Month: December 2020

December 21, 2020

Om Namaha Shivaya
Aaj Ka Suvichaar 🙏🏻🙏🏻 # 1037

   Atma Ka Shringaar

Yeh kalyuga zoron se raha hai lalkaar,
Tabaahi, vipdaaon, beemaariyon se insaan hua hai laachaar,
Guruji ke vash mein hai jagg ka uddhaar,
Lekin zaroori hai insaan ka jhuk jaana abb kee baar.

Agar soch mein ho jaaye sudhaar,
Aur vyavhaar mein samaa jaaye pyaar,
Koi bhi na karey kisee dooje kee bhavna se khilvaad,
Toh mitt jaayega tanaav aur takraar.

Guruji ko hain hamaari laakhon khaamiyaan sweekaar,
Ve har pal hamaari madad karne ke liye Hain tayaar,
Ve awashya denge hamein taar,
Namumkin ko mumkin banaa sakte Hain Parwardigaar.

Agar paawan karne hain apne sanskaar,
Toh insaan ko tyaagna hoga har vikaar,
Saamanjasya mein nahin chalta koi bhi vyaapaar,
Isliye insaan ko shudh karne hongei apne vichaar.

Do char din ka saraay hai yeh sansaar,
Yahaan se bahut duur hai mukti ka dwaar,
Jo pahunchna chaahta hai uss paar,
Uska khatm hona hee hoga saare karmon ka udhaar.

Buss, phir parinde pinjare se azad ho udte hain jis prakaar,
Vaisi hee udaan lekar jaayegi atma uss paar,
Khul jaayenge saumya sachkhand ke dwaar,
Aur mukti ke manohar manke karenge atma ka shringaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 20, 2020

Om Namaha Shivaya
Aaj Ka Suvichaar 🙏🏻🙏🏻# 1036

           Nirmal Naam Ka Daan

Pal pal sangat par hai Guruji kee mehre nazar,
Unhee ke ashirwaad ka hai ye asar,
Ki simran mein lagta hai mann,
Aur mila hai hamein dhyan ka dhan.

Is dhan ko Guruji kee kripa se badhaayein,
Atma ko ruhaaniyat kee oonchaayee par pahunchaayein,
Saath hee neevenpann se aur bhi zyada jhukte jaayein,
Aur hum galat kaam karne se rukte jaayein.

Simran aur dhyan se hoga Guruji se naata gehra,
Guruji ka sadaa hoga hamaare adhyatmik kram-vikaas par pehra,
Jitnee nek neeyat aur jitna dridh hoga hamaara iraada,
Hamaari adhyatmik unnati Guruji kee mehar se hogi utnee hee zyada.

Simran kee gehraayi mein lagne lagega dhyan,
Niyamit roop se ye karenge toh vikasit hoga ruhaani gyan,
Kalyuga mein is se bada na hai koi bhi vardaan,
Isliye zaroori hai ruhaani gyan ke vardaan ko dena sammaan.

Guruji ne diya hai hamein Apne naam ka daan,
Unke bhakt ‘bande’ banein, yahee hai Unka armaan,
Agar hum insaan Guruji kee baat lein maan,
Toh bilkul nishchit hai hamaara kalyaan.

Phir kyun taalein hum yeh shubh kaam,
Is shubh kaam se hum paa sakte hain param dhaam.
Karein Guruji ka koti koti Shukrana aur pranaam,
Ki Kalyuga mein hamein mila hai Unke nirmal naam ka daan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 19, 2020

Om Namaha Shivaya
Aaj Ka Suvichaar 🙏🏻🙏🏻 # 1035

Trilok Ke Taaranhaar

Apne pichhle janmon ke karam,
Kya thei ye na jaanein hum,
Phir bhi yahee suna aur seekha hai,
Ki aksar vahee bante hain aaj ke khushi aur gumm.

Ye toh achchaa hua,
Jo Guruji ne hamein apni sharan mein le liya,
Hamaare karmon ke bhugtaan mein,
Hamein sahaara Unhonei hai diya.

Nahin toh kis kis dar par padta hamein jaana,
Aur aaj se bhi zyada padta hamein pachhtaana,
Khair aagey kya hona hai veh bhi hum ne na jaana,
Isliye kyun na jaayein udhar, jidhar ka raasta Guruji ne hai dikhaana.

Guruji ka dikhaaya hua raasta galat ho hee nahin sakta,
Guruji ke dar par pahunch kar divya khoj ka safar hai rukta,
Kyunki veh MahaShiv ka dwaar hai,
Jinhe bhinn bhinn roop mein poojta saara sansaar hai.

Kisee ne sahi farmaaya hai ki galat disha mein jaane wali bheed ka hissa bann ne se achcha hai,
Ki sahi disha mein akele chale insaan,
Lekin aisa karne ke liye poorna samarpan aur vishwaas hai zaroori,
Kyunki phir saath dete Hain swayam Bhagwaan.

Guruji toh khud hee MahaShiv Bhagwaan Hain,
Apni pakki sangat kee Unhe poori poori pehchaan hai,
Jo aisa nahin sochta, veh toh sach mein naadaan aur anjaan hai,
Guruji ke dayalu dar par hota sadaa kalyaan hai.

Guruji ke dar par sukoon hai, sanshay nahin,
Guruji ke dar par bhaav zaroori hai, bhayy nahin,
Guruji ko hum pyaar karein, na ki karein Unhe pareshaan,
Guruji kee sharan mein shudh banein, na ki banein shaitaan.

Aaj ya kal khatm ho jaayega is janam ka
har kissa,
Phir is janam ka har karam banega aagey kee niyati ka hissa,
Rabb Guruji ke roop mein aaye khel sulajhaane hamaare har karam ka,
Isey sulajhaate sulajhaate Ve khatm kar denge ye silsila janam maran ka.

Ye hai Guruji kee leela aparampaar,
Is tathya se koi nahin kar sakta hai inkaar,
Poori srishti mein kaheen na milenge aise paalanhaar,
Jo swayam hee Hain sampoorna trilok ke taaranhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 18, 2020

Om Namaha Shivaya
Aaj Ka Suvichaar 🙏🏻🙏🏻 # 1034

Pyaar Ko Bahut Pyaar Se

Pyaar ko bahut pyaar se pyaar milta hai,
Jabb Guruji kee sharan mein dil ka murajhaaya phool khilta hai,
Jabb raaste ka bhaari se bhaari pathar Unkee kripa se hilta hai,
Jabb Unka sneh ghaayal mann ke har ghaav ko silta hai.

Asha bahut asha se asha ko paati hai,
Jabb Guruji kee chhavi mann par chhaati hai,
Jabb Unkee kripa se har chinta duur ho jaati hai,
Jabb ummeed kee kiran dil ko chhoone aati hai.

Dhyan karne se dhyan karne ka dhyan badhne lagta hai,
Jabb simran ka suramya sur bajne lagta hai,
Jabb samarpan se jeevan sajne lagta hai,
Jabb dil har pal Guruji ka naam bhajne lagta hai.

Anand bahut anand se satchittanand hota hai,
Jabb bhakt Guru naam ke amrit se apne paap dhota hai,
Jabb bhakt maanta hai ki Bhagwaan bada hai aur veh swayam bahut chhota hai,
Jabb bhakt sadaa ke liye Guru ka hokar apna astitva khota hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 17, 2020

Om Namaha Shivaya
Aaj Ka Suvichaar 🙏🏻🙏🏻 # 1033

  Ateet Kee Dastaan

Kitnee kashmakash mein hai aaj saara jahaan,
Kitnee vyaakultaa chhaayi hai yahaan vahaan.
Aayiye, karke sachche dil se Guruji ka vandan,
Hum phailaayen har oar sakaraatmakta ka spandan.

Guruji ne dee hai ye zindagaani,
Hamaara bhalaa karne waali bani,
Simran kee saugat suhaani,
Unkee sab par hai itnee meharbaani.

Is se mil rahi hai jo adhyatmik taakat,
Uss se hum karein Guruji ke hukm kee hifazat,
Saath mein Unmein basey Ish kee ibadat,
Aur jeevan mein saralta ka swaagat.

Sukhi jeevan kee jo hai paribhaasha,
Usmein samaayi hai anand kee abhilaasha,
Jyotirmay jeevan kee jigyaasa,
Aajeevan aman kee asha.

Jabb ek oar hogi nirmal nadar Guruji kee,
Aur doosri oar hoga hamaara sachchaa prayaas,
Toh hamaari asha aur abhilaasha na rahegi adhoori,
Aur jyotirmay jeevan kee tamanna ho jaayegi poori.

Zindagi mein dinacharya par hoga akhandataa ka asar,
Jiske spandan kee kirnein phaylengi idhar udhar,
Hum sab prayaas karenge toh saara jagg jaayega sudhar,
Aur Guruji kee kripa se zaroor safal hoga ye safar.

Aayiye, bhavishya kee is hakeekat par se kalpana ka kavach utaarein,
Aayiye sab koshish karein ki swayam ko sudhaarein,
Jabb sakaraatmakta kee sugandh se mehekega ye jahaan,
Toh kalyuga kee har vipda bann jaayegi ateet kee dastaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 16, 2020

Om Namaha Shivaya
Aaj Ka Suvichaar 🙏🏻🙏🏻 # 1032

            Is Naam Kee Badaulat

Bharee bheed se banaa hai yeh zamaana,
Lagaa hee rahega yahaan logon ka aana jaana,
Bahut kumm ne hai sachcha saath nibhaana,
Ve hee Hain laukik rishton ka khaas khazaana.

Tu maanta chal Guruji ka bhaana,
Isee ne jeevan mein kaam hai aana,
Chaahe pade tujhe aansoo bahaana,
Phir bhi is se toone hai tarr jaana.

Safal kar le tu apna is jahaan mein aana,
Taaki antt vale mein na pade tujhe pachhtaana.
Guruji ke naam ko banaa le tu apna aashiyana,
Is naam ke ashish se sanvar jaayega har janam ka fasaana.

Kyunki jitnee baar bhi tujhe hai is jeevan mein aana,
Guruji ke is naam ne hee tujhe moksh takk hai pahunchaana,
Isliye na dhoondh naam ko bhoolne ka koi bhi bahaana,
Is naam kee badaulat tujhe meetha lagega Guruji ka har bhaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 15, 2020

Om Namaha Shivaya
Aaj Ka Suvichaar 🙏🏻🙏🏻 # 1031

Jitna Bhi Shukrana Karein Guruji Ka

Guruji toh sab par meharbaan Hain,
Is sach se koi nahin anjaan hai,
Unke bhakton se bharaa hua saara jahaan hai,
Aur har bhakt kee apni anokhi daastaan hai.

Kisee ke liye meet, kisee ke liye naath,
Guruji har pal Hain sabke saath,
Bhakt kar sakte hain Unse har baat,
Aur sabpar hoti hai Unke ashirwaad kee barsaat.

Bigde kaam banaate Hain,
Har haal mein jeena sikhaate Hain,
Patit ko paawan banaate Hain,
Bhoole ko raah dikhaate Hain.

Kisee ke liye murshid, kisee ke liye bhraata,
Sabke saath Unka hai ek khaas naata,
Jo shraddhaalu Unke charnon mein aata hai,
Veh nishchay hee apna kalyaan karva jaata hai.

Koi vehem nahin, koi sakht niyam nahin,
Kewal anushaasan aur sabke sangg pyaar,
Satsang mein shaant hokar sunn-ni hai gurbani,
Aur Shukrana karna hai baarambaar.

Koi chadhaava nahin, koi dikhaawa nahin,
Kewal sarvsamarpan karna hai rakh kar mann mein vishwaas,
Uddhaar karte Hain poori tarehn se,
Sabse pehle Guruji bakshte Hain shwaas.

Jeevan daan ke baad sehat kee aati hai baari,
Guruji kumm ya duur karte Hain beemari,
Swaasthya honei lagta hai behtar,
Kalyaankaari hai Unka dayaalu dar.

Lekin, kalyaan karte samay,
Guruji karmon ka bhugtaan karaate Hain zaroor,
Aur kyunki moksh praapti ke liye karmon ka bhaar halka karna anivaarya hai,
Isliye karmon ke aagey kabhi kabhi Guruji bhi ho jaate Hain majboor.

Phir bhi adhiktar karam swayam par lekar,
Hamein kumm se kumm kashton ka bhugtaan dekar,
Hamaari kitnee madad karte Hain Guruji,
Aur karmon ka bojh kumm karte Hain Guruji.

Is paar se uss paar le jaate samay bhi,
Guruji Apni mamta ke aanchal mein Hain sambhaalte,
Jabb takk moksh kee praapti na ho jaaye,
Ve hamein sudhaarte huey har janam mein Hain taarte.

Isliye aayiye, mann mandir mein sajaayein simran ke suron kee sargam,
Guruji ke kiye ehsaanon ko kabhi bhi na bhoolein hum,
Unhee kee kripa se hee toh saans le rahein hain hum har dumm,
Sach mein, jitna bhi Shukrana karein Guruji ka, vo hai kumm.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 14, 2020

Om Namaha Shivaya
Aaj Ka Suvichaar 🙏🏻🙏🏻 # 1030

Jabb Se Yahaan Par Bulaaya Hai Aapne

Pyaare Guruji,

Aapke dar par jabb pehli baar aa rahe thei,
Toh na maalum thaa ki kya paayenge,
Aapke dar par aakar ye jaana humne,
Ki bin maange hee sab paa jaayenge.

Yahaan kehne kee koi zaroorat nahin,
Yahaan shubh kaaj ke liye koi mahoorat nahin,
Yahaan niswaarth pyaar ka sabse bada ohda hai,
Yahaan hota nahin koi bhi sauda hai.

Yahaan gunah maaf ho jaate hain,
Buss, neeyat honi chahiye sachchi,
Yahaan bin kahey bhakt sab kuch paate hain,
Buss, bhavna honi chahiye achchi.

Yahaan niswaarth sewa ka bada mahatva hai,
Yahaan simran karna hamaara karvatya hai,
Yahaan Aapki mahima ka hota hai bakhaan,
Yahaan sab karte hain Aapka gungaan.

Is dar par koi na ameer hai na gareeb,
Is dar par Aap Hain sabke kareeb,
Yahaan sunvaayi hoti hai sabke manobhaav kee,
Yahaan davaa miltee hai har ghaav kee.

Yahaan jo aata hai khali jholi lekar,
Veh maalaamaal hokar yahaan se jaata hai,
Jisko jaise dhan kee ichchaa hoti hai,
Veh vaisa hee dhan yahaan paata hai.

Jo maangta hai paise aur heere jawaaharaat,

ya phir chaahta hai hona mashhoor,
Usey Aap veh sab dete Hain zaroor.
Jo chaahta hai naukari aur ghar,
Usey milta hai veh bhi is dar par.

Lekin, jo Aap par deta hai chod,
Ki Aap dein jo Aapko lagta hai theek,
Usey kabhi bhi Aapse,
Maangni nahin padti bheekh.

Kyunki uchit samay aane par,
Aap dete Hain usey sab,
Uska adhoorapan poora kar dete Hain,
Aap Hain mata, pita, aur Rabb.

Vahee sabse achchaa dhansangreh hai,
Jo Aap swayam dete Hain,
Varna toh kitne anuchit padaarth,
Hum vyarth mein ekatrit kar lete hain.

Lekin, Aapka diya hua sab kuch,
Sach mein hota hai kalyaankaari,
Sabse badi saugat hai ruhaani gyan,
Jiskee prerna se beet paaye ye umr saari.

Is prerna se samajh aane lagta hai,
Ki har bhautik dhan hai vyarth,
Bhakti, gyan, bairaag kya hai,
Samajh aane lagta hai inka arth.

Guruji, aisee kripa keejiye,
Ki Aapke dar par hum saarthakta ko paayein,
Gyan, bhakti, bairaag ke sahaare,
Aapki karuna se hum tarr jaayein.

Bhalaa keejiye hamaara, aye daata,
Aapke dar ke alaawa nahin hai aur koi bhi dar,
Jab se yahaan par bulaaya Hai Aapne,
Yahee hamein lagta hai abb apna ghar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 13, 2020

Om Namaha Shivaya
Aaj Ka Suvichaar 🙏🏻🙏🏻 # 1029

                 Jaisa Bhi Ho Safar

Ruhaani safar shuru hua hai,
Guruji kee rehanumai mein,
Anubhav behtareen hai aise,
Jaise Khuda kee khudaayee mein.

Ek nazar Guruji kee,
Aur baras jaati hai mehar,
Ek ishaara Unka,
Aur uday hoti hai seher.

Ek hamaari shraddha,
Dooja hamaara vishwaas,
Saath mein ho samarpan,
Aur prem se bhara har shwaas.

Na shikva, na shikaayat,
Buss, imaandaari aur ibadat,
Chaahe dard ho ya ho koi dukh,
Saath hai sadbhaav ka meetha sukh.

Lekin sabse badi baat ye hai,
Ki Unhonei hamein sweekaar liya,
Itnee khaamiyaan hum mein hain, phir bhi,
Unhonei har pal hai pyaar diya.

Kahein Guruji ya kahein Khuda,
Na Hain Ve ek dooje se juda,
Qadr e mutaliq kee nigraani mein hain bande sabb,
Sabko har waqt dekhta hai Vo Rabb.

Ek hukm Guruji ka,
Aur hamaara jhuka hua sir,
Ek chhoti si jageh Unke charnon mein,
Na rahey koi aur tamanna phir.

Imaandaari se karein Unkee ibadat,
Unke har hukm kee karein hifaazat,
Safar hai ye viraane se lekar aashiyaane takk ka,
Raasta hai ye samarpan aur aman ka.

Yahaan paison ko koi mol nahin,
Yahaan buss bhaav chaahiye sahi,
Nek ho neeyat aur iraada ho sachchaa,
Toh jaisa bhi ho safar, veh laagega achchaa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 12, 2020

Om Namaha Shivaya
Aaj Ka Suvichaar 🙏🏻🙏🏻 # 1028

        Kar Lo Maan

Kar lo maan ruhaaniyat ka,
Kar lo maan insaaniyat ka,
Kar lo maan insaniyat aur ruhaaniyat dene waale Parwardigaar ka,
Kar lo maan Guruji ka jinmein basaa hai deedar Paalanhaar ka.

Na karo dikhaawe kee milaavat is maan mein,
Na chodo koi bhi kasar is maan ke sammaan mein,
Guruji ne sharan mein liya hai vahee sabse anmol uphaar hai,
Maan kar ke maan lo jo Guru keh raha baar baar hai.

Bande bano, changey kaam karo,
Guruji se pyaar karo, na ki daraao aur daro,
Kisee ka bhalaa kar sakte ho toh karo zaroor,
Kisee ka bura na karo aur na karo kabhi bhi guroor.

Maan kar lo Guruji ke naam ka,
Kar lo simran baarambaar,
Niswaarth sewa karte raho,
Paa lo Guruji ka pyaar.

Guruji ko har baat ka gyan hai,
Unhe maalum hai kahaan hum sabka dhyan hai,
Isliye kar lo divyataa aur ruhaaniyat ka dhyan,
Kar lo Khuda aur Guru aur insaaniyat ka maan.

Guruji ne diya hai jo naam ka daan,
Ismein basaa hai Guruji ka gungaan,
Isliye kar lo is gungaan ka sammaan,
Aur poora karo Guruji kee mahima karne ka armaan.

Guruji kee mahima karne se hoga kalyaan,
Isee se aayegi antar mann par muskaan,
Isee par nirbhar hai saara jahaan,
Kyunki Guruji swayam Hain MahaShiv Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja