhe ho jaate hain sabse khaas.

Guruji kee kripa se aisee lagg jaaye lagan,
Ki buss simran aur dhyan mein mann ho jaaye magan,
Tarr jaayega phir is ruhaani dhan se tann mann,
Aur phir sach mein safal ho jaayega jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja