Month: March 2021

March 31, 2021

Om Namaha Shivaya
Aaj Ka Suvichaar 🙏🏻🙏🏻 # 1137

            Sachkhand Ke Dar Par

Aaj se pehle toh usey maalum hee nahin thaa,
Ki veh so raha thaa,
Kyunki jo bhi ho raha thaa,
Veh toh usee mein kho raha thaa.
Samajhkar usey hee hakeekat,
Nazar andaaz kar ke har museebat,
Khush rakhte huey apni tabeeyat,
Sunte huey sabki nasihat.

Kal takk daaman mein liye ehsaas-e-falak,
Na jaane veh soya kabb talak.
Jabb aaj neend khuli aur jhapki usne palak,
Toh aankhon se aansoo gaye chhalak.

Kyunki sachchaayee ka ehsaas hua,
Jabb jhooth ka pardaafaash hua,
Pehle pehle toh veh niraash hua,
Lekin phir dil ko sabb bardaasht hua.

Kyunki Guruji ne thaama hua thaa uska haath,
Aur Unhonei vaada kiya thaa ki Ve chalenge uske saath,
Aur har pal ke jaise uss pal mein bhi,
Uske sangg thee Guruji kee ruhaani surbhi.

Buss, phir yoon hee waqt gaya guzar,
Uskee soch par hota raha Guruji ka asar,
Jabb jabb veh jhapakta thaa palak,
Usmein Guruji ke liye pyaar jaata thaa chhalak,
Jabb takk jeevit raha, uskee shwaas rahi tabb talak,
Jabb praan tann se nikle, toh Guruji ne uske daaman mein sajaayee ruhaani falak.

Uska kalyaan hua jabb uska daaman yoon bhar gaya,
Guruji kee rehmat se veh tarr gaya,
Veh duniyadari kee durbal deewaarein paar kar gaya,
Aur Guruji kee mehar-e-nazar se veh antt vele mein sachkhand ke dar par gaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 30, 2021

Om Namaha Shivaya
Aaj Ka Suvichaar 🙏🏻🙏🏻 # 1136

Bhakti Ka Indradhanush

Aayiye, Guruji ke ashirwaad se,
Indradhanush nihaarein bhakti ka,
Jiska har rangg raasta dikhaaye,
Guruji ke saath jude rehne kee yukti ka.

Simran hai bhakti ka rangg pehla,
Is se jeevan bann jaata hai itna suhela,
Har pal mann mein hota hai jo Guruji ka naam,
Toh Guruji hee sambhaalte Hain bhakt ke saare kaam.

Sewa hai bhakti ka rangg dooja,
Gupt ho toh aur bhi nikhar jaati hai pooja,
Niswaarth sewa ho doosron ke prati,
Is se neevanpann aata hai aur praapt hoti hai sumati.

Satsang aur sadh-sangat bhi is indradhanush ka rangg hai,
Guruji ke bhakton ke dil mein sadaa hoti satsang kee umangg hai,
Bheed nahin, na hee jhootha dikhaawa,
Buss satya ka sangg aur Guruji ka bulaava.

Samarpan hai bhakti ka rangg chautha,
Jis se tarr jaata hai bhakti ka paudha,
Is rangg se bayaan hota hai Guruji par bhakt ka poorna vishwaas,
Kyunki sab kuch Guruji par chod kar buss Unkee marzi aati hai raas.

Shraddha ka rangg bhi anivarya hai bhakti ke liye,
Isee se hee jalte hain Guru naman mein divyataa ke diye,
Shraddha se hee Guruji ke sangg waqt bitaane ka karta hai mann,
Shraddha se hee Guru shishya ka rishta hota hai aur bhi sampann.

Prem ka rangg chadhne se bhakti mein aata hai ek nutan nikhaar,
Prem ke bhaav se saadhak paata hai vinamrataa ka sanskaar,
Prem ke bina bhakti toh bilkul neeras hai, bejaan hai,
Niswaarth prem kee pavitrataa hee bhakti kee jaan hai.

Shukrana hai bhakti ka saatvaan aur sabse gehra rangg,
Is rangg kee raunak kabhi na honei paaye bhangg,
Shukrana hee baaki har rangg ko indradhanush mein rakhta hai jod kar,
Varna zindagi ke utaar chadhaav mein kitne bhakt jaate hain is dar ko chod kar.

Jis bhakt par chadha ho Shukrana ka rangg,
Veh jeeta hai hokar Guruji kee mahima mein malang,
Veh Guruji kee har meharbaani kee karta hai kadar,
Aur uske chehre aur charitra par hota hai Guruji ke noor ka asar.

Prem aur shraddha se seench kar bhakti ko,
Uska poshan karein sewa simran aur satsang se,
Samarpan se bhakti ka maan badhaayein,
Shukrana roopi sundar suman se bhakti ko sajaayein.

Aur buss phir bhakti mein magn hokar,
Guruji ko hum yaad karein,
Bhakti ke is indradhanush se,
Mann roopi akash ko aabaad karein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 29, 2021

Om Namaha Shivaya
Aaj Ka Suvichaar 🙏🏻🙏🏻 # 1135

Pyaare Parwardigaar Hamaare

Poojya Guruji, samajh leejiye isey Aap hamaari aas,
Ya isey maan leejiye hamaari ardaas,
Hamein Apne se duur kabhi na karna,
Hum kaheen ke na reh jaayenge varna.

Samajh leejiye isey hamaara Aap par vishwaas,
Ya isey maan leejiye Aapko khush karne ka hamaara prayaas,
Aapke dar ke alaawa sooojhta hee nahin koi aur dar,
Duur ho gaya hai bin murshid aur bin Khuda ke jeevan jeene ka darr.

Kyunki Aap mein hee murshid hai hammara,
Aap mein hee baste Hain hamaare Khuda,
Aap mein hee mata, pita, maargdarshak,
Aur Veh meet, jo kabhi na hoga juda.

Isliye samajh leejiye isey hamaari khudgarzi,
Ya phir hamaari guzaarish manvaane kee Aapse kee gayi arzi,
Rehne dena sadaa hamein Apni sharan mein,
Abb toh jeena marna ho buss Aapke charan mein.

Aap hee Hain hamaare har din ke sooraj,
Aap hee Hain disha dikhaane wale Dhruv ke taare,
Isliye aye Maalik, aye pyaare Parwardigaar hamaare,
Hum toh is paar bhi, aur uss paar bhi Hain buss Aapke sahaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 28, 2021

Om Namaha Shivaya
Aaj Ka Suvichaar 🙏🏻🙏🏻 # 1134

           Naya Jeevan

Pyaare Guruji,

Aap jeevan mein aaye mere,
Toh jaise isee jeevan mein hee ek naya jeevan mil gaya,
Mere mann ke niraash konei mein,
Asha ka suman nikhar kar khil gaya.

Aapki divyata kee khushboo se veh suman mehekne lagaa,
Mann ke aangan mein vipultaa ka vihang chehekne lagaa,
Aapke ashirwaad se har kamee ko mila santushti ka saahil,
Isliye jeevan mein paripoornataa hui haasil.

Honhaari se mehnat karne kee dete Hain Aap prerna,
Aapke siwa kisee aur se ummeed na rakhne kee dete Hain Aap chetna,
Toot-te taaron ko dekh kar kuch maangne kee zaroorat nahin,
Aapke sangg honei se jo bhi chahiye veh Aap denge agar vo hoga sahi.

Andhere se abb lagta nahin hai darr
Kyunki ekant chaahe ho, akelapann nahin
Dekhti hoon jis dwaar par, jis dar par,
Aap nazar aate Hain vaheen.

Aapke pyaar ne, Aapke protsaahan ne,
Dikhaayee hai jo kendrit disha,
Uspar chalne se itihaas bann gayi hai,
Dharma-sankat kee dhundh kee nisha.

Shukriya Aapka ki Apna naam dekar dvij banaaya hai Aapne,
Naya jeevan dekar janma- janmaantar ke liye karzdaar banaaya hai Aapne,
Yeh kshamtaa nahin mujhme ki mai kabhi bhi Aapka karz chukaa sakoon,
Kripa keejiye aisee ki har pal achche se apna har farz nibhaa sakoon.

Dhundhli nisha ko sunehra spasht savera dikhaane ka Shukrana,
Mere antar-mann mein Apna ruhaani basera sajaane ka Shukrana,
Meri har galati, har gunah ko bisaarne ka Shukrana,
Mujhe naya jeevan dekar is jeevan ko nikhaarne ka Shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 27, 2021

Om Namaha Shivaya
Aaj Ka Suvichaar 🙏🏻🙏🏻 # 1133

  Aayi Aayi, Holi Aayi

Phaalgun ke maheene kee poornima hai aayi,
Apne Sangg holi ka parv hai laayi,
Rangon ka tyohaar hai aaya,
Kisee ne rang phenka toh kisee ne dhol bajaaya.

Pauraanik kathaayein ho gayin praacheen,
Lekin aaj bhi suni aur sunaayee jaati hain,
Aise hee holi ke sambandh mein,
Holika se judi kathaayein yaad aati hain.

Hiranyaaksh ko maara Vishnu Bhagwaan ne,
Toh uske bhraata Hiranyakashipu ne tapasya kee bhaari,
Brahma ji ko jabb usne prasann kiya,
Toh aayi uske vardaan maangne kee baari.

Vardaan maanga Hiranyakashipu ne itna uljhaa hua,
Ki Brahma ke paas thaa hee nahin upaay suljhaa hua,
Brahma ko vardaan dena pada,
Aur phir Hiranyakashipu saatvein aasmaan par chadhaa.

Brahma se mila usey yeh vardaan,
Ki na maar sakega usey pashu aur na maar sakega insaan,
Na maara jaayega veh din mein aur na raat mein,
Aur bahut chaalaaki thi uskee har baat mein.

Koi shastra na maar paayega usey, na baahar na andar ghar ke,
Yeh bhi maanga usne Brahma ke dar pe,
Na zameen par maara jaayega na vaayu mein,
Yeh maang kar usne suraksha paa lee apni aayu mein.

Veh khud ko samajh baitha Bhagwaan,
Aur jabb Vishnu kee pooja karne lagi uskee santaan,
Toh usne krodh se apni santaan, Prahlaad ko dhikkaara,
Lekin Prahlad ka toh thaa hee nahin Vishnu kee pooja ke bina guzaara.

Holika kee goad mein Prahlad ko agni mein baithakar,
Hiranyakashipu ne apne putr ko chaaha jalaana,
Lekin Prahlad Vishnu ka naam leta raha, Aakhir veh thaa Unn ka bhakt aur deewaana.

Prahlad kee shraddha aur bhakti rangg laayi,
Aur jeet gayi achchaayee,
Holika uss agni mein jal gayi,
Aur Prahlad kee maut tal gayi.

Guruji kee kripa se hum par bhi chadh jaaye,
Rangg achchaayee aur sachchaayee ka,
Hamaari shraddha aur bhakti bhi badh jaaye,
Nasha ho jaaye hamein Guruji kee vadiyaayee ka.

Guruji, chadhaa deejiye hum par sewa ka rangg,
Jismein mishrit ho Satsang kee umangg,
Rangg jaayein Aapke simran ke gulaal mein,
Jis haal mein Aap rakhein, hum khush rahein uss haal mein.

Aapke rangg mein rangg jaayein sadaa ke liye,
Aur yeh rangg kabhi utarne na paaye,
Jaan bhi chali jaaye agar hamaari,
Toh bhi atma Aapke rangg mein rangi reh jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 26, 2021

Om Namaha Shivaya
Aaj Ka Suvichaar 🙏🏻🙏🏻 # 1132

        Sarhad Par

Upvan aur vann kee sarhad par veh khada thaa,
Uske saamne usee ka shareer nidhaal pada thaa,
Adbhut sa ehsaas thaa,
Aur koi na paas thaa.

Ya phir usey yoon lagaa ki veh thaa akela,
Lekin darasal yeh mauka thaa suhela,
Kyunki usey Guruji kee khushboo aayee,
Aur Unkee divya chhavi dee dikhaayee.

Ruhaani see anubhooti thi,
Jismein Guruji kee vibhuti thee,
Unkee vadiyaayee ke noor kee kanti thi,
Aur atma ko mehsoos ho rahi shanti thi.

Haan, usee atma ko, jo dekh rahi thi sarhad par dharey shareer ko,
Aur Guruji ke saameepya hetu nihaar rahi thi apni taqdeer ko.
Na koi duvidha, na dard, na dukh,
Na garm, na sard, kewal sukh hee sukh.

Vayumandal mein Guruji kee divyata ka thaa spandan,
Pheeka lagg raha thaa chandan ke vann ka chandan,
Pheeki lagg rahi thi upvan ke phoolon kee khushboo,
Kyunki Guruji ke spandan se mehek rahi thi rooh.

Yeh adhyatmik anubhav thaa itna suhaana aur prabal,
Ki ehsaas na hua ki beet gaye usmein itne pal,
Uss avastha mein Guruji ne rakha Apni ichchaa ke anusaar,
Aur phir shareer mein lauta diya dekar bahut saara pyaar.

Shareer mein jaan aayee toh jaana,
Ki upvan aur vann toh hain mann kee dhaarna,
Upvan mein hee vann bhi samaaya hai,
Aur vann mein bhi upvan kee chhaaya hai.

Is chhaaya ke liye dhoop ka hona bhi zaroori hai,
Varna astitva hee na hoga chhaaya ka,
Shaayad is adhyatmik anubhav ke bina yeh samajh na aata,
Shaayad uske mann ka yeh duvidha bhara vichaar na sulajh paata.

Kaaran Guruji ko maalum hai,
Usey tasalli thi is baat kee,
Guruji ne anubhav ka avsar diya,
Usey khushi thi is saugat kee.

Upvan aur vann dono ka hona,
Aawashyak hai jeevan mein,
Sahi mainey mein dekho aur socho,
Toh dono hee hain hamaare mann mein.

Jisko seenchega neeyat aur niyati ka neer,
Usee se banegi hamaari taqdeer,
Guruji kee tasveer ho jis shareer mein basee atma mein,
Uska ek din awashya vilay hoga Paramatama mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 25, 2021

Om Namaha Shivaya
Aaj Ka Suvichaar 🙏🏻🙏🏻 # 1131

Mann Kee Yuddh Bhoomi

Raahi ke mann kee yuddh bhoomi mein,
Dharma sankat kee mushkil thi aan padee,
Maansik roag ko aur chintajanak banaane,
Uspar mano-vikaar ke roag kee chaadar jaa chadhee.

Aaspaas thaa kalyuga ka kohra,
Isliye dikh nahin raha thaa kuch bhi saaf,
Bheetar ke dvandva mein,
Kisee bhi paksh ko na kar sak raha thaa veh maaf.
Isee duvidha mein jeeye jaa raha thaa,
Kisee se bhi usne kuch na kaha thaa.

Bhool gaya thaa ki zindagi hai pal do pal ka safar,
Guruji ka simran karna bhi chod diya thaa,
Kalyugi hawaa ka hua thaa uspar aisa asar,
Ki Guruji se toh usne muh hee moad liya thaa.

Jabb se uska zameer thaa soya,
Usne itna kuch thaa khoya,
Dhan daulat aur roab se veh bigad gaya,
Uskee maasumiyat ka bhola ankur ujad gaya.

Dil aur dimaag kee bhi ladaayee hoti rehti thi,
Mann manmaani karna chaahta thaa aur atma chetna kee baat kehti thi.
Guruji kee baatein aati thein yaad,
Lekin bhool jaata thaa unhe kuch hee pal ke baad.

Mushkil ho gaya uske shareer ka bhi kaam karna,
Aur uss se bhi zyada mushkil ho gaya uska aaraam karna,
Na veh idhar ka raha, na veh raha udhar ka,
Tabb ek awaaz ne usey jhanjhod kar kaha,“Abb toh tu sudhar ja.”

Saamne dekha toh aayiney mein usey dikha apna chehra,
Uska apna anta-karan de raha thaa uspar pehra,
Aankhein bandd keen usne toh dikhi usey Guruji kee sowmya soorat,
Aur usne thaana ki yahee hai kaaya palatne ka mahoorat.

Guruji kee kripa se aa gayi jaagriti,
Sanvarne lagi uske charitr kee aakriti,
Vikaar honei lagey kumm,
Chetna mein aane lagaa dumm.

Guruji se judne ke mahatva ka hua usey ehsaas,
Aur logon se judne ka chod diya usne prayaas,
Saamanjasya ka farz pehle jaise apni oar se bakhoobi nibhaaya,
Guruji ko usmein hua parivartan nazar aaya.

Yuddh bhoomi mein hui shaanti,
Jabb vahaan chhaa gayi Guruji kee kaanti,
Guruji ne parakh lee uskee neeyat,
Aur dobara likh di uskee niyati kee vasiyat.

Hum sabb ke bheetar bhi shaayad hota ho aisa koi yuddh,
Kyun na Guruji kee dee hui prerna se hum karein uss bhoomi ko shuddh,
Hum shraddha se sudhaar ka prayatna karenge,
Toh Guruji ko veh sachchaa lagega,
Aur hamaara sachcha prayaas dekhkar,
Unhe kitna achchaa lagega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 24, 2021

Om Namaha Shivaya
Aaj Ka Suvichaar 🙏🏻🙏🏻 # 1130

Guruji Kee Sharan Mein Basera

Jiska Guruji kee sharan mein ho basera,
Uske liye toh andhere mein bhi ho jaata hai savera,
Uskee raah toh Guruji ke noor se ujjwal rehti hai,
Uske dil mein utsaah kee umang har pal behti hai.

Kabhi kabhi waqt ke tanaav ka shor ooncha honei se,
Behte utsaah ka shaayad kum ho jaata hai ehsaas,
Lekin mann kee aankhon se dekhenge toh,
Guruji nazar aayenge apne bilkul paas.

Buss, is se zyada kya chahiye,
Ki Guruji sadaa Hain saath,
Ye saath janam janam ka hai,
Ye hai bilkul pakki baat.

Jabb is baat mein sanshay nahin,
Toh phir kaisa ghabraana,
Jabb Guruji ko apna maana hai,
Toh phir kaisa hichkichaana.

Jisko Guruji de dete Hain ashirwaad,
Uske liye har pal bann jaata hai prasad,
Uska antar-mann hota hai Unke jazbaat se aabaad,
Usey Guruji hee karte Hain karmic bandhanon se azaad.

Apni taraf se sarv samarpan karna zaroori hai,
Chaahe marzi se karein ya isliye kee mukti paane ke liye majboori hai,
Kyunki agar Guruji ke vash mein hogi poori tarehn se jeevan kee naiya kee patvaar,
Toh Guruji Apne nazariye se karaayenge naiya ka beda paar,
Aur Unka sahaara dikhaayega jo saahil,
Hamein vaheen hoga sachcha sukh haasil.

Isliye Guruji kee sharan mein karte huey basera,
Bhool jaayein kya tera hai aur kya mera,
Jaanein aur maanein jagg ko Ishwar ka banaaya dera,
Shukrana karte huey dekhein hum har savera.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 23, 2021

Om Namaha Shivaya
Aaj Ka Suvichaar 🙏🏻🙏🏻 # 1129

              Aap Hee Sarvesh Hain

Pyaare Guruji,

Hum sab insaan hain naadaan,
Aap Hain MahaShiv Bhagwaan,
Aap hee keejiye uddhaar,
Aap hee sanvaariye sansaar.

Mahamaari, beemari, laachaari,
In mein raahat deejiye Prabhu,
Har insaan ke dil mein dooje ke liye,
Bhale kee chaahat deejiye Prabhu.

Bahut zaroorat hai bhaav kee shuddhi kee,
Bahut aawashyakta hai kalyaankaari buddhi kee,
Taaki sadbhaav kee sugandh ho vaataavaran mein,
Aur mann bhaari na ho janam ya maran mein.

Guruji, hamein sahi disha dikhaayee hai Aapne,
Uspar chalne kee sumat bakhshiye daata,
Sansaar ke uddhaar mein na ho vilamb,
Apni mehar se keejiye uddhaar ka aarambh.

Jo pal Aapko lagey sahi, uchit hoga vahee pal,
Uskee intazaar mein bitaa denge hum uss se pehle waale pal,
Jinhe jaagriti aa gayi hai, Unhe aagey badhte rehne ka deejiye ashirwaad,
Aur jo abb bhi agyaan kee neend soye hain, Unhe deejiye chetna roopi prasad.

Hum Kartikeya ya Ganesh ke aagey toh bilkul tuchh hain,
Par hum bhi Aapke bachche hain, isliye rishte mein Aapke kuch hain
Aap toh dariyadil dayalu Dhanadeep Devesh Hain,
Hamaare liye Aap hee naath aur Aap hee Sarvesh Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 22, 2021

Om Namaha Shivaya
Aaj Ka Suvichaar 🙏🏻🙏🏻 # 1128

       Tumhaare Haq Se Bhi Zyada

Agar lagey kabhi bhi tumhe,
Ki kismat nahin de rahi saath,
Toh yaad dilaa dena khud ko,
Ki Guruji ne thaama hai tumhaara haath.

Kismat toh khud hee tarse,
Ki Guruji kee mehar uspar barse,
Isliye dekhkar tumhaare haath ko Guruji ke haath mein,
Kismat toh khud bakhud chal padegi tumhaare saath mein.

Isliye bilkul bhi ghabraao nahin,
Bilkul bhi hichkichaao nahin,
Buss Guruji kee mazboot pakad se apne saahas ko badhaao,
Aur kismat ke sanvarte rangg ko sajaao.

Guruji toh ek pal mein vo kar sakte Hain,
Jo namumkin hai janm janmaantar mein bhi hona,
Kismat ke khotey ya zung lagey sikke ko bhi,
Guruji palak jhapakte hee banaa sakte Hain sona.

Isliye jabb tak hai Guruji ka saath,
Jabb takk Unke haath ne pakda hai tumhaara haath,
Tabb takk kismat bhi karegi tumhaari khidamat,
Aur aaj nahin toh kal usey aa jaayegi sumat.

Phir dekhte huey Guruji ke haath mein tumhaara haath,
Veh bhi ho jaayegi tumhaare saath,
Karam aur niyati ka hisaab karenge Guruji, tumhaare naath,
Aur tumhaare haq se bhi zyada behtar banaayenge tumhaari har bigdi baat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja