Month: January 2021

January 21, 2021

Om Namaha Shivaya
Aaj Ka Suvichaar 🙏🏻🙏🏻 # 1068

           Haalaat Kee Kahaani

Na doojon kee khushi se tu jal,
Balki khush ho doojon ke sukh se,
Guruji tere sangg bhi hameshaan Hain,
Isliye na ghabraa tu apne dukh se.

Kisee ke vash mein nahin koi bhi pal,
Koi nahin bachtaa haalaat ke rukh se,
Buss, koi bhi nakaraatmak baat,
Na tu soch, na hee bol apne mukh se.

Mausam bhi toh rehte hain badalte,
Hum apni oar se samanjan hain karte,
Apne chayyn ka zyaada prabandh karte hain garmi mein,
Lekin kumm karna padta hai vasant ritu kee narmi mein.

Patjhad ho ya jabb ho jaada,
Ya phir tufaan se mausam ho maada,
Toh aur bhi zyaada karte hain intazaam,
Yeh jaan kar ki har mausam hai kuch samay ka mehmaan.

Aisee hee hai haalaat kee kahaani,
Kabhi ek see nahin rehti kisee kee bhi zindagaani,
Isliye apne sukh mein bhi na itraayein,
Na hee dukh mein hum ghabraayein.

Karam bhoomi hai ye saara sansaar,
Kisee ka ek jaisa nahin hota hai safar,
Buss Guruji ka milta rahey pyaar,
Toh har haalaat mein mumkin hai basar.

Guruji kee mehar toh barasti rahegi,
Is tathya par sabka vishwaas ho atal,
Har koi doojon ke liye changaa soche,
Toh vaayu ka spandan rahe kitna prabal.

Guruji ke har bhakt ka,
Sakaraatmakta se mehekey shwaas,
Saari kee saari sarbat ka bhalaa ho,
Abb yahee hai Guruji se ardaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 20, 2021

Om Namaha Shivaya
Aaj Ka Suvichaar 🙏🏻🙏🏻 # 1067

Guru Gobind Singh Ji Ka Prakash Diwas

Mata Gujri aur Guru Tegh Bahadur ne,
December 22, 1666 mein ek divya baalak ko janam diya,
Baad mein Ve kehlaaye Guru Gobind Singh Ji,
Jinhonei Apne mata pita ka naam roshan kiya.

Patna mein thei janme,
Ye poojya dusvein Sikh Guru,
Apne pita ke deh tyaagne ka baad,
Unkee guruyaayee hui shuru.

Unka naam rakha gaya thaa Gobind Rai,
Niyati ne Unhe nau varsh kee aayu mein Guru diya banaaye,
Mahatva diya Unhonei samaanta aur sadaachaari ko,
Apne protsaahan se duur kiya kitnon kee laachaari ko.

Khalsa ka kiya Guru Gobind Singh ji ne sootrapaat,
Ruhaani anushaasan kee Unhonei kee shuruaat,
1699 mein Guru Gobind Singh Ji ne kar diya ailaan,
Ki Khalsa ke hongei kanga, kara, kachchera, kesh, aur kirpaan.

Anyaaya ke khilaaf uthaayee Unhonei awaaz,
Kartavyaparaayanta ka paath sikhaaya khaas,
Kavi bhi thei Ve, aur thei yoddha aur tatvavyaani,
Sarbat ke uddhaar ke liye jiye Ve Apni zindagaani.

1705 ke yuddh mein Unke do putr maare gaye,
Aur baaki do putron ne maut ko galey lagaaya,
Apne siddhaanton par atal rehkar,
Unhonei sangat ko jeene ka raasta dikhaaya.

Apna shareer chodne se pehle,
Unhonei ghoshna kee thi ki Guru Granth Sahib sadaa ke liye Hain sikhon ke Guru,
Tabb se hee in granth ko Guru maan lene kee,
Parampoojya prathaa hui shuru.

Jabb takk Ve shaareerik roop mein thei, Unhonei samaaj sudhaar mein bhaag liya,
Jabb 1708 ke October kee saat taareek aayi,
Guru Gobind Singh ne Apni deh ko tyaag diya.

Hum sabb bahut bhaagyashaali hain,
Jinhonei Guru kee sharan paayi hai,
Hamaare pyaare Guruji ne bhi,
Gurbani sunn-ni sikhaayee hai.

Guruji ka simran karte huey,
Gurbani sunte jaayein hum,
Gupt sewa, gupt paath, gupt daan karein,
Aur Guruji ka ashish paayein hum.

Saari sangat ko Guru Gobind Singh Ji ke Prakash Purab kee,
Bahut bahut badhaayee,
Aayiye hum sab prem aur shraddha se karein,
Apne pyaare Guru kee vadiyaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 19, 2021

Om Namaha Shivaya
Aaj Ka Suvichaar 🙏🏻🙏🏻 # 1066

Mukti Takk Pahunchne Kee Tarkeeb

Jaisa bhi kisee ko dete hain, vaisa hee laut kar aata hai,
Chaahe vo jhootha ho ya ho sachha,
Toh phir kyun na sabke liye achchi soch hum dein,
Taaki jo laut kar aaye vo bhi ho achcha?

Kyunki jo laut kar aayega hamaare paas,
Usey toh hamein hee bhugatnaa hai,
Phir chaahe vo ho soch ya phir ho karam,
Kyun na mein nibhaayein shuddhi ka dharam?

Pichhle janmon ke karmon par hamaara nahin hai zoar,
Lekin hum sambhaal sakte hain is janam ke karmon kee toad-madod,
Guruji kee dikhaayee raah par chal kar,
Taaki na pachhtaana padey haath mal kar.

Yeh dharti gaol hai aur goal hai karmon ka chakkar,
Hisaab kewal Ishwar karna jaanein,
Phir kyun lein apne muqaddar se takkar,
Kyun na Guruji kee baat hum maanein.

Is Kalyuga ke maade waqt mein,
Jitna kar sakein, paath aur daan karein,
Karte rahein sewa, simran, aur vandan,
Sansaar mein phailaayein sakaaratmak spandan.

Vahee spandan hamaare paas bhi laut kar aayega,
Srishti ka har insaan tarr jaayega,
Ek baar mein mukti na bhi miley toh insaan mukti ke aayega kareeb,
Tarte jaana hee toh hai mukti takk pahunchne kee tarkeeb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 18, 2021

Om Namaha Shivaya
Aaj Ka Suvichaar 🙏🏻🙏🏻 # 1065

Jeene Ka Aa Jaaye Mazaa

Aamod se anandit awaaz se,
Shabad ke shaant aur sureele saaz se,
Pyaar bhari pooja kee pukaar se,
Imaandaari se Ibadat ke ikraar se,
Kar lein Guruji ka satsang,
Chadha lein khud par ruhaani rangg.

Oorja mein basaakar ummeed aur umangg,
Shraddha aur saboori ke sangg,
Mann aur mukh par sajaa kar muskaan,
Gaate huey Guruji ka gungaan,
Guruji se apne prem ka izhaar karein,
Ek baar nahin, baar baar karein.

Bhakti aur bhole bhaav se,
Chintan aur chaav se,
Bina kisee sanshay,
Tyaag kar har bhayy,
Kar lein Guruji kee sewa aur Unka simran,
Aur vaani se bhi kar lein vinti aur vandan.

Bin Khuda se kiye khudgarzi,
Maan kar Maalik kee marzi,
Saraah kar Unkee sukhad sharan,
Choom kar Unke chaaru charan,
Kar lein poojya Guruji ka shukriya,
Jinhonei hamein hai sweekar liya.

Dil mein dharaa ho divyata ka deep,
Sewa aur samarpan se Shivavataari hon sameep,
Taaranhaar ko banaayein aaradhya tapasya ka,
Shaant hokar saamna karein har samasya
ka.

Aur jo hum raazi rehna seekh jaayein usmein,
Jismein ho Guruji kee razaa,
Toh phir koi duvidha sazaa na lagey,
Aur jeene ka aa jaaye mazaa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 17, 2021

Om Namaha Shivaya
Aaj Ka Suvichaar 🙏🏻🙏🏻 # 1064

   Utaar Chadhaav

Jabb takk yeh maanav jeevan hai,
Utaar chadhaav toh yakeenan aayenge,
Kisee ke jeevan mein kumm, kisee ke jeevan mein zyada,
Kabhi dheere dheere, toh kabhi bin bataaye aayenge.

Karmon ka her pher keh lo isey,
Ya phir kismat ka hai ye lekha,
Hamein toh kuch bhi gyan nahin hai iska,
Lekin Guruji ne sadaa sab kuch hai dekha.

Uljhan ko sulajhaane ke liye jo hamaare vash mein hai veh kar lein hum zaroor,
Kyunki apni taraf se poori koshish karna hamaara farz hai,
Hamaare Parwardigaar Guruji Hain hamaare sangg,
Hamaare bin boley hamaari arzi Unke paas darj hai.

Burey vele mein bilkul na ghabraayein hum,
Na hee changey vele mein akad jaayein hum,
Jisne sab kuch diya Vo ek pal mein sab le bhi sakta hai, yeh rakhein yaad,
Isliye sadaa sumati paane kee karein Guruji se fariyaad.

Guruji ne jo hamein apnaaya hai,
Toh Ve hamaare saath chalenge,
Maade samay kee andheri raatein,
Aur kathor din zaroor talenge.

Sukh kee chandni raaton aur khushnuma dinon mein bhi,
Guruji ko yaad karna hamein bhool nahin hai jaana,
Nahin toh unn din aur raaton ko hamaari zindagi se,
Chale jaane ka kaheen mil na jaaye koi bahaana.

Har utaar chadhaav mein,
Guruji ke naam ka lekar sahaara,
Unse ardaas karein,
Ki Ve sambhaalein har kaaj hamaara.

Vintee karein Unse,
Ki hamaari buddhi kabhi na ho bhrasht,
Unpar se hamaara vishwaas kabhi na ho kumm,
Chaahe zindagi mein aayein sainkdon kasht.

Unke ashirwaad se paayein hum atma-bal,
Taaki mann sthir rahe har utaar chadhaav mein,
Unkee dee hui pareeksha chaahe jitnee bhi kathin ho,
Kabhi bhi kamee na ho hamaari shraddha ke bhaav mein.

Buss, phir saagar kee lehron kee bhaanti,
Utaar chadhaav aayenge aur jaayenge,
Hum par kripa karegi Guruji kee kanti,
Aur hum har anubhav se behtar insaan bann paayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 16, 2021

Om Namaha Shivaya
Aaj Ka Suvichaar 🙏🏻🙏🏻# 1063

         Tere Buss Ka Diya Hai Roag

Guruji ne tujhe tere buss ka diya hai roag
Ve sambhaalte Hain sab bhakton ke sanjog
Unka Shukrana karte huey tu isey bhog,
Chaahe jo bhi kahein, kehte rahein loag.

Unhonei toh pehle se adhiktar roag swayam par hai le liya,
Tujhe toh bahut kumm kar ke roag ko hai diya,
Kyunki Ve chaahte Hain tu bhi adaa kar le apna karz,
Taaki Unkee sharan mein poora ho jaaye tera farz.

Bhugtaane kee is bela mein,
Ek pal bhi tera saath na chodenge Guruji,
Har ummeed chaahe muh moad le,
Kabhi bhi tujhse muh na modenge Guruji.

Isliye chod kar chinta, tu kar le chintan,
Chod kar vaad vivaad, tu kar le vandan,
Kaayik roag ho ya ho maansik roag,
Sudhar aur sanvar jaayenge tere sanjog.

Isliye Guruji ko maatha le tu tek,
Aur Guruji kee leela tu dekh,
Unse na darr, Unhe pyaar kar,
Unse apni har soch ka ikraar kar.

Unkee kripa aur marzi se hee hoga ilaaj teri beemari ka,
Ve sambhaal lenge har haalaat teri laachaari ka,
Guruji kee nirmal nigraani hogi tere ilaaj par,
Tu buss bharosa rakh apne Guru, apne sartaj par.

Guruji MahaShiv Hain, Unka shravan kar,
Guruji Parampita Hain, Unhee ka tu manan kar,
Guruji kee mahima ka karta chal gungaan,
Na kar vyarth mein apne roag ka bakhaan.

Tu Unkee raza mein raazi hoga toh teri sehat bhi raazi ho jaayegi,
Is safar mein teri adhyaatmik chhavi bhi nikhar jaayegi,
Buss doob jaa tu Guru prem kee gehraayee mein,
Swayam ko kho de tu pyaare Guruji kee vadiyaayee mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 15, 2021

Om Namaha Shivaya
Aaj Ka Suvichaar 🙏🏻🙏🏻 # 1062

    Har Daat Ke Liye

Yeh sewa kee daat jo toone paayi hai,
Ismein Guruji kee vadiyaayee hai,
Jo chhavi tere bheetar aur tere aaspaas chhaayi hai,
Veh bhi Guruji kee karuna ne har oar sajaayee hai.

Guruji ka jo tu karta hai simran,
Veh bhi Unkee kripa se hota hai,
Veh amrit bhi Unkee dee hui bakhshish hai,
Jis se tu apne paap dhota hai.

Jab tu Guruji ke satsang mein hota hai,
Veh bhi Unse mila hua daan hai,
Samarpan bhi Unkee daya se hai mumkin,
Kyunki tera Guru bada meharbaan hai.

Jo mushkilein tujh takk pahunchne se pehle hee khatm ho jaati hain,
Ve bhi Guruji ke samaksh haar maankar jhuk jaati hain,
Jo uljhanein tujhe apne jaal mein phansaane lagti hain,
Ve bhi Guruji ke saamne sharm se apna chehra chhupaane lagti hain.

Har ann ka daana,
Har kasht ka aana aur jaana,
Har boond paani kee,
Har ghadi zindagaani kee,
Guruji kee tujh par ye mehar hai,
Jo tujh par hoti aathon pehar hai.

Unke ye sabb upkaar tu kabhi na bisraana,
Har pal har daat ke liye karta chal Unka shukrana,
Kya maalum kaise beetna thaa teri zindagi ka afsaana,
Ye toh Guruji kee mehar se bann gaya hai ek taral taraana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 14, 2021

Om Namaha Shivaya
Aaj Ka Suvichaar 🙏🏻🙏🏻 # 1061

Khushi Tujhe Rahi Hai Pukaar

Khushi tujhe rahi hai pukaar,
Abb kee baar tu na kar inkaar,
Guruji ke pyaar ka kar le tu ikraar,
Aur sweekaar le jo khushi aayi hai tere dwaar.

Kyunki Guruji kee mehar na hoti agar,
Toh yeh khushi bhi na aati tere ghar,
Isliye is se asantusht hokar shikaayat na kar,
Aur kal kya hoga uss soch se tu na darr.

Adrishya hoti hai Guruji kee shakti kayee baar,
Lekin Unkee maujoodagi ka kar deti hai veh izhaar,
Guruji se judna itefaaq nahin, hoti hai yeh Guruji kee dee hui daat,
Guruji kee kripa kshanabhangur nahin, balki hoti hai anant saugat.

Mann mein jhoomne de tu Guru prem kee jhankaar,
Ve Hain maalik, kinkar hai ye saara sansaar,
Hoti rahengi Guruji kee rehematein sainkdon hazaar,
Tu buss karta chal Unka shukrana baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 13, 2021

Om Namaha Shivaya
Aaj Ka Suvichaar 🙏🏻🙏🏻 # 1060

Manaa Lein Guruji Ke Sangg Lohri

Guruji kee pasand ke dhaagon se,
Sajaa lein hum bandagi kee dori,
Aao sangaton,
Aaj manaa lein Guruji ke sangg Lohri.

Ek ho sewa ka sundar dhaaga,
Jismein na ho swaarth kee koi bhi gaanth,
Gupt kar sakein toh aur bhi achcha hai,
Aur karne ke baad bhi rahein shaant.

Dooja dhaaga ho simran aur dhyan ka,
Jisey banaate rahein pakka abhyaas se,
Guruji awashya khush hongei humse,
Aur hamaara kalyaan hoga is riyaaz se.

Teesra dhaaga ho Guruji ke satsang ka,
Jahaan kewal Guruji se jodein hum seedhi taar,
Unkee mahima sunein sunaayein, prasad khaayein,
Aur karein Unka shukrana baarambaar.

Inke sangg baandhein dhaaga samarpan ka,
Apna karam karein aur baaki Guruji par dein chod,
Saath mein piroh lein dhaaga vishwaas ka,
Taaki koi bhi is dori ko na sakey toad.

Niswaarth prem aur shraddha ke dhaage hain bahut zaroori,
Is dori kee mazbooti aur sundartaa ke liye,
Itna farz toh bantaa hai Guruji ke prati,
Jinhonei hamaare jeevan mein jalaayein Hain mamta ke diye.

In sabb dhaagon ke sangg dori mein hon,
Dhaage gupt paath aur gupt daan ke,
Aur dori mein ik dhaaga ho aisa,
Jismein basey hon sanskaar achche insaan ke.

Jabb dori main ye sabb dhaagein hongei,
Aur hogi har dhaage se judi bhakti kee bhaavna,
Toh yeh dori kitnee paawan aur atoot hogi,
Ki hum kar sakenge har paristhiti ka saamna.

Hamein milta rahega Guruji ka anant ashirwaad,
Is dori se rahegi hamaari bandagi aabaad,
Aao, Guruji kee kripa aur hamaari nek neeyat se banaayein hum yeh dori,
Taaki Guruji kee mehre-nazar se safal ho hamaari aaj kee lohri.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 12, 2021

Om Namaha Shivaya
Aaj Ka Suvichaar 🙏🏻🙏🏻 # 1059

               Bhakton Ka Sansaar

Paawan hai Guruji ka naam
Paawan hai Unka dhaam
Unke naam se hai subah aur shaam
Unke naam se hai anandmayee aaraam

Ati-sundar hai Guruji ka roop
Roop hai Unka anoop
Unke roop se hai Unka noor itna khoob
Unka roop hai sabse bakhoob

Divya hai Guruji ka chehra
Divya hai Unka pehra
Unke pehre se hai kismat par shubh sehra
Unka pehra hai itna sunehra

Niswaarth hai Guruji ka bhaav
Niswaarth hai Unka pyaar
Is pyaar se sanvarta hai ghar sansaar
Unka pyaar hai aparampaar

Kalyaankaari hai Guruji kee sharan
Kalyaankaari hain Unke charan
Ye charan hain sankat haran
Ye charan hain mangal karan

Divya hai Guruji ka dwaar
Divya hai Unka darbar
Unke dwaar mein hota hai uddhaar
Unke dwaar par hai bhakton ka sansaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja