Month: January 2021

January 11, 2021

Om Namaha Shivaya
Aaj Ka Suvichaar 🙏🏻🙏🏻 # 1058

                   Sarvgyani Sultan

Jitnee saraahna karun apne bhaagya ki,
Veh nahin hai kaafi,
Pyaare Guruvar, isliye pehle hee Aapse,
Iske liye maangti hoon mai maafi.

Bhaagya mera sunehra hua,
Jabb se Aapne mere jeevan ko chhooa,
Mai na jaanoon veh hua mere kaunse janam mein,
Lekin Aapke ashish se phurti aayi mere har kadam mein.

Mehar kee varsha aisee kee Aapne,
Ki mai usmein bheegti gayee,
Aapki prerna aur prem se,
Mai jeena seekhti gayee.

Abhi toh bahut duur takk jaana hai,
Achchaa insaan bann ne ka vaada nibhaana hai,
Aapke ashirwaad se safar rahega jaari,
Jabb takk mukti kee aati nahin baari.

Aap hee karmon ka ganit Hain jaante,
Aap meri har kamzori ko Hain pehchaante,
Mere har janam kee jeevani ka hai Aapko gyan,
Kyunki Aap toh Hain MahaShiv Bhagwaan.

Simran ke saagar mein,
Doob kar tarr jaaoon mai,
Har janam mein jeevan bhar,
Aapki mahima ke geet gaaoon mai,
Apne vichaar aur vyavhaar mein,
Aapki bhakt honei ka sanskaar dikhaaoon mai,
Is sansaar ko behtar banaane mein,
Kuch toh yogdaan de paaoon mai.

Koi fikr nahin hai chaahe aagey ke raaste se mai hoon anjaan,
Kyunki mai jaanti hoon ki Aap har pal har jageh Hain mujh par meharbaan,
Mai hoon Aapki ek bachchi naadaan,
Aur Aap Hain sampoorna Srishti ke sarvgyani sultaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 10, 2021

Om Namaha Shivaya
Aaj Ka Suvichaar 🙏🏻🙏🏻 # 1057

               Mann Kee Sthirtaa

Pal mein khushi, pal mein gumm,
Kisee pal zyada, toh kisee pal kumm,
Aisa toh jeevan mein hota hee rahega,
Mann sthir nahin hoga toh ye sab kaise sahega?

Isliye mann ka sthir hona hai bahut zaroori,
Taaki jo aaye kaisi bhi majboori,
Barkaraar rahe sadaa hamaara atma-bal,
Taaki mann mein hee mil jaaye majboori ka hal.

Guruji ke simran mein hai mann ko sthir karne kee liyaakat,
Is se akasmaat aane waali paristhitiyon ka saamna karne kee miltee hai taakat,
Simran aur dhyan karne se mann ko yogya banaayein,
Aur khushi aur gumm mein sthir rehne kee kaabiliyat paayein.

Mann mein samaa lein Guruji kee tasveer ko,
Guruji kee kripa se sanvarne de apni taqdeer ko,
Kyunki jabb sab kuch Unkee kripa aur ichchaa se hoga,
Toh sab kuch hamaare liye achchaa hee hoga.

Phir chaahe khushi ke hon, ya gumm ke hon pal,
Rakh kar Guruji par vishwaas atal,
Mann kee sthirta se aasaan lagne lagega safar,
Aur Guruji ke bharose ho jaayega jeevan basar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 9, 2021

Om Namaha Shivaya
Aaj Ka Suvichaar 🙏🏻🙏🏻 # 1056

                Koshish Toh Kar

Kehne de, tu kehne de, jo bhi kehta hai sansaar,
Tu Guruji kee baat sunn kar shudh karta chal apne sanskaar,
Tu koshish toh kar ki shant aur sthir rakh apna vyavhaar,
Aur buss yaad se tu jode rakh Guruji se seedhi taar.

Chhaayee hain kalyugi raatein,
Hongi kayee anhoni baatein,
Chaahe koi kahe tujhe baar baar,
Tu dagmagaane se kar dena saaf inkaar.

Aakhir kaun hai yahaan apna, jo paraaya ho jaayega,
Har koi kuch din maheenon ya saalon ka hai mehmaan,
Aakhir hai hee kya yahaan apna, jo koi saath lekar jaa paayega,
Phir na jaane kyun padaarthon kee daur mein paglaa sa gaya hai insaan.

Guruji toh Hain ati-saral,
Guruji toh Hain ati-taral,
Guruji Hain ati-komal,
Aur Ve Hain ati-nirmal.

Tu agar swayam ko Guruji ka bhakt hai kehta,
Phir koshish toh kar saralta apnaane kee,
Tu agar swayam ko Guruji ka anuyaayi hai kehta,
Toh koshish toh kar taralta se jeevan bitaane kee.

Koshish toh kar ki komaltaa aur nirmalta ke saanche mein dhal,
Taaki ujjwal ho jaaye tera aane wala kal.
Ye sab ek pal mein na ho sakega,
Ismein zaroor kuch waqt lagega.

Simran aur dhyan kee koshish se,
Mann kee mayll ko dhona hoga,
Niswaarth sewa kee koshish se,
Khud ko neevan hona hoga.

Ye sab hotey hotey jo samay beet jaayega,
Tu usee samay ka dil tu jeet jaayega,
Samay jaan jaayega ki toone uska achche se kiya prayog,
Aur veh nahin hoga kewal ek shubh sanyog,
Veh bhi hogi Guruji kee hee mehar,
Jo toone atma-sudhaar mein bitaaya har pehar.

Guruji jabb dekhenge teri neeyat hai sachchi,
Toh Unhe teri honhaar koshish lagegi achchi,
Unkee kripa se teri koshish ka kalyaankaari hoga anjaam,
Nek neeyat koshish kabhi na kabhi zaroor pahunchaayegi tujhe Unke dhaam.

Isliye aur vilamb na kar,
Na tu kalyugi raaton se darr,
Abb jo tu aaya hai Guruji ke dar par,
Tu satyugi subah laane ki koshish toh kar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 8, 2021

Om Namaha Shivaya
Aaj Ka Suvichaar 🙏🏻🙏🏻 # 1055

   Guruji, Hamaare Paramatma

Dukh mein ek ghadi bhi hazaar ghadiyon ke samaan lagti hai,
Aur sukh mein anubhooti vipreet ho jaati hai,
Insaan apni taraf se jo bhi kar le,
Phir bhi samay kee hee jeet ho jaati hai.

Kewal Trilokinath ke vash mein hai samay,
Unkee ichchaa se hota hai nirmaan ya hota hai pralay,
Aur hamein toh mila hai MahaShiv ka sahaara,
Toh uddhaar bilkul nishchitt hai hamaara.

Ek ghadi ho ya hon kayee saal,
Guruji sab lenge sambhaal,
Phir chaahe sukh kee ho ya phir dukh kee ho ghadi,
Kisee bhi ghadi kee vadiyaayee nahin hai Guruji se badi.

Isliye sukh mein dukh mein karein Unka simran,
Har pal hum karein Guruji ka hee manan,
Toh har ghadi Unkee kripa se jaayegi tal,
Unkee mehre nazar se har mushkil ho jaayegi hal.

Sukh mein na karein ahankaar,
Sukh hai aane jaane wala mehmaan,
Dukh mein na jaayein himmat haar,
Na pahunchaane dein isey apni shraddha ko nuksaan.

Hamaari zindagi ke har pal par hoga Guruji ka paawan pehra,
Dekhte dekhte Guruji kee mehar ka rangg hota jaayega gehra,
Is rangg mein poori tarehn se jabb rangg jaayegi atma,
Tabb yakeenan hamein mil jaayenge Guruji, hamaare Paramatma.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 7, 2021

Om Namaha Shivaya
Aaj Ka Suvichaar 🙏🏻🙏🏻 # 1054

               Chaaru Chandova

Teri mushkil ke vele mein,
Chaahe moad le tujhse muh ye saara sansaar,
Phir bhi tu akela na hoga, isliye na maan lena tu haar,
Kyunki tere saath hongei tere Guruji har baar.

Jab tu kisee baat se hoga prasann,
Toh teri khushi se shaayad khush na hon kayee jann,
Lekin tera dil chayyn paayega,
Kyunki tere saath tera Guru muskuraayega.

Jab tujhe dard ho raha hoga shareer ya mann ke kisee ghaav mein,
Toh chaahe ho ya na ho tere saath koi bhaagi tere is bhaav mein,
Guruji Apni mamta se tere ghaav bharenge,
Kyunki Ve tere dard ko mehsoos karenge.

Kabhi agar tujhe lagega bhayy,
Ya tujhe honei lagega sanshay,
Toh koi aur tera haath thaame ya na thaame,
Guruji aayenge tera haath thaam kar tujhe samjhaane.

Kabhi jo koi tere atma-sammaan ko thes pahunchaane kee koshish karega,
Toh chaahe tu sambandh kee khaatir atma-sammaan ko daav par lagaane lagega,
Tere jeevan se uss nakaaratmak prabhaav ko hataa denge Guruji,
Aur tera atma-sammaan bachaa lenge Guruji.

Kabhi jo tu bhatakne lagega,
Aur tujhe koi sachchaa saathi sahi raah nahin dikhaayega,
Tera Guru chetna ka chiraag jalaakar tere saath chalkar,
Tujhe sahi raaste par chalna sikhaayega.

Kabhi jabb tu jo kar dega sarvsamarpan,
Aur Guruji se Guruji ko maang lega,
Toh Guruji atyant prassann ho jaayenge,
Aur teri kismat ke sitaare sampann ho jaayenge.

Har shaq har bhayy khatm ho jaayega sadaa ke liye,
Jal uthenge har taraf Guru naam ke simran ke diye,
Phir srishti ka koi bhi timir teri raahein andheri na banaa sakega,
Aur Guruji kee kripa ka chaaru chandova sadaa teri raksha karega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 6, 2021

Om Namaha Shivaya
Aaj Ka Suvichaar 🙏🏻🙏🏻 # 1053

     Guruji Baagbaan Banenge Tere

Jo bhi ho raha hai teri zindagi mein,
Veh tujhe ya tere saath nahin, balki tere liye ho raha hai,
Isliye baar baar ye poochh kar rona chod de,
Ki Guruji, mere saath aisa kyun ho raha hai?

Kyunki sachchaayee toh ye hai,
Ki Guruji veh sab tujhe nahin, balki tere liye kar rahe Hain,
Haan, tere bhale, tere uddhaar ke liye,
Tabhi toh Unhonei ve sabb vritaant honei diye.

Kyunki Unkee sharan joh tujhe mil gayi,
Toh jaise mukti roopi phool kee kalee khil gayi,
Abb kalee ka phool bann na hai shesh,
Jiske liye yaatra karni hogi vishesh.

Yeh yaatra ek janam se zyada kee bhi ho sakti hai,
Kyunki insaan kee hee naadaani se pragati kabhi kabhi rukti hai,
Lekin Guruji ne thaama hai jo tera haath,
Abb Ve har janam mein denge tera saath.

Is yaatra mein kayee imtehaan aayenge,
Jismein Guruji bahut kuch azmaayenge,
Teri neeyat aur teri nishthaa ka ehsaas, tera utsaah aur tera vishwaas,
Teri aasakti, tere vikaar, tera bhaav, aur tere vichaar.

Tujhe anant sukh chahiye ya kewal suvidha,
Tere mann ne kaise spasht kar ke suljhaayee hai ye duvidha,
Guruji tere simran aur dhyan se ye sabb jaanenge,
Aur tujhe diye huey har imtehaan se Ve pehchaanenge.

Yeh safar kadaachit na hoga aasaan,
Ismein tyaagne hongei tujhe anginat laukik armaan,
Lekin adhyaatmik unnati kee raah par chalna aur na jaana bhool,
Ki jitnee anaasakti hogi, utna sheeghr khilega mukti ka phool.

Asal sukh toh aakhir isee mein hai,
Ruhaani gyan se iska tujhe ho jaayega ehsaas,
Iske baad na rahegi aur koi bhi chaahat
Isliye is avastha takk pahunchne ka hee abb kar prayaas

Tu bharosa rakh, abhyaas Guruji karaayenge,
Tu veh abhyaas kar, toh raasta Guruji dikhaayenge,
Tu uss raaste par chal, toh Guruji baghban banenge tere,
Mukti ka phool khilaakar duur karenge har janam ke dukh tere.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 5, 2020

Om Namaha Shivaya

Om Namaha Shivaya
Aaj Ka Suvichaar 🙏🏻🙏🏻 # 1052

        Niklee Hai Dil Se Ye Awaaz

Pyaare Guruji,

Kismat ke bandd dwaar usee pal khul gaye,
Jabb Aap Ishwar ke roop mein mil gaye,
Uske baad ka safar ek anokhi gati se chal raha hai,
Itna kasht toh mujhe chhoone se bhi pehle tal raha hai.

Jo meri kismat mein hai, veh mujhe milega zaroor,
Balki Aapki kripa se milega uss se bhi behtar,
Yeh ummeed nahin, balki mera vishwaas hai,
Is vishwaas se itnee santushti ka hota ehsaas hai.

Kaise prashansa karoon Aapki,
Kin shabdon mein karoon mai varnan,
Kaise prasann karoon Aapko,
Kis tareh se karoon mai vandan.

Aapki mahima sunaane ke liye,
Kumm hain jitne bhi kahoon alfaaz,
Aapke gunon ka geet gaane ke liye,
Soojhta hee nahin hai koi kaabil saaz.

Agyaani hoon, anjaan hoon,
Nasamajh hoon, naadaan hoon,
Prabhu, meri galatiyon ko kar dena nazar andaaz,
Aapki hee rehmat se niklee hai dil se ye awaaz.

Aapki mehar se judi hoon Aapse,
Pyaar bhari bandagi ke bandhan mein,
Arzoo hai ki meri vaani ramm jaaye sadaa ke liye,
Aapke vandan ke shubh spandan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 4, 2020

Om Namaha Shivaya
Aaj Ka Suvichaar 🙏🏻🙏🏻 # 1051

     Chot Ka Lagna Bhi Hai Zaroori

Chot ka lagna bhi hai zaroori,
Dard kya hota hai, ye ehsaas toh ho.
Gir kar uthne kee koshish karna bhi hai zaroori,
Taaki koshish karne ka abhyaas toh ho.

Itna toh nishchitt hai bin kisee sanshay ke,
Ki Guruji se kabhi koi galati ho sakti nahin,
Phir jo bhi Unkee razaa se hota hai,
Veh bina kisee shaq ke hameshaan hoga sahi.

Kisee na kisee tarehn se jo bhi hota hai hamaari zindagi mein,
Veh hamaare kalyaan ke liye karte Hain hamaare naath,
Ya toh uss se hota hai karmon ka bhugtaan,
Ya phir veh hota hai adhyaatmik unnati ka imtehaan.

Kalyuga kee har mushkil ne,
Insaan ke manovikaaron se hai janam liya,
Maano ya na maano, jaano ya na jaano,
Hum insaanon ne hai veh karam kiya.

Jo dukh mil raha hai hamein,
Veh nishchay hee kumm kar ke mil raha hai,
Aur jo bhi sukh praapt hai hamein,
Veh haq se aur hadd se zyada mil raha hai.

Aur phir Guruji ka pyaar toh har ghaav ko bhar deta hai,
Unka ashish toh har kasht ko har leta hai.
Koi dawaa nahin hai Unke prataap se zyaada prabhaavshaali,
Koi bhi nakaaratmakta nahin hai Unkee divyataa ke aagey shaktishaali.

Jiske paas har saagar ko ek pal mein nirjal karne kee kshamtaa hai,
Veh saagar ko anginat boondein dekar aseem honei ka deta hai vardaan,
Yeh yakeenan hamaare dayaalu aur kripaalu Guruji kee mamta hai,
Jo saagar kee tarehn saari srishti ko dete rehte Hain Apni daya ka daan.

Hamaare Guruji ke charnon mein,
Basaa hai har teerath dham,
Isliye aise pooran Guru ka simran karna,
Hai bade hee punya ka kaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 3, 2020

Om Namaha Shivaya
Aaj Ka Suvichaar 🙏🏻🙏🏻 # 1050

    Sabr Aur Shanti

Zindagi ke safar mein zaroori hai ki sukh chayyn ke liye,
Antarmann mein jalaayein ye do sundar diye,
Ek hai sabr ka, dooja diya hai shanti ka,
Inke liye bhi anivaarya hai ashish Guru simran kee kanti ka.

Sabr se miley maansik shakti,
Aur kumm hota jaata hai sanshay,
Shanti se badhti hai bhaavaatmak shakti,
Aur duur honei lagta hai bhayy.

Guruji ke naam ke simran aur dhyan se,
Jabb vikasit hoti hai Guruji kee sadhna,
Toh sadhna se milta hai sabr aur milti hai shanti,
Jin se rangg laati hai Guruji kee aradhana.

Kyunki phir maansik aur bhaavaatmak shakti badh jaati hai,
Aur har tarehn kee pareshaani ko raahat mil jaati hai.
Hamaare har kaarya par aisee shakti ka prabhaav jab padta hai,
Toh Guruji ka ashirwaad hamaara kaarya safal karta hai.

Kyunki Guruji ke hotey huey bhi hamein apna karam toh hai karna,
Lekin jabb Ve saath Hain, toh phir kaahe ka darna?
Isliye sabr aur shanti apni dincharya mein kar lein aatmasaat,
Dheeraj ke neeraj ko shanti se seench kar mehkaa lein apne karmon ka jazbaat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 2, 2021

Om Namaha Shivaya
Aaj Ka Suvichaar 🙏🏻🙏🏻 # 1049

                  Har Pal, Har Din

Har pal, har din,
Ek avsar hai sunehra,
Ki hum Guruji ke saath baney rishte ko,
Unhee kee mehar se banaayein gehra.

Koi sakht niyam nahin,
Na hee koi andhvishwaas,
Buss, mann se Unka shukrana hai karna,
Jismein sanjona hai pyaar ka ehsaas.

Is pyaar mein yeh gyan basaa ho,
Ki hamaare safar kee manzil Hain Guruji,
Is pyaar mein shraddha aur vishwaas aisa ho,
Ki har paristhiti mein dil mein hon Guruji.

Is pyaar mein ho aisee ruhaaniyat,
Is pyaar mein ho aisee maasumiyat,
Jo kabhi aankhon se bayaan ho, toh kabhi baaton se,
Kabhi sewa se bayaan ho, toh kabhi iraadon se.

Koi shart na ho is pyaar mein,
Na judi ho is se koi mannat,
Buss sachche bhaav ka izhaar ho,
Aur basee rahe ismein Guruji kee rehmat.

Guruji ke sangg bandhee rahe bandagi kee doar,
Is paawan prem ke rishte se jeevan mein rahe bhor,
Bhakton par prem bhare ashirwaad kee hoti rahe barsaat,
Aye daata, Apne bhakton ko kripa kar ke deejiye yeh daat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja