Month: March 2021

March 21, 2021

Om Namaha Shivaya
Aaj Ka Suvichaar 🙏🏻🙏🏻 # 1127

    Tanhaayee Mein Shehnaayee

Kalyuga kee is bheed mein,
Jabb ehsaas hota hai tanhaayee ka,
Tabb dil ko bahut sahaara deta hai,
Ehsaas Guruji kee vadiyaayee ka.

Ek Guruji hee Hain jo dil kee vyatha ko samajhte Hain,
Guruji kee kripa se uljhe huey maajre sulajhte hain,
Ek Ve hee Hain jo andhere mein ujaala laate Hain,
Jabb sab mujhe bhool jaate hain, Guruji tabb bhi mujhe bulaate Hain.

Phir jabb tanhaayee mehsoos hoti hai,
Aur aankh Guruji ke deedar ke liye roti hai,
Aise mein Guruji ka simran hee bachaata hai,
Aur Unka naam Unke kareeb laata hai.

Insaan hoon, naadaan si,
Agyaani hoon, anjaan si,
Kayiyon ke jaise hoon is ruhaani safar mein,
Guruji hee sambhaal rahe Hain har din kee guzar basar mein.

Guruji kee sharan mein udaasi kee gunjaaish nahin,
Lekin kabhi kabhi niraasha ho jaati hai kyunki hum insaan hain,
Bhool jaate hain hum ki yeh toh buss ek pehlu hai safar ka,
Guruji ko hee anjaam maalum hai is dagar ka.

Guruji kee mehar har pal baras rahi hai,
Swayam ko yahee hai yaad dilaana,
Jitna ho sakey simran karna hai,
Vahee kaam aayega jabb yahaan se hongei ravaana.

Simran karte karte goonjne lagegi,
Mann mein Guruji ke naam kee shehnaayee,
Aur Guruji kee kripa se isee prayaas se,
Duur ho jaayegi dil kee tanhaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 20, 2021

Om Namaha Shivaya
Aaj Ka Suvichaar 🙏🏻🙏🏻 # 1126

Vo Hai Pyaare Guruji Ka Dar

Jahaan koi shart nahin hai pyaar mein,
Jahaan ek priya rishta hai ikraar mein,
Koi vehem nahin hai vandan mein,
Koi kayda kaanoon nahin hai chintan mein,
Jahaan bin boley hee sunvaayee hoti hai,
Jahaan har bhakt kee bhalaayee hoti hai,
Jahaan milta hai ashirwaad ka var,
Vo hai pyaare Guruji ka dar.

Jahaan mann shaant hota hai Gurbani ke shravan se,
Jahaan dheeraj badhta hai dhyan aur manan se,
Jahaan dil ko sukoon milta hai charan ke naman se,
Jahaan maangne kee nahin hai zaroorat,
Jahaan har pal har din hai ek shubh mahoorat,
Jahaan daras deti hai mamta kee manoram moorat,
Jahaan khud hee jhuk jaata hai sir,
Vo hai pyaare Guruji ka dar.

Jahaan satsang mein mann lagg jaata hai,
Jahaan mann pehle se kumm ghabraata hai,
Jahaan ruhaaniyat ka raasta dikh jaata hai,
Jahaan har bhakt seedhi taar joad paata hai,
Jahaan ujjwal hoti hai jeevan kee raah,
Jahaan umadta hai ek anokha utsaah,
Jahaan ashish se jholi jaati hai bhar,
Vo hai pyaare Guruji ka dar.

Jahaan aakar tamanna nahin hoti kaheen aur jaane kee,
Jahaan fikr nahin karni padti bilkul bhi zamaane kee,
Jahaan ichchaa hoti hai baar baar aane kee,
Jahaan aakar kabhi zaroorat nahin hoti pachtaane kee,
Jahaan agyan ka timir khatm ho jaata hai,
Jahaan chetna ka sooraj uday ho paata hai,
Jahaan divya noor mein Ishwar aate Hain nazar,
Vo hai pyaare Guruji ka dar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 19, 2021

Om Namaha Shivaya

Aaj Ka Suvichaar 🙏🏻🙏🏻 # 1125

                      Badalte Haalaat

Kitna badla badla sa hoga ye jahaan,

Jabb is mahamaari ko alvida kahega,

Kisee kisee ko dekhkar khushi hogi,

Aur kisee kisee ko yaad kar ke aansoo bahega.

Kyunki kitnon kee jaan le chuki hai ye mahamaari,

Aur aagey bhi shaayad legi,

Aise mein kewal ruhaani shakti hee,

Dil ko saantvanaa degi.

Vaise bhi badal raha hai itna kuch har pal,

Kal nahin thaa aaj ke jaisa, aur aaj jaisa na hoga kal,

Kuch na kuch toh badalta hee hai, chaahe hamein maalum chale ya nahin,

Maan lein ki niyati aur karam ke anusaar ho raha hai sabb sahi.

Karam aur niyati ke beech mein hastakshep karna,

Kewal Guruji ka adhikaar hai aur Unkee hee kaabiliyat,

Vahee nirdhaarit karte hain jeena aur marna,

Aur Ve hee lekha phir likh sakte Hain, ye bhi hai hakeekat.

Guruji kee sharan mein rehkar badh jaati hai ruhaani shakti,

Aur samarpan ke dwaara sweekriti ka saahas deti hai bhakti,

Sweekriti badalte haalaaton kee,

Sweekriti chhoti aur badi baaton kee.

Guruji, aisee kripa keejiye sabpar,

Ki Aap mein gehri hoti jaaye hamaari bhakti,

Burey haalaat mein sabr aur achche haalaat mein neevenpann kee,

Aapke naam kee bhakti hee hai ek maatra yukti.

Jaise bhi hon haalaat,

Buss, Aap har pal rehna hamaare saath,

Aapka sanaatan saath,

Hai bhakton ke liye sabse badi daat.

Aapki is daat se Daata,

Juda rahega sadaa Aapse naata,

Chaahe haalaat ho jaise shaant samundar,

Ya ho jaaye jaise jwaar bhaata.

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

March 18, 2021

Om Namaha Shivaya
Aaj Ka Suvichaar 🙏🏻🙏🏻 # 1124

           Jeevan Safal Ho Jaaye

Mere pyaare Guruji,

Aapki mahima ke geet mai gaati rahoon,
Aapke divya roop ko saraahti rahoon,
Aapko mann mandir mein nihaarti rahoon,
Toh jeevan safal ho jaaye.

Aapse mai har baat karoon,
Aapse baat din raat karoon,
Aapke hotey huey na mai kisee se daroon,
Toh jeevan safal ho jaaye.

Aapke baare mein sochti rahoon,
Aapki honei ke liye kuch bhi sahoon,
Aapke prem ke bhaav mein bahoon,
Toh jeevan safal ho jaaye.

Aapki muskaan ko dekh kar muskuraaoon,
Aapke aadar mein sees jhukaaon,
Aapki baatein sabko bataaoon,
Toh jeevan safal ho jaaye.

Aapke darbar ko pyaar se sajaaoon,
Aapke satsang sunoon aur sunaaoon,
Aapko mai kabhi bhi na bhool paaoon,
Toh jeevan safal ho jaaye.

Aapke charnon mein naman karoon,
Aapke vachanon ka manan karoon,
Aapki baani ka shravan karoon,
Toh jeevan safal ho jaaye.

Aapka diya prasad khaaoon,
Har pal Aapka ashirwaad paaoon,
Aapko har pal sangg mai paaoon,
Toh jeevan safal ho jaaye.

Aap par mai vaari jaaoon,
Aapki divyata mein mai kho jaaoon?
Antt vele mein Aapki goad mein mai so paaoon,
Toh jeevan safal ho jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 17, 2021

Om Namaha Shivaya
Aaj Ka Suvichaar 🙏🏻🙏🏻 # 1123

            Sabse Shubh Mahoorat

Brahma Vishnu aur Shiv Bhagwaan,
Hai in teenon ka itna oonchaa sthaan,
Aur Guruji kehte Hain ki Ve MahaShiv Hain,
Isliye Ve divyata mein bhi sabse adhik divya Hain.

Saare devi devta,
Guruji mein samaaye Hain,
Anek bhakton ne Guruji mein,
Apne kul devi devta ke darshan paayein Hain.

Vrindavan ke Krishna hon,
Ya ho Pahaadon wali Mata Rani,
Guruji ne inke roop mein darshan dekar,
Kitnon kee dhanya kee hai zindagaani.

Kisee ko dikhein Sai Baba ya Baba Nanak Unmein,
Toh koi dekhkar Isa Masih rahe Unkee hee dhun mein,
Roop badalne se koi fark nahin padta Unke kisee bhi divya gunn mein,
Isliye Guruji ke saare bhakt rehne lagte hain buss Guruji kee hee dhun mein.

Guruji ke sangg hai jo yeh ruhaani safar,
Ismein Guruji hee Guruji har oar aate Hain nazar,
Udhar bhi aur idhar bhi,
Baahar bhi aur bheetar bhi.

Jaise jaise Guruji ke simran se,
Dheere dheere dhyan lagna shuru ho jaata hai,
Vaise vaise Guruji ka divya noor,
Divya prakash ke roop mein nazar aane lagg jaata hai.

Kaha hai yeh bhi Guruji ne hee,
Ki Ve punj Hain divya prakash ka,
Yeh prakash sanaatan aur anant hai,
Aur iske dwara dil mein jalne wali jyot akhand hai.

Bhaagyashaali hain hum ki hum hain MahaShiv kee sharan mein,
Abb yahaan se kaheen aur jaane kee nahin chaahat ya zaroorat,
Jis pal Guruji ne hamein thaa sweekaara,
Veh thaa hamaare jeevan ka sabse shubh mahoorat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 16, 2021

Om Namaha Shivaya
Aaj Ka Suvichaar 🙏🏻🙏🏻 # 1122

      Kaheen Khushi Kaheen Gumm

Kaheen khushi kaheen gumm,
Kaise phans gaye hain hum,
Is zindagi ke bedard jaal mein,
Jeena padega chahey ho jis haal mein.

Ek taraf maut ka saya chhaa raha hai,
Doosri taraf kisee aur ka janamdin aa raha hai,
Yahi toh duniya ka a-jab sa mela hai,
Sab hain magar phir bhi har koi akela hai.
Khaali haath aaye khaali haath jaana hai
Phir kyun itna khudgarz ye zamaanaa hai?

Is Kalyuga mein aise har khayaal se duur rehne ka hai ek upaay,
Guruji ka simran karo, veh har niraashajanak vichaar se bachaay.
Aur agar mann mein koi aisee soch aa bhi jaaye,
Toh simran karne se niraasha nakaraatmakta na bann paaye.

Simran karte karte dhyan badhne lagega,
Niraasha par asha ka noor chadhne lagega,
Guruji kee aseem kripa ke dwaara,
Aashawaadi hoti jaayegi vichaaradhaara.

Sukh dukh ke lamhe
Dhoop chhaaon bannkar aayenge,
Guruji ke ashirwaad ke moti
Sadaa apni chamak dikhaayenge.

Mushkilein aur chunautiyaan toh shaayad poori tarehn se saath nahin chodengi,
Lekin ye bhi nishchit hai ki Guruji ke hastkshep kee leelaayein muh nahin modengi,
Aur Unke anugraha se sakaaraatmak hota jaayega nazariya,
Toh Unke divya saath ke sangg tayy ho jaayegi jeevan kee ye dagariya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 15, 2021

Om Namaha Shivaya
Aaj Ka Suvichaar 🙏🏻🙏🏻 # 1121

              Ichchaaon Ka Beej

Jabb maanav ne ichchaaon ka beej boya,
Usee pal se maanav ne apni santushti ko khoya,
Kyunki uss beej se upjaa jo paudha,
Usey seenchta hai paani ke bajaay sauda.

Isliye bujhti hee nahin hai pyaas,
Aur itna kuch hotey huey bhi kuch nahin aata hai raas,
Paudhe ke phal mein neeras si khattaayee hai,
Aur phal mein ichchaaon aur lobh kee gandh samaayee hai.

Lobh aur ichchaa, aur bhi zyaada paane kee,
Lobh aur ichchaa, ikaththaa karte jaane kee.
Na jaane kahaan ye sab lekar jaayenge,
Ye laukik padaarth vahaan toh kaam hee nahin aayenge.

Vahaan jaane kee agya kewal atma ko hai mil paati,
Vahaan cheezein ya vastuyein saath nahin hain jaati,
Vahaan inkee koi zaroorat nahin hai,
Vahaan inkee koi chaahat bhi nahin hai.

Lekin agar in sab mein moh ho gaya,
Toh hoga mushkil unhe chod kar jaana,
Isee moh kee vajeh se phir,
Yahaan vaapis padega aana.

Khud hee apni atma ko hum,
Janam maran ke chakkar mein phansaayenge,
Toh jis moksh kee hum baat karte hain,
Veh moksh hum kaise paayenge?

Karte huey Guruji kee bhakti,
Seekh jaayein hum anaasakti,
Taaki moh maya mein phansne se bach paayein,
Aur jaate samay inse mukt ho jaayein.

Jabb takk veh Paramatama se na mil jaaye,
Atma ko aagey ke safar mein aasaani hogi,
Agar hum atma kee oar apna farz na nibhaayein,
Toh phir veh toh hamaari naadaani hogi.

Jeevan mein uchch honei kee rakhein humbabhilaasha,
Lekin na banaayein swayam ko laukikta ke liye itna pyaasa,
Karein hum saarthak anaasakti kee paribhaasha,
Aur bhautikvaad par na ashrit karein apni khushi aur asha.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 14, 2021

Om Namaha Shivaya
Aaj Ka Suvichaar 🙏🏻🙏🏻 # 1120

     Guruji Ke Gunon Ka Bakhaan

Guruji ke saare gunon ka bakhaan kar sakoon,
Itnee kaabiliyat mujh mein kahaan,
Unkee kripa se Unse jude rishte kee wafa nibhaakar,
Jahaan Ve le jaayein, mai toh buss chal doon vahaan.

Kisee bhi Shabdkosh mein nahin hain itne shabd,
Ki Guruji kee mahima ka ho sakey poora bakhaan,
Yeh toh shabdon ke sangg ehsaas ka ek naata hai,
Jis se Unhe mehsoos kar sakta hai insaan.

Ehsaas Unkee kshamta ka,
Ehsaas Unkee mamta ka,
Ehsaas Unke Ishwaratva mein basee saralta ka,
Ehsaas Unke Devatva mein basee komaltaa ka.

Ehsaas Unke bolne ke andaaz ka,
Ehsaas Unkee chuppi ke raaz ka,
Ehsaas Unke tej kee taralta ka,
Ehsaas Unke noor kee nirmaltaa ka.

Ehsaas Ki Ve Hain paalanhaar,
Ehsaas ki Ve Hain taaranhaar,
Ehsaas Unke saundarya ka,
Ehsaas Unke aishwarya ka.

Pyaaron mein Hain sabse pyaare,
Nyaaron mein Hain sabse nyaare,
Komal Hain aur Hain kripalu,
Daata Hain sabke aur Hain bade dayalu.

Chhalkaayein hum par itna nirmal bhaav,
Ki bhar jaaye gehre se gehra ghaav,
Marham baney Unkee mamta,
Himmat de Unkee kshamtaa.

Ye jo jeevan Guruji ne hai bakhsha,
Is jeevan kee Ve hee karte Hain raksha,
Har chhoti aur har badi baat kee,
Har pal kee, har din aur har raat kee.

Guruji ka jo sabke liye paawan pyaar hai,
Is pyaar se hee chal raha sansaar hai,
Mai nahin jaanti swarg kaisa hota hai,
Meri jannat toh mere Guruji ka dwaar hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 13, 2021

Om Namaha Shivaya
Aaj Ka Suvichaar 🙏🏻🙏🏻 # 1119

Zindagi Lambi Hogi Ya Hogi Chhoti

Zindagi ko chhoti samjhein,
Toh veh itnee chhoti toh nahin,
Aur lambi kahein toh phir lagta hai,
Ki itnee lambee bhi nahin.

Khuda ne har praani ko Apne hisaab se dee hai umr sahi,
Lajawaab hai Khuda ka hisaab,
Hisaab karmon ka aur lamhon ka,
Hisaab unke phalne ka ya phir talne ka.

Yeh toh bahut shukr hai,
Ki Guruji ne liye hai hamein Apni sharan mein,
Varna toh jaan vaise hee nikal jaati
Is janam aur pichhle janmon ke hisaab aur karam mein

Guruji se zyada behtar nahin ho sakta koi bhi lekhaapaal,
Kyunki Ve samajhte Hain hum sabke karmon ka jo hai jaal,
Ve toh jaante Hain hamaari asaliyat aur hamaara haal,
Aur jaante Hain kiske kadmon kee sahi aur kiske kadmon kee galat hai chaal.

Zindagi chhoti hogi ya hogi lambi,
Yeh toh Guruji mein basey MahaShiv hee jaanein,
Hamaari bhalaayee toh isee mein hai,
Ki hum Unka kaha hua har vachan maanein.

Duniya ko rijhaane ke liye nahin,
Balki Guruji ko rijhaane ke liye,
Duniya ko dikhaane ke liye nahin,
Balki Guruji ko apni shraddha dikhaane ke liye.

Ghar aur baahar ke diye toh jal jaayenge iske bina,
Lekin Guruji ko rijhaane se jalenge antar-mann ke diye,
In diyon kee lau hamaare adhyatmik raaste ko karegi ujjwal,
Kaash isee raaste par le jaaye hamaara aane wala har pal.

Jitna ho sakey, karein niswaarth sewa aur simran,
Karte rahein Guruji ka Shukrana aur Unka manan,
“Banda Bann,” paalan karein Unke is aadesh ka,
Aur aadar karein Guruji mein basey huey Sarvesh ka.

Guruji kee mehar se sadupyog karein har kshan ka,
Phir saalon mein gintee ke hisaab se
Umr chhoti ho ya lambi,
Guruji lekha sulajhaakar karenge tayy,
Lekin apni taraf se sudhar jaayein hum bhi.

Jitna samay miley, uska karein sadupyog,
Mauj masti bhi karein aur apne kartavya nibhaayein,
Achcha aur sachcha sochein aur karein,
Aur Guruji ke kahe anusaar hum bande bann jaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 12, 2021

Om Namaha Shivaya
Aaj Ka Suvichaar 🙏🏻🙏🏻 # 1118

            Saalgirah

Is varsh kee MahaShivratri gayi beet,
Sabne gaaye Shivji kee mahima ke geet,
Guruji ke bhakton ne bhi dikhaayee apni preet,
Kyunki Guruji Hain MahaShiv aur Hain sab bhakton ke meet.

Har varsh kee MahaShivratri sadhna karna sikhaati hai,
Bhakton ke mann ke timir ko mitaati hai,
Adhyatmik gyan kee jyot jalaati hai,
Saralta aur saadagi kee raah dikhaati hai.

Is seekh ko yaad rakhna farz hai hamaara,
Kyunki beeta waqt kabhi na aaye phir dobara,
Har MahaShivratri ko maan kar ek imtehaan,
Apni adhyaatmik unnati ko hum anivaarya lein jaan.

Karte rahein sewa, simran, aur dhyan,
Jis se tarr jaayein hamaare praan,
Uchchaaran kar ke mantra jaap ka,
Praayashchitt kar lein hum apne paap ka.

Guruji kee kripa se gyan kee jyot jalti rahegi,
Hamaari bhakti Unkee mehar se phalti rahegi,
Saralta aur saadagi aayegi vyavhaar mein,
Komalta aur nirmaltaa aayegi hamaare vichaar mein.

Jaise Brahmaji aur Vishnuji se huey Shivji prasann,
Vaise hee Guruji karenge hum sabko sampann,
Shuddhi se, subuddhi se,
Bhakti se, shakti se,
In sabke dwaara hum ruhaaniyat kee seedhi chadh paayenge,
Aur Guruji ke dikhaaye raaste par aagey badh paayenge.

Har MahaShivratri ko adhyaatmik unnati ka tyohaar jaankar,
Simran aur dhyan ko anivaarya maankar,
Har din simran mein aur bhi ramte jaayein,
Har MahaShivratri par is unnati kee saalgirah ko hum manaayein.

Din beet-te beet-te beet jaayenge jeevan ke varsh,
Hamaari paawan pragati se Guruji ko hoga harsh,
Aayiye shubh kaam mein na karein koi bhi vilamb,
Apni adhyaatmik unnati kee saalgirah kee tayyaari ka karein aarambh.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja