Month: February 2021

February 18, 2021

Om Namaha Shivaya
Aaj Ka Suvichaar 🙏🏻🙏🏻 # 1096

    Karaa Kar Har Pal Tu Shukrana

Karaa kar har pal tu shukrana,
Is shukrana ne hee kaam hai aana,
Baaki sab ne vyarth hai ho jaana,
Is shukrana ne tujhe neeva hai banaana.

Subah so kar jeevit uthne ka shukrana,
Din mein kaam kaaj kar sakne ka shukrana,
Raat ko so sakne ka shukrana,
Subah phir jaag sakne ka shukrana.

Is taqdeer ka shukrana,
Is shareer ka shukrana,
Shareer ke har angg ka shukrana,
Ruhaaniyat ke rangg ka shukrana.

Ghar parivaar ka shukrana,
Guruji ke pyaar ka shukrana,
Guruji ke darbar ka shukrana,
Guruji par aitbaar ka shukrana.

Jisne Guruji se joda, uss kasht ka shukrana,
Jisne Guruji kee oar moda, uss waqt ka shukrana,
Khushi aur gumm kee har leher ka shukrana,
Guruji kee barasti hui mehar ka shukrana.

Ann aur jal ka shukrana,
Satsang ke har pal ka shukrana,
Prakriti ka shukrana,
Sanskriti ka shukrana.

Simran aur dhyan ka shukrana,
Gupt sewa, paath, daan ke gyan ka shukrana,
Karmon ke bhugtaan ka shukrana,
Is dil aur is jaan ka shukrana.

Saralta ke satya ka shukrana,
Taralta ke tathya ka shukrana,
Komalta aur nirmaltaa kee swatantra reet ka shukrana,
Shukrana karne kee taakeed ka shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 17, 2021

Om Namaha Shivaya
Aaj Ka Suvichaar 🙏🏻🙏🏻 # 1095

MahaShiv Ka Simran

Itne khayaal ghoom rahe thei mann kee gumm-summ galiyon mein,
Jaise hazaaron titaliyan mandraa rahi hon phoolon mein aur kaliyon mein,
Titaliyon ko toh saath mila jhoomti hui bahaaron ka,
Lekin mann ko saath mila idhar udhar ke vichaaron ka.

Musaafir ko vash mein kar rakha thaa haalaat ne,
Pareshaani aur ashanti chhalakti thi uskee har baat mein,
Vyaakul thaa, toota thaa,
Khud se hee jaise veh rootha thaa.

Subah se shaam ho gayi chalte chalte,
Veh ek viraane mein pahuncha sooraj ke dhalte dhalte,
Vahaan ek baba samadhi mein leen thei,
Chehre par noor thaa Unke, chaahe angg lagte ksheen thei.

Unhe dekh kar musaafir unkee oar aakarshit honei se
Swayam ko roak na paaya,
Bahut mann kiya uska baba se baat karey, Magar Unkee sadhna ko toak na paaya.

Unke sakaaraatmak spandan se mantra-mugdh hokar,
Musaafir baith gaya Unke paas,
Uska bhi chitt shant ho jaaye,
Usey honei lagi yeh aas.

Baba ke maathe par tripund dekha aur gale mein thi Rudraksha kee mala,
Yeh dekh musaafir ke mann mein jali Shivji ke naam kee jwaala,
‘Om Namaha Shivaya’ ka veh karne lagaa jaap,
Uska dhyan lagne lagaa phir apne aap.

Bandd honei lagey uske nayyn,
Uske dil ko milne lagaa chayyn,
Dhyan karte karte beete kuch prahar,
Waqt beet-te beet-te ho gayi sehar.

Jab musaafir kee aankhein khulin dhyan ke pashchaat,
Toh usne jaana ki dhyan mein beet gayi raat,
Usey baba vahaan nazar nahin aaye,
Veh chale gaye musaafir ko bin bataaye,
Bahut dhoondhne par bhi baba miley nahin,
Lekin is musaafir ko vyaakulta ka ilaaj mila vaheen.

Mann ko milee shanti dhyan ke dwaara,
Uskee jaagriti hui is gyan ke dwaara,
Phir simran aur dhyan veh badhaane lagaa,
Swayam ko adhyaatmik seedhi par chadhaane lagaa.

Guruji aaye thei uss baba ke roop mein,
Usey Guruji ne svapn mein aakar bataaya,
Sapne mein Guruji ne usey ashirwaad diya,
Aur musaafir phoola nahin samaaya.

Hum sabb bhi yahaan par musaafir hee hain,
Aayiye, susthir karein hum bhi apna bhi jeevan,
Is simran se shant aur sukhi hota hai mann,
Kyunki Guruji ka simran hai MahaShiv ka simran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 16, 2021

Om Namaha Shivaya
Aaj Ka Suvichaar 🙏🏻🙏🏻 # 1094

            Ritu Raaj Ka Swaagat

Ritu Raaj Basant ka swaagat karein,
Mehekte phoolon kee khushboo se mann kee bagiya bharein,
Kheton mein sarson kee saloni si hai fasal,
Parishrami kisaanon kee mehnat hui hai safal.

Chaman mein aayi kaliyon aur phoolon kee bahaar hai,
Mandarati hui titaliyon ne bikhera anand aur pyaar hai,
Kayee logon ke vastra hain aaj peele,
Toh kuch logon ke hain kapde rangeele.

Suna hai ki aaj Vishnu ji kee agya se,
Brahma ji ne uthaaya apna kamandal,
Aur phir Unhonei Apne divya prem se,
Chidka dharti par kanon ke roop mein jal.

Jabb jal ke kann dharti par gaye bikhar,
Toh phir kampan see hui idhar udhar,
Vriksh ke beech mein prakat hui ek shakti,
Jinkee honei lagi phir bhakti.

Veh shakti aayi Maa Saraswati Devi ke roop mein,
Bhujaaon mein thaame Veena, Var mudra, pustak, aur mala,
Unhonei kiya Veena dwaara madhurnaad,
Aur vidya aur buddhi pradaan karne ka daayitva sambhaala.

Pawan ke chalne se hui sarsaraahat kee awaaz,
Kuch jann kehte hain ki yahee hai Saraswati naam ka raaz,
Saraswati Maa Hain shuddh aacharan ka aadhaar,
Manovrittiyon kee raksha ka sambhaala hai Unhonei bhaar.

Lekhak ho, vidyaarthi ho, ya ho kavi,
Sabhi mein hai Maa Saraswati kee chhavi,
Gaayak ho ya ho naatak-kaar, vaadak ho ya ho nrityakaar,
Maa Saraswati sabko ashirwaad deti Hain baarambaar.

Maa Saraswati ka janamotsav bhi,
Basant panchami par manaaya hai jaata,
MahaShiv Guruji ke divya drishtikon kee kripa se,
Bhakton ko har tyohaar ka anand hai aata.

Pyaare Guruji Hain hamaare pita aur mata,
Unhe bhi bhakton ka srijansheel hona hai bhaata,
Unhee ke ashirwaad se hota hai sab mumkin,
Unkee kripa se manohar aur madhur hai har din.

Sabhi ko aaj ke paawan din kee,
Bahut bahut badhaayee,
Sabke liye nayee ummeed lekar,
Basant Panchami hai aayi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 15, 2021

Om Namaha Shivaya
Aaj Ka Suvichaar 🙏🏻🙏🏻 # 1093

    Janam Maran Ke Chakravyuh Mein

Guruji ke vandan ko hum maan dein,
Vandan ke shubh spandan ko sammaan dein,
Guruji sadaa saath Hain, is tathya ko jaan lein,
Is paraaye jagg mein ek Ve hee apne Hain, is satya ko pehchaan lein.

Aaj nahin bhi hai agar hamein yakeen in baaton par,
Toh kal kisee na kisee tarehn se yakeen ho jaayega zaroor,
Sada khula hai Guruji ka dwaar aur dar,
Guruji mein nishtha rakhne ka barkarar rakhein hum dastoor.

Ye din beet jaayenge,
Yeh yug ho jaayega khatm,
Sab yahaan se jaayenge ek din,
Aur kuch lenge dobaara janm.

Kuch virlon ka bahut changa hoga naseeb,
Ve honge Paramatama ke itne kareeb,
Ki Unkee atma ka milan Patamatama se ho paayega,
Aur Unka jeena marna safal ho jaayega.

Guruji, kripa kar aisee sumat bakhshiye,
Ki hum is kaabil bann paayein,
Taaki jabb antt vela aaye hamaara,
Hum bhi isee tarehn se jaayein.

Anginat paap kiye hain humne,
Buss, Aap hee ka hai sahara,
Subuddhi deejiye aur shuddhi keejiye hamaari,
Taaki galatiyan na karein dobaara.

Yeh ek janam mein toh shaayad na ho,
Kyunki hamaari galatiyan hain behisaab,
Lekin Aapke charnon mein uddhaar nishchitt hai,
Aapke samaksh hain hum ek khuli kitaab.

Janam maran ke chakravyuh mein apna nirdhaarit samay bitaate huey,
Aapki kripa se swayam ko aur paap karne se bachaate huey,
Hum Aapki bhakti mein apna sab kuch kar dein arpan kar ke Aap par poorna vishwaas,
Jabb yahaan se jaane kee haseen bela aaye, toh Aapke charnon mein lein hum apni antim shwaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 14, 2021

Om Namaha Shivaya
Aaj Ka Suvichaar 🙏🏻🙏🏻 # 1092

              Komal Kripa Nidhaan

Kaise prashansa karoon Guruji kee,
Alfaaz kumm pad jaate hain,
Itne pyaare aur itne saare sadgunn,
Ki shabdon mein nahin samaa paate hain.

Kabhi hansi itnee pyaari,
Kabhi mandd muskuraata sa chehra,
Kabhi thodi si baat karna,
Toh kabhi karte huey vichaar gehra.

Kabhi aasan par viraajmaan hotei Hain Guruji,
Shehenshah is sampoorna srishti ke,
Toh kabhi bhakton ke beech mein baithein,
Aur taarein Apni divyataa kee dayalu drishti se.

Prabal Hain, nirmal Hain, aseem hai Unkee mamta,
Saral Hain, taral Hain, lekin anant Hai Unkee kshamtaa.
Ameer ho ya ho gareeb, har bhakt hai Unka bachcha,
Saari duniya jhoothi ho jaaye, kintu Guruji ka pyaar sada hai sachchaa.

Guruji ke nayynon mein hai itnee gehraayee,
Ki mahasaagar bhi lajjit ho jaaye,
Har leela mein hai aisee vadiyaayee,
Ki devatva susajjit ho jaaye.

Phoolon ke gulistaan se bhi kaheen zyada adhik mehek,
Guruji kee ruhaani khushboo mein hai hoti,
Jisey bhi iss divya khushboo ka anubhav ho jaaye,
Uss bhakt kee rooh uss anubhooti mein hai khoti.

Kitne dayalu Hain Ve karuna nidhaan,
Hain Ve swayam MahaShiv Bhagwaan,
Patit ko paawan banaate Hain,
Niraash kee aas bandhaate Hain.

Unke vash mein hai nirogi karna kaaya,
Kalyuga kee prakhar dhoop mein Hain Ve sheetal chhaaya,
Karte Hain sab par amrit varsha Apne aashirwaad kee,
Bin boley jaante Hain sab, isliye zaroorat nahin fariyaad kee.

Unkee oar se vilamb ho, toh usmein bhi hota hai hamaara uddhaar,
Sab bhakton ke jeevan mein laate Hain Ve sudhaar,
Sudhaar aur uddhaar karte karte,
Antt mein Ve pahunchaate Hain mukti ke dwaar.

Karmon ka bhaar chukaane mein Unhee ka toh sehyog hai,
Yaad dilaate Hain Ve ki jeene ka sahi tareeka Shiv Yog hai,
Apni leela se chudaate Hain bhakton ka paakhand aur ahem,
Sikhaate Hain tyaagna andhvishwaas aur vehem.

Gupt sewa, gupt paath, gupt daan karne ko Hain Ve kehte,
Sadaa apne upaasakon ke sangg Hain Ve rehte,
Unka langar prasad, simran, aur Unka satsang,
Neeras jeevan mein bharta hai ruhaaniyat ke rangg.

Har pal bhi karti rahoon agar,
Guruji kee mahima ka bakhaan,
Toh bhi zindagi chhoti pad jaaye,
Kyunki Guruji Hain itne mahaan.

Mai toh hoon ek anjaan naadaan insaan,
Aur Guruji Hain Guru ke roop mein Bhagwaan,
Apne pyaar kee Shradhanjali hee arpit kar sakti hoon,
Kripa kar qubool keejiye, komal kripa nidhaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 13, 2021

Om Namaha Shivaya
Aaj Ka Suvichaar 🙏🏻🙏🏻 # 1091

         Chaahe Tu Kuch Bhi Na Bol

Chaahe tu kuch bhi na bol,
Toh bhi Guruji hameshaan sunenge teri,
Tujhe chaahe kehne mein vilamb ho jaaye,
Ve sunn-ne mein kabhi bhi na karenge deri.

Kabhi lagey tujhe ki Guruji khaamosh kyun Hain,
Toh yakeen kar, uss khaamoshi ka hoga koi kaaran zaroor,
Isliye tu apne vishwaas ko dolne na dena,
Kyunki Guruji khaamoshi mein bhi nahin hongei tujhse duur.

Tujhe mehsoos ho ya nahin,
Ve har pal Hain tere saath,
Chaahe tere jeevan mein ho sunehri subah ,
Ya aa jaaye ghor andheri raat.

Guruji ke paas hee hai teri uljhan kee suljhan,
Isliye vyarth mein dheeraj khokar tu naadaan matt bann,
Sabki bigdee banaayee hai Unhonei, teri bhi bigdee banaayenge,
Sabke kaaraj sanvaare Hain Unhonei, tere achche din bhi aayenge.

Buss, apne karam karna na chodna,
Unke naam kee chaadar tu odhna,
Raksha ka kavach banegi veh chaadar,
Isliye karna tu uss chaadar ka aadar.

Isliye is vilamb mein jo lamhe hain intazaar ke,
Chaahe usmein aayein sankat kayee prakaar ke,
Tu Guruji ka naam lete huey chalta chal aitbaar se,
Sada tera maargdarshan karenge Guruji bahut hee pyaar se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 12, 2021

Om Namaha Shivaya
Aaj Ka Suvichaar 🙏🏻🙏🏻 # 1090

  Safal Hoga Tera Kiya Hua Vandan

Na churaane de kisee chunauti ko tu apna chayyn,
Na numm honei de kisee niraasha se apne nayyn,
Balki chitt ko chayyn ke chandove se sajaa le,
Aur Guruji ke noor ko nayynon mein basaa le.

Chunauti ka saamna karte samay,
Chayyn ke chandove se chhaaon mil jaayegi,
Aur niraasha ko asha mein badalne ke liye,
Guruji ke noor se nayynon mein jyot jal jaayegi.

Veh chhaaon hogi itnee sheetal,
Veh jyot hogi itnee nirmal,
Sharad ritu kee meethi dhoop ka sa hoga vaataavaran,
Antar-mann mein Guruji ke divya roop ka hoga aagaman.

Is divya roop ke saundarya se susajjit ho jaayega antar-mann,
Toh ek anokhe andaaz se aanandit ho jaayega jeevan,
Aur jabb is anand ko alankrit karega simran, Shukrana, aur sarv-samarpan,
Toh Guruji kee mehar se safal hoga tera kiya hua vandan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 11, 2021

Om Namaha Shivaya
Aaj Ka Suvichaar 🙏🏻🙏🏻 # 1089

          Yeh Guruji Ka Hai Dar

Yeh Guruji ka hai dar,
Yahaan sabki sunvaayee hoti hai,
Is dar kee kar lein hum kadar,
Yahaan sabki bhalaayee hoti hai.

Yahaan chaahe koi ameer ho ya ho gareeb,
Guruji sabka sanvaarte Hain naseeb,
Ve bhakton ka lekha dobara likh dete Hain,
Sabke adhiktar karam khud par le lete Hain.

Yeh Guruji ka hai dar,
Yahaan neeyat parkhi jaati hai,
Jisey bulaa liya Guruji ne is dar par,
Usey Bhagwaan ke roop mein milta saathi hai.

Yahaan milta hai mata pita ka pyaar,
Aur ashish aur dulaar paata hai ghar pariwaar,
Yahaan par sachcha bhaav bahut zaroori hai,
Kyunki yahaan jhooth aur fareb se rakhni duuri hai.

Yeh Guruji ka hai dar,
Yahaan simran se sthir kar lo mann,
Simran aur dhyan ka honei do atma par asar,
Aur Guru naam ka paa lo dhan.

Yahaan Guruji kee mahima suno aur sunaao,
Aur paa lo Guruji ka ashirwaad,
Yahaan Guruji ka gungaan karte jaao,
Aur dil ko kar lo Guru prem se aabaad.

Yeh Guruji ka hai dar,
Yahaan Guruji se jod lo seedhi taar,
Is taar se rishte ko banaa lo amar,
Kyunki vyarth hai baaki saara sansaar.

Guruji ke charan bade sukhdaayee hain,
Yahaan karmon ka hota hai bhugtaan,
Guruji kee sharan kee vaddi vadiyaayee hai,
Kyunki Guruji swayam hee Hain Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 10, 2021

Om Namaha Shivaya
Aaj Ka Suvichaar 🙏🏻🙏🏻 # 1088

                       Keh De Tu

Keh de tu dolti ghataaon se,
Aur in bolti hawaaon se,
Keh de tu noorani nazaaron se,
Aur unn matvaali bahaaron se,
Ki Guruji ke saath ke jaisa aur kisee ka saath nahin.

Keh de tu is neele gagan se,
Aur keh de chaarul chaman se,
Keh de har desh, har vatan se,
Aur keh de prataapi agan se,
Ki Guruji kee jaisi mahima kisee kee nahin.

Keh de har jhooth, har paakhand se,
Aur har swaarth bhare anand se,
Keh de tu samaj ke har khand se,
Aur apni har soch se, har pasand se,
Ki Guruji se achchaa aur sachchaa koi nahin.

Keh de tu sooraj ke prakash se,
Aur anant aseem akash se,
Keh de tu ruhaani sakaash se,
Aur keh de apne vishwaas se,
Ki Guruji ke jaisi divya saarthaktaa kisee mein bhi nahin.

Keh de har nakaraatmak tufaan se,
Aur ateet, bhavishya, aur vartmaan se,
Keh de tu phoolon ke har gulistaan se,
Aur keh de saare ke saare jahaan se,
Ki Guruji ke jaisa pyaara aur nyaara sahaara aur koi nahin.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 9, 2021

Om Namaha Shivaya
Aaj Ka Suvichaar 🙏🏻🙏🏻 # 1087

              Aapki Rehmat Se Hai

Pyaare Guruji,

Meri har khushi Aapki rehmat se hai,
Meri har hansi Aapki rehmat se hai,
Meri bandagi Aapki rehmat se hai,
Meri zindagi Aapki rehmat se hai.

Mera har geet Aapki rehmat se hai,
Meri aur Aapki preet Aapki rehmat se hai,
Mera har meet Aapki rehmat se hai,
Meri har haar aur har jeet Aapki rehmat se hai.

Mere shareer ka har angg Aapki rehmat se hai,
Mere jeene ka dhangg Aapki rehmat se hai,
Meri ruhaaniyat ka rangg Aapki rehmat se hai,
Mila mujhe sadh sangat ka sangg Aapki rehmat se hai.

Meri Aap mein bhakti Aapki rehmat se hai,
Is bhakti se milee jo shakti, veh Aapki rehmat se hai,
Is bhakti se praapt hui tripti bhi Aapki rehmat se hai,
Milegi jabb bhi mukti veh bhi Aapki rehmat se hai.

Meri himmat Aapki rehmat se hai,
Meri taakat Aapki rehmat se hai,
Meri hifaazat Aapki rehmat se hai,
Meri ibaadat Aapki rehmat se hai.

Mera deewaanapan Aapki rehmat se hai,
Mera tann mann dhan Aapki rehmat se hai,
Meri Aap mein lagan Aapki rehmat se hai,
Mera toh yeh jeevan Aapki rehmat se hai.

Mera uddhaar Aapki rehmat se hai,
Mera har sanskaar Aapki rehmat se hai,
Mera ghar parivaar Aapki rehmat se hai,
Har ‘Aaj Ka Suvichaar’ Aapki rehmat se hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja