Month: January 2021

January 31, 2021

Om Namaha Shivaya
Aaj Ka Suvichaar 🙏🏻🙏🏻 # 1078

              Poori Kaayinaat Mein

Guruji ka darbar bada sundar hai,
Jis dil mein Hain Guruji veh dil mandir hai,
Jab mann mein Guru bhakti kee hai kalee khilee,
Phir kyun tu ghoomta hai dar dar gali gali?

Guruji mein dhyan lagaa le,
Guruji mein vishwaas jagaa le,
Guruji mein mann ko ramaa le,
Guru naam ka dhan tu kamaa le.

Baaki sab hai mithya moh maya,
Yeh jagg kisee ke kaam na aaya,
Yahaan har koi aur sab kuch hai paraaya,
Aaj nahin toh kal sabko ye samajh mein hai aaya.

Isliye jo tera apna hai Uspar dhyan de,
Guruji Hain tere apne Unhe maan de,
Unhonei naam ka daan diya hai,
Toone uss naam ka amritpaan kiya hai.

Abb uss amrit kee pavitrataa mein vaas kar,
Ek Guruji tere apne Hain Unpar vishwaas kar,
Unke simran se tu har shwaas bhar,
Aur roam roam mein ruhaaniyat ka ehsaas kar.

Unse jud gaya hai tu, yeh koi itefaaq nahin,
Yeh toh hai Guruji kee dee hui daat,
Guruji kee kripa kshanabhangur nahin,
Yeh toh hoti hai anant saugat.

Isliye duniya mein reh, lekin duniyadaari ko apne bheetar na tu rehne de,
Guru praapti ke apne uddeshya par dhyan de, jo koi bhi kuch kehta hai usey kehne de,
Bahut khushkismati hai teri ki Guruji ne tujhe hai sweekaara,
Poori kaayinaat mein kaheen na milega tujhe Guru itna pyaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 30, 2021

Om Namaha Shivaya
Aaj Ka Suvichaar 🙏🏻🙏🏻 # 1077

                  Ghabraa Matt

Ghabraa matt, buss, yoon hee chalta chal,
Jaisi bhi hon jeevan kee raahein,
Na bebasi mein tu haath mal,
Guruji ne bahut itminaan se thaami hain teri baahein.

Tujhe chhoone se pehle har vipda ko,
Guruji ka saamna karna padega,
Tera Guru sadaa teri raksha ke liye,
Har chunauti se tujhse bhi pehle ladega.

Phir tujhe kumm se kumm kasht sehna pade,
Isliye Ve tujhe thoda sa hee honei denge kasht,
Aur uss dauran bhi Ve saath hongei,
Aur baaki saare kasht kar denge nasht.

Isliye chod de poochhna Unse tu sawaal,
Unpar chod dega toh Ve hee sambhaalenge tera haal,
Baney Hain sadaa aur aagey bhi banenge Ve teri dhaal,
Ve MahaShiv Hain, ek Unhee se darta hai kaal.

Guruji Hain mahaan aur sarvshaktimaan,
Unke samaksh jhuka hai ye saara jahaan,
Tere saath Hain khud Guru ke roop mein Bhagwaan,
Tera toh baal bhi nahin baanka kar sakega koi tufaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 29, 2021

Om Namaha Shivaya
Aaj Ka Suvichaar 🙏🏻🙏🏻 # 1076

Keh Dena Sachche Dil Se Om Namaha Shivaya

Jabb andhere vash kuch bhi nazar na aaye,
Jabb har ve loag jo apne thei lagne lagein paraaye,
Jabb tere dil kee baat koi aur samajh na paaye,
Toh keh dena sachche dil se Om Namaha Shivaya.

Jabb tujhe kisee uljhan kee suljhan samajh na aaye,
Jabb kabhi samasya ka samaadhaan na mil paaye,
Jabb waqt kee raftaar ke beech tera haunsla toot jaaye,
Toh keh dena sachche dil se Om Namaha Shivaya.

Jabb roag kee peeda aur dukh sehna mushkil ho jaaye,
Jabb niraasha ke baadalon mein ummeed ka chaand chhup jaaye,
Jabb sooraj kee kiran tere dar aane se katraaye,
Toh keh dena sachche dil se Om Namaha Shivaya.

Jabb taqdeer tujhe raasta na dikhaaye,
Jabb duniyadari tere dil ko chot pahunchaaye,
Jabb tera mann sanshay se ghabraaye,
Toh keh dena sachche dil se Om Namaha Shivaya.

Jabb kabhi tera vishwaas dagamagaaye,
Jabb kabhi teri shraddha sharmaaye,
Jabb tera dheeraj hee adheer ho jaaye,
Toh keh dena sachche dil se Om Namaha Shivaya.

Har uljhan kee suljhan hai,
Har samasya ka samaadhaan hai,
Guruji ne tujhe yeh sikhaaya hai,
Phir tu abb bhi kyun pareshaan hai?

Om Namaha Shivaya ka japp karte rehne se,
Tera drishtikon, tera nazariya jaayega sudhar,
Jidhar bhi modein Guruji tere jeevan kee naiya,
Tu shikaayat chod kar shukrana karte huey chal de udhar.

Om Namaha Shivaya ke japp mein,
Samaaya hai MahaShiv Guruji ka vardaan,
Om Namaha Shivaya ke japp se,
Shareer aur atma, dono ka hai kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 28, 2021

Om Namaha Shivaya
Aaj Ka Suvichaar 🙏🏻🙏🏻 # 1075

    Jabb Se Lagan Laagee

Jabb se lagan laagee,
Guruji ke naam kee,
Jabb se honei lagi chaahat,
Guruji ke dhaam kee,

Tabb se jeevan hee badalne lagaa,
Har vyarth khayaal mann se nikalne lagaa,
Jabb kabhi aane bhi lagta hai dobaara,
Toh bandd paata hai veh mann ka dwaara.

Sud budh sab kho gayi,
Guruji kee jabb se mai ho gayi.
Kabhi sotey sotey jaagi,
Toh kabhi jaagte huey hee so gayi.

Unhee ke sundar vichaaron mein,
Vyast hokar mai rehne lagi,
Unkee ruhaniyat se mehekti leheron ke sangg,
Mastt hokar mai behne lagi.

Mere jeevan ke din beet-te jaa rahe hain,
Guruji ke sahaare dukh aur sukh sab sahe hain,
Mere sukh aur mere dukh bhi Unhee kee nigraani mein hain,
Kyunki Guruji meri zindagaani ke pal pal kee kahaani mein Hain.

Na Unke bin ye deh hai, na hee hai yeh atma,
Ve Hain mere param pita, Ve hee Hain Paramatama,
Unhee kee nadar se atma tayy karti rahegi har safar,
Jabb takk veh pahunch na jaaye mukti ke dar par.

Tabb takk jeevanmukt honei ka vardaan de deejiye Guruji,
Apne se sadaa jude rehne ka daan de deejiye Guruji,
Aap hee mehar ke maalik Hain, Aap hee Hain mera vishwaas,
Aapse hee mera har shwaas hai, aur Aapka hee hai har shwaas mein vaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 27, 2021

Om Namaha Shivaya
Aaj Ka Suvichaar 🙏🏻🙏🏻 # 1074

             Kaheen Bhi, Kabhi Bhi

Kaheen bhi, kabhi bhi,
Guruji se tu baat kar,
Toh Ve sunenge, sunenge zaroor.
Tujhe bulaana bhi na padega,
Kyunki Ve kabhi gaye hee nahin tujhse duur.

Tere bheetar aur tere aaspaas,
Shudh karte huey tera har shwaas,
Tujhe har pal ashirwaad dete huey,
Teri vipda apne oopar lete huey,
Ve har kshan Hain saath tere,
Jabb takk tu le raha hai jeevan ke phere.

Tu hameshaan apne baare mein kehta rehta hai,
Jab ki tera Guru tere liye sab sehta hai.
Kabhi pyaar se Unhe keh de tu,
Ki tu kritagya hai, Unka aabhaari hai,
Kabhi toh Unhe keh de,
Ki Unkee muskaan bahut hee pyaari hai.

Unkee taareef kar, Unhe dhanyawaad kar,
Sabr se Unke sangg samvaad kar,
Kuch suna de Unhe, kuch sunn le Unkee,
Pehchaan kar le tu Unkee divyata kee dhun kee.

Itnee aasaani se tu sabse kehta phirta hai,
Ki Guruji sabke adhiktar kasht swayam par le lete Hain,
Kabhi toh Guruji ke baare mein bhi soch,
Ki khud takleef jhel kar kaise sabko sukh Ve dete Hain.

Kabhi toh Unse savinay anurodh kar dena,
Ki Guruji, Aap meri beemaari apne par na lena,
Guruji ko lagey toh sahi ki toone jo kiya iska zikr,
Toh kaheen na kaheen tere dil mein Unkee bhi hai fikr.

Ek janam ka nahin, Guruji ke sangg hai bhakton ka,
Janam-janmaantar ka naata,
Toone jo yeh jeevan paaya hai,
Yeh bhi Unkee mehar ke bina tu kabhi na paata.

Isliye chaahe tujhe kuch bhi pade sehna,
Unkee kripa se tu sadaa Unse jude rehna.
Jeevanmukt karenge tujhe aur aagey Sachkhand takk lekar jaayenge,
Jabb bhi aayegi teri baari,
Isliye Unke sangg rishta gehra kar le,
Aur karta chal tu Sachkhand jaane kee tayyaari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 26, 2021

Om Namaha Shivaya
Aaj Ka Suvichaar 🙏🏻🙏🏻 # 1073

         Dhan Baba Deep Singh Ji

Amritsar ke Pahuwind gaaon mein roshan hua ek diya,
Jabb 26 January, 1682 mein Baba Deep Singh ji ne janam liya.
Ve janme Mata Jiooni aur pita Bhagtaa ke ghar mein,
Aur Unkee taqdeer badli Guru Gobind Singhji ke dar ne.

18 saal kee umar mein gaye Ve Anandpur
Sahib,
Jahaan Unhe praapt huey dasham pita ke darshan,
Amritpaan ka saubhaagya mila Unhe,
Aur kiya Unhonei sadaachaari ko apna sab kuch arpan.

Gurbani ke adhyayan se huey sagun,
Shastra ke sanchaalan mein huey nipun,
Sikh dharma ka Unhonei kiya prachaar,
Aur yuva peedi par hua Unka bahut prabhaav.

Faarsi, Arbi, Gurmukhi aur Sanskrit,
Inke alaawa bhi aur bhaashaaon ka thaa Unhe gyan,
Sant aur sipahi, aur vidvaan ke gunn thei Unmein,
Poore vishwa mein aaj bhi roshan hai Unka naam.

Tayyaar kee Unhonei Guru Granth Sahib kee beed,
Talwandi saabo mein Bhai Mani Singh ke saath,
Shaheed misl ka netritva sambhaala,
Ahmad Durrani kee changul se bandhiyon ko nikaala.

Jab Durrani ne Harmandir Sahib ka vidhwans karna chaaha,
Baba Deep Singh ji ko bhakti se milee aparampaar shakti,
Unka khanda thaa 15 kilo se bhi zyada bhaari,
Sir bhi kataa Unka, lekin Unhonei himmat nahin haari.

Unhonei apna sees ka de diya balidaan,
Aur Harmandir Sahib ko bachaane ke liye tyaag diye apne praan,
Jahaan par hua Baba Deep Singh ke paartheev shareer ka daah sanskaar,
Vahaan banaa Gurudwaara Shaheed Ganj Sahib Guruon ka dwaar.

Itihaas ke pannon mein,
Sunehre aksharon mein hai Baba Deep Singh ji ka naam,
Amritsar ka Gurudwaara Shaheed Ganj Sahib,
Unhee ke mahaatmay se banaa divya dhaam.

Aaj Baba Deep Singh ji kee 339vee salagirah par,
Guruji ne Unkee mahima ke baare mein hai likhwaaya,
Dhan Baba Deep Singh kee shahaadat ke itihaas se,
Hamein bhakti mein shakti ka mahaan udaaharan dikhaaya.

Baba Deep Singh Ji ka sadaa roshan rahega naam,
Sikhaaya Unhonei ki zaroori hai surakshit rakhna atma-sammaan,
Unke tyaag se mila sainkdon ko jeevan daan,
Unkee bahaduri aur Unkee ataltaa ko baarambaar pranaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 25, 2021

Om Namaha Shivaya
Aaj Ka Suvichaar 🙏🏻🙏🏻 # 1072

Guruji Se Tu Pyaar Kar

Guruji se tu pyaar kar,
Guruji par aitbaar kar,
Is pyaar aur aitbaar ka ikraar kar.

Guruji ka gungaan kar,
Guruji ka tu maan kar,
Unke kehne par gupt daan kar.

Guruji par vishwaas rakh,
Guru charnon mein har shwaas rakh,
Unkee maujoodagi ka ehsaas rakh.

Guruji ko tu naman kar,
Guruji ka tu manan kar,
Unkee mahima ka tu shravan kar.

Guruji ka gupt paath kar,
Guruji se tu baat kar,
Unse baat tu din raat kar.

Guruji ke ashish se sewa kar niswaarth,
Guruji ke simran mein paa le tu gyan yathaarth,
Unkee sweekriti se sadaa reh kritaarth.

Guruji se hee har fariyaad kar,
Guruji se apne antarmann ko aabaad kar,
Apne mann ko maya ke bandhan se aazad kar.

Guruji ko yaad kar har pal,
Guruji ko yaad kar aaj aur kal,
Unkee kripa se badhaa le atma-bal.

Guruji se karta chal preet,
Guruji ko banaa le tu meet,
Unkee kripa se nibhaa le buss yahee reet.

Guruji ka tu darshan kar,
Guruji ko dukh sukh arpan kar,
Abb tu Unhe sarvsamarpan kar.

Guruji ka leta jaa naam,
Guruji pooran karenge har kaam,
Unhee ke naam mein khud hoja tu gumnaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 24, 2021

Om Namaha Shivaya
Aaj Ka Suvichaar 🙏🏻🙏🏻 # 1071

         Bagiya Ka Laal Gulaab

Chal rahi thi mai bagiya mein,
Phoolon kee kyaariyan thee aas paas,
Khushboo vahaan itnee aa rahi thi,
Poora poora thaa vahaan Guruji ke honei ka ehsaas.

Phool thei uss bagiya mein itne pyaare,
Hawaa ke jhonkon ke sangg thei ve jhoom rahe,
Itnee khushiyaan baant rahe thei aaspaas,
Jaise jaise ik dooje ko ve thei choom rahe.

Bhinn bhinn thei rangg unke,
Bhinn bhinn thaa unka roop,
Lekin unhe dekh kar lag raha thaa aise,
Jaise sab mein hai Guruji ka swaroop.

Tabhi nazar padi ek laal gulab par,
Lagaa ki usspar Guruji kee chhavi hai anokhe roop se chhaayee,
Guruji ka naam lekar mai uss gulab ke paas baithi,
Aur jo dikha mujhe, usey dekh mai turant muskuraayee.

Phool kee thi itnee komal pankhudiyaan,
Jo kar rahin thi Guruji ko apna saundarya arpan,
Mainey pankhudiyon ko kareeb se dekha,
Guruji kee mehar se itne sundar thei Unke darshan.

Pankhudiyon par dikhey ek divya charan aur haath,
Mai toh bhaav vibhor hokar baith gayi uss phool ke saath.
Itne pyaare sanket se Guruji ne apne paas bithaaya,
Yeh soch kar prem bhaav se mera toh dil bhar aaya.

Sabse praveen aur nipun chitrakaar bhi,
Nahin kar sakta itnee divya rachna,
Guruji ke is ashish ko paakar,
Unke gungaan mein ramm gayi meri rasna.

Phool ko shukriya kiya mainey,
Jisne apni pankhudiyon mein Guruji ka deedar karaaya,
Jabb mann kee aankhon se dekha mainey,
Toh aur bhakton ka muskuraata chehra bhi nazar aaya.

Isliye Guruji ko kar ke naman,
Karti rahi Unhee ka manan,
Kya maalum koi aur bhakt aa jaaye vaheen,
Yeh soch kar mainey phool ko toda nahin.

Jo bhi dekhey uss phool ko,
Usey Guruji ka deedar ho jaaye,
Guruji se yeh vinamr vinti kee mainey,
Mere nayyn prem ke ashru se bhar aaye.

Guruji ke darshan dene ke tareeke hain kayee hazaar,
MahaShiv Hain isliye Hain Ve saakaar aur niraakaar,
Sabse pyaare darshan vo jo bhakton kee antaratma mein hain baste,
Vahaan poojya Guruji hamaare saath mein rotey Hain aur saath mein Hain hanste.

Na bhi dikhein kabhi ya kaheen par,
Ve hamaare mann mein karein basar,
Hum dekh sakein ya nahin Guruji ko,
Unkee hum sab par hai har pal nazar.

In sabb baaton ko sochte sochte,
Mai ghar kee oar chali,
Narmi thi akash mein,
Aur din kee dhoop dhali.

Guruji ka ashirwaad sab par banaa rahe sadaa,
Yahee dua karte huey ghar aayi mai,
Sach mein veh sabse mangal pal thaa mere jeevan ka,
Jabb param poojya Guruji ke dar par aayi mai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 23, 2021

Om Namaha Shivaya
Aaj Ka Suvichaar 🙏🏻🙏🏻 # 1070

Sabr Kee Jeet Ka Jashn

Jabb sabr tootne lagey,
Jabb asha chhootne lagey,
Toh lekar ek gehri shwaas,
Guruji kee maujoodagi ka kar ehsaas,
Aur keh de tu sabr se,
Ki veh khud bhi thoda sabr karey.

Yeh sabr ka bhi hai imtehaan,
Ki usey Guruji kee hai kitnee pehchaan,
Kyunki agar usey hoga zara bhi anumaan,
Ki Guruji swayam hee Hain Bhagwaan,
Toh veh Unke aagey jhuk jaayega,
Aur veh tootne se ruk jaayega.

Sabr rahega tere saath tere afsaane mein,
Na phansaayega tujhe kisee bhi bahaane mein,
Tu shraddha kee dori se sabr ka sehra baandh kar chalna,
Chaahe kuch pal ke liye tujhe padey haalaat kee vajeh se dhalna.

Phir jaise har suryaast ke pashchaat sooraj uday hota hai,
Jaise himmat wala insaan apna saara bhayy khota hai,
Vaise hee tu sabr ke sehre se hokar vibhooshit,
Bina huey kisee durvichaar se dooshit,
Bhakti kee naav mein ho jaana savaar,
Prem ke bhaav ka kar lena ikraar.

Guruji hongei maajhi teri bhakti kee naav ke,
Ve vaakif Hain teri divyataa kee chaah se,
Unke haathon mein hogi sadaa naav kee patvaar,
Kabhi na chodenge Ve tujhe beech majdhaar.

Sabr ka meetha phal zaroor milega,
Aaj nahin toh kal zaroor milega,
Guruji ko fakr hoga tere is sabr par,
Ve tere sangg hongei sabr kee jeet ke jashn par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 22, 2021

Om Namaha Shivaya
Aaj Ka Suvichaar 🙏🏻🙏🏻 # 1069

             Protsaahan Aur Pyaar

Protsaahan aur pyaar,
Dilaasa aur dulaar,
Bhakton ko dete Hain Guruji,
Maayusi aur museebat,
Dukh aur dikkat,
Bhakton kee le lete Hain Guruji.

Nirbaltaa aur niraasha,
Sabki duur karte Hain Guruji,
Vehem aur ahem,
Sabka chuur karte Hain Guruji.

Muskaan aur mamta,
Guruji ke chehre par khilti hai,
Kshamaa aur kshamtaa,
Guruji ke pehre se milti hai.

Insaaniyat aur ibaadat,
Guruji sikhaate Hain,
Zindagi aur zulm se zamaanat,
Guruji dilaate Hain.

Simran aur sewa kee saugat,
Guruji se praapt hoti hai,
Samarpan aur satsang,
Ye bhi Guruji kee daat hoti hai.

Vishwaas bhara vandan,
Guruji ka hum karein,
Bandagi ka bandhan,
Guruji se hum rakhein.

Har shwaas mein Shukrana,
Guruji ka hum maanein,
Har ehsaas mein ehsaan,
Guruji ka hum pehchaanein.

Noorani aur nirmal,
Guruji Hain itne nyaare,
Sowmya aur saral,
Guruji Hain Bhagwaan hamaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja